သတင်းနှင့် လှုပ်ရှားမှုများ

      စားသုံးသူရေးရာဦးစီးဌာန၊ ရန်ကုန်တိုင်းဒေသကြီး ဦးစီးမှူးရုံး၏လမ်းညွှန်မှာ ကြားချက်အရ၊ တိုင်းဒေသကြီးကွပ်ကဲမှုအောက်ရှိ ခရိုင်ဦးစီးမှူးရုံးများအနေဖြင့် ခရိုင် အတွင်းမြို့နယ်များ တွင် ရောင်းချနေသောဘိလပ်မြေဆိုင်များတွင် ဘိလပ်မြေအမျိုး အစားများ၊ တစ်မျိုးချင်းစီ၏ တစ်အိတ်ဈေးနှုန်း၊ ပစ္စည်းပြတ်လပ်မှု ရှိ/မရှိ၊ ကုန်ပစ္စည်း လက်ကျန် အခြေအနေများကို သိရှိနိုင်ရန် မြေပြင်ကွင်းဆင်းစစ်ဆေးမှုများ ပြုလုပ်၍ တိုင်းဒေသကြီးဦးစီးမှူးရုံးသို့ ပေးပို့တင်ပြ ပေးလျက်ရှိကြောင်း သိရှိရပါသည်။

      ကွင်းဆင်းစစ်ဆေးဆောင်ရွက်မှုများ ပြုလုပ်ရာတွင် ရန်ကုန်အရှေ့ပိုင်းခရိုင်ဦးစီး မှူးရုံးမှ ဝန်ထမ်းများသည် ၂၉.၄.၂၀၂၄ ရက်နေ့ နံနက် ၁၀:၀၀ နာရီတွင် ဗိုလ်တထောင်ခရိုင်၊ မင်္ဂလာတောင်ညွန့်မြို့နယ်၊ အထက်ပုဇွန်တောင်လမ်းမပေါ်ရှိ အဲဗားဘိလပ်မြေအရောင်းဆိုင်၊ မိဘ မေတ္တာဘိလပ်မြေအရောင်းဆိုင်၊ Pro One Home Center စသည့် ဘိလပ်မြေရောင်းချ ရောင်းချသည့်ဆိုင်များသို့ မေးမြန်းစုံစမ်းရာ ဘိလပ်မြေဆိုင်များတွင် ပစ္စည်းပြတ်လပ်မှုမရှိကြောင်း၊ ကုန်ပစ္စည်း  လက်ကျန်များကြောင်း၊ ဈေးနှုန်းမှာအနည်းငယ်ကျလာကြောင်း သိရှိခဲ့ရပါသည်။

DOCA(ရန်ကုန်)

     စားအုန်းဆီကို အသုံးပြု၍ လုပ်ငန်းဆောင်ရွက်နေသောဒေသတွင်း   အသေးစားစက်မှုလုပ်ငန်းများ ဖွံ့ဖြိုးတိုးတက်ရေးအတွက် ထားဝယ်မြို့မုန့်မျိုးစုံလုပ်ငန်းနှင့် စားသောက်ဆိုင်လုပ်ငန်းများအတွက် အသုံးပြုရန် လိုအပ်လျက်ရှိသော စားအုန်းဆီများအားပြည်တွင်းသို့    စားအုန်းဆီတင်သွင်းသည့် ကုမ္ပဏီများမှ တိုက်ရိုက် ဝယ်ယူခွင့်ရရှိရေးအတွက် တနင်္သာရီတိုင်း‌ဒေသကြီး    ထားဝယ်မြို့ရှိ   မုန့်လုပ်ငန်းရှင် နှင့်စားသောက်ဆိုင်လုပ်ငန်းရှင်(၆)ဦးမှ တစ်လလိုအပ်သော စားအုန်းဆီ(၉၈)ပေပါ၊ ပိဿာချိန် (၁၀၇၆၀)  တန်ချိန် (၁၇.၅၇၀)တန်အား စားသုံးသူရေးရာဦးစီးဌာနသို့ လျှောက်ထားခဲ့ရာ (၁.၅.၂၀၂၄) ရက်နေ့တွင် စားအုန်းဆီ ပေပါ(၉၈)ပေပါသည် ထားဝယ်မြို့သို့ရောက်ရှိလာပြီး လုပ်ငန်းရှင်များ လုပ်ငန်းများတွင်  အသုံးပြုလျက်ရှိပါကြောင်း သိရှိရပါသည်။

DOCA(တနင်္သာရီ)

