သတင်းနှင့် လှုပ်ရှားမှုများ

            စားသုံးသူရေးရာဦးစီးဌာန ၊ မိတ္ထီလာခရိုင်ဦးစီးမှူး၏ ကြီးကြပ်မှုဖြင့် မိတ္ထီလာမြို့နယ်တာဝန်ခံနှင့် ဝန်ထမ်းများသည် ၂၀၂၂ခုနှစ် ဇူလှိုင်လ (၂၅)ရက်နေ့ ၊နံနက်(၉း၃၀)အချိန်တွင် မိတ္ထီလာမြို့ပေါ်ရှိ ဆေးဆိုင်များသို့ စျေးကွက်စောင့်ကြည့် စစ်ဆေးခဲ့ပါသည်။

          အဆိုပါဆေးဆိုင်များတွင် ရောင်းချနေသော ဆေးဝါးများ၊ Mask ၊ Handgel၊ စံမမှီဆေးဝါးများနှင့် တားမြစ်ဆေးဝါး ထိန်းချုပ်ဆေးဝါးများ ရောင်းချခြင်း ရှိ/မရှိ စစ်ဆေးခဲ့ပြီး ဆေးစျေးနှုန်းများ မှန်ကန်မှုရှိစေရေးနှင့် စျေးနှုန်းများအဆမတန်မြင့်တင်၍ စျေးကစားခြင်းများ မပြုလုပ်စေရေး ရည်ရွယ်၍ သွားရောက်စစ်ဆေးခဲ့ပါသည်။ စျေးကွက်အတွင်း ဆေးလက်ကျန်အခြေအနေနှင့် ဆေးပစ္စည်း လိုအပ်ချက်များအား မေးမြန်းဆွေးနွေးခဲ့ကြောင်း သိရှိရပါသည်။

DOCA(မန္တလေး)

               စစ်ကိုင်းတိုင်းဒေသကြီး စားသုံးသူရေးရာဦးစီးဌာနနှင့် မုံရွာစီးပွားရေးတက္ကသိုလ်တို့၏ ပူးပေါင်း စီစဉ်မှုဖြင့် စားသုံးသူကာကွယ်ရေးအသိပညာပေးဟောပြောပွဲကို မုံရွာစီးပွားရေးတက္ကသိုလ်တွင် ၂၀၂၂ခုနှစ်၊ ဇူလိုင်လ (၂၆) ရက်နေ့က ကျင်းပပါခဲ့သည်။

        အခမ်းအနားတွင်  မုံရွာစီးပွားရေးတက္ကသိုလ် ဒုတိယပါမောက္ခချုပ် ဒေါက်တာကြိုင်ကြိုင်သက်က အဖွင့်အမှာစကားပြောကြားရာ၌ ယခုအခါမြန်မာနိုင်ငံတွင် ဆီးချိုရောဂါနှင့် ကင်ဆာရောဂါ ဖြစ်ပွားမှု များပါကြောင်း၊ အစားအသောက်ဘေးကင်းလုံခြုံရေးနှင့် ရွေးချယ်စားသုံးတတ်ရန်အရေးကြီးပါကြောင်း၊ မိမိတို့အားလုံးသည်စားသုံးသူများဖြစ်ကြသည့်အတွက် စားသုံးသူအခွင့်အရေးများကို ကောင်းစွာသိရှိရန်နှင့် အခွင့်အရေးချိုးဖောက်ခံရပါက မည်သည့်ဌာနအဖွဲ့အစည်းကို မည်သို့တိုင်ကြားရမည်ကို သိရှိကြရန် လိုအပ်ပါကြောင်း၊ စားသုံးရေးရာဦးစီးဌာနနှင့်အစားအသောက်နှင့် ဆေးဝါးကွပ်ကဲရေးဦးစီးဌာနတို့မှ တာဝန်ရှိသူများက ယခုကဲ့သို့ လာရောက်ဟောပြောသည့်အတွက် မုံရွာစီးပွားရေးတက္ကသိုလ်မှ ဆရာ၊ ဆရာမများ၊ ကျောင်းသား၊ ကျောင်းသူများအားလုံးကိုယ်စား ကျေးဇူးအထူးတင်ရှိပါကြောင်း ပြောကြားပါ သည်။

