သတင်းနှင့် လှုပ်ရှားမှုများ

နေပြည်တော်၊ (၂၀-၁၂-၂၀၂၁)

ပြည်တွင်းစားသုံးဆီထုတ်လုပ်မှုကဏ္ဍဖွံ့ဖြိုးတိုးတက်ရေးဆွေးနွေးပွဲကို ယနေ့ နံနက် ၉:၃၀ နာရီ တွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ရုံးအမှတ်(၃) အစည်းအဝေးခန်းမ၌ Virtual Meeting ဖြင့် ကျင်းပပြုလုပ်ခဲ့ပါသည်။ အဆိုပါ အစည်းအဝေးသို့ စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၊ ပြည်ထောင်စုဝန်ကြီးနှင့် အမြဲတမ်းအတွင်းဝန်၊ စိုက်ပျိုးရေး ဦးစီးဌာန၊ ကုန်သွယ်ရေးဦးစီး ဌာန၊ စားသုံးသူရေးရာဦးစီးဌာန၊ မူပိုင်ခွင့်ဦးစီးဌာန၊ မြန်မာကုန်သွယ်မှုမြှင့်တင်ရေး အဖွဲ့၊ စက်မှုကြီးကြပ် ရေးနှင့် စစ်ဆေးရေး ဦးစီးဌာနတို့မှ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များ၊ ညွှန်ကြား ရေးမှူးများနှင့် စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ အဖွဲ့ဝင်များ၊ မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းနှင့် မြန်မာနိုင်ငံဆီစက်ပိုင်ရှင်များ အသင်းတို့မှ ဥက္ကဋ္ဌနှင့် အလုပ်အမှုဆောင်များ တက်ရောက်ခဲ့ပါသည်။

အဆိုပါအစည်းအဝေးတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စု ဝန်ကြီးက ပြည်တွင်း၌ စားသုံးဆီထုတ်လုပ်နိုင်မှုပမာဏ ဖူလုံမှုမရှိသဖြင့် ပြည်ပမှ နှစ်စဉ်တန်ချိန် ၉ သိန်း ကျော်တင်သွင်းနေရပါကြောင်း၊ ပြည်တွင်းစားသုံးမှု၊ စက်မှုလုပ်ငန်းသုံးနှင့် ဟိုတယ်ခရီးသွားလုပ်ငန်းများ အတွက် စုစုပေါင်း သုံးစွဲမှုတန်ချိန် ၁၁ သိန်းခန့်ရှိရာ ပြည်တွင်းစားသုံးဆီဖူလုံရေးအတွက် ဆီထွက်သီးနှံ စိုက်ဧကနှင့် အထွက်နှုန်းပိုမိုတိုးတက်လာစေရေး၊ ပြည်တွင်း၌ ထုတ်လုပ်သည့် စားသုံးဆီများ ဈေးကွက် ဝေစုပိုမိုရရှိလာစေ‌ရေး၊ ပြည်တွင်းစားသုံးဆီထုတ်လုပ်မှုကဏ္ဍဖွံ့ဖြိုးတိုးတက်စေရေးနှင့် ဆီထွက်သီးနှံ ကဏ္ဍ(Supply Chain) တစ်ခုလုံး ဖွံ့ဖြိုးတိုးတက်လာစေရေး ဆောင်ရွက်ကြရမှာဖြစ်ပါကြောင်း၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနအနေဖြင့် ဆီထွက်သီးနှံ စိုက်ဧကတိုးချဲ့ စိုက်ပျိုး နိုင်ရေးဆောင်ရွက်နေသကဲ့သို့ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနအနေဖြင့်လည်း ပြည်ပမှ စားသုံးဆီ တင်သွင်းမှုကို အကန့်အသတ်ဖြင့်တင်သွင်းခွင့်ပြုနိုင်ရေး မူဝါဒများ ချမှတ် ဆောင်ရွက်လျက် ရှိပါကြောင်း၊ စားသုံးမှုပုံစံကို ပြောင်းလဲရာတွင် စားသုံးသူအကာအကွယ်ပေးရေး အစီအစဉ်များ၊ စားသုံးသူ အသိအပညာပေး အစီအစဉ်များကို ဦးစားပေးဆောင်ရွက်၍ အရည်အသွေး ပြည့်မီသည့် စားသုံးဆီများ ဖြန့်ဖြူးရောင်းချနိုင်စေရန် ဆောင်ရွက်သွားရမည်ဖြစ်ကြောင်း၊ တစ်ဖက်မှာလည်း ပြည်တွင်း၌ ဆီထွက် သီးနှံများကို ကျယ်ကျယ်ပြန့်ပြန့်စိုက်ပျိုးလာစေရန် တောင်သူများအား အထွက်နှုန်းကောင်းသည့် မျိုးကောင်းမျိုးသန့်နှင့် စိုက်ဧကများ ပိုမိုတိုးချဲ့စိုက်ပျိုးနိုင်ရေး ကွင်းဆင်းအသိပညာပေးခြင်း၊ နည်းပညာ များပံ့ပိုး‌ပေးခြင်းစသည့် လုပ်ငန်းစဉ်များ ချမှတ်အကောင်အထည်ဖော်ရန် လိုအပ်သလို ကြိတ်ခွဲထုတ်လုပ် သည့် ဆီစက်လုပ်ငန်းရှင်များအနေဖြင့်လည်း စိုက်ပျိုးထုတ်လုပ် သည့် တောင်သူများနှင့် အကျိုးတူ ကန်ထရိုက်လယ်ယာစနစ်ပုံစံမျိုး ဆောင်ရွက်ပေးရန်လိုအပ်မည် ဖြစ်ပါကြောင်းနှင့် တက်‌ရောက်လာသူ များအနေဖြင့် ဆီထွက်သီးနှံနှင့် စားသုံးဆီကဏ္ဍ ဖွံ့ဖြိုးတိုးတက်ရေးဆိုင်ရာ လိုအပ်ချက်များကို ဝိုင်းဝန်း အကြံပြုဆွေးနွေးစေလိုကြောင်း ပြောကြားခဲ့ပါသည်။

