သတင်းနှင့် လှုပ်ရှားမှုများ

     တနင်္သာရီတိုင်းဒေသကြီး၊ မြိတ်ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာနနှင့် မြိတ်ခရိုင်စားသုံးသူရေးရာဦးစီးဌာနတို့ ပူးပေါင်း၍ ၂၀၂၃ခုနှစ်၊ ဧပြီလ(၃) ရက်နေ့၊ နံနက်(၁၀း၀၀)နာရီ အချိန်တွင် မြိတ်မြို့ပေါ်ရှိ အိမ်သုံးဆေးဝါးဆိုင်သို့ သွားရောက်၍ သုံးစွဲသူ များဘေးအန္တရာယ်ကင်းရှင်းရေး၊ ထုတ်ကုန်လုံခြုံစိတ်ချရမှုရှိစေရေးအတွက် Parbisure (အကြောအားဆေး)အား ကွင်းဆင်းစစ်ဆေးခြင်းဆောင်ရွက်ခဲ့ကြောင်း သိရှိရပါသည်။

   Parbisure ဆေးကို Towards Ultimate  Company Limited မှ တင်သွင်းလျက်ရှိသော ဂျာမနီနိုင်ငံထုတ်အကြောအားဆေးဖြစ်ပြီး  ၎င်းဆေးအားစျေးကွက်တွင် ပုံစံတူ  DRC No. မပါရှိသောဆေးများ ရောင်းချနေကြောင်း သိရှိရပြီး မြိတ်ခရိုင်စားသုံးသူရေးရာဦးစီးဌာနနှင့်  မြိတ်ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာနတို့မှ မြိတ်ခရိုင်ရှိ အိမ်သုံးဆေးဝါး ရောင်းချနေသောဆိုင်များအား ကွင်းဆင်းစစ်ဆေးခဲ့ရာ မြိတ်ခရိုင်အတွင်း ရောင်းချနေခြင်းမရှိ ကြောင်း စုံစမ်းသိရှိရပြီး သုံးစွဲသူများအသုံးပြုရန် (သို့မဟုတ်) သုံးစွဲရန်အာမခံချက်မရှိသော ကုန်စည်များအား စျေးကွက်အတွင်းရောင်းချမှုမရှိစေရေး၊ စီးပွားရေးလုပ်ငန်းရှင်များလိုက်နာ ဆောင်ရွက်ရမည့်တာဝန်များနှင့် မြန်မာဘာသာဖြင့် ကုန်အညွှန်းအမှတ်အသားဖော်ပြပါရှိသော ကုန်ပစ္စည်းများအား ရောင်းချမှုရှိစေရေးတို့အား ပြောကြားခဲ့ပြီး လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိခဲ့ပါသည်။

DOCA(တနင်္သာရီ)

    စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် ၂၉-၃-၂၀၂၃ ရက်နေ့၊ နံနက်(၁၀:၃ဝ) နာရီအချိန်တွင် ဒေါပုံမြို့နယ်၊ ဒေါပုံဈေး၌ စားသုံးသူကာကွယ်ရေးဥပဒေ (၂၀၁၉)တွင်ပါရှိသည့် “ကုန်အညွှန်းအမှတ်အသားဖော်ပြခြင်း” ခေါင်းစဉ်ဖြင့် ဟောပြောရှင်းလင်းပြောကြားခဲ့ရာ ဟောပြောပွဲ တက်ရောက်သူ (၁၇) ဦး တက်ရောက်ခဲ့ကြောင်း သိရှိရပါသည်။

