သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ စစ်ဆေးရေးမှူး ဦးတင်မောင်ထွန်းသည် ၁၀.၄.၂၀၂၄ ရက်နေ့၊ နံနက် (၁၁:၃၀) နာရီအချိန်တွင် မြစ်ကြီးနားမြို့၊ မန်ခိန်ရပ်ကွက်အတွင်းရှိ လက်လီဖြန့်ဖြူးရောင်းချသော ဦးပါရာကပ်(ကုန်စုံဆိုင်)သို့ သွားရောက်၍ စားသုံးသူများ ဘေးအန္တရာယ် ကင်းရှင်းပြီး ထုတ်ကုန်လုံခြုံစိတ်ချရမှု ရှိစေရေး၊ ဘေးအန္တရာယ်ရှိသော ကုန်စည်များ ဈေးကွက်အတွင်း မှ ပပျောက်စေရေးနှင့် စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းနှင့် ပတ်သက်၍ ကိုက်ညီမှု ရှိ/ မရှိ ဈေးကွက်စောင့်ကြည့်စစ်ဆေးခဲ့ပါသည်။

     ထိုသို့ဈေးကွက်စောင့်ကြည့်စစ်ဆေးရာတွင် ဆိမ့်ဆိမ့်လေး အမှတ်တံဆိပ်ပါ အာလူးဘီစကစ် အသင့်စားမုန့်တွင် ညွှန်ကြားချက်အမှတ် (၂/၂၀၁၉)အရ ကုန်စည်ပေါ်တွင် မြန်မာဘာသာဖြင့် ဖော်ပြရမည့် အမျိုးအမည်၊ အရွယ်အစား၊ အရေအတွက် အသားတင်ပမာဏ၊ ထားသိုသိမ်းဆည်မှု အညွှန်းနှင့် ဓါတ်မတည့်ကြောင်းဖော်ပြချက်တို့ ပြည့်စုံစွာ ဖော်ပြပါရှိကြောင်း စစ်‌ဆေးတွေ့ရှိရပြီး ကုန်စုံဆိုင်ပိုင်ရှင်အား ကုန်အညွှန်းအမှတ်အသား ပြည့်စုံမှုမရှိသည့် ကုန်စည်များ ဈေးကွကအတွင်း မရောင်းချရန် အသိပညာပေးဆွေးနွေးခဲ့ပြီး ကုန်အညွှန်းအမှတ်အသား ဖော်ပြခြင်းဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

     ၁၀.၄.၂၀၂၄ နေ့ ၊နံနက် (၁၀:၀၀) နာရီအချိန် စီပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး၌ ဒု-တိုင်းဒေသကြီး ဦးစီးမှူးဦးဆောင်၍ စစ်မှုထမ်းဟောင်းဥပဒေဆိုင်ရာအကြောင်းနှင့် ရုံးချုပ်၏လမ်းညွှန်မှုနှင့်အတူ အီလက်ထရောနစ်အငွေ့ရှူစက်များနှင့် ပတ်သက်၍ စားသုံးသူများအားနစ်နာမှုမရှိစေရန် ဘေးအန္တရာယ်ကာကွယ်ရေးဆိုင်ရာအသိပညာပေးဟောပြောပွဲ ကျင်းပရာ ဝန်ထမ်းနှင့်ဝန်ထမ်းမိသားစု စုစုပေါင်းလူဦးရေ (၆၅ )ဦးတက်ရောက်ကြောင်း သတင်းရရှိပါသည်။

