Myanmar Tradenet 2.0 စနစ်ဖြင့် ပို့ကုန်၊ သွင်းကုန် လိုင်စင်/ပါမစ် လျှောက်ထားမှုနှင့်စပ်လျဉ်း၍ လိုက်နာရမည့် သတ်မှတ်ချက်များအား ပြင်ဆင်၍ အသိပေးထုတ်ပြန်ထားသည့် သတင်းလွှာ(၄/၂၀၂၂) အား အောက်ပါ .pdf file တွင် ဝင်ရောက်ဖတ့်နိုင်ပါသည်-
စားသုံးသူရေးရာဦးစီးဌာန ၊ ကျောက်ဆည်ခရိုင်ဦးစီးမှူးရုံးမှ ခရိုင်ဦးစီးမှူးဦးဆောင်သောအဖွဲ့သည်(၁၆.၃.၂၀၂၂)ရက်နေ့တွင် စဉ့်ကိုင်မြို့နယ်ရှိDenko(စဉ့်ကိုင်)၊Denko(ပလိပ်)နှင့် တံတားဦးမြို့နယ်ရှိ Denko(တံတားဦး) စက်သုံးဆီအရောင်းဆိုင်များအား လည်းကောင်း၊ (၁၇.၃.၂၂၀၂၂) ရက်နေ့တွင် စဉ့်ကူးမြို့နယ်ရှိ Denko(လက်ပန်လှ)နှင့် မတ္တရာမြို့နယ်ရှိ Denko(မတ္တရာ)စက်သုံးဆီအရောင်းဆိုင်များအား စားသုံးသူကာကွယ်ရေးအသိပညာပေး ဟောပြောပွဲကျင်းပခြင်းနှင့် စျေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ပါသည် ။ ထိုသို့စစ်ဆေးရာတွင် ကျောက်ဆည်ခရိုင် စားသုံးသူရေးရာဦးစီးဌာန ၊ ခရိုင်ဦးစီးမှူးက နိုင်ငံတော်မှစက်သုံးဆီဈေးနှုန်း မြှင့်တက်မှုမရှိစေရေးနှင့် ဈေးနှုန်းတည်ငြိမ်မှုရှိစေရေးအတွက် မြန်မာနိုင်ငံတော်ဗဟိုဘဏ်မှ ရည်ညွှန်းငွေလဲလှယ်နှုန်းဖြင့်ရောင်းချပေးသည့် နိုင်ငံခြားငွေရရှိသောစက်သုံးဆီကုမ္ပဏီများမှ စက်သုံးဆီများအား အထူးဈေးနှုန်း ဖြင့်ရောင်းချလျက်ရှိကြောင်း၊ ရောင်းချရာတွင် သုံးစွဲသူများအား နိုင်ငံတော်မှသတ်မှတ်ထားသည့် အထူးစျေးနှုန်းထက်ကျော်လွန်၍မရောင်းချရန်နှင့် အချင်အတွယ် မှန်ကန်မှုရှိစေရေး၊ အရည်အသွေးကောင်းမွန်သော စက်သုံးဆီများသာရောင်းချရန် ရှင်းလင်းပြောကြားပြီး စက်သုံးဆီအရောင်းဆိုင်ရှိ Pump များမှ အထူးဈေးနှုန်းဖြင့်ရောင်းချနေသည့် စက်သုံးဆီများဖြစ်သော Diesel ၊ Premium Dieselများအား (၂၀)လီတာဝင်စံခွက်ဖြင့် ချင်တွယ်၍ မှန်ကန်မှု ရှိ/မရှိစစ်ဆေးခဲ့ပါသည်။ဆက်လက်ပြီး စက်သုံးဆီအရောင်းဆိုင်ရှိ မန်နေဂျာရုံးခန်းတွင် ဝန်ထမ်းများအား စားသုံးသူကာကွယ်ရေးဥပဒေ နှင့်ပတ်သက်သည့် အကြောင်းအရာများဖြစ်သော စားသုံးသူအခွင့်အရေး ၊ စီးပွားရေးလုပ်ငန်းရှင်များ၏တာဝန်၊ ကုန်စည်နှင့်ဝန်ဆောင်မှုနှင့် စပ်လျဉ်း ၍အာမခံပေးထားမှုအပေါ်စားသုံးသူက တောင်းဆိုနိုင်သည့်အခွင့်အရေးများနှင့် စားသုံးသူများနစ်နာ ဆုံးရှုံးမှုရှိပါက Consumer Information & Cpmplaint Center (CICC)သို့ တိုင်ကြားနိုင်သည့် အကြောင်းအရာများအား အသေးစိတ်ရှင်းလင်းပြောကြားခဲ့ပါသည်။အလားတူ(၁၈.