သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် တောင်ငူခရိုင်၊ ဖြူး၊ အုတ်တွင်းနှင့် တောင်ငူမြို့နယ်များရှိ စပါးကုန်သည်များနှင့်ဆန်စက်ပိုင်ရှင်များအား ၂၀၂၃ခုနှစ်၊ အောက်တိုဘာလ ၂၃ရက်နေ့တွင် သက်ဆိုင်ရာမြို့နယ်များသို့သွားရောက်တွေ့ဆုံပြီး စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး၏ လမ်းညွှန်ချက်များကို ရှင်းလင်းပြောကြားခဲ့ပါသည်။

     ခရိုင်ဦးစီးမှူးသည် နံနက် (၁၀:၃၀) နာရီအချိန်တွင် ဖြူးမြို့၊ မြို့နယ်အထွေထွေအုပ်ချုပ်ရေးဦးစီးဌာန၏ အစည်းအဝေးခန်းမ၌ ဖြူးမြို့မှ ဆန်စပါးကုန်သည်နှင့် ဆန်စက်ပိုင်ရှင်(၆)ဦးအားလည်းကောင်း၊ နေ့လယ် (၁၃:၀၀) နာရီအချိန်တွင် အုတ်တွင်းမြို့နယ်၊ အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမ၌ အုတ်တွင်းမြို့ရှိ ဆန်စပါးကုန်သည်နှင့် ဆန်စက်ပိုင်ရှင် ၁၇ဦးအားလည်းကောင်း၊ နေ့လယ် (၁၅:၀၀) နာရီအချိန်တွင် တောင်ငူမြို့၊ ခရိုင်ဦးစီးမှူးရုံး၌ တောင်ငူမြို့ရှိ ဆန်စပါးကုန်သည်နှင့်ဆန်စက်ပိုင်ရှင် ၁၀ဦးအားလည်းကောင်းတွေ့၍ ပဲခူးတိုင်းဒေသကြီးအစိုးရအဖွဲ့ဝန်ကြီးချုပ်နှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး၏ ညှိနှိုင်းချက်အရ ပဲခူးတိုင်းဒေသကြီးပြင်ပသို့ စပါးသယ်ယူခြင်းအပေါ်  စိစစ်ကြီးကြပ်ရန်ကိစ္စနှင့်ပတ်သက်၍ ပြည်ထောင်စုဝန်ကြီး၏ လမ်းညွှန်ချက်တို့ကို ရှင်းလင်းပြောကြားခဲ့ပါသည်။

     ခရိုင်ဦးစီးမှူးနှင့် သက်ဆိုင်ရာမြို့နယ်များမှ ဆန်စပါးကုန်သည်များနှင့် ဆန်စက်ပိုင်ရှင်များတွေ့ဆုံဆွေးနွေးပွဲသို့ သက်ဆိုင်ရာမြို့နယ်များမှ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌများ၊ မြို့နယ်ရဲတပ်ဖွဲ့မှူးများ၊ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ ဌာနခွဲတာဝန်ခံ ဦးမင်းဇော်နှင့် သက်ဆိုင်ရာမြို့နယ်တာဝန်ခံများတက်ရောက်ခဲ့ကြကြောင်းသိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံ ဦးဇော်ဇော်ထွေးသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ရေတာရှည်မြို့နယ်ဦးစီးမှူး ဒေါ်အေးဆုစံနှင့်အတူ ၂၀၂၃ခုနှစ်၊ အောက်တိုဘာလ ၂၅ရက်နေ့၊ နေ့လယ်ပိုင်းတွင် ရေတာရှည်မြို့နယ်၊ ပိတောက်ခင်ကျေးရွာ၊ အခြေခံပညာအလယ်တန်းကျောင်းခွဲ၌ကျင်းပပြုလုပ်သည့် အသိပညာပေးဟောပြောပွဲသို့တက်ရောက်၍ စားသုံးသူကာကွယ်ရေးဆိုင်ရာအသိပညာများဟောပြောဆွေးနွေးခဲ့ပါသည်။