      ဒု- တိုင်းဒေသကြီးဦးစီးမှူး ဒေါ်ရီလင်းထွဋ်က တက်ရောက်လာသူများအား စစ်မှုထမ်းဥပဒေနှင့် ပတ်သက်သည့်တက်ရောက်ရမည့်အရွယ် အသက်ကန့်သတ်ချက်၊ မဖြစ်မနေ ထမ်းဆောင်ရမည့်သူနှင့် စစ်မှုထမ်းကင်းလွတ်သည့်သူများ၏ အခြေအနေများ၊ လိုက်နာရမည့် ဥပဒေ စည်းကမ်းနှင့်အညီ ဆောင်ရွက်မည့်အချက်အလက်များကို အ‌သေးစိတ်ပြည့်စုံစွာရှင်းလင်းခြင်း၊ မိမိတို့ဌာနမှဆောင်ရွက် နေသောစားသုံးသူကာကွယ်ပေးရေးလုပ်ငန်းစဉ်များ၊ ရုံးချုပ်မှညွှန်ကြားလာသော အီလက်ထရောနစ် အငွေ့ရှူစက်များနှင့်ပတ်သက်၍ နည်းပညာတိုးတက်လာသည်နှင့်အမျှ ဆေးရွက်ကြီးထွက်ပစ္စည်းများကို အပူပေးပြီး အ‌ငွေ့ရှူရသော ပစ္စည်းများနှင့် ဆေးရွက်ကြီးနှင့်ပတ်သက်သည့် ဆက်စပ်ပစ္စည်းများ ဈေးကွက်အတွင်း နည်းမျိုးစုံဖြင့်ထင်ပေါ်စွာရောင်းချနေမှုများဖြစ်ပေါ်လာခြင်းကြောင့် မြန်မာနိုင်ငံရှိ စားသုံးသူပြည်သူများ နစ်နာမှုမရှိစေရန် ဆေးလိပ်၊ ကွမ်းစားသုံးမှုများ ကြိုတင်ကာကွယ်သတိထား ရှောင်ရှားနိုင်ရေးများအကြောင်းကို အကျယ်တဝင့် ဆွေးနွေး‌ဟောပြောပြီး အသိပညာပေးလက်ကမ်းစာစောင်များ ဖြန့်ဝေခဲ့ပါသည်။

DOCA(စစ်ကိုင်း)

     စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး၊ အစည်းအဝေးခန်းမ၌ ၁၀.၄.၂၀၂၄ ရက်နေ့တွင်  ဒု-တိုင်းဒေသကြီးဦးစီးမှူးက ပြည်သူ့စစ်မှုထမ်း ဥပဒေ ဆိုင်ရာ သိကောင်းစရာများအကြောင်းအား ထပ်မံရှင်းလင်းဆွေးနွေးခဲ့ရာ တိုင်းဒေသကြီးဦးစီးမှူးရုံးရှိ ဝန်ထမ်းများ(၄၆)ဦးနှင့် ဝန်ထမ်းများ၏မိသားစုဝင်များ/ မိတ်ဖက်အဖွဲ့အစည်းများနှင့် ပြည်သူ (၁၉)ဦး၊ စုစုပေါင်း (၆၅)ဦး တက်ရောက်ခဲ့ကြကြောင်း သိရှိရပါသည်။

     အဆိုပါရှင်းလင်းဆွေးနွေးပွဲရာတွင် ဒု-တိုင်းဒေသကြီးဦးစီးမှူးက ပြည်သူ့စစ်မှုထမ်းဥပဒေ ဆိုင်ရာအကြောင်းနှင့် ပတ်သက်၍ ပြည်သူ့စစ်မှုထမ်းဥပဒေကို ၂၀၁၀ ပြည့်နှစ်က အတည်ပြုပြီးသော ဥပဒေဖြစ်ပါကြောင်း၊ ဒို့တာဝန်အရေးသုံးပါးကို စောင့်ထိန်းရန်၊နိုင်ငံသားတိုင်း စစ်ပညာ သင်ကြားရန်နှင့် နိုင်ငံတော်ကာကွယ်ရေး တာဝန်ထမ်းဆောင်ရန် ၊ပြည်သူ့ စစ်မှုထမ်း ဥပဒေကို အသက်ဝင်အောင်ဆောင်ရွက်ခြင်းသည် ပြည်သူလူထုပါဝင်သော ကာကွယ်ရေး စနစ်တစ်ခု တည်ဆောက်ရန် ၊ မိမိရပ်ရွာဒေသကာကွယ်ရေးအတွက် ရပ်ရွာလူငယ်များ ပါဝင် သော ပြည်သူ့စစ်မှုထမ်းဥပဒေအောက်မှ ကာကွယ်ရေး အရန်တပ်ဖွဲ့ကြီး ပေါ်ပေါက်လာရန်  ဟူ၍ ရည်ရွယ်ချက်အနေဖြင့်(၃) ရပ်ရှိပါကြောင်း၊ ဗိုလ်ချုပ်အောင်ဆန်း၏ မိန့်ခွန်းကောက်နှုတ် ချက်တွင် ကျန်းမာသောလူမှန်သမျှ  စစ်ထဲမဝင်မနေရ စစ်မှုမထမ်းမနေရ စနစ်ဖြင့် နှစ်နှစ် တန်သည်ဖြစ်စေ၊ သုံးနှစ်တန်သည်ဖြစ်စေ ဝင်ရောက်စစ်မှု ထမ်းဆောင်ကြရမည်ဖြစ်ပါ ကြောင်း၊ စစ်ပညာသင်ကြားရန်နှင့် နိုင်ငံတော်ကာကွယ်ရေးအတွက် စစ်မှုထမ်းဆောင်နိုင်ရန် နိုင်ငံတော် အေးချမ်းသာယာရေးနှင့် ဖွံ့ဖြိုးရေးကောင်စီ၏ ၄.၁၁.၂၀၁၀ ပြည့်နှစ် ဥပဒေအမှတ် ၂၇/ ၂၀၁၀ ဖြင့် ပြဌာန်းခဲ့ပြီး ၂၀၂၄ ခုနှစ်၊ဖေဖော်ဝါရီလ ၁၀ ရက်နေ့တွင် စတင်အသက်ဝင်ကြောင်း ပြောကြားခဲ့ပါသည်။

