သတင်းနှင့် လှုပ်ရှားမှုများ

    ပဲခူးတိုင်းဒေသကြီး၊ သာယာဝတီခရိုင်၊ မင်းလှမြို့နယ် ၊ လက်ဆက်ကျေးရွာအုပ်စု ၊ စိန်ကန့်လန့် ကျေးရွာရှိ လင်းတိုင်းပြည့် မြန်မာမှုပန်းပုလုပ်ငန်းပိုင်ရှင် ဦးကိုမင်းနှင့် ဒေါ်နီနီဝင်းတို့၏ မြန်မာမှု ပန်းပု လုပ်ငန်း လုပ်ဆောင်နေမှု အခြေအနေများလေ့လာရန်အတွက် စားသုံးသူရေးရာဦးစီးဌာန မြို့နယ် တာဝန်ခံ ဦးစိန်ဝင်းမှ (၂၀.၆.၂၀၂၃)ရက်နေ့တွင် သွားရောက်တွေ့ဆုံ မေးမြန်းလေ့လာခဲ့ပါသည်။                                

    လင်းတိုင်းပြည့် မြန်မာမှု ပန်းပုလုပ်ငန်းအား ၁၉၈၈ ခုနှစ်မှ စတင်လုပ်ကိုင်ခဲ့ရာ ယခုအချိန်အထိ လုပ်ငန်းသက်တမ်း (၂၅)နှစ် ရှိပြီဖြစ်ပြီး လုပ်ငန်းအခြေအနေမှာ မိသားစု(၃)ဦးနှင့် ပန်းပုလုပ်သား(၁၂)ဦး တို့ဖြင့် အော်ဒါလက်ခံကြောင်း ၊ မှာကြားသည့် ပန်းပုရုပ်အမျိုးအစား၊ အရွယ်အစားဆိုဒ်၊ လက်ရာ အလိုက် အကြမ်းထည်/ အနုထည် တို့၏ အသေးစိတ်ထုဆစ်မှုအပေါ် ပန်းပုလုပ်သားများအား ထုဆစ်ခ ပေးချေရကြောင်း၊ ယခင်က အကြမ်းထည် ထုဆစ်ပြီး အခေျာသပ်ရာတွင် လက်ဖြင့် ‌အသေးစိတ် ကော်ပတ်အကြမ်း/ အနုတိုက်ရသဖြင့် အချိန်ကြာမြင့်ပြီး လုပ်ငန်း မတွင်ကျယ်ကြောင်း၊ ယခုအခါတွင် စက်မော်တာများ၊ လက်ကိုင် ချိန်းဆောအသေးများ၊ ကော်ပတ်တိုက်စက်များဖြင့်လည်းကောင်း ၊ ခေတ်မီစက်ကိရိယာများ တပ်ဆင်ပြီး အသုံးပြုရသဖြင့် လုပ်ငန်းပိုမို မြန်ဆန်ပြီးမြောက်ပါကြောင်း၊ ခေတ်မီစက်ကိရိယာများအတွက် လျှပ်စစ်မီး အသုံးပြု လုပ်ဆောင်ရသော်လည်း မီးလာချိန် ကန့်သတ်မှု ရှိသဖြင့်  မီးစက်ဖြင့် အသုံးပြု ဆောင်ရွက်ရကြောင်း၊ အော်ဒါမှာကြားရက် အချိန်မီရန်       မီးစက်မောင်း၍ ဆောင်ရွက်ရကြောင်း၊ အော်ဒါမှာကြားမှု အခြေအနေအရ တစ်ရက်လျှင် မီးစက် အသုံးပြုမှု ဓါတ်ဆီ(၃)ဂါလံခန့် ကုန်ကျကြောင်း၊ ကုန်ကြမ်းအနေဖြင့် ကင်းလွတ်သစ် အမျိုးအစား ဖြစ်သည့် ကုက္ကိုသားများအား အဓိကထား၍ ထုလုပ်ပြီး ကုန်ကြမ်းအား ဒေသတွင်းမှပင် ဝယ်ယူစုဆောင်း ရရှိပါကြောင်း၊ မှာကြားသည့် ပန်းပုရုပ်အမျိုးအစား၊ အရွယ်အစားဆိုဒ်အလိုက် ဈေးနှုန်း ကွာခြားပြီး မှာယူသည့် ဒေသအရောက်ပေးပို့ရပါက သယ်ယူပို့ဆောင်ခအား မှာယူသူမှ ကျသင့်ခံရကြောင်း၊ ပန်းပုရုပ်များ ပို့ဆောင်ရာတွင် အရွယ်အစားအလိုက် ထိခိုက်ကျိုးပဲ့မှုမရှိစေရန် စနစ်တကျ ထုတ်ပိုးပြီး ပို့ဆောင်ပေးရပါကြောင်း သိရှိရပါသည်။ ရန်ကုန်တိုင်းဒေသကြီး နှင့် မန္တလေးတိုင်းဒေသကြီး တို့မှလည်း မှာကြားမှုများရှိပါကြောင်း၊ ပန်းပုရုပ်အမျိုးအစားများအား နမူနာအဖြစ် အနည်းငယ်ထုဆစ်ပြသထားပြီး  အော်ဒါမှာကြားမှုအရသာ ထုဆစ်ပေးပြီး ကြိုတင်ထုဆစ်မထားပါကြောင်း ၊ လူမှုကွန်ယက်တွင်လည်း လင်းတိုင်းပြည့်မြန်မာမှုပန်းပုလုပ်ငန်းအမည်ဖြင့် Facebook Page ဖွင့်လှစ်ထားရှိပြီး လုပ်ငန်း အပ်နှံမှုများလက်ခံခြင်း၊ နမူနာဓာတ်ပုံများတင်ပြထားပြီး နမူနာရုပ်ထုဓာတ်ပုံ(၂၀၀၀)ကျော်ရှိပြီး လုပ်ငန်းအရ အပ်နှံသူများ စိတ်တိုင်းကျ ထုဆစ်ပေးလျက်ရှိပါကြောင်း သိရှိရပါသည်။

