တနင်္သာရီတိုင်းဒေသကြီး၊ မြိတ်ခရိုင်သည် ဆန်လိုအပ်လျက်ရှိသည့်အတွက် ဆန်လိုအပ်မှုအတွက် ဧရာဝတီတိုင်းဒေသကြီးမှ အဓိကဝယ်ယူလျက်ရှိပြီး ၂၀၂၄ခုနှစ်၊ မေလ (၂၂) ရက်နေ့နှင့် (၂၃)ရက်နေ့တွင် ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့နယ်နှင့် လပ္ပတ္တာခရိုင်၊ မော်လမြိုင်ကျွန်းမြို့နယ်တို့မှ  MV မြမြမွန် ရေယာဉ်၊ အမ်ဗွီရတနာထွန်း(၇) ရေယာဉ်၊ အမ်ဗွီ ဥပေါသထ ရေယာဉ်တို့နှင့် အမ်ဗွီ လွိုင်ကော်ရေယာဉ် တို့ဖြင့် ဆန်အိတ်များသယ်ယူလာခဲ့ကြောင်း သိရှိရပါသည်။

        ထိုသို့ရောက်ရှိလာခဲ့သော ဆန်အိတ်များကို မြိတ်ခရိုင်စားသုံးသူရေးရာဦးစီးဌာန၊ မြိတ်ခရိုင် အကောက်ခွန်ဦးစီးဌာန၊ မြိတ်ခရိုင်လူဝင်မှုကြီးကြပ်ရေးနှင့်ပြည်သူ့အင်အားဦးစီးဌာန၊ မြိတ်ကုန်သွယ် ရေးဦးစီးဌာန၊ မြိတ်ခရိုင်ရဲတပ်ဖွဲ့တို့ပါဝင်သော အဖွဲ့များဖြင့်  (၂၂.၅.၂၀၂၄) ရက်နေ့တွင် MV မြမြမွန် ရေယာဉ်ဖြင့် ဆန်တန်(၃၅၀)၊ အိတ်ရေ(၇၀၀၀)နှင့် အမ်ဗွီရတနာထွန်း(၇) ရေယာဉ်ဖြင့် ဆန်တန် (၂၀၀)၊ အိတ်ရေ(၄၀၀၀)တို့အား ကွင်းဆင်းစစ်ဆေးခဲ့ပြီး (၂၃.၅.၂၀၂၄)ရက်နေ့တွင် အမ်ဗွီ ဥပေါသထ ရေယာဉ်ဖြင့် ဆန်တန် (၅၀၀)၊ အိတ်ရေ (၁၀၀၀၀) နှင့် အမ်ဗွီ လွိုင်ကော်ရေယာဉ် ဖြင့်ဆန်တန် (၃၅၀)၊ အိတ်ရေ (၇၀၀၀) တို့အား ကွင်းဆင်းစစ်ဆေးခဲ့ပြီး ကုန်စည်စီးဆင်း မှုမှန်ကန်စေရေးဆောင် ရွက်ခဲ့ကြောင်း သိရှိရပါသည်။

DOCA(တနင်္သာရီ)

         တနင်္သာရီတိုင်းဒေသကြီး၊ မြိတ်ခရိုင်တွင် စားသုံးသူရေးရာဦးစီးဌာနမှ ဦးဆောင်၍ ခရိုင်အစားအသောက်‌နှင့် ဆေးဝါးကွပ်ကဲရေးဦးစီးဌာန၊ ခရိုင်ပြည်သူ့ကျန်းမာရေးဦးစီးဌာန၊ မြို့နယ်စည်ပင် သာယာရေးအဖွဲ့မှ ဝန်ထမ်းများသည် ၂၀၂၄ခုနှစ်၊ မေလ (၂၃)ရက်နေ့၊ မွန်းလွဲ (၁း၀၀)အချိန်တွင် မြိတ်မြို့ပေါ်ရှိ အိမ်သုံးဆေးဝါးအရောင်းဆိုင်များသို့သွားရောက်၍  သုံးစွဲသူများဘေးအန္တရာယ်ကင်း ရှင်းရေးအတွက် မြန်မာဘာသာဖြင့်ကုန်အညွှန်းအမှတ်အသားဖော်ပြပါရှိသော ကလေးသုံးဒိုက် ပါကပ်ခွာများ ရောင်းချနေခြင်းရှိ/ မရှိ စျေးကွက်စောင့်ကြည့်စစ်ဆေးခဲ့ပါသည်။

