သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ ကြံခင်းမြို့နယ်တာဝန်ခံသည် (၁၄.၁၀.၂၀၂၄)ရက်နေ့၊ နံနက် (၀၉:၀၀) နာရီအချိန်တွင် ရွာသစ်ရပ်ရှိ သိပ္ပံလမ်းနှင့် ဘုရားကြီးလမ်းတွင် Online စနစ်ဖြင့်ရောင်းချ လျက်ရှိသော အဝတ်အထည်( Fashion Store )နှင့် သီးစုံဖျော်ရည်၊ အသင့်စားအစားအစာ ရောင်းချသောလုပ်ငန်းများသို့ အွန်လိုင်းမှတ်ပုံတင်ထားမှု ရှိ/ မရှိ ကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။
ထိုသို့ကွင်းဆင်းရာတွင် ကြံခင်းမြို့နယ်တာဝန်ခံ ဦးကျော်နိုင်ဝင်းမှ Online စနစ်ဖြင့်ရောင်းချ နေသော အ‌ရောင်းဆိုင်များသို့ မှတ်ပုံတင်လက်မှတ်လျှောက်ထားမှုနှင့် စပ်လျဉ်း၍ မြေပြင်ကွင်းဆင်းဆောင်ရွက်ရာတွင် လုပ်ငန်းရှင်များ လျှောက်လွှာပုံစံတွင် ဖြည့်သွင်းထားသည့် လိပ်စာအတိုင်း လုပ်ငန်းအမှန်တစ်ကယ် တည်ရှိခြင်းရှိ/ မရှိ ၊ မှတ်ပုံတင်လက်မှတ်လျှောက်ထားစဉ်က ရောင်းချရန် တင်ပြထားသော ကုန်စည်(သို့)ဝန်ဆောင်မှု အမျိုးအစားစာရင်းအတိုင်း မြေပြင်တွင် အမှန်တစ်ကယ်ရောင်းချနေသော စာရင်းကိုက်ညီမှုရှိ/ မရှိ တို့ကို စစ်ဆေးခဲ့ပြီး၊ မှတ်ပုံတင်လက်မှတ်ရရှိသူ၏ တာဝန်ဖောက်ဖျက်မှုရှိ/ မရှိ ၊ အစားအသောက်ကုန်စည်ရောင်းချရာတွင် ကုန်အညွှန်းအမှတ်အသား ပြည့်စုံစွာဖော်ပြရန်နှင့် အစားအသောက်နှင့် ဆေးဝါးကွပ်ကဲရေးဦးစီးဌာနမှ သတ်မှတ်ထုတ်ပြန် ထားသော လမ်းညွှန်ချက်များအတိုင်းလိုက်နာဆောင်ရွက်စေရေး အသိပညာပေးခြင်း၊ ဈေးကွက်စောင့်ကြည့်စစ်ဆေးခြင်းတို့ကို ဆောင်ရွက်ခဲ့ကြောင်း သိရှိရပါသည်။
DOCA(ဧရာဝတီ)

           (၁၁-၁၀-၂၀၂၄) ရက်နေ့၊ နေ့လယ် (၁၅း၃၀) နာရီအချိန်တွင် ဧရာဝတီတိုင်းဒေသကြီးဦးစီးမှူးရုံးမှ ဒု-တိုင်းဒေသကြီးဦးစီးမှူး ဦးထွန်ထွန်းနှင့်အဖွဲ့သည် မအူပင်ခရိုင်ဦးစီးမှူးရုံးသို့လာရောက်၍ မအူပင်မြို့နယ်အတွင်း Online Shop ရောင်းချသူလုပ်ငန်းရှင် (၁၈)ဦးနှင့်တွေ့ဆုံ၍ ကုန်စည်နှင့် ဝန်ဆောင်မှုများကို အွန်းလိုင်းရောင်းချမှုနှင့်စပ်လျဉ်း၍ မှတ်ပုံတင်ဆောင်ရွက်ပြီး လုပ်ကိုင်ဆောင်ရွက်နိုင်ရန်ကို အရေးကြီးကုန်စည်နှင့် ဝန်ဆောင်မှုဥပဒေအကြောင်း အသိပညာပေးရှင်းလင်းဟောပြောခဲ့ပါသည်။

