သတင်းနှင့် လှုပ်ရှားမှုများ

    စားသုံးသူရေးရာဦးစီးဌာန၊ မကွေးခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးမျိုးဝင်း (မကွေးမြို့နယ်တာဝန်ခံ)နှင့် ဝန်ထမ်း(၂)ဦးတို့သည် (၆.၄.၂၀၂၃)ရက်နေ့ နံနက်(၁၀:၀၀)နာရီတွင် မကွေးမြို့နယ်၊ မကျီးကန်ကျေးရွာရှိ ပြည်သူများအား စားသုံးသူကာကွယ်ရေး အသိပညာပေးဆွေးနွေးခဲ့ပါသည်။

       မကွေးခရိုင်၊ ဒု-ခရိုင်ဦးစီးမှူး ဦးမျိုးဝင်းမှ စားသုံးသူရေးရာဦးစီးဌာနသည် “ပြည်တွင်းကုန်သွယ်မှု ဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားရေး ဖွံ့ဖြိုးတိုးတက်စေရန် ” ဆောင်ပုဒ်နှင့်အညီ မျှော်မှန်းချက်ထားလုပ်ဆောင်လျက်ရှိပါကြောင်း၊ စားသုံးသူပြည်သူများအနေဖြင့် မိမိတို့ရရှိနိုင်မည့် အခွင့်အရေး (၈)ချက်၊ လိုက်နာရမည့် တာဝန်(၄)ချက်၊ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားများတွင် ပြည့်စုံစွာပါဝင်ရမည့်အချက်များ၊ စားသုံးသူများ နစ်နာဆုံးရှုံးမှုများအတွက် တိုင်ကြားနိုင်သူများ၊ တိုင်ကြားပုံနည်းလမ်းများနှင့် Internet, Mobile Applicationတွင် ဝင်ရောက်တိုင်ကြားပုံ Consumer Call No. 1535 အလွယ်တကူခေါ်ဆိုတိုင်ကြားနိုင်ပုံတို့အား အသေးစိတ်ရှင်းလင်းဆွေးနွေးခဲ့ပါသည်။

  အဆိုပါအသိပညာပေးဆွေးနွေးပွဲသို့ မကျီးကန်ကျေးရွာ အုပ်ချုပ်ရေးမှူး ဦးဇော်မိုးထွန်းနှင့် ရာအိမ်မှူး၊ ဆယ်အိမ်မှူးများ ပြည်သူ(၃၀)ဦး တက်ရောက်ခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသော ညွှန်ကြားချက်အမှတ် (၂/၂၀၁၉)ပါလက်ကမ်းစာစောင်များ ဖြန့်ဝေပေးခဲ့ပါသည်။

DOCA(မကွေး)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန မကွေးတိုင်းဒေသကြီး၊ မင်းဘူးမြို့နယ်တာဝန်ခံ ဦးမြင့်ကြည် (ဒု-ကြီးကြပ်ရေးမှူး)နှင့်အဖွဲ့သည် အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်ကျန်းမာရေးဦးစီးဌာန၊  မြို့နယ်စည်ပင်သာယာရေးအဖွဲ့၊ ဈေးကော်မတီတို့နှင့်ပူးပေါင်း၍ (၆.၄.၂၀၂၃)ရက်နေ့ နံနက်(၁၀:၃၀)အချိန်တွင် မင်းဘူးမြို့မဈေးအတွင်းရှိ ကုန်မျိုးစုံရောင်းချနေသောဆိုင်များသို့ သွားရောက်၍ စားသုံးရန်မသင့်ထုတ်ပြန်ထားသည့် စားသောက်ကုန်များ ရောင်းချမှု ရှိ/မရှိနှင့် ကုန်စည်များတွင် ကုန်အညွှန်းအမှတ်အသား ဖော်ပြချက်ပြည့်စုံမှုရှိ/ မရှိတို့အား ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