၃.၂၀၂၂)ရက်နေ့တွင် ပြင်ဦးလွင်ခရိုင်၊ စားသုံးသူရေးရာဦးစီးဌာန၊ ခရိုင်တာဝန်ခံမှဦးဆောင်ပြီး ပြင်ဦးလွင်မြို့နယ်ရှိ Myint Myat Htut Kuhaung စက်သုံးဆီ အရောင်းဆိုင်အားနိုင်ငံတော်မှသတ်မှတ်ထားသည့် အထူးစျေးနှုန်းများထက် ကျော်လွန်၍ မရောင်းချရန်နှင့် အချင်အတွယ် မှန်ကန်မှုရှိစေရေး၊ အရည်အသွေးကောင်းမွန်သော စက်သုံးဆီများသာရောင်းချရန်အတွက် စျေးကွက်စောင့်ကြည့် စစ်ဆေးခြင်းလုပ်ငန်းများဆောင်ရွက်ခဲ့ကြောင်း သိရှိရပါသည်။
DOCA(မန္တလေး)
မန္တလေးတိုင်းဒေသကြီး၊ မိတ္ထီလာမြို့၊ ဘူတာလမ်း၊ ရတနာမာရ်အောင်ရပ်ကွက်၌ ထုတ်လုပ်ရောင်းချနေသော မုန့်မျိုးစုံလုပ်ငန်းရှင်တစ်ဦးသည် ၎င်း၏ အမှတ်တံဆိပ်တွင် ထည့်သွင်းဖော်ပြသွားမည့် ကုန်အညွှန်းအမှတ်အသားများတွင် စားသုံးသူကာကွယ်ရေးဥပဒေပြဌာန်းချက်များနှင့် ကိုက်ညီမှုရှိ/မရှိနှင့် လိုအပ်ချက်များ ပြင်ဆင်ပြုပြင်နိုင်ရန်အတွက် ၂၀၂၂ခုနှစ်၊ မတ်လ ၂၁ ရက်နေ့တွင် စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူး ဦးဇော်မင်းနှင့် တွေ့ဆုံဆွေးနွေးခဲ့ပါသည်။
အဆိုပါတွေ့ဆုံမှုအရ မုန့်မျိုးစုံလုပ်ငန်းတွင် ပေါင်မုန့်၊ ကိတ်မုန့်နှင့် မုန့်ကြွပ်စသည့် မုန့်များကို မိသားစုတစ်ပိုင်တစ်နိုင်လုပ်ကိုင်ကြကြောင်း၊မိတ္ထီလာမြို့နယ်အတွင်း ဖြန့်ဖြူးရောင်းချလျက်ရှိကြောင်း သိရှိရပါသည်။ ထို့နောက် ခရိုင်ဦးစီးမှူးမှ မုန့်အမျိုးအစားအလိုက် ကုန်အညွှန်းအမှတ်သားများအား ပြည့်စုံစွာဖော်ပြရန်အတွက် မြန်မာနိုင်ငံစားသုံးသူကာကွယ်ရေးကော်မရှင် ထုတ်ပြန်ထားရှိသည့် ကုန်အညွှန်းအမှတ်အသားဖော်ပြခြင်းဆိုင်ရာ အမိန့်ကြေငြာစာ (၂/၂၀၁၉)အား ထုတ်ပြန်ထားရှိကြောင်းကိုလည်းကောင်း၊ ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတွဲလျှက်ရှိစေ ဖော်ပြရမည့်အချက်အလက်များကိုလည်းကောင်း ရှင်းလင်းဆွေးနွေးပြောကြားခဲ့ပြီး ဌာနသို့ စိစစ်ဆောင်ရွက်ပေးပါရန် တင်ပြလာမှုအပေါ် ကူညီဆောင်ရွက်ပေးမှုများပြုလုပ်ခဲ့ပါသည်။
DOCA(မန္တလေး)
