သတင်းနှင့် လှုပ်ရှားမှုများ

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင်၊  မော်ကျွန်းမြို့နယ်တာဝန်ခံ ဦးမင်းဇော်လတ်သည် (၁၈-၄-၂၀၂၃) ရက်နေ့၊ နံနက်(၁၁:၀၀)နာရီအချိန်က မော်ကျွန်းမြို့နယ်၊ အထွေထွေအုပ်ချုပ်ရေးဦးစီးဌာန၏ အစည်းအဝေးခန်းမ၌ ရပ်ကျေးအုပ်ချုပ်ရေးမှူးများအား  စားသုံးသူကာကွယ်ရေးဥပဒေနှင့်သိကောင်းစရာများ အသိပညာပေးဟောပြောပွဲပြုလုပ်ဆောင်ရွက်ခဲ့ပါသည်။

       ထိုသို့ဟောပြောပွဲပြုလုပ်ရာတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဦးမင်းဇော်လတ်က ဟောပြောပွဲပြုလုပ်ရခြင်း၏ရည်ရွယ်ချက်နှင့် မိမိတို့ဌာနက လက်ရှိဆောင်ရွက်နေသော လုပ်ငန်းတာဝန်များအား ဦးစွာရှင်းလင်းပြောကြားပြီးနောက် စားသုံးသူကာကွယ်ရေးဥပဒေ ၂၀၁၉ပါ ပြဋ္ဌာန်းချက်များမှ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ ဥပဒေအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ(၄၁)၊ ပုဒ်မခွဲ(ခ)နှင့်(ဂ)တို့ပါ ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲများ၊ ထုတ်လုပ်မှုအမှတ်စဉ်၊ ဘေးထွက်ဆိုးကျိုး (သို့) ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက်များ၊ စားသုံးသူကာကွယ်ရေးဥပဒေများအား ရှင်းလင်းဆွေးနွေးခဲ့ပါသည်။ အဆိုပါဟောပြောပွဲသို့ ရပ်ကျေးအုပ်ချုပ်ရေးမှူး (၁၀၈)ဦးတက်ရောက်ခဲ့ကြောင်း သိရှိရပါသည်။

DOCA(ဧရာဝတီ)

   စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးမှ စစ်ဆေးရေးအရာရှိများသည် သက်ဆိုင်ရာဌာနများမှ ညှိနှိုင်းလာပါက ဈေးကွက်စောင့်ကြည့်စစ်ဆေးဆောင်ရွက်ရာတွင် ပူးပေါင်း ဆောင်ရွက်ခြင်း၊ စားသုံးသူတိုင်ကြားလာသည့်ကုန်စည်များအတွက် သက်ဆိုင်ရာဌာနများနှင့် ညှိနှိုင်း၍ ဈေးကွက်စောင့်ကြည့်စစ်ဆေးခြင်းကိုပူးပေါင်းဆောင်ရွက်ခြင်းများကို ဆောင်ရွက်လျက်ရှိရာ ပဲခူးတိုင်းဒေသကြီး စားသုံးသူရေးရာကော်မတီက ချမှတ်ပေးသည့် ဦးစားပေးကုန်စည် အလိုက် ပုံမှန်ဈေးကွက် စောင့်ကြည့်စစ်ဆေးခြင်းကိုလည်း အပတ်စဉ် ဆောင်ရွက်လျက်ရှိပါသည်။ ဧပြီလ ၁၈ ရက်နေ့ နံနက်ပိုင်းတွင် ရေတာရှည်မြို့နယ်တာဝန်ခံ ဦးဇော်ထွေးသည် ရေတာရှည်မြို့ စည်ပင်သာယာဈေးအတွင်းရှိ ကုန်စုံဆိုင်များတွင်လည်းကောင်း၊ ဧပြီလ ၂၀ ရက်နေ့ နံနက်ပိုင်းတွင် အုတ်တွင်းမြို့နယ်တာဝန်ခံ ဒေါ်အေးအေးခိုင်နှင့် ဝန်ထမ်းများသည် အုတ်တွင်းမြို့ စည်ပင်သာဈေးအတွင်းရှိ ကုန်စုံဆိုင်များတွင်လည်းကောင်း၊ ဧပြီလ ၂၁ ရက်နေ့ နံနက်ပိုင်းတွင် ဖြူးမြို့ စည်ပင်သာယာဈေးအတွင်းရှိ ကုန်စုံဆိုင်များ၌လည်းကောင်း ရောင်းချလျှက်ရှိသည့် အလှ ကုန်ပစ္စည်းများတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် ၂/၂၀၁၉ နှင့်အညီ မြန်မာဘာသာဖြင့်ဖော်ပြရမည့် ကုန်အညွှန်းအမှတ်အသားများ ဖော်ပြထားခြင်းရှိ/မရှိကို ဈေးကွက်စစ်ဆေး ဆောင်ရွက်လျက်ရှိပါသည်။ ဈေးကွက်စစ်ဆေး ဆောင်ရွက်စဉ် စစ်ဆေးရေးအရာရှိများသည် ဆိုင်ပိုင်ရှင်များအား အလှကုန်ပစ္စည်းများအပါအဝင် ကုန်စည်များ၌ မြန်မာဘာသာဖြင့် ကုန်အညွှန်းအမှတ်အသားများဖော်ပြရန် မြန်မာနိုင်ငံစားသုံးသူကာကွယ်ရေးကော်မရှင်က ညွှန်ကြားချက်အမှတ် ၂/၂၀၁၉ ဖြင့် ညွှန်ကြားထားပြီးဖြစ်ပါသဖြင့် မြန်မာဘာသာဖြင့်ဖော်ပြရန် ညွှန်ကြားထားသည့် ကုန်အညွှန်း အမှတ်အသားများ ဖော်ပြခြင်းမရှိသည့် ကုန်စည်များအား ရောင်းချခြင်းမပြုရန် အသိပညာပေး ဆွေးနွေးခဲ့ကြောင်း သိရပါသည်။

