သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ ပဲခူးတိုင်းဒေသကြီး သာယာဝတီခရိုင်၊ သာယာဝတီမြို့နယ်၊ ရေဝေရပ်ကွက် ၊ ရန်ကုန်-ပြည်လမ်း၊ ဆင်ဖြူတော်ဆန်စက်၌ (၂၁.၂.၂၀၂၂) ရက်နေ့၊ နံနက်(၁၀:၀၀) နာရီအချိန်တွင် ဆန်စက်ဝန်ထမ်း(၃)ဦး၊ ဆန်စက်လုပ်သား (၁၀)ဦး ၊ စုစုပေါင်း(၁၃)ဦးတို့အား စားသုံးသူ ကာကွယ်ရေး အသိပညာပေးဟောပြောခဲ့ပါသည်။

          ခရိုင်ဉီးစီးမှူး ဦးအောင်သိန်းမှ စားသုံးသူရေးရာဦးစီးဌာန စတင်ဖွဲ့စည်းဆောင်ရွက်မှု မြို့နယ် တာဝန်ခံ ဒေါ်အေးသန္တာထွန်း မှ စားသုံးသူကာကွယ်ရေးဉပဒေပါအကြောင်းအရာများ၊ ကုန်စည်နှင့် ဝန်ဆောင်မှုများကြောင့် နစ်နာဆုံးရှုံးမှုများဖြစ်ပေါ်လာပါက လွယ်ကူလျင်မြန်စွာ တိုင်ကြားနိုင်သည့် စားသုံးသူ သတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ (Consumer Information and Complaint Center-CICC)ကို ခရိုင်ဦးစီးမှူးရုံးတွင် ဖွင့်လှစ်ထားရှိကြောင်း၊ ကျန်းမာရေးဝန်ကြီးဌာနမှ ထုတ်ပြန်ထားသော COVID-19 ကာကွယ်ရေးနည်းလမ်းများနှင့်အညီ ပါးစပ်နှင့်နှာခေါင်းစည်းများ  စနစ်တကျ ဝတ်ဆင်ရန် အသိပညာပေးဟောပြောဆောင်ရွက်ခဲ့ပြီး လက်ကမ်းစာစောင်များ ဖြန့်ဝေခဲ့ ပါကြောင်း သတင်းရရှိပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)

          ပဲခူးတိုင်းဒေသကြီး၊ စားသုံးသူရေးရာဦးစီးဌာန တိုင်းဒေသကြီးဦးစီးမှူး၏ စီမံခန့်ခွဲမှု အစီအစဉ်ဖြင့် တိုင်းဒေသကြီးဉီးစီးမှူးရုံးမှ ဝန်ထမ်းများနှင့် အတူ မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းမှ ဦးဆောင်ပြုလုပ်သောသက်ဆိုင်ရာဒေသအလိုက် စားသုံးဆီ ဈေးနှုန်း တည်ငြိမ်ရေးနှင့် သက်သာစွာ ဝယ်ယူ နိုင်ရေး အတွက် ပဲခူးခရိုင်၊ ပဲခူးမြို့ဆီကုန်သည်အသင်းမှ မိမိဒေသအတွင်း အရောင်းကားဖြင့် တိုက်ရိုက် ရောင်းချမှု အစီအစဉ်ကို အရောင်းကိုယ်စားလှယ်များနှင့် ပူးပေါင်းကာ ၂၁.၂.၂၀၂၂ နံနက်(၁၀:၀၀) အချိန်မှ စ၍ ပဲခူးမြို့ပေါ်ရှိ အထူးစုံစမ်းရေးဉီးစီးဌာန၊ စက်မှုကြီးကြပ် ရေးဦးစီးဌာန၊ ဌာဆိုင်ရာစုပေါင်းရုံး၊ ကျေးလက်ဒေသဖွံ့ဖြိုးရေးဦးစီးဌာန၊ မြန်မာနိုင်ငံတိုင်းရဲတပ်ဖွဲ့မှူးရုံး၊ ပြည်တွင်းအခွန်များ ဦးစီးဌာန၊ ပင်စင်ဦးစီးဌာနနှင့် အာမခံလုပ်ငန်းရုံးများသို့ စားသုံးဆီ တစ်ပိဿာလျှင် ၅၀၀ဝိ/ ကျပ်နှုန်းဖြင့် လှည့်လည် ရောင်းချခဲ့ရာ သက်ဆိုင်ရာဌာနဝန်ထမ်းများနှင့် ပြည်သူများအား ရောင်းချပေးခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန

ပဲခူးတိုင်းဒေသကြီး

         စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ လပွတ္တာခရိုင်၊ မော်လမြိုင်ကျွန်းမြို့နယ် တာဝန်ခံ ဦးမင်းဇော်လတ်သည် မြို့နယ်စည်ပင်သာယာရေးအဖွဲ့နှင့်ပူးပေါင်း၍ ၂၂.၂.၂၀၂၂ ရက်နေ့ နေ့လည်(၁၃:၃၀) နာရီအချိန်တွင် ဗိုလ်ချုပ်ဈေးတာဝန်ခံရုံး၌ ကုန်မျိုးစုံဆိုင် လုပ်ငန်းရှင်များအား စားသုံးသူကာကွယ်ရေးဥပဒေပါအချက်များကို အသိပညာပေးဟောပြောပွဲပြုလုပ်ခဲ့ပါသည်။

          အသိပညာပေးဟောပြောပွဲသို့ ဗိုလ်ချုပ်ဈေးရှိ ကုန်မျိုးစုံဆိုင်လုပ်ငန်းရှင် (၈)ဦး တက်ရောက် ခဲ့ပြီး၊ အဆိုပါဟောပြောပွဲတွင် စားသုံးသူရေးရာဦးစီးဌာန မြို့နယ်တာဝန်ခံမှ စားသုံးသူကာကွယ် ရေးဥပဒေပါ စီးပွားရေးလုပ်ငန်းရှင်များ၏တာဝန်များ၊ တားမြစ်ချက်များ၊ ကုန်စည်နှင့်စပ်လျဉ်း၍ အာမခံပေးမှု၊ ကုန်စည်အပေါ် တာဝန်ရှိမှု၊ ကုန်အစည်များတွင် ကုန်အညွှန်းအမှတ်အသားဖော်ပြခြင်း ဆိုင်ရာအချက်များကို အသိပညာပေးဟောပြောဆွေးနွေးခဲ့ပြီး လုပ်ငန်းရှင်များမှ သိလိုသည့်အချက် များမေးမြန်းမှုကို ပြန်လည်ဖြေကြားပေးခဲ့ကြောင်းသိရှိရပါသည်။

DOCA(ဧရာဝတီ)

            စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးနှင့် ဝန်ထမ်းများသည် ကော့ကရိတ်မြို့နယ် တာဝန်ခံ ဦးမောင်မောင်အေး ၊ ဒု-ကြီးကြပ်ရေးမှူး ဒေါ်သီတာဌေး တို့နှင့်အတူ( ၂၀-၂-၂၀၂၂) ရက်နေ့ ၁၃:၃၀ နာရီမှ ၁၅:၀၀ အချိန်တွင် ကော့ကရိတ်မြို့၊ အမှတ်(၃)ရပ်ကွက်၊ ဗိုလ်ချုပ်လမ်းရှိ ရွှေပျံလွှားမုန့်မျိုးစုံလုပ်ငန်း၊ ကော့ကရိတ်မြို့၊ အမှတ်(၃)ရပ်ကွက်၊ ဘုံကျောင်းလမ်း ရှိ မိုးကြယ်စင်သောက်ရေသန့်လုပ်ငန်း၊ ကော့ကရိတ်မြို့၊ အမှတ်(၇)ရပ်ကွက်၊ မေတ္တာလမ်းရှိ ဦးချိ(ဆိတ်ချီးခါး)လုပ်ငန်းတို့ကို ထုတ်ကုန်များလုံခြုံစိတ်ချရမှုရှိစေရေး ကွင်းဆင်းစစ် ဆေးခဲ့ကြောင်း သိရသည်။