      အဆိုပါဟောပြောပွဲတွင် စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဦးနေလင်း (ဒု-ကြီးကြပ်ရေးမှူး)က စားသုံးသူကာကွယ်ရေးဥပဒေပါ အခန်း (၁၈)၊ ပုဒ်မ ၄၁ ရှိ စီးပွားရေးလုပ်ငန်းရှင်သည် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ဖော်ပြပါရှိရမည့် အချက်(၈)ချက်အား အသေးစိတ်ရှင်းလင်း ပြောကြားခဲ့ပါကြောင်း၊ မည်သည့်စီးပွားရေးလုပ်ငန်းရှင်မဆို ပုဒ်မ ၄၁၊ ပုဒ်မခွဲ (ခ) နှင့်(ဆ)တို့ပါ ကုန်အညွှန်းအမှတ်အသား ဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ရေးသားဖော်ပြပေးရမည် ဖြစ်ကြောင်းနှင့် တားမြစ်ချက်တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှားပါက နှစ်နှစ်ထက်မပိုသော ထောင်ဒဏ်ဖြစ်စေ၊ ကျပ်သိန်း ၂၀၀ ထက်မပိုသော ငွေဒဏ်ဖြစ်စေ၊ ဒဏ်နှစ်ရပ်စလုံးဖြစ်စေ ချမှတ်ခံရနိုင်ကြောင်းတို့ကို ပြောကြားပြီး ဟောပြောပွဲကို (၁၁:၁၅)  နာရီတွင် ရုပ်သိမ်းခဲ့ကြောင်း သိရှိရပါသည်။

DOCA(ရန်ကုန်)

        ၂၀၂၃ခုနှစ်၊ ဧပြီလ(၄)ရက်နေ့၊ နံနက်(၉:၃၀)နာရီအချိန်တွင် စားသုံးသူရေးရာဦးစီးဌာန၊ တာချီလိတ်မြို့နယ်တာဝန်ခံရုံးမှ ဝန်ထမ်းများသည် ရေနံထွက်ပစ္စည်းကြီးကြပ်စစ်ဆေးရေးဦးစီးဌာန၊ မြို့နယ်စက်သုံးဆီလုပ်ငန်းရှင်များအသင်းတို့နှင့်ပူးပေါင်း၍ တာချီလိတ်မြို့နယ်အတွင်းရှိ စက်သုံးဆီအရောင်းဆိုင်(၈)ဆိုင်အား စက်သုံးဆီ အခြင်အတွယ် ပြည့်ဝမှု ရှိ/မရှိ၊ သက်မှတ်ရည်ညွှန်းဈေးအတိုင်း ရောင်းချနေမှုအခြေအနေနှင့် စက်သုံးဆီလက်ကျန်အခြေအနေတို့ကို ပူးပေါင်းကွင်းဆင်းစစ်ဆေးခြင်း ဆောင်ရွက်ခဲ့ပါသည်။

          ထိုသို့စစ်ဆေးရာတွင် တာချီလိတ်မြို့နယ်အတွင်းရှိ စက်သုံးဆီအရောင်းဆိုင်းများတွင် စက်သုံးဆီလက်ကျန်အနေဖြင့် လုံလောက်စွာသိုလှောင်ထားရှိပြီး သက်မှတ်ရည်ညွှန်းဈေးအတွင်းသာ ရောင်းချကာ အခြင်အတွယ် ပြည့်ဝမှန်ကန်မှုရှိသည်ကို စစ်ဆေးတွေ့ရှိခဲ့ရပါသည်။ စစ်ဆေးရေးမှူးနှင့် ဌာနဆိုင်ရာတာဝန်ရှိသူများသည် စက်သုံးဆီအရောင်းဆိုင်တာဝန်ခံများအား အခြင်အတွယ် မှန်ကန်မှုရှိစေရေးကို အလေးထားကြရန်၊ သတ်မှတ်ရည်ညွှန်ဈေးအတွင်းသာ ရောင်းချကြရန်တို့အား မှာကြား၍ စက်သုံးဆီလက်ကျန်အခြေအနေတို့အား စစ်ဆေးခြင်းကို ပူးပေါင်းဆောင်ရွက်ခဲ့ပါသည်။

DOCA (ရှမ်း)

