သတင်းနှင့် လှုပ်ရှားမှုများ

     မကွေးတိုင်းဒေသကြီး၊ စားသုံးသူရေးရာဦးစီးဌာန၊ ပခုက္ကူခရိုင်ဦးစီးမှူးရုံးတွင် (၂၀-၄-၂၀၂၃)ရက်နေ့၊ နံနက် (၁၀:၀၀) နာရီအချိန်တွင် ပခုက္ကူခရိုင်ဦးစီးမှူးရုံး၊ အစည်းအဝေးခန်းမ၌ ဝန်ထမ်းစွမ်းဆောင်ရည်မြှင့်တင်ရေးအထောက်အကူပြု Thursday Talk (၄/၂၀၂၃) အသိပညာပေးဟောပြောဆွေးနွေးပွဲပြုလုပ်ရာ ဝန်ထမ်း(၂၀)ဦးတက်ရောက်ခဲ့ပါသည်။

     အဆိုပါ Thursday Talk အသိပညာပေးဆွေးနွေးပွဲတွင် စားသုံးသူရေးရာဦးစီးဌာန၊ ပခုက္ကူ ခရိုင်ဦးစီးမှူး ဦးဝေဠုအောင်က အဖွင့်အမှာစကားပြောကြားခဲ့ပြီးနောက် ဒု-ဦးစီးမှူး ဦးဇော်မင်းဦးက စားသုံးသူကာကွယ်ရေးဥပဒေ(၂၀၁၉) ပြဋ္ဌာန်းချက်ပါ အခန်း(၁၀၊ ၁၁၊ ၁၂၊ ၁၃၊ ၁၄၊ ၁၅)ကို  ဆွေးနွေးခဲ့ရာ အခန်း(၁၀) စီးပွားရေးလုပ်ငန်းရှင်၏တာဝန်များအကြောင်း၊ အခန်း(၁၁) ကုန်စည်နှင့်စပ်လျဉ်း၍ အာမခံချက်ပေးခြင်း၊  အခန်း(၁၂) ကုန်စည်နှင့်စပ်လျဉ်း၍အာမခံပေးထားမှုအပေါ် စားသုံးသူကတောင်းဆိုနိုင်သည့်အခွင့်အရေးများအကြောင်း၊ အခန်း(၁၃) ဝန်ဆောင်မှုနှင့်စပ်လျဉ်း၍ အာမခံချက်ပေးခြင်း၊ အခန်း(၁၄) ဝန်ဆောင်မှုလုပ်ငန်းများ၏အာမခံချက်နှင့်စပ်လျဉ်း၍ စားသုံးသူကတောင်းဆိုနိုင်သည့်အခွင့်အရေးများအကြောင်း၊ အခန်း(၁၅) ကုန်စည် (သို့မဟုတ်) ဝန်ဆောင်မှုလုံခြုံစိတ်ချရမှုများအား  ကျယ်ကျယ်ပြန့်ပြန့်ရှင်းလင်းဆွေးနွေးခဲ့ပါသည်။

     ထို့နောက် ဒု-ဦးစီးမှူး ဒေါ်ခင်သူဇာက စားသုံးသူတိုင်ကြားမှုနှင့်စပ်လျဉ်း၍ လက်ခံဖြေရှင်းဆောင်ရွက်မှုနှင့် အရေးယူမှုဆိုင်ရာညွှန်ကြားချက်အမှတ် (၂/၂၀၂၂) ကို အသေးစိတ်ရှင်းလင်းခဲ့ပြီး တက်ရောက်လာသူများနှင့် အပြန်အလှန်ဆွေးနွေးခဲ့ကြောင်း သိရှိရပါသည်။

DOCA(မကွေး)

     ဧရာဝတီတိုင်းဒေသကြီး၊ ဖျာပုံခရိုင်၊ ကျိုတ်လတ်မြို့နယ်၊ စားသုံးသူရေးရာဦးစီးဌာန၌ (၁၈-၄-၂၀၂၃) ရက်နေ့၊ နံနက် (၀၉:၀၀) နာရီအချိန်တွင် မြို့နယ်တာဝန်ခံ ဦးတင်စိန်သည် ကုန်မျိုးစုံရောင်းချသည့်လုပ်ငန်းရှင်များအား စားသုံးသူကာကွယ်ရေးဥပဒေ ၂၀၁၉ပါ အချက်များကို အသိပညာပေးဟောပြောပွဲပြုလုပ်ခဲ့ပါသည်။

