သတင်းနှင့် လှုပ်ရှားမှုများ

          ၂.၁၂.၂၀၂၀ ရက်နေ့တွင် ဒု-ခရိုင်ဦးစီးမှူး ဒေါ်ခိုင်မို့မို့၊ ဆားလင်းကြီးမြို့နယ်တာဝန်ခံ ဒေါ်မိုးမိုးမြင့်နှင့် ယင်းမာပင်မြို့နယ်တာဝန်ခံ ဒေါ်သီတာခိုင်တို့သည် ယင်းမာပင်မြို့နယ်၊ ပြန်လှည့် ကျေးရွာအတွင်းရှိ ကုန်မျိုးစုံဆိုင်(၅)ဆိုင်တို့အား သက်ဆိုင်ရာမိတ်ဖက်ဌာနများဖြင့် ပူးပေါင်း၍ ထုတ်ကုန်လုံခြုံစိတ်ချရမှုရှိစေရေးအတွက် သက်တမ်းလွန်ကုန်ပစ္စည်းများ ၊ အစားအသောက်နှင့် ဆေးဝါးကွပ်ကဲရေးဦးစီးဌာနမှ စားသုံးရန်မသင့် ကြော်ငြာထားသော စားသောက်ကုန်ပစ္စည်းများ ရောင်းချခြင်း ရှိ/မရှိကွင်း ဆင်းစစ်ဆေးခဲ့ရာ ရောင်းချလျှက်ရှိသောကုန်စည်များတွင် ကုန်အညွှန်းအမှတ်အသားများပြည့်စုံမှုမရှိကြောင်း စိစစ်တွေ့ရှိရပါသည်။

      ထို့နောက် လုပ်ငန်းရှင်များအား ဈေးကွက်အတွင်းရောင်းချနေသော ကုန်စည်များကို ကုန်ပစ္စည်းအမျိုးအစားအလိုက် ဖော်ပြပါရှိရမည့် ကုန်အညွှန်းအမှတ်အသား ပြည့်စုံစွာ ဖော်ပြခြင်း မရှိသော ကုန်ပစ္စည်းများကို ရောင်းချခြင်းမပြုရန်နှင့် COVID-19 ကာလအတွင်း ကျန်းမာရေးအထောက်အကူပြုပစ္စည်းများဖြစ်သော  Hand gel ၊ Mask ၊ ဆေးဝါးများ ၊ စားသုံးကုန်ပစ္စည်းများကို ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းများ မပြုလုပ်ရန်၊ မရောင်းချရန် ရှင်းလင်းဆွေးနွေးခဲ့ပါသည်။

      အလားတူ ပ/သီးကုန်းကျေးရွာအတွင်းရှိ ကုန်မျိုးစုံဆိုင်များနှင့် ကုန်စုံဆိုင်များတွက်လည်း မိတ်ဖက်ဌာနများနှင့်အတူ ဈေးကွက်စောင့်ကြည့်ကွင်းဆင်းစစ်ဆေးဆောင်ရွက်ခြင်းနှင့် စစ်ဆေးခဲ့ကြောင်း သတင်းရရှိပါသည်။

စစ်ကိုင်းတိုင်းဒေသကြီး

စားသုံးသူရေးရာဦးစီးဌာန

       ၅.၁၂.၂၀၂၀ ရက်နေ့တွင် စစ်ကိုင်းခရိုင်၊ စားသုံးသူရေးရာဦးစီးဌာနအနေဖြင့် ကျောက်စိမ်းအချောထည်လုပ်ငန်းရှင်များအသင်းခန်းမ၌ ကျင်းပပြုလုပ်သော ပြည်တွင်းကုန်သွယ်မှုလုပ်ငန်းများ၊ စားသုံးသူကာကွယ်ရေးလုပ်ငန်းများအကြောင်းနှင့် စီးပွားရေးလုပ်ငန်းရှင်များ လိုက်နာရမည့်အကြောင်းများနှင့်ပတ်သက်သည့် ဆွေးနွေးပွဲကို ကျင်းပပြုလုပ်ခဲ့ရာ စားသုံးသူရေးရာဦးစီးဌာန၊ ခရိုင်ဦးစီးမှူးရုံးရှိ ဝန်ထမ်းများ၊ ကျောက်စိမ်း အချောထည် လုပ်ငန်းရှင်များအသင်းမှ လုပ်ငန်းရှင်များ၊ စုစုပေါင်း (၇) ဦး တက်ရောက်ဆွေးနွေး ခဲ့ပါသည်။

