သတင်းနှင့် လှုပ်ရှားမှုများ

            မကွေးတိုင်းဒေသကြီးအတွင်း ကုန်သည်များနှင့် စက်မှုလက်မှုလုပ်ငန်းရှင်များအသင်း ပြန်လည် ဖွဲ့စည်းနိုင်ရေးအတွက် ၂၀၂၂ခုနှစ်၊ ဇူလိုင်လ (၂၂)ရက်နေ့ နံနက်(၀၉:၃၀)နာရီအချိန်တွင် မကွေးတိုင်း ဒေသကြီးအစိုးရအဖွဲ့ စီးပွားရေးရာဝန်ကြီး၊ မကွေးတိုင်းဒေသကြီး စားသုံးသူရေးရာဦးစီးဌာန တိုင်းဒေသကြီးဦးစီးမှူး ဦးမြင့်ဝင်း၊ မကွေးခရိုင်ဦးစီးမှူး၊ ပခုက္ကူခရိုင်ဦးစီးမှူးနှင့် ဝန်ထမ်းများသည် ပခုက္ကူခရိုင်အထွေထွေအုပ်ချုပ်ရေးဦးစီးဌာန၊ မြဧရာအစည်းအဝေးခန်းမတွင် ပခုက္ကူခရိုင် ကုန်သည်များ၊ စက်မှုလက်မှု လုပ်ငန်းရှင်များနှင့် တွေ့ဆုံခဲ့ကြကြောင်းသိရှိရပါသည်။

            အဆိုပါတွေ့ဆုံပွဲတွင် မကွေးတိုင်းဒေသကြီးအစိုးရအဖွဲ့ စီးပွားရေးရာဝန်ကြီးမှ ဒေသအလိုက် ကုန်စည်ဒိုင်အသင်းအဖွဲ့များ ဖွဲ့စည်းနိုင်ရေး၊ ကျေးလက်နေတောင်သူများ လူမှုဘဝမြင့်မားတိုးတက်လာစေရေး၊ ကုန်စည်ဒိုင်ဖွံ့ဖြိုးတိုးတက်ရေးလုပ်ငန်းများတွင် ပူးပေါင်းပါဝင်ဆောင်ရွက်နိုင်ရေး၊ မကွေးတိုင်းဒေသကြီး ကုန်သည်နှင့်စက်မှုလက်မှုလုပ်ငန်းရှင်များအသင်းမှာ သက်တမ်းကုန်ဆုံးပြီဖြစ်၍ ပြန်လည် ဖွဲ့စည်းရာတွင်ဒေသစုံ၊ ကဏ္ဍစုံမှ ကုန်သည်စက်မှုလုပ်ငန်းရှင်များ စုံညီစွာ ပါဝင်ဖွဲ့စည်းနိုင်ရေး၊ ပူးပေါင်းပါဝင် ဆောင်ရွက်ရေးတို့ကို ဆွေးနွေးခဲ့ပါသည်။

            ထို့တွေ့ဆုံပွဲသို့ ဌာနဆိုင်ရာဝန်ထမ်း(၁၀)ဦး၊ ကုန်သည်နှင့် စက်မှုလက်မှုလုပ်ငန်းရှင်များ စုစုပေါင်း (၄၀)ဦးတို့ တက်ရောက်ခဲ့ကြောင်း သတင်းရရှိပါသည်။

DOCA(မကွေး)

           စားသုံးသူရေးရာဦးစီးဌာန၊ဧရာဝတီတိုင်းဒေသကြီး၊ပုသိမ်ခရိုင်ဦးစီးမှူးရုံးမှဦးတင်စိုးလှိုင် ခရိုင် ဦးစီးမှူးသည် ဇူလိုင်လ ၁၂ ရက်က ပုသိမ်မြို့၊ မင်းရဲကျော်စွာလမ်းရှိ မိုးပွင့်အမှတ်တံဆိပ် ပဲဆီ၊ နှမ်း ဆီ၊ နေကြာဆီ ထုတ်လုပ်ရောင်းချသည့် ဆီစက်ပိုင်ရှင်အားတွေ့ဆုံပြီး စားသုံးဆီ ရောင်းချမှုနှင့် စပ်လျဉ်း၍ ညွှန်ကြားချက်အမှတ် (၁/၂၀၂၁)အား ရှင်းလင်းဆွေးနွေးခဲ့သည်။

