သတင်းနှင့် လှုပ်ရှားမှုများ

         ပဲခူးတိုင်းဒေသကြီး၊ သာယာဝတီခရိုင်အတွင်းရှိ မြို့နယ်များဖြစ်သော သာယာဝတီ၊ လက်ပံတန်း၊ မင်းလှ၊ မိုးညို၊ အုတ်ဖို၊ ကြို့ပင်ကောက်မြို့များ၌ ပဲခူးတိုင်းဒေသကြီး အစိုးရအဖွဲ့၏ လမ်းညွှန်မှုဖြင့် မြို့နယ်စီမံအုပ်ချုပ်ရေးအဖွဲ့ဥက္ကဌ၏ကြီးကြပ်မှုဖြင့် ထိုမြို့နယ်များအတွင်းရှိ အထွေထွေအုပ်ချုပ်ရေးဦးစီးဌာန၊ စားသုံးသူရေးရာဦးစီးဌာန၊ ငါးလုပ်ငန်းဦးစီးဌာန၊ စည်ပင် သာယာရေးအဖွဲ့၊ မွေးမြူရေးနှင့်ကုသရေးဦးစီးဌာနများ ပူးပေါင်းကာ ၂၀၂၃ခုနှစ် ဇွန်လမှ စတင်၍ ယခု၂၀၂၄ခုနှစ် ဧပြီလအထိ အခြေခံစားသောက်ကုန်များကို ပြင်ပပေါက်ဈေးထက် ဈေးနှုန်း သက်သာစွာဖြင့် ပြည်သူများထံသို့ နေ့စဉ်ရောင်းချလျက်ရှိပါသည်။

          အခြေခံစားသောက်ကုန်များဖြစ်သော ဆန်၊ ဆီ၊ ကြက်သား၊ ဝက်သား၊ အမဲသား၊ ဆိတ်သား၊ ငါး၊ ကြက်ဥနှင့်ဟင်းသီးဟင်းသီးရွက်များကို သက်သာသောဈေးနှုန်းဖြင့် ဒေသခံ ပြည်သူများကို နေ့စဉ်နံနက် (၀၇:၀၀) နာရီမှစတင်၍ ရောင်းချပေးလျက်ရှိပါသည်။ ၂၀၂၄ခုနှစ် ဧပြီလအတွင်းသင်္ကြန်ရက်ပိုင်းမှ ယခုဧပြီလနောက်ဆုံးပတ်အတွင်း ရောင်းချလျက်ရှိသော ဈေးနှုန်းများအနေဖြင့် စားသုံးသူပြည်သူများအား ဆန်တစ်ပြည်လျှင် ၃၁၀၀ ကျပ်၊ ဆန်တစ်ပြည် လျှင် ၂၅၀၀ ကျပ်၊ ကြက်သား(စီပီ) အကောင်လိုက်တစ်ပိဿာလျှင် ၈၀၀၀-၉၀၀၀ ကျပ်၊ ဝက်သားတစ်ပိဿာ ၁၃၀၀၀ ကျပ်၊  အမဲသားတစ်ပိဿာ ၁၄၀၀၀ ကျပ်၊ ဆိတ်သား တစ်ပိဿာ ၂၀၀၀၀ ကျပ်၊ ငါးမြစ်ချင်းတစ်ပိဿာ ၅၀၀၀ ကျပ်၊ ကြက်ဥတစ်လုံး ၂၃၀ ကျပ်၊ ဘဲဥတစ်လုံး ၃၅၀ ကျပ်ဖြင့် အသီးသီးရောင်းချပေးလျက်ရှိပါကြောင်း သိရှိရပါသည်။

DOCA(ပဲခူး)

