သတင်းနှင့် လှုပ်ရှားမှုများ

       ၂၀၂၄ ခုနှစ်၊ ‌အောက်တိုဘာလ ၆ ရက်နေ့၊  နေ့လယ်(၁၄:၀၀) အချိန်တွင် ထားဝယ်မြို့၊ အိမ်ရှေ့ပြင်ရပ်ကွက်၊ ရေးလမ်းရှိ ကောင်းဆက်ဟိန်းယာဥ်ရပ်နားစခန်းသို့ မြန်မာနိုင်ငံဆီကုန်သည်နှင့် ဆီလုပ်ငန်း ရှင်များအသင်း၏ စီစဥ်မှုဖြင့် Mahar Phone Let Yone ကုမ္ပဏီမှ ၁ ပေပါ လျှင် ၁၁၀ ပိဿာ ပါ စားအုန်းဆီ (၂၁) ပေပါနှင့် Kaung Hlyan New Asia Co,Ltd စားအုန်းဆီ (၄၂)ပေပါ ၊ စုစုပေါင်း (၆၃) ပေပါကို ယာဥ်မောင်း ဦးပြည့်ဖြိုးအောင်၊ ယာဉ်အမှတ် 7L-3503 မော်တော်ယာဥ်နှင့် KHN Co,Ltdမှ  စားအုန်းဆီ (၆၀) ပေပါကို ယာဉ်မောင်း ဦးခင်ချို၊ ယာဉ်အမှတ် 1H-3024 မော်တော်ယာဉ်နှင့် KHN Co,Ltdမှ စားအုန်းဆီ (၇၀) ပေပါကို ယာဉ်မောင်း ဦးဌေးဝင်း၊ ယာဉ်အမှတ် 7F-3777 တို့ဖြင့် တင်ဆောင်၍ ရောက်ရှိလာရာ တိုင်းဒေသကြီး စားသုံးသူရေးရာဦးစီးမှူး  ဦးစိုးဦးနှင့် တာဝန်ရှိသူများက သွားရောက်စစ်ဆေးခဲ့ပြီး အဆိုပါစားအုန်းဆီစုစုပေါင်း (၁၉၃) ပေပါ အား ကုမ္ပဏီ၏ လက်ကား  အ​ရောင်းကိုယ်စားလှယ်မှတစ်ဆင့်  ထားဝယ်မြို့တွင်းရှိ အိုးလုပ်ရပ်ကွက်၊ နိဗ္ဗာန်လမ်းရှိ ဦးဥာဏ်ဝင်း၏ ရွှေတြိဂံ  ကုန်စုံဆိုင်အပါအဝင် လက်လီဆိုင် ၁၅ ဆိုင်မှ တစ်ဆင့် သတ်မှတ်ရည်ညွှန်းစျေးအတိုင်း စားသုံးသူများအား ရောင်းချပေးသွားမည်ဖြစ်ကြောင်း သိရှိရပါသည်။

DOCA(တနင်္သာရီ)

     ၂၀၂၄ ခုနှစ်၊ အောက်တိုဘာလ ၆ ရက်နေ့၊ နေ့လယ် (၁၂း၁၅) နာရီ အချိန်တွင် ရန်ကုန်မြို့မှ ထားဝယ်ဆိပ်ကမ်း ဝင်းဖူးခိုင်တံတားသို့ ရောက်ရှိဆိုက်ကပ်လာသော အမ်ဗွီဂေါ်ဇီလာ သင်္ဘောဖြင့် တင်ဆောင်လာသော ကော်ဖီမစ်၊ အချိုရည်၊ ခြင်ဆေးကွန်တိန်နာများကို စားသုံးသူရေးရာဦးစီးဌာနမှ ဦးစီးအရာရှိ ဒေါ်အေးအေးလွင်နှင့် အကောက်ခွန်ဦးစီးဌာန၊ ရေကြောင်းရဲတပ်ဖွဲ့၊ မြန့်မာ့ဆိပ်ကမ်း အာဏာပိုင်၊ အထွေထွေအုပ်ချုပ်ရေးဦးစီးဌာနတို့မှ တာဝန်ရှိသူများပါဝင်သော ပူးပေါင်းအဖွဲ့ဖြင့် စစ်ဆေးဆောင်ရွက်ခဲ့ပါသည်။

