သတင်းနှင့် လှုပ်ရှားမှုများ

         ပဲခူးတိုင်းဒေသကြီး၊ သာယာဝတီခရိုင်၊ ကြို့ပင်ကောက်မြို့နယ်၊ လှေတုန်းအုပ်စု၊ လှေတုန်းကျေးရွာတွင် စိုက်ပျိုးရေးဦးစီးဌာန၊ မွေးမြူရေး ၊ ကုန်ထုတ်လုပ်မှုဖွံဖြိုးတိုးတက်ရေးသင်တန်း‌အား (၅.၄.၂၀၂၂) ရက်နေ့ နေ့လည် (၁:၀၀)အချိန်တွင် စိုက်ပျိုးရေးဌာန၊ မွေး/ကုဌာန၊ စားသုံးသူရေးရာဦးစီးဌာနတို့ ပူးပေါင်း၍ တက်ရောက်လာသူ တောင်သူ(၃၀)ဦးအား စားသုံးသူရေးရာ သိကောင်းစရာများကို ဆွေးနွေးဟောပြောခဲ့ပါသည်။

         တက်ရောက်လာသူများအနေဖြင့် မြို့ပေါ်ဈေးများ၊ ကျေးရွာရှိဆိုင်များမှ ဝယ်ယူရာတွင်၎င်း၊ ကုန်စည်များကို ကိုယ့်ရပ်ရွာများ၌ ပြန်လည်ရောင်းချရာတွင်၎င်း ၊ ဝယ်ယူသည့်ကုန်စည်များအပေါ်တွင် စားသုံးသူကာကွယ်‌‌ရေး ဉပဒေပါ ပြဌာန်းချက်များပါ ကုန်အညွှန်းအမှတ်အသားများ ပြည့်စုံစွာပါရှိမှသာ ဝယ်ယူသုံးစွဲရောင်းချပါရန်နှင့် အညွှန်းပြည့်စုံသော ပစ္စည်းနမူနာများဖြင့် ပြသ၍ အသိပညာပေး‌ ဟောပြောခဲ့ပါသည်။ စားသုံးသူများ နစ်နာမှုရှိလျှင် တိုင်ကြားနိုင်သည့် (Call Center) များပါ လက်ကမ်းစာစောင်များဖြန့်ဝေပေးခဲ့ပါသည်။

          ဟောပြောပွဲပြီးဆုံး၍ ကျေးရွာအတွင်း မုန့်မျိုးစုံ အ‌ရောင်းဆိုင်(၃)ဆိုင်သို့လည်း သွားရောက်စစ်ဆေးခဲ့ရာ ရက်လွန်ပေါင်မုန့် (၁၀၀)တန် ၁၅ထုပ်တွေ့ရှိ၍ ရပ်ကျေးအုပ်ချုပ်ရေးမှူးထံ အပ်နှံခဲ့ပြီး နောက်နောင်တွင် ရက်လွန်ပစ္စည်းများ ရောင်းချခြင်းမပြုရန် ဆိုင်ရှင်အား အသိပညာပေးကွင်းဆင်း ဟောပြောခြင်းပြုလုပ်ခဲ့ပါကြောင်း သိရှိရပါသည်။

DOCA(ပဲခူး)

           ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးဦးမျိုးအောင်သည် ဧပြီလ ၅ ရက်နေ့ နေ့လယ်ပိုင်းက တောင်ငူမြို့၊ အမှတ်(၂)ရပ်ကွက်ရှိ Angel သောက်ရေသန့်စက်ရုံသို့ သွားရောက်၍ စားသုံးသူကာကွယ်ရေးဆိုင်ရာ အသိပညာပေးဟောပြောခဲ့ပါသည်။ အခမ်းအနားတွင် ခရိုင်ဦးစီးမှူး ဦးမျိုးအောင်က စားသုံးသူရေးရာဦးစီးဌာန ပေါ်ပေါက်လာပုံနှင့် ဆောင်ရွက်ချက်များကို မိတ်ဆက်ပြောကြားပြီး တောင်ငူမြို့နယ်တာဝန်ခံ ဦးမြင့်သူက စားသုံးသူအခွင့်အရေးနှင့်တာဝန်များ၊ စီးပွားရေး လုပ်ငန်းရှင်များ၏ တာဝန်များ၊ ကုန်ပစ္စည်းများဝယ်ယူသုံးစွဲရာတွင် ကုန်အညွှန်းအမှတ်အသားကို တိကျမှန်ကန်စွာဖော်ပြထားသည့် ကုန်စည်များကို ဝယ်ယူရန်လိုအပ်ပုံများ၊ စားသုံးသူနစ်နာဆုံးရှုံးမှုများရှိပါက စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC)တွင် တိုင်ကြားနိုင်မှုများအား အသိပညာပေးဟောပြောပါသည်။

