သတင်းနှင့် လှုပ်ရှားမှုများ

             ပဲခူးတိုင်းဒေသကြီး တောင်ငူမြို့နယ်ရှိ ကျေးရွာတချို့တွင် အာဆီယံသပြေ စိုက်ပျိုးထား သည်ကို တွေ့ရှိရပါသည်။ မြန်မာလူမျိုးတို့၏ ဓလေ့ထုံးစံအရ သပြေပန်းများ ဝယ်ယူပြီး ဘုရားလှူ၊ အောင်အိုးထိုးပူဇော်ကြပါသည်။ မနက်မိုးလင်းသည်နှင့် စံပယ်ပန်း၊ ရွှေပန်း၊ ငွေပန်း၊ နှင်းဆီပန်း၊ အာဆီယံသပြေပန်းအစုံ ခေါင်းရွက်ရောင်းသည့် ဈေးသည်များ၊ စက်ဘီးဆိုင်ကယ်များနှင့် ရောင်းသည့် ပန်းသည်များကို ရပ်ကွက်များ၊ ဈေးများတွင် တွေ့ရှိရပါသည်။ အာဆီယံသပြေပန်း တစ်စည်းကို ၂၀၀ ကျပ်ဖြင့် ရောင်းချရကြောင်း ဈေးရောင်းသူ၏ ပြောပြချက်အရ သိရပါသည်။

              တောင်ငူမြို့နယ် ဇီးဒိုင်းကျေးရွာအုပ်စု ပဲပုပ်ကျေးရွာဘေး အိမ်ခြံမြေနှင့်တွဲလျှက် မြေ ကွက်လပ် ၁.၅၀ ဧက အတွင်း စိုက်ပျိုးထေားသည့် အာဆီယံသပြေခြံအား သွားရောက်လေ့လာ ရာတွင် အာဆီယံသပြေ ပျိုးပင်ပေါက် တစ်ပင်ကို ၂၅၀၀ ကျပ်နှုန်းဖြင့် မန္တလေးမြို့ စိုက်ပျိုးရေးခြံ များမှ မှာယူ၍ စိုက်ပျိုးခြင်းဖြစ်ကြောင်း၊ ပင်ကြား ၃ ပေ၊ တန်းကြား ၄ ပေဖြင့် အပင် ၁၀၀၀ စိုက်ပျိုးထားကြောင်း၊ စိုက်ပျိုးပြီး ၆ လရှိလျှင် စတင်ခူး၍ရကြောင်း၊ အပင်ငယ်သေးချိန်တွင် အညွန့် အထွက်နည်းကြောင်း၊ သုံးနှစ်ကျော် လျှင် အညွန့်များနေ့တိုင်းခူး၍ရကြောင်း၊ အပင်များကြားတွင် ကြားပေါင်းနုတ်ခြင်း၊ မြေဩဇာ  ၁၅:၁၅ ကျွေးခြင်း၊ နွေရာသီတွင်ရေလောင်းပေးခြင်းများ လုပ်ပေးရ ကြောင်း၊ ၆ လတစ်ကြိမ် သွင်းအားစု ထည့်ပေးရကြောင်း၊ မြေဩဇာ ၂ ပြည်၊ ၁၅:၁၅ ပတ်လည် ၄ ပြည်ကို ၃၀၀၀၀ ကျပ် ကုန်ကျစရိတ်ရှိကြောင်း သိရှိရပါသည်။

              ပန်းတစ်စည်းကို ၁၃ ခက်မှ ၁၅ ခက်အထိ စည်းပါကြောင်း၊ ၁၀ စည်းလျှင် ၇၀၀ ကျပ်ဖြင့် ပန်းခြံသို့ လာဝယ်သူရှိပါကြောင်း၊ တစ်ရက်လျှင် ၃၀၀၀ ကျပ်ဖိုး နေ့တိုင်းရောင်းရပါကြောင်း၊ တစ်လ လျှင် ၁၀၀၀၀၀ ကျပ်နီးပါး ဝင်ငွေရရှိပါကြောင်း၊ ပန်းပင်မျိုးထုပ်ဖိုး ကျေအေးသွားပြီဖြစ်သောကြောင့် အမြတ်ရရှိနေပါကြောင်း ပဲပုပ်ကျေးရွာမှ အာဆီယံသပြေခြံပိုင်ရှင် ဦးတင်ထွန်း၏ ပြောပြချက်အရ သိရှိရပါသည်။