စားသုံးသူရေးရာဦးစီးဌာန၊မန္တလေးတိုင်းဒေသကြီး၊ မိတ္ထီလာခရိုင်၊ ခရိုင်ဦးစီးမှူး ဦးဇော်မင်းနှင့်ဝန်ထမ်းများသည်သာစည်မြို့အတွင်းရှိ (တောင်ကြီး-မိတ္ထီလာ)ကားလမ်းရှိ စက်သုံးဆီအရောင်းဆိုင်များသို့(၂၁.၃.၂၀၂၂) ရက်နေ့ (၀၉၀၀) နာရီအချိန်တွင် ရှမ်းရွှေတောင် စက်သုံးဆီအရောင်းဆိုင်နှင့် Moon Sun စက်သုံးဆီအရောင်းဆိုင်များသို့ သွားရောက်၍ စက်သုံးဆီများအား အထူးစျေးနှုန်းဖြင့်ရောင်းချနေမှု အခြေအနေများ၊ စျေးနှုန်းများ၊ အချိန်အတွယ်ပမာဏများ ပြည့်စုံမှန်ကန်စွာ ရောင်းချမှုရှိစေရေး စျေးကွက်စောင့်ကြည့်စစ်ဆေးခြင်းများ ကွင်းဆင်းဆောင်ရွက်ခဲ့ပါသည်။
ထိုသို့ ကွင်းဆင်းဆောင်ရွက်ရာတွင် အဆိုပါ စက်သုံးဆီအရောင်းဆိုင်များအနေဖြင့် နိုင်ငံတော်ဗဟိုဘဏ်က ရည်ညွှန်းစျေးနှုန်းဖြင့် ရောင်းချပေးသည့် အမေရိကန်ဒေါ်လာဖြင့် ပြည်ပမှတင်သွင်းသော စက်သုံးဆီများအား သတ်မှတ်စျေးနှုန်းများအတိုင်းရောင်းချစေရေး၊ ပြည်သူလူထုလက်ဝယ်သို့ အမှန်တကယ် ရောင်းချစေရေး၊ သတ်မှတ်စျေးနှုန်းများအတိုင်း ရောင်းချစေရေး/အခြင်အတွယ်များ မှန်ကန်စွာရောင်းချစေရေး၊ ယာဉ်တစ်စီးချင်းအလိုက် ကုမ္ပဏီသတ်မှတ်ထားသည့်အတိုင်း ရောင်းချနေသည်။ သို့သော်လည်း ရောင်းချခွင့်ရရှိသည့် စက်သုံးဆီပမာဏအတိုင်း အမှန်တကယ်ရောင်းချစေရေး၊ အများပြည်သူသိရှိစေရန်အတွက် အထူးစျေးနှုန်း ဆိုင်းဘုတ်များကို ဆိုင်ရှေ့မျက်နှာစာများတွင် မြင်သာထင်သာအောင်ချိတ်ဆွဲထားစေရေးစသည်များအား အဓိကထား စစ်ဆေးခဲ့ကြောင်း သိရှိရပါသည်။
DOCA(မန္တလေး)
စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးဦးမျိုးအောင်သည် ခရိုင်ဦးစီးမှူးရုံးမှ စားသုံး/ထုတ်လုံဌာနခွဲတာဝန်ခံ၊ တောင်ငူမြို့နယ်တာဝန်ခံတို့နှင့်အတူ မတ်လ ၂၄ ရက်နေ့ နေ့လယ် ပိုင်းက တောင်ငူမြို့ပေါ်ရှိ မော်တော်ယာဉ်ပြုပြင်ရေးဆောင်ရွက်သည့်လုပ်ငန်း (Car Workshop & Auto Service Center) များသို့ သွားရောက်၍ စက်ဆီ၊ ချောဆီနှင့် ဆက်စပ်ရေနံထွက်ပစ္စည်းအတုအပများ အသုံးမပြုစေရေး အသိပညာပေးခြင်းများကို ဆောင်ရွက်ခဲ့ပါသည်။
