သတင်းနှင့် လှုပ်ရှားမှုများ

       တိုင်းဒေသကြီးအတွင်း ထုတ်လုပ်သည့် ပဲဆီ/ နှမ်းဆီများအား စားအုန်းဆီများနှင့်ရောနှော၍ ရောဆီအဖြစ် ခွက်မှောက်ခွက်လှန်စနစ်ဖြင့်ရောင်းချခဲ့ရာ ယခုအခါတွင် စားသုံးသူများအပေါ် လိမ်လည် လှည့်ဖျားခြင်းမရှိစေရန် ပဲဆီ/ နှမ်းဆီ/ စားအုန်းဆီဟုသာရောင်းချစေပြီး စားသုံးသူများ၏ မျက်ကွယ် တွင် ရောဆီအဖြစ်ရောစပ်၍ရောင်းချနေမှုအား တားမြစ်ထားပါကြောင်း၊ စားသုံးသူတောင်းဆိုရာ တွင်သာ တောင်းဆိုသည့်အတိုင်း ပဲဆီ/ နှမ်းဆီနှင့် စားအုန်းဆီတို့ကို စားသုံးသူ၏ရှေ့မှောက်တွင် ရောစပ်ရောင်းချရန်၊ ခွက်မှောက်ခွက်လှန် စနစ်ဖြင့် ရောင်းချရာတွင် ဆီထည့်သည့်ပုံးများအား စတီးလ်ပုံး များဖြင့် အဖုံးများဖုံးအုပ်၍ရောင်းချသွားရန်၊ ကုန်ဈေးနှုန်းကြီးမြင့်မှုမရှိစေရေးနှင့် ပစ္စည်းပြတ်လပ်မှု မရှိစေရေးတို့အား အသိပေးဆွေးနွေးခြင်းများ ပြုလုပ်ခဲ့ပြီး လိုက်နာမှုရှိ/မရှိအား စဉ်ဆက်မပြတ်ကွင်း ဆင်းစစ်ဆေးခြင်းများ ပြုလုပ်ခဲ့ရာ မကွေးတိုင်းဒေသကြီးဦးစီးမှူးရုံးအနေဖြင့် ကန်သာဈေးတွင်(၂) ကြိမ်၊ မကွေးခရိုင်ဦးစီးမှူးရုံးအနေဖြင့် ချောက်မြို့၊ စည်ပင်သာယာဈေးတွင်(၁)ကြိမ်၊ တောင်တွင်း ကြီးမြို့ မောင်းတိုင်(၁/၂)ရပ်ကွက်ရှိ ကုန်စုံဆိုင်တွင် (၁)ကြိမ်၊ မကွေးမြို့၊ မြို့မဈေးတွင် (၁)ကြိမ်၊ မင်းဘူး ခရိုင်ဦးစီးမှူးရုံးအနေဖြင့် မင်းဘူးမြို့၊ စည်ပင်သာယာဈေးတွင် (၁)ကြိမ်၊ ပွင့်ဖြူမြို့စည်ပင်သာယာ ဈေးတွင်(၁)ကြိမ်၊ စလင်း(ဆင်ဖြူကျွန်း) စည်ပင်သာယာဈေးတွင် (၁)ကြိမ်၊ သရက်ခရိုင်ဦးစီးမှူးရုံး အနေဖြင့် မင်းတုန်းမြို့၊ အမှတ်-၄ရပ်ကွက်ရှိ စားသုံးဆီအရောင်းဆိုင်များတွင် (၁)ကြိမ်၊ ဆင်ပေါင်ဝဲ မြို့၊ မြို့မစည်ပင်သာယာဈေးတွင်(၁)ကြိမ်၊ သရက်မြို့၊ ရွှေဘုံသာရပ်ကွက်ရှိကုန်စုံဆိုင်များတွင် (၁) ကြိမ်၊ အောင်လံမြို့၊ မြို့မစည်ပင်သာယာဈေးတွင် (၁)ကြိမ်၊ ကံမမြို့ အမှတ်-၃ရပ်ကွက်ရှိ စားသုံးဆီအရောင်းဆိုင်များတွင် (၁)ကြိမ်၊ ပခုက္ကူခရိုင်ဦးစီးမှူးရုံးအနေဖြင့် ဆိပ်ဖြူမြို့၊  ပတ္တမြားဈေးတွင် (၁) ကြိမ်၊ မကွေးတိုင်းဒေသကြီးအတွင်း ဈေးကွက်ကွင်းဆင်းစစ်ဆေးခြင်းများ စုစုပေါင်း(၁၄)ကြိမ် ဆောင်ရွက်နိုင်ခဲ့ပါသည်။

