သတင်းနှင့် လှုပ်ရှားမှုများ

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မွန်ပြည်နယ်စားသုံးသူရေးရာဦးစီးဌာနသည် စက်တင်ဘာလအတွင်း မွန်ပြည်နယ်အတွင်းရှိ စီးပွားရေးလုပ်ငန်းရှင်များနှင့်တွေ့ဆုံမှု (၁၀)ကြိမ် ပြုလုပ်ခဲ့ပါသည်။ ကုန်အညွှန်းအမှတ်အသားများနှင့် သက်ဆိုင်သည့်အသိပညာပေးဆွေးနွေးခြင်း၊ ကုန်စည်(သို့မဟုတ်)ဝန်ဆောင်မှုအပေါ် တာဝန်ရှိမှုဆိုင်ရာ အသိပညာပေးဆွေးနွေးခြင်း၊ ကုန်စည် (သို့မဟုတ်)ဝန်ဆောင်မှုများ ဘေးအန္တရာယ်ကင်းရှင်းပြီး လုံခြုံစိတ်ချရမှုရှိစေရေးနှင့် အမိန့်နှင့်ညွှန်ကြားချက်များ ထုတ်ပြန်ထားမှုဆိုင်ရာရှင်းလင်းခြင်း စသည့်တို့အား အသိပညာပေးဆွေးနွေး ခြင်းပြုလုပ်ကြောင်း သိရသည်။  

      စီးပွားရေးလုပ်ငန်းရှင်များ ဖြစ်ကြသောဆန်ကုန်သည်အသင်းအဖွဲ့၊ ဆီကုန်သည်နှင့်လုပ်ငန်းရှင်၊ ကြက်သွန်နီရောင်းဝယ်ရေးအသင်းအဖွဲ့၊ NEIမှ တာဝန်ရှိသူများ၊ ကွမ်းသီးအသင်း အဖွဲ့လုပ်ငန်း ရှင်၊ ကျောက်ထုတ်လုပ်လုပ်ငန်းရှင်၊ မုန့်လုပ်ငန်းရှင်များအသင်း၊ MSME လုပ်ငန်း ရှင်များနှင့် “ရိုးဝါး” အမှတ်တံဆိပ်တူနှင့် တစ်ရှူးထုတ်လုပ်သည့်လုပ်ငန်းရှင်၊ မွန်ပြည်နယ် ပဲ၊ နှမ်း လုပ်ငန်းရှင်၊ ကွန်ကရစ်လုပ်ငန်းလုပ်ကိုင်သည့်လုပ်ငန်းရှင်တို့အား တွေ့ဆုံ၍ ဆွေးနွေးမှုများ ပြုလုပ်ခဲ့သည်။ ထို့သို့  စီးပွားရေးလုပ်ငန်းရှင်များနှင့်တွေ့ဆုံအသိပညာပေးဆွေးနွေးခြင်းသည် မွန်ပြည်နယ်၏ စီးပွားရေးလုပ်ငန်းရှင်နှင့်စားသုံးသူများကို စားသုံးသူကာကွယ်ရေးဥပဒေ ၂၀၁၉ဖြင့် စားသုံးသူကာကွယ်ရေးလုပ်ငန်းများ စဉ်ဆက်မပြတ် ကာကွယ်ဆောင်ရွက်နေကြောင်း  သိရှိရပါသည်။

DOCA(မွန်)

    စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံးမှ ခရိုင်ဦးစီးမှူး ဒေါ်စုစုထွန်းနှင့် ဝန်ထမ်းများသည်(22.၉.၂၀၂၃)နေ့ နံနက်(09:00)နာရီအချိန်တွင် မင်းဘူးမြို့နယ် အတွင်းရောင်းချနေသော စက်သုံးဆီအရောင်းဆိုင်များအနက်မှ မင်းဘူးစကုလမ်းပေါ်ရှိ ဦးအေးလွင် ဆီဆိုင်၊ Special Pump ဆီဆိုင်နှင့် စွယ်တော်ဆီဆိုင်တို့အား သတ်မှတ်ရည်ညွှန်းဈေးထက် ဈေးနှုန်းမြင့် တင်ရောင်းချမှုရှိ/မရှိ၊  အချင်အတွယ်မှန်ကန်မှုရှိ/မရှိနှင့် LED ဆိုင်းပုဒ်များတပ်ဆင် ထားခြင်း ရှိ/မရှိတို့ကို အထူးဈေးကွက်စောင့်ကြည့်သည့်အနေဖြင့် ရှောင်တခင်ကွင်းဆင်းစစ်ဆေး ခဲ့ပါသည်။

