သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်ဦးဆောင်၍ ခရိုင်ဦးစီးမှူးရုံးမှ စစ်ဆေးရေးအရာရှိများပါဝင်သောအဖွဲ့သည် စိုက်ပျိုးရေးဦးစီးဌာန၊ အုတ်တွင်းမြို့နယ်ဦးစီးမှူး ဦးအောင်ဆန်းဦး ဦးဆောင်သော စိုက်ပျိုးရေးဦးစီးဌာနမှ ပူးပေါင်းအဖွဲ့နှင့်အတူ (၆-၆-၂၀၂၃) ရက်နေ့၊ နေ့လယ်ပိုင်းတွင် အုတ်တွင်းမြို့နယ်၊ ကျောင်းရှစ်ဆယ်ကျေးရွာအုပ်စု၊ တောင်ငူ-ထန်းတပင်လမ်းမပေါ်ရှိ ဓာတ်မြေဩဇာအရောင်းဆိုင်များသို့သွားရောက်၍ တရားမဝင်ဓာတ်မြေဩဇာများရောင်းချခြင်းရှိ/မရှိကို ဈေးကွက်စောင့်ကြည့်စစ်ဆေးခဲ့ပါသည်။

     စားသုံးသူရေးရာဦးစီးဌာန၊ ခရိုင်ဦးစီးမှူးဦးဆောင်သောပူးပေါင်းအဖွဲ့သည် ကျောင်းရှစ်ဆယ်ကျေးရွာရှိ ပတ္တမြားဓာတ်မြေဩဇာနှင့် စိုက်ပျိုးရေးဆေးအရောင်းဆိုင်၊ ထန်းကုန်းကျေးရွာရှိ လင်းဓာတ်မြေဩဇာနှင့် စိုက်ပျိုးရေးဆေးအရောင်းဆိုင်များသို့ရောက်ရှိပြီး ဓာတ်မြေဩဇာနှင့်စိုက်ပျိုးရေးဆေးများ၌ စားသုံးသူကာကွယ်ရေးဥပဒေနှင့်အညီ မြန်မာဘာသာဖြင့် ကုန်အညွှန်းအမှတ်အသားများဖော်ပြထားခြင်းရှိ/မရှိကိုစစ်ဆေးကြည့်ရှုပြီး ဆိုင်ပိုင်ရှင်များအား တရားမဝင်ကုန်စည်များနှင့် မြန်မာဘာသာဖြင့် ကုန်အညွှန်းအမှတ်အသားများဖော်ပြခြင်းမရှိသောကုန်စည်များကို ရောင်းချခြင်းမပြုရန် အသိပညာပေးခဲ့ပါသည်။

     စားသုံးသူရေးရာဦးစီးဌာန၊ ခရိုင်ဦးစီးမှူး ဦးမျိုးအောင်သည် ညနေပိုင်းတွင် ခရိုင်ဦးစီးမှူးရုံးမှ ဌာနခွဲတာဝန်ခံများ၊ တောင်ငူမြို့နယ်တာဝန်ခံတို့နှင့်အတူ တောင်ငူမြို့နယ်၊ ကေတုမတီမြို့ရှိ အညာသားလေးမုန့်ဖတ်ခြောက်လုပ်ငန်း၊ မိုးမြင့်ကမ္ဘာဝါးတူစက်ရုံနှင့် အင်ဒိုင်းကျေးရွာရှိ “နေလဝန်းကြီး” မုန့်ဟင်းခါးခြောက်လုပ်ငန်းများသို့သွားရောက်ပြီး လုပ်ငန်းရှင်များနှင့်တွေ့ဆုံ၍ ပဲခူးမြို့တွင် ဖွင့်လှစ်ရောင်းချမည့် ဒေသထွက်ကုန်ဆိုင်ခန်းများ၌ မိမိတို့၏ထုတ်ကုန်ပစ္စည်းများရောင်းချနိုင်ရေး၊ လုပ်ငန်းများဆောင်ရွက်ရာတွင် စားသုံးသူကာကွယ်ရေးဥပဒေ ၂၀၁၉ပါ စီးပွားရေးလုပ်ငန်းရှင်များနှင့်သက်ဆိုင်သည့် ပြဋ္ဌာန်းချက်များကို လိုက်နာဆောင်ရွက်ရေးတို့အတွက် ဆွေးနွေးခဲ့ကြောင်း သိရပါသည်။