ဆက်လက်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ အမြဲတမ်းအတွင်းဝန်က မြန်မာ နိုင်ငံတွင် ဆီထွက်သီးနှံစိုက်ဧက (၈) သန်းနီးပါးရှိသော်လည်း ပြည်တွင်း၌ စားသုံးဆီထုတ်လုပ်မှုမှာ နည်းပါးသည့်အတွက် နှစ်စဉ် ပြည်ပမှ စားသုံးဆီတန်ချိန် (၉) သိန်းဝန်းကျင်ခန့် တင်သွင်းနေရပါ ကြောင်း၊ ဆီထွက်သီးနှံများအား တိုးချဲ့စိုက်ပျိုးနိုင်ပြီး ပြည်ပသို့ ဆီထွက်သီးနှံများအား ကုန်ကြမ်း အတိုင်းတင်ပို့ ရောင်းချခြင်းထက် စားသုံးဆီဖူလုံမှုရှိစေရန် ပြည်တွင်း၌ ပိုမိုကြိတ်ခွဲထုတ်လုပ်နိုင်မည် ဆိုပါက ပြည်ပမှ စားသုံးဆီတင်သွင်းမှုကို လျှော့ချနိုင်မည် ဖြစ်ပါကြောင်း၊ ဆီထွက်သီးနှံများအား တန်ဖိုးမြင့်ထုတ်ကုန်များ အဖြစ် ပြောင်းလဲထုတ်လုပ်၍ ပြည်ပသို့ တင်ပို့ရောင်းချနိုင်ပါက နိုင်ငံခြားဝင်ငွေ ရရှိလာနိုင်မည် ဖြစ်ပါကြောင်း၊ ပြည်တွင်း၌ စားသုံးဆီ လစဉ်ပျမ်းမျှတန်ချိန် (၁၈၀၀၀) ကျော် ကြိတ်ခွဲထုတ်လုပ်နိုင်သော် လည်း အချို့စက်များမှာရပ်နားထားခြင်း၊ ကုန်ကြမ်းရရှိမှုနည်းပါးသဖြင့် စက်စွမ်းအားပြည့် လည်ပတ်နိုင်မှု မရှိခြင်းတို့ကို တွေ့ရှိရပါကြောင်း၊ နိုင်ငံတော်အနေဖြင့် အရည်အသွေးမီ ဆီစက်များ ဖြစ်စေရေးနှင့် ဆီစက် လုပ်ငန်းများ အဓွန့်ရှည်ရေးအတွက် ပံ့ပိုးကူညီနိုင်ရေး ညှိနှိုင်း ဆောင်ရွက်သွားမည်ဖြစ်ကြောင်းနှင့် ဆီစက်များ စက်စွမ်းအားပြည့် လည်ပတ်နိုင်မည်ဆိုပါက အလုပ်အကိုင် အခွင့်အလမ်းများ ရရှိလာမည်ဖြစ် သည့်အပြင် ဆီထွက်သီးနှံများကို တိုးချဲ့စိုက်ပျိုး၍ ပြည်တွင်း စားသုံးဆီလိုအပ်ချက် ပြည့်မီအောင် ထုတ်လုပ်နိုင်ပါက နိုင်ငံခြားငွေ သုံးစွဲမှု လျှော့ချနိုင်မည်ဖြစ်ကြောင်း  ဆွေးနွေးပြောကြားခဲ့ပါသည်။

