သတင်းနှင့် လှုပ်ရှားမှုများ

             ၁၁.၁၂.၂၀၂၄ ရက်နေ့ နံနက်(၀၈:၅၀)နာရီအချိန်၌ မြောက်ပိုင်းခရိုင်ဦးစီးမှူးရုံးမှ ဝန်ထမ်းများသည် ထန်းတပင်မြို့နယ်၊ လှိုင်သာယာ(အရှေ့ပိုင်း)နှင့် (အနောက်ပိုင်း)မြို့နယ်များတွင် ဆန်ရောင်းချခြင်းနှင့်ပတ်သက်၍ ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ကြောင်းသိရသည်။

           ထိုသို့ဆောင်ရွက်ခဲ့ရာတွင် ထန်းတပင်မြို့နယ် မြို့မဈေး၊ လှိုင်သာယာ(အရှေ့ပိုင်း) မြို့နယ် အမှတ်(၅)ဈေးနှင့် လှိုင်သာယာ(အနောက်ပိုင်း)မြို့နယ် အမှတ်(၂၀)ဈေးများရှိ ဈေးတာဝန်ခံများ ပူးပေါင်းပါဝင်လျက် ဈေးအတွင်းရောင်းချနေသော ဆန်ဆိုင်များအားလုံးတို့တွင် ရက်(၉၀)၊ ပေါ်ဆန်း မွှေး(ရွှေဘို/ဧရာဝတီ)၊ ဇီယာ၊ အညာသား၊ ကျားပျံနှင့်ဧည့်မထ စသည့်ဆန်များ ရောင်းချလျက်ရှိပြီး ဆန်အားလုံးကိုလည်း သတ်မှတ်ဈေးများအတိုင်း ရောင်းချလျက်ရှိကြောင်း ဆန်များကို ဈေးနှုန်းအဆမတန်ရောင်းချမှုမရှိစေရေးနှင့် ရောင်းချခြင်း တွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူခြင်းခံရမည်ဖြစ်ကြောင်း အသိပေးပြောကြားခဲ့ကြောင်း သိရှိရပါသည်။

DOCA(ရန်ကုန်)

     ၂၀၂၄ ခုနှစ် ၊ ဒီဇင်ဘာလ ၁၂ ရက်နေ့၊   ညနေ(၁၅း၀၀) နာရီအချိန်တွင် စားသုံးသူရေးရာဦးစီးဌာန၊ တနင်္သာရီတိုင်းဒေသကြီး၊ ထားဝယ်မြို့မှ စစ်ဆေးရေးအရာရှိနှင့်ဝန်ထမ်းများသည် မိတ်ဖက်ဌာနများဖြစ်သည့် အထွေထွေအုပ်ချုပ်ရေးဦးစီးဌာန၊ ဗဟိုစာရင်းအင်းအဖွဲ့၊ စည်ပင်သာယာရေးအဖွဲ့တို့နှင့်အတူ ထားဝယ်မြို့ပေါ်ရှိ အလှကုန်အရောင်းဆိုင်များအား စျေးကွက်စောင့်ကြည့်စစ်ဆေးခြင်း ဆောင်ရွက်ခဲ့သည်။

    အဆိုပါ စျေးကွက်စောင့်ကြည့်စစ်ဆေးရာတွင် သုံးစွဲသူပြည်သူများ‌ ဘေးအန္တရာယ်ကင်းရှင်းစွာ ဝယ်ယူသုံးစွဲနိုင်စေရေးအတွက်စျေးကွက်အတွင်း မြန်မာဘာသာနှင့်အခြားဘာသာတစ်ခုခုနှင့်ဖြစ်စေ တွဲလျက်ဖော်ပြထားသော ကုန်အညွှန်းအမှတ်အသား ပြည့်စုံမှန်ကန်စွာပါရှိသည့်အလှကုန်ပစ္စည်းများ ရောင်းချနေခြင်း၊ အွန်လိုင်းစနစ်ဖြင့်‌ရောင်းချခြင်းနှင့် ပတ်သက်၍ အွန်လိုင်းလိုင်စင်လျှောက်ထားခြင်း ကိစ္စရပ်များအကြောင်း၊ သက်ဆိုင်ရာဌာနများမှ တားမြစ်ထားသောအလှကုန်ပစ္စည်းများ‌ရောင်းချခြင်းနှင့် တရားမဝင်တင်သွင်းလာ‌သော အလှကုန်ပစ္စည်းများ ရောင်းချခြင်းများ ရှိ/မရှိစစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

DOCA(တနင်္သာရီ)

             ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၌ ဓာတ်မြေဩဇာအရောင်းဆိုင်များသို့ ဓာတ်မြေဩဇာဖြန့်ဖြူးရောင်းချနေမှု အခြေအနေအား ဒီဇင်ဘာလ(၁၀)ရက်နေ့၊ နံနက်(၁၀း၃၀) အချိန်တွင် ပူးပေါင်းအဖွဲ့ဖြင့် ဈေးကွက်စောင့်ကြည့်ကွင်းဆင်းစစ်ဆေးခဲ့ကြောင်း သိရသည်။

            ထိုသို့ဈေးကွက်စောင့်ကြည့်ကွင်းဆင်းစစ်ဆေးခဲ့ရာတွင် ကော့မှူးမြို့နယ် အထွေထွေအုပ်ချုပ်ရေးဦးစီးဌာန မြို့နယ်အုပ်ချုပ်ရေးမှူး ဦးမျိုးမင်းဦးဆောင်သော မြို့နယ်စီမံအုပ်ချုပ်ရေးအဖွဲ့ အဖွဲ့ဝင်(၂) ဦးမြင့်ဦး၊ စိုက်ပျိုးရေးဦးစီးဌာနမှ မြို့နယ်ဦးစီးမှူး ဦးသက်နိုင်၊ လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာနမှ မြို့နယ်ဦးစီးမှူး ဦးစိုးသက်၊ သမဝါယမဦးစီးဌာနမှ မြို့နယ်ဦးစီးမှူး ဒေါ်စုစုထွေး၊ စားသုံးသူရေးရာဦးစီးဌာနမှ မြို့နယ်တာဝန်ခံ ဦးတင်မင်းတို့ ပူးပေါင်းပါဝင်သောအဖွဲ့ဖြင့် ကော့မှူးမြို့နယ် စည်ပင်လမ်း၊ ပြည်တော်သာရပ်ကွက်၊ မကျီးတန်းရပ်ကွက်ရှိ ဓာတ်မြေဩဇာနှင့် ပိုးသတ်ဆေး ဖြန့်ဖြူးရောင်းချလျက်ရှိသောဆိုင်များသို့ စီးပွားရေးလုပ်ငန်းရှင်များနှင့် တွေ့ဆုံ၍ ဓာတ်မြေဩဇာများအား သတ်မှတ်ရည်ညွှန်းဈေးများအတိုင်းရောင်းချစေရေး ဓာတ်မြေဩဇာများ ဈေးကစားရန် ဈေးနှုန်မြင့်တက်ရန် ရည်ရွယ်ချက်ဖြင့်သိုလှောင်ထားခြင်းများမရှိစေရေး၊ တရားမဝင်သော ဓာတ်မြေဩဇာနှင့် ပိုးသတ်ဆေးများ ဖြန့်ဖြူးရောင်းချမှုမရှိစေရေးတို့အား အသိပညာပေးဆွေးနွေးပြောကြားခဲ့ပြီး ယူရီးယားဓာတ်မြေဩဇာ ဝယ်ယူဖြန့်ဖြူးရောင်းချရေး ဦးဆောင်ကော်မတီအနေဖြင့် ဓာတ်မြေဩဇာ ရည်ညွှန်းဈေးနှုန်းများကို ထုတ်ပြန်ဆောင်ရွက်ပေးလျက်ရှိရာ ဆောင်းသီးနှံ သီးထပ်စီမံကိန်း လျာထားချက်ပြည့်မှီအောင် စိုက်ပျိုးမည့်တောင်သူများ လက်ဝယ်ဈေးနှုန်းမှန်ကန်စွာဖြင့် ဖြန့်ဖြူးရောင်းချပေးကြရန်ပြောကြားခဲ့ပြီး ဈေးကွက်စောင့်ကြည့် ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

    စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံရုံးသည်၂၀၂၄ ခုနှစ်၊ ဒီဇင်ဘာလ ၁၀ ရက်နေ့၊ နံနက် (၀၉:၃၀) အချိန်တွင် ကန့်ဘလူမြို့နယ်တာဝန်ခံ ဦးမျိုးဝင်းသန်းနှင့် ဒေါ်အိမွန်ကျော် အကြီးတန်းစာရေးတို့သည်၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ် ကျန်းမာရေးဦးစီးဌာန၊ ခရိုင်စစစစ၊ မြို့မရဲစခန်းနှင့် မြို့နယ်စည်ပင်သာယာရေးအဖွဲ့တို့မှ ဝန်ထမ်းများနှင့်ပူးပေါင်း၍ ကန့်ဘလူမြို့ “မြို့မဈေး”ရှိ အိမ်သုံးဆေးဝါးအရောင်းဆိုင်များအား ဈေးနှုန်းမြှင့်တင်ရောင်းချခြင်းရှိ/မရှိ ကွင်းဆင်းစစ်ဆေးခဲ့ကြောင်း သိရသည်။

