သတင်းနှင့် လှုပ်ရှားမှုများ

          ၂၀၂၄ခုနှစ်၊ မေလ(၆)ရက်နေ့၊ နေ့လယ် (၁၄:၀၀)နာရီအချိန်တွင် ရှမ်းပြည်နယ်(အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ စစ်ဆေးရေးမှူးနှင့် ဝန်ထမ်းများသည် ကျိုင်းတုံမြို့၊ ရပ်ကွက်(၃)၊ မြို့သစ်ရပ်အတွင်းရှိ ဝက်ခေါက်နှင့်အမဲခေါက်ထုတ်လုပ်သည့်လုပ်ငန်းအား ထုတ်ကုန်များလုံခြုံစိတ်ချရမှုရှိစေရန် ဈေးကွက်စောင့်ကြည့်စစ်ဆေးခြင်းနှင့် စီးပွားရေးလုပ်ငန်းရှင်တွေ့ဆုံဆွေးနွေးခြင်း ဆောင်ရွက်ခဲ့ပါသည်။

          ထိုသို့စစ်ဆေးရာတွင် “ထွန်း”အမှတ်တံဆိပ်(ဝက်ခေါက်၊ အမဲခေါက်)လုပ်ငန်းသည် စားသုံး သူကာကွယ်ရေး ဥပဒေအခန်း(၁၈)ပါ “ကုန်အညွှန်းအမှတ်အသားဖော်ပြခြင်း”နှင့် ပတ်သက်၍ ပြည့်စုံစွာဖော်ပြထားပြီး ထုတ်ကုန်များကိုလည်း သန့်ရှင်းသပ်ရပ်စွာ ထုတ်လုပ်ဖြန့်ချိသည်ကို စစ်ဆေးတွေ့ ရှိရပါသည်။ ထို့နောက် စစ်ဆေးရေးမှူးနှင့် တာဝန်ရှိသူများသည် “ထွန်း”အမှတ်တံဆိပ်လုပ်ငန်းရှင်အား စားသုံးသူဘေးအန္တရာယ်ကင်းရှင်းစေရေး အလေးထားဆောင်ရွက်ရန်၊ ကုန်ကြမ်းများစနစ်တကျ သိုလှောင်ရန်နှင့် စားသုံးသူကာကွယ်ရေးဥပဒေအခန်း(၁၀)ပါ “စီးပွားရေးလုပ်ငန်းရှင်၏တာဝန်များ”ကို လိုက်နာဆောင်ရွက်ရန် ဆွေးနွေးခဲ့ကြပါသည်။

DOCA(ရှမ်း)

       ၂၀၂၄ ခုနှစ်၊ မေလ ၄ ရက်‌နေ့၊ နံနက် (၀၉း၀၀) အချိန်တွင် တနင်္သာရီတိုင်းဒေသကြီး၊  ထားဝယ်မြို့၊ အိမ်ရှေ့ပြင်ရပ်ကွက်၊ ရေးလမ်းရှိ ကောင်းဆက်ဟိန်း ယာဉ်ရပ်နားစခန်းသို့ မြန်မာနိုင်ငံ ဆီကုန်သည်များနှင့်ဆီလုပ်ငန်းရှင်များအသင်းမှ ထားဝယ်ခရိုင်ဆီကုန်သည်နှင့်ဆီလုပ်ငန်းရှင်များ အသင်းသို့  ယာဉ်အမှတ် 2C/4296 ၊ NISSAN DIESEL မော်တော်ယာဉ်ဖြင့်   တင်ဆောင်လာသော စားအုန်းဆီ ၁ ပေပါလျှင် ပိဿာ ၁၁၀ ပါသည့် စားအုန်းဆီ ၆၀ ပေပါ ရောက်ရှိလာခဲ့သဖြင့် စားသုံးသူရေးရာဦးစီးဌာန၊ တိုင်းဒေသကြီးဦးစိးမှူး ဦးစိုးဦးနှင့် တာဝန်ရှိသူများက သွားရောက်စစ်ဆေးခဲ့ပါသည်။ အဆိုပါစားအုန်းဆီ ၆၀ ပေပါအား ထားဝယ်မြို့တွင်း အိုးလုပ်ရပ်ကွက်၊ နိဗ္ဗာန်လမ်းရှိ ဦးဘိုသစ်၏ ယမုံလှိုင်ကုန်စုံဆိုင် အပါအဝင်အထိုင်ရောင်းချနေသည့် ဆီဆိုင် ၁၄ ဆိုင်တို့မှ သတ်မှတ်ရည်ညွှန်း ဈေးအတိုင်း ခွဲဝေရောင်းချပေးသွားမည်ဖြစ်ကြောင်း သိရှိရပါသည်။

