သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးမှ ဝန်ထမ်းများသည် ၁၄.၁၂.၂၀၂၂ ရက်နေ့တွင် ပြည်နယ်ဦးစီးမှူးရုံး၌ စားသုံးဆီတင်သွင်းသည့်ကုမ္ပဏီများမှ လက်ကားဝယ်ယူပြီး လက်လီလက်ကားပြန်လည်ဖြန့်ဖြူး ရောင်းချနေသော လုပ်ငန်းရှင်နှင့်တွေ့ဆုံဆွေးနွေးခဲ့သည်။

          ထိုသို့ တွေ့ဆုံဆွေးနွေးရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန အနေဖြင့် စားသုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီကို ဖွဲ့စည်းကာ ပြည်ပမှ တင်သွင်းလာသည့် စားသုံးဆီများ သတ်မှတ်အရည်အသွေးစံချိန်စံညွှန်းများနှင့် ပြည့်မီစေရေး၊ စားသုံးသူ ပြည်သူများ ကျန်းမာရေးနှင့်ညီညွတ်သော စားသုံးဆီများကိုသုံးစွဲနိုင်ရေး၊ ဈေးနှုန်းတည်ငြိမ် စွာဖြင့် ဝယ်ယူစားသုံးနိုင်စေရေးတို့အတွက် ကြီးကြပ်ထိန်းကျောင်းဆောင်ရွက်ပေးလျှက်ရှိပါကြောင်း၊ လုပ်ငန်းရှင်များအနေဖြင့်လည်း စားသုံးဆီတင်သွင်းသည့်ကုမ္ပဏီများမှ လက်ကားကုန်သည်များသို့ ဖြန့်ဖြူးထုတ်ပေးခဲ့သည့်စားအုန်းဆီများကို ရန်ကုန်အထိုင်ဈေးရည်ညွှန်းလက်ကားဈေးနှုန်းအပေါ် သယ်ယူပို့ဆောင်ခကုန်ကျစရိတ်များထပ်ပေါင်း၍ ၂ ရာခိုင်နှုန်းအမြတ်ထက် မပိုသောဈေးနှုန်းဖြင့် ဈေးကွက်အတွင်း ပြန်လည်ဖြန့်ဖြူးရောင်းချရန်၊ လက်လီဈေးကွက်အတွင်း ဖြစ်သင့်ဖြစ်ထိုက်သော ဈေးနှုန်းဖြင့်ရောင်းချရန်၊ ဈေးနှုန်းအဆမတန်မြှင့်တင်ရောင်းချခြင်းမပြုရန် ဆွေးနွေးခဲ့ကြောင်း သိရှိရ ပါသည်။

DOCA(မွန်)

        သံလွင်ဆီဆိုသည်မှာ သံလွင်သီးမှရရှိသောအဆီဖြစ်ပြီး သံလွင်ဆီကိုရှေးယခင်ကတည်း ကလူသိများသည်။ သံလွင်ဆီတွင် အဓိကရောနှောနေသော triglyceride အစုအဝေးများဖြစ်သော Oleic acid ,palmitic acidနှင့်Fatty acid များနှင့် ဖွဲ့စည်းထားပါသည်။ လေ့လာစမ်းသပ်မှုများအရ သံလွင်ဆီထဲတွင် monounsaturated fats အများအပြားပါဝင်သော ကြောင့် နှလုံးသွေးကြောကျဉ်းနှင့် နှလုံးအဆီဖုံးရောဂါများကို လျော့ကျစေသည်ဟု သိရပါသည်။ သံလွင်ဆီ ၂၃ဂရမ် နေ့စဉ်စားသုံးပေးခြင်းဖြင့် သံလွင်ဆီသည် နှလုံးကျန်းမာရေးကို ကောင်းမွန်စေသော ကြောင့်ကိုလက်စရောကိုပုံမှန်လည်ပတ်စေပြီး ခန္ဓာကိုယ်အရောင်ကျစေခြင်း ၊ သွေးခဲမှုကိုဆန့်ကျင်ခြင်း ၊ သွေးတိုးရောဂါကိုသက်သာစေခြင်းစသည့် ဂုဏ်သတ္တိများလည်းရှိပါသည်။ အချို့သောလေ့လာမှုများအရ သံလွင်ဆီကို နေ့စဉ်ပုံမှန်သောက်သုံးပေးပါက သွေးလွှတ်ကြောများ၏ နံရံများကို ကျုံ့နိုင်ဆန်နိုင်အားများစေပြီး သွေးလွှတ်ကြောများ၏ stressကို လျော့နည်းစေပါသည်။

