သတင်းနှင့် လှုပ်ရှားမှုများ

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင် ဝါးခယ်မမြို့နယ် တာဝန်ခံ ဦးအောင်မိုးသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ အားကစားနှင့်ကာယပညာဦးစီးဌာနတို့နှင့် ပူးပေါင်း၍ (၂၁.၁၁.၂၀၂၃) ရက်နေ့၊ နေ့လယ်(၁၃:၀၀)နာရီက ဝါးခယ်မမြို့နယ် ကဝဲကျောင်းစုကျေးရွာ အထက(ခွဲ)ကျောင်းတွင် ဆရာ/ဆရာမ၊ ကျောင်းသား၊ ကျောင်းသူများအား စားသုံးသူကာကွယ်ရေး အသိပညာပေး ဟောပြောဆောင်ရွက်ခဲ့ပါသည်။

  ထိုသို့ဟောပြောဆွေးနွေးရာတွင် စားသုံးသူရေးရာဦးစီးဌာန၊ ဝါးခယ်မမြို့နယ် တာဝန်ခံက စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ၊ ဌာနမှ လက်ရှိဆောင်ရွက်နေသော လုပ်ငန်းတာဝန်များ ဆက်လက်ဆောင်ရွက်ရမည့် လုပ်ငန်းတာဝန်များအား ဦးစွာရှင်းလင်း ပြောကြားခဲ့ပါသည်။ထို့နောက် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေးဥပဒေ ၂၀၁၉ ပါ ပြဌာန်းချက်များမှ စားသုံးသူ၏ အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ပုဒ်မ ၄၁ ပုဒ်မခွဲ(ခ)နှင့်(ဂ)တို့ပါ ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်အလေးချိန်၊ သုံးစွဲပုံနည်းလမ်းနှင့် ထုတ်လုပ်သည့်ရက်စွဲ၊  သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်တို့အား အသေးစိတ်ရှင်းလင်း ဟောပြောခဲ့ပြီး၊ မိမိတို့စားသောက်နေသော အစားအသောက်များတွင် ဓါတုဆိုးဆေးများအလွန်အကျုးပါဝင်နေခြင်း၊ သက်တမ်းလွန်အစားအသောက်များအား မိမိ၏အသိဖြင့် ဆင်ခြင်ဝယ်ယူစားသောက်ကြရန် ဟောပြောခဲ့ပါသည်။ ဆက်လက်၍ ကျောင်းမုန့်ဈေးတန်းသို့အဖွဲ့ဖြင့် သွားရောက်စစ်ဆေးခဲ့ပြီး၊ ဆိုင်ရှင်များအား သက်တန်းလွန်မုန့်များအား ရောင်းချခြင်းမပြုရန် ပြောကြားခဲ့ပါသည်၊ စားသုံးသူအသိပညာပေး ဟောပြောပွဲသို့ ဆရာ/ဆရာမ(၁၇)ဦး၊ ကျောင်းသားကျောင်းသူ (၂၈၅)ဦး၊ စုစုပေါင်း (၃၀၂)ဦး တက်ရောက်ခဲ့ကြောင်း သိရှိရပါသည်။

DOCA(ဧရာဝတီ)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှု၊ ပခုက္ကူခရိုင်ဦးစီးမှူး၏ကြီးကြပ်မှုဖြင့် (၁၆-၁၁-၂၀၂၃)ရက်နေ့၊ နံနက်(၀၉:၀၀)နာရီအချိန်တွင် ပခုက္ကူခရိုင်ဦးစီးမှူးရုံး (CICC) ခန်းမ၌ ဝန်ထမ်းစွမ်းဆောင်ရည်မြှင့်တင်ရေးအထောက်အကူပြုစေရန် Thursday Talk အသိပညာပေးဟောပြောဆွေးနွေးပွဲကျင်းပပြုလုပ်ခဲ့ရာ ဝန်ထမ်း(၁၇)ဦးတက်ရောက်ခဲ့ပါသည်။

