သတင်းနှင့် လှုပ်ရှားမှုများ

      စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်တွင်  ဆေးနှင့်ဆေးပစ္စည်းများ ဖြန့်ဖြူးရောင်းချနေမှုအခြေအနေအား ကော့မှူးမြို့နယ်စည်ပင်သာယာမြို့မဈေးနှင့် ရပ်ကွက်များတွင် လက်လီ/ လက်ကားဖြန့်ဖြူးရောင်းချလျက်ရှိသော  ဆေးနှင့်ဆေးပစ္စည်းအရောင်းဆိုင်များအား ၂၀၂၄ခုနှစ်၊ ဇူလိုင်လ(၄)ရက်နေ့၊ နေ့လယ်(၁၁၀၀)နာရီအချိန်တွင် သက်ဆိုင်ရာဌာနမှတာဝန်ရှိသူများ ပူးပေါင်းအဖွဲ့ ဖြင့် သွားရောက်ကွင်းဆင်းစစ်ဆေးခဲ့ကြောင်းသိရသည်။

      ထိုသို့ကွင်းဆင်းစစ်ဆေးခဲ့ရာတွင် မြို့နယ်စည်ပင်သာယာရေးအဖွဲ့မှ ဈေးတာဝန်ခံ၊ မြို့နယ်ကျန်းမာရေးဦးစီးဌာနမှ တာဝန်ရှိသူနှင့် စားသုံးသူရေးရာဦးစီးဌာနမှ မြို့နယ်တာဝန်ခံ ဦးတင်မင်းပူးပေါင်းအဖွဲ့သည် စည်ပင်သာယာမြို့မဈေးရှိ အေးမင်းစိုးဆေးဆိုင်၊ မေခလာဆေးဆိုင်၊ မြို့မရပ်ကွက် ဗိုလ်ချုပ်လမ်းရှိ ကောင်းပြည့်ဆေးဆိုင်၊ မကျီးကန်ရပ်ကွက် ဗိုလ်ချုပ်လမ်းရှိ ဇာနည်ဆေးဆိုင်များသို့သွားရောက်၍ ဆေးဆိုင်ပိုင်ရှင်လုပ်ငန်းရှင်များနှင့်သွားရောက်တွေ့ဆုံကာ စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ညွှန်ကြားချက်အရ ဈေးကွက်အတွင်း ဆေးနှင့်ဆေးပစ္စည်းများပြတ်လပ်မှုရှိ/မရှိနှင့် ဖြစ်သင့်ဖြစ်ထိုက်သည့်ဈေးနှုန်းထက် ဈေးနှုန်းမြှင့်တင်ရောင်းချမှုရှိ/မရှိကို ဆက်စပ်ဌာနများပါဝင်သော အဖွဲ့စုံဖြင့် ရန်ကုန်တိုင်းဒေသကြီးအတွင်းရှိ ဆေးဂိုဒေါင်များနှင့် ဆေးဆိုင်ကြီးများအား အဖွဲ့စုံဖြင့် ကွင်းဆင်းစစ်ဆေးဆောင်ရွက်ရခြင်းဖြစ်ကြောင်း အသိပညာပေးပြောကြားဆွေးနွေးခဲ့ပြီး ဆေးဆိုင်များရှိ ဆေးနှင့်ဆေးပစ္စည်းဈေးနှုန်းများ ဖြန့်ဖြူးရောင်းချနေသည့်အခြေအနေများ၊ ဝယ်ယူရရှိမှုအခြေအနေများ၊ ဆေးနှင့်ဆေးပစ္စည်းလက်ကျန်အခြေအနေများအား စာရင်းပြုစုကာ ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)

       စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၊ အထွေထွေအုပ်ချုပ်ရေးဦးစီးဌာနဦးစီးမှူးရုံး၏ အစည်းအဝေးခန်းမ၌ မြို့နယ်အဆင့်ဌာနဆိုင်ရာ တာဝန်ရှိသူများ၊ ရပ်ကွက်ကျေးရွာများမှ အုပ်ချုပ်ရေးမှူးများ၊ စားရေးများနှင့် လုပ်ငန်းညှိနှိုင်းအစည်းအဝေးကို ၂၀၂၄ခုနှစ်၊ ဇူလိုင်လ(၅)ရက်နေ့၊ နံနက်(၁၀း၀၀)နာရီအချိန်တွင် ကျင်းပခဲ့ကြောင်းသိရသည်။

     အဆိုပါလုပ်ငန်းညှိနှိုင်းအစည်းအဝေးတွင် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးကျော်ဒေဝက ၂၀၂၄ခုနှစ် မိုးစပါးစိုက်ဧကစုစုပေါင်း တစ်မြို့နယ်လုံးအတိုင်းအတာအနေဖြင့် (၈၈၀၉၉)ဧကလျာထားပြီး ထွန်ယက်စိုက်ပျိုးလျက်ရှိရာ ဧက(၃၀၀၀၀)ကျော်အား တိုက်ရိုက်မျိုးစေ့ချကိရိယာ(Seeder)ဖြင့် စိုက်ပျိုးနိုင်ရန်အတွက် ကားလမ်းမဘေးဝဲယာနှင့် ရေတော် မိုးတော်စိုက်ဧကရှိသော ရပ်ကွက်ကျေးရွာများသို့ တိုက်ရိုက်မျိုးစေ့ချကိရိယာ(Seeder)များအပြည့်အဝခွဲဝေးချထားပေးပြီးဖြစ်သဖြင့် တောင်သူများ အချိန်မီသိရှိစိုက်ပျိုးနိုင်ရန် အုပ်ချုပ်ရေးမှူးများအနေဖြင့် နှိုးဆော်တိုက်တွန်းသွားကြရန် (Seeder) ဖြင့် စိုက်ပျိုးပြီး ဧက၊ မြေပြုပြင်မှုအခြေအနေနှင့် မိုးစပါးစိုက်ပျိုးပြီးစီးမှုအခြေအနေအား ဓာတ်ပုံမှတ်တမ်းဖြင့် စာရင်းပြုစုတင်ပြသွားရန်၊ တိုက်ရိုက်မျိုးစေ့ချကိရိယာ(Seeder)များအသုံးပြစိုက်ပျိုးခြင်းကြောင့် ရရှိလာမည့်အကျိုးကျေးဇူးများအား တောင်သူများသိရှိနိုင်အောင် အသိပညာပေးခြင်း၊ ဓာတ်မြေဩဇာစနစ်တကျအသုံးပြခြင်းကြောင့် အသိပညာပေးဆိုင်းဘုတ်နှင့် လက်ကမ်းစာစောင်များဖြန့်ဝေခြင်းလုပ်ငန်းအား ကျေးရွာများအရောက် သက်ဆိုင်ရာဌာနများနှင့် ရပ်ကျေးစိုက်ကြပ်အဖွဲ့များ ပူးပေါင်းဆောင်ရွက်သွားကြရန်၊ လယ်ယာမြေအခြားနည်းအသုံးပြုမှုခွင့်ပြုချက်မရှိဘဲ အခြားနည်းအသုံးပြုနေခြင်းများကိုသိရှိပါက မြို့နယ်စီမံအုပ်ချုပ်ရေးအဖွဲ့သို့ သတင်းပို့တင်ပြကြရန် မိုးရာသီတွင် ရာသီတုပ်ကွေး၊ ဝမ်းပျက်ဝမ်းလျော၊ သွေးလွန်တုပ်ကွေးကာကွယ်ရေးတို့အတွက် ရပ်ကွက်/ကျေးရွာအုပ်ချုပ်ရေးမှူးများအနေဖြင့် မိမိတို့‌ကျေးရွာ/ ရပ်ကွက်ရှိ စာသင်ကျောင်းများအား စုပေါင်းသန့်ရှင်းရေးလုပ်ငန်းများ အပတ်စဉ်ဆောင်ရွက်သွားကြရန် ပြောကြားခဲ့ကြောင်းသိရသည်။

