သတင်းနှင့် လှုပ်ရှားမှုများ

၂၀၁၉-၂၀၂၀ ဘဏ္ဍာနှစ် ငွေလုံးငွေရင်း(မူလ)ခွင့်ပြုရန်ပုံငွေဖြင့် မန္တလေးတိုင်းဒေသကြီး၊ စားသုံးသူရေးရာဦးစီးဌာန၊ညောင်ဦးခရိုင် ဦးစီးမှူးရုံး (၅၀^၊×၃၅^၊×၂၄^၊) RC (၂)ထပ် (အတွင်း ရေ၊မီး၊ မိလ္လာ) (Apron & Drain အပါ) အဆောက်အဦဆောက်လုပ်ခြင်းလုပ်ငန်းအား လုပ်ထုံးလုပ်နည်းနှင့် အညီဆောင်ရွက်ခဲ့ရာ အမိုးဒိုင်းတင်ရန် ငြမ်းဆင်ခြင်း၊ဆေးသုတ်ရန်အတွက် ပတ်တီးရိုက်ခြင်း၊ ရေချိုးခန်း၊ရေအိမ် တည်ဆောက်ခြင်းလုပ်ငန်းများ ကို ဆောင်ရွက်လျှက်ရှိရာ (၁၀.၇.၂၀၂၀)ရက်နေ့ အထိ စုစုပေါင်း လုပ်ငန်းပမာဏ၏ (၆၀%)ခန့် ပြီးစီးပြီးဖြစ်ပါသည်။

မန္တလေးတိုင်းဒေသကြီး

စားသုံးသူရေးရာဦးစီးဌာန

       စားသုံးသူရေးရာဦးစီးဌာန၏ ၂၀၁၉-၂၀၂၀ ဘဏ္ဍာနှစ် တတိယ ၃ လပတ် လုပ်ငန်းညှိနှိုင်းအစည်းအဝေးကို ၂၀၂၀ ပြည့်နှစ် ဇူလိုင်လ ၁၁ ရက်နေ့တွင် ရုံးအမှတ် ၅၂ ၊ စားသုံးသူရေးရာဦးစီးဌာန၌ Zoom Application အား အသုံးပြု၍ Video Conferencing စနစ်ဖြင့် ကျင်းပပြုလုပ်ခဲ့ရာ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသန်းမြင့်၊ ဒုတိယ ဝန်ကြီး ဦးအောင်ထူး၊ စားသုံးသူရေးရာဦးစီးဌာနမှ ညွှန်ကြားရေးမှူးချုပ် ဦးမြင့်လွင်၊ ကုန်သွယ်ရေးဦးစီးဌာနမှ ညွှန်ကြားရေးမှူးချုပ် ဦးမင်းမင်း၊ မြန်မာကုန်သွယ်မှုမြှင့်တင်ရေးအဖွဲ့မှ ညွှန်ကြားရေးမှူးချုပ် ဒေါ်နော်မူတာကပေါ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ တာဝန်ရှိသူများနှင့် တိုင်းဒေသကြီး/ပြည်နယ်များမှ တိုင်းဒေသကြီး/ပြည်နယ်ဦးစီးမှူးများနှင့် တာဝန်ရှိသူများ အစည်းအဝေးကို တက်ရောက်ခဲ့ကြပါသည်။