 အဆိုပါဟောပြောပွဲတွင် စားသုံးသူရေးရာဦးစီးဌာနမြို့နယ်တာဝန်ခံက စားသုံးသူကာကွယ်ရေးဥပဒေ ၂၀၁၉ပါ  စီးပွားရေးလုပ်ငန်းရှင်များ၏တာဝန်များ၊ တားမြစ်ချက်များ၊ ကုန်စည်နှင့်စပ်လျဉ်း၍အာမခံပေးမှု၊   ကုန်စည်အပေါ်တာဝန်ရှိမှု၊ ကုန်စည်များတွင် ကုန်အညွှန်းအမှတ်အသားဖော်ပြခြင်းဆိုင်ရာအချက်များကို အသိပညာပေးဟောပြောဆွေးနွေးခဲ့ပြီး တရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီ၏ (၁/၂၀၂၃)ကြိမ်မြောက်လုပ်ငန်းညှိနှိုင်း အစည်းအဝေးဆုံးဖြတ်ချက်အရ Coffee Shop နှင့်  Happy Water Coffee Mix အထုပ်ထဲတွင် မူးယစ်ဆေးဝါးများပါဝင်သည့်အတွက် ဝယ်ယူသုံးစွဲခြင်းမပြုကြရန်နှင့်   ဟောပြောပွဲသို့ ကုန်မျိုးစုံ‌ရောင်းချသူလုပ်ငန်းရှင်( ၇ )ဦးတက်ရောက်ခဲ့ပါသည်။

   ဆက်လက်၍ ကုန်စည်ဝန်ဆောင်မှုနှင့်ပတ်သက်၍ စားသုံးသူများသာမက ကုန်စည်ထုတ်လုပ်ဖြန့်ဖြူးရောင်းချသောလုပ်ငန်းရှင်များပါ စားသုံးသူကာကွယ်ရေးကိစ္စများနှင့်ပတ်သက်၍ သိရှိလိုသည်များကို Call Center (1535) သို့ မေးမြန်းနိုင်ပါကြောင်း အသိပညာပေးဟောပြောခဲ့ပါသည်။

DOCA(ဧရာဝတီ)

   (၂၅-၄-၂၀၂၃) ရက်နေ့တွင် စားသုံးသူရေးရာဦးစီးဌာန၊ မော်လမြိုင်မြို့နယ်တာဝန်ခံနှင့် ဝန်ထမ်းများသည် သူနာပြုသင်တန်းကျောင်းမှ ကျောင်းသား၊ ကျောင်းသူများနှင့်ပူးပေါင်း၍ မော်လမြိုင်မြို့၊ ဈေးကြိုရပ်ကွက်ရှိ ခေတ်ဦးရေသန့်စက်ရုံသို့သွားရောက်၍ ကွင်းဆင်းလေ့လာဆောင်ရွက်ခဲ့ပါသည်။

       ထိုသို့ဆောင်ရွက်ရာတွင် ရေသန့်ထုတ်လုပ်မှုအခြေအနေ၊ လုပ်ငန်းခွင်ဘေးအန္တရာယ်ကင်းရှင်းမှုရှိ/မရှိ၊ သန့်ရှင်းမှုရှိ/မရှိ၊ ကျန်းမာရေးနှင့်ညီညွတ်မှုရှိ/မရှိ၊ သက်ဆိုင်ရာဌာနများ၏ထောက်ခံချက်ရှိ/မရှိ၊ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြချက်နှင့်ကိုက်ညီမှုရှိ/မရှိတို့ကိုစစ်ဆေးခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်က ထုတ်ပြန်ထားသော ၂/၂၀၁၉ ပါ လက်ကမ်းစာစောင်များဖြန့်ဝေပေးခဲ့ကြောင်း သိရှိရပါသည်။

DOCA(မွန်)