     စားသုံးသူရေးရာဦးစီးဌာနအနေဖြင့် မြန်မာမှုပန်းပုလုပ်ငန်း ဖွံ့ဖြိုးတိုးတက်လာစေရန်အတွက် နိုင်ငံ့စီးပွားမြှင့်တင်ရေးရန်ပုံငွေမှ ထောက်ပံ့ရရှိအောင် ကူညီဆောင်ရွက်ပေးခဲ့ပါကြောင်း၊ ဈေးကွက် ပိုမိုကျယ်ပြန့်စွာ ထုတ်လုပ်နိုင်ရေးအတွက် ပဲခူးမြို့ အ‌ရောင်းပြခန်းတွင် ဗွီနိုင်းစနစ် Venyl ဖြင့် ပြသရောင်းချနိုင်ရေးကို ကူညီဆောင်ရွက်ပေးထားပြီး ဒေသထွက်ကုန် မြန်မာမှု ပန်းပုလက်ရာများအား ပြည်တွင်း၌သာမက ပြည်ပသို့ တင်ပို့ရောင်းချနိုင်မည်ဆိုပါက ပိုမို အကျိုးအမြတ်များရရှိနိုင်ပါကြောင်း၊ ရိုးရာမြန်မာမှု ပန်းပုများအား မတိမ်ကော မပပျောက်စေရေးအတွက် မိသားစု လက်ဆင့်ကမ်းပညာအမွေပေး ထိန်းသိမ်းစောင့်ရှောက်ကာ ဆက်လက်ဆောင်ရွက်စေလိုပါကြောင်း ဆွေးနွေးပြောကြားခဲ့ပါ သည်။

DOCA(ပဲခူး)

    စားသုံးသူရေးရာဦးစီးဌာန ၊ ညောင်လေးပင် ခရိုင်ဦးစီးမှူးနှင့်တကွ ဝန်ထမ်းများသည် ၁၅.၆.၂၀၂၃ ရက်နေ့တွင် ပဲခူးတိုင်းဒေသကြီး (အရှေ့) ၊ ညောင်လေးပင်မြို့ ၊ မြို့မ (၂) ရပ်ကွက်ကြား တောရ (၁) လမ်းရှိ သောက်ရေသန့်လုပ်ငန်းသို့ ခရိုင်ဦးစီးမှူးဦးဆောင်၍ မြို့နယ်အထွေထွေအုပ်ချုပ်ရေး ဦးစီးဌာန ၊ ကျန်းမာရေးဦးစီးဌာန ၊ စည်ပင်သာယာရေးအဖွဲ့တို့ ပူးပေါင်းပါဝင်၍ ထုတ်လုပ်မှု ဖြစ်စဉ်များနှင့် ဈေးကွက်ရောင်းဝယ်ဖောက်ကားမှု အခြေအနေများကို ကွင်းဆင်းလေ့လာခဲ့ပါသည်။