              ဟောပြောပွဲသို့ Angel သောက်ရေသန့်စက်ရုံပိုင်ရှင်နှင့် ဝန်ထမ်း ၈ ဦးတက်ရောက်ခဲ့ပါသည်။ ဟောပြောပွဲအပြီးတွင် ခရိုင်ဦးစီးမှူးနှင့် အဖွဲ့ဝင်များသည် သောက်ရေသန့်စက်ရုံအတွင်း ထုတ်လုပ်နေမှုများနှင့် သောက်ရေသန့်ဘူးခွံများတွင် ကုန်အညွှန်းအမှတ်အသားများကို ကြည့်ရှုစစ်ဆေးခဲ့ပြီး စားသုံးသူစိတ်ကျေနပ်မှုရှိစေရေး ဆောင်ရွက်ပေးရန် ဆွေးနွေးပြောကြားခဲ့ကြောင်း သိရှိရပါသည်။

Bago(ပဲခူး)

        ကချင်ပြည်နယ်၊ စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံး၌ ၆.၄.၂၀၂၂ ရက်နေ့တွင် ဗန်းမော်မြို့၊ မင်းကုန်းရပ်ကွက်ရှိ အသစ်ဖွင့်လှစ်ထားရှိသော ဗန်းမော်-နေပြည်တော် တိုက်ရိုက်ပြေးဆွဲနေသော ကြယ်တံခွန်မော်တော်ယာဉ်လိုင်းမှ စီးပွားရေးလုပ်ငန်းရှင်နှင့်တွေ့ဆုံ၍ စားသုံးသူကာကွယ်ရေးဆိုင်ရာ အသိပညာပေးများရှင်းလင်း ဆွေးနွေးခဲ့ပါသည်။

