သတင်းနှင့် လှုပ်ရှားမှုများ

        ဧရာဝတီတိုင်းဒေသကြီး ၊စားသုံးသူရေးရာဦးစီးဌာန၊ ဖျာပုံခရိုင်ကျိုက်လတ်မြို့နယ်မှ မြို့နယ်တာဝန်ခံဦးတင်စိန်နှင့် ဝန်ထမ်းတို့သည် (၂၁.၆.၂၀၂၂)ရက်နေ့၊ နံနက်(၁၀:၀၀)နာရီမှ (၁၁:၀၀)နာရီ အချိန်ထိ ကျိုက်လတ်မြို့နယ်၊ အမှတ်(၁)ရပ်ကွက်၊ (၂၈)လမ်းရှိ အောင် စက်မှုလက်မှုလုပ်ငန်းမှ လုပ်ငန်းရှင် ဦးအောင်ခိုင်နှင့် တွေ့ဆုံဆွေးနွေးဆောင်ရွက်ခဲ့ပါသည်။

          ထိုသို့တွေ့ဆုံဆွေးနွေးရာတွင် အောင် စက်မှုလက်မှုလုပ်ငန်းမှ လက်ရှိဆောင်ရွက်နေသော လုပ်ငန်းများမှာ သံဗန်း၊ သံတံခါး၊ ဒလက်ချာလုပ်ငန်းများလုပ်ကိုင်လျက်ရှိပြီး လက်ရှိတွေ့ကြုံရသည့် အခက်အခဲများမှာ ယခုလက်ရှိသံချောင်းဈေးနှုန်းမြှင့်တက်နေခြင်းကြောင့် အရင်းအနှီးများလာပြီး၊ထုတ် လုပ်မှုပါလျော့နည်းလာပါသည်။လက်ရှိသံချောင်းဈေးမှာ တစ်တန်(၁၈)သိန်းခန့်ဝယ်ရပြီး သံတခါးတစ် ခုကုန်ကျစရိတ်မှာ (၆)သိန်း (၅)သောင်းခန့် ကုန်ကျလျက်ရှိပြီး သံတံခါးတစ်ခုပြုလုပ်ရာတွင် သံတံခါးပြီးဆုံးသည့်အထိ (၃)ရက်ခန့်လုပ်ရပြီး၊ အလုပ်သမားတစ်ဦး၏ တစ်နေ့လုပ်ခမှာ(၁၀၀၀၀)ကျပ် ခန့်ပေးရပြီး သံတံခါးပြုလုပ်ပြီးသည့်အထိ အမြတ်ငွေ(၁၅၀၀၀၀)ကျပ်ခန့်ရရှိကြောင်း မေးမြန်းစုံစမ်း သိရှိခဲ့ရပါသည်။

          စက်မှုလက်မှုလုပ်ငန်းရှင်အ‌နေဖြင့် လက်ရှိဆောင်ရွက်နေသည့် အခြေအနေများ၊ ရှေ့ဆက်လက် ဆောင်ရွက်မည့်အခြေအနေများတွေ့ကြုံရသည့်စိန်ခေါ်မှုများအား တွေ့ဆုံဆွေးနွေးမေးမြန်းခဲ့ပြီး အောင် စက်မှုလက်မှုလုပ်ငန်းမှထုတ်လုပ်လျက်ရှိသော သံဗန်း၊ သံတံခါး၊ ချွေလှေ့စက်၊ရေတင်စက်၊ ဒလတ်ချာ၊ လယ်ယာသုံးစက်ကိရိယာအမျိုးမျိုး ထုတ်လုပ်မှု့ ၊ဖြန့်ဖြူးမှု့ ဈေးနှုန်းဈေးကွက်အခြေအနေများအား ဆွေးနွေးမေးမြန်းကာ ပုဂ္ဂလိက ကဏ္ဍဖွံ့ဖြိုးတိုးတက်ရေးကိစ္စများ ဆွေးနွေးဆောင်ရွက်ခဲ့ကြောင်း သိရှိရပါသည်။

DOCA (ဧရာဝတီ)

             စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဦးစီးအရာရှိ ဦးမျိုးဝင်းနိုင်နှင့် ဝန်ထမ်းများသည် ၂၀-၆-၂၀၂၂ ရက်နေ့မှ ၂၄-၆-၂၀၂၂ ရက်နေ့ထိ၊ နံနက် ၁၀:၀၀ နာရီအချိန်တွင် ကရင်ပြည်နယ်၊ ဘားအံမြို့ပေါ်ရှိ အခြေခံပညာမူလတန်းကျောင်းများတွင် မြို့နယ်ကျောင်းကျန်းမာရေးကော်မတီအဖွဲ့ဝင်များနှင့် ပူးပေါင်း၍ အသိပညာပေး ဟောပြောပွဲ ကျင်းပခဲ့ကြောင်း သိရှိရပါ သည်။

