သတင်းနှင့် လှုပ်ရှားမှုများ

         ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်၌ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ အထက်အကြီးအကဲများ၏လမ်းညွှန်မှုဖြင့် ပြည်လည်စိစစ်တင်ပြရန် ပြင်ပဈေးကွက်တွင် စားအုန်းဆီတစ်ပိဿာလျှင် (၁၁၀၀၀)ကျပ်ပေါက်ဈေးရှိနေသည်ဆိုသည့် သတင်းအရ သုံးခွမြို့နယ်ဈေးကွက်အတွင်း အောက်တိုဘာလ(၁၀)ရက်နေ့၊ နေ့လယ်(၁၂း၀၀)နာရီအချိန်တွင် ဈေးကွက်စောင့်ကြည့်ကွင်းဆင်းစစ်ဆေးခဲ့ကြောင်း သိရသည်။

        ထိုသို့ဈေးကွက်စောင့်ကြည့်ကွင်းဆင်းစစ်ဆေးရာတွင် စားသုံးသူရေးရာဦးစီးဌာန၊ သုံးခွမြို့နယ်တာဝန်ခံနှင့်ဝန်ထမ်းများက စည်ပင်သာယာမြို့မဈေးအတွင်း/ အပြင်နှင့် ရပ်ကွက်များမှ စားအုန်းဆီကိုယ်စားလှယ်ဆိုင်များဖြစ်သော အမှတ်(၁၂) စည်သူလမ်း၊ (၁၁)ရပ်ကွက်ရှိ ဦးအေးသွင်ကုန်စုံဆိုင်နှင့် အမှတ်(၉၄) အောင်သစ္စာလမ်း၊ (၄)ရပ်ကွက်ရှိ ဦးယဉ်မောင်လွင်စားအုန်းဆီ လက်လီ/ လက်ကားဖြန့်ဖြူးရောင်းချလျက်ရှိသော ကုန်စုံဆိုင်ပိုင်ရှင် စီးပွားရေးလုပ်ငန်းရှင်များနှင့်သွားရောက်တွေ့ဆုံမေးမြန်းခဲ့ရာတွင် သုံးခွမြို့နယ်စားသုံးသူပြည်သူများအနေဖြင့် စားအုန်းဆီများကို အခက်အခဲမရှိ ဝယ်ယူစားသုံးနိုင်ရန်အတွက် စားအုန်းဆီကိုယ်စားလှယ်များအား ကုမ္ပဏီမှတစ်ဆင့် သတ်မှတ်ခွဲဝေချထားပြီးဖြစ်သဖြင့် ရရှိသည့်စားအုန်းဆီခွဲတမ်းအလိုက် အပတ်စဉ်တနင်္လာနေ့တိုင်း သတ်မှတ်ရည်ညွှန်းဈေးအပေါ် ဒေသအရောက် သယ်ယူစရိတ်ပါ (၂)ရာခိုင်နှုန်းအမြတ်ထက်မပိုသော သတ်မှတ်ရည်ညွှန်းဈေးများဖြင့် လက်လီ/ လက်ကားဖြန့်ဖြူးရောင်းချပေးလျက်ရှိကြောင်း ပြန်လည်ပြောကြားခဲ့ကြောင်းသိရှိရပါသည်။

DOCA(ရန်ကုန်)

        ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်၊ စည်ပင်သာယာမြို့မဈေးအတွင်းရှိ အလှကုန်ပစ္စည်းအမျိုးမျိုးရောင်းချနေသော လုပ်ငန်းရှင်နှင့် ကုန်စုံမျိုးစုံရောင်းချနေသော လုပ်ငန်းရှင်တို့အား အောက်တိုဘာလ(၁၀)ရက်နေ့၊ နံနက်(၁၀း၀၀)နာရီအချိန်၌ စည်ပင်သာယာမြို့မဈေးတာဝန်ခံရုံးတွင် အွန်လိုင်းစနစ်ဖြင့်ရောင်းချခြင်းလုပ်ငန်းများ မှတ်ပုံလက်မှတ်လျှောက်ထားခြင်းနှင့်စပ်လျဉ်း၍ အသိပညာပေးဟောပြောဆွေးနွေးခဲ့ကြောင်းသိရသည်။

