သတင်းနှင့် လှုပ်ရှားမှုများ

               ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ခရိုင်ဦးစီးမှူးရုံးမှ စားသုံး/ထုတ်လုံတာဝန်ခံနှင့် ရေတာရှည်မြို့နယ်တာဝန်ခံတို့နှင့်အတူ မတ်လ ၂၅ ရက်နေ့ နံနက်ပိုင်းက ရေတာရှည်မြို့ရှိ စက်ဆီ၊ ချောဆီနှင့် ဆက်စပ်ရေနံထွက်ပစ္စည်း အရောင်းဆိုင်များသို့ သွားရောက်၍  စက်ဆီ၊ ချောဆီနှင့် ဆက်စပ်ရေနံထွက်ပစ္စည်း အတုအပများ ရောင်းချမှုမရှိစေရေးကို ကွင်းဆင်း ကြည့်ရှုစစ်ဆေးခဲ့ပါသည်။

              ခရိုင်ဦးစီးမှူးက စက်ဆီ၊ ချောဆီနှင့် ဆက်စပ်ရေနံထွက်ပစ္စည်း အတုအပများ ပြုလုပ်ခြင်း၊ ဈေးကွက်အတွင်း တရားမဝင်ဖြန့်ဖြူးရောင်းချခြင်းတို့သည် စားသုံးသူကာကွယ်ရေးဥပဒေနှင့် ငြိစွန်းပါကြောင်း၊ တရားဝင်လိုင်စင်ရယူ၍ ဆောင်ရွက်ခြင်းမရှိခြင်းသည် နိုင်ငံတော်၏ အခွန် ဘဏ္ဍာကို ဆုံးရှုံးစေပါကြောင်း၊ ဥပဒေနှင့်ငြိစွန်းပါက လက်ဝယ်ရောင်းချသူသာ အရင်ဆုံးဖြေရှင်းရမည် ဖြစ်ပါသဖြင့် မိမိခရိုင်အတွင်း လုပ်ငန်းရှင်များ နစ်နာမှုမရှိစေရေးအတွက် အတုအပ ထုတ်လုပ်သူများက လာရောက်ကမ်းလှမ်းပါက လက်ခံရောင်းချပေးခြင်းမပြုရန် လိုအပ်ပါကြောင်း အသိပညာပေးခဲ့ပါ သည်။

              ခရိုင်ဦးစီးမှူးနှင့်အဖွဲ့သည် မော်တော်ယာဉ်ပြုပြင်ရေးဆောင်ရွက်သည့်လုပ်ငန်းများသို့  ဆက်လက်သွားရောက်၍ စက်ဆီ၊ ချောဆီနှင့် ဆက်စပ်ရေနံထွက်ပစ္စည်းများ အသုံးပြုမှုမရှိစေရေး၊ အတုအပထုတ်လုပ်ဖြန့်ဖြူးသူများက လာရောက်ကမ်းလှမ်းပါက လက်ခံဝယ်ယူ၍ အသုံးမပြုရေး အသိပညာပေးဆွေးနွေးခဲ့ကြောင်း သိရှိရပါသည်။

DOCA(ပဲခူး)

           မန္တလေးတိုင်းဒေသကြီးစားသုံးသူရေးရာကော်မတီ၏ (၁/၂၀၂၂) လုပ်ငန်းညှိနှိုင်းအစည်းအဝေး ကို ၂၀၂၂ ခုနှစ်၊ မတ်လ ၂၄ ရက်နေ့၊ နံနက် (၀၉:၀၀) နာရီအချိန်တွင် စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံး အစည်းအဝေးခန်းမ၌ ကျင်းပပြုလုပ်ခဲ့ရာ မန္တလေးတိုင်းဒေသကြီး၊ စီးပွားရေးရာဝန်ကြီး၊ စားသုံးသူရေးရာကော်မတီ၊ ဥက္ကဌ၊ ဒုတိယဥက္ကဌ၊ အတွင်းရေးမှူးနှင့် အဖွဲ့ဝင် စုစုပေါင်း (၉)ဦး တက်ရောက်ခဲ့ကြောင်း  ကျင်းပပြုလုပ်ခဲ့ကြောင်း သိရှိရပါသည်။