DOCA(တနင်္သာရီ)

         စားသုံးသူရေးရာဦးစီးဌာန၊ ဟင်္သာတမြို့နယ်ဦးစီးမှူးသည် မိတ်ဖက်ဌာနဆိုင်ရာများနှင့်ပူးပေါင်း၍ (၁-၁၀-၂၀၂၄)ရက်နေ့၊ နေ့လယ်(၁၄:၀၀)နာရီအချိန်တွင် ဟင်္သာတမြို့၊ နတ်မော်လမ်းရှိ အမှတ်(၅)၊ အခြေခံပညာအထက်တန်းကျောင်း၌ ဆရာ/ ဆရာမနှင့် ကျောင်းသား/ ကျောင်းသူ ၃၁၀ဦးအား စားသုံးသူကာကွယ်ရေးအသိပညာပေးဟောပြောခြင်းဆောင်ရွက်ခဲ့ပါသည်။

          အဆိုပါဟောပြောပွဲတွင် မြို့နယ်ဦးစီးမှူး ဦးမိုးကျော်က စားသုံးသူကာကွယ်ရေးဥပဒေကို ၂၀၁၉ခုနှစ်၊ မတ်လ(၁၅) ရက်နေ့တွင် အခန်း(၂၅)ခန်း၊ ပုဒ်မ(၈၄)ခုဖြင့် ပြဋ္ဌာန်းခဲ့ကြောင်း၊ စားသုံးသူစကားရပ်၏ အဓိပ္ပါယ်ဖွင့်ဆိုချက်၊  စားသုံးသူအခွင့်အရေးနှင့် တာဝန်များအကြောင်း၊ အစားအသောက်နှင့် ကုန်စည်များပေါ်တွင်ဖော်ပြရမည့် ကုန်အညွှန်းအမှတ်အသားများအကြောင်း၊ ဝန်ဆောင်မှုနှင့်စပ်လျဉ်း၍ အာမခံချက်ပေးခြင်းများ၊ တားမြစ်ချက်များ၊ ပြစ်မှုပြစ်ဒဏ်များအကြောင်း၊ စားသုံးသူတို့အနေဖြင့် အသင့်စားမုန့်များဝယ်ယူစားသုံးရာတွင် ထုတ်လုပ်သည့်ရက်စွဲနှင့် သက်တမ်းကုန်ဆုံးရက်များကို အဓိကဖတ်ရှုရမည်ဖြစ်ကြောင်း၊ ဝယ်ယူအသုံးပြုခဲ့သော ကုန်စည်နှင့်ဝန်ဆောင်မှုများကြောင့် နစ်နာဆုံးရှုံးမှုများဖြစ်ပေါ်လာပါက ပြောဆိုတင်ပြတိုင်ကြားခွင့်နှင့် ပြန်လည်ကုစားနိုင်ခွင့်များအကြောင်းကို အကျယ်တဝင့်ရှင်းလင်းဆွေးနွေးဟောပြောခဲ့ပါသည်။

          ဟောပြောပွဲအပြီးတွင် မြို့နယ်တာဝန်ခံနှင့်အဖွဲ့သည် ကျောင်းမုန့်ဈေးတန်းကော်မတီဝင်များနှင့်အတူ ကျောင်းမုန့်ဈေးတန်းများရှိ ရောင်းချနေသောမုန့်များတွင် ကုန်အညွှန်းအမှတ်အသားပြည်စုံမှုရှိ/မရှိကို ကွင်းဆင်းစိစစ်ခဲ့ပြီး၊ ကုန်အညွှန်းအမှတ်အသားပြည့်စုံသော မုန့်များကိုသာရောင်းချရန် မုန့်ဈေးတန်းရောင်းချသူများအား မှာကြားခဲ့ကြောင်းသိရှိရပါသည်။

