သတင်းနှင့် လှုပ်ရှားမှုများ

             ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ပန်းတနော်မြို့နယ် တာဝန်ခံသည် ပန်းတနော်မြို့နယ် တာဝန်ခံရုံး၌ ၂၀၂၂ခုနှစ် ဇွန်လ ၂၁ရက်နေ့ နံနက် (၁၀:၃၀)အချိန်တွင် သင်ဖျာ လုပ်ငန်းရှင်(၂၀)ဦးအား ဖိတ်ကြား၍ စားသုံးသူကာကွယ်ပေးရေးပညာပေး တွေ့ဆုံဆွေးနွေးခဲ့ကြပါသည်။

          ထိုသို့ တွေ့ဆုံရာတွင် ပန်းတနော်မြို့နယ်တာဝန်ခံ ဒေါ်သင်းသင်းစိုးက စားသုံးသူကာကွယ်ရေးဥပဒေပါ ဥပဒေများအကြောင်းကို ရှင်လင်းဆွေးနွေးပြီး၊ စီးပွားရေးလုပ်ငန်းရှင်တို့၏ တာဝန်များ၊ အခန်း(၁၁)ပါ ကုန်စည်နှင့် စပ်လျဉ်း၍ အာမခံချက်ပေးခြင်း၊ အခန်း(၁၂) ကုန်စည်နှင့် စပ်လျဉ်း၍ အာမခံထားမှု အပေါ် စားသုံးသူ၏ တောင်းဆိုနိုင်သည့် အခွင့်အရေး အခန်း(၁၇) ပါ ကုန်စည် သို့မဟုတ် ဝန်ဆောင်မှုအပေါ် တာဝန်ရှိမှု စပ်လျဉ်းသည် ကိစ္စရပ်များအကြောင်း ရှင်းလင်းဆွေးနွေးပြောကြားခဲ့ပါသည်။ ဆက်လက်၍ လုပ်ငန်းရှင်များကလည်း သိရှိလိုသည်များ မေးမြန်း၍ အပြန်အလှန် ဆွေးနွေးခဲ့ကြကြောင်း သတင်းရရှိပါသည်။

DOCA(ဧရာဝတီ)

            စားသုံးသူရေးရာဦးစီးဌာန၊ ဧရာဝတီတိုင်း‌ဒေသကြီး၊ မအူပင်ခရိုင်၊ ညောင်တုန်းမြို့နယ်ဦးစီးမှူး ဦးအောင်လွင်နှင့် ဝန်ထမ်းများသည် ၂၁.၆.၂၀၂၂ နေ့ (၁၀:၃၀)အချိန် တွင် ညောင်တုန်းမြို့နယ် နတ်ပေး အ.ထ.က ကျောင်းတွင် စားသုံးသူကာကွယ်ပေးရေး အသိပညာပေး ဟောပြောပွဲကို ကျင်းပပြုလုပ်ခဲ့ပါသည်။

          အဆိုပါအခမ်းအနားတွင် ကျောင်းအုပ်ဆရာမကြီးမှ အဖွင့်အမှာစကား ပြောကြားရာ၌ တက်‌ရောက်သူကျောင်းသားများအနေဖြင့် စားသုံးသူများလိုက်နာသင့် အချက်များကို သိရှိရန်လိုအပ်ကြောင်း၊ စားသုံးသူများ၏ အခွင့်အရေး၊ လိုက်နာရမည့် အချက်များကို သေချာစွာ လေ့လာမှတ်သားထားကြရန် အလေးပေးပြောကြားခဲ့ပြီး စားသုံးသူရေးရာဦးစီးဌာန ညောင်တုန်းမြို့နယ် ဦးစီးမှူး ဦးအောင်လွင်က စားသုံးသူကာကွယ်ရေးဥပဒေအကြောင်း၊ ဌာန၏ ရည်ရွယ်ချက်၊ မျှော်မှန်းချက်များ လုပ်ငန်းရှင်များ လေးစားလိုက်နာရမည့်အချက်များ၊ ကုန်အညွှန်းအမှတ်အသားများအကြောင်းနှင့် စားသုံးသူများအနေဖြင့် ကုန်စည်များကိုဝယ်ယူရာတွင် စိတ်ကျေနပ်မှု မရှိခဲ့လျှင် စားသုံးသူသတင်းပြန်ကြားရေးနှင့် တိုက်ကြားမှု လက်ခံဆောင်ရွက်ရေးစင်တာသို့ တိုင်ကြားနိုင်ကြောင်းတို့ကို အကျယ်တဝင့် ဟောပြောဆွေးနွေးခဲ့ပါသည်။ ဆက်လက်၍ ကျောင်းသား/သူများကလည်း သိရှိလိုသည်များမေးမြန်ကြ၍ မြို့နယ်ဦးစီးမှူးမှ ပြန်လည်ဖြေကြား ဆွေးနွေးခဲ့ပြီး ကျောင်းအုပ်ဆရာမကြီး က နိဂုံးချုပ် အမှာစကားပြောကြားခဲ့ပါသည်။ အဆိုပါ အသိပညာပေးဟောပြောပွဲသို့ ကျောင်းသား/ကျောင်းသူ (၂၅၀) ဦးတက်‌ရောက်ခဲ့ကြောင်း သတင်းရရှိပါသည်။

