သတင်းနှင့် လှုပ်ရှားမှုများ

         မန္တလေးတိုင်းဒေသကြီး၊ စားသုံးသူရေးရာဦးစီးဌာန၊ မိတ္ထီလာခရိုင်၊ ခရိုင်ဦးစီးမှူး၏ လမ်းညွှန်ချက်ဖြင့် ဒေါ်စိမ်းစိမ်းထွေး (စစ်ဆေးရေး အရာရှိ)ဦးဆောင်သော ဈေးကွက်စောင့်ကြည့် စစ်ဆေးရေး အဖွဲ့သည် ၂၀၂၂ခုနှစ် ဩဂုတ်လ(၂၂)ရက်နေ့ ၊ နံနက် (၁၀း၀၀) အချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ အမိန့်ကြော်ငြာစာ အမှတ် ၂၁/၂၀၂၀ အရဆေးဝါးများကိုအ‌ရေးကြီးကုန်စည်အဖြစ်သတ်မှတ်လိုက်သဖြင့် ဆေးဝါးများကို စျေးနှုန်းမြှင့်တင် ရောင်းချခြင်း၊ စျေးနှုန်းမြှင့်တင်ဖြန့်ဖြူးခြင်း၊ စျေးကစားရန်ရည်ရွယ််၍ သိုလှောင်ခြင်းမပြုရန်ကို လည်းကောင်း၊ စားသုံးသူကာကွယ်ရေးဥပဒေအရ တရားမဝင်ဆေးဝါးများ၊ အတုအပနှင့် အရည်အသွေးနိမ့်ဆေးဝါများ ရောင်းချခြင်းမပြုရန်ကိုလည်းကောင်း၊ ဆေးပစ္စည်းများနှင့် အထောက်အကူပြု ပစ္စည်းများပြတ်လပ်မှုမရှိစေရေး၊ သတ်မှတ်အရည်အသွေးနှင့် စျေးနှုန်း မှန်ကန်မှုရှိစေ‌ရေးအတွက် မိတ္ထီလာမြို့ပေါ်ရှိ ဆေးဆိုင်များသို့ ဈေးကွက်စောင့်ကြည့် စစ်ဆေးခြင်း များ ဆောင်ရွက်ခဲ့ပါသည်။

          အဆိုပါ ဆေးဆိုင်များတွင် ဆေးဝါးပြတ်လပ်မှုမရှိခြင်း၊ ဆေးစျေးနှုန်းမှာ အခြားကုန်စည်များနည်းတူ အတိုင်းအတာတစ်ခုထိ မြင့်တတ်လာသော်လည်း စျေးကစားရန် ရည်ရွယ်ချက်ဖြင့် သိုလှောင် ခြင်း၊ တရားမဝင်ဆေးဝါးများ ရောင်းချမှုမရှိကြောင်း တွေ့ရှိရပါသည်။ အရောင်ဆိုင်ရှင်များအား ကုန်စည်များကို စျေးကွက်အတွင်း စျေးနှုန့်မြှင့်တင်ရောင်းချခြင်း၊ စျေးနှုန်းမြှင့်တင်ဖြန့်ဖြူးခြင်း (သို့မ ဟုတ်) စျေးကစားရန်ရည်ရွယ်ချက်ဖြင့်  သိုလှောင်ခြင်းများ ဆောင်ရွက်နေသည်ကို စိစစ်တွေ့ရှိပါက အ‌ရေးကြီးကုန်စည်နှင့် ဝန်ဆောင်မှုဥပဒေ ပုဒ်မ ၅ အရ အ‌ရေးယူခြင်းခံရမည်ဖြစ်ကြောင်း ရှင်းလင်း ပြောကြားခဲ့ပါသည်။

DOCA(မန္တလေး)      

              စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကလေးခရိုင်မှဝန်ထမ်းများသည် စားသုံးသူရေးရာကော်မတီ ( ၂/၂၀၂၂ ) အစည်းအဝေးတွင် စားသုံးသူကာကွယ်ရေးဥပဒေအရ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ဥပဒေနှင့်အညီ လိုက်နာဆောင်ရွက်စေရေး၊ အရည်အသွေးနှင့်အလေးချိန်အချင်အတွယ်မှန်ကန်စေရေးနှင့် ဥပဒေ၊ ညွှန်ကြားချက်များနှင့် ညီညွတ်မှုမရှိပါက အရေးယူနိုင်ရေးအတွက် တစ်နှစ်တာအတွင်း ဈေးကွက်စောင့်ကြည့်စစ်ဆေးရာတွင် ဦးစာပေးဆောင်ရွက်သွားမည့် ကုန်စည်အမျိုးအစားများမှာ စားသုံးဆီ၊ အချိုရည်၊ အသင့်စား ခေါက်ဆွဲခြောက်၊ သွားတိုက်ဆေး၊ ဆပ်ပြာခဲ၊ ဆပ်ပြာရည်၊ ဆပ်ပြာမှုန့်၊ စက်သုံးဆီ၊ အသားချောင်း၊ အသားလုံး စသည့်တို့ကို ဆုံးဖြတ်ခဲ့မှုအရ ကလေးခရိုင်အတွင်းရှိ မြို့နယ်များတွင် ကုန်မျိုးစုံဆိုင်များ၊ ဆေးနှင့်ဆေးပစ္စည်းအရောင်းဆိုင်များသို့ စားသုံးသူရေးရာဦးစီးဌာနနှင့် စည်ပင်သာယာရေး ကော်မတီတို့ပူးပေါင်းဆောင်ရွက်၍ ကလေးမြို့၊ ကလေးဝမြို့၊ တမူးမြို့၊ ဖောင်းပြင်မြို့နှင့် ဟုမ္မလင်းမြို့များတွင် ဩဂုတ်လ၊ တတိယပတ်အတွင်း ဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ရာ စားသုံးဆီများနှင့်ပတ်သက်၍ တွေ့ရှိချက်များအနေဖြင့် ဆီဗူးများပေါ်တွင် အသားတင်အလေးချိန်ဖော်ပြချက်များအနေဖြင့် လီတာဖြင့် ဖော်ပြပါရှိသည်ကို စစ်ဆေးတွေ့ရှိကြောင်း သိရှိရပါသည်။

DOCA(စစ်ကိုင်း)

          ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊ မြို့နယ်ဦးစီးမှူး ဦးလှထွဋ်ဦးသည် (၂၀.၈.၂၀၂၂)ရက် နေ့လယ် (၁၂:၃၀) နာရီတွင် မြောင်းမြမြို့နယ် ဝဲကလေးကျေးရွာ အထက(ခွဲ)ကျောင်းတွင် ဆရာ/ဆရာမများ၊ ကျောင်းသား/သူများအား စားသုံးသူကာကွယ်ရေး အသိပညာပေးဟောပြောခဲ့ပါသည်။

        ထိုသို့ဟောပြောဆွေးနွေးရာတွင် မြို့နယ်ဦးစီးမှူးမှ ဦးစွာမိတ်ဆက်စကားပြောကြားပြီး၊ စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ လက်ရှိဆောင်ရွက်နေသော လုပ်ငန်းတာဝန်များအား ရှင်းလင်းပြောကြားပြီး၊ ကျောင်းသား/သူများ အစားအသောက်နှင့်ပတ်သက်၍ စားသောက်ရန်မသင့်သော အစားအသောက်များအကြောင်း၊ ဓါတုဆိုးဆေးများလွန်ကဲစွာအသုံးပြုထားသောမုန့်များ၊ အချိုရည်များ စားသောက်မိပါက ကျန်းမာရေးဆိုင်ရာဘေးထွက််ဆိုးကျိုးများအကြောင်း၊  စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေး ဥပဒေ ၂၀၁၉ ပါ ပြဌာန်းချက်များမှ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ ၄၁ ပုဒ်မခွဲ(က)(ဂ)နှင့်(ဆ)တို့ပါကုန်စည်၏ တံဆိပ်အမှတ်အသား၊ ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ ကျန်းမာရေးဆိုင်ဘေးထွက်ဆိုးကျိုး(သို့) ဓါတ်မတည့်ကြောင်းဖော်ပြချက်နှင့် ကြိုတင်သတိပေးချက်များကို ဟောပြောဆွေးနွေးခဲ့ပါသည်။ ဟောပြောပွဲသို့ ဆရာ/ဆရာမ၊ ကျောင်းသား/သူ(၈၀)ဦး တက်ရောက်ခဲ့ကြောင်း သိရှိရပါသည်။