DOCA(ဧရာဝတီ)

    တနင်္သာရီတိုင်းဒေသကြီး၊  ထားဝယ်မြို့၊ အ.ထ.က(၃) ကျောင်း၌ ကျင်းပပြုလုပ်သည့် ၂၀၂၄-၂၀၂၅ ပညာသင်နှစ်၊ တက္ကသိုလ်ဝင်တန်းအထောက်အကူပြုစာအုပ်များအား Mandalay Media မှ ပေးအပ်လှူဒါန်းပွဲအား တနင်္သာရီတိုင်းဒေသကြီးဝန်ကြီးချုပ်၊ တိုင်းဒေသကြီးအစိုးရအဖွဲ့မှဝန်ကြီးများ၊ တိုင်းဒေသကြီးအစိုးရအဖွဲ့ဝင်များ၊ တိုင်းဒေသကြီးအဆင့်ဌာနဆိုင်ရာများနှင့်အတူ တိုင်းဒေသကြီးစားသုံးသူရေးရာဦးစီးဌာနမှ တက်ရောက်ခဲ့ပါသည်။

     အဆိုပါဟောပြောပွဲတွင် တနင်္သာရီတိုင်းဒေသကြီးဝန်ကြီးချုပ်မှ အဖွင့်အမှာစကားပြော ကြားခဲ့ပါသည်။ ထို့နောက် Mandalay Media မှ ပါမောက္ခ ဒေါက်တာသန့်ဇင်က တက္ကသိုလ်ဝင်တန်းအထောက်အကူပြုစာအုပ်များအကြောင်း ရှင်းလင်းပြောကြားခဲ့ပြီးနောက် Mandalay Media မှတာဝန်ရှိသူ ဦးကျော်ဇေယျက စာမူများအား မည်သို့ပြုလုပ်ခဲ့ရကြောင်း ပြောကြားခဲ့ပါသည်။ ထို့နောက် တနင်္သာရီတိုင်းဒေသကြီးဝန်ကြီးချုပ်မှ Mandalay Media မှ တာဝန်ရှိသူများအား ဂုဏ်ပြုမှတ်တမ်းများပေးအပ်ခဲ့ပြီး  အခမ်းအနားပြီးမြောက်ကြောင်း သတင်းရရရှိပါသည်။