      ထိုသို့ ကွင်းဆင်းစစ်ဆေးခြင်းများ ဆောင်ရွက်ခဲ့ရာတွင် ဈေးကွက်အတွင်းရောင်းချလျှက်ရှိ သော ဘူးသွပ်ဆီများဖြစ်ကြသည့် (Meizan, Lotus, Goody, Duck, Good Choice, Cook, ငွေဇင်ယော်, ရွှေလမင်း, အမေထွား) စသည့်အမှတ်တံဆိပ်များတွင် ကုန်အညွှန်းအမှတ်အသား ပြည့်စုံစွာဖော်ပြထားရှိပြီး FDA ထောက်ခံချက်များပါရှိသည်ကို စစ်ဆေးတွေ့ရှိရကြောင်း သတင်း ရရှိပါသည်။

DOCA(မကွေး)

   မွန်ပြည်နယ်၊ ဘီးလင်းမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ ဝန်ထမ်းများသည် (၂၁-၁၁-၂၀၂၃)ရက်နေ့တွင် ဘီးလင်းမြို့၊ ဘိုးရာဇာရပ်ကွက်၊ မင်္ဂလာဈေးရှိ ဈေးတာဝန်ခံရုံး၌ မြို့နယ်စည်ပင်သာယာရေးအဖွဲ့နှင့်ပူးပေါင်း၍ အသားငါးများရောင်းချသော လုပ်ငန်းရှင်များအား တရားမဝင်အေးခဲသားများရောင်းချမှုမရှိစေရေး အသိပညာပေးဟောပြောဆွေးနွေးပွဲကျင်းပပြုလုပ်ခဲ့ပါသည်။

   အဆိုပါဟောပြောဆွေးနွေးပွဲတွင် ဘီးလင်းမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ မြို့နယ်တာဝန်ခံ ဒေါ်ဇင်ဖြူဝင်း(ဦးစီးမှူး)က တရားမဝင်လမ်းကြောင်းများဖြင့် သယ်ဆောင်လာသော အေးခဲအသားငါးအန္တရာယ်များအကြောင်း၊ တရားမဝင်လမ်းကြောင်းမှ သယ်ဆောင်ရသဖြင့် အချိန်ကြာမြင့်မှုကြောင့် ဘက်တီးရီးယားပိုးများပွားနိုင်ခြင်း၊ အသားငါးများကြာရှည်အေးခဲစေရန်အတွက် အသုံးပြုသောတာရှည်ခံဆေးဝါး၏ဆိုးကျိုးများ၊ ထိုတရားမဝင် အသားငါးများကြောင့် မိမိတို့ဒေသအတွင်း ထွက်ရှိသောလတ်ဆတ်သည့်အသားငါးများ ဈေးကွက်အတွင်း အရောင်းအဝယ်အားနည်း၍ မိမိတို့ဒေသအတွက် စီးပွားရေးနစ်နာမှုဖြစ်စေနိုင်ကြောင်းဆွေးနွေးခဲံပြီး မြို့နယ်စည်ပင်သာယာရေးအဖွဲ့မှ ဦးချစ်စိုး(ဒု-ဦးစီးမှူး)က တရားမဝင်အေးခဲအသားငါးများရောင်းချခြင်းနှင့်ပတ်သက်၍ ဥပဒေအရ အရေးယူနိုင်မှုများကို ဆွေးနွေးအသိပညာပေးခဲ့ကြောင်း သတင်းရရှိပါသည်။

DOCA(မွန်)

     မွန်ပြည်နယ်၊ သထုံခရိုင်၊ စားသုံးသူရေးရာဦးစီးဌာန၊ ပေါင်မြို့နယ်တာဝန်ခံသည် ဒီဂျစ်တယ်ငွေကြေးဆိုင်ရာအသိပညာပေး (Talk Show)ကို (၂၁-၁၁-၂၀၂၃) ရက်နေ့တွင် ပေါင်မြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန (Community Centre) ခန်းမ၌ ကျင်းပပြုလုပ်ခဲ့ကြောင်းသိရသည်။

    ဆွေးနွေးပွဲတွင် ပေါင်မြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်သဥ္ဇာစိုးက Talk Show အစီအစဉ်ကျင်းပပြုလုပ်ရသည့် ရည်ရွယ်ချက်ကိုရှင်းလင်းခဲ့ပြီး စားသုံးသူရေးရာဦးစီးဌာန၊ ပေါင်မြို့နယ်တာဝန်ခံ ဦးအောင်မျိုးဦးက ငွေကြေးဝန်ဆောင်မှု၊ အွန်လိုင်းရောင်းဝယ်မှုဆိုင်ရာတို့နှင့်ပတ်သက်၍ စားသုံးသူပြည်သူများရင်ဆိုင်ကြုံတွေ့နေရသည့်အချက်များနှင့် ဒီဂျစ်တယ်ငွေကြေးအဓိပ္ပါယ်၊ ဒီဂျစ်တယ်ငွေကြေးအသုံးပြုပုံ၊ ဒီဂျစ်တယ်ငွေကြေး (Mobile Wallet) အမျိုးအစားများ၊ စားသုံးသူများ၏အခွင့်အရေးများ၊ စားသုံးသူနစ်နာဆုံးရှုံးမှုဖြစ်ပေါ်လာပါက တိုင်ကြားနိုင်သည့်နေရာနှင့် နည်းလမ်းများအကြောင်းကို ကျယ်ကျယ်ပြန့်ပြန့်ဆွေးနွေးခဲ့ကြောင်း သတင်းရရှိပါသည်။