   (၂၄-၄-၂၀၂၃) ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး၌ အသစ်ခန့်အပ်သောဝန်ထမ်းများအား ရပ်ကွက်၊ ကျေးရွာ၊ စာသင်ကျောင်းများ၌ စားသုံးသူကာကွယ်ရေးအသိပညာပေးဟောပြောခြင်းတွင် ကိုယ်တိုင်ဟောပြောနိုင်ရေးအတွက် လေ့ကျင့်သင်ကြားပေးခဲ့ပါသည်။

       ပြည်နယ်ဦးစီးမှူးက ဝန်ထမ်းများ၏စွမ်းဆောင်ရည်မြှင့်တင်ရေးအတွက် ယခုကဲ့သို့ လေ့ကျင့်ရခြင်းဖြစ်ကြောင်း၊ ဝန်ထမ်းအဟောင်းများနှင့်အတူ ဝန်ထမ်းအသစ်များပါ မိမိတို့၏စွမ်းဆောင်ရည်မြှင့်မားရေးအတွက် အမြဲတမ်းလေ့ကျင့်နေကြရန်၊ လုပ်ငန်းခွင်၌ ကြိုးစားကြရန်၊ အင်္ဂလိပ်စာ၊ ကွန်ပျူတာဘာသာရပ်များကိုလည်း ကျွမ်းကျင်စွာအသုံးပြုနိုင်ရေးအတွက် ကြိုးစားကြရန်၊ သင်တန်းများတက်ရောက်ရာတွင်လည်း ထူးချွန်အောင် ကြိုးစားကြရန်၊ မိမိတို့ဘာသာရပ်အလိုက် ကျွမ်းကျင်အောင် လေ့ကျင့်ထားကြရန် ပြောကြားခဲ့ပါသည်။     

      ထို့နောက် စားသုံးသူကာကွယ်ရေးအသိပညာပေး Power Point များအား ဒုဦးစီးမှူး ဒေါ်ခင်ကြည်နှင့် အငယ်တန်စာရေး ဒေါ်သဇင်ဖြိုးမြတ်တို့က ပဏာမဟောပြောဆွေးနွေးပြီး အသစ်ခန့်အပ်သောဝန်ထမ်း(၄)ဦးအား အလှည့်ကျလေ့ကျင့်သင်ကြားပေးခဲ့ကြောင်း သိရှိရပါသည်။    

DOCA(မွန်)  

      (၂၄-၄-၂၀၂၃) ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်မြို့နယ်တာဝန်ခံနှင့်ဝန်ထမ်းများသည် မော်လမြိုင်မြို့၊ ဈေးကြိုရပ်ကွက်ရှိ  "ထွန်းတောက်ကြယ်" ဆီစက်လုပ်ငန်းရှင်အား တွေ့ဆုံဆွေးနွေးခဲ့ပါသည်။

      ထို့သို့တွေ့ဆုံဆွေးနွေးခဲ့ရာ ဆီစက်လည်ပတ်မှုအခြေအနေ၊ ကုန်ကြမ်းရရှိမှုအခြေအနေ၊ ကုန်ချောဖြန့်ဖြူးမှုအခြေအနေ၊ ဈေးနှုန်းဈေးကွက်အခြေအနေများ၊ စွန့်ပစ်ပစ္စည်းများအသုံးပြုမှုအခြေအနေတို့အားမေးမြန်းရာ ၎င်းတို့အနေဖြင့် ကုန်ကြမ်း(မြေပဲ)များကို ကရင်ပြည်နယ်၊ မန္တလေး၊ ပုဂံ၊ မကွေးတို့မှ မှာယူရရှိပြီး ကုန်ချောများအား မော်လမြိုင်၊ ဘားအံတို့တွင် ရောင်းချဖြန့်ဖြူးကြောင်း၊ ဈေးနှုန်းအနေဖြင့် မြေပဲဆီ(၁)ပိသာလျှင် (၁၄၀၀၀) ကျပ်ဖြင့်ရောင်းချကြောင်း၊ ထွက်ရှိလာသောစွန့်ပစ်ပစ္စည်းများ၊ မြေပဲဖတ်များအား တိရိစ္ဆာန်အစားအစာအရောင်းဆိုင်များမှ တစ်ပိဿာလျှင် (၃၀၀၀) ကျပ်ဖြင့် လာရောက်ဝယ်ယူကြောင်း သိရှိရပါသည်။

DOCA(မွန်)