သတင်းနှင့် လှုပ်ရှားမှုများ

   ၂၉-၅-၂၀၂၄ ရက်နေ့တွင် စားသုံးသူရေးရာဦးစီးဌာန၊ မော်လမြိုင်မြို့နယ်တာဝန်ခံသည် မြို့နယ်အထွေထွေအုပ်ချုပ်ရေးဦးစီးဌာန၊ ရေကြောင်းရဲတပ်ဖွဲ့၊ ရေနံထွက်ပစ္စည်းကြီးကြပ်စစ်ဆေးရေးဦးစီးဌာန၊ လူဝင်မှုကြီးကြပ်ရေးနှင့် အမျိုးသားမှတ်ပုံတင်ရေးဦးစီးဌာန၊ မီးသတ်တပ်ဖွဲ့ဝင်တို့ပါဝင်သော ပူးပေါင်းစစ်ဆေးရေးအဖွဲ့ဖြင့် မော်လမြိုင်မြို့နယ်အတွင်း စက်သုံးဆီလိုအပ်မှုအတွက် ရန်ကုန်တိုင်းဒေသကြီးမှထွက်ခွာလာပြီး မော်လမြိုင်မြို့၊ မုပွန်ကျောက်ချစခန်းသို့ ဝင်ရောက်လာသည့် MT Denko Princess ဆီတင်သင်္ဘောအားကွင်းဆင်းစစ်ဆေးခဲ့သည်။

    ပူးပေါင်းစစ်ဆေးရေးအဖွဲ့အနေဖြင့် စက်သုံးဆီတင်သင်္ဘောများတွင် တရားမဝင်စက်သုံးဆီများ ဝင်ရောက်မှုမရှိစေရေးအတွက် သက်ဆိုင်ရာကြီးကြပ်အဖွဲ့ဝင်ဌာနများနှင့် ပူးပေါင်းကွင်းဆင်းဆောင်ရွက်ခဲ့ကြောင်း သိရှိရပါသည်။

DOCA(မွန်)

     ၂၇.၅.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ မော်လမြိုင်ခရိုင်၊ မုဒုံမြို့နယ်တာဝန်ခံသည် အမှတ်(၁၉)၊ စမ်းသီတာလမ်း၊ စာစင်အလယ်ပိုင်း၊ မုဒုံမြို့ရှိ "ရွှေလင်းယုန်" အမှတ်တံဆိပ် မုန့်လုပ်ငန်းရှင်နှင့် သွားရောက်၍ တွေ့ဆုံဆွေးနွေးခဲ့ကြောင်း သိရှိရပါသည်။

    ထိုသို့ဆွေးနွေးရာတွင် မုန့်လုပ်ငန်းရှင်မှ တစ်ရက်လျှင် အထုပ်အကြီး/အသေး ၂၀၀၀ ထုပ် ခန့်ထုတ်လုပ်ရရှိပြီး အမျိုးအစား ၂၀ မျိုးခန့်ထုတ်လုပ်ကြောင်း၊ မုဒုံမြို့ပေါ်နှင့် ကျေးရွာများသို့ ဆိုင်ကယ်ဖြင့် လိုက်လံရောင်းချသူများအား လက်ကားရောင်းချပေးရကြောင်း ဆွေးနွေးခဲ့ပြီး မုဒုံမြို့နယ်တာဝန်ခံမှလည်း စားသုံးသူကာကွယ်ရေး ဥပဒေပါ စီးပွားရေးလုပ်ငန်းရှင်တို့၏ တာဝန်များ၊ ကုန်အညွှန်းအမှတ်အသားဖော်ပြမှုဆိုင်ရာ အချက်များ၊ သက်ဆိုင်ရာ ဌာနများ၏ ထောက်ခံချက်များအား ဖော်ပြပေးရန် စသည့်အချက်များအား ဆွေးနွေးခဲ့ကြောင်း သိရှိရပါသည်။

DOCA(မွန်)

       ၂၈.၅.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ ကျိုက်ထိုမြို့နယ် တာဝန်ခံသည် မြို့နယ်အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့၊ ကျန်းမာရေးဌာနတို့နှင့် ပူးပေါင်း၍ ကျိုက်ထိုမြို့နယ်တွင်MSME ချေးငွေထုတ်ချေးခြင်းနှင့် စပ်လျဉ်း၍ ကွင်းဆင်းစစ်ဆေးခြင်းကို ကျိုက်ထိုမြို့နယ်၊ မြောက်ပိုင်းရပ်ကွက် ဗိုလ်ချုပ်လမ်းရှိ ဌေးမြင့်အောင်ယိုစုံအား သွားရောက်စစ်ဆေးခဲ့ကြောင်း သိရှိရပါသည်။