            မန္တလေးတိုင်းဒေသကြီးစားသုံးသူရေးရာကော်မတီမှ စားသုံးသူပြည်သူတို့၏ အခွင့်အရေးများနှင့် ရပိုင်ခွင့်များကို ကာကွယ်စောင့်ရှောက်ပေးနိုင်ရန်၊ စားသုံးသူအငြင်းပွားမှုများကို စေ့စပ်ညှိနှိုင်းဖြေရှင်းပေးခြင်းဖြင့် စိတ်ကျေနပ်မှုရရှိစေရန်၊ တိုင်ကြားမှုများနှင့်စပ်လျဉ်း၍ မှန်ကန်မျှတသည့် ဆုံးဖြတ်ချက်များ ချမှတ်နိုင်ရန် စီးပွားရေးလုပ်ငန်းရှင်များအနေဖြင့် စီးပွားရေးကျင့်ဝတ်နှင့်အညီ ဆောင်ရွက်ကြစေရေး အကောင်အထည်ဖော်ဆောင်ရွက်နိုင်ရန် ရည်ရွယ်၍ စားသုံးသူရေးရာကော်မတီ၊ ဥက္ကဌမှ ပြောကြားရာတွင် ကော်မတီအား အဖွဲ့ပေါင်းစုံ ပါဝင်ဖွဲ့စည်းထားသည့်အတွက် စားသုံးသူနစ်နာ၍ တိုင်ကြားမှုများကို အချိန်နှင့်တပြေးညီ ဖြေရှင်းနိုင်မှာဖြစ်ပါကြောင်း၊ တက်ရောက်လာကြသည့်အဖွဲ့ဝင်များမှ မန္တလေးတိုင်းဒေသကြီးမှာ ရှိသည့် စားသုံးသူပြည်သူများ ကုန်စည်/ဝန်ဆောင်မှုများနှင့်ပတ်သက်ပြီး နစ်နာဆုံးရှုံးမှုများ နည်းနိုင်သမျှနည်းအောင်နှင့် နစ်နာဆုံးရှုံးမှုများ ပပျောက်သွားအောင် တက်ညီလက်ညီနှင့် ပူးပေါင်းပါဝင်ဆောင်ရွက်ပေးစေချင်ကြောင်း အကျယ်တဝင့် ဆွေးနွေးခဲ့ပြီး အတွင်းရေးမှူးမှလည်း တိုင်ကြားမှုနှင့်ပတ်သက်၍ ဥပဒေအကြံ ရယူခဲ့မှုများ၊ အခြားဌာနများနှင့် ပူးပေါင်းဆောင်ရွက်ထားရှိမှုများ၊ တိုင်ကြားမှုများအပေါ် စိစစ်တွေ့ရှိမှုအခြေအနေများအား အကျယ်တဝင့် ရှင်းလင်းတင်ပြခဲ့ခြင်း၊ တက်ရောက်လာကြသည့် အဖွဲ့ဝင်များမှလည်း ဝိုင်းဝန်းဆွေးနွေးခဲ့ကြောင်း၊ စားသုံးသူရေးရာကော်မတီ၊ ဥက္ကဌမှ အစည်းအဝေးအား ပုံမှန်ကျင်းပပြုလုပ်ခြင်းအားဖြင့် စားသုံးသူပြည်သူများ၏ အကျိုးစီးပွားအား ထိရောက်စွာ ကာကွယ်ပေးနိုင်မည်ဖြစ်ကြောင်း ဆွေးနွေး ပြောကြားခဲ့ကြောင်း သိရှိရပါသည်။

DOCA(မန္တလေး)

             ရခိုင်ပြည်နယ်၊ စားသုံးသူရေးရာဦးစီးဌာန မောင်တောမြို့နယ်တာဝန်ခံ ဦးအောင်ထွန်းမြ ဒု-ဦးစီးမှူး၊ ဦးဆောင်သောဝန်ထမ်းများနှင့် မြို့နယ်စည်ပင်၊ မြို့နယ်ထွေအုပ်ပါဝင်သော ပူးပေါင်းအဖွဲ့သည်(၂၉-၃-၂၀၂၂)ရက်နေ့ နံနက်(၁၀:၀၀)နာရီအချိန်တွင် မောင်တောမြို့နယ် မြို့တောင်ရပ်ကွက်နှင့် မြို့မဈေးအရှေ့ရပ်ကွက်ရှိ လက်လီကုန်စုံဆိုင်များသို့ သွားရောက်၍ ဈေးကွက်အတွင်းရောင်းချနေသော စားသောက်ကုန်များ ထုတ်ကုန်လုံခြုံစိတ်ချရမှုရှိစေရေး၊ ဘေးအန္တရာယ်ကင်းရှင်စေရေးနှင့် ကုန်အညွှန်းအမှတ်အသားများ ပြည့်စုံစွာဖော်ပြထားရှိမှု ရှိ/မရှိ ဈေးကွက်စောင့်ကြည့်စစ်ဆေးခြင်းဆောင်ရွက်ခဲ့ပါသည်။