    အဆိုပါ Thursday Talk အသိပညာပေးဆွေးနွေးပွဲတွင် စားသုံးသူရေးရာဦးစီးဌာန၊ ပခုက္ကူခရိုင်ဦးစီးမှူး ဦးဝေဠုအောင်က အဖွင့်အမှာစကားပြောကြားခဲ့ပြီး ဒုတိယဦးစီးမှူး ဒေါ်ခင်သူဇာက  ဈေးကွက်စောင့်ကြည့်စစ်ဆေးခြင်းလုပ်ငန်းစဉ်ဆိုင်ရာ ညွှန်ကြားချက်(၁/၂၀၂၂)ပါ အပိုဒ်(၁)မှ(၃၉)ထိ အသေးစိတ်ရှင်းလင်းဆွေးနွေးခြင်း၊ ဒုတိယဦးစီးမှူး ဒေါ်နွယ်နွယ်အေးက  စားသုံးသူကာကွယ်ရေးဥပဒေ(၂၀၁၉) ပြဋ္ဌာန်းချက်ပါ အခန်း(၁၁)ပါ ကုန်စည်နှင့်စပ်လျဉ်း၍ အာမခံချက်ပေးခြင်း၊ အခန်း(၁၂)ပါ ကုန်စည်နှင့်စပ်လျဉ်း၍ အာမခံပေးထားမှုအပေါ် စားသုံးသူတောင်းဆိုနိုင်သည့်အခွင့်အရေး၊ အခန်း(၁၃)ပါ ဝန်ဆောင်မှုနှင့်စပ်လျဉ်း၍ အာမခံချက်ပေးခြင်းနှင့် အခန်း(၁၄)ပါ ဝန်ဆောင်မှုလုပ်ငန်းများ၏ အာမခံချက်နှင့်စပ်လျဉ်း၍ စားသုံးသူက‌တောင်းဆိုနိုင်သည့် အခွင့်အရေးများအား မိမိ၏ကိုယ်တွေ့အကြောင်းအရာများနှင့်ဆက်စပ်ပြီး ဌာနတွင်လုပ်ကိုင်ဆောင်ရွက်နေရသော လုပ်ငန်းအတွေ့အကြုံများနှင့်ပေါင်းစပ်၍ အကျယ်တဝင့်ဆွေးနွေးခြင်းနှင့် အငယ်တန်းစာရေး ဒေါ်သီတာနွယ်က စားသုံးသူကာကွယ်ရေးဥပဒေပါ အခန်း(၁၈) ကုန်အညွှန်း အမှတ်အသားဖော်ပြခြင်းနှင့် အခန်း(၁၉)တိုင်ကြားခြင်းနှင့် စိစစ်ညှိနှိုင်းဖြေရှင်းဆောင်ရွက်ခြင်းဥပဒေ ပုဒ်မ ၄၁မှ ဥပဒေပုဒ်မ ၅၁ထိ ရှင်းလင်းဆွေးနွေးခဲ့ပါသည်။

 ဆက်လက်၍ ဦးဝေဠုအောင်က ယခုကဲ့သို့ရှင်းလင်းဆွေးနွေးခဲ့သူများကိုလည်း ကျေးဇူးတင်ပါကြောင်း၊ တက်ရောက်လာသည့်ဝန်ထမ်းများလည်း စားသုံးသူကာကွယ်ရေးဥပဒေနှင့် ဌာနခွဲများမှ လုပ်ငန်းများကိုလည်းနားလည်စေရန်အတွက် Thursday Talk ကို လစဉ်ပြုလုပ်ရခြင်းဖြစ်ကြောင်းနှင့် နောင်လာမည့် Thursday Talk  များတွင် စားသုံးသူကာကွယ်ရေးဥပဒေ၊ နည်းဥပဒေများသာမက ပြည်တွင်းကုန်သွယ်မှုဖွံ့ဖြိုးတိုးတက်ရေးအတွက် အထောက်အကူပြုမည့်ဒေသထွက်ကုန်များ၊ စိုက်ပျိုးသီးနှံများအကြောင်းကိုလည်း ထည့်သွင်းဆွေးနွေးသွားရန်လိုအပ်ကြောင်းပြောကြားခဲ့ပါသည်။

DOCA(မကွေး)

