သတင်းနှင့် လှုပ်ရှားမှုများ

        စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ခရိုင်ဦးစီးမှူးတို့၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ဦးစီးအရာရှိ ဒေါ်မွန်မွန်စိုးနှင့် ဝန်ထမ်းများသည် (၅.၁.၂၀၂၃) ရက်နေ့၊ နံနက်(၉:၃၀)အချိန်တွင် ဒေသတွင်းထုတ်လုပ်လျက်ရှိသော ပဲခွေကြော်၊ တိုဟူးခြောက်ကြော်၊ ပါပလာ၊ ကြူကြူဝါးလား၊ ငါးမုန့်ကြော်၊ မြေပဲပွကြော်၊ အာလူးကြော်၊ ပေါင်မုန့်၊ ကွတ်ကီး၊ ကိတ်မျိုးစုံ လုပ်ငန်းရှင်များဆီသို့ သွားရောက်၍ စားသုံးသူကာကွယ်ရေး ဥပဒေပါ ပြဌာန်းချက်များအား လိုက်နာဆောင်ရွက်ခြင်းဖြင့် စားသုံးသူများဘေးအန္တရာယ်ကင်းရှင်းပြီး မိမိတို့လုပ်ငန်းများ ထုတ်ကုန်လုံခြုံ စိတ်ချရမှုရှိပြီး အကျိုးစီးပွားအောင်မြင်ဖြစ်ထွန်းစေရန်ရည်ရွယ်၍ အသိပညာ ပေးဆွေးနွေးခဲ့ပါသည်။

          ဦးစီးအရာရှိ ဒေါ်မွန်မွန်စိုးက ဆွေးနွေးရာတွင် စားသုံးသူကာကွယ်ရေးဥပဒေပါ ကုန်အညွှန်း အမှတ်အသား ဖော်ပြချက်များအကြောင်း၊ စီးပွားရေးလုပ်ငန်းရှင်၏ တာဝန်များ၊ စီမံခန့်ခွဲရေးနည်း လမ်းအရ အရေးယူခြင်း၊ တားမြစ်ချက်များ၊ ပြစ်မှုနှင့်ပြစ်ဒဏ်များအကြောင်း၊ မြန်မာနိုင်ငံစားသုံးသူ ကာကွယ်ရေးကော်မရှင်မှ ထုတ်ပြန်ထားသောညွှန်ကြားချက်ပါ ကုန်စည်အုပ်စုအလိုက် မြန်မာဘာသာ ဖြင့် ထည့်သွင်းဖော်ပြရမည့်အချက်အလက်များ၊ လုပ်ငန်းရှင်များမှလည်း မိမိတို့ထုတ်လုပ်သော ကုန်စည်အမျိုးအစားအလိုက် စားသုံးသူကာကွယ်ရေးဥပဒေ(၂၀၁၉)အခန်း (၁၈)ပါ ကုန်အညွှန်း အမှတ် အသားဖော်ပြချက်များနှင့် ကိုက်ညီသည့် ကုန်စည်များကို စားသုံးသူရေးရာ ဦးစီးဌာန၏စိစစ်ခွင့်ပြု ချက်ရရှိရန် လျှောက်ထားနိုင်ကြောင်း အသိပညာပေး ဆွေးနွေးခဲ့ပါသည်။

          ဆက်လက်၍ စားသုံးသူရေးရာဌာနခွဲတာဝန်ခံ ဒေါ်နွယ်နွယ်အေးမှ ဆွေးနွေးရာတွင် လုပ်ငန်းရှင်များ အနေဖြင့် စားသုံးသူများမှ စားသောက်ကုန်တစ်ခုခုကို ရွေးချယ်ဝယ်ယူရာတွင် ကုန်အညွှန်းအမှတ် အသား ပြည့်စုံစွာဖော်ပြမှုမှာ အရေးကြီးသော အခန်းကဏ္ဍတွင်ရှိကြောင်း၊ အသိပညာဗဟုသုတများ ရရှိလာပြီဖြစ်၍ ပြည့်စုံစွာထည့်သွင်းခြင်းဖြင့် အကျိုးစီးပွားများ အောင်မြင်ဖြစ်ထွန်းလာမည်ဖြစ်ကြောင်း၊ ကုန်အညွှန်းအမှတ်အသား ပြည့်စုံမှုမရှိသော ထုတ်ကုန်များအား စားသုံးသူကာကွယ်ရေး ဥပဒေအရ ဈေးကွက်အတွင်းမှ လျော့နည်းပပျောက်သွားစေရန် စောင့်ကြည့်စစ်ဆေး အရေးယူသွား မည်ဖြစ်သော ကြောင့် တိကျစွာလိုက်နာဆောင်ရွက်ရန် လိုအပ်ကြောင်းဆွေးနွေးခဲ့ပြီး မြန်မာနိုင်ငံစားသုံးသူကာကွယ်ရေး ကော်မရှင်မှ ထုတ်ပြန်ထားသော ညွှန်ကြားချက်(၂/၂၀၁၉)လက်ကမ်းစာစောင်များ ဖြန့်ဝေခဲ့ပါသည်။