              ထိုသို့စစ်ဆေးရာတွင် လုပ်ငန်းရှင်များအနေဖြင့်၂၀၁၉ စားသုံးသူကာကွယ်ရေး ဥပဒေပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်းပြီး လိုက်နာဆောင်ရွက်ရမည့်အချက်များနှင့် စားသုံးသူကာကွယ်ရေး ကော်မရှင်မှထုတ်ပြန်ထားသော ၂/ ၂၀၁၉ ပါ ကုန်စည်အမျိုးအစား အလိုက် ဖော်ပြရမည့် ညွှန်ကြားချက်များကို ပြည့်စုံမှန်ကန်စွာဖော်ပြလိုက်နာ ဆောင်ရွက်ရန်  ပြည်နယ်ဦးစီး မှူး ဦးသန်းဦးက ရှင်းလင်းဆွေးနွေးမှာကြားပြီး မြေပြင်လုပ်ငန်းဆောင်ရွက် မှုအခြေအနေများကို ကြည့်ရှု့စစ်ဆေးခဲ့ပါသည်။

              ထို့အပြင် ဌာန၏မျှော်မှန်းချက်ဖြစ်သော “စားသုံးသူများလုံခြုံစိတ်ချရမှုရှိစေရန်” အတွက် ဈေးကွက်ရောက်ပြီးကုန်စည်နှင့် ဈေးကွက်မရောက်မီကုန်စည်များကို လစဉ် လျာထားချက်များချမှတ်၍ ထုတ်ကုန်လုံခြုံစိတ်ချရမှုရှိစေရေးဆိုင်ရာလုပ်ငန်းများ ဆောင်ရွက်လျက်ရှိကြောင်း၊ လုပ်ငန်းရှင်များအနေဖြင့် ကုန်စည်များတွင် ကုန်အညွှန်းအမှတ်ဖော်ပြခြင်းနှင့်စပ်လျဉ်း၍ ပြည့်စုံမှန်ကန်မှု ရှိ/မရှိကို ဌာနသို့ ဝန်ဆောင်ခပေးရန် မလိုဘဲ စိစစ်လျှောက်ထားနိုင်ကြောင်း ကွင်းဆင်းစစ်ဆေးအသိပညာပေးခဲ့ပါသည်။

DOCA(ကယား)

          စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်၊ ခရိုင်ဦးစီးမှူး၊ ဦးဇော်မင်းသည် (၁၀-၂-၂၀၂၂) ရက်နေ့ (၁၀:၀၀)အချိန်တွင် Vegetable Oil နှင့် Cooking Oil များ တပ်ဆင်ရောင်းချနေသော စားသုံးဆီများနှင့်စပ်လျဉ်း၍ ထုတ်ပြန်ထားသော ညွှန်ကြားချက် (၁/၂၀၂၁) နှင့်ပတ်သက်၍ ခရိုင်ဆီကုန်သည်နှင့် ဆီလုပ်ငန်းရှင်များအသင်းတာဝန်ရှိသူများကို မိတ္ထီလာခရိုင်ဦးစီးမှူးရုံးသို့ ဖိတ်ခေါ်၍ ခရိုင်ဦးစီးမှူးရုံးခန်းတွင် တွေ့ဆုံခဲ့ပါသည်။

