သတင်းနှင့် လှုပ်ရှားမှုများ

    ရန်ကုန်တိုင်းဒေသကြီး၊ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူးရုံး၏ ညွှန်ကြားချက်အရ ကော့မှူးမြို့နယ်အတွင်းရှိ ဒေသခံပြည်သူများအနေဖြင့် စားသုံးဆီအမျိုးမျိုးဝယ်ယူစားသုံးရာ၌ ဘေးအန္တရာယ်ကင်းရှင်းစေရေးနှင့် စနစ်တကျဝယ်ယူစားသုံးတတ်စေရန်ရည်ရွယ်၍ ၂၀၂၃ခုနှစ်၊ နိုဝင်ဘာလ ၆ရက်နေ့၊ နံနက်(၁၀:၃၀)နာရီအချိန်တွင် စည်ပင်သာယာမြို့မဈေးအတွင်း/ အပြင်နှင့် ရပ်ကွက်များရှိ ကုန်ခြောက်ဆိုင်များသို့သွားရောက်ကာ လုပ်ငန်းရှင်များနှင့်တွေ့ဆုံ၍ ကုန်အညွှန်းအမှတ်အသားပြည့်စုံစွာဖော်ပြပါရှိခြင်းမရှိသော စားသုံးဆီအမျိုးမျိုးဖြန့်ဖြူးရောင်းချခြင်းမရှိစေရေး ဈေးကွက်စောင့်ကြည့်စစ်ဆေးခဲ့ကြပါသည်။

   ထိုသို့ဈေးကွက်စောင့်ကြည့်ကွင်းဆင်းစစ်ဆေးရာ မြို့နယ်စည်ပင်သာယာရေးဦးစီးဌာနမှ ဈေးတာဝန်ခံနှင့်ဝန်ထမ်းများ၊ မြို့နယ်ကျန်းမာရေးဦးစီးဌာနမှ တာဝန်ရှိသူများ၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့်ပူးပေါင်းအဖွဲ့က ကော့မှူးမြို့နယ်၊ စည်ပင်သာယာမြို့မဈေးအတွင်း/အပြင်နှင့် ရပ်ကွက်များရှိ ကုန်ခြောက်ဆိုင်များသို့သွားရောက်၍ လုပ်ငန်းရှင်များနှင့်တွေ့ဆုံကာ စားသုံးသူပြည်သူများ၏ အဓိကစားသောက်ကုန်အနက် တစ်ခုဖြစ်သော စားသုံးဆီအမျိုးမျိုးရောင်းချရာတွင် ထုတ်ကုန်လုံခြုံစိတ်ချရမှုရှိစေရေးနှင့် စားသုံးသူများဘေးအန္တရာယ်ကင်းရှင်းစေရေးအတွက် စံချိန်စံညွှန်းများနှင့်ကိုက်ညီမှုမရှိသောစားသုံးဆီများ၊ ကုန်အညွှန်းအမှတ်အသားပြည့်စုံစွာဖော်ပြပါရှိမှုမရှိသောစားသုံးဆီများ ဈေးကွက်အတွင်း ဖြန့်ဖြူးရောင်းခြင်း၊ စားသုံးဆီမပြတ်လပ်စေရေး စသည့် စားသုံးသူကာကွယ်ရေးဆိုင်ရာ သိကောင်းစရာများကို ရှင်းလင်းဆွေးနွေးခဲ့ပြီး ပြည်ပမှ တရားမဝင်လမ်းကြောင်းဖြင့် တင်သွင်းဖြန့်ဖြူးနေသောစားသုံးဆီများကို မိမိတို့၏ဆိုင်များတွင် ဝယ်ယူဖြန့်ဖြူးရောင်းချခြင်းများမပြုလုပ်ကြရန်လည်းကောင်း၊ စားသုံးဆီများဖြန့်ဖြူးရောင်းချခြင်းကို စစ်ဆေးတွေ့ရှိပါက သက်ဆိုင်ရာဥပဒေလုပ်ထုံးလုပ်နည်းများနှင့်အညီ ထိရောက်စွာအရေးယူဆောင်ရွက်သွားမည်ဖြစ်သောကြောင့် မိမိတို့၏ဆိုင်များတွင် ဝယ်ယူဖြန့်ဖြူးရောင်းချခြင်းများလုံးဝမပြုလုပ်ကြရန် စားသုံးဆီနှင့်အခြားစားသောက်ကုန်ပစ္စည်းများကို ဖြန့်ဖြူးရောင်းချရာတွင်လည်း ကုန်အညွှန်းအမှတ်အသားဖော်ပြချက်နှင့်စပ်လျဉ်း၍ မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ပါရှိသော စားသောက်ကုန်ပစ္စည်းများကိုသာ ဖြန့်ဖြူးရောင်းချကြရန် ရှင်းလင်းဆွေးနွေးပြောကြားခဲ့ကြောင်း သတင်းရရှိပါသည်။

