သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ ချောက်မြို့နယ်တာဝန်ခံ ဒေါ်မြတ်မြတ်မိုးနှင့် ဒေါ်ချိုဝေလွင် (ဒု-ဦးစီးမှူး) တို့သည် ကျေးလက်ဒေသဖွံ့ဖြိုးရေးဦးစီးဌာနမှ ဦးစိုးလွင်(ဒု-ဦးစီးမှူး)၊ ကျေးရွာအုပ်ချုပ်ရေးမှူး ဦးစောလတ်တို့နှင့်ပူးပေါင်းပြီး း(၂၂.၇.၂၀၂၂) ရက်နေ့တွင် ချောက်မြို့နယ် ဂွေးပင်ကြီးကျေးရွာအုပ်ချုပ်ရေးမှူးအိမ်၌ ကျေးလက်နေပြည်သူများသိသင့်သည့် စားသုံးသူကာကွယ်ပေးရေးအကြောင်း သိကောင်းစရာများဆွေးနွေးခြင်းနှင့် ကျေးရွာရှိအိမ်ဆိုင်များတွင် စားသုံးရန်မသင့်သောကြောင့် တားမြစ်ထားသော အစားအစာများ၊ မှိုတက်နေသော  သက်တမ်းလွန်နေသော အစားအစာများနှင့် ကုန်အညွှန်းအမှတ်အသားမပြည့်စုံသော အစားအစာများ ရောင်းချမှု ရှိ/မရှိ စျေးကွက်စောင့်ကြည့် စစ်ဆေးခဲ့ပါသည်။

           ချောက်မြို့နယ်တာဝန်ခံ ဒေါ်မြတ်မြတ်မိုး း(ဌာနခွဲစာရေး) မှ စားသုံးသူကာကွယ်ရေးဥပဒေ - ၂၀၁၉ ပါ စားသုံးသူအခွင့်အရေး (၈ )ချက်နှင့် တာဝန် (၄) ချက်၊ စီးပွားရေးလုပ်ငန်းရှင်များ၏ တာဝန်တားမြစ်ချက်များ၊ ပြစ်မှု/ ပြစ်ဒဏ်များ၊ ကုန်စည် (သို့မဟုတ်) ဝန်ဆောင်မှုနှင့်စပ်လျဉ်း၍ အာမခံပေးထားမှုအပေါ် စားသုံးသူများက တောင်းဆိုနိုင်သည့် အခွင့်အရေးများအား ရှင်းလင်းဆွေးနွေးခဲ့ပါသည်။

            ဒေါ်ချိုဝေလွင် (ဒု-ဦးစီးမှူး) မှ စားသုံးသူများနစ်နာဆုံးရှုံးမှုများဖြစ်‌ပေါ်ပါက မကွေးတိုင်းဒေသကြီး ဦးစီးမှူးရုံး၌ ဖွင့်လှစ်ထားသော Consumer Information and Complaint Center (CICC) သို့လည်းကောင်း၊ Facebook စာမျက်နှာများတွင် စားသုံးသူရေးရာဦးစီးဌာန Page တွင်လည်းကောင်း၊ Mobile Application များတွင် DOCA Myanmar နှင့် Consumer Call No,1535 သို့ Mytel, Oreedoo, Telenor, MPT Sim Card  များဖြင့် ခေါ်ဆိုတိုင်ကြားနိုင်သလို၊ မြို့နယ်တာဝန်ခံများထံလည်း ဆက်သွယ်တိုင်ကြားနိုင်ကြောင်း၊ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များကို ကျယ်ကျယ်ပြန့်ပြန့်သိရှိလိုပါက www.doca. gov.mm သို့ ဝင်ရောက်လေ့လာနိုင်ကြောင်း အသိပညာပေးဆွေးနွေးခဲ့ပါသည်။

DOCA(မကွေး)