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်း ဒေသကြီးအနေဖြင့် စားသုံးသူကာကွယ်ရေးအသိပညာပေးဟောပြောပွဲများကို လစဉ်စီမံချက်များ ပြည့်မီအောင်ဆောင်ရွက်လျက်ရှိရာ (၅.၄.၂၀၂၃) ရက်နေ့၊ နံနက်(၁၀:၀၀) နာရီချိန်တွင် မုံရွာမြို့၊  ဒေါနခြံရပ်ကွက်ရှိ ရက်ကန်းနှင့် သက်မွေးပညာသင်တန်းကျောင်း၌ ကျင်းပပြုလုပ်သည့် “အခြေခံစက်ချုပ်နည်းပညာသင်တန်း”တွင်  စားသုံးသူကာကွယ်ရေး အသိပညာပေး ဟောပြောပွဲအား ဆောင်ရွက်ခဲ့ပါသည်။

           အဆိုပါဟောပြောပွဲတွင် ဦးစီးအရာရှိ ဒေါ်တိုးတိုးချွန် က စားသုံးသူရေးရာဦးစီးဌာန ပေါ်ပေါက်လာပုံ၊ စားသုံးသူရေးရာဦးစီးဌာန၏ မျှော်မှန်းချက်နှင့် ရည်မှန်းချက်များ၊ စားသုံးသူများ၏ အခွင့်အရေးများကို အပြည့်အဝကာကွယ်နိုင်ရန်အတွက် စားသုံးသူကာကွယ်ရေးဥပဒေကို ၂၀၁၉ ခုနှစ်၊ မတ်လ (၁၅) ရက်နေ့တွင် ပြည်ထောင်စုလွှတ်တော် ဥပဒေ အမှတ် ၉။ ဖြင့် အတည်ပြု ပြဋ္ဌာန်းခဲ့ရာ အခန်းပေါင်း (၂၅) ခန်းနှင့် ပုဒ်မပေါင်း (၈၄) ခုအနက်မှ စားသုံးသူ၏ အဓိပ္ပါယ်ဖွင့်ဆိုချက်များ၊ စားသုံးသူအခွင့်အရေး (၈) ချက်အကြောင်းများကို ရှင်းလင်းဆွေးနွေးခဲ့ပါသည်။ ဆက်လက်၍ ဒု-ဦးစီးမှူး ဒေါ်ဇင်မာနွယ်က စားသုံးသူရေးရာဦးစီးဌာန အနေဖြင့် စားသုံးသူကာကွယ်ရေးနှင့်ပတ်သက်သည့် အသိပညာဗဟုသုတများရရှိစေရန် ကျောင်း၊ ဈေး၊ ဌာနဆိုင်ရာရုံးများ၊  ရပ်ကွက်၊ ကျေးရွာများ၊  တက္ကသိုလ်/ကောလိပ်များ၊ တပ်ရင်းတပ်ဖွဲ့များ တွင် စားသုံးသူကာကွယ်ပေးရေး အသိပညာပေးဟောပြောပွဲများအား ဆောင်ရွက်လျက်ရှိကြောင်း၊ စားသုံးသူပြည်သူများအနေဖြင့် ကုန်စည်နှင့်ဝန်ဆောင်မှုများကို အသုံးပြုရာတွင် ဘေးအန္တရာယ် ကင်းရှင်းစေရန်နှင့် ထုတ်ကုန်များလုံခြုံစိတ်ချရမှုရှိစေရန် မိတ်ဖက်ဌာနဆိုင်ရာ အဖွဲ့အစည်းများနှင့် ပူးပေါင်း၍ ဈေးကွက်မရောက်မီနှင့် ဈေးကွက်ရောက်ပြီးသောကုန်စည်များကို ဈေးကွက်စောင့် ကြည့်စစ်ဆေးခြင်းကို ဆောင်ရွက်ရသည့်အကြောင်းများ၊  စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏တာဝန်များ၊ စားသုံးသူများသည် ကုန်စည်နှင့်ဝန်ဆောင်မှုများ သုံးစွဲရာတွင် စားသုံးသူအခွင့်အရေးနှင့် နစ်နာဆုံးရှုံးမှုများရှိပါက တိုင်ကြားနိုင်ကြောင်းနှင့် တိုင်ကြားနိုင်သည့် နေရာများ၊ ဌာနနှင့်သက်ဆိုင်သောအကြောင်းများကို မေးမြန်းစုံစမ်းနိုင်သည့် Consumer Call Center အကြောင်း၊ တိုင်ကြားစာများကို စိစစ်ညှိနှိုင်းဖြေရှင်းပေးသည့် အကြောင်းများရှင်းလင်းဆွေးနွေးခဲ့ရာ ဆရာ/ဆရာမ (၅) ဦး၊ သင်တန်းသား/သူ(၁၅)ဦး စုစုပေါင်း(၂၀)ဦး တက်ရောက်ခဲ့ပြီး သင်တန်းသား/သူများက သိရှိလိုသည်များကို မေးမြန်ခြင်း၊ ဖြေကြားခြင်း၊  စားသုံးသူကာကွယ်ရေး အသိပညာပေးလက်ကမ်းစာစောင်များဖြန့်ဝေခြင်း လုပ်ငန်းများဆောင်ရွက်ခဲ့ပါကြောင်း သတင်းရရှိပါသည်။

