သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံ ဦးမြင့်သူသည် စက်တင်ဘာလ ၂၂ ရက်နေ့ နံနက်ပိုင်းကတောင်ငူမြို့နယ် စီမံအုပ်ချုပ်ရေးအဖွဲ့ ဥက္ကဌ ဦးဉာဏ်လင်းအောင် ဦးဆောင်၍ မြို့နယ်စီမံ အုပ်ချုပ်ရေးအဖွဲ့ အဖွဲ့ဝင်များ၊ အထွေထွေအုပ်ချုပ်ရေးဦးစီးဌာန၊ ဆည်မြောင်းနှင့် ရေအသုံးချရေးဦးစီးဌာန၊ မွေးမြူရေးနှင့်ကုသရေးဦးစီးဌာန၊ စက်မှုလယ်ယာဦးစီးဌာန၊ စိုက်ပျိုးရေး ဦးစီးဌာနတို့မှ မြို့နယ်ဦးစီးမှူးများ ပါဝင်သော ဌာနဆိုင်ရာ ပူးပေါင်းအဖွဲ့နှင့်အတူ တောင်ငူမြို့နယ်  ငါးဖယ်အင်းကျေးရွာအုပ်စု ကျွဲကူးကျေးရွာမှ တောင်သူလယ်သမားများအား ဗောဓိမြိုင်ကျောင်း ဓမ္မာရုံ၌ တွေ့ဆုံပြီး သက်ဆိုင်ရာ ဌာနများအလိုက် ဆောင်ရွက်ထားရှိမှုအခြေအနေများကို ရှင်းလင်း ပြောကြားကြပါသည်။

      စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံက စားသုံးသူအခွင့်အရေးနှင့် စားသုံးသူ နစ်နာဆုံးရှုံးမှုများ မဖြစ်စေရေးအတွက် ဆောင်ရွက်ချက်များ၊ စားသုံးသူနစ်နာဆုံးရှုံးမှု များ ဖြစ်ပေါ်ပါက တိုင်ကြားနိုင်သည့်အကြောင်းများကိုလည်းကောင်း၊ ပြည်တွင်းကုန်သွယ် မှုဖွံ့ဖြိုးရေး အတွက်  ဈေးနှုန်းဈေးကွက်သတင်းများ၊ သီးနှံများ၏ စိုက်အောင်ထွက် စားသုံးပိုလျှံ သတင်း အချက် အလက်များ ရယူစုဆောင်း၍ တင်ပြဆောင်ရွက်ပေးသည့် အခြေအနေများ၊ သီးနှံအစုအဖွဲ့ များ ဖွဲ့စည်း၍ စုပေါင်းဆောင်ရွက်သည့် အလေ့အထများ ရှိစေရေးအတွက် ဆောင်ရွက်ပေးသည့် အခြေအနေများကိုလည်းကောင်း၊ ကျန်းမာရေးဌာနက အကြံပြုထားသည့် လူတစ်ဦး စားသုံးသင့် သည့် ဆီပမာဏထက်ကျော်လွန်၍ စားသုံးခြင်းမပြုခြင်းဖြင့် ကျန်းမာရေးနှင့်ညီညွတ်သည့်အပြင် မိသားစုစီးပွားရေးကိုလည်း အထောက်အကူပြုမည့် အခြေအနေများ၊ နေကြာ တိုးချဲ့စိုက်ပျိုးခြင်းဖြင့် ကျန်းမာရေးနှင့်ညီညွတ်သည့် စားသုံးဆီများကို စားရမည့်အပြင် ပြည်တွင်းစားသုံးဆီ ဖူလုံရေး အတွက်လည်း အထောက်အကူပြုမည့် အခြေအနေများကို ရှင်းလင်းပြောကြားခဲ့ပါသည်။

     ဟောပြောပွဲအပြီးတွင် တက်ရောက်လာသူများက သိရှိလိုသည်များကို မေးမြန်းကြရာ သက်ဆိုင်ရာဌာနဆိုင်ရာများမှ တာဝန်ရှိသူများက ရှင်းလင်းပြောကြားခဲ့ကြောင်းနှင့် ဟောပြောပွဲသို့ ကျေးရွာနေ တောင်သူလယ်သမား ၁၈၀ ဦး တက်ရောက်ကြောင်း သိရှိရပါသည်။

DOCA(ပဲခူး)

              ပဲခူးတိုင်းဒေသကြီး ၊ ညောင်လေးပင်ခရိုင် ၊ကျောက်တံခါးမြို့နယ် ၊  ပြန်ကြားရေးနှင့် ပြည်သူ့ ဆက်ဆံရေးဦးစီးဌာန၊ စားသုံးသူရေးရာဦးစီးဌာနနှင့် တောင်ငူမြို့နယ် အားကစားနှင့် ကာယပညာ ဦးစီးဌာနတို့ ပူးပေါင်း၍ အသိပညာပေးဆွေးနွေးဟောပြောပွဲကို စက်တင်ဘာလ ၂၂ ရက်နေ့ နံနက် ၁၀ နာရီက အခြေခံပညာအလယ်တန်း သူဌေးကုန်းကျောင်း၌ ကျင်းပပြုလုပ် ခဲ့ပါသည်။

