သတင်းနှင့် လှုပ်ရှားမှုများ

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူး၏ လမ်းညွှန်ချက်၊ ကန့်ဘလူခရိုင်ဦးစီးမှူး၏ ကြီးကြပ်မှုတို့ဖြင့် ကျွန်းလှမြို့နယ်တာဝန်ခံ ဒေါ်ဝေဝေအောင်သည် (၉-၈-၂၀၂၃) ရက်နေ့၊ နံနက် (၁၀:၀၀) နာရီအချိန်တွင်  ကျွန်းလှမြို့၊ ပြန်ကြားရေးနှင့်ပြည်သူ့ ဆက်ဆံရေးဦးစီးဌာနနှင့်ပူးပေါင်း၍ စားသုံးသူကာကွယ်ရေးဥပဒေအကြောင်းနှင့် Online Shopping ဝန်ဆောင်မှု၊ Online ရောင်းချမှုမှတ်ပုံတင်ခြင်းလုပ်ငန်းနှင့်စပ်လျဉ်း၍ စာသုံးသူကာကွယ်ရေးအသိပညာပေး  (Talk Show) ပြုလုပ်ဆောင်ရွက်ပေးခဲ့ကြောင်းသိရှိရပါသည်။

      အဆိုပါ အသိပညာပေးဆွေးနွေးပွဲတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးမှူး ဦးစီးဦးဖိုးချိုက စားသုံးသူကာကွယ်ရေးဥပဒေပြဋ္ဌာန်းရခြင်း၏ ရည်ရွယ်ချက်အကြောင်း၊ Online ရောင်းချမှုမှတ်ပုံတင်ပြုလုပ်ရန်နှင့်ပတ်သက်၍ သိရှိလိုသည်များကိုမေးမြန်းခဲ့ရာ  မြို့နယ်တာဝန်ခံ ဒေါ်ဝေဝေအောင်က စားသုံးသူကာကွယ်ရေးဥပဒေကို ၂၀၁၉ခုနှစ်၊ မတ်လ (၁၅) ရက်နေ့တွင် ပြည်ထောင်စုလွတ်တော်ဥပဒေအမှတ် ၉ဖြင့်ပြဋ္ဌာန်းခဲ့ပြီး အခန့်ပေါင်း (၂၅) ခန်း၊ ပုဒ်မပေါင်း (၈၄) ခုပါဝင်ကြောင်း၊ စားသုံးသူကာကွယ်ရေးဥပဒေပြဋ္ဌာန်းရခြင်း၏ ရည်ရွယ်ချက်များကို အသေးစိတ်ရှင်းလင်းပြောကြားခဲ့ကြောင်း၊ Online Shopping နှင့်ပတ်သက်၍ စားသုံးသူလိမ်လည်လှည့်ဖြားခံရမှုများကြောင့်  Online ရောင်းချမှုမှတ်ပုံတင်ခြင်းဆိုင်ရာများကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက တာဝန်ယူဆောင်ရွက်မည့်အကြောင်း၊ အမိန့်ကြော်ငြာစာအမှတ် (၅၁/၂၀၂၃) ကို ၂၀၂၃ခုနှစ်၊ ဇူလိုင်လ (၂၁) ရက်နေ့တွင် ထုတ်ပြန်ထားကြောင်း၊ Online ရောင်းချမှုမှတ်ပုံတင်ခြင်းအတွက် လူကိုယ်တိုင်သွားရောက်၍ လျှောက်ထားစရာမလိုဘဲ Online မှဆောင်ရွက်ပေးမည့်အကြောင်း၊ Online ရောင်းချမှုမှတ်ပုံတင်ကြေးများနှင့်ပတ်သက်ပြီး အသက်သာဆုံးနှင့်ဆောင်ရွက်ကာ Online Banking စနစ်ဖြင့် ပေးချေဆောင်ရွက်ရမည့်အကြောင်း၊ အမိန့်ကြော်ငြာစာထုတ်ပြန်ပြီး (၆) လပြည့်မြောက်သည့်နေ့မှစတင်၍ အသက်ဝင်လာပြီး ဥပဒေအရ အရေးယူဆောင်ရွက်မှုများဖြစ်လာနိုင်သည့်အတွက် Online Shopping လက်ရှိအမှန်တကယ်ရောင်းချနေသူများကိုလည်း Online  မှတ်ပုံတင်များဆောင်ရွက်ထားကြရန်အကြောင်းတို့ကို တိုက်တွန်းပြောကြားချင်ကြောင်း၊  Online ရောင်းချမှုမှတ်ပုံတင်ခြင်းလျှောက်ထားဆောင်ရွက်ရမည့် အချိန်ကိုလည်း  လျှောက်ထားဆောင်ရွက်ရမည့်လုပ်ငန်းစဉ်များနှင့်အတူ အသိပေးထုတ်ပြန်သွားမည်ဖြစ်ကြောင်း အကျယ်တဝင့်ရှင်းလင်းပြောကြားကာ စားသုံးသူကာကွယ်ရေးလုပ်ငန်းဆိုသည်မှာ တစ်ကြိမ်တစ်ခါဆောင်ရွက်ရုံ၊ တစ်ကြိမ်တစ်ခါဆွေးနွေဟောပြောရုံနှင့် ပြီးဆုံးသွားခြင်းမျိုးမဟုတ်ဘဲ စားသုံးသူပြည်သူများအတွက် အသိပညာပေးခြင်း၊ ဈေးကွက်စောင့်ကြည့်စစ်ဆေးခြင်း စသည့်လုပ်ငန်းများကို စဉ်ဆက်မပြတ်ဆောင်ရွက်သွားရမည်ဖြစ်ပြီး “ပြည်သူတိုင်းဟာ စားသုံးသူဖြစ်တယ်၊ စားသုံးသူတိုင်းမှာ စားသုံးသူအခွင့်အရေးတွေရှိတယ်” ဆိုသည့်အတိုင်း စားသုံးသူပြည်သူများသည် စားသုံးသူကာကွယ်ရေးဥပဒေပါအတိုင်း မိမိတို့လိုက်နာရမည့်တာဝန်များကို လိုက်နာရန်လိုအပ်သကဲ့သို့ နစ်နာဆုံးရှုံးမှုများရှိလာလျှင်လည်း ရရှိမည့်အခွင့်အရေးတို့ကို နားလည်သဘောပေါက်ပြီး တောင်းဆိုတတ်သူများဖြစ်နိုင်ကြပါစေဟု ဆန္ဒပြုပြောကြားကာ နိဂုံးချုပ်ခဲ့ကြောင်း သတင်းရရှိပါသည်။