ထို့နောက် တက်‌ရောက်လာကြသည့် သက်ဆိုင်ရာဌာနအသီးသီးမှ ညွှန်ကြားရေးမှူးချုပ်များ၊ စားသုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ အဖွဲ့ဝင်များ၊ မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်းနှင့် မြန်မာနိုင်ငံဆီစက်ပိုင်ရှင်များ အသင်းတို့မှ ဥက္ကဋ္ဌများ၊ အတွင်းရေးမှူးများက ပြည်ပမှ စားသုံးဆီ တင်သွင်းမှု၊ ဆီထွက်သီးနှံများ စိုက်ပျိုးထုတ်လုပ်နိုင်မှု၊ တိုင်းဒေသကြီး/ပြည်နယ်အလိုက် ဆီစက်များ၏ ကြိတ်ခွဲထုတ်လုပ်နိုင်မှု၊ ဈေးကွက်အတွင်း ဖြန်ဖြူး ရောင်းချမှု အခြေအနေနှင့် ဆီထွက်သီးနှံများအား ပြည်ပတင်ပို့မှု အခြေအနေများ၊ ပြည်တွင်း စားသုံးဆီ ထုတ်လုပ်မှုကဏ္ဍ ဖွံ့ဖြိုးတိုးတက်ရေးအတွက် သက်ဆိုင်ရာကဏ္ဍအလိုက် လိုအပ်ချက်များ၊ အကြံပြု သုံးသပ်ချက်များအား အပြန်အလှန်ဆွေးနွေးခဲ့ကြပြီး ပြည်ထောင်စုဝန်ကြီးက စားသုံးသူပြည်သူများ အပါအဝင် Supply Chain တစ်ခုလုံးတွင် ပါဝင်ပတ်သက်သူများ၏ အကျိုးစီးပွား၊ နိုင်ငံတော်၏ အကျိူးစီးပွားကို ရှေ့ရှုပြီး ဌာနဆိုင်ရာများနှင့် အသင်းအဖွဲ့များ စဉ်ဆက်မပြတ်ထိတွေ့ဆက်ဆံသွားရမည် ဖြစ်ပါကြောင်း၊ စားသုံးသူပြည်သူများကို ဝန်ထုပ်ဝန်ပိုးမဖြစ်စေဘဲ သင့်တင့်မျှတသည့် ဈေးနှုန်းဖြင့် ဖြန့်ဖြူး ရောင်းချရန် လိုအပ်ပါကြောင်း၊ တင်သွင်းထုတ်လုပ်သည်မှ လက်လီဈေးကွက်အထိ တာဝန်ယူမှု၊ တာဝန်ခံမှုရှိသည့် လုပ်ငန်းရှင်များ ဖြစ်လာစေရေး ဝိုင်းဝန်းပူးပေါင်းဆောင်ရွက်သွားရမည် ဖြစ်သည်ဟု လမ်းညွှန်မှာကြားခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန

          ၂၀၂၁ ခုနှစ်၊ ဒီဇင်ဘာလ ၁၅ ရက်နေ့ နံနက် (၁၀:၀၀)တွင် တနင်္သာရီတိုင်းဒေသကြီး၊ အစားအသောက်နှင့်ဆေးဝါးကွပ်ကဲရေးဦးစီးမှူးရုံးတွင် ထားဝယ်ခရိုင် သောက်ရေသန့်အသင်းဖွဲ့ ဖွဲ့စည်းနိုင်ရေးနှင့် စားသုံးသူကာကွယ်ရေးဥပဒေအကြောင်း၊ အစားအသောက်ထုတ်လုပ်ခြင်း ထောက်ခံချက်နှင့် အမျိုးသားအစားအသောက်ဥပဒေအကြောင်းကို သိရှိနိုင်ရန် ရည်ရွယ်၍ ဆွေးနွေးပွဲ ကျင်းပပြုလုပ်ခဲ့ခြင်းဖြစ်ပြီး ​ဆွေးနွေးပွဲသို့ အစားအသောက်နှင့်ဆေးဝါးကွပ်ကဲရေးဦးစီး ဌာနမှ တာဝန်ရှိသူများ၊ စားသုံးသူရေးရာဦးစီးဌာနမှ တာဝန်ရှိသူများ၊ ထားဝယ်ခရိုင် သောက်ရေသန့် လုပ်ငန်းရှင်များ တက်ရောက်ဆွေးနွေးခဲ့ကြောင်း သိရှိရပါသည်။

