သတင်းနှင့် လှုပ်ရှားမှုများ

           ရခိုင်ပြည်နယ်၊ စားသုံးသူရေးရာဦးစီးဌာန၊ စစ်တွေမြို့နယ်တာဝန်ခံ ဦးသိန်းအောင် (ဦးစီးမှူး)နှင့် ဝန်ထမ်းများသည်  (၁၈-၈-၂၀၂၂)ရက်နေ့ နေ့လယ် (၂:၀၀)အချိန်တွင် စစ်တွေမြို့ လမ်းမတော်မြောက်ရပ်ကွက် အမှတ်(၂၀)အခြေခံပညာမူလတန်းကျောင်းတွင် စားသုံးသူကာကွယ်ရေး အသိပညာပေး ဟောပြောပွဲ ကျင်းပဆောင်ရွက်ခဲ့ပါသည်။

          အဆိုပါဟောပြောပွဲတွင် စစ်တွေမြို့နယ်တာဝန်ခံမှ စားသုံးသူရေးရာဦးစီးဌာန၏ ရည်မှန်းချက်၊ မျှော်မှန်းချက်များ စားသုံးသူအခွင့်အရေးနှင့် စားသုံးသူနစ်နာဆုံးရှုံးမှုမရှိစေရေးအတွက် ဆောင်ရွက်ပေးနေသည့် အကြောင်းအရာများအားလည်းကောင်း၊ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍  စီးပွားရေးလုပ်ငန်းရှင်များ၏တာဝန်များနှင့် ပတ်သက်၍လည်းကောင်း၊ ကုန်စည်များ ဝယ်ယူသုံးစွဲရာတွင် ကုန်အညွှန်းအမှတ်အသားဖော်ပြမှုအား အဓိကဦးစားပေးဖတ်ရူ သင့်ကြောင်း စားသောက်ကုန်ပစ္စည်းများဝယ်ယူသုံးစွဲရာတွင် သက်တမ်းလွန်စားသောက်ကုန်များနှင့် ဓာတု ဆိုးဆေးများ အသုံးပြုထားသော စားသောက်ကုန်ပစ္စည်းများကို ရှောင်ရှားဝယ်ယူ အသုံးပြုကြရန် အသိပညာပေးဟောပြောခဲ့ပြီး ဟောပြောပွဲသို့ ကျောင်းသား/သူ(၁၀၀)ဦးခန့် တက်ရောက်ခဲ့ကြောင်းသိရှိရပါသည်။

DOCA(ရခိုင်)

           စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်အနေဖြင့် စားသုံးသူပြည်သူများ ဘေးအန္တရာယ်ကင်းရှင်းရေးအတွက် ဈေးကွက်စောင့်ကြည့်စစ်ဆေးခြင်းများ ဆောင်ရွက်လျက်ရှိရာ ဩဂုတ်လ (၁၂)ရက်နေ့ နေ့လယ်(၁၃:၀၀)နာရီအချိန်တွင် စားသုံးသူရေးရာဦးစီး ဌာနမှ ဒု-ခရိုင်ဦးစီးမှူး၊ ထုန်ကုန်လုံခြုံစိတ်ချရမှုဌာနခွဲတာဝန်ခံ၊ ရွှေဘိုမြို့နယ်တာဝန်ခံနှင့်  ရွှေဘိုခရိုင် ပြည်သူ့ကျန်းမာရေးဦးစီးဌာနမှ ဝန်ထမ်း(၂)ဦးတို့ပူးပေါင်း၍ ရွှေဘိုမြို့ အမှတ်(၅)ရပ်ကွက်ရှိ  အလှကုန်ဆိုင် (၂) ဆိုင်အား ဈေးကွက်စောင့်ကြည့် စစ်ဆေးခဲ့ပါသည်။