            ထိုသို့ကွင်းဆင်းစစ်ဆေးရာတွင် ဦးအေးလွင်ဆီဆိုင်၊ Special Pump ဆီဆိုင်နှင့် စွယ်တော် ဆီဆိုင်များမှ စက်သုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီက ထုတ်ပြန် ထားသော ရည်ညွှန်းဈေးအတိုင်းရောင်းချနေသည်ကို စိစစ်တွေ့ရှိရပါသည်။ LED ဆိုင်းပုဒ်များတပ်ဆင် ထားပြီး အလေးချိန်အချင်အတွယ်များလည်းမှန်ကန်ကြောင်း စစ်ဆေးတွေ့ရှိရပါသည်။ (၂၂.၉.၂၀၂၃)ရက် နေ့တွင်ရောင်းချနေသော စက်သုံးဆီဈေးနှုန်းများမှာ (92)(၁)လီတာလျှင် ကျပ်(၂၃၃၅)၊ (95)(၁)လီတာ လျှင် ကျပ်(၂၄၄၀)၊ ဒီဇယ်ရိုးရိုး(၁)လီတာလျှင် ကျပ်(၂၅၉၅)၊ Premium (၁)လီတာလျှင် ကျပ်(၂၆၇၅) ဈေးနှုန်းဖြင့် အသီးသီးရောင်းချလျက်ရှိကြောင်း ကွင်းဆင်းလေ့လာသိရှိရပါသည်။

DOCA(မကွေး)

    စားသုံးသူရေးရာဦးစီးဌာန၊ ချင်းပြည်နယ်ဦးစီးမှူးရုံးမှ ဒေါ်သူဇာမြင့်(ဦးစီးမှူး)သည် စက်တင်ဘာလ ၂၉ ရက်နေ့၊ နံနက် ၀၉:၃၀ အချိန်တွင် ချင်းပြည်နယ်၊ ဟားခါးမြို့၊ ခရိုင်ပြန်ကြားရေး နှင့်ပြည့်သူ့ဆက်ဆံရေးဦးစီးဌာနရုံးခန်း၌ စားသုံးသူကာကွယ်ရေးဆိုင်ရာ (Talk Show) ကျင်းပခဲ့ပါသည်။