          ထိုသို့တွေ့ဆုံရာတွင် ကုန်အညွှန်းအမှတ်သားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူ ကာကွယ်ရေးကော်မရှင်သည် (၂/၂၀၁၉)ဖြင့် ကုန်စည်များတွင် မြန်မာဘာသာဖြင့်ဖြစ်စေ၊ မြန်မာနှင့် အခြားဘာသာတစ်ခု (သို့မဟုတ်) တစ်ခုထက်ပို၍ဖြစ်စေ ပြည်စုံစွာဖော်ပြနိုင်ရေး၊ ကုန်စည်ထုတ်လုပ်မှုနှင့်စပ်လျဉ်း၍ စားသုံးသူနစ်နာဆုံးရှုံးမှုမရှိစေရေး၊ စားသုံးသူကာကွယ်‌ရေးဥပဒေပါ လုပ်ငန်းရှင်များ လိုက်နာရမည့် တာဝန်များ၊ တားမြစ်ချက်များနှင့် ပြစ်မှုပြစ်ဒဏ်များအား သိရှိစေရန် ရှင်းလင်းပြောကြားခဲ့ပြီးနောက် ကုန်အညွှန်းအမှတ်အသားဖော်ပြရာတွင် ဟင်းသီးဟင်းရွက်ဆီ (Vegetable Oil နှင့် Cooking Oil ) ဟူ၍ အမျိုးအမည်များတွင် ထည့်သွင်းဖော်ပြရောင်းချနေမှုနှင့် စပ်လျဉ်း၍ စီးပွားရေးလုပ်ငန်းရှင်များ လိုက်နာဆောင်ရွက်ရန် (၂၀-၁၂-၂၀၂၁) ရက်နေ့တွင် ညွှန်ကြားချက် (၁/၂၀၂၁)အား ညွှန်ကြားချက် ထုတ်ပြန်ထားကြောင်း၊ ပင်ရင်းပါဝင်ပစ္စည်းကို အခြေခံသော ကုန်စည်၏အမျိုးအမည်၊ အရွယ်အစား၊ အရေအတွက်နှင့် အသား တင်ပမာဏနှင့် ထားသိုသိမ်းဆည်းမှုအညွှန်းတို့ကို မဖြစ်မနေ မြန်မာဘာသာဖြင့်ဖော်ပြရမည်ဖြစ်ကြောင်း၊ ကုန်စည်၏အသားတင်ပမာဏတို့အား မြန်မာအလေးချိန်ယူနစ်ဖြစ်သော ပိဿာ၊ ကျပ်သားတို့ကို မြန်မာဘာသာဖြင့် ဖော်ပြရမည်ဖြစ်ကြောင်း၊ ဟင်းသီးဟင်းရွက်ဆီ (စားအုန်းဆီ)၊ ဟင်းသီးဟင်းရွက်ဆီ (အဆင့်မြင့်စားအုန်းဆီ)ဟူ၍ ဖော်ပြရမည်ဖြစ်ကြောင်း၊ ဤညွှန်ကြားချက်သည် စတင်ထုတ်ပြန်ပြီး (၆)လပြည့်မြောက်ပြီးသည့် (၂၀-၆-၂၀၂၂) ရက်နေ့မှ စတင်၍ အာဏာ သက်ရောက်မည်ဖြစ်ကြောင်း၊ စီးပွားရေးလုပ်ငန်းရှင်များအနေဖြင့် အဆိုပါ အချက်များအား လိုက်နာမှု မရှိပါက စားသုံးသူကာကွယ်ရေးဥပ‌ဒေအရ အရေးယူဆောင်ရွက်သွားမည်ဖြစ်၍ ဆီကုန်သည်နှင့်ဆီလုပ်ငန်းရှင်များအသင်းအနေဖြင့် ဆီထုတ်လုပ်ရောင်းချသော လုပ်ငန်းရှင်များအား ကျယ်ကျယ်ပြန့်ပြန့် အသိပေးဆွေးနွေးပြောကြားထားရန်လိုအပ်ပါကြောင်း ရှင်းလင်းဆွေးနွေး ပြောကြားခဲ့ပါသည်။

        ဆီကုန်သည်နှင့် ဆီလုပ်ငန်းရှင်များအသင်းတာဝန်ရှိသူများမှလည်း ညွှန်ကြားချက်အပေါ် လိုက်နာဆောင်ရွက်သွားမည်ဖြစ်ကြောင်း၊ မိတ္ထီလာခရိုင်အတွင်းရှိ စားသုံးဆီထုတ်လုပ်ရောင်းချသူများအား ဤညွှန်ကြားချက်ကိုဖြန့်ဝေ၍ အာဏာသက်ရောက်မည့် (၂၀-၆-၂၀၂၂) ရက်နေ့မတိုင်မီ ပြောင်းလဲ ပြင်ဆင်ထုတ်လုပ်/ရောင်းချသွားရန် ကြိုးပမ်းဆောင်ရွက်သွားမည်ဖြစ်ကြောင်း ပြန်လည်ရှင်းလင်းပြောကြားခဲ့ပါသည်။

DOCA(မန္တလေး)