        အဆိုပါအသိပညာပေးဟောပြောပွဲတွင် စားသုံးသူရေးရာဦးစီးဌာန၊ သုံးခွမြို့နယ်တာဝန်ခံက အွန်လိုင်းစနစ်ဖြင့် ရောင်းချခြင်းလုပ်ငန်းများဆောင်ရွက်မည်ဆိုပါက မဖြစ်မနေမှတ်ပုံတင်လျှောက်ထားရမည်ဖြစ်ပြီး မှတ်ပုံတင်လျှောက်ထားရန် ကြိုတင်ပြင်ဆင်သင့်သည့် အထောက်အထားများ၊ မဖြစ်မနေပူးတွဲတင်ပြရမည့်အထောက်အထားများ၊ လျှောက်ထားရန် အခြေခံလိုအပ်ချက်များအပါအဝင် အခြားသိကောင်းစရာများကို အသိပညာပေးဆွေးနွေးခြင်း၊ အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးဝန်ဆောင်မှုအဖြစ်သတ်မှတ်သည့် အမိန့်ကြော်ငြာစာအမှတ်(၅၀/၂၀၂၃)ဖြင့် ၂၀၂၃ခုနှစ်၊ ဇူလိုင်လ(၂၁)ရက်နေ့တွင်ထုတ်ပြန်ခဲ့ကြောင်း မည်သူမဆို အွန်လိုင်းဖြင့်ရောင်းချခြင်း လုပ်ငန်းကို မှတ်ပုံတင်လျှောက်ထားပြီးမှသာလုပ်ကိုင်ရမည်ဖြစ်ကြောင်း၊ အမိန့်ကြော်ငြာစာထုတ်ပြန်ပြီး (၆)လပြည့်သည့်နေမှစ၍ မှတ်ပုံတင်မရှိဘဲရောင်းချပါက အရေးကြီးကုန်စည်နှင့်ဝန်ဆောင်မှုဥပဒေ ပုဒ်မ(၅)အရ အရေးယူခံရမည်ဖြစ်ကြောင်း လုပ်ငန်းရှင်များအား အသိပညာပေးဆွေးနွေးခဲ့ကြောင်း ၎င်းဟောပြောပွဲသို့ လုပ်ငန်းရှင် (၉)ဦးတက်ရောက်ခဲ့ကြောင်းသိရှိရပါသည်။

DOCA(ရန်ကုန်)