DOCA(ပဲခူး)   

              အုတ်တွင်းမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ပြည်သူ့ကျန်းမာရေး ဦးစီးဌာနနှင့် စားသုံးသူရေးရာဦးစီးစီးဌာနတို့ပူးပေါင်း၍ ကျောင်းသားကျောင်းသူများ သိသင့်သိထိုက် သည့် အသိပညာ ဗဟုသုတများ ရရှိစေရန် ရည်ရွယ်၍ အသိပညာပေးဟောပြောပွဲကို ဩဂုတ်လ ၈ ရက်နေ့ နံနက်ပိုင်းက ကျင်းပပြုလုပ်ရာ စားသုံးသူရေးရာဦးစီးဌာန အုတ်တွင်းမြို့နယ်တာဝန်ခံ ဒေါ်အေးအေးခိုင်က စားသုံးသူကာကွယ်ရေးဆိုင်ရာများကို အသိပညာပေး ဟောပြောခဲ့ပါသည်။

              စားသုံးသူရေးရာဦးစီးဌာန အုတ်တွင်းမြို့နယ်တာဝန်ခံ ဒေါ်အေးအေးခိုင်က စားသုံးသူ၏ အခွင့်အရေးနှင့်တာဝန်များ၊ စားသုံးသူရေးရာဦးစီးဌာနပေါ်ပေါက်လာပုံနှင့် စားသုံးသူကာကွယ်ရေး ဆောင်ရွက်ချက်များ၊ စားသုံးသူနစ်နာဆုံးရှုံးမှုများ ဖြစ်ပေါ်လာပါက စားသုံးသူရေးရာဦးစီးဌာနက ဖွင့်လှစ်သည့် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC)၊ စားသုံးသူရေးရာဦးစီးဌာန၏ website ဖြစ်သော www.doca.gov.mm တို့တွင် တိုင်ကြားနိုင်ခြင်းများ၊ ကုန်စည်များဝယ်ယူရာတွင် ကုန်အညွှန်းအမှတ်အသားများကို ဦးစားပေးဖတ်ရှုသင့်သည့် အကြောင်းများကို အသိပညာပေး ဟောပြောခဲ့ပါသည်။

              ပြည်သူ့ကျန်းမာရေးဦးစီးဌာနမှ သားဖွားဆရာမ ဒေါ်စုစုခိုင်က မိုးတွင်းကာလတွင် ဖြစ် ပွားလေ့ရှိသော သွေးလွန်တုပ်ကွေးရောဂါအကြောင်း သိကောင်းစရာများကိုလည်းကောင်း၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဒုတိယမြို့နယ်ဦးစီးမှူး ဒေါ်ခင်ခင်မာက ခလေး သူငယ်များ စာဖတ်ခြင်းဖြင့် ရရှိလာမည့် အကျိုးကျေးဇူးများနှင့် လူကုန်ကူးမှုအန္တရာယ်တားဆီး ကာကွယ်ရေးအကြောင်းများကို လည်းကောင်း ဟောပြောခဲ့ပါသည်။

              ဟောပြောပွဲသို့ ကျောင်းသား၊ကျောင်းသူ စုစုပေါင်း ၁၁၁ ဦး တက်ရောက်ကြောင်း သိရှိရပါသည်။

DOCA(ပဲခူး)

