သတင်းနှင့် လှုပ်ရှားမှုများ

        စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနမှ တာဝန်ရှိသူများသည် အရာတော်မြို့၊ မြို့နယ်သနပ်ခါးအသင်း ဥက္ကဌ၊ အတွင်းရေးမှူးအပါအဝင် အသင်းသား (၅)ဦးနှင့် အရာတော်မြို့နယ်၊ စားသုံးသူရေးရာဦးစီးဌာနတာဝန်ခံရုံး၌ တွေ့ဆုံခဲ့ရာ မြို့နယ်သနပ်ခါးအသင်းမှ ဥက္ကဌက အရာတော်မြို့၊ မြို့နယ်သနပ်းခါးအသင်းကို  ၂၀၁၄ခုနှစ်၊ နိုဝင်ဘာလ(၁၄) ရက်နေ့တွင်  အလုပ်အမှုဆောင်(၂၇)ဦးဖြင့် စတင်ဖွဲ့စည်းခဲ့ပြီး အသင်းသား (၂၀၀၀) ကျော်ရှိပါကြောင်း၊ အသင်းလစဉ် ပုံမှန်အစည်းအဝေးကို (၂)လတစ်ကြိမ် ပြုလုပ်ပါကြောင်း၊ ကိုဗစ်ကာလ ဖြစ်၍ သနပ်ခါးအရောင်းအဝယ် အေးနေပါကြောင်း၊ တန်ဖိုးမြှင့်ထုတ်ကုန်များအနေဖြင့် ဗုဒ္ဓရုပ်ပွားတော်၊ စိတ်ပုတီး၊ အမြစ်မှုန့်သောက်ဆေး၊ သနပ်ခါးအမြစ်ရည်၊ မျက်နှာသစ်ဆပ်ပြာ(အခဲ၊ အနှစ်)၊ ပေါင်ဒါ၊ အရွက်ခေါင်းလျှော်ရည်၊ အရွက်သောက်ဆေး၊ နံ့သာခေါင်းအုံး၊ ပန်းအိုး စသည်တို့ကို ထုတ်လုပ်ရောင်းချလျက်ရှိသော်လည်း ဈေးကွက်ကျယ်ပြန့်မှု မရှိသေးပါကြောင်း၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ဦးဆောင်ကျင်းပပြုလုပ်သော ပြပွဲများ၊ အခမ်းအနားများ၊ ပွဲတော်များတွင် ပူးပေါင်းပါဝင်ဆောင်ရွက်လျက်ရှိပါကြောင်း၊ မြို့နယ်သနပ်ခါးအသင်းအနေဖြင့် ကိုဗစ်ကာလတွင် အရောင်းအဝယ်ပါးပြီး ကုန်ကြမ်းများကို အချိန်ကြာမြင့်စွာ သိုလှောင်ထားရ၍ စီးပွားရေးအကျပ်အတည်းဖြစ်နေပါကြောင်း၊ အသင်းသားများ ရေရှည်ရပ်တည်နိုင်ရန်နှင့် အခက်အခဲများ ပြေလည်စေရန် ချေးငွေများ လိုအပ်လျက်ရှိကြောင်း တင်ပြမှုအပေါ် အသင်းအဖွဲ့မှတဆင့် သက်ဆိုင်ရာဝန်ကြီးဌာနသို့ အချက်အလက်အပြည့်အစုံနှင့်တကွ ချေးငွေလျှောက်ထားရန် အကြံပြုဆွေးနွေးပြောကြားခဲ့ကြောင်း သတင်းရရှိပါသည်။