      စားသုံးသူရေးရာဦးစီးဌာန၊ နေပြည်တော်၊ (ရုံးချုပ်)မှ ညွှန်ကြားရေးမှူးချုပ် ဦးအောင်အောင်နှင့် အဖွဲ့သည် (၂၄.၄.၂၀၂၄ ရက်နေ့မှ ၂၅.၄.၂၀၂၄) နေ့တွင် ဧရာဝတီတိုင်းဒေသကြီး ၊ တိုင်းဒေသကြီး ဦးစီးမှူးရုံးမှ ဝန်ထမ်းများနှင့် တွေ့ဆုံခြင်း၊ မအူပင်ခရိုင်အတွင်းရှိ ငါးကန်များအား ကွင်းဆင်းကြည့်ရှုစစ်ဆေးခဲ့ပါသည်။ 

    (၂၅.၄.၂၀၂၄) ရက်နေ့တွင် မအူပင်ခရိုင် ညောင်တုန်းမြို့ရှိ Good Brother Co,Ltd သို့ သွားရောက်ကြည့်ရှုလေ့လာခဲ့ပြီး၊ ညောင်တုန်းမြို့နယ် ငါးကန်(၁၇.၅၁) ဧကနှင့် မအူပင်မြို့နယ် အလန်းကျေးရွာရှိ (၄၁.၇၇)ဧက  ငါးမွေးမြူရေးလုပ်ငန်းအား ကြည့်ရှုစစ်ဆေးခဲ့သည်။ ငါးကန်လုပ်ငန်းရှင်နှင့် တွေ့ဆုံ၍  ငါးမွေးမြူ ရေးကန်များ အပူချိန်ပြင်းထန်လွန်ကဲမှု ဒဏ်ကို ကာကွယ်ရန် ကန်ရေများရေငွေပြန်ပြီး ရေလျော့နည်း ကျဆင်းလာသဖြင့် ရေခန်းလာခြင်းကြောင့် သန့်ရှင်းသော ရေဖြည့်သွင်းပေးရန်၊  ငါးစာကျွေးလွန်ကဲခြင်းကြောင့် စားကြွင်းစာကျန်များကြောင့်လည်းကောင်း၊ ရေထုညစ်ညမ်းပြီး ဆက်စပ်၍ ငါးရောဂါကျရောက်တက်သဖြင့် ငါးစာလျော့ကျွေးရန်၊  ရေတွင်ပျော်ဝင်သော အောက်စီဂျင်မြင့်တက်စေရေး ဆောင်ရွက်ပေးရန်၊  ကန်အခြေအနေနှင့် ရေအရည် အသွေးပြောင်းလဲမှု အခြေအနေများကို နေ့စဉ်ပုံမှန်စစ်ဆေးပါရန်၊ ငါးမွေးမြူကန်၌ ပုံမှန်မဟုတ်သော အခြေအနေပြောင်းလဲခြင်းမျိုးများ ဖြစ်ပေါ်လာပါက အနီးဆုံး ငါးလုပ်ငန်းဦးစီးဌာနသို့လည်း ချိတ်ဆက်ဆက်သွယ် ဆောင်ရွက်ရန် မှာကြားခဲ့ပြီး၊ ငါးမွေးမြူရေးလုပ်ငန်းရှင်မှ တင်ပြရှင်းလင်းချက်များကို ဌာနအနေဖြင့် ဆောင်ရွက်နိုင်သောအချက်များကို ဖြည့်ဆည်းဆောင်ရွက်ပေးသွားမည်ဖြစ်ကြောင်း ပြောကြားခဲ့ကြောင်း သိရပါသည်။