        ဆွေးနွေးပွဲတွင် အစားအသောက်နှင့်ဆေးဝါးကွပ်ကဲရေးဦးစီးဌာနမှ တိုင်းဒေသကြီး ဦးစီးမှူး ဒေါက်တာမေသန်းနိုင်က ကုန်ပစ္စည်းများကို ​ကောင်းမွန်သော ထုတ်လုပ်မှုကျင့်စဉ်ဖြင့် ထုတ်လုပ်ရန် နှင့် ဟောပြောပွဲများလည်း စဉ်ဆက်မပြတ်ပြုလုပ်သင့်ကြောင်း ပြောကြားခဲ့ပြီး စားသုံးသူရေးရာ ဦးစီးဌာန၊ တိုင်းဒေသကြီးဦးစီးမှူး ဦးတင်အောင်ကျော်က ခရိုင်အလိုက် သောက်ရေသန့်အသင်းအဖွဲ့ ဖွဲ့စည်းနိုင်ရန် အသင်းအဖွဲ့ ဖွဲ့ရခြင်း၏ ရည်ရွယ်ချက်၊ အသင်းအဖွဲ့ ဖွဲ့စည်းရာတွင် လိုအပ်သည့် အချက်များ၊ ရရှိလာမည့် အကျိုးကျေးဇူးများအကြောင်းနှင့် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ၏ တာဝန်များ၊ လိုက်နာရမည့်အချက်များအပြင် ကုန်အညွှန်းအမှတ် အသား ဖော်ပြခြင်းများနှင့် ကုန်စည်အမျိုးအစားအလိုက် သတ်မှတ်ချက်များနှင့်အညီ လိုက်နာ ဆောင်ရွက်သွားရန် ဆွေးနွေးပြောကြားခဲ့ပြီး အစားအသောက်နှင့် ဆေးဝါးကွပ်ကဲရေးဦးစီးဌာနမှ တာဝန်ရှိသူများက ကောင်းမွန်သော ထုတ်လုပ်မှုကျင့်စဉ်များအကြောင်း၊ အစားအသောက် ထုတ် လုပ်ခြင်း ထောက်ခံချက် လျှောက်ထားရာတွင် လိုအပ်သောအချက်များနှင့် အမျိုးသားအစား အသောက် ဥပဒေများအကြောင်းကို ဆွေးနွေးပြောကြားခဲ့ကြောင်း သိရှိရပါသည်။

          တက်ရောက်လာသည့် သောက်ရေသန့်လုပ်ငန်းရှင်များမှ ထားဝယ်ခရိုင် သောက်ရေသန့် အသင်းအဖွဲ့ ဖွဲ့စည်းသွားမည်ဖြစ်ပါကြောင်း ပြန်လည်ဆွေးနွေးပြောကြားခဲ့ပြီး နေ့လည် (၁၂:၀၀)တွင် ဆွေးနွေးပွဲကို ရုတ်သိမ်းခဲ့ကြောင်း သိရှိရပါသည်။

စားသုံးသူရေးရာဦးစီးဌာန(တနင်္သာရီတိုင်းဒေသကြီး)

