သတင်းနှင့် လှုပ်ရှားမှုများ

      စားသုံးသူပြည်သူများ ဈေးနှုန်းသက်သာစွာ ဝယ်ယူစားသုံးနိုင်ရန်အတွက် ပုသိမ်မြို့နယ် အမှတ်(၁၀) တာကိုင်းရပ်ကွက်တွင် ၂၆.၉.၂၀၂၃ ရက်နေ့ နံနက်ပိုင်းတွင် အခြေခံ စားသောက်ကုန်များဖြစ်သော ဆန်၊ ဆီ၊ဆားနှင့် ငါးခေါင်းပွငါးများကို ပြင်ပပေါက်ဈေးထက် ဈေးနှုန်းသက်သာစွာဖြင့်ရောင်းချပေးခြင်းကို ဧရာဝတီတိုင်းဒေသကြီး၊ စားသုံးသူရေးရာဦးစီးဌာန မှ ဦးဆောင်၍ ကျေးရွာအုပ်စုအတွင်းရှိ အိမ်ထောင်စု (၅၅၀) အတွက် ဆန်ကုန်သည်များအသင်း၊ ငါးလုပ်ငန်းဦးစီးဌာန၊ ဆားလုပ်ငန်းဦးစီးဌာနပူပေါင်းပါဝင်၍  ဆန်တစ်ပြည်လျှင် ၂၅၀၀ ကျပ်ဖြင့် အိတ်ရေ ၃၀ ကိုလည်းကောင်း၊ စားအုန်းဆီ တစ်ပိဿာ ၄၈၀၀ ကျပ်ဖြင့် ပိဿာ (၅၅၀)ကိုလည်းကောင်း၊ ငါးခေါင်းပွ ၃၀ကျပ်သား တစ်ထုတ်လျှင် ၁၈၀၀ဖြင့် ပိဿာ ၃၀ကိုလည်းကောင်း ၊ ဆားတစ်ပိဿာ ၃၀၀ ကျပ်ဈေးဖြင့် (၇၅) ပိဿာ ကိုလည်းကောင်း ရောင်းချပေးခဲ့ပါသည်၊၊

      ထိုသို့ရောင်းချခဲ့ရာတွင် စားသုံးသူရေးရာဦးစီးဌာနမှ ဒုတိုင်းဦးစီးမှူး ၊ ပုသိမ်ခရိုင်ဦးစီးမှူးရုံးနှင့် မြို့နယ်တာဝန်ခံတို့မှ ပူးပေါင်းပါဝင်ဆောင်ရွက်ခဲ့ကြောင်း သတင်းရရှိပါသည်၊၊

DOCA(ဧရာဝတီ)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန ဒုတိယညွှန်ကြားရေးမှူး ဦးစိုးဦး၊ ပုသိမ်ခရိုင်ဦးစီးမှူးနှင့် မြို့နယ်တာဝန်ခံတို့ပူးပေါင်း၍ ၂၅.၉.၂၀၂၃ ရက်နေ့ နံနက်ပိုင်းတွင် စားသုံးသူပြည်သူများ ဈေးနှုန်းသက်သာစွာ ဝယ်ယူစားသုံးနိုင်ရန်အတွက် ပုသိမ်မြို့နယ် ဇင်ပြွန်းကုန်း ကျေးရွာအုပ်စု ၊ ဝါးဘိုးကျေးရွာနှင့်ဝန်းကျင်ကျေးရွာများနေ အိမ်ထောင်စု (၃၃၀) အား ဈေးကားဖြင့် ဆန်တစ်ပြည်လျှင် ၂၅၀၀ ကျပ်၊ စားအုန်းဆီ တစ်ပိဿာလျှင် ၅၁၀၀ ကျပ် ၊ ကြက်ဥ ၄  လုံး လျှင် ၁၀၀ဝ ကျပ် ၊ ဆား ၅၀ ကျပ်သား လျှင် ၁၅၀ ကျပ် ၊ ငါးသေတ္တာငါး ၃၅ ကျပ်သားလျှင် ၁၀၀၀ ကျပ် နှုန်းဖြင့် ရောင်းချပေးကြောင်း သတင်းရရှိခဲ့ပါသည်၊၊

DOCA(ဧရာဝတီ)

         စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ   ဦးဘောမ်ဇုန်း(ရုံးအုပ်) သည်   ၂၂.၉.၂၀၂၃ရက်နေ့တွင် မြစ်ကြီးနားမြို့၊ စက်မှုဇုန်ရပ်ကွက်ရှိ စားသုံးသူများအား စားသုံးသူကာကွယ်ရေးအသိပညာပေး ဟောပြောပွဲ ပြုလုပ်ဆောင်ရွက်ခဲ့ပါသည်။