     ထိုသို့ဆောင်ရွက်ရာတွင် မောင်တောမြို့နယ်ဈေးကွက်အတွင်းရောင်းချနေသော စားသောက်ကုန်များအများစုမှာ နယ်စပ်ဒေသမြို့ဖြစ်သည့်အတွက် တဖက်ဘင်္ဂလားဒေ့ရှ်နိုင်ငံမှ ဝင်ရောက်လာသော ကုန်ပစ္စည်းများဖြစ်ပြီး ကုန်အညွှန်းအမှတ်အသားဖော်ပြချက်များမှာ ဘင်္ဂလီဘာသာစကားဖြင့် ဖော်ပြထားကြောင်း စီစစ်တွေ့ရှိရပါသည်။

          မောင်တောမြို့နယ်တာဝန်ခံ ဦးအောင်ထွန်းမြမှ ဆိုင်လုပ်ငန်းရှင်များအား ဤကဲ့သို့ ကုန်ပစ္စည်းများ၏ ကုန်အညွှန်းအမှတ်အသားများကို နိုင်ငံခြားဘာသာဖြင့် ဖော်ပြထားသော ကုန်ပစ္စည်းများအား မရောင်းချရန်၊ မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့) တစ်ခုထက်ပို၍ တွဲလျက်ဖြစ်စေ ဖော်ပြထားသည့် ကုန်ပစ္စည်းများကိုသာ ဦးစားပေးရောင်းချကြပါရန်နှင့် ၂၀၁၉ စားသုံးသူကာကွယ်ရေးဉပဒေပါ စီးပွားရေးလုပ်ငန်းရှင်များအနေဖြင့် ကုန်ပစ္စည်းများအား ထုတ်လုပ်ခြင်း၊ တင်ပို့ခြင်း၊ ဖြန့်ဖြူးရောင်းချခြင်းနှင့် ကုန်သွယ်မှုပြုရာတွင် လိုက်နာဆောင်ရွက်ရမည့်  ကုန်စည်အမျိုးအစားအလိုက် သတ်မှတ်ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ရှင်းလင်းပြောကြားခြင်းနှင့် စားသုံးသူအသိပညာပေးလက်ကမ်းစာစောင်များ ဖြန့်ဝေပေးခြင်းတို့အား ဆောင်ရွက်ခဲ့ကြောင်း သတင်းရရှိပါသည်။

DOCA(ရခိုင်)

              စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်း/ခရိုင်ဦးစီးမှူးတို့၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ဒု-ခရိုင်ဦးစီးမှူး ဒေါ်မွန်မွန်စိုး၊ ပခုက္ကူမြို့နယ်တာဝန်ခံ ဦးဇော်မင်းဦးနှင့်အဖွဲ့သည် စားသုံးသူပြည်သူများ ဘေးအန္တရာယ်ကင်းရှင်းစေရေးအတွက် ကုန်စည်များတွင် ကုန်အညွှန်းအမှတ်အသားဖော်ပြချက်များကို စားသုံးသူကာကွယ်ရေးဥပဒေ(၂၀၁၉)နှင့်အညီ ထည့်သွင်းဖော်ပြလာစေရန် ရည်ရွယ်၍  (၂၄.၃.၂၀၂၂)ရက်နေ့၊ နံနက် (၁၁:၀၀)နာရီအချိန်တွင် ပခုက္ကူမြို့ပေါ်ရှိ ကုန်စုံဆိုင်၊ စတိုးဆိုင်များသို့ ဈေးကွက်စောင့်ကြည့် စစ်ဆေးခဲ့ပါသည်။