           မိုးတွင်းကာလတွင်အလေ့ကျပေါက်လေ့ရှိသည့် သဘာဝမှိုများကိုသာ ယခင်ကစားသုံးနေကြရပြီး အခန့်မသင့်ပါက မှိုဆိပ်တောက်၍ အကြောတက်ခြင်း၊ မူးဝေခြင်း၊ အော့အန်ခြင်းတို့အပြင် သေဆုံးသည်အထိ အန္တရာယ်ရှိခဲ့ကြပါသည်။ အဆိပ်ရှိသည့်မှိုနှင့် စားသုံးသင့်သည့်မှိုများကို ခွဲခြား သိရှိနိုင်ရန် မလွယ်ကူသဖြင့် အဆိပ်ရှိမှိုများကိုစားသုံးမိခြင်းများ ကြုံတွေ့ခဲ့ရပါသည်။ ယခုအခါ စားသုံးသူများအတွက် ဘေးဥပါဒ်ကင်းလွတ်စေရန် စားသုံးသင့်သည့်မှိုများကို လေ့လာရွေးချယ်၍ စိုက်ပျိုးထုတ်လုပ်လာသောကြောင့် တစ်နှစ်ပတ်လုံး မွေးမြူစိုက်ပျိုးထုတ်လုပ်နိုင်ခဲ့ပြီး စားသုံးသူများ အတွက် အာဟာရပြည့်ဝကာ ဘေးအန္တရာယ်ကင်းရှင်းသည့်မှိုများကို အချိန်မရွေးစားသုံးလာနိုင်မည် ဖြစ်ပါသည်။ စိုက်ပျိုးမှိုသည် ဓာတုဆေးနှင့် ဓာတ်မြေဩဇာကင်းလွတ်သောကြောင့် ကျန်းမာရေး အတွက် လုံခြုံစိတ်ချရပါသည်။ မှိုများတွင် ချက်ပြုတ်စားသောက်ခြင်းအတွက်သာမက ကြွက် နားရွက်မှို၊ အပ်မှို၊ လင်ဇီးမှို၊ ရှီးပဒီးမှို စသည့်မှိုများကို ဆေးဘက်ဝင်သော မှိုများအဖြစ်သုံးစွဲနိုင် ပါသည်။ မှိုစိုက်ပျိုးထုတ်လုပ်ခြင်းသည် လယ်ယာကိုင်းကျွန်းနှင့် ဥယျာဉ်ခြံဘေးထွက်ပစ္စည်းများ၊ စက်မှုစွန့်ပစ်ပစ္စည်းများ စသည့်အမှိုက်များကို မှိုမွေးမြူစိုက်ပျိုးရေးတွင်ပြန်လည်အသုံးပြုနိုင်ခြင်းဖြင့် သဘာဝ ပတ်ဝန်းကျင်ထိန်းသိမ်းနိုင်ခြင်းကိုလည်း အထောက်အကူပြုနိုင်ပါသည်။ စီးပွားဖြစ်စိုက်ပျိုး ထုတ်လုပ်မှု နည်းပညာ၊ မြေနေရာ ကျဉ်းကျဉ်းတွင် မှိုအမြောက်အမြား စိုက်ပျိုး ထုတ်လုပ်နိုင်သည့် နည်းပညာများကို တောင်သူများအကြား ပြန့်ပွားလာခြင်းကြောင့် တောင်သူများအတွက် တပိုင် တနိုင်စိုက်ပျိုးခြင်းမှ မိသားစုအပိုဝင်ငွေရရှိနိုင်စေခြင်း၊ ထိုမှတစ်ဆင့် စီးပွားဖြစ်လုပ်ငန်း တစ်ရပ်အဖြစ် တိုးတက်ဆောင်ရွက်နိုင်မည်ဖြစ်ပါသည်။ စစ်ကိုင်းတိုင်းဒေသကြီး စားသုံးသူရေးရာ ဦးစီးဌာနအနေဖြင့် ကော်မတီဝင်အဖြစ်ပါဝင်သည့် အလုပ်အကိုင်အခွင့်အလမ်းများဖန်တီးပေးရေး ကော်မတီက မှိုစိုက်ပျိုးထုတ်လုပ်ရေးသင်တန်းကိုဖွင့်လှစ်ပေးရန်စီစဉ်ဆောင်ရွက်ခဲ့ပါသည်။ ပြည်တွင်း ဈေးကွက်အတွင်း တွင်တွင်ကျယ်ကျယ်သုံးစွဲနေကြသည့် မှိုဈေးကွက်အတွက် မှိုစိုက်ပျိုးနည်းပညာ များကို ကျယ်ကျယ်ပြန့်ပြန့် သိရှိစေရန် ရည်ရွယ်ချက်ဖြင့် စစ်ကိုင်းတိုင်းဒေသကြီး စိုက်ပျိုးရေး ဦးစီးဌာနတွင် တိုင်းဒေသကြီးအစိုးရအဖွဲ့၏အစီအစဉ်ဖြင့် မှိုစိုက်ပျိုးထုတ်လုပ်ရေးသင်တန်းကို ၂ရက်ကြာသင်တန်းဖွင့်လှစ်ခဲ့ရာ ၂၀၂၂ ခုနှစ် ဩဂုတ်လ ၂ ရက်နေ့တွင် သင်တန်းဖွင့်ပွဲ၌ တိုင်းဒေသကြီးဝန်ကြီးချုပ်က အဖွင့်အမှာစကားပြောကြားခဲ့ပြီး သင်တန်းသား (၆၀)ဦး တက်ရောက် ခဲ့ပါသည်။ သင်တန်းတွင် မှိုစိုက်ပျိုးထုတ်လုပ်နည်းအပြင် မှိုမျိုးသန့် မွေးမြူနည်း၊ မှိုတွင် ကျရောက်တတ်သည့် ရောဂါကာကွယ်နှိမ်နင်း နည်းများကို သင်တန်းပို့ချခဲ့ကြောင်း သိရပါသည်။ မှိုမျိုးထုပ်များကို တစ်ထုပ်လျှင် (၃၅၀)ကျပ်ဖြင့် မြို့နယ်စိုက်ပျိုးရေးရုံးများတွင် ဝယ်ယူရရှိနိုင် ကြောင်းသိရပါသည်။ တိုင်းဒေသကြီးအတွင်း မှိုမျိုးထုပ်များရောင်းချမှု ထွန်းကားလာပြီး ဒေသ၏ လူမှုစီးပွားကို တစ်ဖက်တစ်လမ်းက အထောက်အကူပြုနိုင်မှာဖြစ်ပါသည်။ တပိုင်တနိုင် မှိုစိုက်ပျိုး ထုတ်လုပ်ခြင်းမှ စီးပွားဖြစ်စိုက်ပျိုးထုတ်လုပ်သူများဖြစ်အောင် အချိန်တိုအတွင်း အလုပ်အကိုင် အခွင့်အလမ်းများ ရရှိစေရေးအတွက် တိုင်းဒေသကြီးအစိုးရအဖွဲ့ကလည်း လိုအပ်သည်များကို ကူညီဖြည့်ဆည်းပေးသွားမည်ဖြစ်ကြောင်း သိရှိရပါသည်။