DOCA(စစ်ကိုင်း)

   ရခိုင်ပြည်နယ်၊ မြောက်ဦးခရိုင်၊ မြေပုံမြို့နယ်တွင် မိုခါမုန်တိုင်းအလွန် ပြန်လည်ထူထောင်ရေးနှင့်ဒေသဖွံ့ဖြိုးရေးတို့အတွက် ကွင်းဆင်းဆောင်ရွက်ရာ၌ နိုင်ငံတော်ကချမှတ်ထားသည့် စစ်ကြောင်း(၅)ကြောင်းဖြင့်ပုံသဏ္ဌာန်ဖော်ခဲ့ပြီး လူမှုရေးစစ်ကြောင်း၌ လမ်းဦးစီးဌာနမှ အဖွဲ့ခေါင်းဆောင် ဦးဆန်းလင်းဦးဆောင်သော မြို့နယ်အဆင့်ဌာနဆိုင်ရာများလိုက်ပါလျက် (၈-၈-၂၀၂၃) ရက်နေ့တွင် သဲတန်းရပ်ကွက်၊ အုပ်ချုပ်ရေးမှူးရုံး၌ကျင်းပရာ ၎င်းအခမ်းအနားသို့ ကျေးရွာသူ/ သား(၃၀)ဦးတို့  တက်ရောက်ခဲ့ကြပါသည်။