DOCA(စစ်ကိုင်း)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ခရိုင်ဦးစီးမှူးနှင့် ဝန်ထမ်းများသည် ကလေးမြို့နယ်၊ ချမ်းမြေ့အောင်စည်ရပ်ကွက်သို့ ( ၄.၄.၂၀၂၃ ) ရက်နေ့ နံနက်(၁၃:၀၀)နာရီအချိန်၌  အ‌သေးစားစက်မှုလက်မှုလုပ်ငန်းဦးစီးဌာနသို့ သွားရောက်၍ အသိပညာပေးဟောပြောပွဲ ကျင်းပပြုလုပ်ခဲ့ရာ သင်တန်းသား /သင်တန်းသူ ( ၃၀ ) ဦးတက်ရောက်ခဲ့ပါသည်။

       အဆိုပါဟောပြောပွဲတွင် စားသုံးသူရေးရာဦးစီးဌာန၊ ကလေးခရိုင်ဦးစီးမှူး ဒေါ်သန်းသန်းဝင်းက မိမိတို့ကုန်ပစ္စည်းများ ဈေးကွက်အတွင်း ဖြန့်ဖြူးရောင်းချမည်ဆိုပါက ကုန်အညွှန်းအမှတ်အသားများအကြောင်းကို ရှင်းလင်းဆွေးနွေးရာ မိမိတို့ ထုတ်လုပ်ရောင်းချသည့် ကုန်ပစ္စည်းများပေါ်တွင်  ကုန်စည်၏တံဆိပ်အမှတ်အသား၊ ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ် သည့်ရက်စွဲနှင့် သက်တမ်းကုန်ဆုံးသည့်ရက်စွဲ ထုတ်လုပ်မှုအမှတ်စဉ်၊ ထုတ်လုပ်သည့်နေရာ၊ ကုန်စည်တွင်ပါဝင်သော ကုန်ကြမ်းပစ္စည်းအမျိုးအမည်များနှင့်  ပစ္စည်းများ၏ပမာဏ၊ ပါဝင်မှုအချိုးအစား၊ ကျန်းမာရေးဆိုင်ရာ ဘေးထွက်ဆိုးကျိုး သို့မဟုတ် ဓါတ်မတည့်ကြောင်း ဖော်ပြချက်နှင့် ကြိုတင်သတိပေးချက်၊ သက်ဆိုင်ရာ အစိုးရဌာနများက ဖော်ပြရန် သတ်မှတ်ထားသော အချက်အလက်များကို ထည့်သွင်းဖော်ပြရမည့်အချက်အလက်များကို အသေးစိတ် ဆွေးနွေးပြောကြားခဲ့ပြီး အသေးစားစက်မှုလက်မှုလုပ်ငန်းဦးစီးဌာနမှ ဦးစွာပထမ အသးစားစက်မှုလက်မှု လုပ်ငန်းဦးစီးဌာန၊ ဒေါ်ခိုင်ခိုင်ဝင်း (လ/ထညွှန်ကြားရေးမှူး)မှ အဖွင့်အမှာစကားပြောကြားပြီး အသေးစားစက်မှုလက်မှုလုပ်ငန်း ဦးစီးဌာနမှ ဖွင့်လှစ်သော