DOCA(ပဲခူး)

   ၉.၆.၂၀၂၃ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် မော်လမြိုင်မြို့၊ မဟာမြိုင်ရပ်ကွက်ရှိ အကောက်ခွန်ဝန်ထမ်းအိမ်ရာဝင်းအတွင်း၌ ပြုလုပ်သည့် သက်ဆိုင်ရာထောက်ခံချက်များမပါရှိသော စားသုံးရန်မသင့်သည့် စားသောက်ကုန်များအား မီးရှို့ဖျက်ဆီးခြင်း အခမ်းအနားသို့ တက်ရောက်ခဲ့သည်။

   အဆိုပါ မီးရှို့ဖျက်ဆီးခြင်းအခမ်းအနားသို့ မိတ်ဖက်ဌာနများဖြစ်သော အကောက်ခွန်ဦးစီးဌာန၊ အထွေထွေအုပ်ချုပ်ရေးဦးစီးဌာန၊ စားသုံးသူရေးရာဦးစီးဌာန၊ ပြည်တွင်းအခွန်များဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာနတို့ တက်ရောက်ခဲ့ပြီး တန်ဖိုး (၃၉၂၀၀၀) ကျပ် တန်ဖိုးရှိ စားသုံးရန်မသင့်သော၊ သက်ဆိုင်ရာ ထောက်ခံချက်များမပါရှိသော၊ မြန်မာဘာသာဖြင့် ကုန်အညွှန်းအမှတ်အသား ဖော်ပြခြင်းမရှိသော စားသောက်ကုန်များအား မီးရှို့ဖျက်ဆီးခဲ့ကြောင်း သိရှိရပါသည်။

DOCA(မွန်)

     မြန်မာနိုင်ငံကော်ဖီအသင်း (ပြင်ဦးလွင်၊ နောင်ချိုအစုအဖွဲ့)နှင့် မြန်မာနိုင်ငံ ထောပတ်သီး စိုက်ပျိုးထုတ်လုပ် တင်ပို့ရောင်းချသူများအသင်း (ပြင်ဦးလွင်)နှင့် ပြည်တွင်းကုန်သွယ်မှုမြှင့်တင်ရေး၊ ပြည်ပသို့တိုးမြှင့်တင်ပို့ရောင်းချနိုင်ရေးနှင့် ကုန်အမှတ်တံဆိပ်ဆိုင်ရာကိစ္စရပ်များ ညှိနှိုင်းဆွေးနွေးပွဲ အား (၁၃.၆.၂၀၂၃)ရက်နေ့၊နံနက်(၁၀:၀၀)နာရီအချိန်တွင် ပြင်ဦးလွင်မြို့ရှိ ကော်ဖီဥယျာဉ်အတွင်း Information  Centre ခန်းမ၌ ကျင်းပခဲ့ပါသည်။

   ဆွေးနွေးပွဲအခမ်းအနားတွင် စားသုံးသူရေးရာဦးစီးဌာန၊ ညွှန်ကြားရေးမှူးချုပ် ဦးမြင့်ချိုက အဖွင့်အမှာစကားပြောကြားရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအနေဖြင့် ကုန်သွယ်မှုဖွံ့ဖြိုးတိုးတက်ရေးနှင့် အမျိုးသားအကျိုးစီးပွားပံ့ပိုးနိုင်ရေးအတွက် အဓိကရည်ရွယ် ဆောင်ရွက်လျက်ရှိပါကြောင်း၊ ဝန်ကြီးဌာနအနေဖြင့် လုပ်ငန်းတာဝန်(၈)ရပ်အပေါ် အဓိကထား​ ဆောင်ရွက်လျက်ရှိမှုအခြေအနေများအား အသေးစိတ်ပြောကြားခဲ့ပြီး တက်ရောက်လာသည့် စီးပွားရေးလုပ်ငန်းရှင်များမှလည်း ကုန်သွယ်မှုနှင့် ပတ်သက်သည့် အခြေအနေများအား တင်ပြပေးစေ လိုကြောင်း၊ အဖွင့်အမှာစကား ပြောကြားခဲ့ပါ သည်။