              ဟောပြောပွဲတွင် စားသုံးသူရေးရာဦးစီးဌာန ၊ ကျောက်တံခါးမြို့နယ်တာဝန်ခံ ဒေါ်တင်တင်စန်းက စားသုံးသူရေးရာဦးစီးဌာနပေါ်ပေါက်လာပုံ၊ စားသုံးသူ၏ အခွင့်အရေးနှင့် တာဝန်များ၊ ဈေးကွက်အတွင်း စားသောက်ကုန်နှင့် အသုံးအဆောင်ပစ္စည်းများဝယ်ယူရာတွင် ကုန် အညွှန်းအမှတ်အသားများ တိကျစွာဖော်ပြထားသည့် ကုန်စည်များကို ဦးစားပေးဝယ်သင့်ပုံများ၊ စားသုံးသူ နစ်နာဆုံးရှုံးမှုများ ပေါ်ပေါက်လာပါက စားသုံးသူရေးရာဦးစီးဌာနသို့ တိုင်ကြားနိုင်ခြင်း များကို ဟောပြောခဲ့ကြောင်း သိရှိရပါသည်။

              အားကစားနှင့် ကာယပညာ ဦးစီးဌာနမှ နည်းစနစ်မှူး ဒေါ်မိုးသူဇာက အားကစား ပြုလုပ်ခြင်း အကျိုးကျေးဇူးများ ၊ အားကစားနှင့် ကာယပညာသိပ္ပံသင်တန်းကျောင်း ဖွင့်လှစ် ထားရှိမှုနှင့် တက်ရောက်လိုပါက ဆက်သွယ်ဆောင်ရွက်ရမည့် နည်းလမ်းများအား ပြောကြားခဲ့ ကြောင်း သိရှိရပါသည်။

              ဆက်လက်၍ ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်စန်းတင့် မှ လူကုန်ကူးမှုအန္တရာယ်နှင့် တားဆီးကာကွယ်ရေး နည်းလမ်းများအား ရှင်းလင်းပြောကြားခဲ့ပြီး အဖွဲ့မှ ကျောင်းမုန့်ဈေးတန်းရောင်းချနေမှုအား ကြည့်ရှုစစ်ဆေးခဲ့ကြောင်း သိရှိရပါသည်။  

DOCA(ပဲခူး)

              ပဲခူးတိုင်းဒေသကြီး ၊ စားသုံးသူရေးရာဦးစီးဌာန ၊ တိုင်းဒေသကြီးဦးစီးမှူးရုံး ၊ ခရိုင်ဦးစီးမှူး ရုံးနှင့် မြို့နယ်ဦးစီးမှူးရုံးများတွင် တာဝန်ထမ်းဆောင်လျက်ရှိသည့် ဝန်ထမ်းများအနေဖြင့် ဌာနတွင်း လုပ်ငန်းများဆောင်ရွက်ရာတွင် ထိရောက်မြန်ဆန်စွာ ဆောင်ရွက်နိုင်ရန်နှင့် ဒေသတွင်း သာမက နိုင်ငံတကာနှင့် ရင်ဘောင်တန်းဆောင်ရွက်နိုင်သော စွမ်းဆောင်ရည်မြင့်မားသည့် အရည်အချင်း ပြည့်ဝ သော ဝန်ထမ်းများ တိုးတက်များပြားစေရန် ရည်ရွယ်၍ ဝန်ထမ်းများ စွမ်းဆောင်ရည်သင်တန်းကို (၂၁.၉.၂၀၂၂) ရက်နေ့မှ (၂၃.၉.၂၀၂၂) ရက်နေ့ထိ ဖွင့်လှစ်ခဲ့ပါသည်။

              အဆိုပါ သင်တန်းဖွင့်ပွဲတွင် ပဲခူးတိုင်းဒေဿကြီး အစိုးရအဖွဲ့ ၊ စီးပွားရေးရာဝန်ကြီးမှ အဖွင့် အမှာစကား ပြောကြားရာတွင် စားသုံးသူရေးရာဦးစီးဌာနတွင် တာဝန်ထမ်းဆောင်နေသော ဝန်ထမ်း များသည် စားသုံးသူအရေးကိစ္စများသာမက ပြည်တွင်းကုန်သွယ်မှု ဖွံ့ဖြိုးတိုးတက်ရေးအတွက်ပါ ဆောင်ရွက်နေရသော ဌာနဖြစ်သည့်အတွက် ဝန်ထမ်းတစ်ဦးချင်း၏ စွမ်းဆောင်ရည်မြင့်မားလာရေးကို ဦးတည်ဆောင်ရွက်ရန် လိုအပ်ကြောင်း ပြောကြားခဲ့ပါသည်။