DOCA(ဧရာဝတီ)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူပြည်သူများအတွက် ကုန်စည်နှင့်ဝန်ဆောင်မှုများအသုံးပြုရာတွင် ဘေးအန္တရာယ်ကင်းရှင်းစေရေး၊ လုံခြုံစိတ်ချရမှုရှိစေရေးအတွက် အစဉ်ဆောင်ရွက်လျက်ရှိပါသည်။ စားသုံးသူများအတွက် လုံခြုံစိတ်ချရမှုမရှိသောကုန်စည်များ၊ စားသုံးသူကာကွယ်ရေးဥပဒေ (၂၀၁၉)၊ အခန်း(၁၈)၊ ပုဒ်မ ၄၁ပါ ကုန်အညွှန်းအမှတ်အသားများပြည့်စုံမှုမရှိသောကုန်စည်များကိုထုတ်လုပ်ဖြန့်ဖြူးခြင်း၊  ထိုသို့သောပစ္စည်းများကို ဈေးကွက်အတွင်း တင်သွင်းရောင်းချခြင်းမရှိစေရန်ရည်ရွယ်၍ မုံရွာခရိုင်ဦးစီးမှူးရုံးမှ မုံရွာမြို့နယ်တာဝန်ခံနှင့် ချောင်းဦးမြို့နယ်တာဝန်ခံတို့ဦးဆောင်၍ ဝန်ထမ်း(၁)ဦးတို့သည် (၂၅-၄-၂၀၂၄) ရက်နေ့၊ နံနက် (၁၀:၀၀) နာရီအချိန်တွင် မုံရွာမြို့၊ အောင်ချမ်းသာဈေးရှိ လူသုံးကုန်နှင့် စားသောက်ကုန်ပစ္စည်းအရောင်းဆိုင်များသို့သွားရောက်၍ ဈေးကွက်စောင့်ကြည့်စစ်ဆေးခဲ့ကြောင်း သတင်းရရှိပါသည်။

       ထိုသို့ဆောင်ရွက်ရာတွင် မုံရွာမြို့၊ အောင်ချမ်းသာဈေးရှိ လူသုံးကုန်နှင့် စားသောက်ကုန်ပစ္စည်းအရောင်းဆိုင်များတွင်  ကုန်အညွှန်းအမှတ်အသားပြည့်စုံမှုမရှိသော ကုန်စည်များရောင်းချနေခြင်းရှိ/ မရှိ စစ်ဆေးခဲ့ကြပြီး ဆိုင်ပိုင်ရှင်များအား  စီးပွားရေးလုပ်ငန်းရှင်၏တာဝန်များနှင့် ကုန်အညွှန်းအမှတ်အသားပြည့်စုံမှုမရှိသော ကုန်စည်များအား တင်သွင်းရောင်းချခြင်းမပြုကြရန်ပြောကြားခဲ့ပြီး ကုန်အညွှန်အမှတ်အသားဖော်ပြခြင်းဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

     ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံသည် ၂၀၂၄ ခုနှစ်၊ ဧပြီလ(၂၃)ရက်၊ နေ့လယ်(၁၅:၀၀)နာရီအချိန်တွင် စားသုံးသူရေးရာဦးစီးဌာန  မြို့နယ်တာဝန်ခံရုံးတွင် ငါးရံ့ခြောက်ဖုတ်လုပ်ငန်းရှင်အသင်းနှင့် တွေ့ဆုံဆွေးနွေးခဲ့ပါသည်။

    ထိုသို့ဆွေးနွေးရာ၌ ကုန်ကြမ်းဝယ်ယူရာတွင် ယခင်လိုမြို့ပေါ်မှာအထိုင်ဖြင့် ဝယ်ယူ၍မရကြောင်း၊ ကျေးရွာများရှိ အင်းချောင်းများသို့ဆင်း၍ ဝယ်ယူရကြောင်း၊ ထိုသို့ဝယ်ယူမှသာ မိမိထုတ်လုပ်နိုင်ရေး တစ်နှစ်စာကုန်ကြမ်းများအတွက်သာရရှိမည်ဖြစ်ကြောင်း၊ ကုန်ကြမ်းဈေးနှုန်းများလည်း အနည်းငယ် မြင့်တက်လာပြီး၊  ကုန်ချောဈေးနှုန်းများမှာလည်း မြင့်တက်လာပါသည်။ ယခင်နှစ်များလို ရောင်းအားမကောင်းကြောင်း တက်ရောက်လာသူများမှ ပြောကြားပါသည်။

     ထို့နောက် စားသုံးသူရေးရာဦးစီးဌာနမှ မြို့နယ်တာဝန်ခံက လုပ်ငန်းရှင်များအနေဖြင့်  ထုတ်လုပ်မှု ကုန်ကျစရိတ်များ လျှော့နိုင်သမျှ လျှော့နိုင်အောင် ကြိုးစားထုတ်လုပ်နိုင်ရေးနှင့် တွက်ချေကိုက်သော လုပ်ငန်းများဖြစ်စေရေး၊ ကုန်အညွှန်းအမှတ်အသား ပြည့်စုံစွာဖော်ပြပါရှိစေရေးနှင့် မိမိတို့  ဌာနအနေဖြင့် လုပ်ငန်းရှင်များ၏ လိုအပ်ချက်များအား ကူညီဆောင်ရွက်ပေးသွားမည်ဖြစ်ကြောင်း  ပြောကြားခဲ့ပါသည်။

DOCA(ဧရာဝတီ)