             ကျောက်ဆည်ခရိုင် ၊ စားသုံးသူရေးရာဦးစီးဌာနသည် စားသုံးသူများဘေးအန္တရာယ်ကင်းရှင်းစေရေး ၊ ထုတ်ကုန်များလုံခြုံစိတ်ချရမှုရှိစေရေးအတွက် စားသုံးသူကာကွယ်ရေးအသိပညာပေး ဟောပြောဆွေးနွေးပွဲကျင်းပခြင်းနှင့် စျေးကွက်စောင့်ကြည့်စစ်ဆေးခြင်းလုပ်ငန်းများအား စဉ်ဆက်မပြတ်ဆောင်ရွက်လျက်ရှိပါသည်။ ကျောက်ဆည်ခရိုင်၊ စားသုံးသူရေးရာဦးစီးဌာန၊ ခရိုင်ဦးစီးမှူး ဦးဆောင်သော စစ်ဆေးရေးအရာရှိများသည် မြို့နယ်စည်ပင်သာယာရေးအဖွဲ့နှင့်ပူးပေါင်းပြီး (၂၂-၇၂၀၂၂) ရက်နေ့တွင် ကျောက်ဆည်ခရိုင်အတွင်းရှိ ကျောက်ဆည်၊ စဉ့်ကိုင်၊ မြစ်သားနှင့် တံတားဦးမြို့နယ်များရှိ Shopping Mallများ၊ စတိုးဆိုင်များနှင့်အလှကုန်ပစ္စည်းရောင်းချသည့်ဆိုင်များတွင် ရောင်းချနေသည့် Mistine အလှကုန်ပစ္စည်းများအား စျေးကွက်စောင့်ကြည့်စစ်ဆေးခြင်းများ ပြုလုပ်ခဲ့ပါသည်။ ခရိုင်ဦးစီးမှူးနှင့်အဖွဲ့မှ စျေးကွက်အတွင်းရောင်းချနေသော Mistine အလှကုန်ပစ္စည်းများအား Thiri Cosmetic Co,Ltd မှ မြန်မာနိုင်ငံတစ်ဦးတည်းကိုယ်စားလှယ်အဖြစ် FDA ၏ထောက်ခံချက်များဖြင့် စျေးကွက်အတွင်း တရားဝင်ဖြန့်ဖြူးရောင်းချလျက်ရှိကြောင်း၊ကုမ္ပဏီမှထုတ်လုပ်သောပစ္စည်းများမှာ Hologram (ရောင်ပြန်) စတစ်ကာနှင့် မြန်မာစာ Labelling ကပ်၍ ဖြန့်ဖြူးလျက်ရှိကြောင်း၊ ယခုအခါတွင်  စျေးကွက်အတွင်း တရားမဝင်ဖြန့်ဖြူးရောင်းချလျက်ရှိသော Mistine အလှကုန်ပစ္စည်းများ၌   Hologram   (ရောင်ပြန်)  စတစ် ကာနှင့် မြန်မာစာ Labelling ကပ်နှိပ်ထားခြင်းမရှိသည့်အတွက် အရေးယူဆောင်ရွက်ရန် တိုင်ကြားလာမှုအရ စျေးကွက်စောင့်ကြည့်စစ်ဆေးရခြင်းဖြစ်ကြောင်း၊ အလှကုန်ပစ္စည်းများရောင်းချသည့်ဆိုင်များအနေဖြင့် စားသုံးသူကာကွယ်ရေးဥပဒေ၌ပါရှိသည့် ကုန်အညွှန်း အမှတ်အသားဖော်ပြခြင်းဆိုင်ရာအချက်အလက်များ ပြည့်စုံစွာပါရှိသည့်ကုန်ပစ္စည်းများကိုသာ ရောင်းချရန်လိုအပ်ကြောင်းနှင့် Mistine အလှကုန်ပစ္စည်းများအား ရောင်းချရာတွင် ကုမ္ပဏီမှတရားဝင်တင်သွင်းရောင်းချသည့် Hologram (ရောင်ပြန်) စတစ်ကာနှင့် မြန်မာစာ Labelling ပါရှိသောကုန်ပစ္စည်းများကိုသာရောင်းချရန် ညွှန်ကြားခဲ့ပြီး ဆိုင်အတွင်းရှိ ရောင်းချနေသော Mistine အလှကုန်ပစ္စည်းများအား စျေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ကြောင်း သတင်းရရှိပါသည်။

DOCA(မန္တလေး)