စစ်ကိုင်းတိုင်းဒေသကြီး

 စားသုံးသူရေးရာဦးစီးဌာန

          စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးအနေဖြင့် စားသုံးသူကာကွယ်ရေးဥပဒေ အခန်း(၁၈)အရ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ဖော်ပြခြင်းရှိ/မရှိစိစစ်ခြင်းနှင့် စားသုံးသူကာကွယ်ရေး အသိပညာပေးခြင်းလုပ်ငန်းများနှင့်အတူ ပြည်တွင်းကုန်သွယ်ရေးဖွံ့ဖြိုးမှု လုပ်ငန်းများကိုလည်း ပူးတွဲဆောင်ရွက်လျက်ရှိကြပါသည်။

စားသုံးသူရေးရာဦးစီးဌာန၊ မုံရွာခရိုင်မှ ဒု-ခရိုင်ဦးစီးမှူးနှင့် မုံရွာမြို့နယ်တာဝန်ခံတို့သည် ဒီဇင်ဘာလ(၈)ရက်နေ့က မုံရွာမြို့၊ ချမ်းမြဝတီရပ်ကွက်ရှိ LUCKY ဂျုံမှုန့်လုပ်ငန်းရှင်နှင့် တွေ့ဆုံခဲ့ရာ ဂျုံမှုန့်လုပ်ငန်းကို ၁၉၉၃ခုနှစ်က စတင်လုပ်ကိုင်ခဲ့ကြောင်း၊ ကုန်ကြမ်းကို မုံရွာမြို့၊ ကုန်စည်ဒိုင်မှ ပေါက်ဈေးအတိုင်းဝယ်ယူပြီး၊ ကုန်ချောဂျုံမှုန့်များကို စစ်ကိုင်းတိုင်းအတွင်းနှင့် မန္တလေးတိုင်း များသို့ တင်ပို့ရောင်းချကြောင်း၊ မိမိတို့ဂျုံမှုန့်များကို မုံရွာမြို့နယ် အတွင်းရှိ ကိတ်မုန့်/ ပေါင်မုန့်နှင့် မုန့်မျိုးစုံလုပ်ငန်းများကလည်း  ဝယ်ယူသုံးစွဲမှုများကြောင်း၊ (၂၅)ပိဿာဝင် ဂျုံမှုန့်တစ်အိတ်လျှင် ပေါက်ဈေး(၃၃ဝဝဝိ/-)ဖြစ်ပြီး၊ အရောင်းအဝယ်ပုံမှန်ရှိကြောင်းသိရှိရပါသည်။ ဂျုံမှုန့်(ပီနန်)အိတ် ပေါ်တွင် ရေးသားရိုက်နှိပ်ထားသော ကုန်အမှတ်တံဆိပ်တွင် ထုတ်လုပ်သည့်နေရာ၊ ထုတ်လုပ်သည့် ရက်စွဲ၊ သက်တမ်းကုန်ဆုံးသည့်ရက်စွဲနှင့် ထားသိုသိမ်းဆည်းရန်အညွှန်းတို့ကို ဖော်ပြပေးရန် လိုအပ်ကြောင်း အသိပညာပေးပြီး၊ ကုန်အမှတ် တံဆိပ်မူပိုင်ခွင့် လျှောက်ထားရန် အကြံပြုဆွေးနွေးခဲ့ကြောင်း သတင်းရရှိပါသည်။

