သတင်းနှင့် လှုပ်ရှားမှုများ

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ပပို့ကုန်တိုးမြှင့်တင်ပို့မှုဆိုင်ရာ ပေါင်းစပ်ညှိနှိုင်းရေးအဖွဲ့ (Export Promotion Task Force) ၊ စားသုံးသူရေးရာဦးစီးဌာန၊ ညွှန်ကြား ရေးမှူးချုပ် ဦးမြင့်ချို ဦးဆောင်၍ မြန်မာ့ကုန်သွယ်မှုမြှင့်တင်ရေးအဖွဲ့မှ ညွှန်ကြားရေးမှူးချုပ် ဒေါ်နော်မူတာကပေါနှင့် မူပိုင်ခွင့်ဦးစီးဌာနမှ ညွှန်ကြားရေးမှူးချုပ် ဒေါက်တာမိုးမိုးသွယ် တို့မှလိုက် ပါ၍ (၁၁.၆.၂၀၂၃) ရက်နေ့တွင် ပအိုဝ်းကိုယ်ပိုင်အုပ်ချုပ်ခွင့်ရဒေသ၊ စီမံအုပ်ချုပ်ရေးအဖွဲ့ အစည်းအဝေးခန်းမတွင် ပွဲရုံလုပ်ငန်းရှင်များ၊ ဆန်အစုအဖွဲ့၊ ပြောင်းအစုအဖွဲ့၊ အာလူးအစုအဖွဲ့၊ ထောပတ်အစုအဖွဲ့၊ ပင်မှည့်အစုအဖွဲ့၊ ငရုတ်သီးအစုအဖွဲ့၊ နာနတ်အစုအဖွဲ့၊ ကော်ဖီအစုအဖွဲ့များနှင့် တွေ့ဆုံ ဆွေးနွေးခဲ့ပါသည်။

    Task Force အဖွဲ့မှ အဖွဲ့၏ လုပ်ငန်းဆောင်ရွက်မှုများကို ရှင်းလင်းဆွေးနွေးခြင်း၊ ဒေသခံလုပ်ငန်းရှင်များ၊ အသင်းအဖွဲ့၊ အစုအဖွဲ့များမှ လုပ်ငန်းလိုအပ်ချက်များ၊ အခက်အခဲများကို တင်ပြခဲ့ကြပြီး တာဝန်ရှိသူများမှ ပြန်လည်ညှိနှိုင်းပေါင်းစပ်ဆောင်ရွက်ခဲ့ပါသည်။ ဆက်လက်၍ အဖွဲ့ဝင်များသည် ဟိုပုံးမြို့ရှိ Coffee Neo စက်ရုံလုပ်ငန်းဆောင်ရွက်နေမှုများနှင့် စိုက်ပျိုးထုတ်လုပ်မှု အခြေအနေများကို ကွင်းဆင်းလေ့လာခဲ့ကြောင်း သိရှိရပါသည်။

DOCA(ရှမ်း)

    ၂၀၂၃ ခုနှစ်၊ ဇွန်လ ၈ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံး၌ ဝန်ထမ်းများအတွက် စွမ်းဆောင်ရည်မြှင့်တင်ရေးအထောက်အကူပြု Thursday Talk ကျင်းပပြုလုပ်ခဲ့ရာ ပြည်နယ်ရုံးနှင့် မော်လမြိုင်ခရိုင်ရုံးမှ ဝန်ထမ်းများ စုစုပေါင်း (၂၈) ဦး တက်ရောက်ခဲ့သည်။

     ပထမဦးစွာ စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးက Thursday Talk ကျင်းပပြုလုပ်ရခြင်း၏ ရည်ရွယ်ချက်ကိုရှင်းလင်းဆွေးနွေးခဲ့ရာ Thursday Talk တွင် ဝန်ထမ်းများ Capacity ပြည့်ဝစေရန်၊ ဝန်ထမ်းများအနေဖြင့် ဆွေးနွေးပွဲများ၊ သင်တန်းများမှ ရရှိလာသည့် ဗဟုသုတများကို အခြားဝန်ထမ်းများသို့ ပြန်လည်မျှဝေပေးရန် စသည်တို့ကို ရှင်းလင်းဆွေးနွေးခဲ့သည်။