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန ၊ စစ်တွေ ခရိုင်ဦးစီးမှူး  ဦးမောင်လှဝင်းနှင့်ဝန်ထမ်းများသည် ကျေးရွာအုပ်ချုပ်ရေးမှူးပါအဖွဲ့နှင့်(၁၃-၁၂-၂၀၂၁) ရက်နေ့ နံနက်(၀၉:၃၀) နာရီအချိန်တွင် ပုဏ္ဏားကျွန်းမြို့နယ် ကွန်းတောင်ကျေးရွာရှိ “နေကြာပန်း       ဂဏန်းပျော့မွေးမြူရေးကုမ္ပဏီ”သို့ သွားရောက်တွေ့ဆုံကာ ဂဏန်းပျော့မွေးမြူတင်ပို့မှုနှင့်ပတ်သက်၍ ကွင်းဆင်းတွေ့ဆုံဆွေးနွေးမှုများပြုလုပ်ခဲ့ရာ “နေကြာပန်းဂဏန်းပျော့မွေးမြူရေးကုမ္ပဏီ” အနေဖြင့် ပြည်ပနိုင်ငံ များသို့ ဂဏန်းပျော့တင်ပို့ခြင်း အား  ၂၀၁၈ ခုနှစ် မတ်လမှစ၍ ဆောင်ရွက်လျက်ရှိကြောင်း ကုန်ကြမ်းများအား ရခိုင်ပြည်နယ်မြောက်ပိုင်း (၁၀)မြို့နယ်မှ ကိုယ်စားလှယ်များက လာရောက်ရောင်းချသည့် (၁လသား၊ ၂လသား)ဂဏန်းအခွံမာ (အဖိုဦးစားပေး )(၅၀/၆၀ ) ဂရမ် အလေးချိန်ရှိ ဂဏန်း ငယ်များအားဝယ်ယူကာ ဂဏန်းတစ်လုံးချင်းစီ လှောင်အိမ်ငယ်(၆)လုံးတွဲ (၁၇၀’)ပေ အရှည် ၊ ဖောင် တစ်ဖက်၃၀ ၊ ပေါင်း(၆၀)ဖောင်ဖွဲ့ မွေးမြူလျှက်ရှိကြောင်း ဂဏန်းတစ်ကန်စီတွင် ဂဏန်းကောင်‌ရေ (၈၀၀၀၀) ခန့် မွေးမြူပြီး ဂဏန်းမွေးမြူကန် (၈)ကန်နှင့် ရေဖြည့်အရံကန် (၄)ကန် ထားရှိလျှက် ကန်တစ်ကန်၏ ဧရိယာ(၃.၂)ဧကခန့်ရှိပြီး ၃လ သားအရွယ် ဂဏန်းအနှေး(အခွံပျော့)များအား နေ့စဉ် နေ့ဆိုင်း/ ညဆိုင်းခွဲ၍ ကောက်ယူနေကြကြောင်း သိရှိခဲ့ရပါသည်။

        ဆက်လက်၍ ဂဏန်းအစာအနေဖြင့် ငါးသေး တစ်နေ့ပိဿာ(၄၀၀၀)ခန့် တစ်ပိဿာလျှင် ၈၀၀ ကျပ်မှ ၁၀၀၀ ကျပ်ထိ ပေးချေကာ နေ့စဉ်တစ်ကြိမ်စီကျွေး၍  ဒီ‌ရေအသွင်း/အထုတ်ပြုလုပ်ကြောင်း (၃)လသား ဂဏန်းပျော့ (အလေးချိန် ၁၀၀/၁၂၀ ဂရမ်)များအား ဂဏန်းမွေးမြူကန်မှ ရွေးထုတ်ကာ အောက်ဆီဂျင်ပေး ရေချို သန့်စင်ကန်သို့ ရွှေ့ပြောင်းပေးပြီး ပြုပြင်မွမ်းမံခန်း(Processing Room) သို့ ပို့ဆောင်ကာ ကလိုရင်း ပိုးသတ်ဆေးရည်စပ် ရေသန့်ဖြင့်သန့်စင်ကာ ပလပ်စတစ်ပျော့အိတ်ငယ်များနှင့် တစ်လုံးချင်း ထုပ်ပိုးပြီး (၂၈) ကီလိုဆန့် ဖော့ဘူးများတွင်ထည့်ကာ ၁၈ ဒီဂရီစင်တီဂရိတ်ရှိ အအေးခန်း (Cold Store) တွင် စုပေါင်းသိုလှောင်ထားရှိပြီး (၇/၈)တန်ဆန့် အအေးခန်းကားများဖြင့် ပျှမ်းမျှတစ်လလျှင် (၅)စီး နှုန်းခန့် (ကားခ ဂဏန်းတစ်တန်လျှင် ၁၀၀၀၀ိ/-ကျပ်နှုန်း) ရန်ကုန်မြို့ ဂဏန်းပျော့အဝယ်ဒိုင် သို့ တင်ပို့ကြောင်း   ဥရောပနိုင်ငံများနှင့် အမေရိကန်နိုင်ငံသို့ အများဆုံးဖြန့်ချီတင်ပို့ကြခြင်းဖြစ်ပြီး  ဂဏန်းအခွံမာဝယ်ယူစရိတ် (1Kg) လျှင် ဈေးနှုန်း အတက်အကျ (၁၅၀၀ကျပ်မှ ၃၀၀၀ကျပ် ထိ) ပေးဝယ်ရပြီး ရန်ကုန်ဒိုင်ရောက် ဂဏန်းပျော့ (1Kg) လျှင် ဒေါ်လာငွေ အတက်အကျ မြန်မာငွေ (၈၀၀၀ ကျပ်မှ ၁၂၀၀၀ကျပ်)ထိ ရရှိကာ ဂဏန်းပျော့ (၁)တန်မှ ကုန်ကျစရိတ်များအား နုတ်ပယ်လျှင် အမြတ်ကျန် ငွေ(၇/၈)သိန်းခန့် ရရှိသဖြင့် ဂဏန်းတင်ပို့လုပ်ကိုင်သူအနေဖြင့် အဆင်ပြေတွက်ခြေကိုက်ကြောင်း၊ မြို့နယ်များမှ လာရောက်လုပ်ကိုင်သော လုပ်သား(၄၆၀)ဦးမှာ တစ်ဦးလျှင် လုပ်သားလစာ (စားစရိတ်ငြိမ်း) အနိမ့်ဆုံး ၁လ ၁၅၀၀၀၀ ကျပ် မှ အမြင့်ဆုံး ၃၀၀၀၀၀ ကျပ်ထိရရှိကာ အလုပ်အကိုင် အခွင့်အလမ်းများရရှိပြီး မိသားစု စားဝတ်နေရေး အဆင်ပြေလျှက်ရှိပါသည်။