  စားသုံးသူရေးရာဦးစီးဌာန၊ မကွေးတိုင်းဒေသကြီး၊ သရက်ခရိုင်၊ သရက်မြို့နယ်တာဝန်ခံ ဦးအုန်းမြင့် (ဦးစီးမှူး)သည် တိုင်းဒေသကြီးဦးစီးမှူးနှင့် ခရိုင်ဦးစီးမှူးတို့၏လမ်းညွှန်မှုတို့ဖြင့် လစဉ် အသိပညာပေးခြင်းလုပ်ငန်းများပြုလုပ်ဆောင်ရွက်လျက်ရှိရာ (၁၇-၁၁-၂၀၂၃)ရက်နေ့၊ နံနက်(၁၀း၀၀)နာရီအချိန်တွင် သရက်မြို့၌ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်ပူးပေါင်း၍ စားသုံးသူပြည်သူများ Online ပေါ်တွင်ရောင်းချနေသော ကုန်စည်များဝယ်ယူသုံးစွဲရာတွင် လုံခြုံစိတ်ချရမှုရရှိစေရေးအတွက် ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံးခန်းမ၌ Online Sale ‌ပြုလုပ်ရာတွင် သိရှိလိုက်နာဆောင်ရွက်ရမည့်အချက်များကို စီးပွားရေးလုပ်ငန်းရှင်များသိရှိစေရန် အသိပညာပေးဟောပြောပွဲ (Talk Show) ကျင်းပခဲ့ပါသည်။

    အဆိုပါဟောပြောပွဲ၌ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးမှူးက ယနေ့ လူအများသုံးစွဲနေသည့် Facebook စာမျက်နှာများပေါ်တွင် Online Sale များနှင့်ပတ်သက်၍ စားသုံးသူရေးရာဦးစီးဌာနအနေဖြင့် စီစဉ်ဆောင်လျက်ရှိသော လုပ်ငန်းလုပ်ဆောင်ချက်များအကြောင်း ရှင်းလင်းပြောကြားပေးပါရန် မေးမြန်းခဲ့ရာ စားသုံးသူရေးရာဦးစီးဌာနဦးစီးမှူး ဦးအုန်းမြင့်က  Online စနစ်ဖြင့်ရောင်းချနေမှုအား အရေးကြီးဝန်ဆောင်မှုလုပ်ငန်းအဖြစ် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ (၂၁-၇-၂၀၂၃)ရက်နေ့တွင် သတ်မှတ်ကြော်ငြာခဲ့ပြီး Online စနစ်ဖြင့်ရောင်းချပါက မှတ်ပုံ တင်ခြင်းပြုလုပ်ရမည်ဖြစ်ပါကြောင်း၊ Online စနစ်ဖြင့် ရောင်းချခြင်းလုပ်ငန်းများကို မှတ်ပုံတင်သည့်အခါတွင် လုပ်ငန်းလိပ်စာမှန်ကန်ကြောင်းအတွက် ရပ်ကွက်ထောက်ခံစာနှင့် ရဲစခန်းထောက်ခံစာ၊ လုပ်ငန်းရှင်၏ရပ်ကွက်ကျေးရွာတွင် အမှန်တကယ်နေထိုင်ကြောင်းထောက်ခံစာ စသည့် လုပ်ငန်းမှတ်ပုံတင်ရမည်အချက်(၈)ချက်တို့ကို အသေးစိတ်ရှင်းလင်းပြောကြားခဲ့ကာ Online စနစ်ဖြင့်ရောင်းချခြင်းပြုလုပ်ပါက လုပ်ငန်းမှတ်ပုံတင်ခြင်းကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာန၏ eComReg System (https://www.ecomreg.gov.mm) Website တွင် မှတ်ပုံတင်နိုင်ကြောင်း စားသုံးသူပြည်သူများအားသိရှိစေရန် အသိပညာပေးဟောပြောခဲ့ကြောင်းသိရှိရပါသည်။

DOCA(မကွေး)

  မကွေးတိုင်းဒေသကြီး၊ မကွေးမြို့၊ ရန်ကင်းစျေးနှင့် ဆည်မြောင်းစျေးရှိ စားသောက်ကုန်များအား (၁၅-၁၁-၂၀၂၃)ရက်နေ့၊ နံနက်(၀၇:၃၀)နာရီအချိန်မှ နံနက်(၀၉:၃၀)နာရီအချိန်အထိ စားသုံးသူရေးရာဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ အထွေထွေအုပ်ချုပ်ရေးဦးစီးဌာနနှင့် စည်ပင်သာယာရေးအဖွဲ့တို့ပူးပေါင်း၍ ကုန်စည်များနမူနာဝယ်ယူကာ Mobile Lab ဖြင့် ဓာတ်ခွဲစမ်းသပ်ခြင်း၊ ကုန်စည်များ၌ ကုန်အညွှန်းအမှတ်အသားသတ်မှတ်ချက်များနှင့်အညီ ပြည့်စုံမှန်ကန်စွာပါဝင်မှုရှိ/မရှိ စစ်ဆေးခဲ့ကြောင်းသိရှိရပါသည်။