    ထိုသို့ကွင်းဆင်းစစ်ဆေးရာတွင် သောက်ရေသန့်များ ထုတ်လုပ်ရောင်းချဖြန့်ဖြူးရာတွင် FDA ထောက်ခံချက် ရှိ/မရှိ ၊ အခြားဌာနများ၏ တရားဝင် အသိအမှတ်ပြု အထောက်အထားများရှိ/မရှိ ၊ ကုန်အညွှန်းအမှတ်အသားများ ပြည့်စုံစွာ ဖော်ပြထားခြင်းရှိ/မရှိ စစ်ဆေးခဲ့ကြောင်း သိရှိရသည်။

DOCA(ပဲခူး)

      ရှမ်းပြည်နယ်(မြောက်ပိုင်း)၊ ကျောက်မဲခရိုင်၊ သီပေါမြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံသည် (၁၈-၆-၂၀၂၃) ရက်နေ့၊ နံနက် (၉:၀၀) နာရီအချိန်တွင် သီပါမြို့နယ်၊ ပြန်ကြားရေးနှင့်ပြည့်သူ့ဆက်ဆံရေးဦးစီးဌာနတို့နှင့်ပူးပေါင်း၍ ၎င်းဌာနရှိ လူထုဗဟိုပြုဌာန (Community Center) ၌ ကုန်ညွှန်းအမှတ်အသားဆိုင်ရာ အသိပညာပေး (Talk Show) ကျင်းပပြုလုပ်ခဲ့ပါသည်။

   အဆိုပါ Talk Show  ဆွေးနွေးပွဲတွင် သီပေါမြို့နယ်၊ ပြန်ကြားရေးနှင့်ပြည့်သူ့ဆက်ဆံရေးဦးစီးဌာန၊ ဒေါ်ခင်နီလာစိုး(ဦးစီးအရာရှိ)က ပထမဦးစွာ Talk Show ဆောင်ရွက်ခြင်း၏ ရည်ရွက်ချက်များကိုပြောကြားခဲ့ပါသည်။ ထို့နောက် သီပေါမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ ဒေါ်လင်းလင်းထွန်း(ဒုတိယဦးစီးမှူး)က “ကုန်စည်များတွင် ကုန်ညွှန်းအမှတ်အသားများ မှန်ကန်ပြည့်စုံစွာဖော်ပြစေရေးအတွက် အသိပညာပေး”ခေါင်းစဉ်ဖြင့် ဆွေးနွေးရာတွင် စားသုံးသူပြည်သူများ နစ်နာဆုံးရှုံးမှုများနှင့် ဘေးအန္တရယ်မဖြစ်စေရေးတို့အတွက် စားသုံးသူကာကွယ်ရေးဥပဒေ (၂၀၁၉)ပါ ပြဋ္ဌာန်းချက်များမှ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များအကြောင်း၊ စားသုံးသူကာကွယ်ရေးဥပဒေ အခန်း(၁၈)ပါ ကုန်ညွှန်းအမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ-၄၁၊ ပုဒ်မခွဲ(ခ)နှင့် (ဆ)တို့ပါ ကုန်ညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့) တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ကြောင်း၊ မိမိတို့၏ကုန်စည်များတွင် သတ်မှတ်ထားသည့်ကုန်ညွှန်းအမှတ်အသားများကို မဖြစ်မနေထည့်သွင်းရမည့်အချက်များအား သိရှိလိုက်နာဆောင်ရွက်နိုင်စေရန်နှင့် စားသုံးသူများအနေဖြင့်လည်း ကုန်စည်များဝယ်ယူရာတွင် ကုန်ညွှန်းအမှတ်အသားများကို သတိပြု၍ဖတ်ရှုတတ်သည့် အလေ့အထကောင်းများရရှိစေနိုင်သည့်အပြင် မိမိတို့၏လိုအပ်ချက်နှင့်ကိုက်ညီသည့် ကုန်စည်ကို ရွေးချယ်ဝယ်ယူနိုင်စေရန်နှင့် စီးပွားရေးလုပ်ငန်းရှင်များအနေဖြင့် “ကုန်စည်လုံခြုံစိတ်ချရမှုအစ၊ ကုန်ညွှန်းအမှတ်အသားက” ဟူသော ဆောင်ပုဒ်နှင့်အညီ လိုက်နာမှုမရှိလျှင် စားသုံးသူကာကွယ်ရေးဥပဒေအရ အရေးယူဆောင်ရွက်ခံရမည်ဖြစ်ကြောင်း သိရှိလိုက်နာဆောင်ရွက်စေရေးအတွက် Talk Show  အစီအစဉ်တွင် ဆွေးနွေးပြောကြားခဲ့ပါသည်။

