သတင်းနှင့် လှုပ်ရှားမှုများ

         ၇.၁၀.၂၀၂၄ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်မြို့နယ်တာဝန်ခံရုံးမှ ဝန်ထမ်းများသည် မော်လမြိုင်မြို့နယ်အတွင်းရှိ ဆေးဆိုင်များတွင် ဆေးဈေးနှုန်းများမြှင့်တင်ရောင်းချခြင်း၊ ဈေးကစားရန်ရည်ရွယ်၍ သိုလှောင်ထားခြင်းရှိ/ မရှိ ဈေးကွက်ကွင်းဆင်းစစ်ဆေးခဲ့ကြောင်း သိရှိရပါသည်။

        ထိုသို့ ကွင်းဆင်းစစ်ဆေးရာ မွန်ပြည်နယ်၊ မော်လမြိုင်မြို့နယ်၊ အောက်လမ်းမကြီးရှိ လမ်းဘေးဝဲယာဆေးဆိုင်များတွင် ရောင်းချနေသောဆေးများမှာ ဈေးနှုန်းမြှင့်တင်ရောင်းချခြင်းရှိ/ မရှိ၊ ဈေးကစားရန်ရည်ရွယ်၍ သိုလှောင်ထားခြင်းရှိ/ မရှိ၊ သက်ဆိုင်ရာဌာနများ၏ ထောက်ခံချက်ပါ/ မပါစစ်ဆေးခဲ့ရာ ဆေးများအား ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်၍ သိုလှောင်ထားခြင်း မရှိပါကြောင်း သိရှိရပါသည်။

DOCA(မွန်)

           ၈.၁၀.၂၀၂၄ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ ဒုတိယပြည်နယ် ဦးစီးမှူးနှင့် ဝန်ထမ်းများသည် မော်လမြိုင်ခရိုင်၊ မော်လမြိုင်မြို့နယ်၊ ဈေးကြိုရပ်ကွက်ရှိ ဝံဈေးစင်တာသို့ သွားရောက်၍ ငရုတ်ဆီနှင့်အချဉ်ရည် အမျိုးမျိုးတို့အား ဈေးကွက်စောင့်ကြည့်စစ်ဆေးခြင်းများ ပြုလုပ်ခဲ့ပါသည်။

       ထိုသို့ ဈေးကွက်စောင့်ကြည့်စစ်ဆေးရာတွင် ဈေးကွက်အတွင်းရောင်းချနေသော ငရုတ်ဆီနှင့်အချဉ်ရည်အမျိုးမျိုးတို့တွင် ကုန်အညွှန်းအမှတ်အသား ပြည့်စုံမှန်ကန်စွာဖော်ပြထားမှုရှိ/ မရှိ ကွင်းဆင်းစစ်ဆေးခဲ့ရာ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂ / ၂၀၁၉) နှင့်အညီ ကုန်အညွှန်းအမှတ်အသားကို မြန်မာဘာသာဖြင့် ပြည့်စုံမှန်ကန်စွာ ဖော်ပြထားကြောင်း စစ်ဆေးတွေ့ရှိရပြီး၊  ဆိုင်ရှင်အား စီးပွားရေးလုပ်ငန်းရှင်များလိုက်နာရမည့်အချက်များနှင့် စားသုံးသူများအား ဘေးအန္တရာယ်ကင်းသောအစားအသောက်များသာ ရောင်းချရန်  အသိပေးပြောကြားခဲ့ကြောင်းသိရှိရပါသည်။

DOCA(မွန်)

     ဧရာဝတီတိုင်းဒေသကြီး၊ ကန်ကြီးထောင့်မြို့နယ်အတွင်းရှိ  စက်သုံးဆီဆိုင်များတွင် ပုံမှန်ရောင်းချလျက်ရှိပြီး စက်သုံးဆီ (၄) မျိုးအား အပြည့်အဝရောင်းချပေးနိုင်ပြီး လျော့နည်းမှုများ မရှိကြောင်း စိစစ်တွေ့ရှိရပါသည်။ ပြည်ပမှ စက်သုံးဆီများမှာယူတင်သွင်းပြီး၊ ထုတ်ယူမည့် Terminal များမှ ခွင့်ပြုချက်များအပေါ် အဆင့်ဆင့် စောင့်ဆိုင်းထုတ်ယူရရှိကြောင်း ကန်ကြီးထောင့်မြို့နယ် အတွင်း စက်သုံးဆီအရောင်းဆိုင်များမှ သိရသည်။ ဆီကားများ ပုံမှန်ရောက်ရှိ၍ ဆီဆိုင်များမှာလည်း ပုံမှန်အတိုင်း ဖြန့်ဖြူးရောင်းချနေကြောင်း စက်သုံးဆီရောင်းချသည့် ဆိုင်တာဝန်ရှိသူများထံမှ သိရှိရပါသည်။