     နမူနာဝယ်ယူစစ်ဆေးခဲ့သော ကုန်စည်များမှာ အရောင်တင်မှုန့်၊ ငရုတ်သီးမှုန့်၊ ချင်းပေါက်၊ သရက်ချဉ်၊ ပဲပင်ချဉ်၊ နနွင်းမှုန့်၊ မုန်လာဥချဉ်၊ မုန့်ဟင်းခါးဖတ်၊ အသားတု၊ ငါးပိထောင်း၊ အမဲသွေးနှင့် ဆိတ်သွေးခဲတို့ဖြစ်ပြီး စစ်ဆေးစဉ် စားသုံးရန်မသင့်ဟုတားမြစ်ထားသော တာရှည်ခံဆေးများကို သုံးစွဲထားခြင်းမရှိကြောင်းတွေ့ရပါသည်။

  ထိုသို့ ကွင်းဆင်းစစ်ဆေးခြင်းဖြင့် စျေးကွက်အတွင်းရောင်းချနေသော စားသောက်ကုန်များအား ဝယ်ယူသုံးစွဲကြသော စားသုံးသူမိဘပြည်သူများအနေဖြင့် ဘေးအန္တရာယ်ကင်းရှင်းစွာသုံးစွဲနိုင်ခြင်း၊ ကုန်အညွှန်းအမှတ်အသားပြည့်စုံမှန်ကန်စွာဖော်ပြထားသော အရည်အသွေးပြည့်ဝသည့်ကုန်ပစ္စည်းများကိုသာသုံးစွဲနိုင်ခြင်း စသည့် အကျိုးရလဒ်များရရှိလာနိုင်မည်ဖြစ်ကြောင်းသိရှိရပါသည်။

DOCA(မကွေး)

   ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ ခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးအောင်ဇော်ဦးနှင့် ခရိုင်ရုံးဝန်ထမ်းများသည် (၂၀.၁၁.၂၀၂၃)ရက်နေ့ (၁၀:၀၀)အချိန်တွင် ရေလဲလမ်းမရှိ 912ဆန်စက်သို့ သွားရောက်၍ ဆန်စက်လည်ပတ်မှုနှင့် ထုတ်ကုန်လုံခြုံစိတ်ချရမှုရှိစေရန်အတွက် ကွင်းဆင်းစစ်ဆေး ဆောင်ရွက်ခဲ့ကြပါသည်။

  ကွင်းဆင်းစစ်ဆေးဆောင်ရွက်ရာတွင် 912ဆန်စက်ပိုင်ရှင်နှင့် တွေ့ဆုံ၍ ဆန်စက်ကြိတ်ခွဲ လည်ပတ်မှုအခြေအနေ၊ စပါး၊ ဆန်ဈေးကွက်အခြေအနေများကို မေးမြန်းပြီး စားသုံးသူကာကွယ်ရေး ဥပဒေအကြောင်းနှင့်စပ်လျဉ်း၍ ရှင်းလင်းဆွေးနွေးပြီး၊ မအူပင်မြို့နယ်အတွင်းရှိ ဆန်စက်လုပ် ငန်းများ ဆန်ထွက်ပစ္စည်းများ ဈေးကွက်အတွင်း ဖြန့်ဖြူးရောင်းချရာတွင် ထုတ်ကုန်လုံခြုံစိတ်ချမှုရှိစေရေး အသိပညာပေးခြင်းနှင့် ဆန်စက်လုပ်ငန်း ဖွံ့ဖြိုးတိုးတက်စေရေးအတွက် စာသုံးသူရေးရာဦးစီးဌာနမှ ဒု-ခရိုင်ဦးစီး မှူး ဦးအောင်ဇော်ဦးမှ 912ဆန်စက်လုပ်ငန်းရှင်နှင့်  တွေ့ဆုံဆွေးနွေးခဲ့ပြီး  ဆန်၊ စပါး ဈေးနှုန်းဈေးကွက် အခြေအနေများ လေ့လာစုံစမ်းခဲ့ကြေင်းသိရသည်။

DOCA(ဧရာဝတီ)