သတင်းနှင့် လှုပ်ရှားမှုများ

    ၂၀၂၄ ခုနှစ်၊ မတ်လ(၁၅)ရက်နေ့တွင် ကျရောက်သည့် ကမ္ဘာ့စားသုံးသူ အခွင့်အရေးများနေ့ အခမ်းအနားကို ရှမ်းပြည်နယ်တောင်ပိုင်း၊ တောင်ကြီးမြို့ရှိ ကုန်သည်များနှင့် စက်မှုလက်မှုလုပ်ငန်းရှင်များ အသင်းရုံး(SSSCCI) ခန်းမ၌ ကျင်းပဆောင်ရွက်ခဲ့ရာ နံနက်(၀၉:၃၀) နာရီအချိန်တွင် အခမ်းအနား စတင်ဖွင့်လှစ်ခဲ့ပြီး အဆိုပါအခမ်းအနားသို့ ရှမ်းပြည်နယ် ဝန်ကြီးချုပ် ဦးအောင်အောင်နှင့် ရှမ်းပြည်နယ် အစိုးရအဖွဲ့ဝင် ဝန်ကြီးများ၊ ဌာနဆိုင်ရာ အသီးသီးမှ အရာရှိ/ အမှုထမ်းများ၊ အသင်း အဖွဲ့များ၊ ကုန်သည်လုပ်ငန်းရှင်များနှင့် စားသုံးသူရေးရာကိစ္စရပ်များနှင့်ပတ်သက်၍ စိတ်ပါဝင်စားသူများအပါအဝင် အင်အား (၁၅၂)ဦးခန့် တက်ရောက်ခဲ့ကြပါသည်။

    ရှမ်းပြည်နယ် ဝန်ကြီးချုပ်ဦးအောင်အောင်က အခမ်းအနား ကျင်းပပြုလုပ်ရသည့်ရည်ရွယ်ချက်၊ ကမ္ဘာ့စားသုံးသူအခွင့်အရေးများနေ့ ပေါ်ပေါက်လာပုံသမိုင်းကြောင်း နှင့်၂၀၂၄ ခုနှစ် ကမ္ဘာ့စားသုံးသူ အခွင့်အရေးများနေ့ ဆောင်ပုဒ်ဖြစ်သည့် “ မျှတအလေးမူ  တာဝန်ယူ၊ စားသုံးသူ အကျိုးပြု ဉာဏ်ရည်တု” (Fair and Responsible AI For Consumers ) ဆိုသည့် ဆောင်ပုဒ်နှင့်အညီ စားသုံးသူများအတွက် ဘေးအန္တရာယ် ကင်းရှင်းရေး၊ ဆန်းသစ်သည့် အဆင့်မြင့် နည်းပညာများဖြင့်  ကမ္ဘာ့အင်အား အကြီးဆုံးအုပ်စုဖြစ်သည့် စားသုံးသူများကိုအကာအကွယ်ပေးရေးနှင့် လူမှုဘဝ ပတ်ဝန်းကျင်ကို စဉ်ဆက်မပြတ် ဖွံ့ဖြိုးတိုးတက်သော  အနာဂတ်တစ်ခုရရှိနိုင်ရေးအတွက် အားလုံး ဝိုင်းဝန်းပူးပေါင်းဆောင်ရွက်ပေးကြရန် ဂုဏ်ပြုအမှာစကား ပြောကြားခဲ့ပါသည်။

      ထို့နောက် စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူး ဦးတင့်လွင်ဦးက စားသုံးသူကာကွယ်ရေးဥပဒေတွင် ပါဝင်သော စားသုံးသူအခွင့်အရေးများအကြောင်း၊ စားသုံးသူရေးရာ ကော်မတီဖွဲ့စည်းထားရှိမှုနှင့် စားသုံးသူ သတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေး စင်တာ( CICC) မှ အငြင်းပွားမှုများ ဖြေရှင်းဆောင်ရွက်ပေးလျက်ရှိကြောင်းများကိုပြောကြားခဲ့ပြီး တက်ရောက်လာသူများအား စားသုံးသူကာကွယ်ရေးဆိုင်ရာ အသိပညာပေး ဗီဒီယိုဖိုင်များ ပြသခဲ့ပါသည်။ အခမ်းအနားသို့ တက်ရောက်လာကြသော ဝန်ကြီးချုပ်နှင့် အဖွဲ့ဝင်များ၊ ဌာနဆိုင်ရာများနှင့် အသင်းအဖွဲ့များသည် မှတ်တမ်းတင်ဓါတ်ပုံများ ရိုက်ကူးကာ အမှတ်တရလက်ဆောင်နှင့် စားသုံးသူအသိပညာပေး လက်ကမ်းစာစောင်များ မျှဝေခဲ့ပြီး အခမ်းအနားကို  နံနက် (၁၀:၃၀) နာရီ အချိန်တွင် ရုပ်သိမ်းခဲ့ကြောင်း သတင်းရရှိပါသည်။