          ထိုသို့ဆွေးနွေးရာ ခရိုင်ဦးစီးမှူး ဦးအောင်ကျော်ဦးက စားသုံးသူကာကွယ်ရေးဥပဒေ (၂၀၁၉)တွင် အခန်း(၂၅)ခန်း၊ ပုဒ်မ(၈၄)ခုပါဝင်ပြီး စီးပွားရေးလုပ်ငန်းရှင်အဓိပ္ပါယ်ဖွင့်ဆိုချက်တွင် မော်တော်ယာဉ် သယ်ယူပို့ဆောင်မှုလုပ်ကိုင်သော စီးပွားရေးလုပ်ငန်းရှင်များလည်းပါဝင်ကြောင်း၊ စားသုံးသူကာကွယ်ရေး ဥပဒေအရ စီးပွားရေးလုပ်ငန်းရှင်များ၏တာဝန်များ၊ ဝန်ဆောင်မှုနှင့်ပတ်သက်၍ မိမိဝန်ဆောင်မှုနှင့် စပ်လျဉ်းသည့် သတင်းအချက်အလက်များကို စားသုံးသူသိရှိစေရန်ကြိုတင်သတိပေးခြင်း၊ မှန်ကန်သော သတင်းအချက်အလက်နှင့် ပြည့်စုံသောဝန်ဆောင်မှုအဆင့်အတန်းနှင့်အညီပြည့်ဝစွာပေးခြင်း၊ စားသုံးသူ၏လိုအပ်ချက်နှင့်ကိုက်ညီမှုရှိခြင်း၊ အာမခံထားသောအချိန်ကာလအတွင်း ပြီးမြောက်အောင်ဆောင်ရွက် ပေးခြင်း၊ စားသုံးသူနှင့်သဘောတူညီထားသည့် ဝန်ဆောင်မှုတန်ဖိုးအတိုင်းပေးအပ်စေခြင်းများကို အာမခံရမည်ဖြစ်ကြောင်း၊ ဝန်ဆောင်မှုနှင့်စပ်လျဉ်း၍ စားသုံးသူနစ်နာဆုံးရှုံးမှုရှိပါက ပြည်တွင်း၌ဖြစ်စေ၊ ပြည်ပနိုင်ငံတစ်ခုခု၌ဖြစ်စေ ဝန်ဆောင်မှုကိုပြည်တွင်းစားသုံးသူများအတွက် ကြားခံဝန်ဆောင်မှုပေးသည့် လုပ်ငန်းလုပ်ကိုင်သူတွင်လည်းတာဝန်ရှိကြောင်း၊ စီးပွားရေးလုပ်ငန်းရှင်များ၏တာဝန်များ၊ တားမြစ်ချက် များ၊ တားမြစ်ချက်တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှားစီရင်ခံရလျှင် ချမှတ်နိုင်သည့်ပြစ်မှုပြစ်ဒဏ်များ၊ စီးပွားရေးလုပ်ငန်းရှင်များသည် ကောင်းမွန်သော စီးပွားရေးလုပ်ငန်းရှင် ကျင့်ဝတ်၊ စည်းကမ်းချက်နှင့်အညီတာဝန်ယူမှု၊ တာဝန်ခံမှုအပြည့်အဝဆောင်ရွက်သွားရမည်ဖြစ်ကြောင်း ရှင်းလင်းဆွေးနွေးခဲ့ပါသည်။

DOCA(ကချင်)

               စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေးခရိုင်၊ မကွေးမြို့နယ်ဦးစီးမှူး ဦးမျိုးဝင်း(စစ်ဆေးအရာရှိ)နှင့် မကွေးခရိုင်ရုံးမှ  ဝန်ထမ်းများသည် (၇.၄.၂၀၂၂)ရက်နေ့ နံနက်(၁၀:၀၀)နာရီမှ (၁၁:၀၀)နာရီထိ မကွေးမြို့ လမ်းမတော်၊ ဆွမ်းလောင်းရုံ(တိုက်တန်း)ရှိ ဒေါ်ခင်ညွန့်(မုန့်မျိုးစုံရောင်းဝယ်ရေး)ဆိုင်တွင် ရောင်းချနေသော အသင့်စားမုန့်အမျိုးမျိုး၊ အချိုရည်များ၊ ပေါင်မုန့်၊ကိတ်မုန့်များသည် စားသုံးသူများအား ဘေးအန္တရာယ်ကင်းရှင်းမှု ရှိ/မရှိ ၊ ထုတ်ကုန်လုံခြုံစိတ်ချရမှု ရှိ/ မရှိ  စားသုံးသူကာကွယ်ရေးဥပဒေ ၂၀၁၉နှင့်အညီ  ကုန်အညွှန်းအမှတ်အသားများ ပြည့်စုံမှန်ကန်စွာဖော်ပြထားမှု ရှိ/မရှိတို့ကို စျေးကွက်စောင့်ကြည့် စစ်ဆေးခဲ့ပါသည်။