           ထို့နောက် စစ်ကိုင်းတိုင်းဒေသကြီး စားသုံးသူရေးရာဦးစီးဌာန တိုင်းဒေသကြီးဦးစီးမှူး ဦးကျော်ကျော်လွင်က စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ မျှော်မှန်းချက်၊ ဝန်ကြီးဌာနရှိ ဦးစီးဌာနအသီးသီး၏လုပ်ငန်းဆောင်ရွက်မှုများနှင့် စားသုံးသူကာကွယ်ရေးဥပဒေပါ စားသုံးသူ အခွင့်အရေးများနှင့် တာဝန်များကို  အကျယ်တဝင့်ရှင်းလင်းပြောကြားပြီး စစ်ကိုင်းတိုင်းဒေသကြီး စားသုံးသူရေးရာဦးစီးဌာန ဒုတိယညွှန်ကြားရေးမှူး ဦးဝေဖြိုးထက်က “စားသုံးသူနစ်နာမှုများအား ဌာနသို့ ဆက်သွယ်တိုင်ကြားနိုင်သည့် နည်းလမ်းများနှင့် ဌာနက ဖြေရှင်းဆောင်ရွက်ပေးခဲ့သည့် စားသုံးသူ တိုင်ကြားမှုဖြစ်စဉ်များ" ကိုလည်းကောင်း၊ အစားအသောက်နှင့် ဆေးဝါးကွပ်ကွဲရေးဦးစီးဌာနမှ ဒုကြီးကြပ်ရေးမှူးဒေါ်မေဇင်က “အစားအသောက်ဘေးအန္တရာယ်ကင်းရှင်းရေးအကြောင်းသိကောင်းစရာ"    တို့ကိုလည်း‌ကောင်း  အသီးသီးရှင်းလင်းဟောပြောဆွေးနွေးခဲ့ကြပါသည်။

        ထို့နောက် မုံရွာစီးပွားရေးတက္ကသိုလ် ဒုတိယပါမောက္ခချုပ် ဒေါ်ခိုင်မာလှိုင်က အသိပညာပေး ဟောပြောပေးခဲ့သည့် တာဝန်ရှိသူများအား အမှတ်တရလက်ဆောင်ပစ္စည်းများ ပေးအပ်ခဲ့ပြီးနောက် အခမ်းအနားသို့ တက်ရောက်လာကြသော ဆရာ၊ဆရာမများနှင့် ကျောင်းသားကျောင်းသူများ၏ သိရှိလိုသည့်မေးမြန်းခြင်းနှင့် အကြံပြုဆွေးနွေးမှုများကို သက်ဆိုင်ရာတာဝန်ရှိသူများက ပြန်လည်ဖြေကြားပေးခဲ့ပြီး စစ်ကိုင်းတိုင်းဒေသကြီး စားသုံးသူရေးရာဦးစီးဌာနအနေမှ အသိပညာပေးလက်ကမ်း စာစောင်များကို  ဖြန့်ဝေပေးခဲ့​ပါသည်။

      အခမ်းအနားသို့ မုံရွာစီးပွားရေးတက္ကသိုလ်မှ ဒုတိယပါမောက္ခချုပ်များ၊ ပါမောက္ခ ဆရာ၊ ဆရာမကြီးများ၊ ဆရာ၊ဆရာမများ၊ ကျောင်းသား၊ကျောင်းသူများ၊ စစ်ကိုင်းတိုင်းဒေသကြီး စားသုံးသူရေးရာဦးစီးဌာနမှ တိုင်းဒေသကြီးဦးစီးမှူးနှင့် တာဝန်ရှိသူများ၊ အစားအသောက်နှင့် ဆေးဝါးကွပ်ကဲရေး ဦးစီးဌာနမှတာဝန်ရှိသူများ စုစုပေါင်း (၃၅၀) ဦးခန့်တက်ရောက်ခဲ့ကြကြောင်း သတင်းရရှိပါသည်။

DOCA(စစ်ကိုင်း)