DOCA(ရှမ်း)

     (၁၅.၃.၂၀၂၄) ရက်နေ့တွင် ကမ္ဘာ့စားသုံးသူအခွင့်အရေးများနေ့ကို မော်လမြိုင် ကုန်စည်ဒိုင်ခန်းမ၌ ကျင်းပပြုလုပ်ခဲ့ရာ မွန်ပြည်နယ်စားသုံးသူရေးရာကော်မတီ အဖွဲ့ဝင်များ၊ ဌာနဆိုင်ရာတာဝန်ရှိပုဂ္ဂိုလ်များ၊ အသင်းအဖွဲ့များမှ တာဝန်ရှိပုဂ္ဂိုလ်များ၊ စားသုံးသူပြည်သူများ တက်ရောက်ခဲ့ကြသည်။

   အဆိုပါ အခမ်းအနားတွင် ပြည်နယ်ဦးစီးမှူးမှ အဖွင့်အမှာစကားပြောကြားခြင်း၊ စားသုံးသူကာကွယ်ရေးဆိုင်ရာ Video Clip ပြသခြင်း၊ ဒုတိယပြည်နယ်ဦးစီးမှူးက ကမ္ဘာ့စားသုံးသူအခွင့်အရေးများနေ့ ကျင်းပရခြင်းနှင့်စပ်လျဉ်း၍ ရှင်းလင်းတင်ပြခြင်း၊ ဉာဏ်စမ်းပဟေဠိမေးခွန်းများ ဖြေဆိုခြင်းနှင့် ဆုလက်ဆောင်များ ချီးမြှင့်ခြင်း အစီအစဉ်များဖြင့် စည်ကားသိုက်မြိုက်စွာ ကျင်းပခဲ့ကြကြောင်း သတင်းရရှိပါသည်။

DOCA(မွန်)

     စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဦးအောင်တင်စိုး၊ ခရိုင်ဦးစီးမှူးအပါ ဝန်ထမ်း(၃)ဦးတို့သည် (၁၁-၃-၂၀၂၄)ရက်နေ့၊ နံနက်(၁၀:၀၀)နာရီအချိန်မှစ၍ ရွှေပြည်သာမြို့နယ်ရှိ စက်မှုဇုန် (၃) သို့သွားရောက်၍ ကွင်းဆင်းစစ်ဆေးခဲ့ပါသည်။

     ထို့သို့ကွင်းဆင်းရာတွင် အမှတ်(၁၈)၊ ဦးဖိုးလှိုင်လမ်းရှိ Colour Care Business Group ၏ မုန့်မျိုးစုံလုပ်ငန်းနှင့် အမှတ် (၁+၁၄+၁၅)ဦးဖိုးလှိုင်လမ်းနှင့် လှသိင်္ဂီလမ်းထောင့်ရှိ စိန်ခဲရွှေခဲ အမှတ်တံဆိပ် ငံပြာရည်၊ ခရုဆီနှင့်ငရုတ်ဆီထုတ်လုပ်သော စက်ရုံများရှိ စက်ရုံမန်နေဂျာများနှင့်တွေ့ဆုံ၍ လုပ်ငန်းအမျိုးအစား၊ တစ်လထုတ်လုပ်သည့်ပမာဏ၊ ရင်းနှီးမြှုပ်နှံမှု(ကျပ်သန်း)၊ လုပ်သားဉီးရေ၊ ဖြန့်ဖြူးသည့်ဒေသနှင့် စက်ရုံတွင် တွေ့ကြုံရသည့်အခက်အခဲ (ကုန်ကြမ်း၊ လျှပ်စစ်၊ စက်သုံးဆီ၊ လုပ်သား၊ အခြား) ပတ်သက်သည့် အကြောင်းအရာများကိုမေးမြန်းခဲ့ရာတွင် စက်ရုံအများစုသည် လျှပ်စစ်မီးရရှိမှု၊ ကုန်ကြမ်းနှင့် သွင်းကုန်လိုင်စင်အခက်အခဲများရှိကြောင်း ပြောကြားခဲ့ကြပြီး မိမိတို့ဌာနအနေဖြင့်လည်း ထုတ်လုပ်သည့်ကုန်ပစ္စည်းတွင် အရည်အသွေး ပြည့်မီအောင်ထုတ်လုပ်စေရန်နှင့် စက်ရုံသန့်ရှင်းရေးကိုအဓိကထား၍ ဆောင်ရွက်ပေးရန် ဖြည့်စွက်ပြောကြားခဲ့ကြောင်းသိရှိရပါသည်။