DOCA(စစ်ကိုင်း)

           ကချင်ပြည်နယ်တွင် စိုက်ပျိုးထွက်ရှိသည့် ဆန်၊ ပဲ၊ ပြောင်း လယ်ယာထွက်ကုန်ပစ္စည်းများ၏ Value Added အဆင့်သတ်မှတ်ခြင်း အစည်းအဝေးကို ၈.၈.၂၀၂၂ ရက်နေ့ (၁၁:၀၀)နာရီအချိန်တွင် စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး၌ ကျင်းပခဲ့ရာ ပြည်နယ်ဦးစီးမှူး၊ ဒုတိယပြည်နယ် ဦးစီးမှူး၊ ကချင်ပြည်နယ် ဆန်၊စပါးလုပ်ငန်းရှင်အသင်းဥက္ကဌနှင့် တာဝန်ရှိသူများ၊ ကချင်ပြည်နယ် ပြောင်းလုပ်ငန်းရှင်အသင်းဥက္ကဌနှင့် အသင်းသူ၊ အသင်းသားများ တက်ရောက်ခဲ့ပြီး အဆိုပါ အစည်းအဝေးတွင် ဆန်၊စပါးလုပ်ငန်းရှင်အသင်းဥက္ကဌ ဦးချစ်လွင်မှ ကချင်ပြည်နယ်၌ ဆန် အား တန်ဖိုးမြှင့်ထုတ်ကုန်အနေဖြင့် ဆန်ခေါက်ဆွဲ၊ ရေစိမ်ခေါက်ဆွဲ၊ မုန့်တီ ခြောက်နှင့် ဆန်မှုန့်တို့ကို ထုတ်လုပ်လျက်ရှိပြီး Value Added အဖြစ် အဆင့်သတ်မှတ်နိုင်သည့် ထုတ်ကုန်များအနေဖြင့် အဆင့်မြင့် ဆန် ၁၀၀ ရာခိုင်နှုန်း (Emata Super-100%) နှင့် အဆင့်မြှင့် ဆန် ၅ ရာခိုင်နှုန်း (Emata Super-5%) ထုတ်လုပ်၍ တန်ဖိုးမြှင့် ဆန်တင်ပို့ရောင်းချရန် Value Added သတ်မှတ်သင့်ကြောင်း ဆွေးနွေးတင်ပြခဲ့ပြီး ကချင်ပြည်နယ် ပြောင်းလုပ်ငန်းရှင်အသင်းဥက္ကဌ ဦးထွန်းမြင့်အောင်ကြည်ဦးမှလည်း အစေ့ထုတ်ပြောင်းကို အခြောက်ခံစက်ဖြင့် သန့်စင်ပြီးနောက် အဆင့်-၁(Grade-1)၊ အဆင့်-၂ (Grade-2)၊ အဆင့်-၃ (Grade-3) အဆင့်သတ်မှတ်ခွဲခြားထုတ်လုပ်၍ အစေ့ထုတ်ပြောင်း အဆင့်-၁ (Special Quality)နှင့်အဆင့်-၂(FAQ)ကို တန်ဖိုးမြှင့်ထုတ်ကုန် အဆင့်သတ်မှတ်နိုင်ရေး တင်ပြဆွေးနွေး ခဲ့ကြောင်း သတင်းရရှိပါသည်။