     ထိုသို့ဈေးကွက်စောင့်ကြည့်စစ်ဆေးရာတွင် ကုန်စုံဆိုင်ပိုင်ရှင်များအား ဒု-ကြီးကြပ်ရေးမှူး ဦးမြင့်ကြည်က စားသုံးရန်မသင့်ဟု ထုတ်ပြန်ထားသည့် စားသောက်ကုန်များအား ဈေးကွက်အတွင်း ရောင်းချမှုမရှိစေရေး၊ စားသုံးသူရေးရာကာကွယ်ရေးဥပဒေ အခန်း(၁၈)၊ ကုန်အညွှန်းအမှတ်အသားဖော်ပြခြင်းနှင့် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက် (၂/၂၀၁၉)အရ ကုန်စည်အုပ်စု (၈)အုပ်စုတွင် ပါဝင်သောအချက်များ ပြည့်စုံမှန်ကန်စွာပါရှိစေရေး၊ စီးပွားရေးလုပ်ငန်းရှင်များ၏တာဝန်များ၊ ကုန်စည်များနှင့် စပ်လျဉ်း၍  အာမခံချက်ပေးခြင်း၊ ကုန်အညွှန်းအမှတ်အသားဆိုင်ရာ ပြဌာန်းချက်ပါ ပုဒ်မ(၄၁)၊ ပုဒ်မခွဲ(ခ)နှင့် (ဆ)ပါအချက်များ၊ မြန်မာဘာသာ ဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ဖော်ပြထားသော ကုန်စည်ကိုသာ ရောင်းချဖြန့်ဖြူးရန်အသိပညာပေးဆွေးနွေးခဲ့ပြီး၊ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ညွှန်ကြားချက်အမှတ်(၂/၂၀၁၉) လက်ကမ်းစာစောင်များ ဖြန့်ဝေပေးခဲ့ပါသည်။

DOCA(မကွေး)

      စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ခရိုင်ဦးစီးမှူးတို့၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ စားသုံးသူကာကွယ်ရေးဥပဒေပါ စားသုံးသူအခွင့် အရေးများ ၊ စီးပွားရေးလုပ်ငန်းရှင်၏တာဝန်နှင့် တားမြစ်ချက်များ ၊ စီးပွားရေးကျင့်ဝတ်နှင့်အညီ လုပ်ကိုင်ဆောင်ရွက်ပြီး တာဝန်ယူမှု၊ တာဝန်ခံမှုရှိသော စီးပွားရေးလုပ်ငန်းရှင်များဖြစ်လာစေရန် ရည်ရွယ်၍ (၆.၄.၂၀၂၃)ရက်နေ့ နံနက်(၁၀:၃၀)အချိန်တွင်   ဦးစီးအရာရှိ ဒေါ်မွန်မွန်စိုး ဦးဆောင်သော ဝန်ထမ်းများအဖွဲ့သည် ဈေးကွက်စောင့်ကြည့်စစ်ဆေးစဉ်က တွေ့ရှိသည့် ကုန်အညွှန်းအမှတ်အသား ပြည့်စုံစွာမပါရှိသည့် စားသောက်ကုန်များအနေဖြင့် ကုန်အညွှန်းအမှတ်အသားများ ပြည့်စုံစွာ ပါဝင်လာစေရန်အတွက် ပခုက္ကူမြို့ပေါ်ရှိ အမှတ်(၂)၊အမှတ်(၃)၊အမှတ်(၄)နှင့် အမှတ်(၅) ရပ်ကွက်ရှိ "Natural"ဆပ်ပြာနှင့် ခေါင်းလျှော်ရည်လုပ်ငန်းရှင်၊ "ငွေအိုး"ကောက်ညှင်းကြော်၊ "ဘိုမ" မြေပဲဆား လှော်၊ "ရွှေစင်"ချိုချဉ်၊ "အိုကေ" ပါပလာကြော်၊ "မိုးမြင့်စံ" အာလူးကြော် လုပ်ငန်းရှင်များ ဆီသို့ သွားရောက်၍ အသိပညာပေး ဆွေးနွေးခဲ့ပါသည်။