DOCA(ပဲခူး)

      စားသုံးသူရေးရာဦးစီးဌာန၊ တောင်ငူခရိုင် ၊ တောင်ငူမြို့နယ်တာဝန်ခံ ဦးစီးမှူး ဦးမြင့်သူသည် ဆည်မြောင်းနှင့်ရေအသုံးချမှု စီမံခန့်ခွဲရေးဦးစီးဌာနမှ တာဝန်ရှိသူများနှင့်အတူ ဧပြီလ ၁၉ ရက်နေ့ နံနက်ပိုင်းက တောင်ငူမြို့နယ် ဆိပ်ဖူးတောင်ကျေးရွာ ဓမ္မာရုံ၌ ကျေးရွာမှ တောင်သူ လယ်သမားကြီးများနှင့်တွေ့ဆုံပြီး သက်ဆိုင်ရာဌာနများအလိုက် ကျေးရွာလူထု သိသင့်သိထိုက် သည်များကို ဆွေးနွေးပြောကြားပါသည်။

  စားသုံးသူရေးရာဦးစီးဌာန မြို့နယ်တာဝန်ခံက စားသုံးသူရေးရာဦးစီးဌာန ပေါ်ပေါက်လာပုံ၊ စားသုံးသူအခွင့်အရေးနှင့်တာဝန်များ၊ စားသုံးသူရေးရာဦးစီးဌာန၏ ဆောင်ရွက်ချက်များ၊ တောင်သူလယ်သမားကြီးများအပါအဝင် ကျေးရွာနေပြည်သူအားလုံး မိမိတို့ဝယ်ယူသုံးစွဲသည့် ကုန်စည် (သို့မဟုတ်) ဝန်ဆောင်မှုများကြောင့် နစ်နာဆုံးရှုံးမှုများရှိခဲ့လျှင် စားသုံးသူရေးရာဦးစီးဌာန သက်ဆိုင်ရာ တိုင်းဒေသကြီး/ပြည်နယ်ဦးစီးမှူးရုံးများ၊ ခရိုင်ဦးစီးမှူးရုံးများသို့ဖြစ်စေ၊ စားသုံးသူရေးရာဦးစီးဌာန၏ website ဖြစ်သော www.doca.gov.mm သို့ဝင်ရောက်၍ တိုင်ကြားမှုပုံစံများ ဖြည့်စွက်၍ဖြစ်စေ တိုင်ကြားနိုင်ခြင်းများကို ရှင်းလင်းပြောကြားခဲ့ပါသည်။

   တွေ့ဆုံဆွေးနွေးပွဲသို့ ဆိပ်ဖူးတောင်ကျေးရွာမှ တောင်သူလယ်သမား ၁၂ ဦး တက်ရောက်ကြောင်းနှင့် တက်ရောက်သူများ၏ မေးမြန်းချက်များကို သက်ဆိုင်ရာတာဝန်ရှိသူများက ရှင်းလင်းဖြေကြားခဲ့ကြောင်း သိရပါသည်။

DOCA(ပဲခူး)