               ကျောက်ဆည်ခရိုင် ၊ စားသုံးသူရေးရာဦးစီးဌာန ခရိုင်ဦးစီးမှူးဦးဆောင်သောဝန်ထမ်းများသည် (၂၁-၇-၂၀၂၂) ရက်နေ့တွင် ကျောက်ဆည်မြို့၊ အေးမြကြည်လင်စျေးနှင့်မြို့မစျေးတို့တွင် စားအုန်းဆီမျာအား လက်လီ၊လက်ကားဖြန့်ဖြူးရောင်းချသည့်လုပ်ငန်းသို့ စျေးကွက်စောင့်ကြည့်စစ်ဆေးခြင်းလုပ်ငန်းမျာ းဆောင်ရွက်ခဲ့ပါသည်။ထိုသို့စစ်ဆေးဆောင်ရွက်ရာတွင် ကျောက်ဆည်ခရိုင် ၊ စားသုံးသူရေးရာဦးစီးဌာန၊ ခရိုင်ဦးစီးမှူးက မိမိတို့ဝန်ကြီးဌာနမှ စားသုံးဆီတင်သွင်း၊ သိုလှောင်၊ ဖြန့်ဖြူးခြင်းလုပ်ငန်းကြီးကြပ်ရေးကော်မတီကိုဖွဲ့စည်းကာ ပြည်ပမှတင်သွင်းလာသည့် စားသုံးဆီများအား သတ်မှတ်အရည်အသွေးစံချိန်စံညွှန်းများနှင့်ပြည့်မီစေရေး၊ စားသုံးသူပြည်သူများ ကျန်းမာရေးနှင့်ညီညွတ်သောစားသုံးဆီများကိုသုံးစွဲနိုင်ရေး၊စျေးနှုန်းတည်ငြိမ်စွာဖြင့် ဝယ်ယူစားသုံးနိုင်စေရေးတို့အတွက် ကြီးကြပ်ထိန်းကျောင်းလျက်ရှိကြောင်း ၊ ယခုဝယ်ယူခွင့်ရရှိသည့် ကုန်သည်များအနေဖြင့် စားအုန်းဆီများကို ရန်ကုန်အထိုင်စျေး၊ ရည်ညွှန်းလက်ကားစျေးနှုန်းအပေါ်  သယ်ယူပို့ဆောင်ခကုန်ကျစရိတ်များ ထပ်ပေါင်း၍ ၂% အမြတ်ထက်မပိုသော စျေးနှုန်းဖြင့်ရောင်းချရ မည်ဖြစ်ပြီး စျေးကွက်အတွင်း ဖြစ်သင့်ဖြစ်ထိုက်သည့်စျေးနှုန်းများဖြင့် ရောင်းချစေရေး ၊ စျေးနှုန်းအဆမတန်မြှင့်တင်ရောင်းချြခင်းများ မပြုလုပ်စေရေးတို့အတွက် မိမိတို့အဖွဲ့မှ ကွင်းဆင်းပြီး စျေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်ရခြင်းဖြစ်ကြောင်း ရှင်းလင်းပြောကြားခဲ့ပါသည်။ ကျောက်ဆည်မြို့ရှိ စားသုံးဆီဝယ်ယူခွင့်ရရှိသူ ဦးဇော်ဇော်ထွန်းမှ ကျောက်ဆည်မြို့၊ အေးမြကြည်လင်စျေးနှင့်မြို့မစျေးတို့ရှိ နေလသုခဆီဆိုင်များတွင် စားသုံးသူပြည်သူများအား စားအုန်းဆီ (၁) ပိဿာလျှင် (၅၀၀၀/-) ကျပ်နှုန်းဖြင့် ရောင်းချခဲ့ကြောင်း းသတင်းရရှိပါသည်။

DOCA(မန္တလေး)

           ရခိုင်ပြည်နယ် စစ်တွေခရိုင်၊ စားသုံးသူရေးရာဦးစီးဌာန စစ်တွေခရိုင်ဦးစီးမှူး ဦးမောင်လှဝင်း (ဦးစီးအရာရှိ)ဦးဆောင်ပြီး၊ စစ်တွေမြို့နယ်တာဝန်ခံ ဦးသိန်းအောင်(ဦးစီးမှူး)နှင့် ဦးဇော်မင်းဦး (ဒု-ဦးစီးမှူး)နှင့် ဝန်ထမ်းများသည် (၂၂-၇-၂၀၂၂)ရက် နေ့လည်(၁:၃၀)နာရီအချိန်တွင် စစ်တွေမြို့ ဆင်ကူးလမ်းရပ်ကွက် အ လ က (၆) စာသင်ကျောင်း၌ စားသုံးသူကာကွယ်ရေးဆိုင်ရာ အသိပညာပေး ဟောပြောဆွေးနွေးပွဲ ကျင်းပပြုလုပ်ခဲ့ပါသည်။