DOCA(ရှမ်း)

    စားသုံးသူရေးရာဦးစီးဌာနအနေဖြင့် ဝန်ထမ်းများအသိပညာဗဟုသုတ တိုးပွားစေရေးနှင့် စွမ်းဆောင်ရည်မြင့်မားလာစေရေး ရည်ရွယ်လျက် Thursday Talk အသိပညာပေးဆွေးနွေးပွဲများ တစ်လလျှင် အနည်းဆုံးတစ်ကြိမ် ကြာသပတေးနေ့၌ ဆွေးနွေးဟောပြောကြောင်း သိရသည်။၂၀၂၃ ခုနှစ်၊ ဇွန်လ (၁၅) ရက်နေ့၌ မိတ္ထီလာခရိုင်၊ စားသုံးသူရေးရာဦးစီးဌာန၊ ခရိုင်ဦးစီးမှူးရုံးတွင် ထုတ်ကုန်လုံခြုံ စိတ်ချရမှုဆိုင်ရာ သိကောင်းစရာများခေါင်းစဉ်ဖြင့် ဒေါ်မြို့ရီ (ဦးစီးအရာရှိ) မှ အသိပညာပေးဆွေးနွေး ပြောခဲ့ပါသည်။ ဆွေးနွေးရာ၌ ကုန်အညွှန်းအမှတ်အသားနှင့်စပ်လျဉ်းသည့် အချက်များ၊ စစ်ဆေးရေးအရာရှိ၏ လုပ်ငန်းတာဝန်နှင့် ဆောင်ရွက်ရသည့်အချက်များကို အသေးစိတ်ဆွေးနွေးဟောပြောခဲ့ရာ ဆွေးနွေးပွဲသို့ မိတ္ထီလာခရိုင်စားသုံးသူရေးရာဦးစီးဌာနမှ ဝန်ထမ်းများ တက်ရောက်ခဲ့ကြောင်း သိရသည်။

DOCA(မန္တလေး)

    ရှမ်းပြည်နယ်(မြောက်ပိုင်း)၊ကျောက်မဲခရိုင်၊ သီပေါမြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံသည် (၁၉-၆-၂၀၂၃) ရက်နေ့တွင် သီပေါမြို့နယ်၊ ပြန်ကြားရေးနှင့်ပြည့်သူ့ဆက်ဆံရေးဦးစီးဌာနရှိ လူထုအခြေပြုဗဟိုဌာန (Community Center) ခန်းမတွင် ယနေ့နံနက် (၉း၀၀) နာရီအချိန်တွင် မြို့နယ်စားသုံးသူရေးရာဦးစီးဌာနနှင့် စာပေချစ်မြတ်နိုးသူများအသင်း (BookClub)၊ အမျိုးသမီးအသင်း (Women Club) တို့ပူးပေါင်း၍ Online Shopping နှင့်ပတ်သက်၍ စားသုံးသူပြည်သူများရင်ဆိုင်ကြုံတွေ့ရသည့်အချက်များကို အသိပညာပေးဆွေးနွေးပွဲပြုလုပ်ဆောင်ရွက်ခဲ့ကြောင်းသိရှိရပါသည်။

    အဆိုပါဆွေးနွေးပွဲတွင် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဒေါ်ခင်နီလာစိုး (ဦးစီးအရာရှိ)က အသိပညာပေးဆွေနွေးပွဲပြုလုပ်ဆောင်ရွက်ရခြင်း၏ ရည်ရွက်ချက်များအား ရှင်းလင်းပြောကြားခဲ့ပြီးနောက် မြို့နယ်စားသုံးသူရေးရာဦးစီးဌာနမှ ‌ဒေါ်လင်းလင်းထွန်း(ဒုတိယဦးစီးမှူး)က Online Shopping နှင့်ပတ်သက်၍ စားသုံးသူပြည်သူများရင်ဆိုင်ကြုံတွေ့ရသည့် အချက်(၇)ချက်တို့ကို အသေးစိတ်အသိပညာပေးဆွေးနွေးခဲ့ရာ Club အဖွဲ့ဝင်များဖြစ်ကြသော ဌာနဆိုင်ရာများ၊ စာပေဝါသနာရှင်များ၊ ဆွေးနွေးပွဲတက်ရောက်သူများကလည်း သိရှိလိုသည့်အကြောင်းအရာများကိုမေးမြန်း၍ အပြန်အလှန်ဆွေးနွေးခဲ့ကြကြောင်းသိရှိရပါသည်။

DOCA(ရှမ်း)