          အဆိုပါဆိုင်များအား ဈေးကွက်စောင့်ကြည့်စစ်ဆေးရာတွင် Mistrine တံဆိပ်ဖြင့် Top Country Perfumed Talcနှင့် White Spa(Whitening Lotion)များတွင် Hologram(ရောင်းပြန်) စတစ်ကာနှင့် မြန်မာစာ Labellingများ ပြည့်စုံစွာပါရှိပြီး  Bulgarian Yogurt (Whitening Lotion ) (၃) ဗူးတွင်  Hologram (ရောင်းပြန်) စတစ်ကာနှင့် မြန်မာစာ Labelling ကပ်ထားခြင်း မရှိကြောင်းစစ်ဆေး တွေ့ရှိရသဖြင့် ယခုအခါဈေးကွက်အတွင်းတွင် အလှကုန်များကိုတုပ၍ တရားမဝင်ဖြန့်ဖြူးရောင်းချလျက် ရှိသည့်ပစ္စည်းများ တွေ့ရှိရပါကြောင်း၊ Mistrine တံဆိပ်အလှကုန်ပစ္စည်းများနှင့် ပတ်သက်၍ Mistrine Thiri Cosmetic Co.,Ltdသည် ထိုင်းနိုင်ငံရှိ Better Way (Thailand)Co.,Ltd မှ ထုတ်လုပ်သည့်အလှကုန် ပစ္စည်းများကို မြန်မာနိုင်ငံတစ်ဦးတည်း ကိုယ်စားလှယ်အဖြစ် FDA ၏ ထောက်ခံချက်ဖြင့် ဈေးကွက်အတွင်း တရားဝင်ဖြန့်ဖြူးရောင်းချလျက်ရှိပြီး ကုမ္ပဏီအနေဖြင့် Mistrine အလှကုန်ပစ္စည်းများတွင် Hologram (ရောင်းပြန်) စတစ်ကာနှင့် မြန်မာစာ Labelling ကပ်၍ဖြန့်ဖြူး ရောင်းချပါသဖြင့် အဆိုပါအချက်များနှင့် ပြည့်စုံမှုမရှိသည့် Mistrine အလှကုန်ပစ္စည်းများကို မှာယူ ဖြန့်ဖြူးရောင်းချခြင်းမပြုရန်၊ ထုတ်လုပ်ဖြန့်ဖြူး ရောင်းချသည့် စီးပွားရေးလုပ်ငန်းရှင်များအနေဖြင့် အလှကုန်ပစ္စည်းများကို ဈေးကွက်စောင့်ကြည့်စစ်ဆေး ခြင်းနှင့် ပတ်သက်၍ မိမိတို့ဌာန၏လုပ်ငန်းဆောင်ရွက်မှုများနှင့် ဥပဒေပါအကြောင်းအရာများကို အသိပညာရရှိနိုင်စေရန် စားသုံးသူကာကွယ်ရေးဥပဒေ၊ အခန်း(၁၈)ပါ ကုန်အညွန်းအမှတ်အသားဖော်ပြခြင်းနှင့် စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉) နှင့်အညီ ပြည့်စုံစွာထည့်သွင်းဖော်ပြထားသည့် အလှကုန်ပစ္စည်းများကိုသာရောင်းချကြရန်၊ ကုန်စည်ကိုထုတ်လုပ် ဖြန့်ဖြူးရောင်းချသည့် စီးပွားရေးလုပ်ငန်းရှင်များအနေဖြင့် ကုန်အညွှန်းအမှတ်အသားဖော်ပြခြင်းနှင့် ပတ်သက်၍ဌာန၏ အတည်ပြုချက်ရယူနိုင်ရေးဆောင်ရွက်ကြရန်၊ စားသုံးသူ၏အခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်စည်နှင့်စပ်လျဉ်း၍ အာမခံချက်ပေးခြင်းနှင့် အားမခံပေးထား မှုအပါ် စားသုံးသူကတောင်းဆိုနိုင်သည့်အခွင့်အရေး၊ ကုန်စည်နှင့် ဝန်ဆောင်မှုအပေါ် တာဝန်ရှိမှု၊ ပြစ်မှုနှင့် ပြစ်ဒဏ်များ၊ ကုန်စည်နှင့် ဝန်ဆောင်မှုကြောင့် စားသုံးသူအခွင့်အရေး ဆုံးရှုံမှုဖြစ်ပါက ဌာနသို့တိုင်ကြားနိုင်သည့်နည်းလမ်းများအကြောင်း၊ စီးပွားရေးလုပ်ငန်းရှင်မှ အာမခံမှုနှင့်အညီ တာဝန်ယူဆောင်ရွက်ပေးရမည်ဖြစ်ကြောင်းတို့ကို အကျယ်တဝင့်ရှင်းလင်းဆွေးနွေးခဲ့ရာ လုပ်ငန်းရှင်မှလည်း လိုက်နာဆောင်ရွက်မည် ဖြစ်ကြောင်း ပြန်လည်ဆွေးနွေးခဲ့သဖြင့်  မြန်မာနိုင်ငံစားသုံးသူကာကွယ်ရေး ကော်မရှင်၏ညွှန်ကြားချက် အမှတ် (၂/၂၀၁၉)နှင့် အသိပညာပေးလက်ကမ်းစာစောင်များ ဖြန့်ဝေခဲ့ပါသည်။