       အစည်းအဝေး၌ ပြည်ထောင်စုဝန်ကြီးက အဖွင့်အမှာစကားပြောကြားရာတွင် မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း (၂၀၁၈-၂၀၂၃)  နှင့်အညီ ပုဂ္ဂလိက ကဏ္ဍဖွံ့ဖြိုးတိုးတက်ရေး၊ အစိုးရ-ပုဂ္ဂလိက ပူးပေါင်းဆောင်ရွက်ရေး၊ စီးပွားရေးလုပ်ငန်းများ လုပ်ကိုင်မှု လွယ်ကူစေရေး၊ ဈေးကွက်အတွင်း မျှတသော ယှဉ်ပြိုင်မှု ဖြစ်ပေါ်စေရေး၊ စားသုံးသူအကာကွယ်ပေးရေး၊ အလုပ်အကိုင်ဖန်တီးပေးနိုင်ရေး၊ မူပိုင်ခွင့် ကာကွယ်မှုမြှင့်တင်ရေးတို့အား ဆောင်ရွက်လျက်ရှိပါကြောင်း၊ စီးပွားရေး ဖွံ့ဖြိုးတိုးတက်မှုကို တွန်းအားပေးနိုင်မည့် အထူးစီးပွားရေးဇုန်များနှင့် နယ်စပ်စီးပွားရေးပူးပေါင်းဆောင်ရွက်မှုဇုန်များကိုလည်း မဟာဗျူဟာကျသော နေရာများတွင် ဆောင်ရွက်လျက်ရှိကြောင်း၊ စတုတ္ထတစ်နှစ်တာ ကာလအတွင်း ကုန်သွယ်မှုလိုငွေ သိသာစွာကျဆင်းခဲ့ကြောင်း၊ COVID 19 ကာလနှင့် COVID 19 အလွန်ကာလများတွင်လည်း ပြည်တွင်းစားနပ်ရိက္ခာဖူလုံစေရေး၊ ကုန်ဈေးနှုန်းတည်ငြိမ်ရေးနှင့် ကုန်သွယ်မှုလုပ်ငန်းများ အရှိန်အဟုန်မပျက်စေရေးအတွက် electronic ကူးသန်းရောင်းဝယ်မှုမြင့်တင်ရေးတို့အား  ဆက်လက်ဆောင်ရွက်သွားရမည်ဖြစ်ကြောင်း ပြောကြားခဲ့ပါသည်။

        ဆက်လက်၍ ဒုတိယဝန်ကြီးက အမှာစကားပြောကြားရာတွင် စားသုံးသူရေးရာဦးစီးဌာန၏ အဓိကလုပ်ငန်းမှာ  စားသုံးသူအကာအကွယ်ပေးရေးဖြစ်ကြောင်း၊ ထုတ်လုပ်သူများ၊ ရောင်းဝယ်သူများနှင့် စားသုံးသူများအကြား ဘေးကင်းလုံခြုံမှုရှိသော ထုတ်ကုန်များကို သင့်တင့်မျှတသော ဈေးနှုန်းများဖြင့် ရောင်းဝယ်နိုင်ကြစေရန် ချိတ်ဆက်ဆောင်ရွက်နိုင်ရေးအတွက် အသင်းအဖွဲ့များ ဖွဲ့စည်းဆောင်ရွက်ခဲ့ကြောင်း၊ COVID 19 အလွန်ကာလများတွင် ရိက္ခာထုတ်လုပ်နိုင်သည့် နိုင်ငံဖြစ်စေရေးအတွက် စီစဉ်ဆောင်ရွက်ထားသဖြင့် စိုက်ပျိုးမွေးမြူရေးကဏ္ဍဖွံ့ဖြိုးတိုးတက်ရေး အားပေးဆောင်ရွက်ရမည်ဖြစ်ကြောင်း၊ လုပ်ငန်းများဆောင်ရွက်ရာတွင် ဥပဒေ၊ စည်းမျည်းစည်းကမ်းများ၊ လမ်းညွှန်ချက်များနှင့်အညီ ဆောင်ရွက်သွားကြရန်ပြောကြားခဲ့ပါသည်။

     ထို့နောက် ရုံးချုပ် ဌာနခွဲများမှ ညွှန်ကြားရေးမှူးနှင့် တိုင်းဒေသကြီး/ပြည်နယ်ဦးစီးမှူးရုံးမှူးများက ၂၀၁၉-၂၀၂၀ ဘဏ္ဍာနှစ် တတိယ ၃လပတ်အတွင်း လုပ်ငန်းဆောင်ရွက်နေမှုအခြေအနေများ၊ ရှေ့ဆက်လက်ဆောင်ရွက်မည့် လုပ်ငန်းများနှင့် လုပ်ငန်းဆောင်ရွက်ရာတွင် ကြုံတွေရသည့် အခက်အခဲများကို ရှင်းလင်းတင်ပြခဲ့ရာ စားသုံးသူရေးရာဦးစီးဌာနမှ ညွှန်ကြားရေးမှူးချုပ် ဦးမြင့်လွင်၊ ဒုတိယညွှန်ကြားရေးမှူးချုပ် ဦးမြင့်ဝေ၊ ဒုတိယညွှန်ကြားရေးမှူးချုပ် ဦးမြင့်ချိုတို့က ပြန်လည်ရှင်းလင်းဆွေးနွေး၍ ဆက်လက်ဆောင်ရွက်ရမည့် လုပ်ငန်းများအတွက် လမ်းညွှန်မှုများပေးခဲ့ကြောင်း သတင်းရရှိပါသည်။

