သတင်းနှင့် လှုပ်ရှားမှုများ

  ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်အတွင်း ရောင်းချလျက်ရှိသော ဆေးနှင့်ဆေးပစ္စည်းအရောင်းဆိုင်များအား အစားအသောက်နှင့်ဆေးဝါးကွပ်ကဲရေးဦးစီးဌာန FDA၊ မြန်မာနိုင်ငံရဲတပ်ဖွဲ့၊ မြို့နယ်အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့၊ ကျန်းမာရေးဦးစီးဌာန၊ စားသုံးသူရေးရာဦးစီးဌာနတို့နှင့်အတူ (၇.၄.၂၀၂၃) ရက်နေ့၊ နံနက် (၀၈:၃၀) မှ (၁၀:၀၀) နာရီအချိန်အထိ ဆေးဆိုင်(၅)ဆိုင်သို့သွားရောက်၍ ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ကြပါသည်။

   ကွင်းဆင်းစစ်ဆေးရာတွင် ဓနုဖြူမြို့နယ်ဦးစီးမှူးရုံးမှ မြို့နယ်ဦးစီးမှူး ဦးဝင်းမင်းစိုးနှင့် ဝန်ထမ်းများသည် ပူးပေါင်းအဖွဲ့နှင့်အတူ ဓနုဖြူမြို့ပေါ်ရှိ ဆေးဝါး‌အရောင်းဆိုင်များမှ ရောင်းချသောဆေးဝါးများတွင် FDAဌာန၏ ထောက်ခံချက်မပါရှိသောဆေးဝါးများ၊ သက်တမ်းလွန်ဆေးဝါးများ ဈေးကွက်အတွင်း ရောင်းချခြင်း ရှိ/မရှိနှင့် စားသုံးသူကာကွယ်ရေးဥပဒေ(၂၀၁၉ )ပါ အခန်း(၁၈) ကုန်အညွှန်းအမှတ်အသား ဖော်ပြ ပါဝင်မှု ရှိ/ မရှိကို စစ်ဆေးခဲ့ကြပါသည်။ ဓနုဖြူမြို့နယ်အတွင်း ဖွင့်လှစ်ရောင်းချနေသော ဆေးဆိုင်များတွင် စံမမီဆေးဝါးများ၊ သက်တမ်းလွန်ဆေးများ၊ ထောက်ခံချက်မပါရှိသောဆေးများ၊ ကုန်အညွှန်းအမှတ် အသား ပြည်စုံစွာမပါဝင်သောဆေးများ ရောင်းချမှုမရှိကြောင်း တွေ့ရှိရပါသည်။ လုပ်ငန်းရှင်များအား သက်ဆိုင်ရာဌာနများမှလည်း ဆေးဝါးရောင်းချမှုနှင့် ပတ်သက်၍ အသိပညာပေးရှင်းလင်းစစ်ဆေးခဲ့ကြောင်း သိရပါသည်။

DOCA(ဧရာဝတီ)

    (၇.၄.၂၀၂၃) ရက်နေ့၊ (၁၀:၀၀) နာရီအချိန်တွင် ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ ပန်းတနော်မြို့နယ်တာဝန်ခံရုံးမှ မြို့နယ်တာဝန်ခံ ဦးပိုးဖြူပိုင်မင်းနှင့် ဝန်ထမ်းများသည် ပန်းတနော်မြို့ရှိ စက်သုံးဆီအရောင်းဆိုင်(၉)ဆိုင်သို့ ကွင်းဆင်း၍  စစ်ဆေးဆောင်ရွက်ခဲ့ကြပါသည်။