ခရိုင်ဦးစီးမှူးက စက်ဆီ၊ ချောဆီနှင့် ဆက်စပ်ရေနံထွက်ပစ္စည်းဆက်စပ်လုပ်ငန်းရှင်များ အသင်းက စက်ဆီ၊ ချောဆီနှင့် ဆက်စပ်ရေနံထွက်ပစ္စည်း အတုအပပြုလုပ်ခြင်း၊ ဈေးကွက်အတွင်း တရားမဝင်ဖြန့်ဖြူးရောင်းချခြင်း၊ တရားဝင်လုပ်ငန်းလိုင်စင် ရယူ၍ ဆောင်ရွက်ခြင်းမရှိခြင်းတို့အား စီးပွားရေးနှင့်ကူးသန်းရောင်းဝယ်ရေးသို့ တင်ပြလာပါကြောင်း၊ ၎င်းအတုအပ ပစ္စည်းများကို အသုံးပြုပါက စားသုံးသူကာကွယ်ရေးဥပဒေ ပုဒ်မ ၂၁၊ ပုဒ်မခွဲ (ဂ)၊ (ဃ)နှင့် (ဆ)တို့ကို ချိုးဖောက်ခြင်း ဖြစ်ပါကြောင်း၊ သို့ဖြစ်၍ မိမိဒေသမှ မော်တော်ယာဉ်ပြုပြင်ရေး လုပ်ငန်းရှင်များ ဥပဒေအရ အရေးယူခံရမှုမရှိစေရေး အတုအပ ထုတ်လုပ်သည့်သူများက လာရောက်ကမ်းလှမ်းပါက ဝယ်ယူအသုံးမပြုမိစေရန်လိုအပ်ပါကြောင်း လုပ်ငန်းရှင်များအား အသိပညာပေးခဲ့ကြောင်း သိရှိရပါ သည်။
DOCA(ပဲခူး)
စစ်ကိုင်းတိုင်းဒေသကြီး၊ မုံရွာမြို့နယ်အတွင်း စက်သုံးဆီဈေးနှုန်းများကို ဆက်သွယ်မေးမြန်းခဲ့ရာ ၂၀၂၂ ခုနှစ်၊ မတ်လ၂၃ ရက်နေ့တွင် အောက်တိန်း92 တစ်ဂါလံလျှင် (၉၆၀၀)ကျပ်၊ အောက်တိန်း95 တစ်ဂါလံလျှင် (၁၀၂၀၀)ကျပ်နှင့် ပရီမီယံဒီဇယ် တစ်ဂါလံလျှင် (၁၀၂၂၀)ကျပ်ထိ အသီးသီး ရောင်းချ လျှက်ရှိကြောင်း သိရှိရသည်။
စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် မြန်မာနိုင်ငံစက်သုံးဆီတင်သွင်းဖြန့်ဖြူး ရောင်းချရေးအသင်းတို့ ပူးပေါင်းကာ အများပြည်သူသက်သာစေရေးအတွက် (၈.၂.၂၀၂၂)ရက်နေ့မှ ၈.၃.၂၀၂၂ရက်နေ့အထိ အထူးသတ်မှတ်ဈေးနှုန်းဖြင့် Asia Energy၊ BOC၊ Max(Monywa-1)၊ Denko(မုံရွာ-၁)၊ Denko(မုံရွာ-၂)နှင့် Denko(မုံရွာ-၃) စက်သုံးဆီဆိုင်တို့မှ ရောင်းချပေးလျှက်ရှိကြောင်း သိရှိရသည်။
မုံရွာမြို့ပေါ်ရှိ စက်သုံးဆီဈေးနှုန်းများကို ယခင်လနှင့် နှိုင်းယှဉ်လျှင် ဓာတ်ဆီတစ်ဂါလံကို (၁၀၀၀)ကျပ်နှင့် ဒီဇယ်တစ်ဂါလံလျှင် (၁၂၅၀)ကျပ်အထိ ဈေးနှုန်းမြှင့်တက်ခဲ့ကြောင်း လေ့လာ သိရှိရပါသည်။
စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ခရိုင်ဦးစီးမှူးရုံးမှ စားသုံး/ထုတ်လုံဌာနခွဲတာဝန်ခံ၊ တောင်ငူမြို့နယ်တာဝန်ခံတို့နှင့်အတူ မတ်လ ၂၄ ရက်နေ့ နံနက်ပိုင်း က တောင်ငူမြို့ပေါ်ရှိ စက်ဆီ၊ ချောဆီနှင့် ဆက်စပ်ရေနံထွက်ပစ္စည်း အရောင်းဆိုင်များသို့ သွား ရောက်၍ စက်ဆီ၊ ချောဆီနှင့် ဆက်စပ်ရေနံထွက်ပစ္စည်း အတုအပများ ရောင်းချမှုမရှိစေရေးကို ကွင်းဆင်းကြည့်ရှုစစ်ဆေးပါသည်။