ဧရာဝတီတိုင်းဒေသကြီး၊ ဟင်္သာတခရိုင်၊ ဟင်္သာတမြို့နယ် အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမတွင် (၁၄.၁၀.၂၀၂၄)ရက်နေ့ နံနက်(၁၀:၀၀)အချိန်တွင် တရားမဝင်ကုန်သွယ်မှု တိုက်ဖျက်ရေးဆိုင်ရာအသိပညာပေးဟောပြောပွဲကိုကျင်းပပြုလုပ်ခဲ့ပါသည်။ဟောပြောပွဲ၌ ဟင်္သာတခရိုင်တရားမဝင်ကုန်သွယ်မှုတိုက်ဖျက်ရေးအထူးအဖွဲ့ ဥက္ကဌ၊ ဟင်္သာတခရိုင် စီမံအုပ်ချုပ်ရေးအဖွဲ့ ဥက္ကဌ ဦးအောင်မြင့်စိုးက အဖွင့်အမှာစကားပြောကြားရာတွင် တရားမဝင်ကုန်သွယ်မှုသည် နိုင်ငံ၏ စီးပွားရေးဖွံ့ဖြိုးတိုးတက်မှုကို အဟန့်အတားဖြစ်စေတဲ့ အဓိကအချက်ဖြစ်တဲ့အပြင်၊ ဒေသတွင်းရှိ အသေးစား၊ အငယ်စားနှင့် အလတ်စား စီးပွားရေးလုပ်ငန်းများအနေဖြင့်လည်း တရားမဝင်ကုန်စည်များနှင့် ယှဉ်ပြိုင်နိုင်မှုနည်းပါးပြီး ရေရှည်ရပ်တည်ရန် ခက်ခဲစေနိုင်ကြောင်း၊ တရားမဝင်ကုန်သွယ်မှုတိုက်ဖျက်ရေး ဦးဆောင်ကော်မတီ၏ (အထူး) လုပ်ငန်းညှိနှိုင်းအစည်းအဝေးမှာ တရားမဝင်ကုန်စည် များအားလက်လီ/ လက်ကားအရောင်းဆိုင်၊ Shopping Mall များမှတဆင့် ဈေးကွက်အတွင်း ဖြန့်ဖြူးခြင်း၊ လက်လီရောင်းချခြင်းများမပြုလုပ်စေရေး ပညာပေးခြင်း၊ သတိပေးခြင်း၊ တားဆီးခြင်း၊ စစ်ဆေးခြင်း၊ ဥပဒေနှင့်အညီ အရေးယူဆောင်ရွက်ခြင်းများကို အချိန်ကာလတစ်ခုသတ်မှတ်ဆောင်ရွက်ရန် ဆုံးဖြတ်ခဲ့ခြင်းကြောင့် ယခုကဲ့သို့ ဟောပြောအသိပညာပေးခြင်းကို ဆောင်ရွက်ရတာဖြစ်ကြောင်း၊ လုပ်ငန်းရှင်များအနေဖြင့်လည်း တရားမဝင်ကုန်စည်များရောင်းဝယ်ဖြန့်ဖြူးခြင်းကိုမပြုလုပ်ပဲ ဥပဒေကိုလိုက်နာရန်လိုကြောင်း တို့ကိုပြောကြားခဲ့ပါသည်။
ဆက်လက်၍ ဟင်္သာတခရိုင်တရားမဝင်ကုန်သွယ်မှုတိုက်ဖျက်ရေးအထူးအဖွဲ့ အတွင်းရေးမှူး၊ စားသုံးသူရေးရာဦးစီးဌာန၊ ဟင်္သာတခရိုင်ဦးစီးမှူး ဦးဇော်မင်းက တရားမဝင်ကုန်သွယ်မှု၏အဓိပ္ပာယ်၊ မြန်မာနိုင်ငံတွင်ဖြစ်ပေါ်နေသော တရားမဝင်ကုန်သွယ်မှုများအကြောင်း၊ ပို့ကုန်/ သွင်းကုန်ဥပဒေဆိုင်ရာသိကောင်းစရာများ၊ အရေးကြီးကုန်စည်နှင့် ဝန်ဆောင်မှုဥပဒေဆိုင်ရာ ပြစ်မှုနှင့်ပြစ်ဒဏ်များ အကြောင်းတို့ကို ရှင်းလင်းဆွေးနွေးခဲ့ပါသည်။ တက်ရောက်လာသော လုပ်ငန်းရှင်များကလည်း သိလိုသည်များကို မေးမြန်းခဲ့ပါသည်။
တရားမဝင်ကုန်သွယ်မှုတိုက်ဖျက်ရေးအထူးအဖွဲ့ဥက္ကဌ ဦးအောင်မြင့်စိုးက နိဂုံးချုပ်စကား ပြောကြားခဲ့ပြီး နံနက်(၁၁:၀၀)နာရီအချိန်တွင် ဟောပြောပွဲအခမ်းအနားအောင်မြင်စွာပြီးမြောက်ခဲ့ပါသည်။ ဟောပြောပွဲကို ဟင်္သာတခရိုင် တရားမဝင်ကုန်သွယ်မှုတိုက်ဖျက်ရေးအထူးအဖွဲ့ဝင် ခရိုင်အဆင့်ဌာနဆိုင်ရာများနှင့် မြို့နယ်အဆင့်ဌာနဆိုင်ရာ(၃၅)ဦးနှင့် ဟင်္သာတမြို့နယ်အတွင်းရှိ စက်သုံးဆီလုပ်ငန်း ရှင်များ (၁၅)ဦး၊ ကုန်စုံဆိုင်လုပ်ငန်းရှင်(၈)ဦး၊ ဆန်လုပ်ငန်းရှင်များ(၁၂)ဦး နှင့် စားသုံးဆီလုပ်ငန်းရှင် (၁၂)ဦး၊ စုစုပေါင်း(၈၂)ဦး တက်ရောက်ခဲ့ပြီး၊ ဟင်္သာတခရိုင် တရားမဝင်ကုန်သွယ်မှုတိုက်ဖျက်ရေးအထူးအဖွဲ့ဥက္ကဌ၏ လမ်းညွှန်မှာကြားချက်များဖြစ်သည့် ပို့ကုန်/ သွင်းကုန်ဥပ‌ဒေ၊ အရေးကြီးကုန်စည်နှင့်ဝန်ဆောင်မှုဥပ‌ဒေ ၊ အကြမ်းဖက်မှုတိုက်ဖျက်ရေးဥပ‌ဒေနှင့် အခြားလိုက်နာဆောင်ရွက်ရမည့် ဥပ‌ဒေများကို ပူးပေါင်းလိုက်နာဆောင်ရွက်မည်ဖြစ်ပါကြောင်းနှင့် လိုက်နာဆောင်ရွက်မှုပျက်ကွက်ပါက တည်ဆဲဥပဒေများနှင့်အညီ အရေးယူခံရမည်ကို သိရှိပါကြောင်း လုပ်ငန်းရှင်များက ဝန်ခံကတိပြုလက်မှတ်ရေးထိုးခဲ့ကြောင်း သိရှိရပါသည်။
DOCA(ဧရာဝတီ)

