သတင်းနှင့် လှုပ်ရှားမှုများ

        စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ စားသုံးသူများ ဘေးကင်းလုံခြုံစိတ်ချစေရေး၊ ထုတ်ကုန်လုံခြုံစိတ်ချရမှုရှိစေရန်နှင့် စားသုံးသူကို အလေးပေး၍ စီးပွားရေးဝန်းကျင်ကောင်း များ ဖန်တီးလာနိုင်စေရန် ရည်ရွယ်၍ ၂၀၂၁ ခုနှစ်၊ ဒီဇင်ဘာ(၂၂)ရက်နေ့၊ နံနက်(၁၀:၀၀)အချိန်တွင် ခရိုင်ဦးစီးမှူး ဦးဝေဠုအောင်၊ ဒု-ခရိုင်ဦးစီးမှူးနှင့် ဝန်ထမ်းများသည် ဒေသတွင်း စားသောက်ကုန် ထုတ်လုပ် ဖြန့်ဖြူးရောင်းချလျက်ရှိသော "ရွှေလှေ" ဇီးဖျော်ရည် လုပ်ငန်း၊ "အောင်ဆင်မင်း" (မတုတ်မ) လက်ဖက် နှင့်အကြော်စုံလုပ်ငန်း "ဆင်ချောင်း" ပုန်းရည်ကြီး လုပ်ငန်းနှင့် "HAPPY Myanmar" ကိတ်နှင့်မုန့်မျိုးစုံလုပ်ငန်းများအား ကွင်းဆင်းဆွေးနွေးခဲ့ပါသည်။

          ထိုသို့ လုပ်ငန်းရှင်များနှင့်တွေ့ဆုံဆွေးနွေးရာတွင် ခရိုင်ဦးစီးမှူး မှ လုပ်ငန်းရှင်များအနေဖြင့် စားသုံး သူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ၊ ကုန်စည်များနှင့်စပ်လျဉ်း၍ အာမခံ ချက်ပေးခြင်း၊ကုန်စည် (သို့)ဝန်ဆောင်မှုအပေါ် တာဝန်ရှိမှုများ ကုန်အညွှန်းအမှတ်အသား ဖော်ပြခြင်းနှင့် ပတ်သက်သည့်ဥပဒေပြဌာန်းချက်များ၊ စီမံခန့်ခွဲရေးနည်းလမ်းအရအရေးယူခြင်း၊ တားမြစ်ချက်များ၊ ပြစ်မှုနှင့်ပြစ်ဒဏ်များအကြောင်းသိရှိစေရန် ဆွေးနွေးခဲ့ပြီး လုပ်ငန်းရှင်များမှ လည်း မိမိတို့ ထုတ်လုပ်သော ကုန်စည်အမျိုးအစားအလိုက် စားသုံးသူကာကွယ်ရေးဥပဒေ (၂၀၁၉) အခန်း(၁၈)ပါ ကုန်အညွှန်းအမှတ်အသားဖော်ပြချက်များနှင့် ကိုက်ညီမှုရှိ/မရှိ စိစစ်ပေးနိုင်ရန် နမူနာပုံစံများနှင့်တကွတင်ပြလျှောက်ထားနိုင်ပြီး စားသုံးသူရေးရာဦးစီးဌာနမှ စိစစ်ပြန်ကြားပေး လျက်ရှိကြောင်း အကျယ်တဝင့်ဆွေးနွေးခဲ့ပါသည်။