     ဟောပြောပွဲတွင် မြို့နယ်တာဝန်ခံ ဦးဇော်ဇော်ထွေးက စားသုံးသူ၏အခွင့်အရေးနှင့်တာဝန်များ၊ စားသုံးသူနစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်ခြင်းများ၊ ကုန်စည်များကိုဝယ်ယူရာတွင် ကုန်အညွှန်းအမှတ်အသားပြည့်စုံစွာဖော်ပြသည့် ကုန်စည်များကို ဦးစားပေးဝယ်ယူသင့်ပုံများ၊ ကုန်အညွှန်းအမှတ်အသားတွင် ဖော်ပြထားသည့်အတိုင်း လိုက်နာသုံးစွဲသင့်ပုံများကို ဟောပြောခဲ့ပါသည်။

    ဆက်လက်၍ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူး ဒေါ်အေးဆုစံက မူးယစ်ဆေးဝါးအန္တရာယ်အကြောင်းသိကောင်းစရာများကို ဟောပြောခဲ့ကြောင်းနှင့် ဟောပြောပွဲသို့ ကျောင်းသား/ ကျောင်းသူ ၉၈ဦးတက်ရောက်ခဲ့ကြကြောင်းသိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံ ဦးဇော်ဇော်ထွေးသည် အစားအသောက်နှင့်ဆေးဝါးကွပ်ကဲရေးဦးစီးဌာန၊ တောင်ငူခရိုင်ဦးစီးမှူးရုံးနှင့် ရေတာရှည်မြိုနယ်၊ အစားအသောက်နှင့်ဆေးဝါးကြီးကြပ်ရေးကော်မတီဝင်ဌာနဆိုင်ရာများမှ တာဝန်ရှိသူများနှင့်အတူ ၂၀၂၃ခုနှစ်၊ အောက်တိုဘာလ ၂၃ရက်နေ့၊ နံနက်ပိုင်းတွင် ရေတာရှည်မြို့နယ်၊ မြို့လှဈေးနှင့် ဈေးပြင်ပဆိုင်များ၌ ဈေးကွက်စောင့်ကြည့်စစ်ဆေးခဲ့ကြပါသည်။

  ဌာနဆိုင်ရာပူးပေါင်းအဖွဲ့သည် ဆေးဆိုင်များတွင် မှတ်ပုံတင်ထားခြင်းမရှိသောဆေးဝါးများနှင့် သက်တမ်းလွန်ဆေးဝါးများရောင်းချခြင်းရှိ/မရှိကိုလည်းကောင်း၊ တရားမဝင်အလှကုန်ပစ္စည်းများနှင့် သက်တမ်းလွန်အလှကုန်ပစ္စည်းများရောင်းချခြင်းရှိ/မရှိကိုလည်းကောင်း၊ စားသောက်ကုန်များ၌ ခွင့်မပြုဓာတုဆေးများနှင့် ဖော်မလင်ပါဝင်မှုရှိ/မရှိကိုလည်းကောင်း ကွင်းဆင်းစစ်ဆေးခဲ့ကြောင်းသိရှိရပါသည်။

    ပူးပေါင်းအဖွဲ့တွင် စားသုံးသူရေးရာဦးစီးဌာန၊ မြို့နယ်တာဝန်ခံ ဦးဇော်ဇော်ထွေး၊ လက်ထောက်ကြီးကြပ်ရေးမှူး ဦးဇော်မိုးအောင်တို့နှင့်အတူ အစားအသောက်နှင့်ဆေးဝါးကွပ်ကဲရေးဦးစီးဌာန၊ ခရိုင်ဦးစီးမှူးရုံးမှ ဒု-ကြီးကြပ်ရေးမှူး ဦးကျော်လင်းထွန်းဦးဆောင်သောဝန်ထမ်းများ၊ မြို့လှတိုက်နယ်ဆေးရုံအုပ်  ဒေါက်တာပန်းအိအိသန့်ဦးဆောင်သောဝန်ထမ်းများ၊ မြို့နယ်စည်ပင်သာယာရေးအဖွဲ့မှ ဌာနခွဲစာရေး ဒေါ်သက်သက်မွန်ဦးဆောင်သောဝန်ထမ်များ ပါဝင်ဆောင်ရွက်ခဲ့ကြကြောင်းသိရပါသည်။