      အဆိုပါ အခမ်းအနားတွင် အဖွဲ့ခေါင်းဆောင်က အဖွင့်အမှာစကားပြောကြားခြင်းနှင့် အဖွဲ့ဖြင့်လိုက်ပါသော ဌာနဆိုင်ရာများမှ တာဝန်ရှိသူများက သက်ဆိုင်ရာကဏ္ဍအလိုက် ဟောပြောခဲ့ကြပြီးနောက် စားသုံးသူရေးရာဦးစီးဌာနမှ မြေပုံမြို့နယ်တာဝန်ခံ ဦးစံညွှန့် (ဦးစီးမှူး) က ဌာန၏စားသုံးသူကာကွယ်ရေးဥပဒေပါ ပြဋ္ဌာန်းချက်များ၊ စားသုံးသူအခွင့်အရေးနှင့်တာဝန်များ၊ ကုန်စည်/ ဝန်ဆောင်မှုပေါ်တွင် စားသုံးသူကတောင်းဆိုနိုင်သည့်အခွင့်အရေးများ၊ စားသုံးသူနစ်နာဆုံးရှုံးမှုအပေါ် အရေးဆိုတောင်းဆိုနိုင်သည့် စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ (CICC) ရုံးခန်းဖွင့်လှစ်ဆောင်ရွက်နေမှုအခြေအနေများ၊ Online စနစ်ဖြင့်ရောင်းချသည့် လုပ်ငန်းများကိုလည်း မှတ်ပုံတင်လက်မှတ် လျှောက်ထားပြီးမှသာ လုပ်ဆောင်ရန်လိုအပ်ကြောင်း အကျယ်တဝင့်ရှင်းလင်းဆွေးနွေးခဲ့ကြောင်းသိရှိရပါသည်။

 DOCA(ရခိုင်)

 ပုသိမ်ခရိုင်၊ စားသုံးသူရေးရာဦးစီးဌာနကဦးဆောင်ပြီး မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်အုပ်ချုပ်ရေးအဖွဲ့များပူးပေါင်းကာ ၂၀၂၃ခုနှစ်၊ ဩဂုတ်လ ၇ရက်နေ့၊ နံနက် (၁၀:၀၀) နာရီအချိန်တွင် ပုသိမ်ခရိုင်၊ ပုသိမ်မြို့နယ်ရှိ ဆေးဆိုင်များအား ကုန်အညွှန်းအမှတ်အသားပြည့်စုံမှုရှိ/ မရှိကိုကွင်းဆင်းစစ်ဆေးခဲ့ပါသည်။

 အဆိုပါဆိုင်များသို့ ဈေးကွက်စောင့်ကြည့်စစ်ဆေးခဲ့ရာတွင် စားသုံးသူများဘေးအန္တရာယ်ကင်းရှင်းစေရေး၊ ထုတ်ကုန်လုံခြုံစိတ်ချရမှုရှိစေရေးအတွက် သက်တမ်းလွန်ဆေးဝါးများရောင်းချမှုမရှိစေရေးတို့အတွက် အသိပညာများပေးအပ်ကာ ဆွေးနွေးဟောပြောခဲ့ကြောင်းသိရှိရပါသည်။

DOCA(ဧရာဝတီ)

 ပုသိမ်ခရိုင်၊ ရေကြည်မြို့နယ်တာဝန်ခံသည် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်အားကစားနှင့်ကာယပညာဦးစီးဌာနတို့ပူးပေါင်း၍ ၂၀၂၃ခုနှစ်၊ ဩဂုတ်လ (၇) ရက်နေ့၊ နံနက် (၁၀:၀၀) နာရီအချိန်တွင် ရေကြည်မြို့နယ်၊ (အ-ထ-က) မြို့မကျောင်းတွင် ဆရာ/ဆရာမ (၈)ဦး၊ ကျောင်းသား/ကျောင်းသူ(၂၃၄)ဦးတို့အား အသိပညာပေးဟောပြောဆွေးနွေးခဲ့ပါသည်။