            စားသောက်ကုန် မုန့်အမျိုးမျိုးရောင်းချသော လုပ်ငန်းရှင်အား စားသုံးသူကာကွယ်ရေးဥပဒေ -၂၀၁၉ အခန်း(၁၈)၊ ပုဒ်မ(၄၁)အရ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားပြည့်စုံစွာ ဖော်ပြထားသော ကုန်စည်များကိုသာ ဆိုင်တင်ရောင်းချရန်နှင့် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ညွှန်ကြားချက်အမှတ်(၂/၂၀၁၉)အရ အသင့်စားမုန့်အမျိုးမျိုးတွင်ပါရှိရမည့် ထားသိုသိမ်းဆည်းပုံအညွှန်းနှင့် ဓါတ်မတည့်ကြောင်းဖော်ပြချက်များကို မြန်မာဘာသာဖြင့် မဖြစ်မနေဖော်ပြပေးရန်၊ ကုန်အညွှန်းအမှတ်အသားနှင့်စပ်လျဉ်း၍  ၂၀၂၀ ခုနှစ် မတ်လ(၁၆)ရက်နေ့မှ စတင်အာဏာသက်ရောက်နေပြီဖြစ်ကြောင်းနှင့် ကုန်အညွှန်းအမှတ်အသားပြည့်စုံစွာဖော်ပြမှုမရှိပါက မည်သည့်စီးပွားရေးလုပ်ငန်းရှင်နှင့်မဆို ဥပဒေအရ အရေးယူ‌ဆောင်ရွက်သွားမည်ဖြစ်ကြောင်း၊ လိုက်နာရန်ပျက်ကွက်သော လုပ်ငန်းရှင်အား စားသုံးသူကာကွယ်ရေးဥပဒေ ပုဒ်မ(၇၃)အရ (၂)နှစ်ထက်မပိုသော ထောင်ဒဏ်ဖြစ်စေ၊ ကျပ်သိန်း(၂၀၀)ထက်မပိုသော ငွေဒဏ်ဖြစ်စေ၊ ပြစ်ဒဏ် (၂) ရပ်လုံး ဖြစ်စေ အရေးယူ ခံရနိုင်ကြောင်း အသိပညာပေးဆွေနွေးခဲ့ပြီး ကုန်အညွှန်းအမှတ်သားနှင့်ပတ်သက်၍ အခက်အခဲရှိပါက “စားသုံးသူ‌‌ရေးရာဦးစီးဌာန”သို့  လာရောက်တိုင်ပင်ဆွေးနွေးနိုင်ကြောင်းနှင့် လုပ်ငန်းရှင်များအနေဖြင့် လည်း၊ မိမိတို့ကိုယ်တိုင်ပင် စားသုံးသူများဖြစ်ကြောင်း ၊ စားသုံးသူများအနေဖြင့် စားသုံးသူအခွင့်အရေးများ ဆုံးရှုံးနစ်နာမှုရှိပါက စားသုံးသူရေးရာဦးစီဌာနသို့ လူကိုယ်တိုင် လာရောက်တိုင်ကြားနိုင်သလို (DOCA  Myanmar Application နှင့် စားသုံးသူရေးရာဦးစီးဌာန၏ Website doca.gov.mm တွင် ဝင်ရောက်ဖြည့်စွက်တိုင်ကြားနိုင်ကြောင်း ဆွေးနွေးပြောကြားခဲ့ပါသည်။

DOCA(စစ်ကိုင်း)

          မကွေးတိုင်းဒေသကြီး၊ စားသုံးသူရေးရာဦးစီးဌာန တိုင်းဒေသကြီးဦးစီးမှူး၏ လမ်းညွှန်မှုအရ ဒုတိယတိုင်းဒေသကြီးဦးစီးမှူး ဦးဆောင်သော ဝန်ထမ်းများသည် ၂၀၂၂ ခုနှစ်၊ ဧပြီလ (၇)ရက်နေ့ နေ့လည် (၁၃:၃၀)နာရီအချိန်တွင် မကွေးမြို့၊ ရန်ပယ်ဈေး၊ ဈေးတာဝန်ခံရုံး၌ ရန်ပယ် ဈေးတွင်း/ ဈေးပြင် စားသုံးဆီရောင်းချနေသော ဆီအရောင်းဆိုင်လုပ်ငန်းရှင်များနှင့် ဟင်းသီးဟင်းရွက်ဆီများတွင် ကုန်အညွှန်းအမှတ်အသား ပြည့်စုံစွာဖော်ပြလာရေး အသိပေးရှင်းလင်း ဆွေးနွေးခြင်းများ ဆောင်ရွက်ခဲ့ ပါသည်။