      စားသုံးသူရေးရာဦးစီးဌာန၊ ဧရာဝတီတိုင်းဒေသကြီးဦးစီးမှူးရုံးမှ ဒုတိုင်းဒေသကြီးဦးစီးမှူးနှင့်အဖွဲ့သည် မအူပင်ခရီးစဉ်တွင် (၁၂.၁၀.၂၀၂၄) ရက်နေ့ ၊နံနက် (၁၁:၃၀) အချိန်က ညောင်တုန်းမြို့နယ် ဆီရောင်းချသူ လုပ်ငန်းရှင် (၃၅)ဦးအား  ဆီထုတ်ကိုယ်စာလှဉ်များနှင့် တွေ့ဆုံ၍ အရေးကြီးကုန်စည်နှင့် ဝန်ဆောင်မှု ဥပဒေအကြောင်း အသိပညာပေး ရှင်းလင်းဆွေးနွေးခဲ့ကြသည်။

      ညောင်တုန်းဆီရောင်းချသူများနှင့် ဆီထုတ်ကိုယ်စားလှယ်များကို ဒုတိုင်းဒေသကြီးဦးစီးမှူးမှ အရေးကြီးကုန်စည်နှင့် ဝန်ဆောင်မှု ဥပဒေအကြောင်း ရှင်းလင်းဆွေးနွေးရာ ၎င်းဥပဒေဆိုသည်မှာ ဝန်ကြီးဌာနတစ်ခုခု အခါအားလျော်စွာ သတ်မှတ်သော ကုန်စည်ဝန်ဆောင်မှု တစ်မျိုးမျိုးကို ဆိုလိုကြောင်း၊ နိုင်ငံသားများ၏ အကျိုးစီးပွားကို အထောက်အကူပြုမည့် ကုန်စည်နှင့် ဝန်ဆောင်မှုကိုကာကွယ်ခြင်း၊ ထိခိုက်စေနိုင်သော ကုန်စည်နှင့် ဝန်ဆောင်မှုကို ကန့်သတ်ခြင်း၊ ဘေးအန္တရာယ်နှင့်၊ ကူးစက်ရောဂါနှင့် မလိုလားအပ် သောကိစ္စတစ်စုံတစ်ရာ ပေါ်ပေါက်နိုင်သည့် ကုန်စည်နှင့် တိရိစ္ဆာန်များအား ပြည်တွင်းသယ်ဆောင်မှု ပြည်တွင်းသို့ တင်သွင်းမှုနှင့် ပြည်အသို့ တင်ပို့မှုတို့ကို တားဆီးနိုင်ရန်ရည်ရွယ်ကြောင်းကို ရှင်းလင်းခြင်း၊ ဆီရောင်းချနေသော လုပ်ငန်းရှင်များအနေဖြင့် ဗူးသွပ်ဆီများတွင် ကုန်အညွှန်းအမှတ်အသားဖြစ်သည့် Label ဖြစ်သည့် စားသုံးသူနှင့် ကုန်အစ္စည်းအကြားရှိ ကြာခံတစ်ခုအဖြစ် ကုန်ပစ္စည်း၏ အချက်အလက်များ ဖော်ပြထားသော ပုံစံအမျိုးမျိုးရှိ(စာဖြင့်၊ သင်္ကေတဖြင်) ဖော်ပြသောပုံစံဖြစ်ကြောင်း၊ ကုန်အညွှန်းအမှတ် အသားပြည်စုံစွာ ဖော်ပြပါဝင်သောကုန်စည်၊ သက်ဆိုင်ရာဌာနက ခွင့်ပြုချက်၊ ထောက်ခံချက်ပါသောကုန်စည်များကို