            ထိုသို့အသိပညာပေးဆွေးနွေးရာတွင် ခေတ်မီလာသော ယနေ့ခတ်ကာလတွင် စားသုံးသူတို့သည် ကုန်စည်နှင့် ဝန်ဆောင်မှုတွေကို အွန်လိုင်းမှဝယ်ယူပြီး အသုံးပြုလာကြသဖြင့် စားသုံးသူအများပြည်သူများ အွန်လိုင်းမှဝယ်ယူမှုများ၊ နစ်နာမှုလိမ်လည်ခံရမှုများမရှိစေရန် အွန်လိုင်းစနစ်ဖြင့်ရောင်းဝယ်မှုကို ထိန်ကြောင်းဆောင်ရွက်နိုင်ရန် ဥပဒေဖြင့်ကာကွယ်ပေးနိုင်ရန် အစိုးရဌာနအသီးသီးက သက်ဆိုင်ရာဥပဒေစည်မျည်းစည်းကမ်းများထုတ်ပြန်ပြီး ထိန်းကြောင်းဆောင်ရွက်ခြင်းဖြစ်ကြောင်း၊ အရေးကြီးကုန်စည်နှင့် ဝန်ဆောင်မှုဥပဒေအရ ၂၀၂၃ခုနှစ်၊ ဇူလိုင်လ ၂၁ရက်နေ့က အမိန့်ကြော်ငြာစာအမှတ် ၅၀/၂၀၂၃ ကိုထုတ်ပြန်ခဲ့ပြီး အွန်လိုင်းစနစ်ဖြင့်ရောင်းချသော လုပ်ငန်းများကို အရေးကြီးကုန်စည်နှင့် ဝန်ဆောင်မှုဥပဒေအဖြစ်သတ်မှတ်ပြီး မှတ်ပုံတင်လက်မှတ်လျှောက်ထားရရှိပြီးမှသာဆောင်ရွက်ခွင့်ရှိသော လုပ်ငန်းအဖြစ်သတ်မှတ်ပြီး ထုတ်ပြန်ခဲ့ခြင်းဖြစ်ကြောင်း၊ လုပ်ငန်းရှင်များအနေဖြင့် လုပ်ငန်းဆောင်ရွက်နိုင်ရန် ကြိုတင်ပြင်ဆင်နိုင်စေရန် အမိန့်ကြော်ငြာစာထုတ်ပြန်ပြီး ၆လအတွင်း ပြင်ဆင်ချိန်ကာလကို သတ်မှတ်ထားပြီးဖြစ်ပါကြောင်း၊ သတ်မှတ်ချိန်ကာလပြည့်မြောက်သည့်နေ့မှာ အွန်လိုင်းမှတ်ပုံတင်လျှောက်ထားခြင်းမရှိဘဲ ရောင်းချခြင်းမျိုးကိုစစ်ဆေးတွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေ ပုဒ်မ -၅ ဖြင့် အရေးယူဆောင်ရွက်မည်ဖြစ်ကြောင်း လုပ်ငန်းရှင်များသိရှိနိုင်ရန်  အသိပညာပေးခဲ့ပြီး အွန်လိုင်းမှတ်ပုံတင်ပြီးရောင်းချသောလုပ်ငန်း၏ အားသာချက်များနှင့် အောင်မြင်သော စီးပွားရေးတာဝန်ယူမှု ၊ တာဝန်ခံမှုရှိသော လုပ်ငန်းဖြစ်ကြောင်းကိုလည်း ရှင်းလင်းပြောကြားခဲ့သည်။ အွန်လိုင်းစနစ်ဖြင့် မှတ်ပုံတင်လျှောက်ထားရန် လုပ်ငန်းလိုအပ်သောအချက်များနှင့် သတ်မှတ်ချက်များကို သိရှိနိုင်ရန် Shop vedio ဖြင့် ချပြရှင်းလင်းဆွေးနွေးခဲ့ပြီး လုပ်ငန်းရှင်များက သိလိုသည်များမေးမြန်းကြကာ ပြန်လည်ရှင်းလင်းပေးခဲ့ပြီး ဟောပြောပွဲကို နေ့လယ် (၁၄း၃၀) နာရီအချိန်တွင် အောင်မြင်စွာရုပ်သိမ်းခဲ့ကြောင်းသိရပါသည်။

DOCA(ဧရာဝတီ)