      ဦးစီးအရာရှိ ဒေါ်မွန်မွန်စိုးက ဆွေးနွေးရာတွင် စီးပွားရေးလုပ်ငန်းရှင်များအနေဖြင့် စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)ပါ ကုန်အညွှန်းအမှတ်အသား ပြည့်စုံစွာဖော်ပြခြင်းဖြင့် ဈေးကွက်အတွင်းရှိ  မိမိတို့ထုတ်ကုန်များမှာ စားသုံးသူများအား ဘေးအန္တရာယ်ကင်းရှင်းစေခြင်း၊ အာမခံချက်ပေးခြင်း၊ သတင်းအချက်အလက်များ ပြည့်စုံမှန်ကန်စွာ ထည့်သွင်းခြင်းတို့ကြောင့် စားသုံးသူများအနေဖြင့် စီးပွားရေးလုပ်ငန်းရှင်များအပေါ်  ယုံကြည်မှုများရရှိလာပြီး အကျိုးစီးပွားများ ပိုမိုရရှိလာနိုင်မည်ဖြစ်ကြောင်း၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ၊ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်(၂/၂၀၁၉)ပါ ကုန်စည်အုပ်စု(က)ရှိ အသင့်စားမုန့်မျိုးမျိုးတွင် မြန်မာဘာသာဖြင့် ထည့်သွင်းရမည့်အချက်များ၊ ကုန်အညွှန်း အမှတ် အသားဖော်ပြခြင်းနှင့်ပတ်သက်သည့် ဥပဒေပြဌာန်းချက်များ၊ စီမံခန့်ခွဲရေး နည်းလမ်းအရ အရေးယူခြင်း၊တားမြစ်ချက်များ၊ ပြစ်မှုနှင့်ပြစ်ဒဏ်များအကြောင်းသိရှိလိုက်နာစေရန် ဆွေးနွေးခဲ့ပြီး စီးပွားရေး လုပ်ငန်းရှင်များသည် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ပြည့်စုံမှန်ကန်မှု ရှိ/မရှိကို မိမိတို့ဌာနသို့ တင်ပြစိစစ်လျှောက်ထားနိုင်ပါကြောင်း၊ ကုန်အမှတ်တံဆိပ်စိစစ်ခွင့်ပြုချက်များအား ပြုလုပ်ဆောင်ရွက်ထားစေလိုကြောင်း၊ ကုန်အညွှန်းအမှတ်အသားများ ပြည့်စုံမှုမရှိသည့် ကုန်စည်များတွေ့ရှိလာပါက ဥပဒေအရအရေးယူဆောင်ရွက်သွားမည်ဖြစ်သဖြင့် လုပ်ငန်းရှင်များလိုက်နာ ဆောင်ရွက်စေလိုကြောင်း အသေးစိတ်ဆွေးနွေးခဲ့ပါသည်။

DOCA(မကွေး)

       မြန်မာတို့အတွက် တန်ခူးလ ဆိုသည့် ဝေါဟာရမှာ “ထန်းသီးခူးသည့် လ”ဟု အဓိပ္ပာယ် သက်ရောက်ပြီး တန်ခူးလသည် သက္ကတဘာသာ “တာလ”မှ ဆင်းသက်သောအမည် ဖြစ်သည်။ တန်ခူးလသည် မြန်မာပြက္ခဒိန်အရ အတာသင်္ကြန်ရေပတာကူးဟူသောအရေးအသားမှာ မိန်ရာသီမှ ပိဿရာသီသို့ ဂြိုဟ် ပြောင်းခြင်းကို စွဲ၍ရေးသားခြင်းဖြစ်ပြီး တန်ခူးလသည် မြန်မာပြက္ခဒိန်၏ ပထမဆုံးလဖြစ်သည်။ တန်ခူးလတွင် ၂၉ ရက်ရှိသည်။ ရက်မစုံသောလဖြစ်ပြီး တန်ခူးလကို တန်းခူးဟူ၍ရေးသည်လည်း ရှိ၏ ကံ့ကော်ပန်း သည် တန်ခူးလ၏ အထိမ်းအမှတ်ပန်း ဖြစ်သည်။

