သတင်းနှင့် လှုပ်ရှားမှုများ

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးမှ ဦးဆောင်၍ စားသုံးသူများ ကုန်စည်နှင့်ဝန်ဆောင်မှု လုံခြုံစိတ်ချ ရမှုရှိစေရေးအတွက် ရည်ရွယ်ပြီး စစ်ကိုင်းတိုင်းဒေသကြီး၊ စားသုံးသူကာကွယ်ရေး အလုပ်ရုံဆွေးနွေးပွဲကို ၂၀၂၃ခုနှစ်၊ စက်တင်ဘာလ ၂၁ ရက်နေ့၊ နံနက်(၉း၀၀)နာရီအချိန်တွင် တိုင်းဒေသကြီးဦးစီးမှူးရုံး၊ အစည်းအဝေးခန်းမ ၌ ကျင်းပပြုလုပ်ခဲ့ရာ စားသုံးသူရေးရာကော်မတီဥက္ကဌ၊ ကော်မတီအဖွဲ့ဝင်များ၊ မိတ်ဖက်ဌာနများ၊ SRCCI မှတာဝန်ရှိသူများ၊ စီးပွားရေးလုပ်ငန်းရှင်များ စုစုပေါင်း (၈၀)ဦးတက် ရောက်ခဲ့ကြောင်း သိရှိရပါသည်။

    အဆိုပါ အလုပ်ရုံဆွေးနွေးပွဲတွင် တိုင်းဒေသကြီးစားသုံးသူရေးရာကော်မတီဥက္ကဌ  စီးပွားရေးရာ ဝန်ကြီး ဒေါ်ရီရီသန်းက တက်ရောက်အဖွင့်အမှာစကားပြောကြားခဲ့ပြီး စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ စားသုံးသူရေးရာကော်မတီအတွင်းရေးမှူး၊ တိုင်းဒေသကြီးဦးစီးမှူး(ကိုယ်စား) ခေတ္တတိုင်းဒေသကြီးဦးစီးမှူးက စားသုံးသူကာကွယ်ရေး အလုပ်ရုံဆွေးနွေးပွဲကျင်းပပြုလုပ်ရခြင်း၏ ရည်ရွယ်ချက်များအား ရှင်းလင်းဆွေးနွေးပြောကြားခဲ့ပါသည်။

    ဆက်လက်၍ တိုင်းဒေသကြီးဌာနဆိုင်ရာအကြီးအကဲများ၊ အသင်းအဖွဲ့များမှ တာဝန်ရှိသူများနှင့် လုပ်ငန်းရှင်များက သက်ဆိုင်ရာလုပ်ငန်းကဏ္ဍများအလိုက် တာဝန်ယူပူးပေါင်းဆောင်ရွက်ကြမည့် အခြေအနေများနှင့် စပ်လျဉ်း၍ တိုင်းဒေသကြီးပညာရေးမှူးရုံးမှ ညွှန်ကြားရေးမှူး ဦးကျော်သူက ပုဂ္ဂလိက ပညာရေးဝန်ဆောင်မှုလုပ်ငန်းများအပေါ် ထိန်းကျောင်းဆောင်ရွက်နေမှုအားလည်းကောင်း၊ တိုင်းဒေသကြီးစည်ပင်သာယာရေးအဖွဲ့မှ ဒုတိယညွှန်ကြားရေးမှူး ဦးသိန်းဆွေမြင့်က စည်ပင်သာယာရေးဥပဒေအကြောင်း သိကောင်းစရာများကိုလည်းကောင်း၊ အစားအသောက်နှင့် ‌ဆေးဝါးကွပ်ကဲရေးဦးစီးဌာနမှ ဦးစီးအရာရှိ ဒေါ်အိအိထွန်းက အစားအသောက်နှင့် ဆေးဝါးအလှကုန်များနှင့် ပတ်သက်၍  စားသုံးသူများဘေးကင်းလုံခြုံမှုဆိုင်ရာ အစီမံများအားလည်းကောင်း၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးမှ ဦးစီးအရာရှိ ဒေါ်‌အေးမြင့်ငြိမ်းက စားသုံးသူကာကွယ်ရေးလုပ်ငန်းဆောင်ရွက်မှုများနှင့် ပတ်သက်၍လည်းကောင်း၊ အသီးသီးPower Point ဖြင့် ရှင်းလင်းဆွေးနွေးခဲ့ကြပါသည်။