   ထို့နောက်  မူဝါဒလေ့လာရေးနှင့်စီမံကိန်းစာရင်းအင်းဌာနခွဲမှ တာဝန်ခံဒေါ်ခင်မြတ်ကျော်က စားသုံးသူရေးရာဦးစီးဌာန၏ မူဝါဒများအကြောင်းနှင့်ပတ်သက်၍ လည်ကောင်း၊ ထုတ်ကုန်လုံခြုံစိတ်ချရမှုဌာနခွဲမှ အကြီးတန်းစာရေး ဦးကျော်စည်သူသွင်က ကုန်အညွှန်းအမှတ်အသားဖော်ပြခြင်းဆိုင်ရာ သိကောင်းစရာနှင့်ပတ်သက်၍လည်းကောင်း၊ စီမံရေးရာဌာနခွဲမှ  အကြီးတန်းစာရေး ဦးနိုင်လင်းထက်က  Market Segmentation နှင့်ပတ်သတ်၍လည်းကောင်း၊ သတင်းအချက်အလက်နည်းပညာနှင့်သုတေသန ဌာနခွဲမှ အငယ်တန်းစာရေး ဒေါ်ယွန်းမီမီဖူးဝေက စားသုံးသူရေးရာဦးစီးဌာနမှ လွှင့်တင်လျက်ရှိသော Website၊ Mobile Application နှင့်ပတ်သက်၍ သိကောင်းစရာများအား ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မွန်)

    မွန်ပြည်နယ်၊ ဘီးလင်းမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံရုံးမှ မြို့နယ်တာဝန်ခံနှင့် ဝန်ထမ်းများသည် (၆.၆.၂၀၂၃) ရက်နေ့တွင် ဘီးလင်းမြို့နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့ ပူးပေါင်း၍ ပြန်ကြားရေးနှင့်ပြည်သူ့ဆက်ဆံရေးဦးစီးဌာန (ဘီးလင်း) ခန်းမတွင် အွန်လိုင်းရောင်းဝယ်မှုဆိုင်ရာ စားသုံးသူအသိပညာပေး (Talk Show) ပြုလုပ်၍ ဟောပြောဆွေးနွေးခဲ့ကြောင်း သိရပါသည်။

    အဆိုပါ ဆွေးနွေးပွဲတွင် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန (ဘီးလင်း)မှ မြို့နယ်ဦးစီးမှူး ဒေါ်အေးမျိုးမျိုးစံ (ဦးစီးအရာရှိ)မှ အွန်လိုင်းရောင်းဝယ်မှုဆိုင်ရာ စားသုံးသူအသိပညာပေးအကြောင်း သိလိုသည်များကို မေးမြန်းခဲ့ရာတွင် ဘီးလင်းမြို့နယ်တာဝန်ခံ ဒေါ်ဇင်ဖြူဝင်း (ဦးစီးမှူး)မှ စားသုံးသူရေးရာဦးစီးဌာနအနေဖြင့် စားသုံးသူအသိပညာပေး လုပ်ငန်းများကို ကျယ်ကျယ်ပြန့်ပြန့်ဆောင်ရွက်လျက်ရှိကြောင်း၊ စားသုံးသူအနေဖြင့် ကုန်စည် (သို့မဟုတ်) ဝန်ဆောင်မှုများကို ဝယ်ယူသုံးစွဲရာတွင် နစ်နာဆုံးရှုံးမှုမရှိစေရေးနှင့် နစ်နာဆုံးရှုံးမှု ရှိလာပါက ရှင်းလင်းတင်ပြခွင့်၊ တိုင်ကြားခွင့်နှင့် ကုစားခွင့်နည်းလမ်းများရှိကြောင်း ပြောကြားပြီးနောက် ယခုအခါတွင် စားသုံးသူများသည် ကုန်စည်နှင့် ဝန်ဆောင်မှုများကို Internet၊ website၊ Application (သို့မဟုတ်) Social Media များတွင် ဝယ်ယူသုံးစွဲနေသည်ကို တွေ့ရှိရကြောင်း၊ စားသုံးသူများ ဝယ်ယူသုံးစွဲရာတွင် ထိခိုက်နစ်နာမှုမရှိစေရေးအတွက် Online Shopping မှတ်ပုံတင်စနစ် ပြုလုပ်နိုင်ရန် အကောင်အထည်ဖော်ဆောင်ရွက်လျက်ရှိကြောင်းနှင့် e-commerce guide line နှင့် e-commerce ဥပဒေ အမြန်ဆုံးထွက်ရှိနိုင်ရန် ဌာနမှစီစဉ်ဆောင်ရွက်လျက်ရှိကြောင်း ဆွေးနွေးခဲ့ပြီး ဒုတိယဦးစီးမှူး ဒေါ်နော်အေးမို့မို့မှ Online Shopping နှင့်ပတ်သက်၍ ဝယ်ယူခြင်းမပြုမီ သတိပြုရမည့်အချက် (၇) ချက်နှင့် စားသုံးသူပြည်သူများအနေဖြင့် ကုန်စည်နှင့်ဝန်ဆောင်မှုများ ဝယ်ယူသုံးစွဲခြင်းကြောင့် ထိခိုက်နစ်နာမှုဖြစ်ပေါ်လာပါက တိုင်ကြားနိုင်သည့် နည်းလမ်း (၅) ခုအား ရှင်းလင်းဆွေးနွေးခဲ့ကြောင်း သတင်းရရှိသည်။