DOCA(ဧရာဝတီ)

     ဧရာဝတီတိုင်းဒေသကြီး၊ ပုသိမ်ခရိုင်၊ ငပုတောမြို့နယ်၊ စားသုံးသူရေးရာဦးစီးဌာနနှင့် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ ပူးပေါင်းပြီး စားသုံးသူရေးရာဦးစီးဌာနမှ အကြီးတန်း စာရေးဒေါ်ဇင်မေထက်သည် ၄.၁၀.၂၀၂၄ ရက်နေ့၊ နံနက် (၁၀:၀၀) နာရီအချိန်တွင် အွန်လိုင်းရောင်းချခြင်းလုပ်ငန်း မှတ်ပုံတင်ခြင်းဆိုင်ရာ Talk Show အစီအစဉ်ကျင်းပဆွေးနွေးခဲ့ကြောင်း သိရှိရပါသည်။

    အဆိုပါ ဆွေးနွေးပြောကြားချက်များထဲမှ အွန်လိုင်းစနစ်ဖြင့် ရောင်းချခြင်းလုပ်ငန်းများကို အရေးကြီးကုန်စည်နှင့် ဝန်ဆောင်မှုလုပ်ငန်းများအဖြစ် သတ်မှတ်ပြီး အမိန့်ကြော်ငြာစာအမှတ် (၅၁/၂၀၂၃) ဖြင့် အမိန့်ထုတ်ပြန်ထားပြီး၊ ၂၀၂၃ ခုနှစ် ဇူလိုင်လ (၂၁) ရက်နေ့တွင် စတင်အာဏာ သက်ဝင်ခဲ့ကြောင်းနှင့် မှတ်ပုံတင်ထားခြင်းမရှိသည့် Online Sale များကို အရေးကြီးကုန်စည်နှင့် ဝန်ဆောင်မှုဥပဒေ ပုဒ်မ (၅) အရ အရေးယူခံရမည်ဖြစ်ကြောင်း စသည့်အချက်များအား အသိပညာပေး ဟောပြောခဲ့ကြောင်း သိရှိရပါသည်။

DOCA(ဧရာဝတီ)

   ပုသိမ်ခရိုင်၊ စားသုံးသူရေးရာဦးစီးဌာန၊ ကန်ကြီးထောင့်မြို့နယ်၊ မြို့နယ်တာဝန်ခံနှင့် ဝန်ထမ်းသည် ပူးပေါင်းအဖွဲ့များနှင့် ပူးပေါင်း၍ ၈.၁၀.၂၀၂၄ ရက်နေ့၊ နံနက် (၁၀:၀၀) အချိန်တွင် ကန်ကြီးထောင့်မြို့၊ ရွာသစ်ကုန်းကျေးရွာအတွင်းရှိ စားအုန်းဆီအရောင်းဆိုင်များအား သတ်မှတ် ဈေးနှုန်းဖြင့် ရောင်းချခြင်း ရှိ/မရှိ ဈေးကွက်စောင့်ကြည့်စစ်ဆေးခဲ့ပါသည်။

    ဈေးကွက်စောင့်ကြည့်စစ်ဆေးရာတွင် စားအုန်းဆီခွဲတမ်းရရှိသော အရောင်းဆိုင်များအနေဖြင့် စားသုံးသူရေးရာဦးစီးဌာနမှ သတ်မှတ်ညွှန်ကြားထားသော ဈေးနှုန်းဖြင့်ရောင်းချနေခြင်းရှိ/မရှိ ၊ ဆိုင်းဘုတ်ချိတ်ဆွဲရောင်းချခြင်းရှိ/မရှိ၊ ဈေးနှုန်းဆိုင်းဘုတ်အား အများပြည်သူများမြင်သာသောနေရာတွင် ချိတ်ဆွဲထားပို့တို့ကို စစ်ဆေးခဲ့ရာ ခွဲတမ်းရရှိသောဆိုင်များအနေဖြင့် သတ်မှတ်ရည်ညွှန်း ဈေးနှုန်းများဖြင့် ရောင်းချနေကြောင်း ဈေးကွက်စောင့်ကြည့်စစ်ဆေးခဲ့ကြောင်း သိရှိရပါသည်။

DOCA(ဧရာဝတီ)