DOCA(ရန်ကုန်)

    ၂၀၂၃ခုနှစ်၊ နိုဝင်ဘာလ ၁၅ရက်နေ့တွင် ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်ရှိ ဌာနဆိုင်ရာများ၊ ရပ်ကွက်ကျေးရွာအုပ်စု (၆၂) ခုမှ ရပ်ကွက်ကျေးရွာဥက္ကဋ္ဌများနှင့် ရပ်ကွက်ကျေးရွာများမှ စာရေးများသည် နံနက်(၁၀း၀၀)နာရီအချိန်တွင် အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမ၌ လပတ်လုပ်ငန်းညှိနှိုင်းအစည်းအဝေးကျင်းပခဲ့ပါသည်။

     အဆိုပါလုပ်ငန်းညှိနှိုင်းအစည်းအဝေး၌ ကော့မှူးမြို့နယ်၊ အထွေထွေအုပ်ချုပ်ရေးဦးစီးဌာနမှ မြို့နယ်အုပ်ချုပ်ရေးမှူး ဦးကျော်ဒေဝက ကော့မှူးမြို့နယ်သည် စိုက်ပျိုးရေးကို အဓိကလုပ်ကိုင်နေသောဒေသတစ်ခုဖြစ်ပြီး မိုးစပါးစိုက်ဧကပြည့်မီအောင် စိုက်ပျိုးနိုင်ခဲ့၍ ၎င်းကို ယခုနိုဝင်ဘာလတွင် စတင်ရိတ်သိမ်းနေပြီဖြစ်ရာ သီးထပ်သီးညှပ်ဆောင်းသီးနှံများ လျာထားချက်ပြည့်မီအောင် စိုက်ပျိုးနိုင်ရေးအတွက် အဓိကကျသော သက်ဆိုင်ရာဌာနများနှင့် ရပ်ကွက်ကျေးရွာအုပ်ချုပ်ရေးမှူးများအနေဖြင့် မိမိတို့၏ရပ်ကွက်ကျေးရွာအတွက် သတ်မှတ်ထားသောလျာထားဧကများနှင့်စပ်လျဉ်း၍ လယ်သမားများအနေဖြင့် နိုဝင်ဘာလ ဒုတိယအပတ်အတွင်း သိရှိအောင်ဆောင်ရွက်ကြရန်နှင့် သိရှိလိုက်နာဆောင်ရွက်ပါမည်ဟု ဝန်ခံကတိပြုလက်မှတ်များယူပြီး နိုဝင်ဘာလ တတိယပတ်အတွင်း မြို့နယ်သို့ အချိန်မီပြန်လည်တင်ပြကြရန်၊ ယခုနှစ် ဆောင်းသီးနှံ၊ သီးထပ်သီးညှပ်များဖြစ်သော နွေစပါး၊ နေကြာ၊ နှံစားပြောင်း၊ ပဲအမျိုးမျိုး၊ ပန်းအမျိုးမျိုး၊ ဟင်းသီးဟင်းရွက်အမျိုးမျိုးတို့ကို လျာထားသည့်ဧကအတိုင်း ပြည့်မီအောင်စိုက်ပျိုးကြရန် လယ်သမားများအား တွန်းအားပေးရမည်ဖြစ်ကြောင်း ပြောကြားဆွေးနွေးခဲ့ပြီး  မြို့နယ်စီမံအုပ်ချုပ်ရေးအဖွဲ့ဝင်(၁) ဗိုလ်မှူးထွန်းဇော်မင်းက ဌာနဆိုင်ရာများနှင့် ရပ်ကွက်ကျေးရွာဥက္ကဋ္ဌများအနေဖြင့် မိမိတို့ဌာန/ရပ်ကွက်/ ကျေးရွာအတွင်းရှိ အများပြည်သူများအား လုံခြုံရေးသတိဖြင့် လုပ်ငန်းများလုပ်ဆောင်ကြစေရန်နှင့် ထူးခြားသည့်အခြေအနေများရှိပါက ချက်ချင်းသတင်းပို့ကြရန် တိုက်တွန်းဆွေးနွေးပြောကြားခဲ့ပါသည်။