      အဆိုပါဟောပြောပွဲတွင် ဒေါ်သူဇာမြင့်က စားသုံးသူကာကွယ်ရေးဆိုင်ရာကိစ္စရပ်များနှင့်ပတ်သက်၍ “ကုန်အညွှန်းအမှတ်အသားပြည့်စုံမှ စိတ်ချယုံကြည်စားသုံးစို့” ခေါင်းစဉ်ဖြင့်  စားသုံးသူပြည်သူများ ထိခိုက်နစ်နာမှုမရှိစေရန်မည်သည့်စားသုံးကုန်စည်ဖြစ်စေ ကုန်ညွှန်းအမှတ်အသား ပြီးပြည့်စုံစွာ မဖြစ်မနေ ဖော်ပြရမည်ဖြစ်ကြောင်း၊ ပြန်ကြားရေးနှင့်ပြည့်သူ့ဆက်ဆံရေးဦးစီးဌာနမှ တာဝန်ရှိသူက စားသုံးသူကာကွယ်ရေးဥပဒေတွင် ပြဋ္ဌာန်းထားသည့်ဥပဒေ၊နည်းဥပဒေများနှင့်စပ်လျဉ်း၍ သိရှိလိုသည်များကို မေးမြန်းခြင်း၊ အပြန်အလှန်ဆွေးနွေးခြင်းများ ပြုလုပ်ခဲ့ပါသည်။ ထို့နောက် အများပြည်သူသိရှိစေရန် ၂၀၁၉ခုနှစ် မတ်လ(၁၅)ရက်နေ့တွင် ပြည်ထောင်စု လွှတ်တော်ဥပဒေ အမှတ်(၉)ဖြင့် ပြဋ္ဌာန်းခဲ့သော စားသုံးသူကာကွယ်ရေးဥပဒေတွင် အခန်း(၂၅)နှင့် ပုဒ်မ(၈၄) ခုပါရှိကြောင်း၊ စားသုံးသူကာကွယ်ရေးဥပဒေအခန်း(၁)၊ ပုဒ်မ(၂)မှ အမည်နှင့်အဓိပ္ပာယ်ဖွင့်ဆိုချက်များ ၊ကုန်စည်နှင့်ဝန်ဆောင်မှု၏အဓိပ္ပာယ်၊ အခန်း(၉)မှ စားသုံးသူ၏ အခွင့်အရေး(၈)ချက်နှင့် တာဝန်များ၊ အခန်း(၁၈)မှ ကုန်အညွှန်းအမှတ်အသားဖော်ပြခြင်းနှင့် စပ်လျဉ်းပြီး အကျယ်တဝင့် ရှင်းလင်းဆွေးနွေးခဲ့ကြောင်း သိရှိရပါသည်။

DOCA(ချင်း)

    စားသုံးသူ‌ရေးရာဦးစီးဌာန၊ ရန်ကုန်တိုင်းဒေသကြီး၊ တိုင်းဦးစီးမှူး ဦးကျော်ကျော်လွင်သည် ၂၂.၉.၂၀၂၃ ရက်နေ့၊ နေ့လယ် (၁၃:ဝဝ) နာရီအချိန်တွင် ရန်ကုန်အရှေ့ပိုင်းခရိုင်ဦးစီးမှူးနှင့် ဝန်ထမ်းများကို အရှေ့ပိုင်းခရိုင်ဦးစီးမှူးရုံး၌ မိတ်ဆက်တွေ့ဆုံ ခဲ့ကြောင်း သိရှိရပါသည်။

  အဆိုပါတွေ့ဆုံရာတွင် တိုင်းဦးစီးမှူးမှ မိတ်ဆက်စကားပြောကြားခဲ့ပြီး၊ ခရိုင်ဦးစီးမှူး ဦးဇော်မင်းလတ်မှ ဝန်ထမ်းတစ်ဦးချင်းစီနှင့် မိတ်ဆက်ပေးခြင်းနှင့် ခရိုင်ဦးစီးမှူးရုံး၏ လုပ်ငန်း ဆောင်ရွက်နေမှုအခြေအနေများကို တင်ပြခဲ့ပါသည်။

     ထို့နောက်တိုင်းဦးစီးမှူးမှ လက်ရှိဆောင်ရွက်နေသည့်လုပ်ငန်းများနှင့် ရှေ့ဆက်လက်‌ဆောင်ရွက်ရမည့်လုပ်ငန်းစဉ်များအကြောင်း၊ လျာထားချက်များ ပြည့်မှီအောင်ဆောင်ရွက်ရန် လိုအပ်ကြောင်း၊ သက်ဆိုင်ရာဌာနခွဲများ၏ လုပ်ငန်းတာဝန်များကိုလည်း ဂရုတစိုက်လုပ်ဆောင်ကြရန်နှင့် ဌာနခွဲတစ်ခုနှင့် တစ်ခုချိတ်ဆက်မိစေရန်လိုအပ်ကြောင်း၊ မကြာမီကာလအတွင်း ရာထူးတိုးစာမေးပွဲများနှင့် ဝန်ထမ်းသစ်များခေါ်ယူရန်ရှိကြောင်းနှင့် သတင်း/ဆောင်းပါးများရေးသားမှုကို စွမ်းစွမ်းတမံရေးသားပေးစေလိုကြောင်းနှင့် လုပ်ငန်းများဆောင်ရွက်ရာတွင် အခက်အခဲများရှိပါက ပွင့်ပွင့်လင်းလင်းတင်ပြနိုင်ကြောင်း စသည်ဖြင့်ပြောကြားခဲ့ပါသည်။ ဝန်ထမ်းအင်အား (၁၈) ဦးနှင့် တွေ့ဆုံခြင်းကို နေ့လယ်(၁၄:၃၀) နာရီတွင် ရုပ်သိမ်းခဲ့ကြောင်း သိရှိရပါသည်။  