DOCA(မွန်)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံးတွင် ၂၀၂၃ ခုနှစ်၊ နိုဝင်ဘာလ (၈)ရက်နေ့၌ ပြည်ခရိုင်ဦးစီးမှူး ဦးမင်းဆွေမှ အစည်း အဝေးကျင်းပပြုလုပ်ခဲ့ပါသည်။ ထိုအစည်းအဝေးကို မြန်မာနိုင်ငံဆန်စပါးကဏ္ဍ ဖွံ့ဖြိုးတိုးတက်စေရေးနှင့် သိုလှောင်မှုများစနစ်တကျ ရှိစေရေးအတွက် စပါးတင်း (၅၀၀၀) သို့မဟုတ် ဆန်တန် (၅၀)အထက် ဆန်စပါးသိုလှောင်မှု အခြေအနေများအား ဒီဂျစ်တယ်နည်းလမ်း အွန်လိုင်းမှတ်ပုံတင်စနစ် Myanmar Rice Online (MyRo)ဖြင့် မှတ်ပုံတင်နိုင်ရေး သိုလှောင်လုပ်ငန်းများ စနစ်တကျဖွံ့ဖြိုးတိုးတက်နိုင်စေရေး၊ ဆန်စပါးဈေးကွက်တည်ငြိမ်မှန်ကန်စွာ ဖွံ့ဖြိုးတိုးတက်ရေး၊ ဆန်စပါးသိုလှောင်မှုကို စနစ်တကျ မှတ်ပုံတင်စာရင်းပြုစုထားနိုင်ရေး သင့်တင့်မျှတတည်ငြိမ်သော ဆန်ဈေး ကွက်နှင့် ဈေးနှုန်းများ ဖြစ်ပေါ်စေရေးစသည့် ရည်ရွယ်ချက်ကောင်းများဖြင့် စားသုံးသူရေးရာဦးစီးဌာနနှင့် မြန်မာနိုင်ငံ ဆန်စပါးအသင်းချုပ်တို့၏ အစိုးရ - ပုဂ္ဂလိက ပူးပေါင်းစီစဉ်မှုဖြင့် ဆောင်ရွက်လျက်ရှိသည့် အစည်းအဝေးကို ဌာနဆိုင်ရာနှင့် အသင်းအဖွဲ့များမှ လုပ်ငန်းရှင် (၁၀)ဦး တက်ရောက်ခဲ့ကြောင်း သိရပါသည်။

    ထိုအစည်းအဝေးကို ဒီဂျစ်တယ်နည်းလမ်းဖြင့် မှတ်ပုံတင်စာရင်းတင်ပြဆောင်ရွက်နိုင်မည့် Online Registration စနစ် (MyRo)ကို ၂၀၂၃ ခုနှစ်အတွင်း မကြာမီအသုံးပြုနိုင်ရေးအတွက် Digital Certificate ထုတ်ပေးနိုင်သည့် ဝန်ဆောင်မှုဖြင့် သိုလှောင်မှုလုပ်ငန်းများ စနစ်တကျ ဖွံ့ဖြိုးတိုးတက် စေရန် ရည်ရွယ်ချက်ဖြင့် စီစဉ်ဆောင်ရွက်ခဲ့ခြင်းဖြစ်ကြောင်း အသေးစိတ်သိရှိလိုပါက www.MyRo. Com.mm သို့ ဝင်ရောက်လေ့လာနိုင်ကြောင်း သိရပါသည်။

DOCA(ပဲခူး)

     စားသုံးသူရေးရာဦးစီးဌာနအနေဖြင့် ပြည်တွင်းပြည်ပမှ ထုတ်လုပ်တင်သွင်းလာသည့် ကုန်စည်နှင့်ဝန်ဆောင်မှုများအပေါ် စားသုံးသူများ ဘေးအန္တရာယ်ကင်းရှင်းစွာ အသုံးပြုနိုင်ရန် စားသုံးသူအခွင့်အရေးများ ပြည့်ပြည့်ဝဝရရှိစေရန် စားသုံးသူကာကွယ်ရေးဥပဒေကို ၂၀၁၉ ခုနှစ်၊ မတ်လ (၁၅) ရက်နေ့တွင် ပြည်ထောင်စုလွှတ်တော်ဥပဒေအမှတ် (၉) ဖြင့် အတည်ပြုပြဋ္ဌာန်းခဲ့ပြီး စားသုံးသူကာကွယ်ရေးလုပ်ငန်းများနှင့် ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများကို အဓိကထားဆောင်ရွက်လျက်ရှိပါသည်။