           အဆိုပါဟောပြောပွဲတွင် အ လ က (၆)   ကျောင်းအုပ်ဆရာမကြီး ဒေါ်သီတာမိုးက အဖွင့် အမှာစကားပြောကြားပြီး ခရိုင်ဦးစီးမှူး ဦးမောင်လှဝင်းက စားသုံးသူကာကွယ်ရေးလုပ်ငန်း ဆောင်ရွက်ချက်များကိုလည်းကောင်း၊ မိတ်ဖက်ဌာနအဖွဲ့အစည်းများဖြင့် ထုတ်ကုန်လုံခြုံစိတ်ချရမှုဆိုင်ရာကိစ္စရပ်များဆောင်ရွက်နိုင်ရေးအတွက် လုပ်ငန်းရှင်များနှင့် တွေ့ဆုံသည့် အခြေအနေများကိုလည်းကောင်း၊ ဈေးကွက်စောင့်ကြည့်စစ်ဆေးခြင်းများ ဆောင်ရွက်နေခြင်းကိုလည်းကောင်း ရှင်းလင်းဆွေးနွေးခဲ့ပြီး စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေးဥပဒေ (၂၀၁၉)ပါ အခန်း(၁၈)ပုဒ်မ(၄၁) တွင် ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ပြဌာန်းထားရှိမှုများကို ချပြဆွေးနွေးပြောကြားခဲ့ပါသည်။ ဆက်လက်၍ မြို့နယ်တာဝန်ခံ ဦးသိန်းအောင်က စားသုံးရန်မသင့်သည့် စံမညီအစားအသောက်များကြောင့် တွေ့ကြုံရမည့်လတ်တလောရောဂါနှင့် ကြာရှည်ရောဂါဖြစ်ပွားနိုင်မှုများနှင့် ထိခိုက်မှုများဖြစ်ပေါ်နိုင်ခြင်းတို့အား ချပြဆွေးနွေးခဲ့ပြီးနောက် ဦးဇော်မင်းဦးက စားသုံးသူကာကွယ်ရေးဥပဒေ အခန်း(၉)ပုဒ်မ (၁၉၊၂၀) ပါ စားသုံးသူအခွင့်အရေး(၈)ချက်အား စားသုံးသူများ ရရှိခံစားနိုင်မှုများကိုလည်းကောင်း၊ စားသုံးသူများအနေဖြင့်လည်း လိုက်နာရမည့် တာဝန်(၄)ချက်အားလည်းကောင်း ချပြဆွေးနွေးခဲ့ပါသည်။

      ထို့‌‌နောက် ကုန်စည်နှင့် ဝန်ဆောင်မှုများနှင့်ပတ်သက်၍ နစ်နာဆုံးရှုံးများဖြစ်ပေါ်လာပါက တိုင်းကြားနိုင်သည့် နည်းလမ်းများကိုလည်းကောင်း၊ စစ်တွေခရိုင်တွင် စားသုံးသူသတင်း ပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC)ဖွင့်လှစ်ထားရှိကြောင်းကိုလည်းကောင်း၊ Consumer Call Center ဖွင့်လှစ်ထားရှိမှုအခြေအနေများကိုလည်းကောင်း အကျယ်တဝင့် ရှင်းလင်းဆွေးနွေးခဲ့ပြီး စားသုံးသူအသိပညာပေးလက်ကမ်းစာစောင်များပေးအပ်ခဲ့ပါသည်။

             ဟောပြောပွဲသို့ ဆရာ/ဆရာမများနှင့် ကျောင်းသား/သူ (၂၃၀)ဦး တက်ရောက်ခဲ့ကြောင်း သတင်းရရှိပါသည်။

DOCA(ရခိုင်)  

          ပဲခူးတိုင်းဒေသကြီး တရားမဝင်ကုန်သွယ်မှု တိုက်ဖျက်ရေးအထူးအဖွဲ့၏ လုပ်ငန်းဆောင်တာများ ထိရောက်စွာဆောင်ရွက်သွားနိုင်ရန်အတွက် ပဲခူးတိုင်းဒေသကြီး၊ တရားမဝင်ကုန်သွယ်မှုတိုက်ဖျက်ရေး အထူးအဖွဲ့ ဥက္ကဌနှင့် ခရိုင်တရားမဝင် ကုန်သွယ်မှု တိုက်ဖျက်ရေးအထူးအဖွဲ့ဝင်များတွေ့ဆုံပွဲ အခမ်းအနားကို ဇူလိုင်လ(၂၂)ရက် နံနက်(၉:၀၀)နာရီအချိန်တွင် ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တိုင်း‌ဒေသကြီးဦးစီးမှူးရုံးအစည်းအဝေးခန်းမ၌ Zoom Virtual စနစ်ဖြင့်  ကျင်းပပြုလုပ်ခဲ့ပါသည်။