ITQM

တနင်္သာရီတိုင်းဒေသကြီး စားသုံးသူရေးရာကော်မတီ(၁/၂၀၂၀)လုပ်ငန်းညှိနှိုင်းအစည်းအဝေး ကို ဇူလိုင် ၂ ရက်နေ့၊  စားသုံးသူရေးရာဦးစီးဌာန၊ တနင်္သာရီတိုင်းဒေသကြီးဦးစီးမှူးရုံး၊အစည်းအဝေး ခန်းမ၌ ကျင်းပခဲ့ရာ စားသုံးသူရေးရာကော်မတီဥက္ကဋ္ဌ တနင်္သာရီတိုင်းဒေသကြီးအစိုးရအဖွဲ့ဝင် စီမံကိန်းနှင့်ဘဏ္ဍာရေးဝန်ကြီး ဒေါ်ရီရီချို၊ အတွင်းရေးမှူးနှင့် ကော်မတီအဖွဲ့ဝင်များတက်ရောက်ခဲ့ ပါသည်။

          အဆိုပါ လုပ်ငန်းညှိနှိုင်းကော်မတီအစည်းအဝေး၌ စားသုံးသူရေးရာကော်မတီ ဥက္ကဋ္ဌ တနင်္သာရီတိုင်းဒေသကြီး အစိုးရအဖွဲ့ဝင် စီမံကိန်းနှင့်ဘဏ္ဍာရေးဝန်ကြီး ဒေါ်ရီရီချိုက အဖွင့်အမှာစကား ပြောကြားရာတွင် တိုင်းဒေသကြီးအတွင်း စားသုံးသူအကာအကွယ်ပေးရေးလုပ်ငန်းများ ပိုမို ထိရောက်စွာဆောင်ရွက်နိုင်ရေးအတွက် မြန်မာနိုင်ငံစားသုံးသူကာကွယ်ရေးကော်မရှင်ကချမှတ် ထားသော မူဝါဒလမ်းညွှန်ချက်များကို လိုက်နာအကောင်အထည်ဖော်ရန်လိုအပ်ကြောင်း၊ စားသုံးသူကာကွယ်ရေးလုပ်ငန်းသည် နိုင်ငံသားအားလုံးနှင့် သက်ဆိုင်သည့်လုပ်ငန်းဖြစ်သည့် အတွက် အမျိုးသားရေးတာဝန်တစ်ရပ်အနေဖြင့် အားလုံးဝိုင်းဝန်းပါဝင်ဆောင်ရွက်မှသာ အောင်မြင် သောလုပ်ငန်းစဉ်ကြီးတစ်ရပ်ဖြစ်မည်ဖြစ်ကြောင်းနှင့် တက်ရောက်လာသော ကော်မတီဝင်များက ဝိုင်းဝန်းပူးပေါင်းပါဝင်ဆောင်ရွက်ပေးကြရန်လိုအပ်ကြောင်းပြောကြားခဲ့ပါသည်။

ဆက်လက်၍ စားသုံးသူရေးရာကော်မတီအတွင်းရေးမှူး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး ဦးဝင်းထွန်းက ၂၀၁၉-၂၀၂၀ ဘဏ္ဍာနှစ် အောက်တိုဘာလမှ ဇွန်လအထိ အသိပညာပေးဟောပြောပွဲများ၊ ကွင်ဆင်းစစ်ဆေးခြင်းလုပ်ငန်းဆောင်ရွက်မှုအခြေအနေများကို လည်းကောင်း၊ တယ်လီဖုန်းဝန်ဆောင်မှုများ၊ online မှတဆင့် ပစ္စည်းများဝယ်ယူရာတွင်နစ်နာမှုရှိ၍ တိုင်ကြားမှုများနှင့်ပတ်သက်သောဖြေရှင်းဆောင်ရွက်ထားရှိမှုများအခြေအနေများကိုလည်းကောင်း၊ စားသုံးရေးရာကော်မတီ၏လုပ်ပိုင်ခွင့်နှင့်လုပ်ငန်းတာဝန်များ၊ စီမံခန့်ခွဲရေးနည်းလမ်းအရ အရေးယူနိုင်သည့်အခြေအနေများနှင့် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ရှေ့ဆက်လက် ဆောင်ရွက်မည့်အခြေအနေများကို ရှင်းလင်းဆွေးနွေးခဲ့ပါသည်။ ထိုနောက် တက်ရောက်လာကြသော ကော်မတီအဖွဲ့ဝင်များမှ ဝိုင်းဝန်းအကြံပြု ဆွေးနွေးခဲ့ကြောင်း သတင်းရရှိပါသည်။