       သို့ဖြစ်ပါ၍ ရခိုင်ပြည်နယ်သည် ငါး၊ ပုစွန်၊ ဂဏန်း မွေးမြူ‌ရေးလုပ်ကိုင်ရန် ရေမြေသဘာဝ  ကောင်းမွန်ပြီး မြေလွတ်မြေရိုင်း မြစ်ချောင်းများများပြားခြင်း၊ ရာသီဥတုမျှတခြင်း၊ ကုန်ကြမ်းရရှိမှု လွယ်ကူခြင်း၊ အလုပ်လက်မဲ့များ အလုပ်အကိုင်အခွင့်အလမ်းရရှိကာ ရခိုင်ပြည်နယ်အတွက် အမယ်သစ် (Value added) ပြည်ပပို့ကုန်တိုးမြှင့်လာခြင်းများ ဖြစ်ပေါ်လာကာ နိုင်ငံအကျိုးပြု ၊ ပြည်သူအကျိုးပြု ကုန်ထုတ်လုပ်မှုလုပ်ငန်းများတိုးမြှင့်လာခြင်းတို့ကြောင့် ဂဏန်းပျော့မွေးမြူ တင်ပို့ရောင်းချမှုလုပ်ငန်းအပြင် ငါး၊ ပုစွန် သားပေါက်မွေးမြူရေးလုပ်ငန်းများကိုလည်း လုပ်ကိုင်နိုင်သည့်အခွင့်အလမ်းများ ရရှိနိုင်ပါ၍ ပြည်တွင်းပြည်ပမှ စီးပွား‌ရေးလုပ်ငန်းရှင်များ ၊ ကုမ္ပဏီများ အနေဖြင့် စိတ်ပါဝင်စားစွာ ရခိုင်ပြည်နယ်သို့ လာရောက်ရင်းနှီးမြှုပ်နှံမှုများ လုပ်ကိုင်ဆောင်ရွက်ပါက အကျိုးကျေးဇူးများခံစားနိုင်မည်ဖြစ်ကြောင်း လေ့လာတင်ပြလိုက်ရပါသည်။

စားသုံးသူရေးရာဦးစီးဌာန(ရခိုင်ပြည်နယ်)

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင် ဦးဆောင်၍ ဒု-ခရိုင်ဦးစီးမှူးနှင့် ဝန်ထမ်းများသည် ၂၀၂၁ခုနှစ်၊ ဒီဇင်ဘာလ(၁၂) ရက်နေ့၊ နံနက်(၁၁:၀၀)နာရီအချိန်တွင် ပခုက္ကူမြို့နယ်၊ ကိုင်းကျေးရွာအုပ်စု၊ အင်ပင်ကျေးရွာ ရှိ မြေပဲ၊ နှမ်း စိုက်တောင်သူနှင့် တွေ့ဆုံဆွေးနွေးခဲ့ပါသည်။

