သတင်းနှင့် လှုပ်ရှားမှုများ

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး ဦးမြင့်ဝင်းသည် (၁၀-၆-၂၀၂၃) ရက်နေ့၊ နေ့လယ် (၁၃း၀၀) နာရီအချိန်တွင် မကွေးမြို့၊  ကုန်သည်များနှင့်စက်မှုလက်မှုလုပ်ငန်းရှင်များအသင်း (ကုန်စည်ဒိုင်) ခန်းမ၌ ဆန်စက်ပိုင်ရှင်များနှင့်ဆန်ကုန်သည်များအား ဆန်စပါးဥပဒေ (မူကြမ်း) နှင့် ဆန်စပါးသိုလှောင်မှုလုပ်ငန်းမှတ်ပုံတင်ခြင်းဆိုင်ရာ အစိုးရပုဂ္ဂလိကလုပ်ငန်းအဖွဲ့ ဖွဲ့စည်းထားရှိမှုနှင့် ဆောင်ရွက်သွားမည့်အစီအမံများအား ချပြရှင်းလင်းခြင်းနှင့်စပ်လျဉ်း၍ အသိပညာပေးချပြဆွေးနွေးခဲ့ပါသည်။

အဆိုပါအခမ်းအနားတွင် တိုင်းဒေသကြီးဦးစီးမှူးက ဥပဒေ (မူကြမ်း) ရေးဆွဲခြင်းနှင့်စပ်လျဉ်း၍ ဆန်စပါးကဏ္ဍဖွံ့ဖြိုးတိုးတက်ရေးအတွက် ဆက်လက်ဆောင်ရွက်သင့်သည့်လုပ်ငန်းစဉ်များ၊ ကြုံတွေ့ရသည့်အခက်အခဲများနှင့် ဆန်စပါးကဏ္ဍ၏ အနာဂတ်ဦးတည်ရာများကို လေ့လာသုံးသပ်ဆွေးနွေးဖော်ထုတ်ရန်ရည်ရွယ်၍ မြန်မာ့ဆန်စပါးညီလာခံ (၂၀၂၂) ကို နေပြည်တော်၌ (၆-၁၀-၂၀၂၂) ရက်နေ့မှ (၇-၁၀-၂၀၂၂) ရက်နေ့အထိကျင်းပပြုလုပ်ခဲ့ကြောင်း၊ ဆန်စပါးညီလာခံက စိုက်ပျိုးထုတ်လုပ်မှုကဏ္ဍ (၁၅) ချက်၊ ထုတ်လုပ်မှုကဏ္ဍ (၁၀) ချက်၊ ပို့ကုန်မြှင့်တင်ရေးနှင့်ထုတ်လုပ်မှုကဏ္ဍ (၁၈) ချက်ဖော်ထုတ်နိုင်ခဲ့ကြောင်း၊ ကြိတ်ခွဲထုတ်လုပ်မှုကဏ္ဍ၊ ပို့ကုန်မြှင့်တင်ရေးနှင့် ကုန်သွယ်မှုကဏ္ဍဆိုင်ရာဖော်ထုတ်ချက်များကို အကောင်ထည်ဖော်ဆောင်ရွက်နိုင်ရန်အတွက် စီးပွားရေးနှင့်ကူးသန်းရောင်းဝယ်ရေ းဝန်ကြီးဌာန၏ တာဝန်ပေးချက်အရ ဆန်စပါးဥပဒေ (မူကြမ်း) ကို စားသုံးသူရေးရာဦးစီးဌာနက ရေးဆွဲခဲ့ခြင်းဖြစ်ပါကြောင်း၊ မကွေးတိုင်းဒေသကြီးသည် ၂၀၂၂ခုနှစ်တွင် စပါးနှင့်ပတ်သက်ပြီး မိုးစပါးဧက (၆) သိန်းကျော်နှင့် နွေစပါးဧက (၃) သိန်းကျော်စိုက်ပျိုးခဲ့ကြောင်း၊ ၂၀၂၂ခုနှစ်တွင် စပါးတင်း (၄၆၀) သိန်းထွက်ရှိပြီး တစ်နှစ်လျှင် စပါးတင်း (၆၅၀) သိန်း၊ ဆန်တန်ချိန် (၆) သန်းသုံးစွဲရန်လိုအပ်လျက်ရှိကြောင်း၊ ၂၀၂၁ခုနှစ်တွင် (၆၄) ရာခိုင်နှုန်း၊ ၂၀၂၂ခုနှစ်တွင် (၇၀) ရာခိုင်နှုန်းအထိဆန်ဖူလုံမှုရှိခဲ့ကြောင်း၊ ၂၀၂၂ခုနှစ်တွင် ဆန်ဖူလုံမှုမရှိသည့်အတွက် (၁) လလျှင် ဆန်တန်ချိန် (၁၅၀၀၀) ခန့်၊ (၁) နှစ်လျှင် ဆန်တန်ချိန် (၁၈၀၀၀၀) ခန့်၊ ဧရာဝတီ၊ ပဲခူး၊ မန္တလေးတို့မှ ဝယ်ယူနေရပါကြောင်း၊ ဆန်စက်ပိုင်ရှင်နှင့်ဆန်ကုန်သည်များသည် ဥပဒေနှင့်ပတ်သက်ပြီး မဖြစ်မနေသိရမည်ဖြစ်သည့်အတွက် ချပြဆွေးနွေးခြင်းဖြစ်ကြောင်း ရှင်းလင်းဆွေးနွေးခဲ့ပါသည်။ ထို့နောက်တက်ရောက်လာသည့်ကုန်သည်များနှင့် စက်မှုလက်မှုလုပ်ငန်းရှင်များက  ဆန်စပါးဥပဒေပြဋ္ဌာန်းချက် (မူကြမ်း) နှင့် ဆန်စပါးသိုလှောင်မှုလုပ်ငန်းမှတ်ပုံတင်ခြင်းဆိုင်ရာ အစိုးရပုဂ္ဂလိကလုပ်ငန်းအဖွဲ့ ဖွဲ့စည်းထားရှိမှုနှင့် ဆောင်ရွက်သွားမည့်အစီအမံများအပေါ်  သိရှိလိုသည့်အကြောင်းအရာများကို အပြန်အလှန်ဆွေးနွေးခဲ့ကြပြီး ညနေ (၁၅း၃၀) နာရီအချိန်တွင် အခမ်းအနားရုပ်သိမ်းခဲ့ကြောင်း သိရှိရပါသည်။