DOCA(ဧရာဝတီ)

       စားသုံးသူရေးရာဦးစီးဌာန၊ ရှမ်းပြည်နယ်(အရှေ့ပိုင်း)၊ ကျိုင်းတုံမြို့၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူးများနှင့် ဝန်ထမ်းများသည် ရပ်ကွက်(၄) အုပ်ချုပ်ရေးမှူးရုံးရှိ တာဝန်ရှိသူများနှင့် ပူးပေါင်း၍ (၂၂.၈.၂၀၂၂) ရက်နေ့၊ နေ့လယ် (၁၄:၀၀) နာရီအချိန်တွင် ရပ်ကွက်(၄) အတွင်းရှိ IQ အမှတ်တံဆိပ်သောက်ရေသန့်ထုတ်သည့်လုပ်ငန်းသို့ သွားရောက်၍ ထုတ်ကုန်များ လုံခြုံစိတ်ချရမှုရှိစေရေး၊ စားသုံးသူများ ဘေးအန္တရာယ်ကင်းရှင်းစေရေးနှင့် ယုံကြည်စိတ်ချစွာ ဝယ်ယူသုံးစွဲနိုင်ရေး စားသုံးသူကာကွယ်ရေးဥပဒေအခန်း (၁၈) ပါ ကုန်အညွှန်းအမှတ်အသားများ ဖော်ပြနိုင်ရေးနှင့် ပတ်သက်၍ ပြည်စုံစွာပါရှိနိုင်ရေး ရည်ရွယ်၍ ဈေးကွက်စောင့်ကြည့်စစ်ဆေးခြင်း ဆောင်ရွက်ပါသည်။

    စစ်ဆေးရေးမှူးများနှင့် ဝန်ထမ်းများသည် သောက်ရေသန့်လုပ်ငန်းရှင်ကို စက်ရုံဝန်ထမ်းများ၏ တစ်ကိုယ်ရေသန့်ရှင်းရေး ဂရုတစိုက်ပြုလုပ်ကြရန်၊  စနစ်တကျ ထုတ်ပိုးဖြန့်ဖြူးရောင်းချရန်၊ နေရောင်ခြည်နှင့်တိုက်ရိုက်မထိတွေ့စေရေး နေကာ-မိုးကာများကာကွယ်၍ သယ်ယူပို့ဆောင်မှု စနစ်တကျ ဖြန့်ဖြူးရောင်းချရန်၊ စက်ရုံဝန်ထမ်းများအား ခေါင်းစောင်း၊ ခြေအိတ်နှင့် လက်အိတ်များ စနစ်တကျ ဝတ်ဆင်ကြရန်၊ ရေသန့်ထုတ်လုပ်သော စက်ကိရိယာ၏ ရေဖိအား၊ ရေဖြတ်နှုန်း၊ လျှပ်စစ်အားစသည်တို့ကို စဉ်ဆက်မပြတ် စစ်ဆေး၍ မှတ်တမ်းတင်ထားရန်၊ သောက်ရေသန့် ထည့်သွင်းအသုံး ပြုမည့် ရေသန့်ဘူးများသည် PET, HDEP, PE ပလပ်စတစ်အမျိုးအစားဘူးများသာ အသုံးပြုရန်၊ R.O.U.V ရေသန့်စင်စက်တွင် အသုံးပြုသော ဓာတုပစ္စည်းများ၊ ရေစင်များ (Resin)၊ ရေစစ်များ (Filter) လဲလှယ်ခြင်း၊ ဓာတုဂုဏ်သတ္တိပြန်လည်ရရှိစေရေး (Reactivation) ကို ဆောင်ရွက်ရာတွင် သက်ဆိုင်ရာဌာန၏ သတ်မှတ်ထားသော လုပ်ထုံးလုပ်နည်းများ၊ ညွှန်ကြားချက်များနှင့်အညီ ဆောင်ရွက်ရန် အသိပညာပေး ဆွေးနွေးခဲ့ပါသည်။