           ပခုက္ကူမြို့နယ်၊ ကျွဲတဲအုပ်စု၊ ရွှေချောင်းကျေးရွာ (ကွက်သစ်)ရှိ "ဆင်ချောင်း"ပုန်းရည်ကြီး လုပ်ငန်းအား ကွင်းဆင်းလေ့လာရာတွင် သန့်စင်ပြီးသော ပဲပိစပ်များကို လိုအပ်သည့်အချိုးအဆ အတိုင်း ဆားထည့်၍  နောက်တစ်နေ့ နံနက် (၅:၀၀)နာရီမှ ညနေ(၄:၀၀)နာရီထိ ပြုတ်ရပါကြောင်း၊ ပြုတ်ရည်များကို တစ်ညတာ အချဉ်ဓာတ်ရရှိရန် အလျဉ်ခံရပါကြောင်း၊ အလျဉ်ခံ၍ရသော ပဲပိစပ် အရည်အား နံနက်(၆:၀၀)နာရီ မှ နေ့လယ် (၁:၀၀)နာရီခန့်အထိ ကျိုချက်ရပါကြောင်း၊ မိမိတို့ လိုချင်သော အနေအထားရပါက အအေးခံ၍ ထုပ်ပိုးပါကြောင်း၊ ပြုတ်၍ ထွက်ရှိလာသော ပဲပိစပ်အခွံ အဖတ်များအား တိရစ္ဆာန်အစာအဖြစ် ပြန်လည်ရောင်းချပါကြောင်း၊ ဈေးနှုန်းအနေဖြင့် (၂၅)ကျပ်သား တစ်ဗူးလျှင်(၁၅၀၀/-)၊(၃၀)ကျပ်သားတစ်ဗူးလျှင် (၂၀၀၀/-)ရောင်းချပါကြောင်း၊ ဈေးကွက် အနေဖြင့် ပခုက္ကူဒေသတွင်းနှင့်ရန်ကုန်၊ ပုသိမ်၊ မြန်အောင်၊ ဧရာဝတီသို့ ဖြန့်ဖြူးရောင်းချပါကြောင်း၊ အလုပ် သမားဦးရေ(၁၅)ဦးခန့်ရှိပါကြောင်း၊ လုပ်အားခမှာတစ်ဦးလျှင် (၄၀၀၀/၅၀၀၀/ ၆၀၀၀) ကျပ်ခန့် ပေးပါကြောင်း၊ ရပ်ကွက်အတွင်းရှိ ပြည်သူများအား အလုပ်အကိုင်အခွင့်အလမ်းများပေးနိုင်ပါ ကြောင်း၊ ကုန်အညွှန်းအမှတ်အသားတွင် မြန်မာဘာသာဖြင့် ဖော်ပြရန်သတ်မှတ်ချက် များနှင့်အညီ ပြည့်စုံမှုမရှိသေးသဖြင့် နမူနာပုံစံများတင်ပြလျှင် ကိုက်ညီမှုရှိ/မရှိ စိစစ်ပေးမည်ဖြစ်ပြီး အကယ်၍ ဈေးကွက်အတွင်း ရောင်းချရာတွင် ကုန်အညွှန်းအမှတ်အသားများ မပါရှိပါက ဥပဒေအရ အရေးယူ သွားမည်ဖြစ်ကြောင်း အသိပညာပေးဆွေးနွေးခဲ့ပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)

          နိုင်ငံတော်က ရောင်းချပေးသည့် အမေရိကန်ဒေါ်လာဖြင့် ပြည်ပမှတင်သွင်းသည့် စက်သုံးဆီ များအပေါ် သက်သာသောအထူးဈေးနှုန်းဖြင့် ဖြန့်ဖြူးရောင်းချပေးသည့် စစ်ကိုင်းတိုင်းဒေသကြီး၊ စစ်ကိုင်းမြို့ရှိ ရွှေဗျိုင်းဖြူစက်သုံးဆီအရောင်းဆိုင်သို့ စစ်ကိုင်းမြို့၊ ဈေးကွက်စောင့်ကြည့် စစ်ဆေး ကြပ်မတ်ရေးအဖွဲ့နှင့်အတူ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး၊ မြို့နယ်တာဝန်ခံနှင့် ဝန်ထမ်းများသည် ၂၀၂၁ ခုနှစ် ဒီဇင်ဘာလ ၂၂ ရက်နေ့က ကွင်းဆင်းစစ်ဆေးခဲ့ပါသည်။