တနင်္သာရီတိုင်းဒေသကြီး

စားသုံးသူရေးရာဦးစီးဌာန

နေပြည်တော်   -  ဇွန် ၂၅ လယ်ယာထုတ်ကုန်စီမံခန့်ခွဲရေးအဖွဲ့၏ လုပ်ငန်းညှိနှိုင်းအစည်းအဝေးကို ယနေ့ မွန်းလွဲ(၁) နာရီတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန အစည်းအဝေးခန်းမ၌ Video Conferencing ဖြင့် ကျင်းပသည်။

               အစည်းအဝေးတွင် လယ်ယာထုတ်ကုန်စီမံခန့်ခွဲရေးအဖွဲ့ ဥက္ကဌ စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန ဒုတိယဝန်ကြီး ဦးအောင်ထူးက အခြေခံရည်ညွှန်းစပါးဈေးနှုန်းကို ယခင်နှစ်မှစ၍ တောင်သူ လယ်သမားအကျိုးစီးပွားကာကွယ်ရေးနှင့် မြှင့်တင်ရေးဦးဆောင်အဖွဲ့ကို တင်ပြခဲ့ပြီး စပါးတင်း ၁၀၀ ကို ကျပ်ငါးသိန်း  သတ်မှတ်ထုတ်ပြန်ခဲ့ကြောင်း၊ အခြေခံရည်ညွှန်းစပါးဈေးနှုန်းအောက်နိမ့်ကျနေသော ရန်ကုန်၊ ပဲခူး၊ ဧရာဝတီတိုင်းဒေသကြီးတို့တွင် အခြေခံရည်ညွှန်းဈေးနှုန်းဖြင့် စပါးဝယ်ယူရန်အတွက် လှည့်ပတ်ရန်ပုံငွေမှ ကျပ် ၁၅ ဘီလီယံ သုံးစွဲဝယ်ယူခဲ့ပြီး တင်ဒါစနစ်ဖြင့် ဆောင်ရွက်ခဲ့ပါကြောင်း၊ ကျပ် ၁၅ ဘီလီယံမှ ကျပ် ခုနစ်ဘီလီယံ သုံးစွဲဝယ်ယူခဲ့ပြီး ဝယ်ယူလက်ခံထားသော ဆန်များထဲမှ တရုတ်ပြည်သူ့သမ္မတနိုင်ငံသို့ ဆန်တန်ချိန် ၈၀၀ နှင့် အခြေခံလူတန်းစားများကို ရောင်းချရန်အတွက် ဆန်တန်ချိန် ၈၀၀၀ အား မြန်မာနိုင်ငံဆန်စပါးအသင်းချုပ်မှ တစ်ဆင့် ရောင်းချပေးခဲ့ပါကြောင်း၊ ယခုနှစ်အတွက်  အခြေခံစပါးဈေးနှုန်းသတ်မှတ်ရန် ဝယ်ယူမည့်ပမာဏ၊ လိုအပ်မည့်ငွေ၊ တင်ဒါစနစ်ဖြင့် ဆန်ပြန်လည်လက်ခံရာတွင် ဆန်အရည်အသွေးပိုင်းအနေနှင့်ပတ်သက်ပြီး ဆွေးနွေး ပေးစေလိုကြောင်း၊ အခြေခံရည်ညွှန်းစပါးဈေးနှုန်းအား ဖြစ်သင့်သည့်ဈေးနှုန်းကို တင်ပြစေလိုပါကြောင်း၊ လယ်ယာ ထုတ်ကုန်စီမံခန့်ခွဲရေးအဖွဲ့မှ အခြေခံဈေးနှုန်းဖြင့် စပါးဝယ်ယူခဲ့ရာတွင် အခက်အခဲရှိသော်လည်း စပါးဈေးနှုန်း ငါးသိန်းအောက် မကျသည့်အတွက် အောင်မြင်သည်ဟု သုံးသပ်ရပါကြောင်း၊ ထို့အတွက် အခြေခံရည်ညွှန်း စပါးဈေးနှုန်းသတ်မှတ်ရန်ကိစ္စ၊ ဝယ်ယူမည့်ပမာဏ၊ လိုအပ်သည့်ငွေကြေးပမာဏ၊ တင်ဒါလက်ခံမည့် ဆန်အရည် အသွေးကိစ္စရပ်များကို ဆွေးနွေးပေးရန် ပြောကြားသည်။