DOCA(ရန်ကုန်)

      ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ ကော့မှူးမြို့နယ် တာဝန်ခံ ဦးတင်မင်းသည် မိတ်ဖက်ဌာနများနှင့်အတူ ၂၀၂၃ခုနှစ်၊ စက်တင်ဘာလ (၂၁) ရက်နေ့၊ နံနက်(၉:၀၀)နာရီအချိန်တွင် ကော့မှူးမြို့နယ်၊ မြို့မစည်ပင်သာယာဈေးအတွင်းရှိ စားသောက်ကုန်စုံ ပစ္စည်းအရောင်းဆိုင်များသို့ သွားရောက်၍ လုပ်ငန်းရှင်များကိုတွေ့ဆုံ၍ စားသုံးဆီအမျိုးမျိုး ဖြန့်ဖြူးရောင်းချ နေမှုများအား ကွင်းဆင်းစစ်ဆေး အသိပညာပေးခဲ့ကြောင်းသိရပါသည်။

      ထိုသို့ကွင်းဆင်းအသိပညာပေးရာတွင် မြို့နယ်စီမံအုပ်ချုပ်ရေးအဖွဲ့မှအဖွဲ့ဝင်(၁)ဦး၊ မြို့နယ်အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူး၊ မြို့နယ်စည်ပင်သာယာရေးဦးစီးဌာနမှ အမှုဆောင်အရာရှိ၊ မြို့နယ်ရဲတပ်ဖွဲ့မှ စခန်းမှူး၊ မြို့နယ်မီးသတ်ဦးစီးဌာနမှ မြို့နယ်ဦးစီးမှူးနှင့် မြို့နယ်စားသုံးသူရေးရာဦးစီးဌာနမှတာဝန်ခံတို့က  ကော့မှူးမြို့မစည်ပင်သာယာဈေးအတွင်း/အပြင်ရှိ စားသောက်ကုန်ပစ္စည်းအရောင်းဆိုင်များမှ လုပ်ငန်းရှင်များအား ပြည်သူများထံ စားသောက်ကုန်ပစ္စည်းများနှင့် စားသုံးဆီအမျိုးမျိုး တို့ကိုရောင်းချရာတွင် ကျန်းမာရေးဘေးကင်းလုံခြုံရေးအတွက် သတ်မှတ် စံချိန်၊ စံညွှန်းများနှင့် ကိုက်ညီမှုရှိသော စားသုံးဆီများကိုသာ ဖြန့်ဖြူးရောင်းချခြင်းများ ပြုလုပ်ရန်နှင့် စားအုန်းဆီများ ရောင်းချရာတွင် စားသုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ကော်မတီ ရန်ကုန်အထိုင် အခြေခံလက်ကားရည်ညွှန်းဈေးအတိုင်း မိမိတို့ မြို့နယ်အတွင်း ဖြန့်ဖြူးရောင်းချပေးနိုင်ရေးတို့ကို လုပ်ငန်းရှင်များအား ပူးပေါင်းအဖွဲ့တွင် ပါဝင်သောဌာနဆိုင်ရာတာဝန်ရှိသူများမှ အသိပညာပေး ရှင်းလင်းဆွေးနွေးပြောကြားခဲ့သည်။

DOCA(ရန်ကုန်)