DOCA(တနင်္သာရီ)

     အပြည်ပြည်ဆိုင်ရာ အလုပ်သမားနေ့အခမ်းအနားကို ၁.၅.၂၀၂၄ ရက်နေ့တွင် မော်လမြိုင်မြို့၊ မွန်ပြည်နယ်ခန်းမ၌ ကျင်းပပြုလုပ်ခဲ့ရာ အဆိုပါအခမ်းအနားသို့ မွန်ပြည်နယ် ဝန်ကြီးချုပ်နှင့် အစိုးရအဖွဲ့ဝင်ဝန်ကြီးများ၊ ဌာနဆိုင်ရာတာဝန်ရှိပုဂ္ဂိုလ်များ၊ အသင်းအဖွဲ့များ၊ ကဏ္ဍအသီးသီးမှအလုပ်သမားများ၊ သတင်းမီဒီယာများ တက်ရောက်ခဲ့ကြသည်။

     အဆိုပါအခမ်းအနားတွင် မွန်ပြည်နယ်ဝန်ကြီးချုပ်က အလုပ်သမားနေ့သဝဏ်လွှာကို ဖတ်ကြားခဲ့ပါသည်။ ဆက်လက်၍ အလုပ်သမားဝန်ကြီးဌာန၏ လုပ်ငန်းဆောင်ရွက်ချက်များအား Video Click ပြသပြီး မှတ်တမ်းတင်ဓာတ်ပုံရိုက်ကူးကာ အခမ်းအနားအား ရုတ်သိမ်း ခဲ့ကြသည်။

     ထို့နောက် တက်ရောက်လာသူများသည် အပြည်ပြည်ဆိုင်ရာ အလုပ်သမားနေ့အထိမ်းအမှတ် MSME ထုတ်ကုန်ပြခန်းများ လှည့်လည်ကြည့်ရှု့အားပေးခဲ့ကြကြောင်း သိရှိရပါသည်။

DOCA(မွန်) 

      မွန်ပြည်နယ်၊ သထုံခရိုင်၊ စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံသည် မြို့နယ်ရုံး၌ ၂.၅.၂၀၂၄ ရက်နေ့တွင် ဘီးလင်းမြို့နယ် ပေါက်တောကျေးရွာ အောင်မင်္ဂလာကွက်သစ်မှ အချိုရည် ထုတ်လုပ်ရောင်းချဖြန့်ဖြူးသူ လုပ်ငန်းရှင်ဦးကျော်သူရနှင့် တွေ့ဆုံဆွေးနွေးခဲ့ရာ ၎င်းမှ “Phyo” အမှတ်တံဆိပ်ဖြင့် Jelly Milk Shake မျိုးစုံကို ထုတ်လုပ်လျက်ရှိပြီး ဈေးကွက်အတွင်းဖြန့်ဖြူးရောင်းချရာတွင် သက်ဆိုင်ရာဌာနများ၏ ထောက်ခံချက်ရရှိရန်အတွက် လုပ်ထုံးလုပ်နည်းများ ဆောင်ရွက်လိုကြောင်း တင်ပြလာမှုအပေါ်တွင် ဘီးလင်းမြို့နယ်တာဝန်ခံမှ သက်ဆိုင်ရာဌာနနှင့် လုပ်ငန်းရှင်အား ဆက်သွယ်မှုရစေရန် ကူညီဆောင်ရွက်ပြီး ဈေးကွက်အတွင်း ရောင်းချမည့် အချိုရည်များတွင် စားသုံးသူကာကွယ်ရေးဥပဒေ ၂၀၁၉ ပြဌာန်းချက်နှင့်အညီ ကုန်အညွှန်းအမှတ်အသားပြည့်စုံစွာ ဖော်ပြရန်နှင့် လုပ်ငန်းရှင်များလိုက်နာရမည့်တာဝန်များကို အသိပေးဆွေးနွေး ခဲ့ကြောင်း သတင်းရရှိပါသည်။

DOCA(မွန်) 

       ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်အတွင်းရှိ စည်ပင်သာယာမြို့မဈေးအတွင်း/အပြင်နှင့် ရပ်ကွက်များတွင် စားအုန်းဆီလက်လီ/ လက်ကားဖြန့်ဖြူးရောင်းချလျက်ရှိသော စားအုန်းဆီအရောင်းကိုယ်စားလှယ်ဆိုင်ကြီးများနှင့် ဈေးအတွင်း/အပြင်ရှိ ကုန်ခြောက်ဆိုင်များတွင် လက်လီဖြန့်ဖြူးရောင်းချနေသည့် စားအုန်းဆီအရောင်းဆိုင်များသို့သွားရောက်၍ ညွှန်ကြားချက်နှင့်အညီ စားသုံးသူပြည်သူများအလွယ်တကူရရှိနိုင်ရန်နှင့် ရည်ညွှန်းဈေးအပေါ် (၂)ရာခိုင်နှုန်းအမြတ်ယူဖြန့်ဖြူးရောင်းချနေခြင်းရှိ/မရှိ မေလ(၂)ရက်နေ့၊ နံနက်(၁၁:၃၀)နာရီအချိန်၌ တာဝန်ရှိသူများက ကွင်းဆင်းစစ်ဆေးခဲ့ကြကြောင်းသိရသည်။

       ထိုသို့ကွင်းဆင်းစစ်ဆေးခဲ့ရာတွင် မြို့နယ်အထွေထွေအုပ်ချုပ်ရေးဦးစီးဌာနမှ မြို့နယ်အုပ်ချုပ်ရေးမှူးနှင့်ဝန်ထမ်းများ၊ မြို့နယ်ရဲတပ်ဖွဲ့မှ မြို့နယ်မှူးနှင့် ရဲတပ်ဖွဲ့ဝင်များ၊ မြို့နယ်စီမံအုပ်ချုပ်ရေး အဖွဲ့ဝင်များ၊ မြို့နယ်စည်ပင်သာယာရေးဦးစီးဌာနမှ အမှုဆောင်အရာရှိနှင့် ဈေးတာဝန်ခံနှင့် စားသုံးသူရေးရာဦးစီးဌာနမှ မြို့နယ်တာဝန်ခံတို့က စည်ပင်သာယာမြို့မဈေးအတွင်း/အပြင်၌ စားအုန်ဆီလက်လီ/ လက်ကားဖြန့်ဖြူးရောင်းချနေမှုအခြေအနေ၊ အမှတ်(၂) ရပ်ကွက်ရှိ စားအုန်းဆီအရောင်းကိုယ်စားလှယ် ဦးရဲဝင်းကျော်ဆီဆိုင်နှင့် အမှတ်(၆)ရပ်ကွက်ရှိ စားအုန်းဆီအရောင်း ကိုယ်စားလှယ် ဦးရဲထွန်းဆီဆိုင်များတွင် စားအုန်းဆီလက်လီ/ လက်ကားဖြန့်ဖြူးရောင်းချနေမှုအခြေအနေနှင့် ခရမ်းမြို့နယ်အတွင်းရှိ စားသုံးသူပြည်သူများ ဈေးနှုန်းမှန်ကန်စွာ စားအုန်းဆီများကို အခက်အခဲမရှိဝယ်ယူစားသုံးနိုင်ရေး၊ ဆီဈေးနှုန်းတည်ငြိမ်စေရေး၊ သတ်မှတ်ဈေးနှုန်းဖြင့် ဖြန့်ဖြူးရောင်းချစေရေးနှင့် ရောနှောဆီများဖြင့် ဈေးနှုန်းမြှင့်တင်ရောင်းချမှုများမရှိစေရေးတို့အတွက် လက်လီ/ လက်ကားဖြန့်ဖြူးရောင်းချပေးနိုင်သည့် ဆီကိုယ်စားလှယ်အရောင်းဆိုင်များအား သတ်မှတ်ခွဲတမ်းများ ခွဲဝေချထားပေးပြီးဖြစ်၍ ရရှိသည့်ခွဲတမ်းများအလိုက် အခြေခံလက်ကားရည်ညွှန်းဈေးအနေဖြင့် မိမိတို့၏ဒေသအရောက် သယ်ယူစရိတ်ပါ (၂)ရာခိုင်နှုန်းအမြတ်ထက်မပိုသောဈေးနှုန်းဖြင့် ဈေးကွက်အတွင်း အမှန်တကယ်ဖြန့်ဖြူးရောင်းချနေခြင်းရှိ/မရှိ ဈေးကွက်စောင့်ကြည့်ကွင်းဆင်းစစ်ဆေးခဲ့ကြကြောင်းသိရှိရပါသည်။

DOCA(ရန်ကုန်)