     ဆက်လက်၍ စစ်မှုထမ်းရမည့် အမျိုးသား/ အမျိုးသမီးအသက်အပိုင်းအခြားအလိုက် အမျိုးသား အသက် ၁၈ နှစ်မှ ၃၅ နှစ် ၊အမျိုးသမီး အသက် ၁၈ နှစ်မှ ၂၇ နှစ်၊ ကျွမ်းကျင်သူအမျိုးသား အသက် ၁၈ နှစ်မှ ၄၅ နှစ်၊ကျွမ်းကျင်သူအမျိုးသမီး အသက် ၁၈ နှစ်မှ ၃၅ နှစ်အရွယ်ရောက်သူတိုင်းစစ်မှုထမ်းရမည်ဖြစ်ကြောင်း၊ ပြည်သူ့စစ်မှုထမ်းရန်ကာလအကြောင်း၊ ပြည်သူ့စစ်မှုထမ်းတို့၏ ခံစားခွင့်များ အကြောင်း၊  နိုင်ငံခြားတိုင်းပြည်များတွင် ဆောင်ရွက် နေသော စစ်မှုမထမ်းမနေရဥပဒေအကြောင်း၊ ပြည်သူ့စစ်မှုထမ်းဥပ‌ဒေထမ်းဥပဒေသည် ဥပဒေပြ ဌာန်းလိုက်သည်နှင့် ချက်ချင်းစစ်မှုထမ်းရန် ခေါ်ယူမည်မဟုတ်ကြောင်း၊ အချိန်အခါအရ လိုအပ်၍ ဥပဒေအာဏာတည်ကြောင်းကို ထုတ်ပြန်ကြေညာခြင်းဖြစ်ကြောင်း ၊လက်တွေ့ ကျင့်သုံးရန်အတွက် လိုအပ်သော နည်းဥပဒေများ၊ လုပ်ထုံးလုပ်နည်းများ၊ အမိန့်ကြော်ငြာစာများ အဆင့်ဆင့်အကြောင်းရှင်းလင်းဆွေးနွေးခဲ့ပြီး လက်ကမ်းစာစောင်များ ဖြန့်ဝေခဲ့ကြောင်းသိရှိရပါသည်။

DOCA(စစ်ကိုင်း)

     တောင်ငူခရိုင်၊ အုတ်တွင်းမြို့နယ်တွင် အသေးစား၊ အငယ်စားနှင့် အလတ်စား စီးပွားရေးလုပ်ငန်းများဖွံ့ဖြိုးတိုးတက်ရေးဆိုင်ရာ ညှိနှိုင်းအစည်းအဝေးကို ၂၀၂၄ခုနှစ်၊ ဧပြီလ ၂ရက်နေ့၊ နံနက်ပိုင်းတွင် အုတ်တွင်းမြို့နယ်အထွေထွေအုပ်ချုပ်ရေးဦးစီးဌာန၊ သီရိရတနာခန်းမ၌ကျင်းပခဲ့ရာ စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်အေးအေးခိုင်တက်ရောက်၍ သက်ဆိုင်ရာဌာနများနှင့် လုပ်ငန်းရှင်များ၏မေးမြန်းချက်များကို ရှင်းလင်းဆွေးနွေးခဲ့ပါသည်။

      အစည်းအဝေးတွင် မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးညီညီက အဖွင့်အမှာစကားပြောကြားခဲ့ပြီး စက်မှုကြီးကြပ်ရေးနှင့်စစ်ဆေးရေးဦးစီးဌာန၊ ခရိုင်ဦးစီးမှူး ဦးနေထွန်းဝင်းနှင့် အသေးစားစက်မှုလက်မှုလုပ်ငန်းဦးစီးဌာန၊ ခရိုင်ဦးစီးမှူး ဒေါ်နှင်းနန္ဒာလှိုင်တို့က သက်ဆိုင်ရာကဏ္ဍများအလိုက် ရှင်းလင်းဆွေးနွေးခဲ့ကြပြီး စားသုံးသူရေးရာဦးစီးဌာန မြို့နယ်တာဝန်ခံ ဒေါ်အေးအေးခိုင်ကလည်း အသေးစား၊ အငယ်စားနှင့် အလတ်စား စီးပွားရေးလုပ်ငန်းများဖွံ့ဖြိုးတိုးတက်ရေးအတွက် သက်ဆိုင်ရာဌာနများနှင့်အတူ MSMEs ထုတ်ကုန်များနှင့်ပတ်သက်၍ ဈေးကွက်ရှာဖွေဖော်ထုတ်ပေးနိုင်မည့် အခြေအနေများကိုဆွေးနွေးခဲ့ပါသည်။