     ထိုသို့ကွင်းဆင်းစစ်ဆေးရာ စားသုံးသူများနေ့စဉ် အသုံးပြုလျက်ရှိသော အိမ်သုံးဆေးဝါးများ ပြတ်လပ်မှုရှိ/မရှိ၊ လုပ်ငန်းရှင်များအနေဖြင့် ဖြစ်သင့်ဖြစ်ထိုက်သည့်ဈေးနှုန်းများဖြင့်ရောင်းချရန်၊ စံမညီဆေးဝါးများနှင့် သက်တမ်းလွန်ဆေးဝါးများရောင်းချမှုမရှိစေရေး ကွင်းဆင်းစစ်ဆေးခဲ့ ကြောင်း၊ လုပ်ငန်းရှင်များအနေဖြင့် ကုန်စည်များကို အွန်လိုင်းစနစ်ဖြင့် ရောင်းချမည်ဆိုပါက မှတ်ပုံတင်လက်မှတ်လျှောက်ထားရရှိပြီးမှသာ ရောင်းချခွင့်ရှိကြောင်း၊ မှတ်ပုံတင်လက်မှတ်မရှိဘဲ ရောင်းချပါကဥပဒေအရ အရေးယူခံရနိုင်ကြောင်း အသိပညာပေးပြောကြားခဲ့ပြီး လက်ကမ်းစာစောင်များဖြန့်ဝေပေးခဲ့ကြောင်း သတင်းရရှိသည်။

DOCA(စစ်ကိုင်း)

              ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်၌ ကုန်ဈေးနှုန်းကြီးမြင့်မှုမရှိစေရေး၊ ကုန်ဈေးနှုန်းတည်ငြိမ်စေရေးတို့အတွက် အခြေခံစားသောက်ကုန်ပစ္စည်းများ ကြက်ဥ၊ ဘဲဥများ ဖြန့်ဖြူးရောင်းချလျှက်ရှိသော သုံးခွမြို့နယ် စည်ပင်သာယာဈေးအတွင်း/ အပြင်ရှိ ကြက်ဥ၊ ဘဲဥဆိုင်များသို့ ဒီဇင်ဘာလ(၁၀)ရက်နေ့၊ နံနက်(၁၀း၃၀)နာရီအချိန်တွင် ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ကြောင်း သိရသည်။

              ထိုသို့ကွင်းဆင်းစစ်ဆေးခဲ့ရောတွင် သုံးခွမြို့နယ် အထွေထွေအုပ်ချုပ်ရေးဦးစီးဌာန၊ မြို့နယ်ရဲတပ်ဖွဲ့၊ စည်ပင်သာယာရေးအဖွဲ့၊ မြို့နယ်စားသုံးသူရေးရာဦးစီးဌာနတို့ ပူးပေါင်းအဖွဲ့သည် စည်ပင်သာယာမြို့မဈေးအတွင်း/ အပြင်ရှိ ကြက်ဥ၊ ဘဲဥများ ဈေးကွက်အတွင်းဖြန့်ဖြူးရောင်းချပေးလျက်ရှိသော ဆိုင်ပိုင်ရှင်စီးပွားရေးလုပ်ငန်းရှင်များအနေဖြင့် ကြက်ဥ၊ ဘဲဥ ဝယ်ယူရရှိမှုအခြေအနေ ဈေးကွက်အတွင်း ပြန်လည်ဖြန့်ဖြူးရောင်းချနေမှုအခြေအနေများအား မေးမြန်းစုံစမ်းခဲ့ရာတွင် မြို့နယ်အတွင်း ကျေးရွာများရှိ ကြက်မွေးမြူးရေးခြံနှင့် ဘဲမွေးမြူရေးခြံများမှလည်းကောင်း နီးစပ်ရာမြို့နယ်များမှ ကြက်ဥ၊ ဘဲဥဒိုင်များမှလည်းကောင်း ဝယ်ယူရရှိခဲ့ပြီး ဈေးကွက်အတွင်း ဖြန့်ဖြူးရောင်းချပေးလျက်ရှိကြောင်း ပြန်လည်ဖြေကြားပေးခဲ့ပြီး လက်ရှိဖြန့်ဖြူးရောင်းချပေးလျက်ရှိသော ကြက်ဥ၊ ဘဲဥ အကြီး၊ အလတ်၊ အသေး ဈေးနှုန်းတို့အား စာရင်းကောက်ယူခဲ့ပြီး ဈေးကွက်အတွင်း ကြက်ဥ၊ ဘဲဥရောင်းချနေမှုအခြေအနေ ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)