စစ်ကိုင်းတိုင်းဒေသကြီး

စားသုံးသူရေးရာဦးစီးဌာန

    ၂၀၂၀-ပြည့်နှစ်၊ ဇွန်လမှ ဒီဇင်ဘာလအထိ ကသာခရိုင်အတွင်း စားသုံးသူရေးရာဦးစီးဌာနနှင့် အစားအသောက်နှင့် ဆေးဝါးကွပ်ကဲရေးဦးစီးဌာနများမှ ဦးဆောင်၍ မိတ်ဖက်ဌာနများနှင့်အတူ ပူးပေါင်းစစ်ဆေးခဲ့ရာတွင် ဈေးကွက်အတွင်းမှ သက်တမ်းလွန် အစားအသောက်များ၊ ဆေးဝါးများနှင့် အလှကုန်များ စုစုပေါင်းခန့်မှန်းတန်ဖိုး ငွေကျပ် ၆,၂၇၃,၂၂၇/- ကျပ် အား သိမ်းဆည်းရရှိခဲ့ပြီး သိမ်းဆည်းရရှိခဲ့သော ကုန်စည်များအား ၂၀၂၀ ပြည့်နှစ် ဒီဇင်ဘာလ(၁၆)ရက်နေ့တွင် မိတ်ဖက်ဌာနများဖြစ်သည့် ခရိုင်နှင့်မြို့နယ်အဆင့်ဌာနဆိုင်ရာများနှင့်အတူ ကသာမြို့နယ်၊ စည်ပင်သာယာရေး အမှိုက်စွန့်ပစ်ကွင်း၌ စနစ်တကျမီးရှို့ဖျက်ဆီးခဲ့ကြောင်း သတင်းရရှိပါသည်။

စစ်ကိုင်းတိုင်းဒေသကြီး

စားသုံးသူရေးရာဦးစီးဌာန

      ၁၄.၁၂.၂၀၂၀ရက်နေ့တွင် ဗန်းမော်ခရိုင်စားသုံးသူရေးရာဦးစီးဌာနမှ ခရိုင်ဦးစီးမှူး ဦးဆောင်၍ မိခင်နှင့်ကလေးစောင့်ရှောက်ရေးအဖွဲ့ရုံးခန်းမ၌ ဆေးနှင့်ဆေးပစ္စည်းရောင်းချသည့် စီးပွားရေးလုပ်ငန်းရှင်(၂၂)ဦးအား စားသုံးသူကာကွယ်ရေးဉပဒေ(၂၀၁၉)၊ အခန်း(၁၈)ပါ ကုန်အညွှန်းအမှတ်အသား ဖော်ပြချက်နှင့်စပ်လျဉ်း၍ရှင်းလင်းခြင်း၊ လက်ကမ်းစာစောင်များဖြန့်ဝေခြင်း၊ Covid-19 ဆိုင်ရာ ကျန်းမာရေးသုံး ကုန်ပစ္စည်းများအား စျေးနှုန်းမြှင့်တင်ရောင်းချခြင်း၊ ဖြန့်ဖြူးခြင်း (သို့မဟုတ်) စျေးကစားရန်ရည်ရွယ်၍ သိုလှောင်ခြင်းတို့ပြုလုပ်ပါက အရေးကြီးကုန်စည်ပုဒ်မ(၅)အရ အရေးယူမည် ဖြစ်ကြောင်းတို့ကို  ကျန်းမာရေးနှင့်အားကစားဝန်ကြီးဌာနမှ ထုတ်ပြန်ထားသော စည်းကမ်းချက်များနှင့်အညီ ဆောင်ရွက်ခဲ့ပါသည်။