     ထို့နောက် အလုပ်ရုံဆွေးနွေးပွဲသို့ တက်ရောက်လာကြသူများက အပြန်အလှန်ဆွေးနွေးခဲ့ကြပြီး အထွေထွေဆွေးနွေးမြန်းခြင်းအပေါ် စားသုံးသူရေးရာဦးစီးဌာန၊ ခေတ္တတိုင်းဒေသကြီးဦးစီးမှူးက အလုပ်ရုံဆွေးနွေးပွဲမှ မေးမြန်းမှုများ၊ဖော်ထုတ်ချက်များနှင့် ပတ်သက်၍ သုံးသပ်ဆွေးနွေးခဲ့ပြီး သက်ဆိုင်ရာကဏ္ဍအလိုက် အသီးသီးရှင်းလင်းတင်ပြမှုအပေါ် တိုင်းဒေသကြီး၊ စားသုံးသူရေးရာ ကော်မတီဥက္ကဌက လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ်ဆောင်ရွက်ပေးပြီး နိဂုံးချုပ်အမှာစကားပြောကြားကာ အခမ်းအနားကို နေ့လယ်(၁၃း၀၀)နာရီအချိန်တွင် အောင်မြင်စွာ ရုပ်သိမ်းခဲ့ကြောင်း သိရှိရပါသည်။

DOCA(စစ်ကိုင်း)

      စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်ဦးစီးမှူးရုံးမှ မြို့နယ်ဦးစီးမှူး ဦးဝင်းမင်းစိုးနှင့် ဝန်ထမ်းများ (၁၉.၉.၂၀၂၃) ရက်နေ့ ၊နံနက်(၁၀:၀၀)အချိန်တွင် ဓနုဖြူမြို့ပေါ်ရှိ ရောင်းချနေသောဆီများအား ကုန်အညွှန်းအမှတ်အသား ပြည်စုံစွာ ဖော်ပြပါဝင်ခြင်း ရှိ/မရှိ ကွင်းဆင်းစစ်ဆေးခဲ့ကြပါသည်။

       အဆိုပါစစ်ဆေးဆောင်ရွက်မှုတွင် စားသုံးသူရေးရာဦးစီးဌာန၊ ဓနုဖြူမြို့နယ် ဦးစီးအရာရှိ ဦးဝင်းမင်းစိုးက စားသုံးသူများ ဘေးအန္တရာယ်ကင်းရှင်းရေးအတွက် ဒေသတွင်း အသုံးပြုလျက်ရှိသည့် ကုန်စည်များနှင့် စပ်လျဉ်း၍ ယခုကဲ့သို့ ဈေးကွက်စောင့်ကြည့်စစ်ဆေးခြင်းဖြစ်ကြောင်း၊ လုပ်ငန်းရှင်များအား မိမိတို့ရောင်းချနေသောကုန်စည်များတွင် ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ရေးသားဖော်ပြပါဝင်သော ကုန်စည်များကိုသာ ရောင်းချကြရန်၊ သက်တမ်းလွန်ကုန်စည်များ၊ ခွင့်ပြုချက်မရှိသော ကုန်စည်များ၊ ကုန်အညွှန်းအမှတ်အသားမပါဝင်သောကုန်စည်များကို ဈေးကွက်အတွင်းမရောင်းချရန် ကုန်စုံဆိုင်လုပ်ငန်းရှင်များကို အသိပညာပေးပြောကြားခဲ့ကြောင်း သိရှိရပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ်ဦးစီးမှူးရုံး ပန်းတနော်မြို့နယ်သို့ ခရိုင်ကိုယ်စားပြု ခရိုင်ဦးစီးမှူးဦးဇော်မင်းနှင့် ဝန်ထမ်းများသည် (၁၉.၉.၂၀၂၃) ရက်နေ့၊ (၁၁:၀၀)နာရီအချိန်က ပန်းတနော်မြို့ပေါ်ရှိ ကုန်မျိုးစုံ မုန့်မျိုးစုံအရောင်းဆိုင်တွင် ရောင်းချလျက်ရှိသော ကလေးအာဟာရမုန့်အမျိုးမျိုးကို ကုန်အညွှန်းအမှတ်အသားပါဝင်မှု ရှိ/မရှိ ကုန်စည်ဈေးကွက် စောင့်ကြည့် စစ်ဆေးခဲ့ကြပါသည်။