    စားသုံးသူကာကွယ်ရေးဥပဒေ ၂၀၁၉ ပါ ပြဋ္ဌာန်းချက်များကို စားသုံးသူပြည်သူများ ကျယ်ကျယ်ပြန့်ပြန့် သိရှိလာစေရန် ရည်ရွယ်၍ စားသုံးသူကာကွယ်ရေးဆိုင်ရာ အသိပညာပေး ဟောပြောပွဲများကို နိုင်ငံအဝှမ်းဆောင်ရွက်လျက်ရှိရာ စားသုံးသူရေးရာဦးစီးဌာန၊ ပဲခူးတိုင်း ဒေသကြီး (အနောက်) ပြည်ခရိုင်၊ ပြည်မြို့နယ်မှ မြို့နယ်ဦးစီးမှူး ဦးထွန်းနိုင်လင်းသည် (၁၀.၁၁.၂၀၂၃) နေ့၊ နေ့လယ် (၁၃:၀၀) နာရီအချိန်တွင် ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ ရိုက်ကူးရေးခန်းမ၌ ကျင်းပပြုလုပ်သည့် Online Talk Show အစီအစဉ်တွင် ပါဝင်ခဲ့ပြီး “စားသုံးသူကာကွယ်ရေးဆိုင်ရာ အသိပညာပေး” ခေါင်းစဉ်ဖြင့် စားသုံးသူကာကွယ်ရေးဥပဒေပါ ပြဋ္ဌာန်းချက်များထဲမှ စီးပွားရေးလုပ်ငန်းရှင်များအနေဖြင့် ကုန်စည် (သို့) ဝန်ဆောင်မှုများ ထုတ်လုပ်ပြီး ဈေးကွက်အတွင်း ဖြန့်ဖြူးရောင်းချရန်အလို့ငှာ ကုန်စည်၏ထုတ်ပိုးမှုအပြင်အဆင်ပေါ်တွင် ကုန်အညွှန်းအမှတ်အသားများ ရေးသားဖော်ပြရာတွင် ပါဝင်ရမည့်အချက်များ၊ မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍ တွဲလျက်ဖြစ်စေ ဖော်ပြရမည့်အချက်များအား ရှင်းလင်းဆွေးနွေးခဲ့ကြောင်း သိရပါသည်။

     စီးပွားရေးလုပ်ငန်းရှင်တစ်ဦးအနေဖြင့် ကုန်စည် (သို့) ဝန်ဆောင်မှုများ ထုတ်လုပ်ဖြန့်ဖြူး ရောင်းချမည်ဆိုပါက အောက်ဖော်ပြပါ အချက်အလက်များကို သိသာထင်ရှားစွာ ဖော်ပြဖို့လိုမှာ ဖြစ်ပါသည် -

     (က)    ကုန်စည်၏ တံဆိပ်အမှတ်အသား

     ( ခ )   ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊

               ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း

    (  ဂ )  ထုတ်လုပ်သည့်ရက်စွဲ၊ သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်

    (ဃ)    ပြည်တွင်းသို့တင်သွင်းလာသော ကုန်စည်ဖြစ်ပါက တင်သွင်းသူ၏အမည်နှင့်

              လိပ်စာ၊ ထုတ်လုပ်သည့်လုပ်ငန်းအမည်နှင့် လိပ်စာ

   ( င )   ထုတ်လုပ်သည့်နေရာ (သို့) ပြည်ပမှကုန်စည်များ တင်သွင်းပြီး ပြန်လည်ထုတ်ပိုး

             သည့်နေရာ

  ( စ )   ကုန်စည်တွင်ပါဝင်သော ကုန်ကြမ်းပစ္စည်း အမျိုးအမည်များနှင့် ပစ္စည်းများ၏

             ပမာဏ၊ ပါဝင်မှုအချိုးအစား

  (ဆ)    ကျန်းမာရေးဆိုင်ရာ ဘေးထွက်ဆိုးကျိုး (သို့) ဓါတ်မတည့်ကြောင်း ဖော်ပြချက်နှင့်

             ကြိုတင်သတိပေးချက်

   ( ဇ )   သက်ဆိုင်ရာ အစိုးရဌာနများကဖော်ပြရန် သတ်မှတ်ထားသောအချက်အလက်များ

             (ခ) နှင့် (ဆ) တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည်ဖြစ်ကြောင်း သိရှိရပါသည်။

DOCA(ပဲခူး)