    ထိုသို့ ကွင်းဆင်းစစ်ဆေးရာတွင် စက်သုံးဆီရောင်းချသည့်လုပ်ငန်းရှင်များအား စက်သုံးဆီတင်သွင်း၊ သိုလှောင်၊ ဖြန့်ဖြူးရောင်းချခြင်း လုပ်ငန်းကြီးကြပ်ရေးကော်မတီက သတ်မှတ်ထားသော ရည်ညွှန်းဈေးများအတိုင်းရောင်းချခြင်း ရှိ/ မရှိနှင့် စက်သုံးဆီဆိုင်များတွင် LED ဆိုင်းဘုတ်တပ်ဆင်၍ ရောင်းချခြင်း ရှိ/ မရှိတို့ကို ဆီဆိုင်များစစ်ဆေးရာ ယနေ့ရောင်းချလျက်ရှိသော စက်သုံးဆီဈေးနှုန်း ဓါတ်ဆီ 92 တစ်ဂါလံ လက်ကားဈေး(၉၇၂၈)ကျပ်၊ လက်လီဈေး(၉၇၂၈)ကျပ်ဖြင့်လည်းကောင်း၊ ဒီဇယ် တစ်ဂါလံဈေး(၉၅၂၃) ဖြင့် ရောင်းချလျက်ရှိကြောင်း ယနေ့(၄.၄.၂၀၂၃) ရက်နေ့ ရည်ညွှန်းဈေးအနေဖြင့် (92)Ron တစ်လီတာ ဈေး(၂၂၈၅)ကျပ်၊ (95)Ron တစ်လီတာဈေး(၂၃၄၀)ကျပ်၊ HSD(500)ppm (၂၁၉၅)ကျပ်၊ ဖြင့်သာ ရောင်းချ လျက်ရှိပါကြောင်း၊ ရည်ညွှန်းဈေးထက်ပိုမို၍ ရောင်းချပါက သက်ဆိုင်ရာဌာနတို့၏ လုပ်ထုံးလုပ်နည်း ဥပဒေများအတိုင်း အရေးယူဆောင်ရွက်သွားမည် ဖြစ်ကြောင်း၊ မိမိတို့ဒေသတွင်း ဆီပြတ်လပ်မှုမရှိစေရေးအတွက် ကုမ္ပဏီများက မှာယူထားသော စက်သုံးဆီဘောက်စာကားများ ကြန်ကြာမှုမရှိစေရေး အချိန်မီရောက်ရှိစေရေးတို့ကို သက်ဆိုင်ရာဌာနများနှင့် ပူးပေါင်းကူညီချိတ်ဆက်ဆောင်ရွက်ရန်နှင့် မိမိတို့ရောင်း ချနေသော ကုန်စည်များ အလေး၊ အချိန်အတွယ်ပြည်ဝစွာရောင်းချကြရန် ဆီဆိုင်လုပ်ငန်းရှင်များသိရှိလိုသည်များကို ရှင်းလင်းဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၊ ခရိုင်ဦးစီးမှူးတို့၏လမ်းညွှန်မှုဖြင့်  ကျွန်းလှမြို့နယ်တာဝန်ခံ(အကြီးတန်းစာရေး) ဒေါ်ဝေဝေအောင်သည် (၁၈.၄.၂၀၂၃)ရက်နေ့၊ နံနက် (၀၉:၀၀)နာရီ အချိန်တွင်  ကျွန်းလှမြို့ပေါ်ရှိ  လျှပ်စစ်ဓါတ်အားဖြန့်ဖြူးရေး လုပ်ငန်းမှ ဝန်ထမ်းများအား တွေ့ဆုံ၍ စားသုံးသူကာကွယ်ရေး အသိပညာပေးဟောပြောပွဲ ကျင်းပခဲ့ပါသည်။