       တန်ခူးလတွင် နှစ်ဟောင်းကုန်ဆုံး၍ နှစ်သစ်သို့ကူးပြောင်းခြင်းအထိမ်းအမှတ်အဖြစ် နှစ်ဟောင်းမှ အညစ်အကြေးများ နှစ်သစ်သို့မပါသွားစေရန်ဟူသော ရည်ရွယ်ချက်ဖြင့် ရေပက်ကစားခြင်းကို  ရိုးရာပွဲတော်အနေဖြင့် မြန်မာနိုင်ငံတွင် ကျင်းပပြုလုပ်ကြပြီး ဆက်နွယ်မှုအနေဖြင့် ထိုင်းနိုင်ငံတွင် ဆောင်ခရမ်ပွဲတော်၊ လာအိုနှစ်သစ်ကူး၊ ကမ္ဘောဒီးယားနှစ်သစ်ကူးရက်များအဖြစ် ကျင်းပလေ့ရှိကြောင်း သိရသည်၊၊ မြန်မာနိုင်ငံတွင် (တန်ခူးလ)သင်္ကြန်ကာလအား ရုံးပိတ်ရက်ရှည် အားလပ်ရက်အဖြစ် အစိုးရမှ ရုံးပိတ်ရက်သတ်မှတ်ပေးပြီး  တရားဘာဝနာပွားများခြင်း၊ သက်ကြီးရွယ်အိုတို့အား ကန်တော့ခြင်းနှင့် စတုဒီသာမုန့်များပြုလုပ်လှူဒါန်းခြင်းများ ကျင်းပပြုလုပ်ကြပါသည်။ မြန်မာနိုင်ငံတွင် တန်ခူးလသည် ခရစ်ပြက္ခဒိန်အရ မတ်လနှင့်ဧပြီလများအတွင်း ကျရောက်ပြီး သင်္ကြန်ပွဲတော်အား ခရစ်နှစ် ဧပြီ ၁၃ ရက်နေ့မှ ၆ ရက်နေ့ထိ ကျင်းပလေ့ရှိကြောင်း သိရသည်။

        စားသုံးသူရေးရာဦးစီးဌာန ၊ကရင်ပြည်နယ်ဦးစီးမှူးရုံးအနေဖြင့် ၁၃၈၄ ခုနှစ် မဟာအတာသင်္ကြန် ပွဲတော် (၁၃-၄-၂၀၂၃) ရက်နေ့ သင်္ကြန်အကြိုနေ့တွင် မုန့်လုံးရေပေါ်ပြုလုပ်၍ အလှူဒါနပြုလုပ်ခြင်း၊ ကရင်ပြည်နယ်စီးပွားရေးရာဝန်ကြီးမဏ္ဍပ်မှ သင်္ကြန်အကျနေ့ ၁၄-၄-၂၀၂၃ ရက်နေ့တွင် သင်္ကြန်ထမင်း အလှူဒါနပြုရာ၌ လုပ်အားဒါနပြုလုပ်ဆောင်ရွက်ခြင်း၊ သင်္ကြန်အကြတ်နေ့ ၁၅-၄-၂၀၂၃ ရက်နေ့၌ အဖွဲ့ခေါင်းဆောင်တာဝန်ယူ၍ ရွှေရင်အေးမုန့် ဒါနပြုခြင်း၊ သင်္ကြန်အတက်နေ့  ၁၆-၄-၂၀၂၃ ရက်နေ့၌ သာခွေယိုင်မုန့် ဒါနပြုခြင်းများနှင့် သင်္ကြန်မဏ္ဍပ်စည်ကားသိုက်မြိုက်စေရေး၊ ရေကစားသူများ ဘေးအန္တရာယ်ကင်းရှင်း၍ ပျော်ရွင်ချမ်မြေ့စွာ ရေးကစားနိုင်ရေးအတွက် သက်ဆိုင်ရာဌာနများနှင့် ပူးပေါင်း၍ ပါဝင်ဆင်နွှဲခဲ့ကြောင်း သိရသည်။