        ထိုသို့စစ်ဆေးရာတွင် တရားဝင်မှတ်ပုံတင်ထား၍ မြန်မာဘာသာဖြင့်ကုန်အညွှန်းအမှတ်အသားဖော်ပြပါရှိသော ကလေးသုံးဒိုက်ပါကပ်ခွာများ အဓိကစစ်ဆေးခဲ့ပြီး စားသုံးသူပြည်သူများအသုံး ပြုရန်(သို့မဟုတ်)သုံးစွဲရန်အာမခံချက်မရှိသော ကုန်စည်များအားဝယ်ယူရောင်းချခြင်းမပြုရန်‌ ဆွေးနွေးပြောကြားခဲ့ပါသည်။ စစ်ဆေးတွေ့ရှိချက်အရ အဆိုပါဆိုင်များတွင် မြန်မာဘာသာဖြင့်ကုန်အညွှန်း အမှတ်အသားဖော်ပြပါရှိသော ကလေးသုံးဒိုက်ပါကပ်ခွာများကိုသာရောင်းချနေကြောင်း သိရှိရပြီး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(တနင်္သာရီ)

       စားအုန်းဆီကိုအသုံးပြု၍ လုပ်ငန်းဆောင်ရွက်နေသော ဒေသတွင်း အသေးစားစက်မှုလုပ်ငန်း များဖွံ့ဖြိုးတိုးတက်ရေးအတွက် ထားဝယ်မြို့ မုန့်မျိုးစုံလုပ်ငန်းနှင့် စားသောက်ဆိုင်လုပ်ငန်းများ အတွက် အသုံးပြုရန် လိုအပ်လျက်ရှိသော စားအုန်းဆီများအားပြည်တွင်းသို့    စားအုန်းဆီတင်သွင်းသည့် ကုမ္ပဏီများမှ   တိုက်ရိုက်ဝယ်ယူခွင့်ရရှိရေးအတွက်  တနင်္သာရီတိုင်း‌ဒေသကြီး၊  ထားဝယ်မြို့ရှိ မုန့်လုပ်ငန်းရှင်နှင့် စားသောက်ဆိုင်လုပ်ငန်းရှင်များမှ စားသုံးသူရေးရာဦးစီးဌာနသို့ လျှောက်ထားခဲ့သော စားအုန်းဆီ ပေပါ(၅၁) ပေပါသည်(၂၃.၅.၂၀၂၄) ရက်နေ့တွင် ထားဝယ်မြို့သို့ရောက်ရှိလာပြီး လုပ်ငန်းရှင်များမှ လုပ်ငန်းများတွင်  အသုံးပြုလျက်ရှိပါကြောင်း သိရှိရပါသည်။

DOCA(တနင်္သာရီ)

        ၂၀၂၄  ခုနှစ်၊  မေလ၊  ၂၃  ရက်နေ့၊  နံနက် (၁၀း၀၀) အချိန်တွင် စီးပွားရေးနှင့်ကူသန်း ရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရုံးချုပ်မှ ကျင်းပပြုလုပ်သော စားသုံးဆီဖြန့်ဖြူးခြင်းရောင်းချခြင်းဆိုင်ရာ လုပ်ငန်းညှိနှိုင်းအစည်းအဝေးကို စားသုံးသူရေးရာဦးစီးဌာန၊ တနင်္သာရီတိုင်းဒေသကြီးဦးစီးမှူးမှ online virtual ဖြင့်တက်ရောက်ခဲ့ပါသည်။

         အစည်းအဝေးတွင် ညွှန်ကြားရေးမှူးချုပ်မှ အဖွင့်အမှာစကားပြောကြားခဲ့ပြီး ဒုတိယညွှန်ကြားရေးမှူးချုပ်မှ စားသုံးဆီမူဝါဒအသစ်ဖြင့် တင်သွင်းသိုလှောင်ဖြန့်ဖြူးခွဲဝေပေးမည့် ကုမ္ပဏီများ စာရင်း၊ စားသုံးဆီများမှန်ကန်စွာရောက်ရှိစေရေး၊ အချိန်တွယ်အလေးချိန်မှန်ကန်စေရေး၊ အများ ထင်ယောင်ထင်မှား မဖြစ်စေရေးတို့ကို အလေးထားဆောင်ရွက်သွားရန် မှာကြားခဲ့ပါသည်။