                အဆိုပါဟောပြောပွဲများတွင် သက်ဆိုင်ရာမိတ်ဖက်ဌာနများမှ မိမိတို့သက်ဆိုင်သည့်ဌာန အလိုက် အကြောင်းအရာများကို ဆွေးနွေးခဲ့ပြီး စားသုံးသူရေးရာဦးစီးဌာနမှ ဦးစီးအရာရှိ ဦးမျိုးဝင်းနိုင်က  စားသုံးသူကာကွယ်ရေးဆိုင်ရာ သိကောင်းစရာများနှင့် သတ္တမတန်း သင်ရိုးသစ် ဘဝတွက်တာ သင်ရိုးညွှန်းတန်းအခန်း(၄)ပါ စားသုံးသူနှင့်ဆိုင်သော အသိပညာအကြောင်းကို လက်တွေ့သရုပ်ပြ ရှင်းလင်းဆွေးနွေးခဲ့ပြီး အကြီးတန်းစာရေး ဒေါ်စုနွေးသီရိမောင်က ထုတ်ကုန်လုံခြုံစိတ်ချရမှုရှိသော အစားအသောက်နှင့် ကုန်စည်များကို စနစ်တကျ ရွေးချယ်ဝယ်ယူ စားသောက်သုံးစွဲတတ်စေရန်အတွက် ကုန်အညွှန်းအမှတ်အသား အကြောင်းကိုလည်းကောင်း အသီးသီးရှင်းလင်းပြောကြားခဲ့ကာ ဆရာ၊ ဆရာမများ၊ ကျောင်းသား၊ကျောင်းသူများ၊ ကျောင်းသားမိဘများ စုစုပေါင်း ဦးရေ (၇၄၁)ဦး တက်ရောက်ပြီး ဥပဒေစာအုပ်နှင့် လက်ကမ်းစာစောင်များလည်း ဖြန့်ဝေခဲ့ခြင်း၊  စားသုံးသူရေးရာဦးစီးဌာန၊ မြို့နယ်ကျောင်းကျန်းမာရေးကော်မတီအဖွဲ့ဝင်များနှင့် ပူးပေါင်း၍ ကျောင်းဝန်းအတွင်းရှိ ကျောင်းမုန့်ဈေးတန်းတွင် အစားအသောက်များ ဘေးအန္တရာယ်ကင်းရှင်းရေးနှင့် ထုတ်ကုန်များလုံခြုံစိတ်ချရမှုရှိစေရေးတို့ကို စစ်ဆေးခြင်းများ ဆောင်ရွက်ခဲ့ကြသည်။

             စားသုံးသူရေးရာဦးစီးဌာနသည် စားသုံးသူကာကွယ်ရေးဆိုင်ရာ အကြောင်းအရာများကို ဦးတည်နေရာ (၁၂) နေရာတွင် အသိပညာပေးဟောပြောခြင်းများ ဆောင်ရွက်နေသကဲ့သို့ စားသုံးသူရေးရာဦးစီးဌာနပါဝင်သော ကျောင်းကျန်းမာရေးကော်မတီအဖွဲ့ဝင်များမှလည်း ၂၀၂၂-၂၀၂၃ ကျောင်း ဖွင့်ရာသီကာလအတွင်း ဘားအံမြို့ပေါ်ရှိ ကျောင်းများကို စားသုံးသူကာကွယ်ရေးနှင့် ကျောင်းကျန်းမာရေးဆိုင်ရာ အသိပညာပေးဟောပြောခြင်းများ၊ စစ်ဆေးခြင်းများ ဆောင်ရွက်နိုင်ရေးအတွက် ရက်အလိုက် လျာထားချက်များ ချမှတ်စီစဉ်ဆောင်ရွက်ထားလျက်ရှိကြောင်း သိရသည်။

DOCA(ကရင်)

             ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ ဓနုဖြူမြို့နယ်တာဝန်ခံ ဦးဝင်းမင်းစိုးနှင့် ဝန်ထမ်း များသည် (၂၂.၆.၂၀၂၂)ရက်နေ့တွင် ဓနုဖြူမြို့နယ် ဈေးကွက်အတွင်း Gnoအမှတ်တံဆိပ် ကုန်ပစ္စည်များ အား တရားမဝင်ရောင်းချသော ကုန်စည်များ ရှိ/မရှိ ကွင်းဆင်းစစ်ဆေးခဲ့ကြပါသည်။ ဓနုဖြူဈေးကွက်အတွင်းရှိ ဈေးဆိုင်(၁၀)ဆိုင်တွင် ရောင်းချနေသော ကုန်စည်များတွင် Gno အမှတ်တံဆိပ်ဖြင့် ကော်ဖီ(3 In 1) သွားတိုက်ဆေးနှင့် ဖြည့်စွက်အစားအစာများကို တရားမဝင်တင်သွင်းကုန်စည်များရောင်းချခြင်း ရှိ/မရှိ ကွင်းဆင်းစစ်ဆေးခဲ့ရာ တရားမဝင်တင်သွင်းကုန်စည်များ ရောင်းချခြင်းမရှိကြောင်း တွေ့ရှိခဲ့ရပါသည်။

                ဆက်လက်၍ ဓနုဖြူမြို့နယ် တာဝန်ခံဦးဝင်းမင်းစိုးမှ ရောင်းချနေသော ဆိုင်ရှင်များအား စားသုံးသူကာကွယ်ပေးရေးဥပဒေများအကြောင်း၊ ကုန်အညွှန်းအမှတ်အသားများအကြောင်း၊ လုပ်ငန်းရှင်တို့၏ တာဝန်၊ဝတ္တရားများအကြောင်း စစ်ဆေးရေးမှူးတို့၏ လုပ်ငန်းတာဝန်ဆောင်ရွက်ချက်များ အကြောင်းကို ရှင်းလင်းပြောကြားပြီးနောက် မလေးရှားနိုင်ငံ Gno Excel Industries SDN. BHD မှ အစားအသောက်လူသုံးကုန် ဖြည့်စွက် အစားအစာများကို တစ်ဦးတည်းကိုယ်ပိုင် ကိုယ်စားလှယ်အဖြစ် မှတ်ပုံတင်ပြီးတရားဝင်ရောင်းချလျှက် ကြောင်းနှင့် သက်ဆိုင်ရာဌာနများ၏ ထောက်ခံချက်နှင့် ကုန်အညွှန်း အမှတ်အသားများလည်းကိုက်ညီမှုရှိသောကုန်စည်များဖြစ်ပြီး၊  Gnoအမှတ်တံဆိပ် ကော်ဖီ(3 In 1) သွားတိုက် ဆေးနှင့် ဖြည့်စွက်အစားအစာများကို  ဈေးကွက်အတွင်း ရောင်းချခြင်းမပြုရန် ဆိုင်ရှင်များအား ပြောဆိုဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

           ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်ဦးစီးမှူးရုံး၊ ခရိုင်ဦးစီးမှူး ဦးဇော်လင်းအောင်နှင့် မြို့နယ်ဦးစီးမှူး ဦးလှထွဋ်ဦးတို့သည်(၂၃.၆.၂၀၂၂)ရက်နေ့ နံနက်(၁၀:၀၀) နာရီက မြောင်းမြမြို့နယ် ထောင်ရောင်နေလမ်းရှိ ခရိုင်အသေးစားအလတ်စားစက်မှုလက်မှု လုပ်ငန်းဦးစီးဌာနတွင် ပြုလုပ်သည့် လူသုံးကုန်ထုတ်လုပ်မှုနည်းပညာသင်တန်း (၁/၂၀၂၂) တက်ရောက်နေသော သင်တန်းသူ/သားများအား စားသုံးသူကာကွယ်ရေးအသိပညာပေးဟောပြော ဆွေးနွေးခဲ့ပါသည်။