DOCA(ကချင်)

        ဧရာဝတီတိုင်းဒေသကြီး ၊ စားသုံးသူရေးရာဦးစီးဌာန လပွတ္တာခရိုင် ၊လပွတ္တာမြို့နယ်တာဝန်ခံ ဦးမြင့်ဌေးနှင့်ဝန်ထမ်းများသည်  မြို့နယ်စည်ပင်သာယာရေးအဖွဲ့နှင့်ပူးပေါင်း၍ (၈.၈.၂၀၂၂) ရက်နေ့ နံနက်(၁၀:၃၀) နာရီက လပွတ္တာမြို့ အမှတ်(၉)ရပ်ကွက်၊ ဩဘာလမ်းရှိ မုန့်မျိုးစုံရောင်းချသော ဆိုင်များသို့ သွားရောက်ပြီး၊ ကုန်ပစ္စည်းများပေါ်တွင် ကုန်အညွှန်းအမှတ်အသားဖော်ပြချက်ပြည့်စုံမှု ရှိ/မရှိ ဈေးကွက်စောင့်ကြည့်စစ်ဆေးခဲ့ပါသည်။

        ထိုသို့ကွင်စစ်ဆေးရာတွင် မြို့နယ်တာဝန်ခံဦးမြင့်ဌေးမှ အမှတ်(၉)ရပ်ကွက် ဩဘာလမ်းရှိ မုန့်မျိုးစုံဆိုင်ပိုင်ရှင်များအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသာ စားသုံးသူကာကွယ်ရေးဥပဒေ ၂၀၁၉ ပါ ပြဌာန်းချက်များအရ ဥပဒေအခန်း(၉)ပါ စားသုံးသူ၏အခွင့် အရေးနှင့်တာဝန်များ၊ ဥပဒေအခန်း(၁၀)ပါ စီးပွားရေးလုပ်ငန်းရှင်၏တာဝန်များ၊ ဥပဒေအခန်း(၂၃) ပါ တားမြစ်ချက်များ၊ ဥပဒေအခန်း(၂၄)ပါပြစ်မှုပြစ်ဒဏ်များ၊ စားသုံးသူကာကွယ်ရေးဥပဒေအခန်း (၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ(၄၁) ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု(သို့)တစ်ခုထက်ပို၍တွဲလျှက်ဖြစ်စေ ရေးသားဖော်ပြရ မည်ဖြစ်ပြီး၊ ကုန်စည်အမျိုးအစားအလိုက်သတ်မှတ်ထားသည့် ဥပဒေများနှင့်အညီ လိုက်နာဆောင် ရွက်ကြရန် ဈေးကွက်အတွင်းရောင်းချနေသော ကုန်စည်များတွင်ကုန်အညွှန်းအမှတ်အသားဖော်ပြချက်ပြည့်စုံမှုရှိ/မရှိ၊  ဌာနမှ ဈေးကွက်စောင့်ကြည့်စစ်ဆေးမှုအား နေ့စဉ်ဆောင်ရွက်သွားမည်ဖြစ်ကြောင်း ဆိုင်ရှင်များသို့ အသိပေးခဲ့ကြောင်း သိရှိရပါသည်။

DOCA(ဧရာဝတီ)