    ထိုသို့စစ်ဆေးရာတွင် MSME ချေးငွေထုတ်ချေးခြင်းနှင့်စပ်လျဉ်း၍ အာမခံပစ္စည်းထားရှိမှု၊ ဖြေလျော့ပေးနိုင်မည့်နည်းလမ်း၊ ချေးငွေအစားလိုအပ်သော စက်ကိရိယာပစ္စည်းများ ထောက်ပံ့ပေးနိုင်မည့်အစီအစဉ်များ၊ ကုန်ညွှန်းအမှတ်အသားပြည့်စုံမှန်ကန်မှုရှိ/မရှိတို့ကို စစ်ဆေးဆောင်ရွက်ခဲ့ကြောင်း သိရှိရပါသည်။

DOCA(မွန်)

     ဧရာဝတီတိုင်းဒေသကြီး စားသုံးသူရေးရာဦးစီးဌာန တိုင်းဦးစီးမှူး ပုသိမ်ခရိုင်ဦးစီးမှူးနှင့် မေလ ၂၅ ရက်နေ့ သာပေါင်းမြို့နယ် စားသုံးသူရေးရာဦးစီးဌာန မြို့နယ်တာဝန်ခံရုံးတွင် တိုင်းအတွင်း သီဟိုဠ်စိုက်ဧက ၂၀၀၀၀ ဝန်းကျင်နှင့် အများဆုံးစိုက်ပျိုးထုတ်လုပ်လျက်ရှိ‌သော သာပေါင်းမြို့နယ် သီဟိုဠ်စိုက်ပျိုးထုတ်လုပ်ရောင်းချသူများအသင်းဥက္ကဋ္ဌအပါအဝင် အသင်းသားများနှင့် တွေ့ဆုံခဲ့ပါသည်၊၊

    ထိုသို့တွေ့ဆုံခဲ့ရာတွင် တိုင်းဦးစီးမှူးမှ သာပေါင်းမြို့နယ်သည် ပြည်တွင်း/ပြည်ပဈေးကွက် ဝယ်လိုအားရှိသော သီဟိုဠ်အများဆုံး စိုက်ပျိုးလျက်ရှိသည့် မြို့နယ်တစ်ခုဖြစ်ပြီး မိမိတို့ မြို့နယ်အတွင်း သီဟိုဠ်အထွက်နှုန်းတိုးတက်လာစေရန်နှင့် အပင်များရေရှည်ထိန်းသိမ်းနိုင်ရန် စိုက်ပျိုးရရှိရေးအတွက် ရေကန်များတူးဖော်ရန်နှင့် သီဟိုဠ်ထွက်ရှိချိန်အလေအလွင့်မရှိစေရေး သီဟိုဠ်စေ့ပေါ်ချိန် တောဆင်ရိုင်းအန္တရာယ်များကျရောက်ပါက ကာကွယ်ရန်နည်းလမ်းများ သီဟိုဠ်စိုက်တောင်သူများ စိုက်ပျိုးမြေတရားဝင်အမည်ပေါက် အခွန်အခပေးဆောင်ရွက်ရန်ကိစ္စရပ်များအသင်း၏အားသာချက်၊ အားနည်းချက်များ ဆွေးနွေးလာမှုအပေါ် တိုင်းဦးစီးမှူးမှ မိမိတို့ ဒေသတွင် သီဟိုဠ်စေ့ ကုန်ကြမ်းများ ထွက်ရှိသည့်အတွက် သီဟိုဠ်ကုန်ချောထုတ်လုပ်သည့် စက်ရုံတည်ဆောက်နိုင်ပါက မိမိတို့ဒေသတွင်း စီးပွားရေးလုပ်ငန်းများ ပိုမိုဖွံ့ဖြိုးတိုးတက် လာမှာဖြစ်သလို သီဟိုဠ်ကုန်ချောထုတ်လုပ်နိုင်ရန် စက်ရုံအတွက်မြေနေရာရရှိရေး စိုက်ပျိုးမြေရရှိရန်ကန်များ တူးဖော်ရန်အသင်းအဖွဲ့မှ တင်ပြပေးရမှာဖြစ်ပြီး မိမိတို့အနေဖြင့် တိုင်းဒေသကြီး အစိုးရအဖွဲ့သို့ ဆက်လက်တင်ပြပေးမှာဖြစ်ကြောင်း ၎င်းအပြင် သက်ဆိုင်ရာဌာနများနှင့်လည်း ပေါင်းစပ်ကူညီဆောင်ရွက်ပေးမှာဖြစ်ကြောင်း ဈေးကွက်ချဲ့ထွင်နိုင်ရေးနှင့် ပြည်ပဈေးကွက် ပိုမိုတင်ပို့ရောင်းချနိုင်ရေး ဝိုင်းဝန်းကူညီဆောင်ရွက်ပေးမှာဖြစ်ကြောင်း ဆွေးနွေးပြောကြားခဲ့ပါသည်၊၊