     မူပိုင်ခွင့်ဦးစီးဌာန၊ညွှန်ကြားရေးမှူးချုပ် ဒေါက်တာမိုးမိုးသွယ်က စီးပွားရေးနှင့်ကူးသန်းရောင်းဝယ်ရေးဝန်ကြီးဌာန အောက်တွင် မူပိုင်ခွင့်ဦးစီးဌာနအား (၂၃.၁၂.၂၀၂၀)ရက်တွင် စတင်ဖွဲ့စည်း ခဲ့ကြောင်း၊ (၂၀၁၉)ခုနှစ်တွင် မူပိုင်ခွင့်ဥပဒေ(၄)ခုအား ပြဠာန်းခဲ့ပြီး အကောင်အထည် ဖော်ဆောင် ရွက်လျက်ရှိပါကြောင်း၊ တက်ရောက်လာသည့် လုပ်ငန်းရှင်များ အနေဖြင့်လည်း မိမိတို့၏ ကုန်အမှတ်တံဆိပ်များအား ပြန်လည်မှတ်ပုံတင်ရန်လိုအပ်ကြောင်း ရှင်းလင်းပြောကြား ခဲ့ပါသည်။   

     ထို့နောက် ပြင်ဦးလွင်၊ နောင်ချို ကော်ဖီအစုအဖွဲ့ ဥက္ကဌနှင့် ထောပတ်အစုအဖွဲ့ဥက္ကဌများမှ မိမိတို့အသင်း၏ ဆောင်ရွက်ချက်များအား ရှင်းလင်းတင်ပြကြပါသည်။

    အဆိုပါ တွေ့ဆုံပွဲအခမ်းအနားသို့ ကော်ဖီ၊ ထောပတ်လုပ်ငန်းရှင်(၅၀)ဦးခန့် တက်ရောက်ပြီး တက်ရောက်လာသည့်စီးပွားရေးလုပ်ငန်းများမှ သိရှိလိုသည်များကို မေးမြန်းခဲ့ရာ သက်ဆိုင်ရာ ညွှန်ကြားရေးမှူးချုပ်များက ပြန်လည်ရှင်းလင်းပေးခဲ့ပြီး ဆွေးနွေးပွဲအခမ်းအနားအား နေ့လယ် (၁၃:၃၀) နာရီတွင် ရုပ်သိမ်းခဲ့ကြောင်း သတင်းရရှိပါသည်။

DOCA(မန္တလေး)

    သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ ပဲခူးတိုင်းဒေသကြီး အသေးစားစက်မှုလက်မှုလုပ်ငန်းဦးစီးဌာန  လူသုံးကုန်ထုတ်လုပ်မှုနည်းပညာသင်တန်း ဖွင့်ပွဲအခမ်းအနားကို ၂၀၂၃ခုနှစ်၊ဇွန်လ (၆)ရက်နေ့ ၊ နံနက်(၉)နာရီအချိန်က ပဲခူးတိုင်းဒေသကြီး၊ ညောင်လေးပင်ခရိုင်၊ ဒိုက်ဦးမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန Community Centre ခန်းမ၌ ကျင်းပပြုလုပ်သည်။

    သင်တန်းဖွင့်ပွဲတွင် ပဲခူးတိုင်းဒေသကြီး အသေးစားစက်မှုလက်မှုလုပ်ငန်းဦးစီးဌာနမှ ဒုတိယ ညွှန်ကြားရေးမှူး ဒေါ်သက်နှင်းဖြိုးက သင်တန်းဖွင့်လှစ်ရခြင်း၏ ရည်ရွယ်ချက်နှင့် သင်တန်းစည်းကမ်းများပြောကြားခဲ့ပါသည်။    ထို့နောက် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးကျော်ဆန်းဦးက အမှာစကားပြောကြားခဲ့ပါသည်။