        သံလွင်ဆီသည် antioxidantနှင့် ဗီတာမင်Eတို့ ကြွယ်ဝစွာပါဝင်သောကြောင့်အသား အရည်စိုပြည်စေခြင်း အသားအရည်ပြန်လည်ကောင်းမွန်စေခြင်းတို့ကြောင့်ရှေးယခင်က ဂရိအမျိုးသမီးများသည် အလှအပနှင့် ခန္ဓာကိုယ်အတွက် အသုံးပြုခဲ့သည်။  သံလွင်ဆီ၏ကောင်းကျိုးများအရ သံလွင်ဆီကို လိမ်းဆေးအလှဆီအနေဖြင့်လည်း အသုံးပြုလာကြပါသည်။ သံလွင်ဆီတွင် Extra virgin olive oil ဟာအရေပြားကို moisturizing ဂုဏ်သတ္တိပါဝင်သော ကြောင့် အသားအရည်စိုပြေစေပါသည်။ သံလွင်ဆီကို နားအတွင်းပိုင်းသန့်စင်ဖို့အတွက်လည်း အသုံးပြုကြပါသည်။  သံလွင်ဆီကို မျက်နှာနဲ့တခြားခန္ဓာကိုယ်က အမွှေးတွေဖယ်ရှားသုတ်သင်ဖို့အတွက် shaving oil အနေနဲ့လည်းအသုံးပြုနိုင်ပါသည်။ စမ်းသပ်မှုတွေအရ သံလွင်ဆီလိမ်းပေးခြင်းဖြင့် သံလွင်ဆီနဲ့  UVB rays တွေ ထိတွေ့ရင် ကျူမာနဲ့ အရေပြားကင်ဆာတွေကို ကာကွယ်ပေးနိုင်စွမ်းရှိပါသည်။  သံလွင်ဆီသည် အလာ့ဂျစ်ဓာတ်မတည့်မှုများ လုံးဝမဖြစ်စေနိုင်ပါ။သံလွင်ဆီမှာ ဝမ်းပျော့စေတဲ့ laxative ဓာတ်ပါရှိပါသည်။  ထိုအပြင် အူကျုံ့ခြင်းကိုလည်း တားဆီးပေးနိုင်ပါသည်။ သံလွင်ဆီမှာပါတဲ့ဓာတ်သည် အင်ဇိုင်းကို တားဆီးပေးသောဓာတ်လည်း ပါရှိသောကြောင့် ခန္ဓာကိုယ်နာကျင်ကိုက်ခဲမှုကိုလည်း လျော့ကျစေပါသည်။

       သံလွင်ဆီကို ကုန်ကြမ်းအဖြစ်အသုံးပြု၍ ချက်ပြုတ်ခြင်းအလှအပရေးရာ ၊ ဆေးဝါး ထုတ်လုပ်ခြင်း၊ ဆပ်ပြာနဲ့လောင်စာဆီအဖြစ်လည်း အသုံးပြုကြပါသည်။  ကမ္ဘာတဝှမ်းလုံးမှာ သံလွင်ဆီကိုအသုံးပြုကြပြီး အထူးသဖြင့်မြေထဲပင်လယ်၊ အနောက်ဥရောပနှင့် စပိန်နိုင်ငံတို့တွင် အလှအပအတွက်သာမက ကျန်းမာရေးအတွက်ပါ တွင်တွင်ကျယ်ကျယ် အသုံးပြုလာကြပြီး အရှေ့တောင်အာရှနိုင်ငံများတွင်လည်း ယခုနောက်ပိုင်းတွင်ကျယ်ပြန့်ပိုမို အသုံးပြုလာကြပါသည်။