          စားသုံးသူကာကွယ်ရေး အသိပညာပေးဟောပြောရာတွင် စားသုံးသူကာကွယ်ရေးဆိုသည်မှာ ကုန်စည် သို့မဟုတ် ဝန်ဆောင်မှုနှင့် စပ်လျဉ်း၍ စားသုံးသူ၏ အခွင့်အရေးနှင့် အကျိုးစီးပွားကို ကာကွယ်ပေးခြင်းဖြစ်ကြောင်း၊ စားသုံးသူနှင့် စီးပွားရေးလုပ်ငန်းရှင်တို့အကြား ကော်မရှင်နှင့် ကော်မတီအဆင့်ဆင့်တို့မှ သတ်မှတ်ဆောင်ရွက်ပေးသည့် မျှတမှုရှိသော လုပ်ငန်းစဉ်ကိုဖြစ်ကြောင်း၊ စားသုံးသူဆိုသည်မှာ ကုန်စည် သို့မဟုတ် ဝန်ဆောင်မှုကို ကုန်သွယ်ရောင်းဝယ်မှုပြုရန် သို့မဟုတ် အသက်မွေးဝမ်ကြောင်းပြုရန် မဟုတ်ဘဲ ကိုယ်တိုင်သုံးစွဲမှု အတွက်သော်လည်းကောင်း၊ အခြားသူအတွက် သော်လည်းကောင်း ရည်ရွယ်၍ ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည်ချေးဌားခြင်း ပြုလုပ်သူများ သို့မဟုတ် ပေးကမ်းထောက်ပံ့ခြင်းခံရသူများကို ဆိုလိုကြောင်း၊ စားသုံးသူ၏အခွင့်အရေးများဖြစ်သည့် စားသုံးသူများအတွက် ကုန်စည် သို့မဟုတ် ဝန်ဆောင်မှုကို ဘေးအန္တရာယ်ကင်းရှင်းစွာ အသုံးပြုခွင့်ရှိခြင်း၊ ဈေးကွက်အတွင်းရှိ ကုန်စည် သို့မဟုတ် ဝန်ဆောင်မှုနှင့် စပ်လျဉ်း၍ စားသုံးသူစိတ်ကြိုက်ရွေးချယ်ဝယ်ယူနိုင်ခွင့်ရှိခြင်း၊ စားသုံးသူနစ်နာဆုံးရှုံမှုနှင့်စပ်လျဉ်းသည့် ကိစ္စရပ်များတွင် ရှင်းလင်းတင်ပြခွင့်နှင့် တိုင်ကြားခွင့်ရရှိနိုင်ကြောင်း၊ ကုန်စည် သို့မဟုတ် ဝန်ဆောင်မှုကို ဝယ်ယူ အသုံးပြုခြင်းကြောင့် ဖြစ်ပေါ်လာသည့် နစ်နာဆုံးရှုံးမှုများနှင့် စပ်လျဉ်း၍ ကုစားခွင့်ရရှိကြောင်း၊ စားသုံးသူ၏ တာဝန်များ ဖြစ်သည့် ကုန်စည် သို့မဟုတ် ဝန်ဆောင်မှုနှင့် စပ်လျဉ်းသည့် သတင်းအချက်အလက်နှင့် လမ်းညွှန်ချက်များအတိုင်း လိုက်နာဆောင်ရွက်ရန်၊ ကုန်စည် သို့မဟုတ် ဝန်ဆောင်မှုကို ရွေးချယ်ဝယ်ယူရာတွင် သဘောတူညီထားသည့် တန်ဖိုးနှင့်အညီ ပေးချေခြင်းဖြစ်ကြောင်းနှင့် စီးပွားရေးလုပ်ငန်းရှင် အပေါ်ထိခိုက်နစ်နာစေရန် ရည်ရွယ်၍ မဟုတ်မမှန် စွပ်စွဲပြောဆိုမှု၊ ပြုလုပ်မှု တို့ကို ရှောင်ကြဉ်ရမည်ဖြစ်ကြောင်း အသိပညာပေးဟောပြောခဲ့ပြီး တက်ရောက်သူများမှ သိရှိလိုသည်များ မေးမြန်းခဲ့၍ ပြန်လည်ရှင်းလင်းခဲ့ကာ စားသုံးသူကာကွယ်ရေး ဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

          စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ  ဦးဘောမ်ဇုန်း(ရုံးအုပ်) သည် (၂၁.၉.၂၀၂၃) ရက်နေ့တွင် မြစ်ကြီးနားမြို့၊ ဧရာရပ်ကွက်ရှိ စားသောက်ကုန်အရောင်းဆိုင် လုပ်ငန်းရှင်နှင့် တွေ့ဆုံဆွေးနွေးခဲ့ပါသည်။