     ကွင်းဆင်းစစ်ဆေးရာတွင် ပန်းတနော်မြို့နယ်ရှိစတိုးဆိုင်နှင့် ကုန်မျိုးစုံ၊ မုန့်မျိုးစုံအရောင်းဆိုင်များတွင် ရောင်းချသောကလေးအာဟာရမှုန့်များတွင် ကုန်အညွှန်းအမှတ်အသား ပြည်စုံစွာဖော်ပြပါဝင်ခြင်း ရှိ/မရှိကို မိတ်ဖက်အဖွဲ့စည်းများနှင့်အတူ ကွင်းဆင်းစစ်ဆေးခဲ့ကြပါသည်။ ကုန်အညွှန်းအမှတ်အသားဖော်ပြပါဝင်သော ကုန်စည်အချို့ကိုသာ ရောင်းချနေကြောင်း စစ်ဆေးတွေ့ရှိရပြီး၊ ကုန်မျိုးစုံရောင်းချနေ သောဆိုင်ရှင်များအား စစ်ဆေးရေးတာဝန်ရှိသူမှ ဈေးကွက်အတွင်း FDA ဌာန၏ ခွင့်ပြုချက်မပါရှိသောကုန်စည်များ၊ စားသုံးသူရေးရာဦးစီးဌာန၏ ကုန်အညွှန်းအမှတ်အသားမပြည့်စုံသော ကုန်စည်များ၊ အထက်ဌာန၏ လမ်းညွှန်ချက်အရ ဈေးကွက်အတွင်း တားမြစ်ကုန်စည်များရောင်းချခြင်းမျိုး ရှိ/မရှိကိုလည်း လစဉ်ကွင်းဆင်းစစ်ဆေးလျက်ရှိသောကြောင့် လုပ်ငန်းရှင်များအနေဖြင့် မိမိတို့ရောင်းချသော ကုန်စည်များ ဘေးအန္တရာယ်ကင်းရှင်းသော ကုန်စည်များကိုသာ ရောင်းကြရန်၊ စားသုံးသူများဝယ်ယူသည့်အခါ ကုန်စည်တစ်ခုခုကြောင့် စားသုံးသူအခွင့်အရေး နစ်နာဆုံးရှုံးမှုရှိလာပါက စားသုံးသူရေးရာဦးစီးဌာနသို့ တိုင်ကြားနိုင်သည့်အတွက် စီးပွားရေးလုပ်ငန်းရှင်များမှ လုပ်ငန်းရှင်တို့၏ လိုက်နာရမည့်တာဝန်များ၊ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက် အမှတ်(၂/၂၀၁၉) လမ်းညွှန်ချက်များ၊ စားသုံးသူကာကွယ်ရေးလုပ်ငန်းစဉ်နှင့်များ ဌာန၏ ဆောင်ရွက်နေသောလုပ်ငန်းများနှင့် ပတ်သက်၍ သိရှိလိုပါက ရုံးဖွင့်ရက်ရုံးချိန်အတွင်းတွင် Consumer Call Center No 1535 သို့ ဆက်သွယ်မေးမြန်းနိုင်ကြောင်းကိုပါ အသိပေးခဲ့ကြောင်း သတင်းရရှိပါသည်။

DOCA(ဧရာဝတီ)

    ဧရာဝတီတိုင်းဒေသကြီး မအူပင်ခရိုင်၊ ပန်းတနော်မြို့နယ် မြို့မဈေးနှင့် မြို့ပေါ်များရှိ စတိုးဆိုင်များတွင် ဖြန့်ဖြူးရောင်းချလျက်ရှိသည့် စားသုံးဆီအမျိုးမျိုးနှင့်စပ်လျဉ်း၍ စားသုံးသူကာကွယ်ရေး ဥပဒေပါ  ကုန်စည်များ၌ ကုန်အညွှန်းအမှတ် ပြည့်စုံစွာပါရှိ/မရှိ ကွင်းဆင်းစစ်ဆေးခြင်းကို (၂၀.၉.၂၀၂၃) ရက်နေ့၊ နံနက်  (၀၉:၃၀) နာရီခွဲအချိန်တွင် စစ်ဆေးခဲ့ကြောင်း သိရသည်။