    ကျေးရွာနေပြည်သူများ အလုပ်အကိုင်အခွင့်အလမ်းရရှိစေရန်၊ သင်တန်းမှ သင်ကြားပေးသော အတတ်ပညာများဖြင့် မိသားစုတစ်ပိုင်တစ်နိုင်လုပ်ငန်းငယ်များမှ လုပ်ငန်းရှင်များဖြစ်လာသည်အထိ ပံ့ပိုးကူညီပေးသွားမည် ဖြစ်ကြောင်း၊  စက်မှုလက်မှုလုပ်ငန်းဦးစီးဌာနအနေဖြင့်လည်း လုပ်ငန်းလုပ်ကိုင်လိုသူများအား မှတ်ပုံတင်ပြုလုပ်ပေးသွားမည်ဖြစ်ကြောင်း အသေးစားစက်မှု လက်မှုလုပ်ငန်းဦးစီးဌာနမှ ဒုတိယညွှန်ကြားရေးမှူး ဒေါ်သက်နှင်းဖြိုးက ထပ်မံ ပြောကြားခဲ့ပြီး စားသုံးသူရေးရာဦးစီးဌာန မြို့နယ်တာဝန်ခံ ဦးမျိုးမြင့်မှလည်း စားသုံးသူကာကွယ်ရေးဆိုင်ရာ အကြောင်းအရာများအား အသိပညာပေးဟောပြောဆွေးနွေးခဲ့ပါသည်။

      သင်တန်းတွင်  အဝတ်လျှော်၊ ပန်ကန်ဆေး၊ လက်ဆေးဆပ်ပြာဆီများ၊ လျှော်မွေးနှင့် မျက်နှာသစ်ဆပ်ပြာ ပြုလုပ်နည်းကို စာတွေ့၊ လက်တွေ့ဖြင့် ငါးရက်ကြာ အခမဲ့သင်ကြားပေးသွားမည်ဖြစ်ရာ သင်တန်းသား ၂၀ ဦး တက်ရောက်လျက်ရှိကြောင်း သိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ တောင်ငူခရိုင်၊ ရေတာရှည်မြို့နယ်တာဝန်ခံ စစ်ဆေးရေးအရာရှိ ဦးဇော်‌ဇော်ထွေး (ဒုတိယဦးစီးမှူး)သည် ၂၀၂၃ခုနှစ်၊ ဇွန်လ ၇ ရက်နေ့ နံနက်ပိုင်းက ရေတာရှည်မြို့ရှိ ဓါတ်မြေဩဇာနှင့် စိုက်ပျိုးရေးဆေးဆိုင်များသို့ သွားရောက်၍ တရားမဝင်ဓါတ်မြေဩဇာများ ရောင်းချခြင်း ရှိ/မရှိကို စောင့်ကြည့်စစ်ဆေးခဲ့ပါသည်။

     ဓာတ်မြေဩဇာနှင့် စိုက်ပျိုးရေးဆေးဆိုင်များသို့ ဈေးကွက်စောင့်ကြည့်စစ်ဆေးစဉ် မြို့နယ်တာဝန်ခံသည် ဆိုင်ပိုင်ရှင်များနှင့် အရောင်းကိုယ်စားလှယ်များအား တရားမဝင် ဓာတ်မြေဩဇာများ ရောင်းချခြင်းသည် နိုင်ငံတော်က ရသင့်ရထိုက်သည့် အခွန်ငွေကို ဆုံးရှုံးစေသည့်အပြင် ဝယ်ယူ သုံးစွဲသူ တောင်သူလယ်သမားများအား ထိခိုက်နစ်နာစေနိုင်ပါသဖြင့် တရားမဝင် ဓာတ်မြေဩဇာများကို ရောင်းချခြင်းမပြုရန် အသိပညာပေးခဲ့ပါသည်။

   မြို့နယ်တာဝန်ခံ ဦးဇော်ဇော်ထွေးသည် ဇွန်လ ၈ ရက်နေ့တွင် ရေတာရှည်မြို့ရှိ ကုန်စုံဆိုင်များသို့ သွားရောက်၍ ဈေးကွက်အတွင်းရောင်းချနေသော ရေထွက်ကုန်ပစ္စည်းများတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ နှင့်အညီ မြန်မာ ဘာသာဖြင့်ဖော်ပြရမည့် ကုန်အညွှန်းအမှတ်အသားများ ပြည့်စုံစွာဖော်ပြထားခြင်း ရှိ/မရှိကို စောင့်ကြည့်စစ်ဆေးခဲ့ကြောင်း သိရပါသည်။

DOCA(ပဲခူး)