DOCA(ရန်ကုန်)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး ဦးစီးမှူး၏လမ်းညွှန်ချက်၊ ကန့်ဘလူခရိုင်ဦးစီးမှူး၏ကြီးကြပ်မှုတို့ဖြင့် ကျွန်းလှမြို့နယ် တာဝန်ခံ ဒေါ်ဝေဝေအောင်သည် စားသုံးသူပြည်သူများကို စားသုံးသူအခွင့်အရေးနှင့် အကျိုးစီးပွားကာကွယ်ရန် ၊ဘေးအန္တရာယ်ကင်းရှင်းစေရေး၊ ကျန်းမာရေး၊ ထုတ်ကုန်များ လုံခြုံစိတ်ချရမှုရှိစေရေးတို့အတွက် (၁၄.၃.၂၀၂၄)ရက်နေ့၊ နံနက် (၀၉:၃၀) နာရီအချိန်တွင်  ကျွန်းလှမြို့နယ် စိုက်ပျိုးရေးဦးစီးဌာနတွင်  စားသုံးသူအကာအကွယ်ပေးရေး အသိပညာပေးဟောပြောပွဲ ကျင်းပပြုလုပ်ခဲ့ပါသည်။

     အဆိုပါ အသိပညာပေးဟောပြောပွဲတွင် မြို့နယ်စိုက်ပျိုးရေးဦးစီးမှူး ဒေါ်မြင့်မြင့်ရီမှ ကြိုဆိုနှုတ်ခွန်းဆက် စကားပြောကြားခဲ့ပြီးနောက် မြို့နယ်တာဝန်ခံ ဒေါ်ဝေဝေအောင်က  ကမ္ဘာ့စားသုံးသူအခွင့်အရေးများနေ့ဖြစ်ပေါ်လာပုံ၊ စားသုံးသူကာကွယ်ရေး ဥပဒေကို ၂၀၁၉ ခုနှစ် ၊ မတ်လ (၁၅)ရက်နေ့ မှာ ပြဌာန်းခဲ့ပြီး အခန်းပေါင်း(၂၅)ခန်း ပုဒ်မပေါင်း(၈၄)ခု ပါဝင်ပြဌာန်း ထားကြောင်း၊ ယခု ၂၀၂၄ ခုနှစ်၊ မတ်လ(၁၅)ရက်နေ့မှာ ဆိုရင်လည်း “မျှတအလေးမူ တာဝန်ယူ၊ စားသုံးသူအကျိုးပြု ဉာဏ်ရည်တု” ဟူသော ဆောင်ပုဒ်နှင့် ကမ္ဘာ့စားသုံးသူအခွင့် အရေးများနေ့ အထိမ်းအမှတ် အခမ်းအနားများကို တိုင်းဒေသကြီး/ ပြည်နယ်တွေမှာ ကျင်းပမှာဖြစ်သလို ခရိုင်/မြို့နယ်တွေမှာလည်း ယခုလို ဟောပြောပွဲတွေ/ လက်ကမ်းစာစောင် ဖြန့်ဝေခြင်း ကမ်ပိန်းတွေ ပြုလုပ်ကျင်းပဆောင်ရွက်သွားမည်ဖြစ်ကြောင်း၊ စားသုံးသူများအနေနဲ့ စားသုံးသူအခွင့်အရေး (၈)ချက်၊ စားသုံးသူများလိုက်နာ ဆောင်ရွက်ရမည့် တာဝန်(၄)ချက် ၊ စားသုံးသူအကာကွယ်ပေးရေး ဥပဒေ အခန်း(၁၈)ပါ ကုန်အညွှန်းအမှတ်အသား ဖေါ်ပြခြင်းနှင့် စပ်လျဉ်း၍ မြန်မာနိုင်ငံ စားသုံးသူကာကွယ်ရေး ကော်မရှင်၏ ညွှန်ကြားချက်အမှတ် (၂/၂၀၁၉)နှင့်အညီ ကုန်စည်အမျိုး အစားအလိုက် သတ်မှတ်ချက်နှင့်အညီ သိသာထင်ရှားစွာဖော်ပြရမည့် အသေးစိတ် စိစစ်ချက်များကို ပြည့်စုံစွာ ထည့်သွင်း ဖော်ပြ၍  ထုတ်လုပ်ဖြန့်ဖြူးသည့် ကုန်ပစ္စည်းများကိုသာ ဝယ်ယူစားသောက် အသုံးပြုတတ်ရန်နှင့် စားသုံးသူ နစ်နာဆုံးရှုံးမှုရှိလျှင် တိုင်ကြားနိုင်ကြောင်း ၊ တိုင်ကြားနိုင်သည့် နေရာများဖြစ်သည့် မိမိတို့ စားသုံးသူရေးရာဦးစီးဌာန ခရိုင်ဦးစီးမှူးရုံး စားသုံးသူသတင်း ပြန်ကြားရေးနှင့် တိုင်ကြားမှုလက်ခံ ဆောင်ရွက်ရေးစင်တာ (CICC) တွင်လည်းကောင်း ၊ Facebook Page ဖြစ်တဲ့ DOCA Myanmar Page တွင်လည်းကောင်း ၊  မိမိတို့ဌာန Website ဖြစ်တဲ့ www.doca.gov. mm တွင်လည်းကောင်း တိုင်ကြားနိုင်ပြီး စားသုံးသူကိစ္စရပ်များ စုံစမ်းမေးမြန်းရန်အတွက် Call Center No. 1535 အား ဖွင့်လှစ်ထားရှိကြောင်းနှင့် စားအုန်းဆီ ကျန်းမာရေးအကျိုး ပြုပုံများ အကြောင်းကို မြို့နယ်စိုက်ပျိုးရေးဦးစီးမှူးနှင့် ဝန်ထမ်း(၈)ဦးတို့အား အကျယ်တဝင့် ရှင်းလင်းပြောကြားခဲ့ပြီး (၂/၂၀၁၉) ညွန်ကြားချက်ပါ လက်ကမ်းစာစောင်များအား ဖြန့်ဝေပေးခဲ့ကြောင်း သတင်းရရှိခဲ့ပါသည်။

DOCA(စစ်ကိုင်း)

     ပြည်နယ်နှင့်တိုင်းဒေသကြီးအသီသီးရှိ MSMEs စီးပွားရေးလုပ်ငန်းရှင်များ စားအုန်းဆီများဝယ်ယူရာ၌ အဆင်ပြေလွယ်ကူချောမွေ့စေရန်အတွက် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌ၊ မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်းတို့ပူးပေါင်း၍ စားသောက်ဆိုင်၊ လက်ဖက်ရည်ဆိုင်၊ ဟိုတယ်၊ စားသောက်ကုန်ထုတ်လုပ်ရောင်းချသူများ၊ စားသောက်ကုန်ထုတ်လုပ်သည့် အသေးစား၊ အလတ်စား စားသောက်ကုန်လုပ်ငန်းရှင်များအား စက်မှုကုန်ကြမ်းသုံး စားအုန်းဆီများကို ရန်ကုန်တိုင်းဒေသကြီး၊ ကြည်မြင့်တိုင်မြို့နယ်၊ ထီးတန်းဆိပ်ကမ်းရှိ Htoo ဆီကန်မှ (၄-၃-၂၀၂၄) ရက်နေ့မှ (၉-၃-၂၀၂၄) ရက်နေ့ထိ  ဆီတစ်ပိဿာလျှင် (၆၁၇၃) ကျပ်ဈေးနှုန်းဖြင့် ဆီပေပါအလုံးရေစုစုပေါင်း ၁၁၃၈၃လုံးထုတ်ပေးခဲ့ကြောင်းသိရှိရပါသည်။

DOCA(ရန်ကုန်)