ရောင်းချရန်၊ စားအုန်းဆီရောင်းချသူ လုပ်ငန်းရှင်များအနေဖြင့် ရရှိသော ဆီခွဲတမ်းအပေါ် သတ်မှတ်ချက်အတိုင်း ယခုကာလ မြို့ပေါ်ရပ်ကွက် အိမ်ထောင်စုများ ဆီထုတ်ယူခွင့်စာအုပ်များ ကို ရရှိသော ဆီဆိုင်များမှလည်း တူညီသော ခွဲတမ်းအလိုက် စနစ်တကျ ထုတ်ယူခွင့်ရရှိနိုင်ရန် စနစ်တကျစိစစ်ဆောင်ရွက်ရန်၊ သတ်မှတ်ရည်ညွှန်းဈေးအတိုင်း ဈေးနှုန်း ဗီနိုင်းဖြင့် ရောင်းချပေးကြရန်၊ အိမ်ထောင်စု တစ်ခု ၁၀ရက်တစ်ကြိမ်၊ တစ်လ ၁ပိဿာ ၅၀ ကျပ်သားကို ထုတ်ယူသည့်အခါ ပထမအကြိမ် စားသုံးသူမှ ခရီးလွန်၍ ထုတ်ယူမှု မရှိပဲ ဒုတိယအကြိမ်မှ ပေါင်းထုတ်ပါက ဒုတိယအကြိမ် ရည်ညွှန်းဈေးဖြင့် ရောင်းချပေးနိုင်ရန်၊ အထမအကြိမ်ရော၊ ဒုတိယအကြိမ်ပါ ထုတ်ယူခြင်းမရှိပါက  တတိယအကြိမ်တွင် ပေါင်းထုတ်ယူခွင့်ပေးရမည်ဖြစ်ကြောင်း၊ ပထမလ သုံးကြိမ်ထုတ်ခွင့်လုံးမထုတ်ယူပဲ ဒုတိယလတွင် လာရောက်ထုတ်ယူပါက စားသုံးသူထုတ်ယူခွင့် မရှိကြောင်း သိရှိနားလည်နိုင်ရန် အသေးစိတ် စားသုံးသူများကို ကြိုတင် ရှင်းလင်း ပြောပြထားရန်၊ မြို့ပေါ်ရပ်ကွက် ဆီထုတ်ယူခွင့်ကို စားသုံးသူများ အားလုံးရရှိမည်ဖြစ်၍ ဆူညံမှု မရှိစေရန်နှင့် ကျေးရွာများသို့လည်း အိမ်ထောင်စုစာရင်း၊ ထောက်ခံချက် လိုအပ်သောအချက်အလက်များကို သေချာစိစစ်၍ ရပ်ကျေးအုပ်ချုပ်ရေးမှူးတို့နှင့် ပူးပေါင်းစိစစ်ဆောင်ရွက်နိုင်ပါရန်ကို အသိပေးပြောကြားခဲ့သည်။  အရေးကြီးကုန်စည်နှင့် ဝန်ဆောင်မှု ဥပဒေ ပုဒ်မ ၄အရအမိန့်တစ်ရပ်ရပ်ကို ဖောက်ဖျက်ကြောင်း ပြစ်မှုထင်ရှားစီရင်ခြင်းခံရလျှင် ထိုသူအား ထောင်ဒဏ် ၆လမှအများဆုံး ထောင်ဒဏ် ၃နှစ် အထိ ချမှတ်နိုင်သည့်အပြင် ကျပ်ငါးသိန်းထက်မပိုသော ငွေဒဏ်လည်းချမှတ်ခံရနိုင်ကြောင်း အသိပညာပေး ရှင်းလင်းဆွေးနွေးခဲ့ပါသည်။