          အဖွဲ့ခေါင်းဆောင်ဖြစ်သော စစ်ကိုင်းခရိုင်ဦးစီးမှူးက စက်သုံးဆီခွဲတမ်းရရှိမှုအပေါ် နိုင်ငံတော်က သတ်မှတ်ပေးသည့် ဈေးနှုန်းများဖြင့် အချင်အတွယ် မှန်ကန်စွာ  ရောင်းချရန်၊ ကားဆီဖြည့်သည့် နေရာနှင့် ဆိုင်ကယ်ဆီဖြည့်သည့်နေရာများကို သီးခြားခွဲထားရန်အကြံပြုခဲ့ပြီး၊ နေ့စဉ်ရောင်းချရမှု စာရင်းနှင့် ဈေးနှုန်းများကို စနစ်တကျမှတ်တမ်းထားရှိ၍ နေ့စဉ်မိမိတို့ဌာနသို့ စာရင်းပေးပို့ရန်နှင့် ရောင်းချမှုအခြေအနေများ မေးမြန်းခဲ့ရာ နေ့စဉ်နံနက်(၀၅:၀၀) နာရီမှ ည(၂၀:၀၀)နာရီထိ နိုင်ငံတော်က သတ်မှတ်ပေးသည့် ဈေးနှုန်းဖြင့် 92 ၊ ပရီမီယမ်ဒီဇယ်နှင့် ဒီဇယ်ရိုးရိုးတို့ကို  အချင်အတွယ် မှန်ကန်စွာဖြင့် ရောင်းချလျက်ရှိပါကြောင်း၊ ယခုရက်ပိုင်းတွင် ရောင်းအား အနည်းငယ်ကျကြောင်း ပြောကြားခဲ့ပါသည်။

DOCA(စစ်ကိုင်း)

မကွေးတိုင်းဒေသကြီး၊ မကွေးခရိုင်၊ တောင်တွင်းကြီးမြို့နယ်၊ စားသုံးသူရေးရာဦးစီးဌာနမှ မြို့နယ်ဦးစီးမှူး ဒေါ်ဌေးဌေးသည်(၂၁.၁၂.၂၀၂၁)ရက်နေ့ (၁၀:၃၀) အချိန်၌ တောင်တွင်းကြီး မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့ ပူးပေါင်း၍ စားသုံးသူအသိပညာပေးရေး အစီအစဉ်နှင့် ပြန်ကြားဆက်သွယ်ရေး ပူးပေါင်းဆောင်ရွက်ရေး အစီအစဉ်များအရ မိဘ/ပြည်သူ များအား စားသောက်ကုန်ပစ္စည်းများ၊ ဝန်ဆောင်မှုလုပ်ငန်းများ ဝယ်ယူ/သုံးစွဲရာတွင် ဘေးကင်းလုံခြုံ စိတ်ချရမှုရှိစေရေးအတွက် ရည်ရွယ်၍ အွန်လိုင်းစနစ်ဖြင့် စားသုံးသူကာကွယ်ရေး အသိပညာပေး ဆွေးနွေးပွဲ (Talkshow)အား မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနရုံးခန်းမ၌ ကျင်းပခဲ့သည်။
အဆိုပါ(Talk show)ဆွေးနွေးပွဲတွင် တောင်တွင်းကြီးမြို့နယ် စားသုံးသူရေးရာဦးစီးဌာန မြို့နယ်ဦးစီးမှူးက မြို့နယ်အတွင်းရှိ စားသုံးသူမိဘ/ပြည်သူများအနေဖြင့် စားသုံးသူအခွင့်အရေးများ အပြည့်အဝရရှိစေရန်နှင့် အရည်အသွေးပြည့်ဝသည့် ကုန်စည်နှင့် ဝန်ဆောင်မှုများကို ရရှိစေရန် အတွက် စားသုံးသူကာကွယ်ရေးဥပဒေ အခန်း(၁၉)ပါ စားသုံးသူ၏ အခွင့်အရေးနှင့် တာဝန်များ၊ ကုန်စည်နှင့်ဝန်ဆောင်မှုများ၌ စီးပွားရေးလုပ်ငန်းရှင်မှ အာမခံပေးထားမှုအပေါ် စားသုံးသူက တောင်းဆိုနိုင်သည့်အခွင့်အရေးများအား အသိပညာပေးရှင်းလင်းဆွေးနွေးခဲ့ပြီး၊ စီးပွားရေးလုပ်ငန်းရှင် များအနေဖြင့်လည်း စားသုံးသူကာကွယ်ရေးဥပဒေပါ အခန်း(၁၇) ကုန်စည်(သို့မဟုတ်) ဝန်ဆောင်မှု အပေါ်တာဝန်ရှိမှုများ အခန်း(၁၈) ကုန်အညွှန်းအမှတ်အသားဖော်ပြခြင်းများနှင့် အခန်း(၂၀) စီမံခန့်ခွဲရေးနည်းလမ်းအရ အရေးယူခြင်း အခန်း(၂၄) ပြစ်မှုနှင့် ပြစ်ဒဏ်များအား အခန်းကဏ္ဍများ အလိုက် အသိပညာပေးရှင်းလင်းဆွေးနွေးခဲ့သည်။
တောင်တွင်းကြီးမြို့နယ် စားသုံးသူရေးရာဦးစီးဌာန မြို့နယ်ဦးစီးမှူးအနေဖြင့်စားသုံးသူ မိဘ/ပြည်သူများအား စားသုံးသူကာကွယ်ရေးဥပဒေပါ ပြဌာန်းချက်များ အသိပညာဗဟုသုတ တိုးပွားစေရေးအတွက် သတင်းမီဒီယာများနှင့် ချိတ်ဆက်၍ အွန်လိုင်းမှတစ်ဆင့် သတင်းအချက် အလက်များအား စဉ်ဆက်မပြတ် ဖြန့်ဝေခြင်းများဆောင်ရွက်သွားမည်ဖြစ်ကြောင်းသိရှိရပါသည်။
DOCA(မကွေး)

စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဒု-ခရိုင်ဦးစီးမှူး စစ်ဆေးရေးအရာရှိ ဒေါ်မွန်မွန်စိုး ဦးဆောင်သော ဝန်ထမ်းများအဖွဲ့သည် ဒီဇင်ဘာလ(၂၀)ရက်နေ့ နံနက်(၁၀:၃၀)အချိန်တွင် ပခုက္ကူမြို့အတွင်းရှိ ဆေးဆိုင်(၅)ဆိုင်၌ လည်းကောင်း၊ ဆိပ်ဖြူမြို့နယ် တာဝန်ခံ ဦးဇော်နေလင်းမှ နေ့လယ်(၁၄:၀၀)နာရီတွင် ဆိပ်ဖြူမြို့ပေါ်ရှိ ဆေးဆိုင်(၂)ဆိုင်တွင် လည်းကောင်း မိတ်ဖက်ဌာနဖြစ်သော မြို့နယ်စည်ပင်နှင့် ပူးပေါင်း၍ ဈေးကွက်စောင့်ကြည့် စစ်ဆေးခဲ့ပါသည်။
အဆိုပါဈေးကွက်စောင့်ကြည့်စစ်ဆေးရာတွင် ဆေးဆိုင်များအနေဖြင့် ဈေးနှုန်းမြှင့်တင် ရောင်းချခြင်း၊ ဆေးဝါးပြတ်လပ်မှုမရှိခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းများ မရှိ ကြောင်း စစ်ဆေးတွေ့ရှိရပါသည်။
ဆေးနှင့်ဆေးပစ္စည်းအရောင်းဆိုင် ပိုင်ရှင်များအနေဖြင့် ဆေးနှင့်ဆေးပစ္စည်းများကို ဈေးနှုန်းမြှင့်တင်ရောင်းချခြင်း၊ ဖြန့်ဖြူးခြင်းနှင့် ဈေးကစားရန် ရည်ရွယ် ချက်ဖြင့် သိုလှောင်ခြင်းများပြုလုပ်ပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူ ဆောင်ရွက်သွားမည်ဖြစ်ပြီး စားသုံးသူကာကွယ်ရေးဥပဒေ(၂၀၁၉)ပါ ပြဌာန်းချက်များကိုလည်း သိရှိလိုက်နာဆောင်ရွက်သွားရန် လိုအပ်ကြောင်း ပြောကြားခဲ့ပြီး လက်ကမ်းစာစောင်များလည်း ဖြန့်ဝေခဲ့ကြောင်းသတင်းရရှိပါသည်။