     ထို့နောက် ၁၅.၁၂.၂၀၂၀ ရက်နေ့တွင် မြစ်ကြီးနားခရိုင်စားသုံးသူရေးရာဦးစီးဌာန၊ ခရိုင်ဦးစီးမှူး ဦးဆောင် သောအဖွဲ့သည် မြစ်ကြီးနားမြို့၊ ရမ်ပူရပ်ကွက် Very Good ကိတ်နှင့် မုန့်မျိူးစုံစက်ရုံရှိ  လုပ်ငန်းရှင်နှင့်လုပ်သားများအား စားသုံးသူကာကွယ်ရေးအသိပညာပေးဟောပြောရာတွင်  ခရိုင်ဦးစီးမှူး ဦးကျော်မြင့်က စားသုံးသူကာကွယ်ရေးဖြစ်ပေါ်လာပုံ၊ စားသုံးသူရေးရာဦးစီးဌာနသမိုင်း၊ ၂၀၁၉ စားသုံးသူကာကွယ်ရေးဥပဒေအဓိပ္ပါယ်ဖွင့်ဆိုချက်များ၊ အရေးကြီးကုန်စည်နှင့်ဝန်ဆောင်မှု ဥပဒေ အကြောင်းနှင့် Online Shopping ဆိုင်ရာ သိကောင်းစရာများကိုဆွေးနွေးခြင်း၊ ဦးကိုကိုစိုး (ဦးစီးမှူး)က စားသုံးသူအခွင့်အရေးနှင့်တာဝန်များ၊ စားသုံးသူနှစ်နာဆုံးရှုံးမှုနှင့်စပ်လျဉ်းသည့် တိုင်ကြားမှုပြုလုပ်ရာတွင် ပါဝင်ဖော်ပြရမည့်အချက်များ၊ တိုင်ကြားနိုင်သည့်နည်းလမ်းများ၊ တိုင်ကြား နိုင်သည့်နေရာ၊ ဖုန်းနံပါတ်၊ စားသုံးသူရေးရာဦးစီးဌာန၏ Website နှင့် ပြစ်မှုပြစ်ဒဏ်များကို ရှင်းလင်းဆွေးနွေးခဲ့ပြီး တက်ရောက်လာသူများမှ မေးမြန်းခြင်းများကို ပြန်လည်ရှင်းလင်းပြီး လုပ်ငန်းရှင်နှင့်လုပ်သား (၁၅)ဦး တက်ရောက်ခဲ့ကြောင်း သတင်းရရှိပါသည်။

        အလားတူ ၁၅.၁၂.၂၀၂၀ရက်နေ့တွင် ဗန်းမော်ခရိုင် စားသုံးသူရေးရာဦးစီးဌာနမှ ဒေါ်နှောင်းနှောင်းဝင်း (ဒု-ဦးစီးမှူး) ဦးဆောင်သောအဖွဲ့သည် ဗန်းမော်မြို့ဒေသထုတ်ကုန်များဖြစ်သည့် အောင်ဗိုလ်မုန့်လုပ်ငန်းနှင့် ရှမ်းမလေး ချဉ်စော်ခါးသီးယိုလုပ်ငန်းရှင်များအား စားသုံးသူကာကွယ်ရေးဉပဒေ(၂၀၁၉)၊ အခန်း(၁၈)ပါကုန်အညွှန်း အမှတ်အသားဖော်ပြချက်နှင့်စပ်လျဉ်း၍ ထည့်သွင်းဖော်ပြရမည့်အချက်များအား သွားရောက်တွေ့ဆုံ ရှင်းလင်းခြင်းများဆောင်ရွက်ခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန

ကချင်ပြည်နယ်     

         ၂၀၂၀ ပြည့်နှစ်၊ ဒီဇင်ဘာလ  ၁၀ ရက်နေ့တွင် မြိတ်ခရိုင်စားသုံးသူရေးရာဦးစီးဌာနမှ ဝန်ထမ်းများသည် ခရိုင်အစားအသောက်နှင့် ဆေးဝါးကွပ်ကဲရေးဦးစီးဌာန၊ ခရိုင်ပြည်သူ့ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့၊ ခရိုင်ရဲတပ်ဖွဲ့နှင့် သက်ဆိုင်ရာဌာနတို့ပူးပေါင်း၍ မြိတ်မြို့၊ ပါရမီရပ်၊ ပါရမီစျေးကြီး၌ ရောင်းချနေသော အစားသောက်များ၊ အလှကုန်များအား စျေးကွက်စောင့်ကြည့်စစ်ဆေးခဲ့ပါသည်။