          ထိုသို့ဆွေးနွေးရာတွင် ကုန်စည်အုပ်စု(၈)ခုအနက် အုပ်စု(က)ဖြစ်သော အစားအသောက် ကုန်စည်အုပ်စုတွင်ပါဝင်သော စားသုံးဆီအမျိုးမျိုးနှင့်စပ်လျဉ်း၍ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းပုံအညွှန်းတို့ကို မြန်မာဘာသာဖြင့် မဖြစ်မနေဖော်ပြရန် လိုအပ်ကြောင်း၊ ဈေးကွက်အတွင်းဖြန့်ဖြူးရောင်းချနေသည့် စားသုံးဆီအမျိုးမျိုးတို့ကို အမျိုးအစားအလိုက် ကုန်အညွှန်းအမှတ်အသားဖော်ပြရာတွင် ပါဝင်ပစ္စည်းများကို တိကျစွာ မြန်မာဘာသာဖြင့်ဖော်ပြရမည် ဖြစ်ကြောင်း၊ အသားတင်ပမာဏနှင့် အရွယ်အစားတို့အား မြန်မာအလေးချိန်ယူနစ်ဖြစ်သော ပိဿာ/ ကျပ်သားတို့ဖြင့်သာဖော်ပြရမည် ဖြစ်ကြောင်း၊ စီးပွားရေးလုပ်ငန်းရှင်များအနေနှင့် ကုန်အညွှန်းအမှတ် အသားဖော်ပြရာတွင် ကိုက်ညီမှုရှိ၊မရှိကို စားသုံးသူရေးရာဦးစီးဌာနတွင် တင်ပြလျှောက်ထားရန်နှင့် ကုန်အညွှန်းအမှတ်အသားရရှိပြီးမှသာလျှင် ဈေးကွက်တွင်ဖြန့်ဖြူး ရောင်းချရမည်ဖြစ်ကြောင်း၊ ညွှန်ကြားချက်များကို တိကျစွာလိုက်နာဆောင်ရွက်မှုမရှိပါက စားသုံးသူကာကွယ်ရေးဥပဒေအရ ပြစ်မှုပြစ်ဒဏ်များ ကျခံရမည်ဖြစ်ကြောင်း အသိပညာပေးဆွေးနွေးခဲ့ကြောင်း သိရှိရပါသည်။

DOCA(ဧရာဝတီ)

         ပုသိမ်ခရိုင်၊ ရေကြည်မြို့နယ်တာဝန်ခံသည် မြို့နယ်ပြန်/ဆက်၊ မြို့နယ် အား/ကာ အဖွဲ့ များနှင့် ပူးပေါင်း၍ ဇူလိုင်လ (၁၅)ရက် နေ့လယ်(၁) နာရီအချိန်တွင် ရေကြည်မြို့နယ်၊ အ.မ.က ကျွန်းကုန်းကြီး ကျောင်းတွင် ဆရာ၊ဆရာမ (၄)ဦး၊ ကျောင်းသား၊ကျောင်းသူ(၈၂) ဦးတို့အားအသိ ပညာပေးဟောပြော ဆွေးနွေးခဲ့ပါသည်။

          ဟောပြောဆွေးနွေးပွဲတွင် စားသုံးသူရေးရာဦးစီးဌာန၏ မျှော်မှန်းချက်၊ ရည်ရွယ်ချက် အပါအဝင် ဈေးကွက်အတွင်းရောင်းချနေသော ကုန်ပစ္စည်းများတွင် ကုန်စည်အမျိုးအစား အပေါ်မူတည်၍ ကုန် အညွှန်းအမှတ်အသားပြည့်စုံစွာပါရှိရေး၊ စားသုံးသူကာကွယ်ရေးဥပဒေပါ စားသုံးသူများရရှိနိုင်သော အခွင့်အရေး(၈)ချက်နှင့် တာဝန်များ အစရှိသည့် စားသုံးသူ အခွင့်အရေးနှင့်ပတ်သက်၍ ဆွေးနွေးခဲ့ပြီး  စားသုံးသူပြည်သူများအနေနှင့် သိသင့်သိထိုက်သော ကုန်အညွှန်းအမှတ်အသားဖော်ပြထားသည့် အသိပညာပေးလက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(ဧရာဝတီ)