DOCA(မွန်)

    ၂၀၂၃ ခုနှစ် မိုးရာသီသစ်ပင်စိုက်ပျိုးပွဲအခမ်းအနားကို ဇွန်လ ၃ ရက်နေ့ နံနက်ပိုင်းတွင် မွန်ပြည်နယ် မော်လမြိုင်မြို့အခြေခံပညာအထက်တန်းကျောင်းခွဲ အ.လ.က (၆) ကျောင်းဝင်းအတွင်း၌ ကျင်းပပြုလုပ်ခဲ့ရာ           အဆိုပါအခမ်းအနားသို့ မွန်ပြည်နယ် ဝန်ကြီးချုပ်၊ အရှေ့တောင်တိုင်းစစ်ဌာနချုပ် တိုင်းမှူး၊ မွန်ပြည်နယ် အစိုးရအဖွဲ့ဝင်များ၊ မွန်ပြည်နယ်စားသုံးသူရေးရာ ဦးစီးဌာန၊ ပြည်နယ်ဦးစီးမှူးအပါအဝင် ပြည်နယ်အဆင့်ဌာနဆိုင်ရာများ၊ အမျိုးသမီးရေးရာအဖွဲ့၊ ကြက်ခြေနီ တပ်ဖွဲ့ဝင်များ၊ မီးသတ်တပ်ဖွဲ့များနှင့် လူမှုရေးအဖွဲ့အစည်းများမှ သစ်ပင် ၁၀၁၂ ပင်ကို စိုက်ပျိုးခဲ့ကြသည်။

 ရှေးဦးစွာ ပြည်နယ်ဝန်ကြီးချုပ် ဦးအောင်ကြည်သိန်းက “သက်ရှိလောကတည်မြဲဖို့ သစ်ပင်စိုက်ပျိုးကြပါစို့” ဆိုသည့်ဆောင်ပုဒ်အတိုင်း လူသားတွေအပါအဝင် သက်ရှိအားလုံး ရှင်သန်ရပ်တည်နိုင်ရေးအတွက် သစ်ပင်တွေစိုက်ပျိုးဖို့ သစ်တောတွေကို ထိန်းသိမ်းဖို့ စဉ်ဆက်မပြတ် ဆောင်ရွက်ကြရမှာဖြစ်ကြောင်း၊ ယခုကျင်းပသော သစ်ပင်စိုက်ပျိုးပွဲတော်တွင် အဖိုးတန်သစ်မျိုးများ၊ ရာသီအလိုက်ဖူးပွင့်နိုင်တဲ့အပင်များ၊ အရိပ်ရသစ်မျိုးများ စသည့်အပင်အမျိုးမျိုးကို စနစ်တကျ စိုက်ပျိုးသွားမှာဖြစ်၍ စိုက်ပျိုးရေးနှင့်သဘာဝဒီရေတောများ ကာကွယ်ရေးလုပ်ငန်းစဉ်များကို အမျိုးသားရေးတာဝန်တစ်ရပ်အနေဖြင့် ပြည်သူများပူးပေါင်း ပါဝင်ဆောင်ရွက်ကြပါစေလိုကြောင်း ပြောကြားခဲ့ကြောင်း သိရှိရပါသည်။