ဧရာဝတီတိုင်းဒေသကြီး၊ စားသုံးသူရေးရာဦးစီးဌာန မြောင်းမြခရိုင် ဝါးခယ်မမြို့နယ်ရှိ တာဝန်ခံ ဦးအောင်မိုးနှင့်ဝန်ထမ်းများသည် (၁၄.၁၀.၂၀၂၄)ရက်နေ့ နေ့လယ်(၁၃:၃၀)နာရီအချိန်တွင် ဝါးခယ်မမြို့နယ် ရှိပုဂ္ဂလိကမော်တော်ယာဉ်များစနစ်တကျ ပြေးဆွဲကြီးကြပ်ရေးကော်မတီအသင်း ဥက္ကဌဦးသန်းအောင်နှင့် မော်တော်ယာဉ်ကြီးကြပ်ရေးကော်မတီရုံးတွင်တွေ့ဆုံကာ မော်တော်ယာဉ်များစနစ်တကျပြေးဆွဲနိုင်ရေးနှင့် ပတ်သက်၍ဆွေးနွေးခဲ့ပါသည်။
ထိုသို့ဆွေးနွေးဆောင်ရွက်ရာတွင် ပုဂ္ဂလိကမော်တော်ယာဉ်များစနစ်တကျပြေးဆွဲရေးအသင်း ဥက္ကဌမှ အဖွဲ့ဝင်များ သက်သာချောင်ချိရေးအတွက် စီမံဆောင်ရွက်လျက်ရှိပြီး မြို့နယ်အတွင်းဘာသာ၊ သာသနာ၊ လူမှုရေးကိစ္စများ ပါဝင်ဆောင်ရွက်လျက်ရှိပြီး အသင်းကို ယခင်ကအသင်းဝင်(၃၀)ဦးဖြင့်ဖွဲ့စည်း ထားပါသည်။ ၂၀၂၄-၂၀၂၅ ခုနှစ်တွင်လည်း မော်တော်ယာဉ်များစနစ်တကျပြေးဆွဲနိုင်ရေးအတွက် ဆောင်ရွက်လျက်ရှိပြီး အသင်း၏ဖွံ့ဖြိုးတိုးတက်မှုကိုဆက်လက်ဆောင်ရွက်လျက် ဒေသဆိုင်ရာအဖွဲ့ အစည်းများနှင့်လည်းပူးပေါင်းဆောင်ရွက်လျက် မော်တော်ယာဉ်များစနစ်တကျပြေးဆွဲနိုင်ရေး၊ အသင်း အနေဖြင့်အသင်းတိုးတက်ရေးတွင်လည်း အခက်အခဲမရှိ ဆောင်ရွက်သွားမည်ဖြစ်ကြောင်း အသင်းအား ၁.၇.၂၀၂၄ နေ့တွင် အသင်းဝင်(၁၂၅)ဦးဖြင့် အသစ်ပြန်လည်ဖွဲ့စည်းခဲ့ပြီး ရွာလယ်ရပ်ကွက်ရှိ ရွှေခယ်ဧရာ အဝေးပြေးကားဝန်းတွင် ပုဂ္ဂလိကမော်တော်ယာဉ်များ စနစ်တကျပြေးဆွဲနိုင်ရေးကို ဆွေးနွေးခဲ့ကြောင်း သိရပါသည်။
DOCA(ဧရာဝတီ)