မွန်ပြည်နယ်၊ကျိုက်မရောမြို့နယ်၊ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊မြို့နယ်စားသုံးသူရေးရာဦးစီးဌာနတို့ပူးပေါင်း၍ စားသုံးသူအသိပညာပေး(Talk Show)ဆွေးနွေးပွဲကို ၂၀.၁၂.၂၀၂၁ ရက်နေ့ နံနက်၁၀နာရီတွင် ကျိုက်မရောမြို့နယ်၊ လူထုအခြေပြု၊ဗဟိုဌာန၊(Community Center)ခန်းမ၌ ပြုလုပ်ခဲ့သည်။ ရှေးဦးစွာပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ဦးစီးအရာရှိဒေါ်ချိုမြတ်မြတ်ထွေးက စားသုံးသူအကာကွယ်ပေးရေးအသိပညာပေး(Talk Show)ပြုလုပ်ရခြင်း၏ရည်ရွယ်ချက်ကို ရှင်းလင်းဆွေးနွေးပြီး မွန်ပြည်နယ်စားသုံးသူရေးရာဦးစီးဌာန ၊ကျိုက်မရောမြို့နယ်ရုံး တာဝန်ခံဒု-ဦးစီးမှူးဦးအောင်ညီညီခန့်က စားသုံးသူပြည်သူများအနေဖြင့် မိမိတို့ရရှိမည့်စားသုံးသူအခွင့်အရေးများနှင့် လိုက်နာရမည့်တာဝန်များ၊ကုန်စည်၊ ဝန်ဆောင်မှုများနှင့်ပတ်သက်၍ ဝယ်ယူသုံးစွဲရာတွင် နစ်နာဆုံးရှုံးမှုများနှင့် ကြုံတွေ့ရပါက စားသုံးသူရေးရာဦးစီးဌာနသို့ ဆက်သွယ်တိုင်ကြားနိုင်ကြောင်း၊ လုပ်ငန်းရှင်များအနေဖြင့် လိုက်နာရမည့် တာဝန်များ၊ ကုန်စည်ထုတ်လုပ်ဖြန့်ဖြူးရောင်းချရာတွင် စားသုံးသူကာကွယ်ရေးဥပဒေတွင် ပြဌာန်းထားသည့် ကုန်ညွှန်းအမှတ်အသားများဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ လိုက်နာဆောင်ရွက်ကြရန်၊ စားသုံးသူရေးရာဦးစီးဌာနနှင့် ပတ်သက်သောသတင်းအချက်အလက်များအား သိရှိစုံစမ်းလိုလျှင် Consumer Call Center များသို့ ဆက်သွယ်စုံစမ်းနိုင်ကြောင်းစသည့် အချက်များအား အသိပညာပေးဆွေးနွေးခဲ့ကြကြောင်း သိရသည်။
အဆိုပါ စားသုံးသူကာကွယ်ပေးရေးအသိပညာပေး(Talk.Show)အစီအစဉ်အား ကျိုက်မရောမြို့နယ်၊ပြည်သူ့စာကြည့်တိုက်Facebook pageစာမျက်နှာတွင် ဝင်ရောက်ကြည့်ရူလေ့လာနိုင်ကြောင်း သိရှိရသည်။
စားသုံးသူရေးရာဦးစီးဌာန