         ရင်းနှီးမြှုပ်နှံမှုနှင့်နိုင်ငံခြားစီးပွားဆက်သွယ်ရေးဝန်ကြီးဌာန၊ ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှုဦးစီးဌာန၊ စစ်ကိုင်းတိုင်းဒေသကြီးဦးစီးမှူးရုံး အစည်းအဝေးခန်းမ၌ (၂၆.၇.၂၀၂၂)ရက်နေ့ နံနက်(၁၀:၀၀)နာရီအချိန်တွင်  ကိုဗစ်-၁၉ကြောင့် ဖြစ်ပေါ်လာနိုင်သည့် စီးပွားရေးသက်ရောက်မှု များအပေါ် ကုစားရေးလုပ်ငန်းကော်မတီ၏လုပ်ငန်းအဖွဲ့ခေါင်းဆောင် ဒေါက်တာဝါဝါမောင်ဦးစီး၍ တိုင်းဒေသကြီးပြည်နယ်အလိုက် ချေးငွေများအကျိုးရှိစွာ အသုံးချမှုအပေါ်စိစစ်ကြပ်မတ်ရေးအဖွဲ့ ဥက္ကဌများနှင့် အဖွဲ့ဝင်များအား Online နှင့် တွေ့ဆုံ၍ Zoom meeting အစည်းအဝေးကျင်းပခဲ့ ပါသည်။

        အစည်းအဝေး၌ အဖွဲ့ခေါင်းဆောင်က အဖွင့်အမှာစကားပြောကြားရာတွင် ယခင် အစည်းအဝေး(၄/၂၀၂၂)ဆုံးဖြတ်ချက်များအား အဖွဲ့သို့ချပြလိုကြောင်း၊ ချေးငွေဆပ်ခြင်းနှင့် ပတ်သက်ပြီးလုပ်ငန်းရှင်များဘက်မှ အခက်အခဲများအား သိရှိခဲ့ရကြောင်း၊ ချေးငွေများအပေါ် အတိုးနှုန်း ၁% ကောက်ခံခြင်းအား (၂)နှစ်အထိသာဖြစ်ပြီး (၂)နှစ်ကျော်ပါက အတိုးနှုန်း ၁% အပြင် နောက်ကျကြေး ၁% ကောက်ခံသွားမည်ဖြစ်၍ စုစုပေါင်း ၂% ဖြစ်သွားနိုင်ကြောင်း၊ ယခုအစည်းအဝေးပြုလုပ်ရခြင်းသည် နောက်ကျကြေး ၁% ကောက်ခံမည့် အစီအစဉ်အား သက်ဆိုင်ရာတိုင်းဒေသကြီး/ပြည်နယ်များရှိ စိစစ်ကြပ်မတ်ရေးအဖွဲ့များ သဘောတူ/မတူနှင့် ချေးငွေ (၂)နှစ်ပြည့်ပြီး အရင်းဆပ်သည့်အခါ အရစ်ခွဲဆပ်မည့်အစီအစဉ်အား အရစ်မည်မျှခွဲဆပ် စေလိုကြောင်း၊ ဥပမာ- သုံးရစ်၊ လေးရစ်၊ ခြောက်ရစ်ထားပါက လုပ်ငန်းရှင်များ အဆင်ပြေ/မပြေ၊ ဆပ်နိုင်မဆပ်နိုင်သိလိုကြောင်း၊ ဒီ(၂)ချက်နှင့်ပတ်သက်ပြီး ဆွေးနွေးပေးကြရန်နှင့် ယခု အစည်းအဝေးမှ ဆုံးဖြတ်ရရှိသောအဖြေကို မိမိအနေဖြင့် လုပ်ငန်းကော်မတီအစည်းအဝေးတွင် ဆက်လက်တင်ပြဆွေးနွေးသွားမည်ဖြစ်ကြောင်း ဆွေးနွေးပြောကြားခဲ့ပါသည်။

      ထို့နောက်အဖွဲ့ခေါင်းဆောင်၏ ဆွေးနွေးချက်(၂)ရပ်အပေါ် သက်ဆိုင်ရာတိုင်းဒေသကြီး/ ပြည်နယ်စိစစ်ကြပ်မတ်ရေးအဖွဲ့ ဥက္ကဌများက မိမိတို့တိုင်းဒေသကြီး/ပြည်နယ်အလိုက် တင်ပြလိုသော အကြောင်းအရာများ၊ အတည်ပြုလိုသောအချက်များနှင့် ဒေသအလိုက်ကြုံတွေ့ရသည့် အခက်အခဲများကို ဆွေးနွေးတင်ပြကြပြီး အစည်းအဝေးကို (၁၂:၃၀)နာရီတွင် ရုတ်သိမ်းခဲ့ကြောင်း သတင်းရရှိပါသည်။  

DOCA(စစ်ကိုင်း)

              စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်အနေဖြင့် စားသုံးသူပြည်သူများ ဘေးအန္တရာယ်ကင်းရှင်းရေးအတွက် ဈေးကွက်စောင့်ကြည့်စစ်ဆေးခြင်းများ ဆောင်ရွက်လျက်ရှိရာ ဇူလိုင်လ(၂၅)ရက်နေ့တွင် စားသုံးသူရေးရာဦးစီးဌာန၊ ခရိုင်ဦးစီးမှူး၊ ရွှေဘိုမြို့နယ် တာဝန်ခံနှင့်  ရွှေဘိုခရိုင်ပြည်သူ့ကျန်းမာရေးဦးစီးဌာနမှ ဝန်ထမ်း(၂)ဦးတို့ ပူးပေါင်း၍ ရွှေဘိုမြို့ ကြည်တော်စုရပ်၊ အမှတ်(၄)ရပ်ကွက်ရှိ ဆေးနှင့် ဆေးပစ္စည်းအရောင်းဆိုင်နှင့် စည်ပင်သာယာဈေးအတွင်း ရုံအမှတ် (၁၂)၊ ဆိုင်အမှတ် (၂၂၊ ၂၃) ရှိ ဆေးနှင့်ဆေးပစ္စည်းအရောင်းဆိုင်တို့အား ဈေးကွက်စောင့်ကြည့်စစ်ဆေးခဲ့ပါသည်။

          အဆိုပါဈေးကွက်စောင့်ကြည့်စစ်ဆေးသည့် ဆေးနှင့် ဆေးပစ္စည်းအရောင်းဆိုင်များသည် အသစ် ဖွင့်လှစ်ရောင်းချသည့်ဆိုင်များဖြစ်သဖြင့် ရွှေဘိုခရိုင်ပြည်သူ့ကျန်းမာရေးဦးစီးဌာနမှ လိုင်စင်အသစ် လျှောက်ထားရာတွင်လိုအပ်သည့်အချက်များ၊ လိုက်နာဆောင်ရွက်ရမည့်အချက်များနှင့် တားမြစ်ဆေးဝါးများ၊ သက်တမ်းလွန်ဆေးဝါးများ ရောင်းချခြင်းမပြုရန် အသိပညာပေးဆွေးနွေးခဲ့ပြီး ရွှေဘိုခရိုင် စားသုံးသူရေးရာ ဦးစီးဌာနမှ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ အမိန့် ကြော်ငြာစာ အမှတ်၊ ၂၁/၂၀၂၀ဖြင့် Covid-19 ကာကွယ်၊ ထိန်းချုပ်၊ ကုသရေးဆိုင်ရာ ကျန်းမာရေး အထောက်အကူပြု ပစ္စည်းများ၊ ဆေးဝါးများ၊ စားသုံးကုန်ပစ္စည်းများအား ဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးနှုန်း မြှင့်တင်ဖြန့်ဖြူးခြင်း သို့မဟုတ် ဈေးကစားရန်ရည်ရွယ်ချက်ဖြင့် သိုလှောင်ခြင်းကို တားမြစ်သည့်အမိန့် ကြော်ငြာစာကို ထုတ်ပြန်ထားပြီး၊ ကြော်ငြာစာအမှတ်၊ ၂၁/၂၀၂၀ဖြင့် အရေးကြီးကုန်စည်နှင့် ဝန်ဆောင်မှု ဥပဒေပုဒ်မ ၁၁ ပုဒ်မခွဲ(ခ)အရ အထက်ပါတားမြစ်ထားသည့် ကုန်စည်များကို တင်သွင်းမှု၊ တင်ပို့မှု၊ ရောင်းဝယ်မှု၊ လက်ဝယ်ထားမှု၊ သိုလှောင်မှု၊ သယ်ဆောင်မှု၊ ဖြန့်ဖြူးမှု၊ အသုံးပြုမှု၊ စားသုံးမှုတို့နှင့် စပ်လျဉ်း၍ အမိန့်ကြော်ငြာစာ၊ အမိန့်၊ ညွှန်ကြားချက်နှင့် လုပ်ထုံးလုပ်နည်းများ ထုတ်ပြန်ခွင့်ကို စားသုံးသူရေးရာဦးစီးဌာနအား အခွင့်အာဏာအပ်နှင်းထားကြောင်း၊ ကျန်းမာရေးအထောက်အကူပြု အသုံးအဆောင်ပစ္စည်းအမျိုးမျိုးနှင့် ပတ်သက်၍ စားသုံးသူကာကွယ်ရေးဥပဒေ၊ အခန်း(၁၈)ပါ ကုန်အညွန်း အမှတ်အသားဖော်ပြခြင်းနှင့် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့်အညီ ပြည့်စုံစွာထည့်သွင်းဖော်ပြ၍ ထုတ်လုပ်ဖြန့်ဖြူးရောင်းချကြရန်၊ စားသုံးသူကာကွယ်ရေး ဥပဒေပါအကြောင်းအရာများအား အကျယ်တဝင့်ရှင်းလင်းဆွေးနွေးခဲ့ပြီး တားမြစ်ဆေးဝါးများ၊ သက်တမ်းလွန် ဆေးဝါးများ ရောင်းချမှုရှိ/ မရှိ စစ်ဆေးခြင်း၊ ဆေးဈေးနှုန်းနှင့်လက်ကျန်အခြေအနေများ ဆွေးနွေးခဲ့ကြကြောင်း သတင်းရရှိပါသည်။