ခရိုင်ဦးစီးမှူးက စက်ဆီ ၊ ချောဆီနှင့် ဆက်စပ်ရေနံထွက်ပစ္စည်း အတုအပ ပြုလုပ်ခြင်း၊ ဈေးကွက်အတွင်း တရားမဝင်ဖြန့်ဖြူးရောင်းချခြင်းတို့သည် စားသုံးသူကာကွယ်ရေးဥပဒေ ပုဒ်မ ၂၁၊ ပုဒ်မခွဲ (ဂ)၊ (ဃ)နှင့် (ဆ)တို့ကို ချိုးဖောက်ခြင်း ဖြစ်ပါကြောင်း၊ ထို့အတူ တရားဝင်လိုင်စင်ရယူ၍ ဆောင်ရွက်ခြင်းမရှိခြင်းသည် နိုင်ငံတော်အတွက် အခွန်ဘဏ္ဍာကို ဆုံးရှုံးစေပါကြောင်း၊ သို့ဖြစ်ပါ၍ မိမိခရိုင်မှ လုပ်ငန်းရှင်များ ဥပဒေအရ အရေးယူခံရမှုမရှိစေရေးအတွက် အတုအပ ထုတ်လုပ်သည့်သူများက လာရောက်ကမ်းလှမ်းပါက လက်ခံရောင်းချပေးခြင်းမပြုရန် လိုအပ်ပါကြောင်း ဆိုင်ပိုင်ရှင်များအား အသိပေးရှင်းလင်းခဲ့ကြောင်း သိရှိိရပါသည်။
DOCA(ပဲခူး)
စစ်ကိုင်းတိုင်းဒေသကြီး စားသုံးသူရေးရာဦးစီးဌာနမှ စစ်ဆေးရေးမှူးများ လုပ်ငန်းကျွမ်းကျင်မှု ဆိုင်ရာ အလုပ်ရုံဆွေးနွေးပွဲတက်ရောက်ခဲ့သည့် စစ်ဆေးရေးမှူးများမှ စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များ စားသုံးသူဘေးအန္တရယ်ကင်းရှင်းရေး စားသုံးသူအခွင့်အရေးများ အပြည့် အဝရရှိစေရေး၊ ထုတ်ကုန်များလုံခြုံစိတ်ချရမှုရှိစေရေး၊ ဘေးအန္တရာယ်ရှိသည်ဟု ထင်မြင်ယူဆရသော ကုန်စည်များအား စျေးကွက်အတွင်းမှပပျောက်စေရေးတို့အတွက် လုပ်ငန်းကျွမ်းကျင်မှုရှိသော စစ်ဆေး ရေးမှူးများ မွေးထုတ်ပေးနိုင်စေရန်ရည်ရွယ်၍ စစ်ဆေးရေးမှူးများ လုပ်ငန်းကျွမ်းကျင်မှုဆိုင်ရာ ဆင့်ပွား သင်တန်းကို မတ်လ(၂၃)ရက်နေ့ နံနက်(၁၀)နာရီအချိန်က စစ်ကိုင်းတိုင်းဒေသကြီး၊ စားသုံးသူရေးရာ ဦးစီးဌာန အစည်းအဝေးခန်းမ၌ ကျင်းပပြုလုပ်ခဲ့ကြောင်းသိရသည်။
ရှေးဦးစွာ အခမ်းအနားတွင် စစ်ကိုင်းတိုင်းဒေသကြီး စားသုံးသူရေးရာဦးစီးဌာန၊ တိုင်းဒေသကြီး ဦးစီးမှူး ဦးကျော်ကျော်လွင်က စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာ ဦးစီးဌာနအနေဖြင့် မိမိတို့ဌာန၏ ရည်မှန်းချက်တာဝန်များကို အကောင်အထည်ဖော်ဆောင်ရွက်ရာတွင် စားသုံးသူကာကွယ်ရေးဥပဒေနှင့်အညီ စစ်ဆေးရေးမှူးများခန့်အပ်တာဝန်ပေးပြီး စျေးကွက်စောင့်ကြည့် စစ်ဆေးခြင်းလုပ်ငန်းများ၊ စားသုံးသူ နစ်နာဆုံးရှုံးများနှင့်စပ်လျဥ်း၍ လိုအပ်သည့် စုံစမ်းစစ်ဆေးခြင်းများ ဆောင်ရွက်လျက်ရှိပါကြောင်း၊ ထိုသို့ဆောင်ရွက်ရာတွင် ဝန်ထမ်းများအနေဖြင့် အရည်အချင်းပြည့်ဝပြီး လုပ်ငန်းကျွမ်းကျင်မှုရှိစေရေး