      ထိုသို့ကွင်းဆင်းစစ်ဆေးရာတွင် ပါရမီစျေးကြီးအတွင်းရောင်းချနေသောဆိုင်များ၌ စားသုံးသူပြည်သူများ၀ယ်ယူစားသုံးရာတွင် ဘေးဥပဒ်အန္တရာယ်ကင်းရှင်းမှုရှိစေရန်နှင့် ရောင်းချသော အစားအသောက်/အလှကုန်များတွင် ကုန်အညွှန်းအမှတ်အသားဖော်ပြရာ၌ မြန်မာဘာသာဖြင့် ပြည့်စုံမှန်ကန်စွာဖော်ပြခြင်းရှိ/မရှိနှင့် သက်ဆိုင်ရာဌာနများမှတားမြစ်ထားသောကုန်ပစ္စည်းများ ရောင်းချနေခြင်းရှိ/မရှိ စျေးကွက်စောင်ကြည့်စစ်ဆေးခဲ့ကြောင်း သတင်းရရှိပါသည်။

      အလားတူ၂၀၂၀ ပြည့်နှစ်၊ ဒီဇင်ဘာလ ၁၁ ရက်နေ့တွင် တနင်္သာရီတိုင်းဒေသကြီး၊ မြိတ်ခရိုင် စားသုံးသူ ရေးရာဦးစီးဌာနနှင့် အစားအသောက်နှင့်ဆေးဝါးကွပ်ကဲရေးဦးစီးဌာန တို့ပူးပေါင်း၍ မြိတ်မြို့ပေါ်ရှိ ကုန်တိုက်နှင့် စတိုးဆိုင်များ၌ရောင်းချလျှက်ရှိသည့် ကလေးနို့မုန့်များအား စားသုံးသူကာကွယ်ရေးဥပဒေပါ အခန်း(၁၈)၊ ပုဒ်မ(၄၁)အရ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ သတ်မှတ်ချက်နှင့် အညီဆောင်ရွက်ထားခြင်းရှိ/မရှိနှင့် အစားအသောက်နှင့်ဆေးဝါးကွပ်ကဲရေးဦးစီးဌာန၏ နို့စို့ကလေး နှင့်ကလေးငယ်အတွက် ဖော်စပ်ထုတ်လုပ်ထားသော အစားသောက်များစျေးကွက်တင်ခြင်းဆိုင်ရာ အမိန့်ပါပြဌာန်းချက်နှင့် ကိုက်ညီမှု ရှိ/မရှိ စျေးကွက်စောင့်ကြည့်စစ်ဆေးခဲ့ကြောင်း သတင်း ရရှိပါသည်။

       အလားတူ ၂၀၂၀ ပြည့်နှစ်၊ ဒီဇင်ဘာ ၁၆ ရက်နေ့တွင် တနင်္သာရီတိုင်းဒေသကြီး စားသုံးသူရေးရာဦးစီးဌာနမှဝန်ထမ်းများသည် တိုင်းဒေသကြီးအစားအသောက်နှင့် ဆေးဝါးကွပ်ကဲရေးဦးစီးဌာနနှင့်ပူးပေါင်း၍ ထားဝယ်မြို့ပေါ်ရှိ ကုန်တိုက်များနှင့် စတိုးဆိုင်များတွင်  စားသောက်ကုန်များတွင် စားသုံးသူကာကွယ်ရေးဥပဒေပါ အခန်း(၁၈)အညီ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ သတ်မှတ်ချက်နှင့်အညီ ဆောင်ရွက်ထားခြင်းရှိ/မရှိနှင့် အစားအသောက်နှင့်ဆေးဝါးကွပ်ကဲရေးဦးစီးဌာန၏ နို့စို့ကလေးနှင့် ကလေးငယ်အတွက် ဖော်စပ်ထုတ်လုပ်ထားသော အစားအသောက်များ စျေးကွက်တင်ခြင်းဆိုင်ရာအမိန့်ပြဌာန်းချက်နှင့် ကိုက်ညီမှု ရှိ/မရှိစျေးကွက်စောင့်ကြည့်စစ်ဆေး ခဲ့ကြောင်းသတင်းရရှိပါသည်။။

တနင်္သာရီတိုင်းဒေသကြီး

စားသုံးသူရေးရာဦးစီးဌာန