ဧရာဝတီတိုင်းဒေသကြီး၊ စားသုံးသူရေးရာဦးစီးဌာန မြောင်းမြခရိုင်၊ လပွတ္တာမြို့နယ်တာဝန်ခံ ဦးမြင့်ဌေးနှင့် ဝန်ထမ်းများသည် လပွတ္တာမြို့နယ်စားသုံးသူရေးရာဦးစီးဌာန မြို့နယ်တာဝန်ခံရုံး၌ (၁၄.၁၀.၂၀၂၄)ရက်နေ့ နံနက်(၁၁:၁၀)နာရီအချိန်တွင် လပွတ္တာမြို့နယ်အတွင်းရှိ စက်သုံးဆီရောင်းချ နေသောဆိုင်ပိုင်ရှင်များအား ခေါ်ယူ၍စားသုံးသူအသိပညာပေးဟောပြောဆောင်ရွက်ခဲ့ပါသည်။ ထိုသို့ဟောပြောဆောင်ရွက်ရာတွင် လပွတ္တာမြို့နယ်တာဝန်ခံမှ လပွတ္တာမြို့နယ်အတွင်းရှိ လိုင်စင်ရစက်သုံးဆီ(၆)ဆိုင်၏ လုပ်ငန်းရှင်များအား စားသုံးသူရေးရာဦးစီးဌာနရုံးသို့ ခေါ်ယူ၍မိမိတို့ ရောင်းချနေသောစက်သုံးဆီများအား လက်လီ/ လက္ကားရောင်းချနေမှုအပေါ် သတ်မှတ်ရည်ညွှန်းဈေးနှုန်းဖြင့် ရောင်းချရန်၊ ဈေးနှုန်းမြှင့်တင်ရောင်းချမှုမရှိစေရန်၊ အလေးချိန်ပြည့်ဝမှန်ကန်စွာရောင်းချကြရန်၊ စည်းမျဉ်းစည်းကမ်းများနှင့် အညီ စနစ်တကျဖြန့်ဖြူးရောင်းချကြရန် ရှင်းလင်းပြောကြားခဲ့ပြီး ဆိုင်ပိုင်ရှင်များအား စက်သုံးဆီရောင်းချမှုအခြေအနေနှင့် လက်ရှိဖြစ်ပေါ်နေသော စက်သုံးဆီဈေးနှုန်းကြီးမြင့်နေမှုကို မိမိတို့ဆိုင်များအနေဖြင့် ပြည်သူများအားဈေးနှုန်းမြှင့်တင်ရောင်းချခြင်းမပြုကြရန်၊ သတ်မှတ်ဈေးနှုန်းဖြင့်သာရောင်းချကြရန်၊ ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ထားရှိခြင်းများစစ်ဆေးတွေ့ရှိပါက အရေးကြီးကုန်စည်နှင့်ဝန်ဆောင်မှု ဥပဒေအရအရေးယူဆောင်ရွက်သွားမည်ဖြစ်ကြောင်း စက်သုံးဆီဆိုင်ပိုင်ရှင်များအား ရှင်းလင်းဆွေးနွေးပြောကြားခဲ့ပါသည်။
DOCA(ဧရာဝတီ)

         ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံ (စစ်ဆေးရေးအရာရှိ) ဦးမိုးမင်းသန်းနှင့် ဝန်ထမ်းတို့သည် ၂၀၂၄ခုနှစ်၊ အောက်တိုဘာလ(၁၁) ရက်နေ့၊ နေ့လယ် (၁၃:၀၀) နာရီအချိန်တွင် ကျိုက်လတ်မြို့နယ်၊ ဆန်စက်အသင်းရုံး၌ လုပ်ငန်းရှင်များအား Online Sales ကိစ္စရပ်များနှင့်ပတ်သက်၍ အသိပညာပေးဟောပြောခဲ့ပါသည်။

          အဆိုပါအသိပညာပေးဟောပြောပွဲတွင် မြို့နယ်တာဝန်ခံ ဦးမိုးမင်းသန်းက အွန်လိုင်းစနစ်ဖြင့် ရောင်းချခြင်းလုပ်ငန်းဆောင်ရွက်မည်ဆိုပါက ဦးစီးဌာနကသတ်မှတ်ထားသော လျှောက်လွှာပုံစံတွင်ဖြည့်သွင်း၍ (online) စနစ်ဖြင့် ဦးစီးဌာနသို့ မှတ်ပုံတင်လက်မှတ်လျှောက်ထားရမည်ဖြစ်ကြောင်း၊ မှတ်ပုံတင်လက်မှတ်လျှောက်ထားသူသည် ပြည်ထောင်စုသမ္မတမြန်မာနိုင်ငံသားဖြစ်ပြီး အသက်(၁၈) နှစ်ပြည့်ပြီးသူဖြစ်ရမည်ဖြစ်ကြောင်း၊ အွန်လိုင်းစနစ်ဖြင့် ရောင်းချခြင်းလုပ်ငန်းဆောင်ရွက်မည့်နေရာကို တင်ပြနိုင်ရမည်ဖြစ်ပြီး၊ မှတ်ပုံတင်လက်မှတ်ရရှိထားပါက စားသုံးသူ၏တိုင်ကြားမှုတွင် ဥပဒေအရ ကာကွယ်ခုခံပိုင်ခွင့်ရှိပြီး၊ ကုန်စည် (သို့မဟုတ်) ဝန်ဆောင်မှုကိုရောင်းချရာတွင် သဘောတူညီချက်၊ တန်ဖိုးတို့နှင့်အညီ ငွေပေးချေမှုကို လက်ခံရယူပိုင်ခွင့်ရှိခြင်း စသည့် အွန်လိုင်းမှတ်ပုံတင်ခြင်းဆိုင်ရာ ကိစ္စရပ်များနှင့်စပ်လျဉ်း၍ အားသာချက်များကို အသိပညာပေးဟောပြောခဲ့ကြောင်း သတင်းရရှိပါသည်။

DOCA(ဧရာဝတီ)