သတင်းနှင့် လှုပ်ရှားမှုများ

  စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူးရုံး မှ တာဝန်ရှိသူများသည် ၁၈.၂.၂ဝ၂ဝ ရက်နေ့တွင် လွိုင်လင်ခရိုင်၊ မိုင်းကိုင်မြို့၊ ဓမ္မာရုံ၌လည်းကောင်း၊  ၁၉.၂.၂ဝ၂ဝ ရက်နေ့၌ အ.ထ.က(ကျေးသီး)ကျောင်း၌လည်းကောင်း စားသုံးသူကာကွယ်ရေးဆိုင်ရာအသိပညာပေးဆွေးနွေးဟောပြောပွဲများ ပြုလုပ်ခဲ့ကြောင်း သိရပါသည်။

     အဆိုပါဆွေးနွေးပွဲများတွင် စားသုံးသူရေးရာဦးစီးဌာနမှ တာဝန်ရှိသူ တစ်ဦးက စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ဆောင်ရွက်လျက်ရှိသော လုပ်ငန်းစဉ်များအကြောင်း၊ စားသုံးသူရေးရာဦးစီးဌာနပေါ်ပေါက်လာခဲ့သည့်သမိုင်းကြောင်းနှင့် ဌာနမှလုပ်ဆောင်နေသည့် လုပ်ငန်းများအကြောင်း၊ ကုန်စည်/ဝန်ဆောင်မှုများကြောင့်စားသုံးသူများအနေဖြင့် နစ်နာမှုများနှင့် နစ်နာမှုဆိုင်ရာကိစ္စရပ်များ ရှိလာပါက စားသုံးသူသတင်းပြန်ကြားရေးနှင့် တိုင်ကြားမှုစင်တာ(CICC)များသို့ တိုင်ကြားနိုင်ပါကြောင်း၊ တိုင်ကြားမှုများနှင့်ပတ်သက်၍လည်း ဖြေရှင်းဆောင်ရွက်ပေးခဲ့သည့် အကြောင်းအရာများကိုရှင်းလင်းဆွေးနွေးခဲ့ပါသည်။ ဆက်လက်၍ ၂ဝ၁၉ ခုနှစ်၊ စားသုံးသူကာကွယ်ရေး ပြဌာန်းချက်တွင်ပါဝင်သော စားသုံးသူများ၏ အခွင့်အရေးနှင့်တာဝန်များအကြောင်း၊ စီးပွားရေးလုပ်ငန်းရှင်များ၏ တာဝန်နှင့်တားမြစ်ချက်များအကြောင်း၊ ကုန်အညွှန်းအမှတ်အသားဆိုင်ရာ အချက်အလက်များအကြောင်းနှင့်ပြစ်မှုပြစ်ဒဏ်များအကြောင်းကို အသေးစိတ်ရှင်းလင်းဆွေးနွေးခဲ့ပြီး တက်ရောက်လာသူများ၏ မေးမြန်းဆွေးနွေးမှုများကို ပြန်လည်ရှင်းလင်း ဆွေးနွေးခြင်းများ ပြုလုပ်ခဲ့ပါသည်။   ဆွေးနွေးပွဲများသို့   ဆရာ/ဆရာမများနှင့် ကျောင်းသား/သူများ၊ ဌာနဆိုင်ရာများ၊ ရပ်ကွက်နေ ပြည်သူ/သားများ၊ လက်လီ/လက်က္ကား ရောင်းချသူများ စုစုပေါင်း မိုင်းကိုင်မြို့တွင် (၁၂၅)ဦးနှင့် ကျေးသီးမြို့တွင်(၁၇၂)ဦး အသီးသီးတက်ရောက်ခဲ့ကြောင်း သတင်းရရှိပါသည်။

တောင်ကြီးခရိုင်

စားသုံးသူရေးရာဦးစီးဌာန

     (၁၈.၂.၂၀၂၀) ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာနမှ တာဝန်ရှိသူများသည် စားသုံးသူကာကွယ်ရေးဥပဒေ (၂၀၁၉)နှင့် မြန်မာနိုင်ငံ စားသုံးသူကာကွယ်ရေးကော်မရှင်၏(၂/၂၀၁၉) ညွှန်ကြားချက်တို့နှင့်အညီ ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ဖော်ပြရာ၌ စီးပွားရေးလုပ်ငန်းရှင်များ လိုက်နာ ဆောင်ရွက်နိုင်ရန်  ရည်ရွယ်၍ မြို့နယ်အစားအသောက်နှင့် ဆေးဝါးကြီးကြပ်မှုကော်မတီဝင်များ၊ မြို့နယ်ကျန်းမာရေးဦးစီးဌာန၊ မြိို့နယ်တိုင်းရေးဆေးဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ရဲတပ်ဖွဲ့ဝင်များပါဝင်သော ပူးပေါင်းအဖွဲ့သည် မုဒုံမြို့နယ်၊ မြို့မစျေး၊ ရွှေဟင်္ဿာစျေးနှင့် မြို့ပေါ်ရပ်ကွက်ရှိ လမ်းဘေးဝဲ/ယာ စျေးဆိုင်၊ ဆေးဆိုင်၊ စတိုးဆိုင် စုစုပေါင်း ဆိုင်ခန်း(၇၅) တို့အား ကွင်းဆင်းစစ်ဆေးပြီး အသိပညာပေးလုပ်ငန်းများ ဆောင်ရွက်ခဲ့ပါသည်။