          အဆိုပါ စိုက်ပျိုးတောင်သူနှင့် တွေ့ဆုံဆွေးနွေးရာတွင်  ခရိုင်ဦးစီးမှူးမှ  စားသုံးသူရေးရာဦးစီးဌာနသည် စားသုံးသူကာကွယ်ပေးရေးလုပ်ငန်းများကိုသာမက ပြည်တွင်းကုန်သွယ်မှုဖွံ့ဖြိုးရေးကဏ္ဍများကိုလည်း တစ်ဖက်တစ်လမ်းမှ ဖွံ့ဖြိုးတိုးတက်အောင် ဆောင်ရွက်နေကြောင်း၊ ဒေသထွက်ကုန်များကိုလည်း တန်ဘိုးမြှင့်ထုတ်ကုန်များအဖြစ် ထုတ်လုပ်ခြင်းကိုအား ပေးကူညီကြောင်း၊ တောင်သူများထံမှ စိုက်ပျိုးသီးနှံများ၏ အမှန်တကယ် စိုက်ဧက၊ ကုန်ကျ စရိတ်၊ ဝင်ငွေ၊ အကျိုးအမြတ်နှင့် ဓာတ်မြေဩဇာ/ ပိုးသတ်ဆေးဈေးနှုန်းတို့ကိုလည်း ကွင်းဆင်းမေးမြန်းပြီး အထက်ဌာနအဆင့်ဆင့်သို့ တင်ပြပေးလျက်ရှိကြောင်း ရှင်းလင်းပြောကြားပါသည်။

         ထို့နောက် မြေပဲစိုက်တောင်သူများမှ ယခုနှစ် မြေပဲစိုက်ရသည်မှာ အထွက်နှုန်းတိုးကြောင်း၊ မြေပဲနှင့်အတူ ပဲစဉ်းငုံကို သီးညှပ်အဖြစ် စိုက်ပျိုးကြကြောင်း၊ မြေပဲစိုက်ဧက (၅)ဧက စိုက်ရာတွင် မြေပဲ အထွက် တင်း(၁၀၀)ကျော်  ရရှိကြောင်း၊ ထွက်ရှိသည့်မြေပဲများကို ပခုက္ကူမြို့ပေါ်ရှိ ပဲပွဲရုံများထံသို့ရောင်းချကြောင်း၊ မြေပဲဆံ (၁)ပိဿာ ကို (၂၇၀၀)ကျပ် ရရှိပြီး မြေပဲတောင့် (၁)ပိဿာကို (၁၆၂၅)ကျပ် ရရှိကြောင်း၊ ယခုနှစ်မှာ မိုးရွာနှုန်းများ၍ မြေပဲ အထွက်နှုန်းတိုးရခြင်း ဖြစ်ကြောင်း၊ ယခင်နှစ်က မိုးရွာနှုန်းနည်းသောကြောင့်  မြေပဲအထွက် နှုန်းလျော့ကျပြီး အရှုံးပေါ် ခဲ့ကြောင်း၊ ယခုနှစ်မှာမူ မြေပဲတစ်ဧကကုန်ကျစရိတ်ငွေ (၃၅၀,၀၀၀) ကျပ်ခန့် ကုန်ကျပြီး အကျိုးအမြတ်မှာ တစ်ဧကကို(၃၀၀,၀၀၀)ကျပ်ခန့်ရရှိသည်ဟု ခန့်မှန်းရပါကြောင်း၊  ဓါတ်မြေဩဇာ/ ပိုးသတ် ဆေးဈေးနှုန်းများ ထက်ဝက်ခန့်ဈေးတက်နေခြင်း ကိုလည်းထိန်းချုပ်ပေးစေလိုကြောင်း၊ ၎င်းဈေးနှုန်းများ ပုံမှန်ဈေးဖြစ်လျှင် တောင်သူများ ပို၍ အကျိုးအမြတ်ရရှိမည် ဖြစ်ကြောင်း တောင်သူများထံမှ သိရှိခဲ့ရပါသည်။