DOCA(စစ်ကိုင်း)

         စစ်ကိုင်းတိုင်းဒေသကြီး၊ မုံရွာခရိုင်စီမံအုပ်ချုပ်ရေး အဖွဲ့ဥက္ကဌခေါင်းဆောင်၍ မုံရွာခရိုင်အတွင်းရှိ ခရိုင်အဆင့်ဌာနဆိုင်ရာများနှင့် ဩဂုတ်လ လဝက် လုပ်ငန်းညှိနှိုင်းအစည်းအဝေးကို ခရိုင်စီမံအုပ်ချုပ်ရေးအဖွဲ့၊ အစည်းအဝေးခန်းမ၌ (၁၆.၈.၂၀၂၂)ရက်နေ့ နံနက်(၁၀:၃၀)နာရီ အချိန်တွင်ကျင်းပခဲ့ရာ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူးတက်ရောက်ခဲ့ပါသည်။

        အစည်းအဝေးတွင် ခရိုင်စီမံအုပ်ချုပ်ရေးအဖွဲ့ဥက္ကဌ ဦးဇော်တင်မိုးက (၈.၈.၂၀၂၂) ရက်နေ့မှ (၁၀.၈.၂၀၂၂)ရက်နေ့အထိ ကျင်းပပြုလုပ်ခဲ့သော (၆)လပတ် အစည်းအဝေးတွင် နိုင်ငံတော်ဝန်ကြီးချုပ်၏ လမ်းညွှန်ချက်များ နိုင်ငံတော်စီမံအုပ်ချုပ်ရေးကောင်စီ၏ ဦးတည်ချက်များ ရှေ့လုပ်ငန်းစဉ်များကို အလေးထားဆောင်ရွက်ရန်လိုကြောင်း၊  ပညာရေးကဏ္ဍတွင်လည်း KG+9 အခမဲ့ပညာရေးစနစ် ဆောင်ရွက်ပေးလျက်ရှိကြောင်း၊ စိုက်ပျိုးရေး/ မွေးမြူရေး ကဏ္ဍများကိုဖွံ့ဖြိုးတိုးတက်အောင် ဆောင်ရွက်ပေးစေလိုကြောင်း၊ မွေးမြူရေးလုပ်ငန်းသည် အကျိုးအမြတ်ရလွယ်သည့်အတွက် လုပ်ကိုင်စေလိုကြောင်း၊ စိုက်ပျိုးမွေးမြူရေးဘာသာရပ်ကို စိုက်ပျိုးရေးကချမှတ်ထားသောသတ်မှတ်ချက် နှင့်အညီ မုံရွာ၊ စစ်ကိုင်း၊ ရွှေဘို ခရိုင်(၃)ခု ရွေးချယ်ပြီး စမ်းသပ်သင်ကြားသွားမည်ဖြစ်ကြောင်း၊ အဖွင့်အမှာစကားပြောကြားခဲ့ပါသည်။ ဆက်လက်ပြီး ခရိုင်အဆင့်ဌာနဆိုင်ရာများမှ ခရိုင်ဦးစီးမှူးများက