     အဆိုပါအခမ်းအနားသို့ ဆန်ကုန်သည် (၁၈) ဦး၊ ဆန်စက်ပိုင်ရှင် (၂၁) ဦး၊ စုစုပေါင်း (၃၉) ဦးတို့တက်ရောက်ခဲ့ကြကြောင်း သတင်းရရှိပါသည်။

DOCA(မကွေး)

    စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးမှ စစ်ဆေးရေးမှူး ဦးတင်မောင်ထွန်း သည် (၁၂.၆.၂၀၂၃) ရက်နေ့၊  (၁၀း၃၀) နာရီအချိန်တွင် မြစ်ကြီးနားမြို့၊ အင်ဂျန်ဒုံရပ်ကွက်အတွင်းရှိ လက်လီ၊ လက်ကား ဖြန့်ဖြူးရောင်းချသော ကုန်စုံဆိုင်များသို့သွားရောက်၍ စားသုံးသူများ ဘေးအန္တရာယ် ကင်းရှင်းပြီး ထုတ်ကုန်လုံခြုံစိတ်ချရမှုရှိစေရေး၊ ဘေးအန္တရာယ်ရှိသော ကုန်စည်များ ဈေးကွက်အတွင်းမှ ပပျောက်စေရေးနှင့် စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းနှင့်ပတ်သက်၍ ကိုက်ညီမှု ရှိ/ မရှိ ဈေးကွက်စောင့်ကြည့်စစ်ဆေးခဲ့ပါသည်။

    ထိုသို့ ဈေးကွက်စောင့်ကြည့်စစ်ဆေးရာတွင် Abevia အမှတ်တံဆိပ် (နို့ဆီ)၊ D-POP အမှတ်တံဆိပ် (လီမွန်းစပါကလင်အချိုရည်)နှင့် မီကို အမှတ်တံဆိပ်(ဒိန်ချဉ်)တို့တွင် ညွှန်ကြားချက်အမှတ် (၂/၂၀၁၉)အရ ကုန်စည်ပေါ်တွင် မြန်မာဘာသာဖြင့်ဖော်ပြရမည့် အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ ဓါတ်မတည့်ကြောင်းဖော်ပြချက်များ ပြည့်စုံစွာဖော်ပြပါရှိကြောင်း စစ်‌ဆေးတွေ့ရှိရပြီး ကုန်စုံဆိုင်ပိုင်ရှင်အား ကုန်အညွှန်းအမှတ်အသား ပြည့်စုံမှုမရှိသည့် ကုန်စည်များ ဈေးကွက်အတွင်း ရောင်းချမှုမပြုရန် ဆွေးနွေးခဲ့ပြီး ကုန်အညွှန်း အမှတ်အသားဖော်ပြခြင်းဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။

DOCA(ကချင်)