          "အီဂျစ်မ" အာလူးကြော်လုပ်ငန်းတွင် မိသားစုဝင်များ တစ်ပိုင်တစ်နိုင်မိသားစုဝင်များ လုပ်ကိုင်ဆောင်ရွက်လျက်ရှိပြီး ကုန်ကြမ်းပစ္စည်းများကို အောင်ပန်းမြို့မှ အာလူးထိပ်စ(ရှယ်) များကို ဝယ်ယူအသုံးပြု၍ ရောင်းချလျက်ရှိရာ အထုပ်သေးတစ်ထုပ်လျှင် ကျပ်(၃၀၀)၊ အထုပ်ကြီး တစ်ထုပ်လျှင် ကျပ်(၅၀၀)ဖြင့် ရောင်းချကြောင်း၊ လက်ကားဈေးနှုန်းအနေဖြင့် အထုပ်သေး(၅) ထုပ်လျှင် ကျပ်(၁၄၀၀)၊ အထုပ်ကြီး(၅)ထုပ်လျှင် ကျပ်(၂၃၀၀)ဖြင့် ရောင်းချကြောင်း၊ ဈေးကွက်အနေဖြင့် ပခုက္ကူဒေသတွင်းနှင့် ကမ္မမြို့နယ်များသို့ ဖြန့်ဖြူးရောင်းချလျက်ရှိကြောင်း "အီဂျစ်မ" အာလူးကြော် လုပ်ငန်းရှင်၏ ပြောကြားချက်အရ သိရှိရပါသည်။

DOCA(မကွေး)

       မုံရွာခရိုင်အတွင်းရှိ စားသုံးသူပြည်သူများ စားသုံးဆီပြတ်လပ်မှုမရှိစေရေး၊ ဈေးနှုန်းချိုသာ၍ အရေအတွက်အလေးချိန်နှင့်အရည်အသွေး ပြည့်ဝမှန်ကန်စွာရရှိနိုင်ရေးအတွက် စားသုံးသူရေးရာဦးစီး ဌာန၊ မြန်မာနိုင်ငံ ဆီကုန်သည်များနှင့် ဆီလုပ်ငန်းရှင်များအသင်း၊  မုံရွာခရိုင် စားသုံးဆီကုန်သည်များနှင့် စားသုံးဆီလုပ်ငန်းရှင်များအသင်းမှ ပူးပေါင်း၍ စားအုန်းဆီများ ဖြန့်ဖြူးရောင်းချပေးလျက်ရှိကြောင်း သိရသည်၊၊

     စားအုန်းဆီများရောင်းချရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ ထုတ်ပြန်ပေးလျက်ရှိသော စားအုန်း ဆီ တစ်ပိဿာရည်ညွှန်းဈေးအပေါ် အခြေခံ၍ သယ်ယူပို့ဆောင်ခပါ ကုန်ကျစရိတ်တွင် အမြတ် ၂ ရာခိုင်နှုန်းတွက်ချက်၍ ရောင်းချပေးခြင်းဖြစ်ပြီး လူတစ်ဦးလျှင် ၁ ပိဿာနှုန်းဖြင့် ရောင်းချ ပေးကြောင်း သိရသည်။

      မုံရွာခရိုင်အတွင်း  ၁-၁၂-၂၀၂၂ ရက်နေ့မှ ၃၁-၁၂-၂၀၂၂ ရက်နေ့ထိ စားအုန်းဆီ စုစုပေါင်းပိဿာ ချိန် ၂၂၇၂၀ ပိဿာခန့် ရောင်းချပေးနိုင်ခဲ့ပြီး ရောင်းချရာတွင် လူစည်ကားရာရပ်ကွက်၊ ဈေးများအပြင် မြို့စွန်ရပ်ကွက်များသို့ပါ ဈေးကားများဖြင့် လှည့်လည်ရောင်းချလျက်ရှိကြောင်းနှင့် ယခုအပတ်တွင် စားအုန်းဆီဈေးနှုန်းမှာ တစ်ပိဿာလျှင် ၄၈၀၀ ကျပ်ဖြစ်ကြောင်း မုံရွာခရိုင်စားသုံးဆီကုန်သည်များနှင့် စားသုံးဆီလုပ်ငန်းရှင်များထံမှ သတင်းရရှိပါသည်။