      ထို့အပြင် အစားအသောက်နှင့်ဆေးဝါးကွပ်ကဲရေးဦးစီးဌာန၏ ထောက်ခံချက်များရရှိရေးနှင့် သက်တမ်းတိုးခြင်းလုပ်ငန်းများကို ဆောင်ရွက်ရန်၊ အဆိုပါဌာန၏ လမ်းညွှန်ချက်များနှင့်အညီ လိုက်နာဆောင်ရွက်ရန် မှာကြားခဲ့ပြီး စားသုံးသူကာကွယ်ရေးဥပဒေ အခန်း (၁၀) ပါ စီးပွားရေးလုပ်ငန်းရှင်၏ လိုက်နာရမည့် တာဝန်များကို သိရှိလိုက်နာနိုင်စေရန်အတွက် အပြန်အလှန်ဆွေးနွေးမှုများ ဆောင်ရွက်ခဲ့ပါသည်။

DOCA(ရှမ်း)

           ကချင်ပြည်နယ်၊ စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ ဦးကျော်မိုးလွင်(ဌာနခွဲစာရေး)သည် ၂၂.၈.၂၀၂၂ ရက်နေ့တွင် မိုးညှင်းမြို့၊ ထန်းတပင်ကျေးရွာအတွင်းရှိ စားသုံးသူများအား စားသုံးသူကာကွယ်ရေးအသိပညာပေး ဟောပြောပွဲ ဆောင်ရွက်ခဲ့ပါသည်။

          စားသုံးသူကာကွယ်ရေးအသိပညာပေးဟောပြောရာတွင် စားသုံးသူ၏ အခွင့်အရေးများဖြစ်သော စားသုံးသူများအတွက် ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များပေါ်တွင် စိတ်ကျေနပ်မှုရရှိစေခြင်း၊ ကုန်စည် သို့မဟုတ် ဝန်ဆောင်မှုကို ဘေးအန္တရာယ်ကင်းရှင်းစွာ အသုံးပြုခွင့်ရှိခြင်း၊ ကုန်စည် သို့မဟုတ် ဝန်ဆောင်မှုကို ရွေးချယ်ဝယ်ယူအသုံးပြုရာတွင် လိုအပ်သော သတင်းအချက်အလက်များ ပြည့်စုံမှန်ကန်စွာသိရှိခွင့်နှင့် ပြေစာ သို့မဟုတ် အထောက်အထားရယူခွင့်ရှိခြင်း၊ ဈေးကွက်အတွင်းရှိ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ စားသုံးသူစိတ်ကြိုက်ရွေးချယ် ဝယ်ယူနိုင်ခွင့်ရှိခြင်း၊ စားသုံးသူနစ်နာဆုံးရှုံးမှုနှင့်စပ်လျဉ်းသည့် ကိစ္စရပ်များတွင် ရှင်းလင်းတင်ပြခွင့်နှင့် တိုင်ကြားခွင့်ရရှိစေခြင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်းသည့် အသိပညာဗဟုသုတများ၊ အခွင့်အရေးများနှင့် လိုအပ်သောအချက်အလက်များကို သိရှိလေ့လာနိုင်ခွင့်ရှိခြင်း၊ မစ္စုပ္ပန်တွင်သာမက အနာဂတ်မျိုးဆက်များအတွက်ပါ ကောင်းမွန်သာယာသော လူနေမှုအဆင့်အတန်းနှင့် ပတ်ဝန်းကျင်တွင် နေထိုင်နိုင်ခွင့်ရရှိစေခြင်းတို့ကို အသိပညာပေးဟောပြောခဲ့ပြီး စားသုံးသူကာကွယ်ရေးဆိုင်ရာ လက်ကမ်းစာစောင်များ ဖြန့်ဝေပေးခဲ့ပါသည်။

DOCA(ကချင်)