မိမိတို့ဌာနအလိုက် လုပ်ငန်းဆောင်ရွက်ချက်များ အသီးသီးတင်ပြကြပြီး စားသုံးရေးရာဦးစီးဌာန၊ ခရိုင်ဦးစီးမှူးက ဩဂုတ်လအတွင်း စားသုံးသူကာကွယ်ရေးလုပ်ငန်းများဖြစ်သည့် အသိပညာပေး ဟောပြောပွဲဆောင်ရွက်နိုင်မှု၊ လုပ်ငန်းရှင်တွေ့ဆုံခြင်း၊ ဈေးကွက်စောင့်ကြည့်စစ်ဆေးခြင်းဆောင်ရွက် နိုင်မှုအခြေအနေများကို ဦးစွာတင်ပြပြီး ရွှေဘိုပေါ်ဆန်း၊ ဧရာမင်းနှင့် မနောသုခတို့၏ နေ့စဉ်ဖြစ်ပေါ် နေသော စပါးတင်း(၁၀၀)ဈေး၊ ဆန်(၁)အိတ်ဈေးနှုန်းများ၊ အခြေခံစားကုန်ဈေးနှုန်းများ၊ စားအုန်းဆီဈေးနှုန်းများနှင့် ဈေးကွက်အတွင်း ရည်ညွှန်းဈေးဖြင့် စားအုန်းဆီရောင်းချမှုကို ကွင်းဆင်း စစ်ဆေးသည့်အခြေအနေများ၊ မုံရွာခရိုင်အတွင်း စက်သုံးဆီအရောင်းဆိုင်များ၏ နေ့စဉ်ရောင်းချမှု အခြေအနေများ၊ ဆေးဆိုင်များ၏ ဆေးဈေးနှုန်းများ၊ အောက်ဆီဂျင်၊ အောက်ဆီမီတာ ဈေးနှုန်းများနှင့် ဆေးဆိုင်များ၏ တစ်ပတ်အတွင်းရောင်းချမှု/ကျန်ရှိမှု/ လိုအပ်မှု အခြေအနေများကို နေ့စဉ်စာရင်းပြုစုဆောင်ရွက်လျက်ရှိကြောင်းတင်ပြရာ ခရိုင် ဥက္ကဌက ကျောင်းဖွင့်ရာသီဖြစ်ပြီး မိုးရာသီဖြစ်သည့်အတွက် ဈေးများ၊ ကျောင်းမုန့်ဈေးတန်းများတွင် ယင်နားစာများမရောင်းချစေရေး၊ ကျန်းမာရေးနှင့်ညီညွတ်မျှတသော အစားအစာများရောင်းချစေရေး၊ FDA၊ စည်ပင်တို့နှင့် ချိတ်ဆက် ပူးပေါင်း၍ ကွင်းဆင်းဆောင်ရွက် စေလိုကြောင်း၊ အခက်အခဲများရှိပါကလည်း တင်ပြစေလိုကြောင်း ပြန်လည်ရှင်းလင်းဆွေးနွေး ခဲ့ပါသည်။