          ဆက်လက်၍ တိုင်းဒေသကြီး/ပြည်နယ်ဦးစီးမှူးများက မိမိတို့ရရှိသည့် ခွဲတမ်းအလိုက် ကုမ္ပဏီများနှင့် ထပ်ဆင့်အစီအစဥ်များကို တစ်ဦးချင်းဆွေးနွေးခဲ့ကာ အစည်းအဝေးကို မွန်းလွဲ (၁၂း၃၀)နာရီအချိန်တွင် ရုတ်သိမ်းခဲ့ကြောင်းသိရှိရပါသည်။

DOCA(တနင်္သာရီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးမှ ခရိုင်ဦးစီးမှူးနှင့် ရွှေဘိုမြို့နယ်တာဝန်ခံတို့သည်  (၂၁-၅-၂၀၂၄)ရက်နေ့၊ နံနက်(၁၀:၀၀)နာရီအချိန်တွင် ရွှေဘိုမြို့၊ အမှတ်(၁၀)ရပ်ကွက်ရှိ အေးမေတ္တာဆန်စက်နှင့် ဆန်၊ စားသုံးဆီအမျိုးမျိုးရောင်းဝယ်ရေးဆိုင်သို့သွားရောက်၍ ဆန်စပါးသိုလှောင်ထားရှိမှု၊ ကြိတ်ခွဲထုတ်လုပ်မှုနှင့် ဈေးနှုန်း၊ ဈေးကွက်အခြေအနေများကို ကွင်းဆင်းစစ်ဆေးခဲ့ပါသည်။

    ထိုသို့စစ်ဆေးရာ၌ မိုးစပါး(ရွှေဘိုပေါ်ဆန်းစပါး) တင်း(၁၀၀)လျှင် (၄၃)သိန်းကျပ်ဖြင့်ဝယ်ယူရပြီး ကြိတ်ခွဲထွက်ရှိသည့်ဆန်များကို တစ်အိတ်လျှင် (၁၅၀၀၀ဝိ/-)ကျပ်မှ (၁၅၅၀၀ဝိ/-)ကျပ်ဖြင့်လည်းကောင်း၊ ဧရာမင်းစပါးတင်း(၁၀၀)လျှင် (၃၃)သိန်းကျပ်ဖြင့်ဝယ်ယူရပြီး ကြိတ်ခွဲထွက်ရှိသည့်ဆန်များကို တစ်အိတ်လျှင် (၁၄၀၀၀ဝိ/-)ကျပ်မှ (၁၄၅၀၀ဝိ/-)ဖြင့်လည်းကောင်း ရောင်းချလျက်ရှိကြောင်း၊ ရွှေဘိုမြို့၊ စက်မှုဇုန်ရှိ ဆန်စက်မှကြိတ်ခွဲပြီး ထွက်ရှိသောဆန်များကို အရောင်းဆိုင်ဖွင့်လှစ်၍ရောင်းချသည့်အပြင် အခြားဒေသများသို့လည်းတင်ပို့ရောင်းချကြောင်း၊ ဆန်ဈေးနှုန်းအနေဖြင့် ယခင်အပတ်ဈေးနှုန်းထက် သိသိသာသာဈေးနှုန်းမြှင့်တက်ခြင်းမရှိဘဲ အရောင်းအဝယ်မှာလည်း ပုံမှန်သာဖြစ်ကြောင်းစစ်ဆေးတွေ့ရှိရသဖြင့် ခရိုင်ဦးစီးမှူးက စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် တိုင်းဒေသကြီး/ ပြည်နယ်များအတွင်းရှိ ဆန်အပါအဝင် အခြေခံစားသောက်ကုန်ပစ္စည်းများ ပြတ်လတ်မှုမရှိစေရေးနှင့် ဈေးနှုန်းများတည်ငြိမ်စေရေးအတွက် ကြပ်မတ်ဆောင်ရွက်လျက်ရှိကြောင်းနှင့် လုပ်ငန်းရှင်များအနေဖြင့် ဈေးနှုန်းမြင့်တင်ရောင်းချခြင်းအလို့ငှာ သိုလှောင်ခြင်း၊ ဖြန့်ဖြူးခြင်း၊ ရောင်းချခြင်းများမပြုလုပ်ရန် အသိပညာပေးဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)