   မွန်ပြည်နယ်၊ ပေါင်မြို့နယ်၊ စားသုံးသူရေးရာဦးစီးဌာန မြို့နယ်တာဝန်ခံသည် (၅.၆.၂၀၂၃)ရက်နေ့တွင် ပေါင်မြို့နယ်၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့နှင့် ပူးပေါင်း၍ ပေါင်မြို့နယ်၊ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုဗဟိုပြုခန်းမတွင် စားသုံးသူ ကာကွယ်ရေးဆိုင်ရာအသိပညာပေး (Talk Show) ပြုလုပ်၍ ဟောပြော ဆွေးနွေးခဲ့ပါသည်။

   အဆိုပါ ဆွေးနွေးပွဲတွင် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ ဦးစီးအရာရှိက စားသုံးသူကာကွယ်ရေးဆိုင်ရာအသိပညာပေး (Talk Show) ပြုလုပ်ရခြင်း၏ ရည်ရွယ်ချက်ကို ရှင်းလင်းဆွေးနွေးခဲ့ပြီး ပေါင်မြို့နယ်တာဝန်ခံ ဦးနေဇင်သက် (ဦးစီးအရာရှိ)က စားသုံးသူရေးရာ ဦးစီးဌာနအနေဖြင့် စားသုံးသူအသိပညာပေးလုပ်ငန်းများကို ကျယ်ကျယ်ပြန့်ပြန့် ဆောင်ရွက်လျက်ရှိကြောင်း၊ စားသုံးသူများအနေဖြင့် မိမိတို့၏ အခွင့်အရေးများကိုသိရှိထားရန် လိုအပ်ကြောင်းဆွေးနွေးခဲ့ပြီး စားသုံးသူအခွင့်အရေး(၈)ချက်၊ ကုန်စည်၊ ဝန်ဆောင်မှုများနှင့်ပတ်သက်၍ စားသုံးသူက တောင်းဆိုနိုင်သော အခွင့်အရေးများအား သိရှိရမည်ဖြစ်ကြောင်း၊ စားသုံးသူအနေဖြင့် ကုန်စည် (သို့မဟုတ်) ဝန်ဆောင်မှုများကို ဝယ်ယူသုံးစွဲရာတွင် နစ်နာဆုံးရှုံးမှုမရှိစေရေး သတိပြုရမည်ဖြစ်ကြောင်းနှင့် နစ်နာဆုံးရှုံးမှု ရှိလာပါက ရှင်းလင်းတင်ပြခွင့်၊ တိုင်ကြားခွင့်နှင့် ကုစားခွင့်နည်းလမ်းများဖြင့် ဆောင်ရွက်နိုင်ကြောင်းတို့ကို ပြောကြားပြီးနောက် စားသုံးသူပြည်သူများအနေဖြင့် ကုန်စည်နှင့်ဝန်ဆောင်မှုများ ဝယ်ယူသုံးစွဲခြင်းကြောင့် ထိခိုက်နစ်နာမှု ဖြစ်ပေါ်လာပါက တိုင်ကြားနိုင်သည့် နည်းလမ်းများ၊ ဌာန၏ Website ဖြစ်သော www.doca.gov.mm ပါ အကြောင်းအရာများ၊ စားသုံးသူရေးရာဦးစီးဌာနနှင့်ပတ်သက်၍ သိရှိလိုသည့် အချက်အလက်များနှင့် စားသုံးသူနစ်နာဆုံးရှုံးမှုများအတွက် Consumer Call Center (1535) ကို ခေါ်ဆိုမေးမြန်းနိုင်ကြောင်း ရှင်းလင်းဆွေးနွေးခဲ့ကြောင်း သတင်းရရှိသည်။

DOCA(မွန်)

    ၂၀၂၃ခုနှစ် ဇွန်လ ၁၀ ရက်နေ့၊ နေ့လယ် (၁၃:၀၀) နာရီအချိန်တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးမှ ဒုတိယဦးစီးမှူး ဒေါ်ခင်ကြည်၊ အငယ်တန်းစာရေး ဒေါ်ခင်လေးနွယ်၊  မော်လမြိုင်ခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံးမှ လက်ထောက်ညွှန်ကြားရေးမှူး  ဒေါ်မြင့်မြတ်သီတာတို့သည် လူထုအခြေပြုဗဟိုဌာန (Community Center)၌ စားသုံးသူကာကွယ်ရေးအသိပညာပေး    (Talk Show) ကျင်းပပြုလုပ်ခဲ့ကြောင်း သိရပါသည်။