          ထိုသို့ အသိပေးရှင်းလင်းရာတွင် ဒုတိယတိုင်းဒေသကြီးဦးစီးမှူး ဒေါ်အေးအေးမိုးမှ စားသုံးဆီ ရောင်းချဖြန့်ဖြူးသော လုပ်ငန်းရှင်များအား ညွှန်ကြားချက်အမှတ် ၁/၂၀၂၁ အရ ဟင်းသီးဟင်းရွက်ဆီ (Vegetable Oil, Cooking Oil) နှင့်စပ်လျဉ်း၍ ကုန်အညွှန်းအမှတ်အသား ဖော်ပြရာတွင် စီးပွားရေး လုပ်ငန်းရှင်များ လိုက်နာဆောင်ရွက်ရန် ညွှန်ကြားချက်များအား အသေးစိတ်ရှင်းလင်း ဆွေးနွေးခဲ့ပြီး ညွှန်ကြားချက်ကို (၂၀.၁၂.၂၀၂၁)တွင် ထုတ်ပြန်ခဲ့ပြီးဖြစ်ရာ (၆)လပြည့်သည့်နေ့မှစ၍ အရေးယူ ဆောင်ရွက်တော့မည်ဖြစ်ကြောင်း၊ စားသုံးဆီဖြန့်ဖြူးရောင်းချသူများအနေဖြင့်လည်း ယခုချိန်မှစ၍ ပြင်ဆင်ရန်လိုအပ်ပါကြောင်း၊ စားသုံးဆီဖြန့်ဖြူးသော ကုမ္ပဏီများ၏ ကိုယ်စားလှယ်များကိုလည်း အသိပေးရှင်းလင်းခြင်းများ ဆောင်ရွက်ပြီးဖြစ်ကြောင်း၊ အချိန်အတွယ်ဖြင့် ရောင်းချသော ဆီဆိုင်များ အနေဖြင့်လည်း ဘေးအန္တရာယ် ကင်းရှင်းအောင် စတီးအိုး၊ ကြွေအိုး၊ စဉ့်အိုး၊ ပလတ်စတစ်ပုံးများဖြင့် သိုလှောင်ရောင်းချရန်၊ ဈေးကွက်တွင် စားအုံးဆီနှင့် ပဲဆီ၊ နှမ်းဆီကို ရောစပ်၍ ရောင်းချနေခြင်းများ လည်းရှိရာ စားသုံးသူများ ရှင်းရှင်းလင်းလင်း သိစေရန် ရောစပ်မှုအချိုးကို ပွင့်လင်းမြင်သာစွာ ဖော်ပြ ရောင်းချသွားရန် အသေးစိတ် ရှင်းလင်းခဲ့ပြီး စားသုံးဆီရောင်းချသူလုပ်ငန်းရှင်များမှ သိလိုသည်များ မေးမြန်းခဲ့မှုအပေါ် ပြန်လည်ရှင်းလင်းခြင်းများ ဆောင်ရွက်ခဲ့ပြီး တက်ရောက်လာသော လုပ်ငန်းရှင်များ အား (၂၀.၁၂.၂၀၂၁)ရက်နေ့တွင် ထုတ်ပြန်ခဲ့သည့် ညွှန်ကြားချက်အမှတ် (၁/၂၀၂၁)နှင့် လက်ကမ်း စာစောင်များ ဝေငှခဲ့ပါသည်။

          ဆက်လက်၍ နေ့လည် (၁၄:၀၀)နာရီတွင် မကွေးတိုင်းဒေသကြီးအတွင်း ကိုယ်စားလှယ် ဖြန့်ဖြူး ရောင်းချနေသည့် Cook အမှတ်တံဆိပ် စားသုံးဆီ ဖြန့်ဖြူးရောင်းချသော အရောင်းဆိုင်သို့ သွားရောက်၍   ဟင်းသီး ဟင်းရွက်ဆီ (Vegetable Oil, Cooking Oil) နှင့်စပ်လျဉ်း၍ ညွှန်ကြားချက်အမှတ် (၁/၂၀၂၁) အား အသိပေးရှင်းလင်းခြင်းများ ဆောင်ရွက်ခဲ့ကြပါကြောင်း သတင်းရရှိပါသည်။

DOCA(မကွေး)