DOCA(စစ်ကိုင်း)

       စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံ ဦးမျိုးဝင်းသန်းသည် (၆.၁.၂၀၂၃)ရက်နေ့၊ နေ့လည်(၁၃:၀၀)နာရီအချိန်တွင် ကန့်ဘလူမြို့ အမှတ်(၅)ရပ်ကွက်ရှိ “သိန်းကမ္ဘာ”စက်သုံးဆီအရောင်ဆိုင်သို့ သတ်မှတ်ရည်ညွှန်းဈေးဖြင့် ရောင်းချနေခြင်း ရှိ/မရှိ ကွင်းဆင်းစိစစ်ကြပ်မတ်ဆောင်ရွက်ခဲ့သည်။

     ထိုသို့စစ်ဆေးရာတွင် မြို့နယ်တာဝန်ခံ ဦးမျိုးဝင်းသန်းမှ စက်သုံးဆီတင်သွင်းရောင်းချ ဖြန့်ဖြူးနေသည့် လုပ်ငန်းရှင်အား စက်သုံးဆီဆိုင်များသို့  လစဉ်ကွင်းဆင်းစိစစ်ကြပ်မတ်ဆောင် ရွက်လျက်ရှိကြောင်း၊ လုပ်ငန်းရှင်များအနေဖြင့် တရားမဝင်စက်သုံးဆီ၊ ချောဆီများတင်သွင်း ဖြန့်ဖြူးရောင်းချနေခြင်း စစ်ဆေးတွေ့ရှိရပါက အရေးယူ‌ဆောင်ရွက်သွားမည်ဖြစ်ကြောင်း၊ PPRDမှ နေ့စဉ်ထုတ်ပြန်ထားသော စက်သုံးဆီရည်ညွှန်းဈေးထက် ပိုမိုရောင်းချခြင်း ရှိ/မရှိနှင့် ပြည်သူများ အဆင်ပြေစွာ ဝယ်ယူနိုင်ရေးအတွက် စက်သုံးဆီအရောင်းဆိုင်များ စက်သုံးဆီပြတ်လပ်မှုမရှိစေရေး ပုံမှန်ဖွင့်လှစ်ရောင်းချနိုင်ရေး  စက်သုံးဆီများကို သတ်မှတ်ဈေးနှုန်းထက် ပိုမိုရောင်းချခြင်းမပြုပဲ အချိန်အတွယ်မှန်ကန်စွာ ရောင်းချနိုင်ရေးနှင့် ထုတ်ပြန်ထားသော ညွှန်ကြားချက်များအတိုင်း လိုက်နာ ဆောင်ရွက်ကြရန် ဆွေးနွေးပြောကြားခဲ့ကြောင်း သိရှိရပါသည်။

DOCA(စစ်ကိုင်း)

      ရခိုင်ပြည်နယ် စားသုံးသူရေးရာဦးစီးဌာန၊ တောင်ကုတ်ခရိုင်ဦးစီးမှူး ဦးမောင်ကျော်မြင့် (ဦးစီးအရာရှိ) နှင့် ဝန်ထမ်းများသည် ၂၀၂၃ ခုနှစ် ဇန်နဝါရီလ (၆) ရက်နေ့၊ နံနက် (၀၉:၀၀) နာရီ အချိန်တွင် တောင်ကုတ်မြို့ပေါ်ရပ်ကွက်များရှိ ဆေးဝါးအရောင်းဆိုင်များသို့ သွားရောက်၍ DICION-M ပုံစံတူဆေးဝါးများ ရောင်းချမှု ရှိ/မရှိ ကို မြို့နယ်ကျန်းမာရေးဦးစီးဌာန၊ မြို့နယ်စည်ပင် သာယာရေးအဖွဲ့၊ မြို့နယ်အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့ တို့ပါဝင်သော ပူးပေါင်းအဖွဲ့ဖြင့် ဈေးကွက်စောင့်ကြည့် စစ်ဆေးခြင်း ဆောင်ရွက်ခဲ့ပါသည်။