              ထို့နောက် မိတ်ဖက်ဌာနဆိုင်ရာဖြစ်သော ကုန်သွယ်ရေးဦးစီးဌာန ၊ စိုက်ပျိုးရေးဦးစီးဌာန ၊ စက်မှုကြီးကြပ်ရေးနှင့် စစ်ဆေးရေးဦးစီးဌာန ၊ အစားအသောက်နှင့် ဆေးဝါးကွပ်ကဲရေးဦးစီးဌာန ၊ မွေးမြူရေးနှင့် ကုသရေးဦးစီးဌာန ၊ စည်ပင်သာယာရေးအဖွဲ့ ၊ ရင်းနှီးမြုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာနတို့မှ  သင်တန်းနည်းပြ (၈)ဦး ၊ ဒုတိုင်းဒေသကြီးဦးစီးမှူးနှင့် ဌာနခွဲ တာဝန်ခံ (၃)ဦးတို့မှ သက်ဆိုင်ရာ ဘာသာရပ်အလိုက် သင်တန်းပို့ချခဲ့ပြီး သင်တန်းတွင် သင်တန်းသား ၊ သင်တန်းသူ (၃၀)ဦးတက်ရောက်ကြောင်း သိရှိရပါသည်။

DOCA(ပဲခူး)

           ၂၇.၉.၂၀၂၂ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးနှင့် ဝန်ထမ်းများသည် မွန်ပြည်နယ်မိခင်နှင့်ကလေးစောင့်ရှောက်ရေးအသင်း၊ မွန်ပြည်နယ် ဆီကုန်သည်နှင့်ဆီလုပ်ငန်းရှင်အသင်းတို့ပူးပေါင်း၍ တောင်ဝိုင်းဓမ္မာရုံ၌ ပြည်သူများသို့ စားသောက်ကုန် များလှူဒါန်းခဲ့ကြကြောင်း သိရှိရသည်။

        အဆိုပါ လှူဒါန်းခြင်းတွင် ဆန်၊ ဆီ၊ ကြက်ဥ၊ ခေါက်ဆွဲခြောက်တို့အား အိမ်ထောင်စု တစ်စုလျှင် (၁၇၂၉၀) ကျပ်နှုန်းဖြင့် အိမ်ထောင်စု (၁၂၀) စု အတွက် စုစုပေါင်းတန်ဖိုးအားဖြင့် (၂၀,၇၄,၈၀၀) ကျပ်ခန့် တန်ဖိုးရှိသော စားသောက်ကုန်ပစ္စည်းများအား လှူဒါန်းပေးခဲ့ကြောင်း သိရှိရပါသည်။

 DOCA(မွန်)

         မွန်ပြည်နယ် စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှ ဝန်ထမ်းများသည် ၂၆.၉.၂၀၂၂ ရက်နေ့ (၀၉:၃၀)ချိန်တွင် ချောင်းဆုံမြို့နယ် အမက(ကညှော်) ကျောင်း၌ စားသုံးသူ ကာကွယ်ရေး အသိပညာပေးဟောပြောဆွေးနွေးပွဲ ပြုလုပ်ခဲ့သည်။

         အဆိုပါဟောပြောဆွေးနွေးပွဲတွင် ကျောင်းအုပ်ဆရာမကြီး ဒေါ်ခင်လေးမြင့်က အဖွင့်အမှာစကား ပြောကြားခဲ့ပြီး စားသုံးသူရေးရာဦးစီးဌာန၊ ချောင်းဆုံမြို့နယ်တာဝန်ခံ ဦးပြည့်ဖြိုးဝေက စားသုံးသူကာကွယ်ရေး ဥပဒေပါ စားသုံးသူအခွင့်အရေး(၈)ချက်နှင့်တာဝန်များ၊ ကုန်စည်များကို ဝယ်ယူသုံးစွဲရာတွင် ကုန်အညွှန်းအမှတ်အသားကို သေချာစွာဖတ် ရှု့ပြီးမှ အသုံးပြုသင့်ကြောင်း၊ စားသုံးသူထိခိုက်နစ်နာမှုအတွက် တိုင်ကြားနိုင်သည့် အကြောင်းအရာများ ၊ Call Center ၁၅၃၅ သို့ ဖုန်းခေါ်ဆို၍ တိုင်ကြားနိုင်သည့် အခြေအနေများအား ဟောပြောဆွေးနွေးခဲ့ပါသည်။

          ထို့နောက် ကျောင်းအုပ်ဆရာမကြီးထံ လက်ကမ်းစာစောင်များပေးအပ်ခဲ့ပြီး အဆိုပါဆွေး နွေးပွဲသို့ ဆရာ၊ ဆရာမ၊ ကျောင်းသား၊ ကျောင်းသူ (၂၁၆) ဦးတက်ရောက်ခဲ့ကြောင်း သိရှိရပါသည်။

DOCA(မွန်)