          အဆိုပါ ဟောပြောပွဲတွင် လျှပ်စစ်ဓါတ်အားဖြန့်ဖြူးရေးလုပ်ငန်းမှ ဝန်ထမ်းများအား ကျွန်းလှမြို့နယ်တာဝန်ခံ ဒေါ်ဝေဝေအောင်က စာသုံးသူရေးရာဦးစီးဌာန ဖြစ်ပေါ်လာပုံ ၊ စားသုံးသူရေးရာ ဦးစီးဌာန၏ မျှော်မှန်းချက်၊ ရည်မှန်းချက်၊ စားသုံးသူအကာကွယ်ပေးရေး ဥပဒေပါ စားသုံးသူ၏အဓိပ္ပါယ် ဖွင့်ဆိုချက် စားသုံသူအခွင့်အရေး(၈)ချက်နှင့် စားသုံးသူတို့၏တာဝန်များ၊  စီးပွားရေးလုပ်ငန်းရှင်၏ အဓိပ္ပါယ်ဖွင့်ဆိုချက်များ ၊ စီးပွားရေးလုပ်ငန်းရှင်၏တာဝန်များနှင့် လိုက်နာရမည့်အချက်များ၊ ဥပဒေ အခန်း(၁၈)ပါ ကုန်အညွှန်း အမှတ်အသား ဖေါ်ပြခြင်းနှင့် စပ်လျဉ်း၍ မြန်မာနိုင်ငံစားသုံးသူ ကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့်အညီ ပြည့်စုံစွာ ထည့်သွင်းဖော်ပြ၍  ထုတ်လုပ်ဖြန့်ဖြူးသည့် ကုန်ပစ္စည်းများကိုသာ ဝယ်ယူသုံးစွဲကြရန် ၊ ကုန်စည် ထုတ်လုပ်သည့် စီးပွားရေး လုပ်ငန်းရှင်များအနေဖြင့် ကုန်အညွှန်းအမှတ်အသားနှင့် ပတ်သက်၍ ဌာန၏အတည်ပြုချက် ရယူနိုင်ရေး ဆောင်ရွက်ကြရန်နှင့်  စားသုံးသူနစ်နာဆုံးရှုံးမှုရှိလျှင် တိုင်ကြားနိုင်ပါကြောင်း ၊ တိုင်ကြားနိုင်သည့် နေရာများဖြစ်သည့် Facebook Page တွင် DOCA Myanmar Page တွင်လည်းကောင်း ၊ မိမိတို့ ဌာနခရိုင်ဦးစီးမှူးရုံး စားသုံးသူသတင်းပြန်ကြားရေးနှင့် စားသုံးသူတိုင်ကြားမှု လက်ခံဆောင်ရွက်ရေး စင်တာ(CICC) တွင်လည်းကောင်း ၊ မိမိတို့ဌာန Website  ဖြစ်သည့် www.doca.gov.mm တွင် လည်းကောင်း ၊ MPT ၊mytel ၊  Telenor ၊  Oredoo  စသည့်  SIM Card များဖြင့်လည်း Call Center No. 1535 တို့တွင် တိုင်ကြားနိုင်ပါကြောင်း လျှပ်စစ်ဓါတ်အားဖြန့်ဖြူးရေးလုပ်ငန်းမှ ဝန်ထမ်း(၈)ဦးတို့အား အကျယ်တဝင့် ရှင်းလင်းဆွေးနွေးခဲ့ပြီး လက်ကမ်းစာစောင်များအား ဖြန့်ဝေပေးခဲ့ကြောင်း သတင်းရရှိ ပါသည်။

DOCA(စစ်ကိုင်း)

     စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံး၊ အစည်းအဝေးခန်းမ၌ (၆.၄.၂၀၂၃)ရက်နေ့၊ နေ့လယ် (၁၄:၀၀)နာရီအချိန်တွင် ဝန်ထမ်းများစွမ်းဆောင်ရည်မြင့်မားစေရန် ရည်ရွယ်၍ (၃/၂၀၂၃)ကြိမ်မြောက် Thursday Talk ဝန်ထမ်းစွမ်းဆောင်ရည်မြှင့်တင်ရေး အထောက်အကူပြု အသိပညာပေးဟောပြောဆွေးနွေးပွဲကို ကျင်းပပြုလုပ်ခဲ့ရာ ဝန်ထမ်း(၈) ဦးတက်ရောက်ခဲ့ပါသည်။