       ဆက်လက်၍ အစည်းအဝေးသို့ တက်ရောက်လာသော ဌာနဆိုင်ရာတာဝန်ရှိသူများနှင့် ရပ်ကွက်၊ ကျေးရွာအုပ်ချုပ်ရေးမှူး၊ စာရေးများက သက်ဆိုင်ရာဌာနများ၊ အုပ်ချုပ်ရေးမှူးများက မိုးစပါးစိုက်ပျိုးမှုနှင့်အခြားပူးပေါင်းဆောင်ရွက်နေသည့် လုပ်ငန်းများအားဆွေးနွေးခဲ့ကြောင်းသိရှိရပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ မော်လမြိုင်ခရိုင်ဦးစီးမှူး၊ ကျိုက်မရောမြို့နယ်တာဝန်ခံနှင့် ဝန်ထမ်းများသည် ၈.၇.၂၀၂၄ ရက်နေ့တွင် ကျိုက်မရောမြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့နှင့် ပူးပေါင်း၍ ကျိုက်မရောမြို့နယ်၊ ရှင်စောပုရပ်ကွက် (၂)၊ အခြေခံပညာအထက်တန်းကျောင်းခွဲ၌ စားသုံးသူကာကွယ်ရေးဆိုင်ရာအသိပညာပေး ဟောပြောဆွေးနွေးပွဲ ကျင်းပပြုလုပ်ခဲ့ပါသည်။  

     အဆိုပါဆွေးနွေးပွဲတွင် စားသုံးသူရေးရာဦးစီးဌာန၊ မော်လမြိုင်ခရိုင်ဦးစီးမှူး ဒေါ်ဝါဝါမြိုင်က ဦးစီးဌာန၏ မျှော်မှန်းချက်၊ ရည်မှန်းချက်တာဝန်များ၊ စားသုံးသူကာကွယ်ရေး ဥပဒေပါပြဌာန်းချက်ဖြစ်သည့် စားသုံးသူအခွင့်အရေးနှင့် တာဝန်များ၊ ကုန်အညွှန်းအမှတ်အသားနှင့် ပတ်သက်သည့်အချက်များ၊ ကုန်စည်နှင့်ဝန်ဆောင်မှုများအား ရွေးချယ်ဝယ်ယူရာ တွင် သတိပြုရမည့်အချက်များ၊ စားသုံးသူထိခိုက်နစ်နာဆုံးရှုံးမှုရှိလာပါက စားသုံးသူရေးရာဦးစီးဌာနသို့ လူကိုယ်တိုင် သို့မဟုတ် ဖုန်းဖြင့်ဖြစ်စေ၊ www.doca.gov.mm website မှ ဖြစ်စေ၊ DOCA Myanmar Mobile Application ဖြင့် ဖြစ်စေ၊ Consumer Call Center 1535 ကို ခေါ်ဆို၍ဖြစ်စေ တိုင်ကြားနိုင်ကြောင်းနှင့်  တိုင်ကြားမှုများအပေါ်ဖြေရှင်း ဆောင်ရွက်ပေးခဲ့သည့် အခြေအနေများကို အကျယ်တဝင့်ဆွေးနွေးခဲ့ကြောင်း သိရှိရပါသည်။

DOCA(မွန်)

    ၉.၇.၂၀၂၄ ရက်နေ့တွင် စားသုံးသူရေးရာဦးစီးဌာန၊ သံဖြူဇရပ်မြို့နယ်တာဝန်ခံနှင့် ဝန်ထမ်းများသည် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့ တို့နှင့်ပူးပေါင်း၍ သံဖြူဇရပ်မြို့နယ်၊ မြို့မဈေး၌ အသင့်စားမုန်အမျိုးမျိုးအား ကုန်အညွှန်း အမှတ်အသားပြည့်စုံစွာ ဖော်ပြထားခြင်း ရှိ/မရှိကို ဈေးကွက်စောင့်ကြည့် စစ်ဆေးခဲ့သည်။