DOCA(ဧရာဝတီ)

     ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်အတွင်းရှိ စိုက်ပျိုးမြေများတွင် သီးနှံစိုက်ပျိုး ထုတ်လုပ်မှု တိုးတက်မြင့်မားရေးအတွက် တူးချောင်းကျေးရွာအုပ်စုနှင့် ညောင်ဝိုင်းကျေးရွာအုပ်စုတို့ရှိ တောင်သူများ(၅၅)ဦးနှင့် တွေ့ဆုံဆွေးနွေးခြင်းကို ၂၀၂၂ခုနှစ် ဇွန်လ ၂၂ရက်နေ့ နံနက် ၁၀နာရီ အချိန်က မြို့နယ်မြန်မာ့လယ်ယာဖွံ့ဖြိုးရေးဘဏ်ခွဲရုံး ခန်းမ၌ပြုလုပ်ခဲ့သည်။

    ထိုသို့တွေ့ဆုံရာတွင် မြို့နယ်သီးနှံစိုက်ပျိုးထုတ်လုပ်မှု တိုးတက်မြင့်မားရေး​ကြီးကြပ်မှု ကော်မတီ ဥက္ကဋ္ဌဦးကျော်စိုးက နွေစပါး၊ မိုးစပါး၊ ဆောင်းသီးနှံ စိုက်ဧကများလျာထားချက်ပြည့်မီအောင် စိုက်ပျိုးနိုင်ရေးစသည့် အကြောင်းအရာများကို ဆွေးနွေးပြောကြားခဲ့ပြီး မြို့နယ်စာသုံးသူရေးရာဦးစီးဌာနမှ ဒုတိယ ဦးစီးမှူးဒေါ်ချိုမီဇင်က ဆီထွက်သီးနှံ နေကြာ စိုက်ပျိုးခြင်းသည် ပြည်တွင်းစားသုံးဆီဖူလုံ၍ ပြည်ပမှ စားအုန်းဆီတင်သွင်းမှုလျှော့ချနိုင်‌ရေး၊ ပြည်တွင်းစားသုံဆီဈေးကွက် ပိုမိုရရှိစေ‌ရေး၊ ဆီစက်လုပ်ငန်းများ ပိုမိုဖွံ့ဖြိုးတိုးတက်လာစေရေး၊ နိုင်ငံခြားငွေအသုံးပြုမှုလျော့နည်းသက်သာလာစေရေး စသည့် ရည်ရွယ်ချက်များနှင့် တောင်သူများ အသုံးပြုလျက်ရှိသည့် စိုက်ပျိုးရေးဆေးများနှင့် မျိုးစေ့များ ဝယ်ယူသုံးစွဲရာတွင် စားသုံးသူကာကွယ်ရေးအသိပညာပေး အကြောင်းအရာများ‌ကို ဆွေးနွေးပြောကြား၍ စိုက်ပျိုးရေးဦးစီးဌာနမှ တာဝန်ရှိသူများက စိုက်ပျိုးနည်းစနစ်မှန်ကန်ရေးနှင့်မျိုးကောင်းမျိုးသန့်များစိုက်ပျိုးနိုင်ရေး၊ နည်းစနစ်မှန် ကန်စွာမြေပြုပြင်ပေးခြင်း၊ စားသုံးဆီဖူလုံရေးနှင့် ဝင်ငွေတိုးစေရန်ဆောင်းသီးနှံ နေကြာအား သီးထပ်သီး ညှပ်လျာထားချက်အတိုင်း စိုက်ပျိုးကြရေးဆွေးနွေးမှာကြားပြီး တက်ရောက်လာကြသည့် တောင်သူများမှ သိရှိလိုသည်များကို ပြန်လည်ဆွေးနွေးဖြေကြားခဲ့ကြောင်း သိရသည်။