လိုအပ်သည့်အတွက် စစ်ဆေးရေးမှူးများလုပ်ငန်းကျွမ်းကျင်မှုဆိုင်ရာ ဆင့်ပွားသင်တန်းကို ဖွင့်လှစ်ပို့ချရခြင်းဖြစ်ကြောင်းနှင့် သင်တန်းသားသင်တန်းသူများအနေဖြင့် ယခု သင်တန်းမှရရှိလာမည့် အသိပညာဗဟုသုတအသီးသီးကို စားသုံးသူကာကွယ်ရေးလုပ်ငန်းများ အကောင် အထည်ဖော်ဆောင်ရွက်ရာတွင် အကျိုးရှိရှိအသုံးပြုနိုင်ပြီး နိုင်ငံတော်နှင့်ပြည်သူများအတွက် အလေး ထားရသည့် တာဝန်ကျေပွန်သောဝန်ထမ်းကောင်းများအဖြစ် ရပ်တည်သွားကြစေလိုကြောင်း တိုက်တွန်း ပြောကြားခဲ့သည်။
ဆက်လက်၍ တိုင်းဒေသကြီးစားသုံးသူရေးရာဦးစီးဌာနနှင့်မုံရွာခရိုင်စားသုံးသူရေးရာဦးစီးဌာနတို့မှ စစ်ဆေးရေးအရာရှိများ လုပ်ငန်းကျွမ်းကျင်မှုဆိုင်ရာအလုပ်ရုံဆွေးနွေးပွဲ တက်ရောက်ပြီးသည့် စစ်ဆေးရေးမှူးတို့မှ တက်ရောက်လာသော သင်တန်းသား သင်တန်းသူများအား စစ်ဆေးရေးအရာရှိများ ၏ လုပ်ပိုင်ခွင့်နှင့်လုပ်ငန်းတာဝန်များ၊ စျေးကွက်စောင့်ကြည့်စစ်ဆေးရာတွင် လိုက်နာရမည့် လုပ်ငန်း တာဝန်များ၊ ဘေးအန္တရာယ်ရှိသောကုန်စည် သို့မဟုတ် ဝန်ဆောင်မှုများတွေ့ရှိပါကဆက်လက်ဆောင်ရွက် ရမည့်လုပ်ငန်းစဥ်များ၊ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ ဆက်လက်ဆောင်ရွက်ရမည့် လုပ်ငန်းစဥ်များကို ပါဝါပွိုင့်များဖြင့် အသေးစိတ်ကျယ်ကျယ်ပြန့်ပြန့် ရှင်းလင်းသင်ကြားပေးခဲ့သည်။ အဆိုပါသင်တန်းတွင် စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနမှ သင်တန်းသား သင်တန်းသူ (၃၀)ဦး တက်ရောက်ပြီး သင်တန်းကာလ တစ်ရက်ကြာ သင်ကြားပို့ချပေးခဲ့ကြောင်း နောင်တွင်လည်း ယခုကဲ့သို့ ဝန်ထမ်းစွမ်းဆောင်ရည်မြှင့်တင်ရေးသင်တန်းများကိ အခါအားလျော်စွာ ထပ်မံဖွင့်လှစ်သွားမည်ဖြစ်ကြောင်း သတင်းရရှိပါသည်။
စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်အတွင်းရှိ သဲကုန်းမြို့နယ်တွင် မတ်လ ၉ ရက်နေ့၊ ပေါက်ခေါင်းမြို့နယ်တွင် မတ်လ ၁၀ ရက်နေ့၊ ရွှေတောင်မြို့နယ်တွင် မတ်လ ၂၁ ရက်နေ့၊ ပေါင်းတည်မြို့နယ်တွင် မတ်လ ၂၄ ရက်နေ့၊ ပြည်မြို့နယ်နှင့် ပန်းတောင်းမြို့နယ်တို့တွင် မတ်လ ၂၅ ရက်နေ့တို့၌ သက်ဆိုင်ရာမြို့နယ်တာဝန်ခံများဦးဆောင်သော မြို့နယ်ဈေးကွက် စောင့်ကြည့်စစ်ဆေးရေးအဖွဲ့များမှ ဈေးကွက်များအတွင်းရှိ ကိုဗစ် ၁၉ ကူးစက်ရောဂါကာကွယ် ကုသဆေးဝါးများ ဈေးနှုန်းမြင့်တက်မှုမရှိစေရေး၊ အရည်အသွေးမီသော ဆေးဝါးများကိုသာ ရောင်းချမှုရှိစေရေး၊ ဈေးကွက်အတွင်း ဆေးဝါးများ ပြတ်လပ်မှုမရှိစေရေး ရည်ရွယ်၍ ဆေးနှင့် ဆေးပစ္စည်းအရောင်းဆိုင်များသို့ ကွင်းဆင်းစစ်ဆေးခြင်းများ ဆောင်ရွက်ခဲ့ကြပါသည်။