               ယင်းနောက် တက်ရောက်လာကြသည့် လွှတ်တော်ကိုယ်စားလှယ်များ၊ တိုင်းဒေသကြီးနှင့် ပြည်နယ် များမှ  စီမံကိန်းနှင့် ဘဏ္ဍာရေးဝန်ကြီးများ၊ စပါး၊ ဆန်ဝယ်ယူရေးကြီးကြပ်မှုလုပ်ငန်းအဖွဲ့များ၊ ဆန်စပါးစျေး ကွက်နှင့် စျေးနှုန်းဆိုင်ရာ သုံးသပ်အကြံပြုတင်ပြရေး လုပ်ငန်းကော်မတီအဖွဲ့ဝင်များ၊ ဌာနဆိုင်ရာ အသီးသီးမှ တာဝန်ရှိသူများ၊ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်၊ မြန်မာနိုင်ငံ ဆန်စပါး အသင်းချုပ်၊ မြန်မာနိုင်ငံဆန်စက်လုပ်ငန်းရှင်များအသင်း၊ မြန်မာနိုင်ငံစပါးကုန်သည်များအသင်းတို့မှ တာဝန်ရှိ သူများက လုပ်ငန်းကဏ္ဍအလိုက် တင်ပြကြရာ တင်ပြချက်များအပေါ် ဒုတိယဝန်ကြီးက ပြန်လည်ဆွေးနွေးပြီး နိဂုံးချုပ်အမှာစကား ပြောကြားခဲ့ကြောင်းသိရသည်။

စားသုံးသူရေးရာဦးစီးဌာန

စစ်ကိုင်းခရိုင် ရေသန့်လုပ်ငန်းရှင်များအသင်း ဖွဲ့စည်းခြင်းအခမ်းအနားကို စားသုံးသူ ရေးရာဦးစီးဌာန၊ စစ်ကိုင်းခရိုင်ဦးစီးမှူးရုံးခန်းမ၌ (၁၈.၆.၂၀၂၀)ရက်နေ့ (၁၃:၃၀) အချိန်တွင် ကျင်းပပြုလုပ်ခဲ့ပြီး  အဆိုပါအခမ်းအနားကို စစ်ကိုင်းခရိုင်ရေသန့်လုပ်ငန်းရှင်များ စုစုပေါင်း (၂၁)ဦး  တက်ရောက်ခဲ့ပါသည်။