လူသုံးကုန်ထုတ်လုပ်မှုနည်းပညာသင်တန်းဆင်းပွဲတွင် ဘေးအန္တရာယ်ကင်းရှင်းပြီး  မိသားစုတစ်ပိုင်တစ်နိုင် စီးပွားရေးလုပ်ငန်းငယ်လေးများ ဖြစ်ထွန်းလာစေရန်နှင့် MSMEလုပ်ငန်းများဖွံ့ဖြိုးတိုးတက်လာစေရန် ရည်ရွယ်၍ဖွင့်လှစ်ရသော သင်တန်းဖြစ်ကြောင်း၊ သင်တန်းသား/သူများအနေဖြင့် သင်တန်းမှလက်တွေ့ကျကျသင်ကြားသော သင်ခန်းစာ များကို မသိနားမလည်မှုများရှိပါက သင်တန်းနည်းပြများထံသို့ အချိန်မရွှေးဆက်သွယ်မေးမြန်း နိုင်ပါကြောင်း သင်တန်းလာတက်ရသည့် အချိန်များကို အကျိုးရှိအောင် မိမိတို့ဘက်မှလည်း ကျိုးစား၍ သင်ကြားပေးသည့်အတွက်၊ သင်တန်းမှရရှိသော သင်ခန်းစာများနှင့် မိမိတို့ကိုယ်စွမ်း ဉာဏ်စွမ်းများဖြင့် ပေါင်းစပ်၍ လုပ်ငန်းငယ်လေးများ စတင်ထူထောင်ကြစေလိုပါကြောင်း၊ ခေတ်စနစ်နှင့်အညီ ပြည်ပမှဝင်ရောက်သော Ready Made မုန့်များတွင် အရောင်ဆိုးဆေးများစွာနှင့် ကလေးသူငယ်များ စားချင်စဖွယ်ဖြစ်အောင် ဖန်တီးထားသော မုန့်များကို ဈေးကွက်များတွင် မြင်တွေ့နေရ၍ ပြည်ပမှဝင်ရောက်သော မုန့်များစားသုံးမှုနည်းလာစေရန် ပြည်တွင်းမှ ကိုယ်တိုင်ပြုလုပ်ပြီး အာဟာရပြည့်ဝတဲ့ မုန့်များကိုဈေးကွက်တွင် ထုတ်လုပ်ရောင်းချခြင်းဖြင့် ပြည်ပမှဝင်ရောက်လာတဲ့ မုန့်များဟာလည်း လျော့နည်းလာ မည်ဖြစ်ကြောင်း သင်တန်းမှပို့ချပေးသောပညာရပ်များကို မိမိတို့၏ မိသားစုတစ်ပိုင်တစ်နိုင် လက်တွေ့ဆောင်ရွက်သွားကြစေလိုကြောင်း တစ်ပိုင်တစ်နိုင်လုပ်ငန်းမှသည် အောင်မြင်သည့်လုပ်ငန်းရှင်ကြီးများဖြစ်အောင်လည်း ကြိုးစားဆောင်ရွက်သွားကြစေလိုကြောင်းပြောကြားခဲ့ကြောင်း သတင်းရရှိပါသည်။

DOCA(စစ်ကိုင်း)