    အဆိုပါ Talk Show ဆွေးနွေးပွဲတွင် မော်လမြိုင်ခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံး၊ လက်ထောက်ညွှန်ကြားရေးမှူး  ဒေါ်မြင့်မြတ်သီတာက ပထမဦးစွာ Talk Show ဆောင်ရွက်ခြင်း ရည်ရွယ်ချက်များကို ပြောကြားပါသည်။ ထို့နောက်  မွန်ပြည်နယ် စားသုံးသူရေးရာ ဦးစီးဌာန၊ ပြည်နယ်ဦးစီးမှူးရုံးမှ ဒုတိယဦးစီးမှူး ဒေါ်ခင်ကြည်က “အွန်လိုင်းရောင်းဝယ်မှုဆိုင်ရာ စားသုံးသူအသိပညာပေး” ခေါင်းစဉ်ဖြင့် ဆွေးနွေးရာတွင် ယနေ့ခေတ်၏ စားသုံးသူများ ဝယ်ယူသုံး စွဲမှုများပြားသော Online Shopping နှင့်ပတ်သက်၍  စားသုံးသူပြည်သူများအတွက် အသိပညာပေးရာတွင် စားသုံးသူပြည်သူများက ရင်ဆိုင်တွေ့ကြုံနေရသည့် အချက်အလက်(၇)ချက်နှင့် Online Shopping ဝယ်ယူမှုမပြုမီ စားသုံးသူက ကြိုတင်သတိထားရှိ ရမည့်အချက်အလက်(၇)ချက်တို့ကိုသိရှိစေရန်နှင့် စားသုံးသူပြည်သူများ စားသုံးသူအခွင့်အရေးများ မရှုံးဆုံးစေရေးတို့အတွက် စားသုံးသူများနစ်နာမှုမရှိစေရေး၊ စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးဥပဒေဖြင့် ဆောင်ရွက်လျက်ရှိကြောင်း၊  ဆက်လက်၍လည်း စားသုံးသူများကို ကာကွယ်ရေးနှင့် အသိပညာပေး အစီအစဉ်များဖြင့် ဆောင်ရွက်မည်ဖြစ်ပါကြောင်း၊ စားသုံးသူများ ထိခိုက်နစ်နာမှုရှိလာပါက စားသုံးသူရေးရာဦးစီးဌာနသို့ တိုင်ကြားနိုင်ပါကြောင်း၊  တိုင်ကြားမှုဆောင်ရွက်ရန် နည်းလမ်းများနှင့် စားသုံးသူရေးရာဦးစီးဌာန၏ Official Webiste www.doca.gov.mm ကိုလေ့လာသိရှိစေရန် Talk Show အစီအစဉ်မှာ ဆွေးနွေးပြောကြားခဲ့ကြောင်း သတင်းရရှိသည်။

DOCA(မွန်)

     (၆.၆.၂၀၂၃) ရက်နေ့တွင် ပဲခူးတိုင်းဒေသကြီး(အရှေ့) ညောင်လေးပင်ခရိုင်၊  ညောင်လေးပင် မြို့နယ်အတွင်းရှိ မြို့ပေါ်ရပ်ကွက်များ၌ အခြေခံလူတန်းစားများ စားဝတ်နေရေး အဆင်ပြေစေရန် ရည်ရွယ်၍ မြန်မာနိုင်ငံဆီကုန်သည် ဆီလုပ်ငန်းရှင်များအသင်း၏ အစီအစဉ်ဖြင့် ပဲခူးခရိုင် ဆီကုန်သည်အသင်းမှ အရောင်းဈေးကားဖြင့် ညောင်လေးပင်မြို့နယ်အတွင်း လှည့်လည်၍ ရောင်းချ ပေးကြောင်း သိရပါသည်။

    ထိုသို့အရောင်းဈေးကားဖြင့် လှည့်လည်ရောင်းချရာတွင် ညောင်လေးပင်မြို့နယ်အတွင်းရှိ အခြေခံလူတန်းစားများ နေထိုင်သော ရပ်ကွက်များသို့ အဓိကထား၍ လူတစ်ဦးလျှင် တစ်ပိဿာနှုန်းဖြင့် ရောင်းချပေးပြီး ဈေးနှုန်းအနေဖြင့် တစ်ပိဿာ ၄၆၀၀/- ကျပ်ဖြင့် ရောင်းချပေးကြောင်း ၊  ပဲခူးခရိုင်ဆီကုန်သည်အသင်းမှ ညောင်လေးပင်မြို့အတွင်း လာရောက်ရောင်းချရာတွင် မြို့နယ် စားသုံးသူရေးရာဦးစီးဌာနမှလည်း ကြီးကြပ်ဆောင်ရွက်ပေးခဲ့ပါကြောင်း သိရှိရပါသည်။

DOCA(ပဲခူး)