    အဆိုပါကွင်းဆင်းစစ်ဆေးရာသို့ မအူပင်ခရိုင် စားသုံးသူရေးရာဦးစီးဌာနမှ ခရိုင်ဦးစီးမှူး ဦးဇော်မင်းနှင့် မိတ်ဖက်ဌာနများမှ တာဝန်ရှိသူများနှင့်အတူ ပန်းတနော်ဈေးကွက်အတွင်းရှိ ဟင်းသီးဟင်းရွက်ဆီ (Vegetable Oil, Cooking Oil) နှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် ကုန်စည်၏ အမျိုးအမည်ကိုတိကျစွာ မြန်မာဘာသာဖြင့်ဖော်ပြရန်နှင့် အရွယ်အစား၊ အသားတင်ပမာဏတို့အား ဖော်ပြရန်လိုအပ်ခြင်းနှင့် ၎င်းကုန်အညွှန်းအမှတ်အသားဖော်ပြချက်တို့နှင့်ကိုက်ညီသော စားသုံးဆီများကိုသာ ရောင်းချစေရေး စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက်တို့အား အသိပေးရှင်းလင်းပြောကြားခဲ့ပြီး ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါကြောင်း သတင်းရရှိပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးရုံး အစည်းအဝေးခန်းမ၌ (၂၁.၉.၂၀၂၃)ရက်နေ့ ၊နေလယ် (၁၃:၀၀)နာရီအချိန်တွင် ဝန်ထမ်းများစွမ်းဆောင်ရည်မြှင့်တင်ရေး အထောက်အကူပြု Thursday Talk အသိပညာပေးဟောပြောပွဲ ကျင်းပပြုလုပ်ခဲ့ပါသည်။

    ပထမဦးစွာ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ဒုတိယတိုင်းဒေသကြီး ဦးစီးမှူး ဒေါ်အေးအေးမိုးက အဖွင့်အမှာစကားပြောကြားရာတွင် ဝန်ထမ်းတစ်ဦးချင်း စွမ်းဆောင်ရည် မြင့်တက်စေရေးအတွက် Thursday Talk အသိပညာပေးသင်တန်းများ ကျင်းပရခြင်းဖြစ်ကြောင်း၊ ဝန်ထမ်းများအနေဖြင့် သေချာစွာလေ့လာမှတ်သားကြစေလိုကြောင်း ပြောကြားခဲ့ပါသည်။ ဆက်လက်၍ မကွေးခရိုင်ဦးစီးမှူးရုံးမှ ဒုတိယခရိုင်ဦးစီးမှူး ဦးမျိုးဝင်း(ဦးစီးမှူး)က ဓါတ်မြေဩဇာနှင့် ပိုးသတ်ဆေး ဥပဒေအကြောင်းကိုလည်းကောင်း၊ တိုင်းဒေသကြီးဦးစီးမှူးရုံး၊ စီမံရေးရာဌာနခွဲ၊ စီမံ(ထွေ)ဌာနစိတ်မှ ဒေါ်ရွှေရည်ဝင်း(ဒု-ဦးစီးမှူး)က ငှားရမ်းခြင်းဆိုင်ရာကိစ္စရပ်များကိုလည်းကောင်း၊ စီမံရေးရာဌာနခွဲ၊ စီမံ(ဝန်ထမ်း)ဌာနစိတ်မှ ဒေါ်စန်းစန်းအေး(ဒု-ဦးစီးမှူး)က ထောက်ပံ့ကိစ္စဆိုင်ရာသိကောင်းစရာများအကြောင်း ကိုလည်းကောင်း၊ မကွေးခရိုင်ဦးစီးမှူးရုံးမှ ဒေါ်ခင်စုစုမွန်(ဒု-ဦးစီးမှူး)က  စစ်ဆေးရေးအရာရှိ၏လုပ်ငန်း တာဝန်များအကြောင်းကိုလည်းကောင်း Power Point များဖြင့် ဟောပြောဆွေးနွေးခဲ့ပြီး တက်ရောက် လာသည့်ဝန်ထမ်းများက သိရှိလိုသည်များကိုမေးမြန်းမှုအပေါ် အပြန်အလှန်ဆွေးနွေးခြင်းများ ပြုလုပ်ခဲ့ပြီး နေ့လယ် (၁၅း၃၀)နာရီအချိန်တွင် ဟောပြောဆွေးနွေးပွဲ ရုပ်သိမ်းခဲ့ပါသည်။ အဆိုပါ သင်တန်းသို့ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူး၊ ဒုတိယတိုင်းဒေသကြီး ဦးစီးမှူး၊ ခရိုင်ဦးစီးမှူးများနှင့် ဌာနတာဝန်ခံများ၊ အရာထမ်း/အမှုထမ်းများ စုစုပေါင်း(၃၃)ဦး တက်ရောက်ခဲ့ကြကြောင်း သတင်းရရှိပါသည်။  

DOCA(မကွေး)