DOCA(ကရင်)

            မကွေးတိုင်းဒေသကြီး အစိုးရအဖွဲ့၏လမ်းညွှန်မှုအရ ၅.၄.၂၀၂၃ ရက်နေ့တွင် မကွေး မြို့ပေါ်ရှိ ဆေးနှင့်ဆေးပစ္စည်းအရောင်းဆိုင်များသို့ သင်္ကြန်ကာလအတွင်း ဆေးများဈေးနှုန်းမြှင့်တင် ရောင်းချမှုမရှိစေရေးနှင့် သက်တမ်းလွန်ဆေးဝါးများ ရောင်းချမှုမရှိစေရေး ဈေးကွက်စောင့်ကြည့်စစ်ဆေးခြင်းများဆောင်ရွက်ခဲ့ပါသည်။ ထိုသို့ဈေးကွက်စောင့်ကြည့်စစ်ဆေးရာတွင် FDA၊ စည်ပင် သာယာရေးအဖွဲ့၊ အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့နှင့် စားသုံးသူရေးရာဦးစီးဌာန  မကွေးတိုင်းဒေသကြီးဦးစီးမှူးရုံးမှ ဝန်ထမ်းများ၊ မကွေးမြို့နယ်တာဝန်ခံရုံးမှ ဝန်ထမ်းများပါဝင်သော အဖွဲ့သည် မကွေးမြို့ပေါ်ရှိ သီလ၊ သံလွင်၊ မေတ္တာမွန်၊ ပတ္တမြားဆေးဆိုင်၊ ထက်ဆေးဆိုင်၊ ဇီဝက ဆေးဆိုင်၊ ပုလဲ၊ ဖန်ခါးမြေဆေးဆိုင်များနှင့် JDS ဆေးကုမ္ပဏီများသို့ ဈေးကွက်စောင့်ကြည့်စစ်ဆေးခဲ့ပါသည်။ 

            အဆိုပါအဖွဲ့အနေဖြင့် ဆေးဈေးနှုန်းစာရင်းများကောက်ယူခြင်း၊ ကုမ္ပဏီရောင်းချသောဈေးနှုန်းများနှင့် ကွာခြားမှုရှိ/မရှိ စိစစ်ခြင်း၊  ဆေးပစ္စည်းများ ပြတ်လပ်မှုမရှိစေရေး မေးမြန်းစုံစမ်းခြင်းများ ဆောင်ရွက်ခဲ့ကြပါသည်။

        ဆက်လက်၍ အဆိုပါအဖွဲ့သည် မကွေးမြို့၊ ရန်ပယ်ဈေးရှိ စားသုံးဆီရောင်းချသော ဆိုင်များသို့ လည်း သွားရောက်၍ ရောဆီများပါဝင်မှုအချိုးအဆအတိုင်း လေဘယ်ကပ်၍ ရောင်းချရေး၊ ဆီများရောင်းချရာတွင် သန့်ရှင်းစွာဖြင့် ခင်းကျင်းရောင်းချရေးတို့အား ကွင်းဆင်းစစ်ဆေးခြင်းများ  ဆောင်ရွက်ခဲ့ပါကြောင်း သတင်းရရှိပါသည်။

DOCA(မကွေး)