          ကုန်မျိုးစုံရောင်းဝယ်သည့်ဆိုင်များအား ဈေးကွက်စောင့်ကြည့်စစ်ဆေးရာတွင် ထုတ်လုပ်ဖြန့်ဖြူးရောင်းချသူ ဈေးဆိုင်ပိုင်ရှင်များကို စားသုံးသူကာကွယ်ရေးဥပဒေ (၂၀၁၉)ပါ  စီးပွားရေး လုပ်ငန်းရှင်၏တာဝန်များ၊ တားမြစ်ချက်များနှင့်ပြစ်ဒဏ်များ၊ အခန်း(၁၈)ကုန်အညွှန်းအမှတ်အသား ဆိုင်ရာ ပြဌါန်းချက်များအား ပြည့်စုံစွာဖော်ပြရမည့်အပြင်  ပုဒ်မ(၄၁)၊ ပုဒ်မခွဲ (ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ ရေးသားဖော်ပြခြင်းပါရှိသော ကုန်စည်များကိုသာ စားသုံးသူများဘေးအန္တရာယ်ကင်းရှင်းစေရေးအတွက် ရောင်းချဖြန့်ဖြူးရမည်ဖြစ်ကြောင်း၊ မိမိကုန်စည်နှင့်ပတ်သက်၍ ဘေးအန္တရာယ်ကင်းရှင်းမှုကိုလည်း အာမခံမှုပေးရမည်ဖြစ်ကြောင်း၊ ကုန်စည်ကြောင့် စားသုံးသူအနေဖြင့် ထိခိုက်နစ်နာမှုရှိပါက တာဝန်ယူဖြေရှင်းပေးရမည်ဖြစ်ပြီး အာမခံမှုနှင့်အညီ ဆောင်ရွက်ပေးမှုမရှိပါက စားသုံးသူမှ တိုင်ကြားနိုင်သည့် အခွင့်အရေးရှိပြီး ဌာနနှင့် စားသုံးသူကာကွယ်ရေးကော်မတီတို့၏ စီမံခန့်ခွဲရေးနည်းလမ်းအရ အရေးယူနိုင်သည့်အချက်များအား အသေးစိတ်ရှင်းလင်းဆွေးနွေးခဲ့ပြီး စားသုံးသူအသိပညာပေး လက်ကမ်းစာစောင်များလည်း ဖြန့်ဝေပေးခဲ့ပါသည်။

DOCA(မကွေး)

            စားသုံးသူရေးရာဦးစီးဌာန ၊ မိတ္ထီလာခရိုင်ဦးစီးမှူး၏ ကြီးကြပ်မှုဖြင့် ဦးသန်းစိုး (ဦးစီးအရာရှိ) ဦးဆောင်သော စျေးကွက်စောင့်ကြည့်စစ်ဆေးရေးအဖွဲ့သည် ဝန်ထမ်းများသည် ၂၀၂၂ခုနှစ် မတ်လ (၁၇)ရက်နေ့ ၊နံနက်(၉း၃၀)အချိန်တွင် မိတ္ထီလာမြို့ပေါ်ရှိ ဆေးဆိုင်များသို့ စျေးကွက်စောင့်ကြည့် စစ်ဆေးခဲ့ပါသည်။

           အဆိုပါဆေးဆိုင်များတွင် ရောင်းချနေသော ဆေးဝါးများ၊ Mask ၊ Handgel၊ စံမမှီဆေးဝါးများနှင့် တားမြစ်ဆေးဝါး ထိန်းချုပ်ဆေးဝါးများ ရောင်းချခြင်း ရှိ/မရှိ စစ်ဆေးခဲ့ပြီး ဆေးစျေးနှုန်းများ မှန်ကန်မှုရှိစေရေးနှင့် စျေးနှုန်းများအဆမတန်မြင့်တင်၍ စျေးကစားခြင်းများ မပြုလုပ်စေရေး ရည်ရွယ်၍ သွားရောက်စစ်ဆေးခဲ့ပါသည်။ စျေးကွက်အတွင်း ဆေးလက်ကျန်အခြေအနေနှင့် ဆေးပစ္စည်းလိုအပ်ချက်များအား မေးမြန်းဆွေးနွေးခဲ့ရာ ဆေးဝါးများပြတ်လတ်မှုမရှိပါကြောင်းနှင့် ဆေးကုမ္ပဏီများမှ လိုအပ်သလောက်မှာယူနိုင်ပါကြောင်း သိရှိရပါသည်။

DOCA(မန္တလေး)