     အခမ်းအနားတွင် စားသုံးသူရေးရာဦးစီးဌာနမှ တာဝန်ရှိသူတစ်ဦးက မိမိတို့ဌာနအနေဖြင့် စားသုံးသူအကာအကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုမြှင့်တင်ရေးလုပ်ငန်းများ၊ ပြည်ပပို့ကုန်မြှင့်တင်ရေးလုပ်ငန်းများလည်း ဆောင်ရွက်ရကြောင်း၊ စားသုံးသူအကာအကွယ်ပေးရေး အတွက် စီးပွားရေးလုပ်ငန်းရှင်များကို စားသုံးသူကာကွယ်ရေးဥပဒေနှင့်အညီ ထိန်းချုပ် ဆောင်ရွက်ရကြောင်းပြောကြားခဲ့ပါသည်။ ဆက်လက်၍ ကျောက်စိမ်းအချော ထည်လုပ်ငန်းရှင်များကို စားသုံးသူကာကွယ်ရေးဥပဒေ အခန်း(၁၀)ပါ စီးပွားရေးလုပ်ငန်းရှင်များ လိုက်နာရမည့်အချက်များ၊ အခန်း (၁၁) ပါ ကုန်စည်နှင့်စပ်လျဉ်း၍ အာမခံချက်ပေးသည့်အချက်များ၊ စားသုံးသူကာကွယ်ရေးဥပဒေ အခန်း (၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ လိုက်နာရမည့်အချက်များအား ရှင်းလင်းဆွေးနွေးခဲ့ကြောင်း သတင်းရရှိပါသည်။

စစ်ကိုင်းတိုင်းဒေသကြီး
စားသုံးသူရေးရာဦးစီးဌာန

       စစ်ကိုင်းတိုင်းဒေသကြီး၊ ကသာခရိုင်၊ ကသာမြို့ပေါ်တွင် ရောင်းချနေသော ကုန်စုံဆိုင်များ နှင့် အလှကုန်ဆိုင်များတွင် တားမြစ်ကုန်စည်များ ရောင်းချခြင်းရှိ/မရှိ၊ အရေးကြီးကုန်စည်များအား ဈေးနှုန်းမြှင့်တင်ရောင်းချမှု ရှိ/မရှိနှင့် သက်တမ်းလွန်ပစ္စည်းများ ရောင်းချခြင်း ရှိ/မရှိ စစ်ဆေးခြင်း ကို ၂၀၂၀ ပြည့်နှစ် ဒီဇင်ဘာလ (၈)ရက်နေ့တွင် ကသာခရိုင် စားသုံးသူရေးရာဦးစီးဌာနမှ ဝန်ထမ်းများ၊ မြို့နယ်အထွေထွေအုပ်ချုပ်ရေးဦးစီးဌာန၊ စည်ပင်သာယာရေးကော်မတီ၊ မြန်မာနိုင်ငံရဲတပ်ဖွဲ့၊ ခရိုင်ကျန်းမာရေးဦးစီးဌာန၊ ခရိုင်အစားအသောက်နှင့် ဆေးဝါးကွပ်ကဲရေးဦးစီးဌာနတို့ဖြင့် ပူးပေါင်း၍ ဈေးဆိုင် (၇)ဆိုင်အား စစ်ဆေးခဲ့ပါသည်။

          ထိုသို့စစ်ဆေးရာတွင် ခရိုင်စားသုံးသူရေးရာဦးစီးဌာနမှ ဦးသန်းပိုနှင့် တာဝန်ရှိသူများသည် သက်တမ်းလွန် အစားအသောက်များ၊ တားမြစ်ကုန်ပစ္စည်းများ၊ ကုန်စည်များတွင် ကုန်အညွှန်းအမှတ်အသား(မြန်မာစာဖြင့်) ပြည့်စုံစွာ ဖော်ပြမှုရှိ/မရှိ၊ ကိုဗစ်-၁၉ရောဂါကာလ ကျန်းမာရေး အထောက်အကူပြုဆေးဝါးများနှင့် ကုန်စည်များ ဈေးနှုန်းမြှင့်တင်ရောင်းချခြင်းရှိ/မရှိ တို့ကို လိုက်လံစစ်ဆေးခဲ့ကြပြီး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