      ဆက်လက်၍ တက်ရောက်လာသောလုပ်ငန်းရှင်များ၏ မေးမြန်းချက်များကို မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌနှင့် သက်ဆိုင်ရာ ဌာနဆိုင်ရာတာဝန်ရှိသူများက ပြန်လည်ရှင်းလင်းဆွေးနွေးခဲ့ကြကြောင်းနှင့် အစည်းအဝေးသို့ မြို့နယ်စီမံအုပ်ချုပ်ရေးအဖွဲ့ဝင်များ၊ မြို့နယ်အဆင့် ဌာနဆိုင်ရာများမှ တဝန်ရှိသူများနှင့် အုတ်တွင်းမြို့နယ်မှ စီးပွားရေးလုပ်ငန်းရှင် ၂၄ဦးတက်ရောက်ခဲ့ကြကြောင်းသိရှိရပါသည်။

DOCA(ပဲခူး)

   စားသုံးသူရေးရာဦးစီးဌာန၊ တောင်ငူခရိုင်၊ တောင်ငူမြို့နယ်တာဝန်ခံ ဦးမြင့်သူသည် မြို့နယ်စီမံအုပ်ချုပ်ရေးကောင်စီဥက္ကဋ္ဌ ဦးဉာဏ်လင်းအောင်နှင့်အတူ တောင်ငူမြို့ပေါ်ရှိ ကုန်ထုတ်လုပ်မှုလုပ်ငန်းများသို့ သွားရောက်စစ်ဆေးရာတွင် လိုက်ပါဆောင်ရွက်ခဲ့ပြီး စက်ရုံလုပ်သားများအား စားသုံးသူ ကာကွယ်ရေးဆိုင်ရာများကို အသိပညာပေးပြောကြားခဲ့ပါသည်။

        မြို့နယ်စီမံအုပ်ချုပ်ရေးအဖွဲ့ဥက္ကဋ္ဌဦးဆောင်၍ ဧပြီလ ၃ရက်နေ့၊ နေ့လယ်ပိုင်းတွင် တောင်ငူမြို့၊ အမှတ်(၂၃)ရပ်ကွက်၊ ခြင်္သေ့ဦးရှိ ရှယ်တောင်ကြီးမုန့်ဖတ်ခြောက်လုပ်ငန်းသို့လည်းကောင်း၊ ဧပြီလ ၄ရက်နေ့၊ နံနက်ပိုင်းတွင် အမှတ်(၁၁)ရပ်ကွက်၊ ကျုံးပတ်လမ်းရှိ မိဘမေတ္တာဆန်စက်သို့လည်းကောင်း ရောက်ရှိစစ်ဆေးခဲ့ပြီး မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌနှင့် အဖွဲ့ဝင်ဌာနဆိုင်ရာအကြီးအကဲများအား သက်ဆိုင်ရာဌာနအလိုက် သိသင့်သိထိုက်သည်များကို အသိပညာ ပေးပြောကြားခဲ့ပါသည်။

      စားသုံးသူရေးရာဦးစီးဌာန၊ မြို့နယ်တာဝန်ခံက စားသုံးသူအခွင့်အရေးနှင့်တာဝန်များ၊ စားသုံးသူနစ်နာဆုံးရှုံးမှုများဖြစ်ပေါ်ပါက တိုင်ကြားနိုင်ခြင်းများကို အသိပညာပေးပြောကြားခဲ့ကြောင်းနှင့် ဟောပြောပွဲသို့ ရှယ်တောင်ကြီးမုန့်ဖတ်ခြောက်လုပ်ငန်းမှ စက်ရုံပိုင်ရှင်နှင့် စက်ရုံလုပ်သား ၂၅ဦး၊ မိဘမေတ္တာဆန်စက်မှ စက်ရုံပိုင်ရှင်နှင့် စက်ရုံလုပ်သား ၄၅ဦးတက်ရောက်ခဲ့ကြောင်းသိရပါသည်။

DOCA(ပဲခူး)