DOCA(ဧရာဝတီ)

     ဧရာဝတီတိုင်းဒေသကြီး၊စားသုံးသူရေးရာဦးစီးဌာန၊မအူပင်ခရိုင်၊ဆန်စပါးကုန်သည်များအသင်း ကော်မတီဝင်အဆင့်ဆင့်ကို (၁၃.၁၀.၂၀၂၄) ရက်နေ့၊ နံနက် (၁၀:၃၀ ) အချိန်တွင် ခရိုင်အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမတွင်ကျင်းပရာ ဌာနဆိုင်ရာ(၅)ဦး၊လုပ်ငန်းရှင် (၁၅) ဦးတက်ရောက်ခဲ့ပြီး  အသင်းအဖွဲ့စည်းမျဉ်း၊ အသင်းအဖွဲ့မှတ်တမ်းများနှင့်အညီ ခရိုင်ဆန်စပါး ကုန်သည်များအသင်းကို ရွေးချယ်ဖွဲ့စည်းခဲ့ပါသည်။

      ထိုသို့ ရွေးချယ်ဖွဲ့စည်းရာတွင် မအူပင်ခရိုင်ဦးစီးမှူးမှ ဆန်စပါးကုန်သည်များအသင်း ဖွဲ့စည်းရခြင်း၏ အဓိကရည်ရွယ်ချက်မှာ ဆန်စပါးဈေးကွက် တည်ငြိမ်မှန်ကန်ရေးနှင့်၊ ဆန်စပါးလုပ်ငန်းဖွံ့ဖြိုးတိုးတက်ရေး ၊နိုင်ငံတော်၏အကျိုး၊ ဆန်စပါးကဏ္ဍအကျိုးနှင့် ဆန်စပါး လုပ်ငန်းလုပ်ကိုင်ဆောင်ရွက်သူတို့၏ အကျိုးစီးပွားတို့ကို တည်ဆဲဥပဒေများ၊ လမ်းညွှန်ချက်များနှင့်အညီ စီးပွားရေးလုပ်ငန်းအသင်းအဖွဲ့များအတွက် သတ်မှတ်ချက်များ၊ အသင်းအဖွဲ့စည်းမျဥ်း၊ အသင်းအဖွဲ့မှတ်တမ်းများနှင့်အညီ ဖွဲ့စည်းဆောင်ရွက်ရသည်ကို အကျယ်တဝင့်ရှင်း လင်းဆွေး နွေးခဲ့ပါသည်။ ဒုခရိုင်ဦးစီးမှူးမှ အသင်းအဖွဲ့ရွေးချယ်မှုဆိုင်ရာ အသင်းအဖွဲ့ရွေးချယ်ပုံ အဆင့်ဆင့်အား ရှင်းလင်းဆွေးနွေးပြီး တက်ရောက်လာသည့် လုပ်ငန်းရှင်များမှ အဆိုပြုစနစ်ဖြင့် ရွေးချယ်ခဲ့ရာ ခရိုင်ဆန်စပါးကုန်သည်များအသင်းကို အဖွဲ့ဝင် (၁၇) ဦးဖြင့် ဖွဲ့စည်းခဲ့ကြောင်း သိရှိရပါသည်။

DOCA(ဧရာဝတီ)