          ထိုသို့ဟောပြောဆွေးနွေးရာတွင် ခရိုင်ဦးစီးမှူးဦးဇော်လင်းအောင်မှ တက်ရောက်လာကြသောသင်တန်းသူ/သားများအား စားသုံးသူကာကွယ်ရေး အသိပညာပေးဆွေးနွေးခြင်းဆောင်ရွက်ခဲ့ပြီး၊ မြို့နယ်ဦးစီးမှူးဦးလှထွဋ်ဦးမှ စားသုံးသူကာကွယ်ရေးဥပဒေ ၂၀၁၉ ပါ ပြဌာန်းချက်များ၊ စားသုံး သူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ် ဒါဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ ၄၁ ပုဒ်မခွဲ(ခ)နှင့်(ဆ)တို့ပါ ကုန်အညွှန်းအ မှတ်အသား ဖော်ပြရာတွင် မြန်မာဘာသာဖြစ်စေ၊ အခြားဘာသာတစ်ခု(သို့)တစ်ခုထက်ပို၍ တွဲလျှက်ဖြစ်စေ၊ ရေးသားဖော်ပြရမည်ဖြစ်ပြီး၊ မိမိတို့ရောင်းချထုတ်လုပ်နေသော ကုန်ပစ္စည်းအမျိုးအစားအလိုက် သတ်မှတ်ထားသည့်ဥပဒေများနှင့်အညီ လိုက်နာဆောင်ရွက်ကြရန် စားသုံးသူ ကာကွယ်ရေးဥပဒေများအား တက်ရောက်လာကြသော သင်တန်းသူ/သားများအား အသေးစိတ်ရှင်းလင်းဆွေးနွေးခဲ့ကြောင်း သိရှိရိပါသည်။

DOCA(ဧရာဝတီ)

          ဧရာဝတီတိုင်း‌‌ဒေသကြီး၊ စားသုံးသူရေးရာဦးစီးဌာန၊ ညောင်တုန်းမြို့နယ်၊ မြို့နယ်ဦးစီးမှူးရုံးမှ ဒေါ်ချိုမီဇင်(ဒု-ဦးစီးမှူး) နှင့် ဝန်ထမ်း များသည် (၂၃.၆.၂၀၂၂) ရက်နေ့  (၁၀:၁၅) မှ (၁၂:၀၀)နာရီအချိန်ထိ မွေးမြူရေးနှင့် ကုသရေးဦးစီးဌာန၊ ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနတို့နှင့် ပူးပေါင်း၍ ညောင်တုန်း မြို့မ အ.ထ.က- စာသင်ကျောင်းတွင် ကျောင်းသား/ ကျောင်းသူ ဆရာ/ ဆရာမ (၁၇၀) ဦးအား စားသုံးသူကာကွယ်ရေး အသိပညာပေးဟောပြောပွဲ ပြုလုပ်ခဲ့ကြပါသည်။ 

         အဆိုပါဟောပြောပွဲတွင် မိတ်ဖက်ဌာနများမှလည်း သက်ဆိုင်ရာ ဌာနများ၏ လုပ်ငန်းဆောင်ရွက်ချက် ၊ စီမံချက်များအကြောင်းကို အသိပညာပေး ဟောပြောခဲ့ကြပြီး၊ စားသုံးသူရေးရာဦးစီးဌာနမှ မြို့နယ်ဦးစီးမှူး ရုံးမှ ဒေါ်ချိုမီဇင်(ဒု-ဦးစီးမှူး) က စားသုံးသူရေးရာဦးစီးဌာန၏ မျှော်မှန်းချက် ရည်မှန်းချက်နှင့်  စားသုံးသူအခွင့်အရေးနှင့် စားသုံးသူများလိုက်နာရမည့် တာဝန်များအကြောင်း၊ စားသုံးသူကိုယ်တိုင်က ကုန်စည်(သို့မဟုတ်) ဝန်ဆောင်မှုကို ရွေးချယ်ဝယ်ယူတက်စေရန်နှင့် လုပ်ငန်းရှင်တို့၏ တာဝန်များ လိုက်နာရမည့် အချက်များနှင့် စားသုံးသူများ ကုန်စည်ကို ရွေးချယ်ဝယ်ယူ အသုံးပြုရာတွင် ကုန်အညွှန်းအမှတ်အသားပါဝင်သော ကုန်စည်များကိုသာ ရွေးချယ် ဝယ်ယူကြရန်နှင့်  ကုန်စည်ဝယ်ယူအသုံးပြုရာတွင် နစ်နာဆုံးရှုံးမှု ရှိလာပါက နစ်နာဆုံးရှုံးမှုအတွက် စားသုံးသူရေးရာဦးစီးဌာနသို့ တိုင်ကြားနိုင်ကြောင်း၊ဟောပြေဆွေးနွေးခဲ့ပြီး ဟောပြောပွဲမှ ကျောင်းသား/သူများက သိရှိလိုသည်များကို မေးမြန်းကြရာ အပြန်အလှန် ရှင်းလင်းဖြေကြားခဲ့ကြောင်း သတင်းရရှိပါသည်။

DOCA(ဧရာဝတီ)