DOCA(ဧရာဝတီ)

       စားသုံးသူရေးရာဦးစီးဌာန၊ နေပြည်တော်ဦးစီးမှူးရုံးမှ ဝန်ထမ်းများသည် (၂၈-၅-၂၀၂၄) ရက်နေ့တွင် ပြည်ထောင်စုနယ်မြေ၊ နေပြည်တော်၊ လယ်ဝေးမြို့နယ်အတွင်းရှိ စားအုန်းဆီ လက်ကားရောင်းချသည့်ဆိုင်များ၊ ဆန်ပွဲရုံ/ဆန်ဆိုင်များအား ကွင်းဆင်းစစ်ဆေးခဲ့ကြပါသည်။

         ထို့သို့စစ်ဆေးရာတွင် စားသုံးသူရေးရာဦးစီးဌာန၊ နေပြည်တော်ဦးစီးမှူးရုံးမှ ဦးထွန်းမင်းသန့်၊ အကြီးတန်းစာရေးနှင့် လယ်ဝေးမြို့နယ်၊ အထွေထွေအုပ်ချုပ်ရေးဦးစီးဌာန၊ နေပြည်တော်စည်ပင်သာယာရေးကော်မတီမှ ဝန်ထမ်းများသည် လယ်ဝေးမြို့နယ်၊ သီရိရတနာ(မြို့မဈေး)ရှိ စားအုန်းဆီ လက်လီရောင်းချသည့်ဆိုင်(၅)ဆိုင်၊ သပြေပင်ကျေးရွာရှိ စားအုန်းဆီလက်လီရောင်းချသည့်ဆိုင် (၈)ဆိုင်၊ ပတ္တာကျေးရွာရှိ စားအုန်းဆီလက်လီရောင်းချသည့်ဆိုင် (၁)ဆိုင်၊ အမှတ်(၂)ရပ်ကွက်ရှိ စားအုန်းဆီလက်လီရောင်းချသည့်ဆိုင် (၁)ဆိုင်တို့မှာ စားအုန်းဆီများကို သတ်မှတ်ရည်ညွှန်းဈေးနှုန်းအတိုင်း ရောင်းချခြင်းရှိ/မရှိစစ်ဆေးခဲ့ကြပါသည်။

         ထိုကဲ့သို့စစ်ဆေးရာတွင် လယ်ဝေးမြို့နယ်အတွင်းရှိ စားအုန်းဆီ လက်လီရောင်းချသည့်ဆိုင်များအား သတ်မှတ်ရည်ညွှန်းဈေးအတိုင်း ရောင်းချနေကြောင်း စစ်ဆေးတွေ့ရှိရပါသည်။ သတ်မှတ်ရည်ညွှန်းဈေးအတိုင်းမရောင်းချပါက စားသုံးသူကာကွယ်ရေးဥပဒေ၊ အရေးကြီးကုန်စည်နှင့်ဝန်ဆောင်မှုဥပဒေများအရ အရေးယူခံရမည်ဖြစ်ကြောင်း ဆီလုပ်ငန်းရှင်များအား အသိပညာပေးပြောကြားခဲ့သည်။ ပူးပေါင်းအဖွဲ့သည် လယ်ဝေးမြို့နယ်အတွင်းရှိ ဆန်ပွဲရုံ/ဆန်ဆိုင်များအား ၎င်းတို့ရောင်းချသော ဆန်အမျိုးအစားများ၊ တစ်နေ့ရောင်းအား၊ ယခုနှစ်ဈေးနှုန်း၊ ယခင်နှစ်ဈေးနှုန်းများကိုလည်း ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(နေပြည်တော်)