       ထိုသို့တွေ့ဆုံဆွေးနွေးရာတွင် စားသုံးသူကာကွယ်ရေးဥပဒေအရ စီးပွားရေးလုပ်ငန်းရှင်ဆိုသည်မှာ ကုန်စည်ကိုထုတ်လုပ်ခြင်း၊ ဖြန့်ဖြူးခြင်း၊ သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့တင်သွင်းခြင်း၊ ပြန်လည်ရောင်းချခြင်းကိုဖြစ်စေ၊ ထောက်ပံ့ခြင်းကိုဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာလုပ်ငန်း လုပ်ကိုင်ခြင်းကိုဖြစ်စေ တစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူ ကို ဆိုလိုကြောင်း၊ စီးပွားရေးလုပ်ငန်းရှင်၏ တာဝန်များဖြစ်သော ကုန်စည် သို့မဟုတ် ဝန်ဆောင်မှု၏ အာမခံချက်၊ သတ်မှတ်ချက်များနှင့်စပ်လျဉ်း၍ ရိုးရှင်းမှန်ကန်သော သတင်းအချက်အလက်များပေးခြင်း၊ စားသုံးသူကို ခွဲခြားမှုမရှိဘဲ ဖြောင့်မတ်မှန်ကန်စွာ ဆက်ဆံခြင်း၊ စီးပွားရေးလုပ်ငန်း လုပ်ကိုင်ရာတွင် စီးပွားရေး ကျင့်ဝတ်၊စည်းကမ်းနှင့်အညီ ဖြောင့်မတ်မှန်ကန်စွာဆောင်ရွက်ခြင်း၊ ကုန်စည်သို့မဟုတ်ဝန်ဆောင်မှုနှင့် စပ်လျဉ်း၍ ထပ်မံပေးချေရမည့်တန်ဖိုးကို စားသုံးသူကဝယ်ယူအသုံးမပြုမီ သိရှိစေရန် အတိအလင်း ဖော်ပြပေးခြင်း၊ ဝန်ဆောင်မှုဆိုသည်မှာ လုပ်ငန်းသို့မဟုတ် လုပ်ဆောင်မှုအသွင်ဖြင့် စားသုံးသူ၏ လိုအပ်ချက်ကို တန်ဖိုးဖြင့်ဖြစ်စေ တန်ဖိုးမပါဘဲဖြစ်စေ ဖြည့်ဆည်းပေးသည့် ဆောင်ရွက်မှုကို ဆိုလိုကြောင်း၊ ဝန်ဆောင်မှုပေးခြင်းနှင့်စပ်လျဉ်းသည့် ဖော်ပြရမည့်အာမခံချက်များဖြစ်သော စားသုံးသူ၏ လိုအပ်ချက်နှင့်ကိုက်ညီမှုရှိခြင်း၊ စားသုံးသူနှင့်သဘောတူညီထားသည့် ဝန်ဆောင်မှုတန်ဖိုးအတိုင်း ပေးအပ် စေခြင်း စသည့်အချက်များ ရှင်းလင်းဆွေးနွေးခဲ့ပြီး  စားသုံးသူကာကွယ်ရေးဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

      ဧရာဝတီတိုင်းဒေသကြီး စားသုံးသူရေးရာဦးစီးဌာန ၊ တိုင်းဒေသကြီးဦးစီးမှူးရုံး ၊ အစည်းအဝေးခန်းမတွင် ၂၁.၉.၂၀၂၃ ရက်နေ့ ၊ နံနက် (၁၀:၁၅) နာရီတွင် ကျင်းပပြုလုပ်သည့် ဝန်ထမ်း စွမ်းဆောင်ရည်မြှင့်တင်ရေး အထောက်အကူပြု အသိပညာပေးဟောပြောပွဲ ဆွေးနွေးခြင်း (၉/၂၀၂၃) Thursday Talk ကျင်းပပြုလုပ်ခဲ့ပါသည်။

     Thursday Talk ဟောပြောပွဲတွင် ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး ၊ စီမံရေးရာဌာနခွဲ ဒေါ်ဝတ်ရည်ဝင်း ၊ ဒု-ဦးစီးမှူးသည် ၎င်း၏ လုပ်ငန်း တာဝန်များဖြစ်သည့် စီမံရေးရာဌာနခွဲဆိုင်ရာ ကိစ္စရပ်များအပြင် နိုင်ငံဝန်ထမ်း ဥပဒေ ၊ နည်းဥပဒေ အခန်း (၂၄) ဝန်ထမ်းမှတ်စုစာအုပ် ထိန်းသိမ်းခြင်းတွင် ပါဝင်သည့် အပိုင်း (၃) ပိုင်းဖြစ်သည့် ဝန်ထမ်း ကိုယ်တိုင် ဆောင်ရွက်ရမည့် အပိုင်း ၊ ဝန်ထမ်းနှင့် ဌာန ပေါင်းစပ်ဆောင်ရွက်ရမည့်အပိုင်း နှင့် ဌာနမှ ဆောင်ရွက်ရမည့် အပိုင်းတို့နှင့် ပတ်သက်၍ အကျယ်တဝင့် ဆွေးနွေး ပြောကြားခဲ့ ကြောင်း သတင်းရရှိရပါသည်။

DOCA(ဧရာဝတီ)