        ထို့နောက် ဌာနဆိုင်ရာများမှ ခရိုင်ဦးစီးမှူးများက ခရိုင်အတွင်းလုပ်ငန်းများ ဆောင်ရွက်ရာတွင် ကြုံတွေ့နေရသည့်အခက်အခဲများကို ပြန်လည်ဆွေးနွေးတင်ပြကြပြီး ခရိုင်စီမံအုပ်ချုပ်ရေးအဖွဲ့ဥက္ကဌက ဆောင်ရွက်ပေးနိုင်သည်များ ဆောင်ရွက်ပေးပြီး လိုအပ်ပါကတိုင်းဒေသကြီး အဆင့်သို့ ဆက်လက်တင်ပြသွားမည်ဖြစ်ကြောင်း၊ ယခုရက်များအတွင်း လုံခြုံရေး၊ ကျန်းမာရေး အထူးဂရုစိုက်စေလိုကြောင်း နိဂုံးချုပ်ပြောကြားပြီး အစည်းအဝေးကို (၁၄:၃၀)နာရီအချိန် ရုတ်သိမ်းခဲ့ပါသည်။

DOCA(စစ်ကိုင်း)

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ တိုင်းဒေသကြီးဦးစီးမှူး လမ်းညွှန်မှုဖြင့် တိုင်းဒေသကြီးဦးစီးမှူးရုံးမှ ဝန်ထမ်းများသည် (၁၈.၈.၂၀၂၂)ရက်နေ့ နံနက် (၁၀:၀၀)နာရီအချိန်တွင် မုံရွာမြို့၊ အမှတ်(၇) အခြေခံပညာအထက်တန်း ကျောင်း၌ စားသုံးသူကာကွယ်ပေးရေးအသိပညာပေးဟောပြောပွဲ ဆောင်ရွက်ခဲ့ရာ ဆရာ/မ (၄)ဦး၊ ကျောင်းသား/သူ (၉၉)ဦး၊  စုစုပေါင်း (၁၃၉)ဦး တက်ရောက်ခဲ့ကြပါသည်။

           ဟောပြောပွဲတွင် အမှတ်(၇)၊ အခြေခံပညာအထက်တန်း ကျောင်းအုပ်ဆရာမကြီး ဒေါ်သန်းသန်းအိက နှုတ်ခွန်းဆက်အဖွင့်အမှာစကားပြောကြားပြီး စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးမှ ဒု-တိုင်းဒေသကြီးဦးစီးမှူး ဒေါ်ရီလင်းထွဋ်က ဌာန၏လုပ်ငန်း ဆောင်ရွက်မှုအကြောင်းများနှင့် ဝန်ဆောင်မှုများအကြောင်း၊ စားသုံးသူများ၊ စီးပွားရေးလုပ်ငန်းရှင်များ သိရှိလိုက်နိုင်ရန်ကုန်အညွှန်း အမှတ်အသားများအကြာင်း၊ ဦးစီးအရာရှိ ဒေါ်ခိုင်မို့မို့က စားသုံးသူကာကွယ်ရေးဥပဒေပါ အခွင့်အရေးနှင့်တာဝန်များ၊ စားသုံးသူနစ်နာမှုရှိပါက ဌာနသို့ ဆက်သွယ်တိုင်ကြားနိုင်သည့် နည်းလမ်းများအကြောင်း ရှင်းလင်းဆွေးနွေးပြီး ကျောင်းအုပ်ဆရာမကြီးထံသို့ ဌာန၏ ပညာပေးလက်ကမ်းစာစောင်များ ဆရာ/မများ၊ ကျောင်းသား/ ကျောင်းသူများ သိရှိလေ့လာနိုင်စေရန် စားသုံးရန်မသင့်သည့် ဗီနိုင်းပိုစတာများကို လက်ဆောင်ပေးအပ်ခဲ့ပါသည်။

DOCA(စစ်ကိုင်း)

          ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင်၊လပွတ္တာမြို့၊ မြို့နယ်တာဝန်ခံ ဦးမြင့်ဌေးနှင့် ဝန်ထမ်းများသည် (၁၈.၈.၂၀၂၂)ရက်နေ့(၀၉:၀၀)နာရီအချိန်တွင် လပွတ္တာမြို့၊ အမှတ်(၅)ရပ်ကွက် အ.မ.က(၄) မူလွန်ကျောင်းတွင် ဆရာ၊ဆရာမနှင့် ကျောင်းသား၊ကျောင်းသူများအား စားသုံးသူကာကွယ်ရေး အသိပညာပေး ဟောပြောခဲ့ပါသည်။

          ထိုသို့ဟောပြောဆွေးနွေးရာတွင် စားသုံးသူရေးရာဦးစီးဌာန၊ မြို့နယ်တာဝန်ခံမှ မိတ်ဆက်စကားပြောကြား၍ စားသုံးသူရေးရာဦးစီးဌာန၏ မျှော်မှန်းချက်များ၊ ရည်မှန်းချက်များ၊ ဌာန၏လက်ရှိဆောင်ရွက်လျက်ရှိသော လုပ်ငန်းတာဝန်များကို ရှင်းလင်းပြောကြားပြီး ကျောင်းသားကျောင်းသူများနှင့်သက်ဆိုင်သော အစားအသောက်များနှင့်ပတ်သက်၍ ဓါတုဆိုးဆေးများပါဝင်မှုများပြားသော အစားအစာနှင့်အချိုရည်များရှောင်ကြဉ်ကြရန်၊ ဆိုးဆေးပါဝင်မှုများပြားသော အစားအသောက်များအား စားသောက်မိပါက ဖြစ်ပေါ်လာမည့်ကျန်းမာရေး ဘေးထွက်ဆိုးကျိုးများ၊ ဆေးကုသမှုအတွက်ကုန်ကျစရိတ်များနှင့် နောက်ဆက်တွဲဆိုးကျိုးများ ဖြစ်ပေါ်လာနိုင် ကြောင်း၊ကျောင်းသားကျောင်းသူများအနေဖြင့် အစားအသောက်များကို ရွေးချယ်ဝယ်ယူစားသောက်ကြရန် ရှင်းလင်းဟောပြောခဲ့ပါသည်။ ထို့နောက်ကျောင်းမုန့်ဈေးဆိုင်များသို့ သွားရောက်ပြီး ရောင်းချနေသော ဆိုင်ရှင် များအား စားသုံးသူကာကွယ်ရေးဥပဒေ ၂၀၁၉ပါ ပြဌာန်းချက်များမှ အခန်း(၁၈)ပါ ကုန်အညွှန်းအမှတ်အသား ဖော်ပြချက်များနှင့်စပ်လျဉ်း၍ ပုဒ်မ(၄)ပုဒ်မခွဲ(က)(ဂ)နှင့် (ဆ)တို့ပါ ကုန်စည်၏တံဆိပ် အမှတ်အသား၊ ထုတ်လုပ် သည့်ရက်စွဲနှင့် သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ ကျန်းမားရေးဆိုင်ရာ ဘေးထွက်ဆိုးကျိုး (သို့)ဓါတ်မတည့်ကြောင်းဖော်ပြချက်နှင့် ကြိုတင်သတိပေးချက်များကို သိရှိနားလည်စေရန်နှင့် သက်တမ်းလွန် နေသောအစားအသောက်များအား ရောင်းချခြင်းမပြုရန် ဈေးဆိုင်ပိုင်ရှင်များအား ဟောပြောဆွေးနွေး စစ်ဆေး၊ပညာပေးခဲ့ပါသည်။ စားသုံးသူအသိပညာပေးဟောပြောပွဲသို့ ဆရာ၊ဆရာမ(၅)ဦး၊ ကျောင်းသားကျောင်းသူ(၁၁၀)ဦး ၊ စုစုပေါင်း(၁၁၅)ဦး တက်ရောက်ခဲ့ကြောင်း သိရှိရပါသည်။

DOCA(ဧရာဝတီ)