DOCA(တနင်္သာရီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ပြည်ထောင်စုနယ်မြေ၊ နေပြည်တော်ဦးစီးမှူးရုံးမှ မြို့နယ်တာဝန်ခံများသည်  စားသုံးသူများ အသုံးပြုလျက်ရှိသည့် ကုန်စည်များဘေးအန္တရာယ်ကင်းရှင်းပြီး လုံခြုံစိတ်ချရမှုရှိစေရေး၊ စားသုံးသူကာကွယ်ရေးဥပဒေပါ ပြဋ္ဌာန်းချက်များနှင့် ကိုက်ညီမှုရှိစေရေးအတွက် သက်ဆိုင်ရာမြို့နယ်အလိုက် ဈေးကွက်စောင့်ကြည့် စစ်ဆေးခြင်းများပြုလုပ်လျက်ရှိရာ စက်တင်ဘာလအတွင်း ပျဉ်းမနားမြို့နယ်၊ အခြေခံပညာအထက် တန်းကျောင်း၊ အ-ထ-က(၅)(ကန်နား)ကျောင်းနှင့် အခြေခံပညာအလယ်တန်းကျောင်း၊ အ-လ-က(မင်္ဂလာကျောင်း)များရှိ ကျောင်းမုန့်ဈေးတန်းကိုလည်းကောင်း၊ ပုဗ္ဗသီရိမြို့နယ်ဈေးအတွင်းရှိ ကုန်စုံဆိုင်များတွင်လည်းကောင်း၊ ဒက္ခိဏသီရိမြို့နယ်‌ဈေးအတွင်းရှိ ကုန်စုံဆိုင်များကိုလည်းကောင်း၊ ပျဉ်းမနားမြို့မဈေးအတွင်းရှိ ကလေးအသုံးအဆောင်ပစ္စည်းဆိုင်များကိုလည်းကောင်း၊ ပျဉ်းမနား မြို့နယ်၊ ယုဇနဈေးအတွင်းရှိ ကုန်စုံဆိုင်များကိုလည်းကောင်း သွားရောက်၍ အသင့်စား စားသောက်ကုန်များ၊ အချိုရည်များ၊ မုန့်မျိုးစုံများ၊ စားသုံးဆီများ၊ ကလေးအသုံးအဆောင်ပစ္စည်းအမျိုးမျိုးတို့တွင် ကုန်ပစ္စည်းများ ဘေးအန္တရာယ်ကင်းရှင်းမှုရှိ/ မရှိ၊ ကုန်အညွှန်းအမှတ်အသားပြည့်စုံစွာ ဖော်ပြထားခြင်းရှိ/ မရှိ၊ သက်တမ်းလွန်သောစားသောက်ကုန်များ ရောင်းချနေမှုရှိ/ မရှိ၊ တားမြစ်ထားသော ကုန်ပစ္စည်းများရောင်းချမှုရှိ/ မရှိ ဈေးကွက်စောင့်ကြည့်စစ်ဆေးခြင်းကို စက်တင်ဘာလအတွင်း (7)ကြိမ် ဆောင်ရွက်ခဲ့ပါကြောင်းနှင့် တစ်နှစ်စာအတွင်း ဦးစားပေးဆောင်ရွက်ရန် လျာထားသည့် ကုန်စည်(၁၀)မျိုးအနက် စက်တင်ဘာလအတွင်း ဦးစားပေးဆောင်ရွက်ရန်လျာထားသည့် ကုန်စည်များအား ဈေးကွက်စောင့်ကြည့် စစ်ဆေးခဲ့ခြင်းဖြစ်ပါကြောင်း သိရှိခဲ့ရပါသည်။

     ပြည်ထောင်စုနယ်မြေ၊ နေပြည်တော်(၈)မြို့နယ်အတွင်းရှိ ဈေးများ၊ ရပ်ကွက်ကုန်စုံဆိုင်များ၊ ဆေးဆိုင်များ၌ ဝမ်းရောဂါနှင့်ပတ်သက်သည့်ဆေးဝါးများ၊ အားဆေး၊ အရိုးဆေး၊ သွေးကျဆေး၊ အသည်းဆေး၊ အာရုံကြောဆေး၊ အကိုက်အခဲပျောက်ဆေး၊ သွေးကျဲဆေး၊ လေဆေးစသည့် ဆေးအုပ်စုများ၊ အခြေခံစားကုန်(၂၃)မျိုးတို့အား ဆေးပစ္စည်းများပြတ်လပ်မှုရှိ/ မရှိ၊ ဈေးနှုန်းမြင့်တက်ခြင်း ရှိ/မရှိနှင့် ဆန်အမျိုးမျိုးအား စားသုံးသူရေးရာဦးစီးဌာနမှ သတ်မှတ်ထားသည့် ရည်ညွှန်းဈေးအတိုင်း ရောင်းချဖြန့်ဖြူးခြင်းရှိ/ မရှိတို့ကို စက်တင်ဘာလအတွင်း   အထူးဈေးကွက်စောင့်ကြည့်စစ်ဆေးခြင်း အနေဖြင့်  (၆၉)ကြိမ်ဆောင်ရွက်နိုင်ခဲ့ပါကြောင်း သိရှိခဲ့ရပါသည်။

DOCA(ပြည်ထောင်စုနယ်မြေ)