DOCA(စစ်ကိုင်း)

          စားသုံးသူရေးရာဦးစီးဌာန၊  မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူး၏ လမ်းညွှန်ချက်ဖြင့် ရမည်းသင်းမြို့နယ်တာဝန်ခံနှင့် ဝန်ထမ်းများသည် ၂၀၂၂ ခုနှစ်၊ ဇူလိုင်လ ၂၅ ရက်နေ့တွင် စျေးကွက်တွင်း ရောင်းချနေသော ဓါတ်ဆီ၊ ဒီဇယ်များ စျေးနှုန်းမြင့်တင်ရောင်းချမှု ရှိ/မရှိ၊ အချိန်အတွယ် လီတာ၊ ဂါလံများ ပြည့်မီမှုရှိ/မရှိဈေးကွက်စောင့်ကြည့်စစ်ဆေးရန် ရမည်းသင်းမြို့နယ်အတွင်းရှိ MGM ၊ Goden Eagle၊ ရှဲဒိုး(၂)၊ နီလာရီုးမနှင့် သိန်းထိုက်သူ(၁၊၂၊၃) ဆီဆိုင်များသို့ သွားရောက်၍ကွင်းဆင်းစစ်ဆေးခဲ့ပါသည်။

          ထိုသို့ ကွင်းဆင်းစစ်ဆေးရာတွင် မြို့နယ်တာဝန်ခံက စီးပွားရေးလုပ်ငန်းရှင်များအနေဖြင့် ကုန်စည်နှင့်စပ်လျဉ်း၍ အာမခံချက်ပေးရာတွင် ကုန်စည်၏ အရည်အသွေး၊ အချိန်အတွယ်ပမာဏနှင့် အလေးချိန်မှန်ကန်မှုရှိရမည်ဖြစ်ကြောင်း၊  အရည်အသွးပြည့်မီမှန်ကန်သည့် သတ်မှတ်ချက်နှင့် ကိုက်ညီသော စက်ဆီ၊ချောဆီ များကိုသာ တင်သွင်း၊ဖြန့်ဖြူးရောင်းချရစေလိုကြောင်း ၊ သတ်မှတ်ချက်နှင့်မကိုက်ညီသော ပစ္စည်းများ ဖြစ်ပါက ဥပဒေနှင့်အညီဆောင်ရွက်သွားရမည်ဖြစ်ကြောင်း၊ စက်သုံးဆီများကို ပြည်သူများလက်ဝယ် သို့ ရည်ညွှန်းစျေးများအတိုင်း အမှန်တကယ်ရောင်းချပေးစေလိုကြောင်း အသိပညာပေးဆောင်ရွက်ခဲ့ပါသည်။

ယင်းဆီဆိုင်များတွင် စက်သုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကော်မတီမှ သတ်မှတ်ထားသော နှုန်းထားများအတိုင်းသာ ရောင်းချမှုရှိပြီး၊ အချိန်အတွယ် လီတာ၊ဂါလံများလဲ့ (၂၀) လီတာစံဝင်ခွက်ဖြင့် တိုက်ဆိုင်စစ်ဆေးခဲ့ရာ ပြည့်မီမှုရှိကြောင်း သိရှိရပါသည်။

DOCA(မန္တလေး)