     အဆိုပါ Thursday Talk ဝန်ထမ်းစွမ်းဆောင်ရည်မြှင့်တင်ရေး အထောက်အကူပြု အသိပညာပေးဟောပြောဆွေးနွေးပွဲတွင် ဒု-ခရိုင်ဦးစီးမှူးဒေါ်နှင်းနှင်းခိုင်က နိုင်ငံ့စီးပွားမြှင့်တင်ရေးအတွက် အသေးစားအငယ်စားနှင့် အလတ်စားစီးပွားရေးလုပ်ငန်းများ ဖွံ့ဖြိုးတိုးတက်အောင် ဆောင်ရွက်လျက်ရှိရာ စီးပွားရေးလုပ်ငန်းရှင်များထုတ်လုပ်သည့် ကုန်စည်များတွင် ကုန်အညွှန်းအမှတ်အသားများ ထည့်သွင်းဖော်ပြရန် ဌာနမှ ကူညီဆောင်ရွက်ပေးလျက်ရှိသဖြင့် ဝန်ထမ်းများအားလုံး သိရှိထားရန် လိုအပ်ကြောင်း၊  စားသုံးသူရေးရာဦးစီးဌာန၏ လုပ်ငန်းစဉ်ဖြစ်သည့် စားသုံးသူပြည်သူများအား စားသုံးသူကာကွယ်ပေးရေးအသိပညာပေး ဟောပြောပွဲများ ဆောင်ရွက်လျက်ရှိသည့်အပြင် စီးပွားရေးလုပ်ငန်းရှင်များ၏ အဓိကအခန်းကဏ္ဍဖြစ်သည့် ကုန်စည်တစ်ခု ထုတ်လုပ်ရာတွင် အခန်း (၁၈)၊ ပုဒ်မ ၄၁ ထဲမှ ကုန်အညွန်းအမှတ်အသားဖော်ပြခြင်းအကြောင်း၊ ပုဒ်မ ၄၂ အကြောင်း၊ ပုဒ်မ ၄၃ အကြောင်း၊ ပုဒ်မ ၆၇ အကြောင်း၊ ပုဒ်မ ၆၈ အကြောင်း၊ ပုဒ်မ ၇၃ ထဲမှ စီးပွားရေး လုပ်ငန်းရှင် မည်သူမဆို ပုဒ်မ ၆၇ နှင့် ၆၈ တို့ပါ တားမြစ်ချက်တစ်ရပ်ရပ်ကို ဖောက်ဖျက်ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို နှစ်နှစ်ထက်မပိုသော ထောင်ဒဏ်ဖြစ်စေ၊ ကျပ် သိန်း ၂၀၀ ထက်မပိုသော ငွေဒဏ်ဖြစ်စေ ၊ ဒဏ်နှစ်ရပ်လုံးဖြစ်စေ ချမှတ်ရမည်ဖြစ်ကြောင်း၊ မြန်မာနိုင်ငံ စားသုံးသူကာကွယ်ရေးကော်မရှင် ညွှန်ကြားချက်အမှတ် (၂/၂၀၁၉)အကြောင်းနှင့် ဟင်းသီးဟင်းရွက်ဆီနှင့် စပ်လျဉ်း၍ ဝန်ကြီးဌာနက ထုတ်ပြန်ထားသော ညွှန်ကြားချက်အမှတ် (၁/၂၀၂၁) ပါ အကြောင်းအရာများကို အကျယ်တဝင့် ရှင်းလင်းဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)

        စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးတွင် ၂၀-၄-၂၀၂၃ရက်နေ့ (၁၃:၀၀) နာရီအချိန်တွင် ကရင်ပြည်နယ်ဦးစီးမှူး ဦးသန်းဦး ဦးဆောင်၍ ပြည်နယ်ရုံးရှိ ဌာနခွဲတာဝန်ခံများနှင့် ဝန်ထမ်းများနှင့်အတူ ဝန်ထမ်းစွမ်းဆောင်ရည်မြှင့်တင်ရေးအထောက်အကူပြု (Thursday Talk) ဆွေးနွေးပွဲ ကျင်းပခဲ့ကြောင်း သိရသည်။

      အခမ်းအနားတွင် ပြည်နယ်ဦးစီးမှူး ဦးသန်းဦးက စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များကိုလည်းကောင်း၊ ဌာနမှ တာဝန်ယူဆောင်ရွက်လျက်ရှိသော လုပ်ငန်းစဉ်များ၊ ရှေ့ဆက်လုပ်ဆောင်မည့်လုပ်ငန်းစဉ်များနှင့်ပတ်သက်၍လည်းကောင်း ရှင်းလင်းဆွေးနွေးခဲ့ပြီး စားသုံးသူအခွင့်အရေးများ အပြည့်အဝရရှိနိုင်ရန်၊ စားသုံးသူပြည်သူများ၏ နစ်နာဆုံးရှုံးမှုများအား အချိန်တိုအတွင်း ကုစားဖြေရှင်းပေးနိုင်ရန်အတွက် စားသုံးသူ သတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC) ကိုလည်း ဖွင့်လှစ်ထားလျက်ရှိကြောင်း၊ စားသုံးသူပြည်သူများ နစ်နာဆုံးရှုံးမှုနှင့် ကြုံတွေ့လာပါက စားသုံးသူတိုင်ကြားမှုများအပေါ် မည်ကဲ့သို့ ဖြေရှင်းဆောင်ရွက်မည့် နည်းလမ်းများကို ကုန်စည်နှင့် ဝန်ဆောင်မှု အမျိုးအစားအလိုက် အကျယ်တဝင့် ရှင်းလင်းဆွေးခဲ့ပြီး ယခုအခမ်းအနားတွင် ပြည်နယ်ဦးစီးမှူးပါ ဝန်ထမ်းစုစုပေါင်း (၁၄) ဦး တက်ရောက်ခဲ့ကြောင်းနှင့် အခမ်းအနားကို (၁၅:၀၀) နာရီအချိန်တွင် ရုပ်သိမ်းလိုက်ကြောင်း သတင်းရရှိပါသည်။

DOCA(ကရင်)