    သံလွင်ဆီမှရရှိသော အိုလစ်အက်ဆစ်အဆီဓာတ်ရာနှုန်း၇၀ကျော်ပါရှိပါသည်။  ထိုအပြင် သံလွင်ဆီသည် အယ်ဇိုင်းမားရောဂါဖြစ်ပွားနှုန်းကိုလျော့နည်းစေပါသည်။ အယ်ဇိုင်းမားရောဂါ သည် ဦးနှောက်နှင့်အာရုံကြောဆဲလ်များထဲတွင် ဘီတာအမိုင်းလွိုက်ဟုခေါ်သော ဓာတ်များစုပုံလာခြင်းကြောင့် ဦးနှောက်ဆဲလ်များ ထိခိုက်လာခြင်းဖြစ်သည်။ သံလွင်ဆီသည် အဆိုပါဓာတ်များကို ဖယ်ရှားပေးနိုင်သောအာနိသင်ရှိပါသည်။  သံလွင်ဆီသည် သွေးတွင်းအချိုဓာတ်ကိုထိန်းညှိပေးနိုင်သောကြောင့် ဆီးချို‌ရောဂါဖြစ်ပွားနိုင်ခြင်းကိုလည်း လျော့ကျစေနိုင်ပါသည်။ ထိုကြောင့် သံလွင်ဆီတွင် ခန္ဓာကိုယ်အတွက် ကောင်းကျိုးများစွာရရှိစေနိုင်သော ဂုဏ်သတ္တိများစွာပါဝင်သောကြောင့် သံလွင်ဆီကို ကျန်းမာရေးအတွက် အသုံးပြုပေးရန်လိုအပ်ကြောင်း သုံးသပ်ရေးသားဖော်ပြလိုက်ရပါသည်။

DOCA(ကယား)

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများကို လျာထားချက်ပြည့်မီကျော်လွန်အောင် ဆောင်ရွက်လျက်ရှိရာစီးပွားရေးလုပ်ငန်းရှင်များ ထုတ်လုပ်သည့် ကုန်စည်များတွင် ကုန်အညွှန်းအမှတ်အသားများ ပြည့်စုံစွာ ထည့်သွင်းဖော်ပြနိုင်ရေးအတွက် ဒီဇင်ဘာလ(၁၂)ရက်နေ့၊ နံနက်(၁၀:၀၀)နာရီအချိန်တွင် ရွှေဘိုခရိုင် စားသုံးသူရေးရာဦးစီးဌာနမှ ဒု-ခရိုင်ဦးစီးမှူး၊ ရွှေဘိုမြို့နယ်တာဝန်ခံနှင့် ထုတ်ကုန်လုံခြုံစိတ်ချရမှုဌာနခွဲ တာဝန်ခံတို့သည် ရွှေဘိုမြို့၊ အမှတ်(၄)ရပ်ကွက်၊ အောင်ဇေယျရပ်ရှိ တီစူး အာလူးကြော်လုပ်ငန်းရှင်နှင့် တွေ့ဆုံဆွေးနွေးခဲ့ပါသည်။