     လုပ်ငန်းညှိနှိုင်းအစည်းအဝေးကျင်းပခြင်းအခမ်းအနားသို့ မြို့နယ်အုပ်ချုပ်ရေးမှူး၊ ဒုတိယမြို့နယ်အုပ်ချုပ်ရေးမှူး၊ မြို့နယ်စီမံအုပ်ချုပ်ရေးအဖွဲ့ဝင်(၁)၊ အဖွဲ့ဝင်(၂)၊ မြန်မာနိုင်ငံရဲတပ်ဖွဲ့မှ မြို့နယ်မှူး၊ လူဝင်မှုကြီးကြပ်ရေးဦးစီးဌာနမှ ဦးစီးမှူး၊ ကော့မှူးမြို့နယ်၊ ဌာနဆိုင်ရာများမှ ဦးစီးမှူးများ၊ ရပ်ကွက်ကျေးရွာများမှ ဥက္ကဋ္ဌများ၊ ရပ်ကွက်ကျေးရွာများမှ စာရေးများတက်ရောက်ခဲ့ကြကြောင်းသိရှိရပါသည်။

DOCA(ရန်ကုန်)        

    စားသုံးသူရေးရာဦးစီးဌာနအနေဖြင့် အသစ်ခန့်အပ်ထားခဲ့သော ဝန်ထမ်းများနှင့် လက်ရှိ ဝန်ထမ်းများ၏ လူ့စွမ်းအားအရင်းအမြစ်များ တိုးတက်လာစေပြီး ဌာန၏ လုပ်ငန်းဆောင်ရွက်ချက် များကို လွယ်ကူလျင်မြန်သွက်လက်စေရန်ရည်ရွယ်၍ နှစ်ပတ်လျှင်(၁)ကြိမ် ကြာသပတေးနေ့တိုင်း (Thursday Talk) အသိပညာပေးဆွေးနွေးပွဲများကို ကျင်းပပြုလုပ်လျက်ရှိရာ ၉-၁၁-၂၀၂၃ ရက်နေ့၊ နေ့လယ် (၁၃း၀၀)နာရီအချိန်၌ ရန်ကုန်တိုင်းဒေသကြီးဦးစီးမှူးရုံး အစည်းအဝေးခန်းမတွင်  (Thursday Talk) အသိပညာပေးဆွေးနွေးပွဲအား ဒုတိယတိုင်းဒေသကြီးဦးစီးမှူး ဦးရွှေဖြူ ဦးဆောင်၍ တက်ရောက် ဝန်ထမ်းအင်အား(၂၅)ဦးဖြင့် ကျင်းပပြုလုပ်ခဲ့ပါသည်။

     အဆိုပါ Thursday Talk အသိပညာပေးဆွေးနွေးပွဲ၌ တိုင်းဒေသကြီးဦးစီးမှူး၏ လမ်းညွှန်ချက်အရ ဌာနအတွက် ဂုဏ်ယူရပြီး နိုင်ငံ့ဝန်ထမ်းတက္ကသိုလ်တွင် ထူးချွန်သည့်ဝန်ထမ်းများ ပေါ်ထွန်းလာစေရန် ရည်ရွယ်၍ သတင်းအချက်အလက်နည်းပညာနှင့် အရည်အသွေး စီမံခန့်ခွဲရေးဌာနခွဲမှ ဒေါ်စန္ဒာဝင်း၊ ဦးစီးအရာရှိက နိုင်ငံ့ဝန်ထမ်းတက္ကသိုလ် သင်တန်းအကြောင်း သိကောင်းစရာများ ခေါင်းစဉ်ဖြင့် ဆွေးနွေးပြောကြားခဲ့ပြီး  ဌာနဆိုင်ရာဝန်ထမ်းများနှင့် ပတ်သက်၍ နိုင်ငံ့ဝန်ထမ်းတက္ကသိုလ်တွင် ဖွင့်လှစ်သည့် သင်တန်းအမျိုးအစားနှင့် သင်တန်းကာလများ၊ Online နှင့် In-House သင်တန်းကာလဆောင်ရွက်ရန်များ၊ Online System ကာလအတွင်းနှင့်  In-House System ကာလအတွင်း (ဆောင်ရွက်ရမှုများ/ ဖြစ်လေ့ဖြစ်ထ ရှိတတ်သည်များ/ သတိပြုရန်များ/ ဆောင်ရွက်သင့်သည်များ)၊ နိုင်ငံ့ဝန်ထမ်းတက္ကသိုလ်သို့ သင်တန်းတက်ရောက်ပါက ဆောင်ရွက်သင့်သည်များကို နိုင်ငံ့ဝန်ထမ်းတက္ကသိုလ် (အောက်မြန်မာပြည်) အမှတ်တရမှတ်တမ်းဓာတ်ပုံများ၊  စံပြဆုရရှိမှုမှတ်တမ်းဓာတ်ပုံများနှင့်အတူ အကျယ်တဝင့် ဆွေးနွေးပြောကြားခဲ့ပြီး တက်ရောက်သူများက ပြန်လည်မေးမြန်းခြင်း၊ အမေးအဖြေကဏ္ဍများဖြင့် ကျင်းပပြုလုပ်ခဲ့ကြောင်း သိရှိရပါသည်။