    ယခုလို မိုးရာသီကာလတွင် သစ်ပင်အမျိုးမျိုးတို့ကို စိမ်းလန်းစိုပြည်ရေး၊ သစ်တောပြုန်းတီးမှုများကို ပြန်လည်အစားထိုးနိုင်ရေး၊ ဂေဟစနစ်ပြောင်းလဲမှုများကို ပြုပြင်ထိန်းသိမ်း ဆောင်ရွက်နိုင်ရေးစသည့် ရည်ရွယ်ချက်များဖြင့် သစ်ပင်စိုက်ပျိုးပွဲကို ကျင်းပပြုလုပ်ရခြင်းဖြစ်ကြောင်း သိရှိရပါသည်။

DOCA(မွန်)

    မွန်ပြည်နယ်၊ မော်လမြိုင်မြို့၊ သူနာပြုသင်တန်းကျောင်း အပတ်စဉ် (၄၇) ၏ဦးဆောင်း၊ ဝတ်စုံအပ်နှင်းပွဲအခမ်းအနားကို ၂၀၂၃ ခုနှစ် ဇွန်လ (၈) ရက်နေ့ နံနက်ပိုင်း (၈:၀၀) နာရီအချိန်တွင် သူနာပြုသင်တန်းကျောင်းခန်းမ၌ ကျင်းပရာ မွန်ပြည်နယ်ဝန်ကြီးချုပ် ၊ အရှေ့တောင်တိုင်းစစ်ဌာနချုပ် တိုင်းမှူး၊ ပြည်နယ်တရားလွှတ်တော် တရားသူကြီးချုပ်၊ ပြည်နယ်အစိုးရအဖွဲ့ဝင်ဝန်ကြီးများ၊ ပြည်နယ်ပြည်သူ့ကျန်းမာရေးနှင့် ကုသရေးဦးစီးဌာန၊ စားသုံးသူရေးရာဦးစီးဌာန၊ မွန်ပြည်နယ် ဦးစီးမှူးအပါအဝင် ပြည်နယ်အဆင့်ဌာနဆိုင်ရာများ၊ သူနာပြုဆရာမများ၊ သင်တန်းသား/သူများ တက်ရောက်ခဲ့ပါသည်။

   ထို့နောက်အခမ်းအနားတွင် မွန်ပြည်နယ်ဝန်ကြီးချုပ် ဦးအောင်ကြည်သိန်းက မျိုးဆက်သစ် သူနာပြုသင်တန်းသား/သူ (၄၄) ဦးကို သူနာပြုအမှတ်အသားဖြစ်သည့် ဦးဆောင်း၊ ဝတ်စုံအပ်နှင်းပွဲ ဖြစ်သည့်အတွက် သင်တန်းကျောင်း၏ မင်္ဂလာရှိသည့် အခမ်းအနားတစ်ခုဖြစ်ပါကြောင်း၊ ခေတ်နှင့်အညီ ဖွံ့ဖြိုးတိုးတက်သော နိုင်ငံတော်ဖြစ်အောင် ကြိုးပမ်းဆောင်ရွက်ရာတွင် ကျန်းမာရေးကဏ္ဍသည်လည်း အပါဝင်ဖြစ်ပါကြောင်း၊ စဉ်ဆက်မပြတ်တိုးတက်နေသောခေတ်နှင့်အညီ ရင်ဘောင်တန်းပြီး နိုင်ငံတော်က ချီးမြှင့်လမ်းဖွင့်ပေးထားသည့် သူနာပြုပညာရေးသိပ္ပံဘွဲ့၊ မဟာဘွဲ့၊ ပါရဂူဘွဲ့များကိုလည်း ဆက်လက်ဆည်းပူးသွားကြရန်ဖြစ်ကြောင်း တိုက်တွန်းမှာကြားခဲ့သည်။

  ဆက်လက်၍ သူနာပြုသင်တန်းကျောင်း၊ ကျောင်းအုပ်ကြီးမှ  ကျေးဇူးတင်စကားပြောကြားပြီး အပတ်စဉ် (၄၇) သူနာပြုသင်တန်းသား/သူများအား တာဝန်ရှိသူများက ဦးဆောင်းနှင့်ဝတ်စုံကို ချီးမြှင့်ခဲ့ရာ သူနာပြုသင်တန်းသား/သူများက “ဂရုဏာအလင်း” သီချင်းဖြင့်သီဆိုဖျော်ဖြေနေမှုကို မွန်ပြည်နယ်ဝန်ကြီးချုပ်၊ တိုင်းမှူးနှင့်တာဝန်ရှိသူများက ကြည့်ရှုအားပေးခဲ့ကြောင်း သိရှိရပါသည်။

DOCA(မွန်)