           ထိုသို့တွေ့ဆုံဆွေးနွေးရာတွင်  ဒု-ခရိုင်ဦစီးမှူးမှ စားသုံးသူရေးရာဦးစီးဌာနအနေဖြင့် ထုတ်ကုန်များ လုံခြုံစိတ်ချရမှုရှိစေရေးအတွက် စီးပွားရေးလုပ်ငန်းရှင်များထုတ်လုပ်သည့် ကုန်စည်များပေါ်တွင်စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားများပြည့်စုံစွာဖော်ပြ၍ ထုတ်လုပ်ဖြန့်ဖြူး ရောင်းချကြရန်လိုအပ်ကြောင်း၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ညွှန်ကြားချက်အမှတ်(၁/၂၀၁၉)တွင် ကုန်စည်အုပ်စု(၈)ခု၏ ကုန်စည်အုပ်စုအလိုက် မြန်မာဘာသာဖြင့် ကုန်အညွှန်းအမှတ်အသားဖော်ပြရမည့်အချက်များကို ထုတ်ပြန်ထားကြောင်း၊ အာလူးကြော်သည် ကုန်စည်အုပ်စု(က)အစားအသောက်များထဲမှ အသင့်စားမုန့်အမျိုးမျိုးထဲတွင် ပါဝင်ပြီး ကုန်စည်၏အမျိုးအမည်၊ အသားတင်ပမာဏ၊ ထားသိုသိမ်းဆည်းမှုအညွန်း၊ ဓာတ်မတည့်ကြောင်း ဖော်ပြချက်များကို မြန်မာဘာသာဖြင့် မဖြစ်မနေဖော်ပြရန်လိုအပ်ပြီး မြန်မာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ဖော်ပြနိုင်ကြောင်း၊ ၎င်းအပြင် ကုန်စည်၏တံဆိပ်အမှတ်အသား၊ ထုတ်လုပ်သည့်ရက်စွဲ၊ သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ ပါဝင်ပစ္စည်း၊ ထုတ်လုပ်သည့် လိပ်စာများကို ဖော်ပြရန်လိုအပ်ကြောင်း၊ ကုန်အညွှန်းအမှတ်အသားများကို ပြည့်စုံစွာဖော်ပြ၍ ဌာန၏ အတည်ပြုချက်ရယူရေး ဆောင်ရွက်ရန်လိုအပ်သည့်အကြောင်းများကို ဆွေးနွေးပြီး  မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၁/၂၀၁၉)အားဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)

      စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ဝန်ထမ်းများသည် (၁၃.၁၂.၂၀၂၂) ရက်နေ့၊ နေ့လယ် (၁၃:၀၀) နာရီအချိန်တွင် ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနက ကျင်းပပြုလုပ်သည့်  လူသုံးကုန်ထုတ်လုပ်မှုနည်းပညာသင်တန်းတွင် စားသုံးသူကာကွယ်ရေး အသိပညာပေးဟောပြောပွဲ ကျင်းပပြုလုပ်ခဲ့ရာ  ခရိုင်ပြန်ကြားရေးနှင့် ပြည်သူ့ဆက်ဆံရေး ဦးစီးဌာနမှ အရာထမ်း၊ အမှုထမ်းများ  တက်ရောက်ခဲ့ကြပါသည်။

    ထိုသို့ဆွေးနွေးရာတွင် ခရိုင်ဦးစီးမှူးက စားသုံးသူကာကွယ်ရေးဦးစီးဌာနအကြောင်း၊ စားသုံးသူကာကွယ်ရေးလုပ်ငန်းများ ပေါ်ပေါက်လာရခြင်းအကြောင်း၊ စားသုံးသူကာကွယ်ရေး ဥပဒေပါ စားသုံးသူများ၏ အခွင့်အရေးနှင့်တာဝန်များအကြောင်း၊ စီးပွားရေးလုပ်ငန်းရှင်များ လိုက်နာရမည့် တာဝန်များအကြောင်း၊ စားသုံးသူရေးရာဦးစီးဌာနနှင့် အစားအသောက်နှင့် ဆေးဝါးကွပ်ကဲရေးဦးစီးဌာနတို့၏ ရည်မှန်းချက်၊ မျှော်မှန်းချက်နှင့် လုပ်ဆောင်ချက်များ ကွဲပြားပုံအကြောင်း၊ ပြည်သူများ အနေဖြင့် မိမိတို့ရွေးချယ် အသုံးပြု လိုက်သော ကုန်စည်ကြောင့်ဖြစ်စေ၊ ဝန်ဆောင်မှုကြောင့်ဖြစ်စေ ထိခိုက်နစ်နာမှုများရှိပါက မိမိတို့၏ စားသုံးသူအခွင့်အရေးကို အဆုံးရှုံးမခံဘဲတိုင်ကြားကြစေလိုကြောင်း၊ ပြည်သူအားလုံးကို တိုင်ကြားသည့်အလေ့အကျင့်များ ရှိစေလိုကြောင်း၊ တိုင်ကြားရုံသာမက မိမိတို့ဘက်မှလည်း လိုက်နာရမည့် တာဝန်များကို လိုက်နာကြရန် လိုအပ်ကြောင်း၊ ကုန်စည်(သို့) ဝန်ဆောင်မှုနှင့်ပတ်သက်၍ နစ်နာဆုံးရှုံးမှုများကြောင့် တိုင်ကြားလာသောကိစ္စရပ်များအားလည်း ဌာနမှ ညှိနှိုင်းပေးသဖြင့် အဆင်ပြေသွားသည့် အမှုကိစ္စများ များစွာရှိပါကြောင်း၊ တိုင်ကြားနိုင်သည့် နည်းလမ်းများ၊ တိုင်းဒေသကြီး/ ပြည်နယ်များအလိုက် ဆက်သွယ်နိုင်သည့် ဖုန်းနံပါတ်များ၊ ပြည်သူတိုင်းသည် စားသုံးသူများဖြစ်၍ စားသုံးသူတိုင်းမှာ စားသုံးသူအခွင့်အရေးရှိပါကြောင်း အကျယ်တဝင့်ရှင်းလင်းဟောပြောခြင်းနှင့် စားသုံးသူကာကွယ်ရေးဥပဒေ အခန်း (၁၈)ပါ ကုန်အညွှန်းအမှတ်ဖော်ပြခြင်းများနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ဆောင်ရွက်ရသည်များကို  ရှင်းလင်းဆွေးနွေးခဲ့ရာ  ဝန်ထမ်းများမှ စိတ်ပါဝင်စားစွာဖြင့် သိရှိလိုသည်များကို မေးမြန်းခြင်း၊  ပြန်လည်ဖြေကြားခြင်း၊ လက်ကမ်းစာစောင်များ ဖြန့်ဝေခြင်းများ ပြုလုပ်ခဲ့ကြကြောင်း သိရှိရပါသည်။