မွန်ပြည်နယ်

စားသုံးသူရေးရာဦးစီးဌာန

    ၂၀၂၀ ပြည့်နှစ် ဖေဖော်ဝါရီ ၁၈ ရက်နေ့တွင် တနင်္သာရီတိုင်းဒေသကြီး၊ စားသုံးသူရေးရာဦးစီးဌာန၊ မြိတ်ခရိုင်ဦးစီးမှူးရုံးမှ ဝန်ထမ်းများသည် ခရိုင်အစားအသောက်နှင့် ဆေးဝါးကွပ်ကဲရေးဦးစီးဌာန၊ ပြည်သူ့ ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့နယ်ရဲတပ်ဖွဲ့တို့နှင့်ပူးပေါင်း၍ မြိတ်မြို့ ပေါ်ရှိ ကုန်စုံဆိုင်များတွင် အများပြည်သူစားသုံး/သုံးစွဲရန်မသင့်ကြေငြာထားသော အစားအသောက်များ ရောင်းချမှုရှိ/မရှိ ရှောင်တခင်ကွင်းဆင်းစစ်ဆေးခဲ့ပါသည်။

         ကွင်းဆင်းစစ်ဆေးရာတွင် စားသောက်ကုန်ပစ္စည်းများရောင်းချနေသော လုပ်ငန်းရှင်များအနေဖြင့် စားသုံးသူများ ဘေးအန္တရာယ်ဖြစ်စေနိုင်သော စားသောက်ကုန်များအား ရောင်းချခြင်း မပြုရန်နှင့် ၎င်းတို့ ထုတ်လုပ်တင်သွင်းဖြန့်ဖြူးရောင်းချသော ကုန်စည်များတွင် ကုန်အညွှန်အမှတ်အသားဖော်ပြခြင်းနှင့်စပ်လျဉ်း၍ မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ဖော်ပြပေးရမည့်အချက်များအား ရှင်းလင်းပြောကြားပြီး အသိပညာပေးလက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။

တနင်္သာရီတိုင်းဒေသကြီး
စားသုံးသူရေးရာဦးစီးဌာန

           ၂၀၂၀ ပြည့်နှစ် ဖေဖော်ဝါရီလ ၁၄ ရက်နေ့တွင် ထားဝယ်မြို့၊ တဂူသိမ်စျေး၌ တနင်္သာရီတိုင်းဒေသကြီး စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးမှဝန်ထမ်းများနှင့် တိုင်းဒေသကြီးအစားအသောက်နှင့် ဆေးဝါးကွပ်ကဲရေးဦးစီးဌာနတို့သည် မိတ်ဖက်ဌာနများဖြစ်သည့် မြို့နယ်စည်ပင်သာယာရေးအဖွဲ့တို့ပူးပေါင်း၍ တဂူသိမ်စျေးအတွင်း အများပြည်သူ စားသုံး/သုံးစွဲရန်မသင့်သော အစားအသောက် များရောင်းချနေမှု ရှိ/မရှိ ကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။

          ကွင်းဆင်းစစ်ဆေးရာတွင် တဂူသိမ်စျေးအတွင်းရောင်းချနေသည့် စျေးဆိုင်များမှ အများပြည်သူများ သုံးစွဲရန်မသင့်သော လူသုံးကုန်/အလှကုန်ပစ္စည်းများရောင်းချမှုရှိ/မရှိ စစ်ဆေးခဲ့ပြီး ကုန်စုံဆိုင်ရှင်များအား ၎င်းတို့ထုတ်လုပ်၊ တင်သွင်း၊ ဖြန့်ဖြူးသည့်ကုန်စည်များတွင် စားသုံးသူ ဥပဒေပါသတ်မှတ်ချက်များနှင့်အညီ ကုန်ညွှန်းအမှတ်အသားများအား မြန်မာဘာသာဖြင့် ဖော်ပြရန် တို့ကိုအသိပညာပေးခဲ့ပါသည်။ ထိုနောက် စျေးအတွင်းသံသယရှိအစားအသောက်နမူနာပစ္စည်းများ အားဝယ်ယူ၍ရွေ့လျား မော်တော်ယာဉ်တွင်ပါရှိသော Rapid Test Kit များဖြင့် ဓါတ်ခွဲစစ်ဆေး ဆောင်ရွက်ခဲ့ကြောင်းသတင်းရရှိပါသည်။