        ၎င်း DICION-M Tablet (Diciofenac Sodium 50mg, Paracetamol 500mg) သည်     New Magnate Co.,Ltd မှ ဆေးဝါးမှတ်ပုံတင်၍ တင်သွင်းဖြန့်ဖြူးရောင်းချနေသော ဆေးဝါးဖြစ်ပြီး ဈေးကွက်အတွင်း ပုံစံတူ ဆေးဝါးများကို မှတ်ပုံတင်ထားခြင်းမရှိဘဲ တရားမဝင်တင်သွင်းပြီး ဈေးကွက်ထဲတွင် ရောင်းချနေကြောင်း သိရှိရသည့်အတွက် သုံးစွဲသူမိဘပြည်သူများ‌ ဘေးအန္တရာယ် ကင်းရှင်းစေရေး ရည်ရွယ်၍ သွားရောက် စစ်ဆေးရခြင်း ဖြစ်ပါသည်။

         ဈေးကွက်အတွင်းရှိ ဆေးဝါးအရောင်းဆိုင်များအား မှတ်ပုံတင်မဲ့ဆေးဝါးများ၊ သက်ဆိုင်ရာ ဌာနများမှ တားမြစ်ထားသော ဆေးဝါးများ၊ သက်တမ်းလွန်ဆေးဝါးများ ရောင်းချမှုမရှိစေရေး၊ မြန်မာနိုင်ငံစားသုံးသူကာကွယ်ရေးကော်မရှင်၏ ၂/၂၀၁၉ ညွှန်ကြားချက်ပါ ဆေးဝါးနှင့် ဖြည့်စွက်စာများတွင် ဖော်ပြရမည့်ကုန်အညွှန်းအမှတ်အသားဖော်ပြချက်နှင့် ကိုက်ညီမှုရှိသော ဆေးဝါးနှင့်ပစ္စည်း များကိုသာ ဖြန့်ဖြူးရောင်းချရေး အသိပညာပေးခြင်းများ ဆောင်ရွက်ခဲ့ကြောင်း သတင်းရရှိပါသည်။

DOCA(ရခိုင်)

        မွန်ပြည်နယ် ၊ မော်လမြိုင်ခရိုင် ၊ မုဒုံမြို့နယ်စားသုံးသူရေးရာဦးစီးဌာနနှင့်စိုက်ပျိုးရေးဦးစီးဌာနတို့ ပူးပေါင်း၍ ၂၀၂၃ ခုနှစ်၊ ဇန်နဝါရီလ(၂)ရက်နေ့ နံနက်(၁၀:၀၀)နာရီတွင် မုဒုံမြို့ပေါ်ရှိ ဓာတ်မြေဩဇာအရောင်းဆိုင်များ၌ ဈေးကွက်အတွင်းတွင် ဈေးနှုန်း သက်သာသော အရည်အသွေးနိမ့် မြေဩဇာများကို ထိုင်းနိုင်ငံပြည်တွင်းသုံး မြင်းပျံအိတ်ခွံများဖြင့် ပြန်လည်ထုပ်ပိုးပြီး အိုင်ပီစီ မြင်းပျံဓာတ်မြေဩဇာ အတုများပြုလုပ် ရောင်းချနေမှုရှိ ၊ မရှိ ကွင်းဆင်း စစ်ဆေးခဲ့ပါသည်။

    ထိုသို့ စစ်ဆေးရာတွင် မြို့နယ်တာဝန်ခံမှ စားသုံးသူကာကွယ်ရေးဥပဒေအခန်း(၁၀)ပါ စီးပွားရေးလုပ်ငန်းရှင်များ၏တာဝန်များ၊ ဥပဒေအခန်း(၂၃)ပါတားမြစ်ချက်များ၊ ဥပဒေ အခန်း(၂၄) ပါပြစ်မှုပြစ်ဒဏ်များ ၊ စားသုံးသူကာကွယ်ရေးအခန်း(၁၈)ပါ ကုန်အညွှန်း အမှတ်အသား ဖော်ပြခြင်းများအကြောင်းအား လိုက်နာဆောင်ရွက်ကြရန် အသိပညာပေးပြောကြားခဲ့ပြီး စိုက်ပျိုးရေးဦးစီးဌာန မြို့နယ်ဦးစီးမှူးမှလည်း ဓာတ်မြေဩဇာရောင်းချခွင့် လိုင်စင်သက်တမ်း အချိန်မှီတိုးသွားရန် ပြောကြားခဲ့ပါသည်။ ကွင်းဆင်းစစ်ဆေးမှုအရ ထိုင်းနိုင်ငံထုတ် အိုင်ပီစီ မြင်းပျံဓာတ်မြေဩဇာများ တုပရောင်းချခြင်းမရှိကြောင်း သိရှိရပါသည်။

DOCA(မွန်)