စားသုံးသူရေးရာဦးစီးဌာန၏ ဝန်ထမ်းစွမ်းဆောင်ရည်မြှင့်တင်ရေး အထောက်အကူပြု အသိ ပညာပေးသင်တန်း(၁/၂၀၂၂)အား ၂၀၂၂ခုနှစ်၊ ဇူလိုင်လ (၂၁)ရက်နေ့ နေ့လည်(၁၃:၀၀)နာရီအချိန်တွင် မကွေးတိုင်းဒေသကြီး စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး အစည်းအဝေးခန်းမ၌ ကျင်းပပြုလုပ်ခဲ့ရာ တိုင်းဒေသကြီးဦးစီးမှူး ဦးမြင့်ဝင်းမှ အဖွင့်အမှာစကား ပြောကြားခဲ့ပါသည်။
ဆက်လက်၍သင်တန်းတွင် ဟောပြောဆွေးနွေးမည့် သင်တန်းသား/သူများမှ အလှည့်ကျ မိတ်ဆက်ခြင်းများ ဆောင်ရွက်ခဲ့ကြပြီး ဟောပြောရန် အလှည့်ကျသည့် ဒုကြီးကြပ်ရေးမှူး ဦးမြင့်ကြည် မှ စားသုံးသူရေးရာဦးစီးဌာန ဖြစ်ပေါ်လာပုံ အဆင့်ဆင့်နှင့် စားသုံးသူကာကွယ်ရေးဥပဒေဖြစ်ပေါ်လာပုံ၊ စားသုံးသူကာကွယ်ရေးနှင့် အသိ ပညာပေးလုပ်ငန်း များဆောင်ရွက်နေမှုများအား Power Point ဖြင့် အသေးစိတ် ရှင်းလင်းဆွေးနွေးခဲ့ပြီး ဒုကြီးကြပ်ရေးမှူး ဒေါ်တင်လျမ်းဝေမှလည်း မိမိ တာဝန်ယူ ဆောင်ရွက်နေရသော မူဝါဒလေ့လာရေးနှင့် စီမံကိန်းစာရင်းအင်းဌာနခွဲမှ လုပ်ငန်းတာဝန်များ အကြောင်း ရှင်းလင်းဆွေးနွေးခဲ့ပါသည်။ ထို့နောက် ဒု-ဦးစီးမှူး ဒေါ်ဇင်ဝေဦးမှ စားသုံးသူအခွင့်အရေး (၈)ချက်နှင့် စားသုံးသူတာဝန်များ၊ စားသုံးသူတိုင်ကြား မှုဖြေရှင်းခြင်းဆိုင်ရာ ကိစ္စရပ်များအားလည်း ကောင်း၊ ဒု-ဦးစီးမှူး ဒေါ်ခင်စုစုမွန်မှ ကုန်အညွှန်းအမှတ်အသားဖော်ပြခြင်းနှင့် စပ်လျဉ်းသည်များ၊ ဈေးကွက်စောင့်ကြည့် စစ်ဆေးခြင်းလုပ်ငန်းနှင့် ထုတ်ကုန်လုံခြုံစိတ်ချရမှုဆိုင်ရာ လုပ်ငန်းများအား လည်းကောင်း Power Point များဖြင့် ရှင်းလင်းဆွေးနွေးခြင်းများ ဆောင်ရွက်ခဲ့ကြပါသည်။
ထို့နောက် စားသုံးသူရေးရာဦးစီးဌာနမှ ဒုတိယတိုင်းဒေသကြီးဦးစီးမှူး ဒေါ်အေးအေးမိုးမှ ဆွေးနွေးဟောပြောမှုများအပေါ် ပြန်လည်သုံးသပ်၍ လိုအပ်ချက်များအပေါ် လမ်းညွှန်မှာကြားမှုများ ပြုလုပ်ခဲ့ပြီး တိုင်းဒေသကြီးဦးစီးမှူး ဦးမြင့်ဝင်းမှ ယခုကဲ့သို့ အလေ့အကျင့်များပြုလုပ်ပေးခြင်းအားဖြင့် မြေပြင်ကွင်းဆင်းခြင်းလုပ်ငန်းများ၊ စားသုံးသူအသိပညာပေးလုပ်ငန်းများ ဆောင်ရွက်ရာ၌ အမှား အယွင်းမရှိ ကောင်းမွန်စွာ ဆွေးနွေးဟောပြောခြင်းများ ပြုလုပ်နိုင်မည်ဖြစ်ပါကြောင်း နိဂုံးချုပ်အမှာ စကားပြောကြားကာ ဆွေးနွေးပွဲအား (၁၅:၃၀)နာရီအချိန်တွင် ရုတ်သိမ်းခဲ့ပါသည်။ သင်တန်းသို့ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူး၊ ဒုတိယတိုင်းဒေသကြီးဦးစီးမှူး၊ ခရိုင်ဦးစီးမှူးများ နှင့် ဌာနခွဲတာဝန်ခံများ၊ အရာထမ်း/ အမှုထမ်းများ စုစုပေါင်း(၄၅)ဦးတက်ရောက်ခဲ့ကြကြောင်း သတင်း ရရှိပါသည်။
DOCA(မကွေး)

              စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ၂၀၂၂ ခုနှစ်၊ ဇူလိုင်လ (၂၅) ရက် နေ့၊ နံနက် (၁၀:၀၀) နာရီအချိန်တွင် လွိုင်ကော်မြို့ပေါ်ရှိ ရွှေတောင်ရပ်ကွက်၊ မင်္ဂလာရပ်ကွက်၊ မင်းစုရပ်ကွက်နှင့် နောင်ယား(ခ)ရက်ကွက်ရှိ စတိုးဆိုင်များ၌ Thiri Comestic Co.,Ltd မှ တရား ဝင်တင်သွင်း ဖြန့်ဖြူးရောင်းချနေသော Mistine အလှကုန်ပစ္စည်းများတွင် FDA ခွင့်ပြုချက်၊ Hologram (ရောင်ပြန်) စတစ်ကာနှင့် မြန်မာစာ labelling များ မပါရှိဘဲ ကုန်ပစ္စည်းဆင်တူယိုးမှား ထုတ်လုပ်ဖြန့်ဖြူးရောင်းချနေမှုများ ရှိ/မရှိ မိတ်ဖက်ဌာနများဖြစ်သော ပြည်နယ်အစားအသောက်နှင့် ဆေးဝါးကွပ်ကဲရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍ ဈေးကွက်စောင့်ကြည့်စစ်ဆေးဆောင်ရွက်ခဲ့ပါသည်။

         ထိုသို့ဈေးကွက်စောင့်ကြည့်စစ်ဆေးရာတွင် လွိုင်ကော်မြို့ပေါ်ရှိ Peral Mart ၊ ဇဝတီစတိုး တို့တွင် Thiri Comestic Co.,Ltd မှ တရားဝင်ဖြန့်ဖြူး ရောင်းချသည့် Mistine အလှကုန် ပစ္စည်းများတွင် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသော (၂ /၂၀၁၉) ညွှန်ကြားချက်ပါ ကုန်စည်နှင့် ကိုက်ညီသောအချက်များအား FDA ခွင့်ပြုချက်၊ Hologram (ရောင်ပြန်) စတစ်ကာနှင့် မြန်မာစာ labelling များဖော်ပြပါရှိသောကုန်စည်များအား တင်သွင်း ဖြန့်ဖြူးရောင်းချလျှက်ရှိကြောင်း၊ ရွှေကသစ်စတိုးနှင့် တော်ဝင်စတိုးဆိုင်တို့တွင် Mistine အလှကုန် ပစ္စည်းများ တင်သွင်းရောင်းချနေမှုမရှိကြောင်း စစ်ဆေးတွေ့ရှိရပြီး အလှကုန်ပစ္စည်းများ တင်သွင်း ဖြန့်ဖြူးရောင်းချနေသည့် လုပ်ငန်းရှင်များအနေဖြင့် (၂/၂၀၁၉)  ညွှန်ကြားချက်ပါ ကုန်အညွှန်းအမှတ်အသားဖော်ပြချက်နှင့်  ကိုက်ညီမှုရှိသော ကုန်စည်များကိုသာ တရားဝင်ဖြန့်ဖြူးရောင်းချကြရန်နှင့် တရားမဝင် တင်သွင်းဖြန့်ဖြူးသော ကုန်စည်များအား ရောင်းချခြင်းမပြုကြရန် အသိ‌ပေးဆွေးနွေးခဲ့ကြောင်း သတင်းရရှိပါသည်။

DOCA(ကယား)