တနင်္သာရီတိုင်းဒေသကြီး
စားသုံးသူရေးရာဦးစီးဌာန

     (၁၅.၂.၂၀၂၀) နှင့် (၁၇.၂.၂၀၂၀) ရက်နေ့တို့တွင် မကွေးတိုင်းဒေသကြီး၊ စားသုံးသူရေးရာဦးစီးဌာနမှ ဒုတိယတိုင်းဒေကြီးဦးစီးမှူးဦးဆောင်သောအဖွဲ့သည် ထုတ်လုပ်သောလုပ်ငန်းများ၊ လက်လီလက္ကားရောင်းချဖြန့်ဖြူးသော လုပ်ငန်းရှင်များ၊ Magway Shopping Mall ၊ ကောင်းမွန်စင်တာ၊ သာလှစတိုး ဆိုင်ကြီးများနှင့် မကွေးမြို့ မြို့မဈေးတွင် ရောင်းချလျက်ရှိသော ကုန်စုံဆိုင်များအား မိမိတို့ တင်သွင်းဖြန့်ဖြူး ရောင်းချသည့် ကုန်စည်များတွင် စားသုံးသူကာကွယ်ရေးဥပဒေ (၂၀၁၉) အခန်း (၁၈) တွင် ဖော်ပြပါရှိသည့် ကုန်အညွှန်းအမှတ်အသားများအား မြန်မာဘာသာဖြင့်ဖြစ်စေ၊ အခြားဘာသာနှင့် မြန်မာဘာသာ တွဲလျက် ဖြစ်စေထည့်သွင်းဖော်ပြလာရေး လုပ်ငန်းရှင်များ ကြိုတင်ပြင်ဆင်နိုင်ရေး စားသုံးသူကာကွယ်ရေးဥပဒေ (၂၀၁၉) ကို ၂၀၁၉ ခုနှစ် မတ်လ (၁၅) ရက်နေ့တွင် ပြဌာန်းခဲ့ပြီးနောက် (၁) နှစ်ဆိုင်းငံ့ထားခဲ့ရာ (၁၆.၃.၂၀၂၀) ရက်နေ့မှစ၍ စားသုံးသူကာကွယ်ရေးဥပဒေအရ အရေးယူဆောင်ရွက်သွားရမည်ဖြစ်သောကြောင့် ထုတ်လုပ်ဖြန့်ဖြူးရောင်းချသော လုပ်ငန်းရှင်များအနေဖြင့် ထုတ်ကုန်များ၏ ထုပ်ပိုးမှုတွင် ဖော်ပြပါရှိရမည့် ကုန်အညွှန်းအမှတ်အသား ပြည့်စုံစွာဖော်ပြပါရှိရေးနှင့် ပြည်ပမှတင်သွင်းလာသော ကုန်စည်များအားလည်း မြန်မာဘာသာပူးတွဲလျက် မဖြစ်မနေဖော်ပြရမည့် ကုန်အညွှန်းအမှတ်အသားများကိုလည်း တင်သွင်းသည့် လုပ်ငန်းရှင်မှ ထည့်သွင်းထုတ်လုပ်ဖော်ပြရမည်ဖြစ်ကြောင်း၊ လက်လီလက္ကား ရောင်းချ ဖြန့်ဖြူးသူ လုပ်ငန်းရှင်များ အနေဖြင့်လည်း ကုန်အညွှန်းအမှတ်အသားများ ပြည့်စုံစွာဖော်ပြပါရှိသည့် ကုန်စည်များကိုသာ ရွေးချယ်၍ မှာယူရောင်းချကြရန် တိုက်တွန်းဆွေးနွေးခဲ့ပြီး (၁၆.၃.၂၀၂၀) နောက်ပိုင်း တွင်ကုန်အညွှန်းအမှတ်အသား ပြည့်စုံစွာမပါရှိသည့် ကုန်စည်များအား ဈေးကွက်အတွင်း စစ်ဆေးတွေ့ရှိရပါက စားသုံးသူကာကွယ်ရေးဥပဒေ အရ အရေးယူဆောင်ရွက်သွားမည်ဖြစ်ကြောင်းကို အသိပေး ဆွေးနွေးခဲ့ရာ တက်ရောက်လာသော လုပ်ငန်းရှင်များမှ သိလိုသည်များ မေးမြန်းခဲ့မှုအပေါ် ပြန်လည်ရှင်းလင်းဆွေးနွေးခဲ့ကြောင်း သိရှိရပါသည်။

          အလားတူ တိုင်းဒေသကြီးအတွင်းရှိ မကွေး၊ မင်းဘူး၊ သရက်၊ ပခုက္ကူခရိုင်ဦးစီးမှူးများမှလည်း မိမိတို့ ခရိုင်အတွင်း ထုတ်လုပ်သည့်လုပ်ငန်းရှင်များသို့ ကုန်အညွှန်းအမှတ်အသားများ ပြည့်စုံစွာ ဖော်ပြလာရေး လုပ်ငန်းရှင်များနှင့်တွေ့ဆုံ၍ အသိပေးဆွေးနွေးမှုများ ဆောင်ရွက်လျက်ရှိကြောင်း သတင်းရရှိပါသည်။

မကွေးတိုင်းဒေသကြီး

စားသုံးသူရေးရာဦးစီးဌာန