 ထိုသို့ဟောပြောဆွေးနွေးရာတွင် စားသုံးသူရေးရာဦးစီးဌာန၏ မျှော်မှန်းချက်၊ ရည်ရွယ်ချက်အပါအဝင် ဈေးကွက်အတွင်းရောင်းချနေသောကုန်ပစ္စည်းများတွင် ကုန်စည်အမျိုးအစားအပေါ်မူတည်၍ ကုန်အညွှန်းအမှတ်အသားပြည့်စုံစွာပါရှိရေး၊ စားသုံးသူကာကွယ်ရေးဥပဒေပါ စားသုံးသူများရရှိနိုင်သော အခွင့်အရေး(၈)ချက်နှင့်တာဝန်များ အစရှိသည်တို့ကိုဆွေးနွေးခဲ့ပြီး ကုန်အညွှန်းအမှတ်အသားဖော်ပြထားသည့် အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(ဧရာဝတီ)

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ အစည်းအဝေးခန်းမ၌ ၂၀၂၃ခုနှစ်၊ ဩဂုတ်လ (၇) ရက်နေ့တွင် ဒု-တိုင်းဦးစီးမှူး ဦးထွန်းထွန်း၊ စားသုံးသူရေးရာဌာနခွဲတာဝန်ခံ ဦးကျော်စိုးရီ၊ ထုတ်ကုန်လုံခြုံစိတ်ချရမှုဌာနခွဲတာဝန်ခံ ဒေါ်ဖြူဖြူလတ်တို့သည် ဖျာပုံမြို့နယ်နှင့် ဘိုကလေးမြို့နယ်များရှိ ကုန်မျိုးစုံရောင်းချလျက်ရှိသော လုပ်ငန်းရှင်များနှင့်တွေ့ဆုံခဲ့ကြပါသည်။

  ဖျာပုံမြို့နယ်၊ စားသုံးသူရေးရာဦးစီးဌာန၊ မြို့နယ်စစ်ဆေးရေးအရာရှိနှင့် ပူးပေါင်းအဖွဲ့များ သွားရောက်စစ်ဆေးစဉ် သက်ဆိုင်ရာဌာန၏ FDA ထောက်ခံချက်မပါသည့် စားသုံးဆီမျိုးစုံရောင်းချနေသော ဆိုင် (၉) ဆိုင်၊ ဘိုကလေးမြို့နယ်၊ စားသုံးသူရေးရာဦးစီးဌာန၊ မြို့နယ်စစ်ဆေးရေးအရာရှိနှင့် ပူးပေါင်းအဖွဲ့များသွားရောက်စစ်ဆေးစဉ် သက်ဆိုင်ရာဌာန၏ FDA ထောက်ခံချက်မပါသည့် စားသုံးဆီမျိုးစုံရောင်းချနေသော ဆိုင် (၄) ဆိုင်မှ ကုန်အညွှန်းအမှတ်အသားပြည့်စုံစွာ ဖော်ပြထားခြင်းမရှိသည့် လုပ်ငန်းရှင်များက လာရောက်တွေ့ဆုံခဲ့ကြပါသည်။

 ထိုသို့တွေ့ဆုံခဲ့ကြရာတွင် ဒု-တိုင်းဦးစီးမှူးက ကုန်အညွှန်းအမှတ်အသားပြည့်စုံစွာဖော်ပြ ထားခြင်းမရှိသည့်ကုန်စည်များကိုရောင်းချခြင်းမပြုရန် စားသုံးသူအကာအကွယ်ပေးရေးဥပဒေများအကြောင်းရှင်းလင်း၍ စားသုံးသူရေးရာဦးစီးဌာနခွဲတာဝန်ခံ ဦးကျော်စိုးရီက လုပ်ငန်းရှင်၏တာဝန်များကိုရှင်းလင်းခဲ့ပြီးနောက် ထုတ်ကုန်လုံခြုံစိတ်ချရမှုဌာနခွဲတာဝန်ခံ ဒေါ်ဖြူဖြူလတ်ကလည်း ကုန်ညွှန်းအမှတ်အသားဥပဒေပါ အကြောင်းအရာများကိုရှင်းလင်း၍ နောင်တွင် ကုန်အညွှန်းအမှတ်အသားများပြည့်စုံစွာဖော်ပြထားသည့် ကုန်စည်များသာရောင်းချရန် ပြောကြားခဲ့ကြောင်းသိရှိရပါသည်။

DOCA(ဧရာဝတီ)