    စားသုံးသူရေးရာဦးစီးဌာန၊ ပဲခူးတိုင်း‌ဒေသကြီး၊ သာယာဝတီခရိုင်၊ လက်ပံတန်းမြို့နယ် စည်ပင်သာယာမြို့မစျေးအတွင်း ရောင်းချနေသော မုန့်မျိုးစုံရောင်းဝယ်ရေးဆိုင်များတွင် ကုန်အညွှန်း အမှတ်အသားများ ပြည့်စုံစွာ ဖော်ပြခြင်းရှိ /မရှိကို ၂၀၂၃ခုနှစ် ၊ မတ်လ၂၀ရက်နေ့ ၊ နံနက် (၁၀ : ၀၀)နာရီ အချိန် တွင် ခရိုင်ဦးစီးမှူး ဦးအောင်သိန်းနှင့်(စားသုံး/ ထုတ်လုံ)တာဝန်ခံ‌‌‌ ဒေါ်ခိုင်ခိုင်ရီ ၊ မြို့နယ်တာဝန်ခံ ဦးချစ်ကိုကို၊ မြို့နယ်ကျန်းမာရေးမှူး ဦးဇော်မင်းထိုက်  ၊ တိရစ္ဆာန်မွေးမြူရေးနှင့် ကုသရေးဦးစီးဌာနမှ ဒေါက်တာစိုးမိုးဝင်း ၊ စျေးတာဝန်ခံဦးတိုးအောင်နှင့် စည်ပင်သာယာ‌ရေးအဖွဲ့များ ပူးပေါင်း၍ စျေးကွက်စောင့်ကြည့် စစ်ဆေးခဲ့ပါသည်။

   စားသုံးသူပြည်သူများအနေဖြင့် ကုန်စည်များဝယ်ယူအသုံးပြုရာတွင် ဘေးအန္တရာယ်ကင်းရှင်းရေး၊ လုံခြုံစိတ်ချရမှုရှိစေရေးတို့အတွက် ရည်ရွယ်၍ စားသုံးသူကာကွယ်‌ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ပြည့်စုံစွာဖော်ပြခြင်း ရှိ/မရှိ စျေးကွက်စောင့်ကြည့် စစ်ဆေးခဲ့ပြီး လက်ကမ်းစာစောင်များဖြန့်ဝေခဲ့ပါကြောင်း သိရှိရသည် ။

DOCA(ပဲခူး)

    စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ မြန်အောင်ခရိုင်၊ မြန်အောင်မြို့ ဒု-ခရိုင် ဦးစီးမှူးသည် (၂၀.၄.၂၀၂၃)ရက်နေ့ နံနက်(၁၀:၀၀)နာရီအချိန်တွင်  အထွေထွေအုပ်ချုပ်ရေးဦးစီးဌာန၏ အစည်းအဝေးခန်းမ၌ ဆီစက်လုပ်ငန်းရှင်(၁၀)ဦးအား စားသုံးသူကာကွယ်ရေး အသိပညာပေးဟောပြောခြင်းကို ဆောင်ရွက်ခဲ့ပါသည်။

  ဟောပြောပွဲတွင် ဒု-ခရိုင်ဦးစီးမှူးက စားသုံးသူများဘေးအန္တရာယ်ကင်းရှင်းစေရန်အတွက် ဈေးကွက်အတွင်းရောင်းချနေသော ကုန်စည်များပေါ်တွင် ကုန်အညွှန်းအမှတ်အသား ပြည့်စုံမှန်ကန် တိကျစွာဖော်ပြနိုင်ရေး ဦးစားပေးဆောင်ရွက်ရန်၊ စီးပွားရေးလုပ်ငန်းရှင်အနေဖြင့်လည်း မိမိတို့ ကုန်စည်အပေါ် အာမခံချက်ပေးနိုင်ရန်နှင့် စားသုံးသူကာကွယ်ရေးဥပဒေများအကြောင်း၊  စားသုံးသူ အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ စားသုံးသူရေးရာဦးစီးဌာနမှ လက်ရှိဆောင်ရွက်နေ့သည့် လှုပ်ရှားမှုအခန်းကဏ္ဍများ၊ စားသုံးသူသတင်းပြန်ကြားရေးနှင့်တိုင်ကြားမှု လက်ခံဆောင်ရွက်ရေးစင်တာ (CICC) ရုံးခန်းများ ဖွင့်လှစ်ထားရှိမှု အခြေအနေတို့ကိုလည်းကောင်း အသိပညာပေးဟောပြောခဲ့ပြီး တက်ရောက်လာသူများမှလည်း သိလိုသည်များကို မေးမြန်း၍ စားသုံးသူကာကွယ်ရေး ဥပဒေစာအုပ်နှင့် လက်ကမ်းစာစောင်များကို ဖြန့်ဝေပေးခဲ့ကြကြောင်း သိရှိရပါသည်။

DOCA(ဧရာဝတီ)