DOCA(ရန်ကုန်)

     စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒု-ကြီးကြပ်ရေးမှူး ဒေါ်ဖြူဖြူမြင့်ပါ (၂) ဦးတို့သည် ၁၅.၁၁.၂၀၂၃ ရက်နေ့၊ နံနက် (၉:၃၀) အချိန်တွင် မှော်ဘီမြို့နယ်၊ အလက(ခွဲ)၊ ကိုးလုံးကွင်းတွင် စားသုံးသူကာကွယ်ရေးအသိပညာပေး ဟောပြောပွဲ ဆောင်ရွက်ခဲ့ပါတယ်။

     ရှေးဦးစွာ အလက(ခွဲ)၊ ကိုးလုံးကွင်းကျောင်းမှ ကျောင်းအုပ်ဆရာမကြီး ဒေါ်ခိုင်သီတာက အဖွင့်အမှာစကားပြောကြားပြီး မြောက်ပိုင်းခရိုင်ဦးစီးမှူးရုံးမှ ဒုကြီးကြပ်ရေးမှူး ဒေါ်ဖြူဖြူမြင့်က စားသုံးသူကာကွယ်ရေးအသိပညာပေးဟောပြောရာတွင် စားသုံးသူရေးရာ ဦးစီးဌာန၏ ဆောင်ပုဒ် “စားသုံးသူအခွင့်အရေး ဦးစားပေး” စားသုံးသူ၏အခွင့်အရေးများနှင့် လိုက်နာရမည့်တာဝန်များ၊ ကုန်စည်/ဝန်ဆောင်မှုနှင့်ပတ်သက်၍ ဖြေရှင်းဆောင်ရွက်ထားရှိမှုများ၊ အမှတ်တံဆိပ်မပါသော အစားအသောက်များကို ဝယ်ယူခြင်းမပြုရန် ဘေးကင်း လုံခြုံသည့်အစားအသောက်များကို ရွေးချယ်ဝယ်ယူသည့် အလေ့အကျင့်ကောင်းများ ရရှိစေရန်၊ ကုန်စည်/ဝန်ဆောင်မှုများနှင့်စပ်လျဉ်း၍ နစ်နာမှုများရှိပါက တိုင်ကြားနိုင်သည့် နည်းလမ်းများကို ဟောပြောဆွေးနွေးခဲ့ရာ ဟောပြောပွဲသို့ ဆရာမ၊ ကျောင်းသား/ကျောင်းသူ စုစုပေါင်း (၁၆၇) ဦး တက်ရောက်ခဲ့ပြီး စားသုံးသူကာကွယ်ရေးဆိုင်ရာ အသိပညာပေး လက်ကမ်းစာစောင်များ ဖြန့်ဝေခဲ့ပါတယ်။

DOCA(ရန်ကုန်)

    ရန်ကုန်တိုင်းဒေသကြီးဦးစီးမှူးရုံး၏ လမ်းညွှန်မှုဖြင့် စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးမှ ဝန်ထမ်းများသည် (၁၃-၁၁-၂၀၂၃) ရက်နေ့၊ နံနက်(၁၀:၃၀)နာရီအချိန်တွင် ပုဇွန်တောင်မြို့နယ်၊  ပုဇွန်တောင်ဈေးကွက်အတွင်းရောင်းချနေသော စည်သွပ်အစားအစာနှင့် စားသုံးဆီအမျိုးမျိုးတို့၌ စားသုံးသူကာကွယ်ရေးဥပဒေပါ ကုန်စည်များနှင့်ကုန်အညွှန်းအမှတ်အသားပြည့်စုံစွာပါဝင်မှုရှိ/မရှိစစ်ဆေးခြင်း၊ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ရေးသားဖော်ပြပါဝင်သော ကုန်စည်များကိုသာရောင်းချ၍ ၎င်းစီးပွားရေးလုပ်ငန်းရှင်များအနေဖြင့်လည်း မိမိတို့ကုန်စည်များကို သတ်မှတ်ချက်များနှင့်အညီ ထုတ်လုပ်ဆောင်ရွက်ရန်လိုအပ်ကြောင်းကို အသိပညာပေးဆွေးနွေးခဲ့ကြောင်းသိရှိရပါသည်။     

DOCA(ရန်ကုန်)