ယင်းသို့ ကွင်းဆင်းစစ်ဆေးခြင်းများ ဆောင်ရွက်ရာတွင် ဆေးနှင့်ဆေးပစ္စည်းအရောင်းဆိုင် ပိုင်ရှင်များအနေဖြင့် အရည်အသွေးပြည့်မီသော ဆေးဝါးများကိုသာ ရောင်းချရန်နှင့် ဈေးနှုန်းများ အဆမတန်မြှင့်တင်ရောင်းချခြင်းများ မပြုလုပ်ကြရန် သက်တမ်းလွန်ဆေးဝါးများအား သွယ်ဝိုက် ရောင်းချခြင်းများအား ရှောင်ကြဉ်ကြရန် အသိပညာပေးပြောကြားခဲ့ပြီး စားသုံးသူအသိပညာပေး လက်ကမ်းစာစောင်များ ဝေငှခြင်းများ ဆောင်ရွက်ခဲ့ကြကြောင်း သိရှိရပါသည်။
DOCA(ပဲခူး)
စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးနှင့် စားသုံး/ ထုတ်လုံဌာနခွဲတာဝန်ခံတို့သည် မတ်လ ၃ ရက်တွင် ပြည်မြို့နယ်၊ နဝဒေးရပ်ကွက်ရှိ နီလာရိုးမစက်သုံးဆီအရောင်းဆိုင်သို့လည်းကောင်း၊ ရွှေတောင်မြို့နယ်တာဝန်ခံနှင့် ဝန်ထမ်းများသည် မတ်လ (၁၇) ရက်တွင် ရတနာစက်သုံးဆီဆိုင်နှင့် မတ်လ (၁၈) ရက်တွင် Petro – K စက်သုံးဆီဆိုင်တို့သို့ လည်းကောင်း သွားရောက်၍ ရရှိထားသည့် စက်သုံးဆီခွဲတမ်းများအား သတ်မှတ်ဈေးနှုန်းများဖြင့် ရောင်းချမှုရှိစေရေး၊ အရည်အသွေးနှင့် အချိန်အတွယ် မှန်ကန်မှုရှိစေရေး ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ကြပါသည်။
အဆိုပါ စစ်ဆေးခြင်းများဆောင်ရွက်ရာတွင် လုပ်ငန်းရှင်များအနေဖြင့် မိမိတို့ရောင်းချမည့် စက်သုံးဆီများအား ရရှိသောခွဲတမ်းများအတိုင်း အထူးဈေးနှုန်းဖြင့် သတ်မှတ်ထားသော အရေအတွက်အတွင်း ရောင်းချမည်ဆိုပါက စီးပွားရေးကျင့်ဝတ်စည်ကမ်းများနှင့်အညီ ရောင်းချကြရန်၊ အရည်အသွေးပြည့်မီသော စက်သုံးဆီများသာ ရောင်းချကြရန်၊ စားသုံးသူပြည်သူများအား မိမိတို့ ရောင်းချသည့် စက်သုံးဆီနှင့် ပတ်သက်သည့် သတင်းအချက်အလက်များကို ပြည့်စုံမှန်ကန်စွာ ဖြန့်ဝေခြင်းများ ဆောင်ရွက်ကြရန် အသိပေးပြောကြားခဲ့ကြောင်းနှင့် စားသုံးသူအသိပညာပေး လက်ကမ်းစာစောင်များလည်း ဖြန့်ဝေပေးခဲ့ကြောင်း သတင်းရရှိပါသည်။
DOCA(ပဲခူး)