     ထိုသို့ ဈေးကွက်စောင့်ကြည့်စစ်ဆေးခဲ့ရာ အသင့်စားမုန့်အမျိုးမျိုးတို့တွင် ကုန်စည် အမျိုးအစားအလိုက် သတ်မှတ်ချက်များနှင့် မြန်မာဘာသာဖြင့် ပြည့်စုံစွာဖော်ပြရမည့် ကုန်စည်၏ အမျိုးအမည်၊ အရွယ်အစား၊ အရေအတွက် အသားတင်ပမာဏ၊ ထားသို သိမ်းဆည်းမှုအညွှန်းနှင့် ဓာတ်မတည့်ကြောင်း ဖော်ပြချက်တို့ကို စားသုံးသူကာကွယ်ရေး ဥပဒေနှင့်အညီ ကုန်အညွှန်းအမှတ်အသား ဖော်ပြထားခြင်း ရှိ/မရှိ ဈေးကွက် စောင့်ကြည့်စစ်ဆေးခဲ့ရာ ကုန်အညွှန်းအမှတ်အသား ပြည့်စုံစွာ ဖော်ပြထားရှိသည်ကို စစ်ဆေးတွေ့ရှိရ‌ကြောင်း သိရှိရပါသည်။

DOCA(မွန်)

     ၉.၇.၂၀၂၄ ရက်နေ့တွင် စားသုံးသူရေးရာဦးစီးဌာန၊ သံဖြူဇရပ်မြို့နယ်တာဝန်ခံသည် စက်စဲကျေးရွာရှိ ရွှေငါးအမှတ်တံဆိပ် သဘာဝမြေဩဇာထုတ်လုပ်သည့် လုပ်ငန်းရှင်နှင့် တွေ့ဆုံဆွေးနွေးခဲ့သည်။

     ထိုသို့ တွေ့ဆုံဆွေးနွေးရာတွင် သံဖြူဇရပ်မြို့နယ်တာဝန်ခံက သဘာဝမြေဩဇာ ထုတ်လုပ်မှု၊ ကုန်ကြမ်းပါဝင်မှု၊ ဖြန့်ဖြူးမှု၊ လုပ်သားအင်အားနှင့်စပ်လျဉ်း၍ ဆွေးနွေးမေးမြန်း ရာလုပ်ငန်းရှင်က ကုန်ကြမ်းအနေဖြင့် နွားချေး၊ မြေဆွေး၊ ငါးမှုန့်တို့ကို သမအောင်ရောစပ်၍ ထုတ်လုပ်ကြောင်း၊ ယခင်က တစ်နေ့လျှင်အိတ်ရေ (၅၀-၆၀) ခန့်ထုတ်လုပ်ခဲ့သော်လည်း ယခုအခါ လမ်းပန်းဆက်သွယ်ရေးအခြေအနေ၊ ဈေးကွက်အခြေအနေတို့ကြောင့် တစ်နေ့လျှင် အိတ်ရေ (၂၀)ခန့်သာ ထုတ်လုပ်ကြောင်း၊ ဖြန့်ဖြူးမှုအနေဖြင့် ယခင်က ရေး၊ ထားဝယ်၊ ပဲခူး၊ သာယာဝတီသို့ တင်ပို့ရောင်းချကြောင်း၊ ယခုအခါဒေသအတွင်း၌သာ ဖြန့်ဖြူးရောင်းချကြောင်း၊ ဈေးနှုန်းအနေဖြင့် တစ်အိတ်လျှင် (၁၈၀၀၀) ကျပ်ဖြင့် ရောင်းချကြောင်း၊ အလုပ်အကိုင် အခွင့်အလမ်းဖန်တီးပေးမှုအနေဖြင့် လုပ်သား (၆) ဦးအား အလုပ်အကိုင် ဖန်တီးပေးနိုင်ကြောင်း ပြန်လည်ဆွေးနွေးခဲ့သည်။

DOCA(မွန်)