စားသုံးသူရေးရာဦးစီးဌာန

ကသာခရိုင်

       စစ်ကိုင်းတိုင်းဒေသကြီး၊ ကောလင်းခရိုင်၊ ဝန်းသိုမြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံ ဦးစိုးစိုးသည် ဝန်းသိုမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနဖြင့် ပူးပေါင်း၍ ၂၀၂၀ ပြည့်နှစ် ဒီဇင်ဘာလ(၇)ရက်နေ့တွင် စားသုံးသူကာကွယ်ပေးရေးအသိပညာပေး Talk Show ကျင်းပပြုလုပ်ခဲ့ပါသည်။

    အဆိုပါ Talk Show တွင် စားသုံးသူရေးရာဦးစီးဌာန၏ ရည်မှန်းချက်၊ မျှော်မှန်းချက်များ၊ စား သုံးသူကာကွယ်ရေးဥပဒေတွင် ပါဝင်သည့် စားသုံးသူအခွင့်အရေး(၈)ချက်၊ စားသုံးသူ၏တာဝန်(၄) ရပ်နှင့် လုပ်ငန်းရှင်များ၏ တာဝန်(၁၁)ရပ်များအကြောင်း ဦးစွာရှင်းလင်းပြောကြားခဲ့ပြီး ယခင်က ရပ်ကွက်/ကျေးရွာ/အခြေခံပညာကျောင်းများနှင့် ဌာနဆိုင်ရာများအား စားသုံးသူကာကွယ်ရေး အသိ ပညာပေးဟောပြောပွဲများ ကျင်းပပြုလုပ်သော်လည်း ကိုဗစ်-၁၉ ကာလအတွင်း ဟောပြောပွဲများ ရပ်နားထားရကြောင်း၊ ဟောပြောပွဲများ ရပ်နားထားရသော်လည်း စီးပွားရေးနှင့်ကူးသန်းရောင်းဝယ် ရေးဝန်ကြီးဌာနမှ ထုတ်ပြန်ထားသော အမိန့်ကြော်ငြာစာအမှတ်(၂၁/၂၀၂၀)အရ အရေးကြီးကုန်စည် ဖြစ်သည့် ကိုဗစ်-၁၉ ကာကွယ်၊ ထိန်းချုပ်၊ ကုသရေးဆိုင်ရာ ကျန်းမာရေးအထောက်အကူပြု ပစ္စည်းများ၊ ဆေးဝါးများနှင့် စားသုံးကုန်ပစ္စည်းများအား ဈေးနှုန်းမြှင့်တင်ရောင်းချခြင်း၊ ဈေးကစား ရန်ရည်ရွယ်ချက်ဖြင့် သိုလှောင်ထားခြင်းများ ရှိ/မရှိကို ကုန်စုံဆိုင်များ၊ ဈေးများနှင့် ဆေးဆိုင်များသို့ လစဉ် ကွင်းဆင်းစစ်ဆေးလျက်ရှိကြောင်း ပြောကြားခဲ့သည်။

          ဆက်လက်၍ စားသုံးသူရေးရာဦးစီးဌာနအနေဖြင့် စီးပွားရေးလုပ်ငန်းရှင်များ ထုတ်လုပ် ရောင်းချလျက်ရှိသည့် ကုန်စည်များတွင် စားသုံးသူကာကွယ်ရေးဥပဒေ အခန်း(၁၈)အရ ကုန်အညွှန်း အမှတ်အသားနှင့် ပတ်သက်သည့် ကုန်စည်များတွင် မြန်မာဘာသာဖြင့် ဖြစ်စေ၊ မြန်မာ ဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ဖော်ပြခြင်းရှိ/မရှိကိုလည်း စစ်ဆေး လျက်ရှိပြီး လိုက်နာခြင်း မရှိသည့် လုပ်ငန်းရှင်များအား စာဖြင့်၊ နှုတ်ဖြင့် သတိပေးခြင်း၊ ခံဝန် ကတိများ ပြုလုပ်၍ စားသုံးသူ ကာကွယ်ရေးဥပဒေပါ အရေးယူနိုင်သည့် ဥပဒေပုဒ်မများကိုလည်း ရှင်းလင်းပေးလျက်ရှိကြောင်း၊ အကယ်၍ စားသုံးသူများ နစ်နာဆုံးရှုံးမှုရှိလာပါက ကသာခရိုင် စားသုံးသူရေးရာဦးစီးဌာန၊ စားသုံးသူ သတင်းပြန်ကြားရေးနှင့် တိုင်ကြားရေးစင်တာ (CICC) (၀၇၅-၂၀၂၅၀၆၂)သို့  လက်ခံပြေစာ၊ အသံဖိုင်၊ video ဖိုင်များဖြင့် ဆက်သွယ် တိုင်ကြားနိုင် ကြောင်း၊ DOCA Myanmar application မှလည်း တိုင်ကြားနိုင်ကြောင်း ရှင်းလင်းဆွေးနွေး ပြောကြားခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန

ကသာခရိုင်

      ရှမ်းပြည်နယ် ၊ စားသုံးသူရေးရာကော်မတီ အစည်းအဝေး (၂/၂၀၂၀) အား ၂၇.၁၁.၂၀၂၀ ရက်နေ့(၁၃:၀၀)နာရီအချိန်တွင် ရှမ်းပြည်နယ်အစိုးရအဖွဲ့ရုံး၊ ဘဏ္ဍာရေးဝန်ကြီးရုံးအစည်းအဝေး ခန်းမ၌ ကျင်းပခဲ့ပါသည်။ အစည်းအဝေးသို့ ဒု-ဥက္ကဌ ရှမ်းပြည်နယ် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဦးစိုင်းလုံကျော်က အဖွင့်အမှာစကားပြောကြားပြီး ရှမ်းပြည်နယ် စားသုံးသူ ရေးရာဦးစီးဌာနမှအတွင်းရေးမှူး ဦးတင့်လွင်ဦးက စားသုံးသူကာကွယ်ရေးဉပဒေအရ စားသုံးသူ ရေးရာကော်မတီ၏ လုပ်ပိုင်ခွင့်နှင့် လုပ်ငန်းတာဝန်များအားရှင်းလင်းတင်ပြခြင်း ၊ ဦးစီးအရာရှိ ဒေါ်နှင်းအိအောင်က စားသုံးသူကာကွယ်ရေးဆိုင်ရာလုပ်ငန်းဆောင်ရွက်ချက်များ၊ ဈေးကွက် စောင့်ကြည့်စစ်ဆေးခြင်းများ၊ ၂၀၂၀-၂၀၂၁ဘဏ္ဍာနှစ် စားသုံးသူကာကွယ်ရေးဆိုင်ရာလုပ်ငန်း အစီအစဉ်များ၊ စီမံခန့်ခွဲရေးနည်းလမ်းအရ အမိန့်ချပုံစံနှင့် နှစ်ဦးသဘောတူပုံစံများ၊ ၂၀၂၀ ပြည့်နှစ် ဇန်နဝါရီလမှ နိုဝင်ဘာလအထိ CICC ဖြေရှင်းဆောင်ရွက်မှုများ၊ အိမ်ယာဆောက်လုပ်/ ပြုပြင်ခြင်းဆိုင်ရာအငြင်းပွားမှု ဖြေရှင်းနိုင်မှုအခြေအနေ၊ တယ်လီနော Simcard နှင့် ပတ်သက်သည့်တိုင်ကြားမှု၊ Wave Pay တိုင်ကြားမှု၊ Wave Money တိုင်ကြားမှုတို့နှင့် ပတ်သက်၍ ဖြေရှင်းဆောင်ရွက်မှုများနှင့်ကိုယ်ပိုင်အုပ်ချုပ်ခွင့်ရ တိုင်း/ခရိုင်ဆင့် စားသုံးသူရေးရာကော်မတီဖွဲ့စည်းနိုင်ရေး စသည်တို့ကို တင်ပြဆွေးနွေးခဲ့ရာ တက်ရောက်လာသူများမှ ဆွေးနွေးတင်ပြချက်များအား အတည်ပြုမှတ်တမ်းတင်ခြင်း၊ ဆွေးနွေးအကြံပြုခြင်းတို့ ဆောင်ရွက်ခဲ့ပြီးအစည်းအဝေးအား (၁၅:၁၅)နာရီ အချိန်တွင် ရပ်နားခဲ့ကြောင်း သတင်းရရှိပါသည်။

ရှမ်းပြည်နယ်(တောင်ကြီး)

စားသုံးသူရေးရာဦးစီးဌာန