DOCA(ပဲခူး)

     ကရင်ပြည်နယ်အစိုးရအဖွဲ့က ကြီးမှူးကျင်းပသော ကရင်ပြည်နယ်၊ ဘားအံမြို့၊ ကျက်သရေဆောင် ရွှေယဉ်မျှော်ပြည်တော်ဧစေတီတော်မြတ်ကြီးရှေ့၌  (၇၄) ကြိမ်မြောက် ဆွမ်းဆန်တော်လောင်းလှူပွဲကို (၂၅-၁၀-၂၀၂၃) ရက်နေ့၊ နံနက် (၀၇:၀၀) နာရီအချိန်တွင် စည်ကားသိုက်မြိုက်စွာကျင်းပခဲ့ကြောင်းသိရသည်။

    ယင်းဆွမ်းလောင်းလှူပွဲတွင် ကရင်ပြည်နယ်အစိုးရအဖွဲ့ဝင် တာဝန်ရှိသူများ၊ ပြည်နယ်အဆင့်ဌာနဆိုင်ရာများ၊ ရပ်ကွက်နေပြည်သူများနှင့် ပတ်ဝန်းကျင်ကျေးရွာများရှိ တိုင်းရင်းသားပြည်သူများက ဘားအံမြို့ပေါ်ရှိ ကျောင်းတိုက်ပေါင်း (   ၅၄   ) ကျောင်းနှင့် သီလရှင်ကျောင်း (   ၁၄   ) ကျောင်းတို့မှ ရဟန်း၊ သီလရှင်  ( ၂၅၀၀ ) ပါးခန့်တို့အား စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူး ဦးသန်းဦးနှင့် ပြည်နယ်ဦးစီးမှူးရုံးရှိ ဝန်ထမ်းများပူးပေါင်းပါဝင်စုပေါင်းလောင်းလှူခဲ့ကြပါသည်။ နှစ်စဉ်ကျင်းပမြဲဖြစ်သော (၇၄) ကြိမ်မြောက် သီတင်းကျွတ်လဆန်း (၁၁) ရက်နေ့တွင် ဆွမ်းဆန်လောင်းလှူပွဲကို ရွှေယဉ်မျှော်ပြည်တော်ဧစေတီတော်ရှေ့မှ ကမ်းနားလမ်းတစ်လျှောက် စည်ကားသိုက်မြိုက်စွာ  ကျင်းပခဲ့ပြီး နံနက် (၀၈:၃၀)  နာရီအချိန်တွင်ရုပ်သိမ်းခဲ့ကြောင်း သတင်းရရှိပါသည်။

DOCA(ကရင်)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုနှင့် ပခုက္ကူခရိုင်ဦးစီးမှူး၏ ကြီးကြပ်မှုဖြင့် ပခုက္ကူ ခရိုင်ဦးစီးမှူးရုံးမှ ဝန်ထမ်းများသည် စားသုံးသူ၏အခွင့်အရေးများ၊ စီးပွားရေးလုပ်ငန်းရှင်၏ တာဝန်များ၊ ကုန်အမှတ်တံဆိပ်တွင် ပါဝင်ရမည့်အမှတ်အသားများ၊ မြန်မာလိုထည့်သွင်းဖော်ပြရမည့် အချက် အလက်များအား သိရှိစေရန်အတွက် (၂၀.၁၀.၂၀၂၃)ရက်နေ့၊ နံနက်(၀၉:၃၀)အချိန်နှင့် နေ့လယ် (၁၃:၀၀)အချိန်တွင် ဆိပ်ဖြူမြို့နယ်၊ ပတ္တမြားဈေးရှိ ကုန်မျိုးစုံရောင်းဝယ်ရေး လုပ်ငန်းရှင်များနှင့်တွေ့ဆုံ၍ မြို့နယ်စည်ပင်သာယာရေးအဖွဲ့နှင့် ပူးပေါင်းပြီး အသိပညာပေးခဲ့ပါသည်။