DOCA(စစ်ကိုင်း)       

           စားသုံးသူရေးရာဦးစီးဌာန၏ ရည်မှန်းချက်(၃)ချက်အနက် ဒုတိယအချက်ဖြစ်သည့် ထုတ်ကုန် လုံခြုံစိတ်ချရမှုရှိစေရန်အတွက် စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးနှင့် ဝန်ထမ်းများသည် ဒီဇင်ဘာလ ၆ ရက်နေ့က စစ်ကိုင်းမြို့၊ စိန်ကုန်းရပ်ကွက်ရှိ Blue Moon သောက်ရေသန့် ထုတ်လုပ်ဖြန့်ဖြူးရောင်းချသည့်လုပ်ငန်းရှင်နှင့် တွေ့ဆုံခဲ့ပါသည်။

          Blue Moon သောက်ရေသန့်လုပ်ငန်းရှင် ဒေါ်ချောအိထူးနှင့် တွေ့ဆုံ၍ စားသုံးသူကာကွယ် ရေး ဥပဒေအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ပြည့်စုံစွာ မှန်ကန်မှုရှိ /မရှိ၊ ထုတ်ကုန်ပစ္စည်းများကို သန့်ရှင်းသပ်ရပ်စွာထုတ်လုပ်မှုရှိ /မရှိ၊ ကွင်းဆင်း စစ်ဆေးခဲ့ရာ သောက်ရေသန့်ဘူးခွံ၌ အသားတင်အလေးချိန်ကို ဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့မဟုတ်) တစ်ခုထက်ပို၍တွဲလျက်ဖြစ်စေ  ရေးသားဖော်ပြရမည်ဖြစ်ကြောင်း၊ စားသုံးသူများ ဘေးအန္တရာယ် ကင်းရှင်းစေရေးကို အလေးထားဆောင်ရွက်ရန်နှင့် ကုန်ချော (ရေသန့်ဘူး)များ စနစ်တကျ သိုလှောင်ထိန်းသိမ်းရန်နှင့် စားသုံးသူကာကွယ်ရေးဥပဒေအခန်း(၁၀)ပါ စီးပွားရေးလုပ်ငန်းရှင်၏ တာဝန်များကို လိုက်နာဆောင်ရွက်ရန် အသိပညာပေးဆွေးနွေးပြောကြား ခဲ့ကြပါသည်။

DOCA(စစ်ကိုင်း)