          ပဲခူးတိုင်းဒေသကြီး သာယာဝတီခရိုင် ကြို့ပင်ကောက်မြို့နယ် ဖုန်းဆိုးစုအုပ်စု၊ ရဲတမံရွာ ထိပ်တွင် ဧက(၃)ဧက ခန့်ရှိသော နေရာ၌ တိုးမြင့်နို့စားနွားမွေးမြူရေးခြံသို့ (၂၅.၄.၂၀၂၄)ရက်နေ့ နံနက် (၁၀:၀၀) နာရီတွင် စားသုံးသူရေးရာဦးစီးဌာန ကြို့ပင်ကောက်မြို့နယ်တာဝန်ခံနှင့် တိရိစ္ဆာန်မွေးမြူရေးနှင့်ကုသရေးဦးစီးဌာနမှ ဦးစီးမှူးတို့သည် နွားမွေးမြူထားသော အခြေအနေ အား သိရှိနိုင်ရန် သွားရောက်ခဲ့ပါသည်။

         "တိုးမြှင့်” နို့စားနွားမွေးမြူခြင်းလုပ်ငန်းအား ပိုင်ရှင် ဦးမျိုးမျိုး သည် နိုင်ငံစီးပွားမြှင့်တင် ရေးရန်ပုံငွေမှ MSMEs လုပ်ငန်းဖြစ်သော နွားမွေးမြူရေး ခြံဆောက်လုပ်ရန်အတွက် နို့နှင့် နို့ထွက် ပစ္စည်း ထုတ်လုပ်ရာတွင် အထောက်အကူဖြစ်စေရန် ချေးငွေရယူဆောင်ရွက်ခဲ့ကာ တစ်နှစ် ပြည့်တော့မည်ဖြစ်ပြီး အဆောက်အဦဆောက်လုပ်ရာတွင်လည်းပြီးစီး၍ နွားကောင်ရေ (၂၀) အား မွေးမြူထားပြီး ဖြစ်ပါသည်။ နွားထီး(၂)ကောင်၊ နွားမ(၁၂) ကောင်၊ နွားအကောင်လေး(၆) ကောင် ရှိပြီး ယခုဆိုလျှင် တစ်နေ့ (နေ့+ည) နွားနို့ ပိဿာ (၅၀) ပိဿာခန့် ရရှိကြောင်း ကိုယ်ပိုင် “တိုးမြင့်” ဒိန်ချဉ် လုပ်ငန်းအတွက် အသုံးပြုလျက်ရှိပါကြောင်း ဆက်လက်၍လည်း နွားကောင်ရေများတိုးချဲ့ မွေးမြူသွားနိုင်ရန် ကြိုးစားလျက်ရှိပါကြောင်းကို တာဝန်ရှိသူမှ ပြောကြားခဲ့ကာ လုပ်ငန်းရှင်နှင့် တွေ့ဆုံမေးမြန်းကွင်းဆင်းခဲ့ကြောင်း သိရှိရပါသည်။

DOCA(ပဲခူး)

        စားသုံးသူရေးရာဦးစီးဌာန သာယာဝတီခရိုင် အုတ်ဖိုမြို့နယ်တာဝန်ခံနှင့် ဝန်ထမ်းများ သည် (၂၆.၄.၂၀၂၄) ရက်နေ့တွင် မိတ်ဖက်ဌာနများနှင့် ပူးပေါင်း၍ ကွင်းဆင်းစစ်ဆေးခြင်း ပြုလုပ်ခဲ့ ပါသည်။