  ကုန်မျိုးစုံရောင်းချသည့်လုပ်ငန်းရှင်များနှင့် တွေ့ဆုံရာတွင် ဆိပ်ဖြူမြို့နယ်တာဝန်ခံ ဒုတိယ ဦးစီးမှူး ဒေါ်မြင့်မြင့်သန်းက အမှတ်တံဆိပ်များအား နမူနာပြု၍ စားသုံးသူကာကွယ်ရေးဥပဒေ ၂၀၁၉ အခန်း(၁၈)တွင် ပြဌာန်းထားသည့် ကုန်အညွှန်းအမှတ်အသားဖော်ပြခြင်းတွင်ပါဝင်သော ကုန်စည်၏ တံဆိပ်အမှတ်အသား၊ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ်သည့်ရက်စွဲ၊ သက်တမ်းကုန်ဆုံးသည့် ရက်စွဲ၊ ထုတ်လုပ်မှုအမှတ်စဉ်၊ တင်သွင်းသူ၏အမည်နှင့်လိပ်စာ၊ လုပ်ငန်းအမည်နှင့် လိပ်စာ၊ ထုတ်လုပ်သည့်နေရာ၊ ပြန်လည်ထုပ်ပိုးသည့်နေရာ၊ ပါဝင်ပစ္စည်း၊ ဘေးထွက်ဆိုးကျိုး၊ ဓာတ်မတည့်ကြောင်း ဖော်ပြချက်၊ ကြိုတင်သတိပေးချက်၊ အစိုးရဌာနများက သတ်မှတ်ထားသော အချက်အလက်များအား အသေးစိတ် ရှင်းလင်းပြောကြားခဲ့ပါသည်။

   ဒုတိယဦးစီးမှူး ဒေါ်တင်မာရီက စီးပွားရေးလုပ်ငန်းရှင်အား လိုက်နာရမည့်တာဝန်များ၊ တားမြစ်ချက်များနှင့်ပတ်သက်၍ စီးပွားရေးလုပ်ငန်းရှင်အား မိမိထုတ်လုပ်ရောင်းချသော ကုန်စည်ပေါ်တွင် ကုန်အညွှန်းအမှတ်အသားပြည့်စုံစွာပါရှိသော ကုန်စည်ကိုသာ စားသုံးသူများဘေးအန္တရာယ်ကင်းပြီး လုံခြုံစိတ်ချရမှုရှိစေရေးအတွက် ရောင်းချဖြန့်ဖြူးရမည်ဖြစ်ကြောင်း အသိပညာပေး ဆွေးနွေးခဲ့ပြီး စားသုံးသူကာကွယ်ရေးဥပဒေ ၂၀၁၉ ပါ ကုန်အညွှန်းအမှတ်အသားဖော်ပြချက်နှင့် စပ်လျဉ်း၍ ကုန်စည်ပေါ်တွင် ဖော်ပြရမည့်အချက်များ၊ စီးပွားရေးလုပ်ငန်းရှင်သိရှိလိုက်နာရမည့်တာဝန်များ၊ တားမြစ်ချက်များ၊ စီမံခန့်ခွဲရေးနည်းလမ်းအရ အရေးယူနိုင်မည့်အချက်များ၊ ပြစ်မှုပြစ်ဒဏ်များ၊ စားသုံးသူအခွင့်အရေးနှင့် တာဝန်များပါရှိသည့် စားသုံးသူကာကွယ်ရေးအသိပညာပေး လက်ကမ်း စာစောင်များ ဖြန့်ဝေခဲ့ပါသည်။

DOCA(မကွေး)