DOCA(ဧရာဝတီ)

           စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ပုသိမ်ခရိုင်၊ ကျုံပျော်မြို့နယ် တာဝန်ခံရုံးမှ မြို့နယ်တာဝန်ခံဒေါ်ခင်မေဝင်းနှင့် ဝန်ထမ်းများသည် စားသုံးသူဘေးအန္တရာယ် ကင်းရှင်းစွာ သုံးစွဲနိုင် ရေးရည်ရွယ်၍ ဇွန်လ(၂၁)ရက် နေ့လည် (၃) နာရီအချိန်တွင် ကျုံပျော် မြို့နယ်၊ အထောင်မြို့၊ သပြေငူ ကျေးရွာတွင် အသစ်ထုတ်လုပ်လျှက်ရှိသော Good Health သောက်ရေသန့်လုပ်ငန်းသို့ သွားရောက်၍ ဈေးကွက် စောင့်ကြည့်စစ်ဆေးခဲ့ပါသည်။

          ထိုသို့စစ်ဆေးရာတွင် ကျုံပျော်မြို့နယ် တာဝန်ခံက မည်သည့်စီးပွားရေးလုပ်ငန်းရှင်မဆို ကုန်စည်များပေါ်တွင် ကုန်အညွှန်းအမှတ်အသား ပြည့်စုံစွာဖော်ပြရန်နှင့် (၂၀၁၉) စားသုံးသူကာကွယ်ရေးဥပဒေပါ ပြဌာန်းချက်များနှင့်အညီ ထုတ်လုပ်ခြင်းနှင့် ရောင်းချခြင်းများပြုလုပ်ကြရန် ကုန်စည်များအား ကုန်အညွှန်းအမှတ်အသား ပြည့်စုံမှုရှိ၊မရှိ စစ်ဆေးပြီး အသိပညာပေးဆောင်ရွက်ခဲ့ကြောင်း သိရှိရပါသည်။

DOCA(ဧရာဝတီ)

            ဧရာဝတီတိုင်းဒေသကြီး၊စားသုံးသူရေးရာဦးစီးဌာန၊ ပုသိမ်ခရိုင် သာပေါင်းမြို့နယ်တာဝန်ခံရုံး၌  (၂၀.၆.၂၀၂၂) ရက်နေ့ နေ့လည် (၁၁)နာရီတွင် သာပေါင်းမြို့နယ်တာဝန်ခံနှင့် ဝန်ထမ်းများသည် ဆန်စက် လုပ်ငန်းရှင်များနှင့် တွေ့ဆုံ၍ ဆွေးနွေးခဲ့ကြောင်း သိရှိရပါသည်။

          ထိုသို့ဆွေးနွေးရာတွင် ဆန်စက်လုပ်ငန်းရှင်များ၏ အခက်အခဲများ၊ ထုတ်လုပ်နိုင်မှု အခြေအနေ၊ ဈေးနှုန်းဈေးကွက်၊ စိုက်ပျိုးမှုနှင့်ပတ်သက်သော အကြောင်းအရာများကို မေးမြန်း ဆွေးနွေးခဲ့ပြီး ဆန်စက်လုပ်ငန်းရှင်များဘက်မှ တွေ့ကြုံနေရသော အခက်အခဲများ၊ ဆန်ထွက်ရှိမှုနှုန်း၊ ဆန်စပါး ဈေးနှုန်းတို့ကို အပြန်အလှန်ဆွေးနွေးခဲ့ကြပြီး အကြံပေးညှိနှိုင်းခဲ့ကြကြောင်း သတင်းရရှိပါသည်။

DOCA(ဧရာဝတီ)