        ဆက်လက်၍ နှမ်းစိုက်တောင်သူမှ ယခုအချိန်သည် နှမ်းရိတ်သိမ်းပြီး နှမ်းထောင်နေလှန်း သည့် အချိန်ဖြစ်ကြောင်း၊ နှမ်းကို တလင်းပြင်တွင် တစ်ခါလှန်းလျှင် (၄/၅) ရက်ခန့် လှန်းရကြောင်း၊ ပြီးလျှင် နှမ်းခါသည့်အဆင့်ကို လုပ်ဆောင်ရကြောင်း၊ တောင်သူအငှားအလုပ်သမားများမှာ ကျေးရွာ အတွင်း ရှားပါးသောကြောင့် အခြား နှောကုန်း၊ ဒေါင်းစားရွာများမှ ခေါ်ယူရပါကြောင်း၊ လုပ်အားခအနေဖြင့် (၁)ဦးလျှင် (၁)ရက်ကို ၆၀၀၀/- ကျပ်ပေးရပါကြောင်း၊ ယခုအချိန် (တောင်သူလက်ဝယ် ရှိသောအချိန်) နှမ်းနက်(၁)တင်းကို (၇၀၀၀၀)ကျပ်ဈေးရရှိ သည်ဟုကြားသိရကြောင်း၊ တောင်သူ များနှမ်းရောင်းချမည့်အချိန်ရောက်လျှင်  ဈေးမည်မျှပေါက် သည်ကို မသိရသေးကြောင်း၊ ယခင်နှစ်က နှမ်းစိုက်တောင်သူများ ရောင်းသည့်အချိန် တွင် နှမ်း(၁) တင်းကို (၅၀,၀၀၀)ကျပ်ရရှိခဲ့ပါကြောင်း၊ သီးနှံဈေးကွက်များမှာ တောင်သူပေါ်ချိန်တွင် ဈေးရရှိမှု နည်းပြီး တောင်သူတွင် မရှိတော့ဘဲ ကုန်သည်လက်ဝယ်ရောက်မှ ဈေးကောင်းရခြင်းကို ကြုံနေရကြောင်း၊ ထို့ကြောင့်တောင်သူပေါ်ချိန် တွင် သီးနှံများဈေးကောင်းရရှိပြီး ဓာတ်မြေဩဇာဈေးနှုန်းများ ပုံမှန်ဖြစ်လျှင် စိုက်ပျိုးတောင်သူများ မှာ အမှန်တကယ်အကျိုးအမြတ်ရရှိနိုင်မည်ဟု အကြံပြုလိုပါကြောင်း  လေ့လာသိရှိခဲ့ရပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)

ရန်ကုန်၊ ၁၁ - ၁၂ - ၂၀၂၁

          ကုန်သွယ်မှုနှင့် ကုန်စည်စီးဆင်းမှုများမှန်ကန် မြန်ဆန်စေရေးလုပ်ငန်းကော်မတီမှ ဦးဆောင်၍ COVID-19 ရောဂါ စတုတ္ထလှိုင်း ကြိုတင်ကာကွယ်နိုင်ရေး အစီအမံများ ပြုလုပ်ရန် ညှိနှိုင်းအစည်းအဝေးအား (၁၁.၁၂.၂၀၂၁) ရက်နေ့၊ စနေနေ့ (၁၃:၀၀)နာရီအချိန်တွင် Virtual  Meeting စနစ်ဖြင့် ကျင်းပ ပြုလုပ်ခဲ့ရာ သက်ဆိုင်ရာဌာနဆိုင်ရာမှ တာဝန်ရှိသူများ၊ Task Force လုပ်ငန်းအဖွဲ့မှ တာဝန်ရှိသူများ၊ အဖွဲ့ဝင်များ တက်ရောက်ကြပါသည်.

        ညှိနှိုင်းဆွေးနွေးပွဲတွင် ကုန်သွယ်မှုနှင့် ကုန်စည်စီးဆင်းမှုများ မှန်ကန်မြန်ဆန်စေရေးလုပ်ငန်း ကော်မတီ ဥက္ကဌ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးညွန့်အောင်မှ အဖွင့်အမှာစကားပြောကြားခြင်း၊ဗဟိုကော်မတီ တွဲဘက်အတွင်းရေးမှူး ဗိုလ်မှူးချုပ် ရန်နောင်စိုးမှလည်း လိုအပ်သည်များ ဖြည့်စွက်ရှင်းလင်းအကြံပြုပြောကြားခြင်းနှင့် (Task Force) လုပ်ငန်းအဖွဲ့၊ ဥက္ကဌမှ လုပ်ငန်းဆောင်ရွက်ခဲ့မှုအခြေအနေများ ရှင်းလင်းဆွေးနွေးပြီး အဖွဲ့ဝင်များနှင့် တက်ရောက်လာသော ဌာနဆိုင်ရာများမှ တာဝန်ရှိသူများမှ ကြိုတင်ကာကွယ်ရေး အစီအမံနှင့် ပတ်သက်၍ အကြံပြုဆွေးနွေးခဲ့ကြောင်း သိရှိရပါသည်။

စားသုံးသူရေးရာဦးစီးဌာန(ရန်ကုန်တိုင်းဒေသကြီး)