အခမ်းအနားတွင် စားသုံးသူရေးရာဦးစီးဌာန စစ်ကိုင်းခရိုင်ဦးစီးမှူး ဦးတင်အောင်ကျော် (လ/ထ ညွှန်ကြားရေးမှူး) မှ  ယခုလို စစ်ကိုင်းခရိုင် ရေသန့်လုပ်ငန်းရှင်များအသင်း ဖွဲ့စည်းခြင်း ပြုလုပ်ရသည့်အတွက်  အလွန်ဝမ်းသာမိပါကြောင်း၊ မိမိတို့စားသုံးသူရေးရာဦးစီးဌာနအနေဖြင့် စားသုံးသူအကာအကွယ်ပေးရေးလုပ်ငန်းများ ဆောင်ရွက်ရသလို ပြည်တွင်းကုန်သွယ်ရေးမြှင့် တင်ရေးလုပ်ငန်းများ၊ ပြည်ပပို့ကုန်မြှင့်တင်ရေး အတွက်လည်း ဆောင်ရွက်ရကြောင်း၊ စီးပွားရေး နှင့် ကူးသန်းရောင်းဝယ်ရေးဝန်ကြီး ဌာန၏ မျှော်မှန်းချက်မှာ ကုန်သွယ်မှုလုပ်ငန်းများဖြင့် အမျိုးသား စီးပွားရေးဘက်စုံ ဖွံ့ဖြိုးတိုးတက်အောင် ဆောင်ရွက် ရန် ဖြစ်ပါကြောင်း၊ မျှော်မှန်းချက်အပေါ် အခြေခံ၍ ကုန်သွယ်ရေးကဏ္ဍရည်မှန်းချက်များကို ကုန်သွယ်မှုပမာဏ တိုးတက်ရေးဆောင်ရွက်ရန်၊ ဈေးကွက်စီးပွားရေးစနစ်နှင့်အညီ ပုဂ္ဂလိကအခန်းကဏ္ဍ ဖွံ့ဖြိုးတိုးတက်အောင် အားပေးမြှင့်တင် ဆောင်ရွက်ရန်၊ နိုင်ငံတကာအဖွဲ့အစည်းများနှင့် ပူးပေါင်းဆောင်ရွက်ခြင်းဖြင့် နိုင်ငံတကာ ဈေးကွက်တွင် မြန်မာ့ထွက်ကုန်များ ဈေးကွက်ဝေစု ပိုမိုအောင် ဆောင်ရွက်ရန်နှင့် ကုန်သွယ်မှု လုပ်ငန်းများ အဆင်ပြေချောမွေ့စွာ ဆောင်ရွက်နိုင်ရေးအတွက် ပံ့ပိုးကူညီရန် ရည်မှန်းချက်များကို ထားရှိပါကြောင်း၊ အသင်းဖွဲ့စည်းခြင်းအားဖြင့် လုပ်ငန်းရှင် အချင်းချင်း စည်းလုံးညီညွှတ်မှုရှိခြင်း၊ တစ်ဦး အခက်အခဲကို အသင်းကြီးက ကူညီဆောင်ရွက် ပေးနိုင်ခြင်း၊ ဒေသတွင်း ရေသန့်လုပ်ငန်း အားကောင်းလာလျှင် အလုပ်အကိုင်အခွင့်အလမ်းပေးနိုင် သည့် အဖွဲ့အစည်း ဖြစ်လာမည် ဖြစ်ကြောင်း၊ ဒေသဖွံ့ဖြိုးတိုးတက်ရေး အတွက် အသင်းကြီး၏ အင်အားနှင့်လိုအပ်သည့် အကူအညီ များအား ပံ့ပိုးကူညီ ဆောင်ရွက်နိုင်ရန်နှင့် စားသုံးသူများ ဘေးအန္တရာယ်ကင်းသည့် ရေသန့်များအား ဖြန့်ဖြူးနိုင်မည်ဖြစ်ကြောင်းစသော ရည်ရွယ်ချက်များဖြင့် ဖွဲ့စည်းဆောင်ရွက်စေလိုပါကြောင်း ရှင်းလင်းဆွေးနွေးပြီး တက်ရောက်လာသော စစ်ကိုင်း၊ မြင်းမူ၊ မြောင်မြို့နယ်များမှ ရေသန့်လုပ်ငန်း ရှင်များ၏ အဆိုပြုချက်နှင့်တာဝန် ပေးအပ်ခြင်း ခံရသော ရေသန့်လုပ်ငန်းရှင်များ၏ သဘောတူညီ မှု ဆန္ဒအရ စစ်ကိုင်းခရိုင်ရေသန့်လုပ်ငန်းရှင်များ၏ သဘောတူညီမှုဖြင့် အလုပ်အမှုဆောင်(၂၁)ဦး၊ အသင်းသား (၂၁)ဦး ဖွဲ့စည်းထားရှိပါကြောင်း သတင်းရရှိပါသည်။

စစ်ကိုင်းတိုင်းဒေသကြီး

စားသုံးသူရေးရာဦးစီးဌာန