          အဆိုပါ အစည်းအဝေးသို့ ပဲခူးတိုင်းဒေသကြီး တရားမဝင်ကုန်သွယ်မှု တိုက်ဖျက်ရေးအထူး အဖွဲ့၊ ဥက္ကဌ ၊ အဖွဲ့ဝင်များ ၊ တွဲဖက်အတွင်း‌ရေးမှူးများနှင့် ခရိုင်တရားမဝင် ကုန်သွယ်မှု တိုက်ဖျက်ရေး အထူး အဖွဲ့ဝင်များ စုစုပေါင်း (၅၅)ဦး တက်ရောက်ခဲ့ကြပါသည်။ အစည်းအဝေးတွင် ပဲခူးတိုင်းဒေသကြီး တရားမဝင် ကုန်သွယ်မှု တိုက်ဖျက်‌ရေး အစီအစဉ်များ၊  ရှေ့ဆက်လက်ဆောင်ရွက်မည့်အစီအမံများနှင့် ပတ်သက်၍ ဆွေးနွေးခြင်း ၊ ခရိုင်တရားမဝင် ကုန်သွယ်မှု တိုက်ဖျက်ရေးအထူးအဖွဲ့ဝင်များအနေဖြင့် ချမှတ်ထားသော မူဝါဒများနှင့်အညီ လက်တွေ့ဆောင်ရွက်နိုင်ရေးအတွက်  ဆွေးနွေးခဲ့ကြပါသည်။

          ပဲခူးတိုင်းဒေသကြီးအနေဖြင့် ၂၀၂၂ခုနှစ်၊ ဇန်နဝါရီလတွင် စိုက်ပျိုးရေး ဆေးပစ္စည်း၊ စားသောက် ကုန်၊ လူသုံးကုန်ပစ္စည်းအား တန်ဖိုးကျပ်(၉၄၄၇၄၀၆၀)ကိုလည်းကောင်း၊ ဖေဖော်ဝါရီလတွင် အင်ဂျင် ဝိုင်ဖာ ၊ စားသောက်ကုန်၊ လူသုံးကုန်ပစ္စည်းများအား တန်ဖိုးကျပ် (၆၄၃၀၂၄၃၄)ကိုလည်းကောင်း၊ မတ်လတွင် မော်တော်ယာဉ်နှင့် စားသောက်ကုန်များအား တန်ဖိုးကျပ်(၂၂၁၅၂၈၇၇၇)ကိုလည်းကောင်း၊ ဧပြီလတွင် မော်တော်ယာဉ်နှင့် စားသောက်ကုန်များအား တန်ဖိုးကျပ် (၁၂၆၁၃၃၀၈၄) ကိုလည်းကောင်း ၊ မေလတွင် စားသောက်ကုန်နှင့် လူသုံးကုန်ပစ္စည်းများ ၊ မော်တော်ယာဉ် (၃)စီးနှင့် လိုင်စင်မဲ့ယာဉ် (၁၁)စီးအား တန်ဖိုးကျပ် (၁၆၃၈၇၃၀၈၉) ကိုလည်းကောင်း ၊ ဇွန်လတွင် ယာဉ် ၊ မော်တော်ယာဉ် နှင့် စားသောက်ကုန်နှင့် လူသုံးကုန်ပစ္စည်းနှင့် လိုင်စင်မဲ့ ယာဉ်(၁)စီးအား တန်ဖိုးကျပ် (၄၄၁၉၅၉၅၇၂) ကိုလည်းကောင်း ၊ ဇူလိုင်လတွင် ယာဉ် ၊ မော်တော်ယာဉ် နှင့် စားသောက်ကုန်နှင့် လူသုံးကုန်ပစ္စည်းနှင့် လိုင်စင်မဲ့ ယာဉ်(၈)စီးအား တန်ဖိုးကျပ် (၁၁၃၀၇၇၉၄၄၈) ကို တရားမဝင်ကုန်သွယ်မှုတိုက်ဖျက်ရေး အထူးအဖွဲ့မှ ဖမ်းဆီးရမိခဲ့ပြီး ဖြစ်ပါကြောင်း သတင်းရရှိပါသည်။

DOCA(ပဲခူး)