       တိုင်းဒေသကြီး အစားအသောက်နှင့် ဆေးဝါးကွပ်ကဲရေးကော်မတီ၏ ညွှန်ကြားချက်အရ စားသုံးသူရေးရာဦးစီးဌာန သာယာဝတီခရိုင် အုတ်ဖိုမြို့နယ်တာဝန်ခံနှင့် ဝန်ထမ်းများသည် မြို့နယ်အစားအသောက်နှင့်ဆေးဝါးကွပ်ကဲရေးဦးစီးဌာနမှ ဥက္ကဌ ဒေါက်တာစိုးသက်ဝင်း ဦးဆောင် သော မြို့နယ်စီမံအုပ်ချုပ်ရေးအဖွဲ့ ၊ မြို့နယ်ရဲတပ်ဖွဲ့၊ မြို့နယ်စည်ပင်သာယာရေးအဖွဲ့တို့ပါဝင်သော ပူးပေါင်းအဖွဲ့ဝင်များနှင့် အုတ်ဖိုမြို့နယ်ရှိ ဆေးဝါး အရောင်းဆိုင်များသို့ ကွင်းဆင်းကာ တရားမဝင်သော ဆေးဝါးများရောင်းချခြင်း ရှိ / မရှိ ၊ ဆေးဝါးများအား ကောင်းမွန်သော ရောင်းချမှုကျင့်စဉ်(Good  Pharmacy Practice) ဖြင့် ရောင်းချရန်၊ စပ်ဆေးများ ရောင်းချမှု မရှိစေရန်၊ သက်တမ်းလွန်ဆေးဝါးများရောင်းချခြင်း မပြုကြရန်နှင့် အထက်ပါအကြောင်းအရာများ အား ဖောက်ဖျက်ကျူးလွန်ပါက အရေးယူဆောင်ရွက်သွားမည့် ပြစ်မှု/ပြစ်ဒါဏ်များအား ရှင်းလင်း ပြောကြားခဲ့ပါသည်။

DOCA(ပဲခူး)

          ပဲခူးတိုင်းဒေသကြီး၊ သာယာဝတီခရိုင် လက်ပံတန်းမြို့၌ စားသုံးသူရေးရာဦးစီးဌာန သာယာဝတီခရိုင်ဦးစီးမှူး၏ လမ်းညွှန်မှုဖြင့် ၂၉.၄.၂၀၂၄ ရက်နေ့ နံနက်(၁၀:၀၀)နာရီအချိန်တွင် မြို့မဈေးအပြင်တန်းရှိဆေးနှင့် ဆေးပစ္စည်းဆိုင်များဖြစ်သော ဒီလှိုင်းစတိုး၊ ကိုဖိုးချိုဆေးဆိုင်များ အား ကုန်အညွှန်းအမှတ်အသားများ ပြည်စုံစွာဖော်ပြခြင်း ရှိ/မရှိ ကို လက်ပံတန်းမြို့နယ်တာဝန်ခံ ဦးချစ်ကိုကိုနှင့် ဦးကိုကိုနိုင် တို့မှ ဈေးကွက်စောင့်ကြည့် စစ်ဆေးခဲ့ပါသည်။

        အဆိုပါကွင်းဆင်းစစ်ဆေးမှုတွင် စားသုံးသူများ   တိကျမှန်ကန်ရှင်းလင်းသော သတင်း အချက်အလက်များ သိရှိစေရန်၊ စားသုံးသူများ ဘေးအန္တရာယ်ကင်းရှင်းစေရန်၊  စိတ်ကျေနပ်မှု ရှိစေရန် အာမခံချက်ပေးနိုင်သည့် အရည်အသွေးမြင့်မားသော ကုန်စည်ဝန်ဆောင်မှုများ ဖော်ဆောင် ဖြည့်ဆည်းပေးနိုင်စေရေးနှင့် စီးပွားရေးလုပ်ငန်းရှင်များအနေဖြင့် စားသုံးသူကာကွယ်ရေးဥပဒေအား သိရှိလိုက်နာဆောင်ရွက်ရန် အသိပညာပေးခြင်း၊ ကုန်စည်အမျိုးအစားအလိုက် သတ်မှတ်ချက်များနှင့်အညီ ပြည့်စုံစွာဖော်ပြခြင်း ရှိ/မရှိ ဈေးကွက်စောင့်ကြည့်စစ်ဆေးခဲ့ပြီး လက်ကမ်းစာစောင် များ ဖြန့်ဝေခဲ့ပါသည်။

DOCA(ပဲခူး)

               စားသုံးသူ‌ရေးရာဦးစီးဌာန ပဲခူးတိုင်းဒေသကြီး ညောင်လေးပင်ခရိုင်၊ ညောင်လေးပင် မြို့နယ် တာဝန်ခံနှင့် ဝန်ထမ်းများသည် မြို့နယ်စည်ပင်သာယာရေးအဖွဲ့ရှိ တာဝန်ရှိသူများနှင့် ပူးပေါင်းကာ ၂၀၂၄ခုနှစ် ဧပြီလအတွင်း ညောင်လေးပင်ခရိုင် ညောင်လေးပင်မြို့(မြို့မဈေး)၊ ၊  ပြွန်တန်ဆာ (စည်ပင်သာယာဈေး)နှင့် ညောင်လေးပင်ရှိ (ရက်ကွက်လက်လီဆိုင်) များရှိ စားသုံးဆီ ရောင်းချမှုပြုလုပ်နေသော ကုန်စုံဆိုင်များသို့ ဈေးကွက်စောင့်ကြည့်စစ်ဆေးခြင်းများ ပြုလုပ်ခဲ့ ပါသည်။

              ထိုသို့ သွားရောက်စစ်ဆေးခြင်းများ ပြုလုပ်ရာတွင် ဈေးကွကင်အတွင်း စားသုံးဆီ လက်လီရောင်းချနေသည့် ကုန်စုံဆိုင်များတွင် ရောင်းချလျက်ရှိသော (Goody) ဟင်းရွက်ဆီ ၊ (Diamond)  ဟင်းသီးဟင်းရွက်ဆီ၊ (Duck) ဟင်းသီးဟင်းရွက်ဆီ ၊ ( Meizan) နေကြာဆီ ၊ (LoTus) ဟင်းသီးဟင်းရွက်ဆီအစရှိသော စားသုံးဆီဗူးများတွင် ၂၀၁၉စားသုံးသူကာကွယ်ရေးဉပဒေ အခန်း (၁၈)၊ ပုဒ်မ(၄၁)အရ ကုန်အညွှန်းအမှတ်အသား ပြည့်စုံစွာပါဝင်မှု ရှိ/ မရှိ ၊ မြန်မာနိုင်ငံ စားသုံးသူကာကွယ်ရေးကော်မရှင်မှ ထုတ်ပြန်ထားသည့် ကုန်အညွှန်းအမှတ်သားများကို မြန်မာ ဘာသာဖြင့် ဖော်ပြခြင်းနှင့် စပ်လျဉ်း၍ ညွှန်ကြားချက်အမှတ် (၂/၂၀၁၉) နှင့်အညီ ‌ဖော်ပြထားခြင်း ရှိ/ မရှိ စစ်ဆေးခဲ့ရာတွင် အထက်ဖော်ပြပါအချက်များနှင့် ကိုက်ညီမှုရှိကြောင်း ဈေးကွက် စောင့်ကြည့်စစ်ဆေးမှုများအရ သိရှိရပါသည်။

              ဆက်လက်၍ ဈေးကွက်အတွင်း စားသုံးဆီရောင်းချသည့် ကိုယ်စားလှယ်များသည် ပြည်သူများထံသို့ စားသုံးဆီရောင်းချရာတွင် သတ်မှတ်ရည်ညွှန်းဈေးဖြင့် ရောင်းချရေး၊ သတ်မှတ် ဈေးနှုန်းရေးဆွဲထားသည့် ဗီနိုင်းများအား နေ့စဉ်ချိတ်ဆွဲရောင်းချနိုင်ရေးနှင့် ခွဲတမ်းရရှိသည့် ဆီပမာဏကိုလည်း ပြည်သူများထံ အပြည့်အဝ ရောင်းချနိုင်ရေးကို အသိပညာပေး ရှင်းလင်း ပြောကြားခဲ့၍ ဈေးကွက်အတွင်းရောင်းချနေသော စားသုံးဆီအမျိုးမျိုးတို့တွင်လည်း စားသုံးသူ ကာကွယ်ရေးဥပဒေပါ ကုန်အညွှန်းအမှတ်အသား ပြည့်စုံစွာပါဝင်မှုရှိ/ မရှိ ကို ကွင်းဆင်းစစ်ဆေး၍ အသိပညာပေးခြင်းများ ဆောင်ရွက်ခဲ့ပါသည်။

DOCA(ပဲခူး)